Ame ngöne lo macatre 1923, hetre ewekë ka saze ngöne la organizasio i Iehova, nge celë hi ka acatrene la cas ne la Itretre Ini Tusi Hmitrötr. Hnene la Ita Ne Thup hna nyiqan qejepengöne la itre xötr hna ithanatane ngöne lo icasikeu hna hëne ka hape, “Thith, Me Nyine Atrunyi Iehova.” Ketre, hnei angatre fe hna kuca la itre calendrier, me amë la itre xötr nyine e ngöne la wiik, memine la nyima nyine thing ngöne la hmi ne la fami, maine ini Tusi cas.

Ame ngöne la itre icasikeu cili, Itretre Ini Tusi Hmitrötr a qaja la hnei angatr hna melëne ngöne la hna cainöj, maine qaja atrunyi Iehova, maine nyima me thith. Öni Eva Barney, ketre trejine hna bapataison lo 1923, lo kola 15 lao macatre, ka hape: “Ame la ka pi qaja la hnei angeic hna melën, ke tro angeic a cil me hape: ‘Eni a pane pi olene koi Joxu la aqane lolo thiina i Nyidrë koi ni.’ ” Eje hi, tru catr ka pi hamë ithuecatr. Trejine Barney a qaja la ketre qatr trahmany, ketre trejine hi me easë, öni eahlo: “Ame trejine Godwin, ke tru la itre ewekë hnei nyidrë hna pi olene koi Joxu! Ngo ame la föi nyidrëti a öhne laka, qea palaha la hnei nyidrë hna ithanata, eahlo a nango hule ju la pune ikootre i nyidrë, ene pe, lapa hmaca ju hi nyidrë.”

Ame ngöne la itre ekalesia, ke hna kuca la itre icasikeu göi thith, me göi troa atrunyi Iehova. Ame ngöne la ca drai ne la treu, hna kuca la ketre icasikeu göi ithuecatr. Önine la Ita Ne Thup ne 1 Eiperem 1923 göne la icasikeu cili ka hape: “Ame la ketre igötranene la icasikeu, ke troa nue kowe la itre trejine troa qaja la itre hnei angatr hna melëne ngöne la hna cainöj, nyine ithuecatre kowe la itre xan. . . . Eahuni a mekune laka, tro la hna amekötine cili a acatrene la cas ne la itre trejin.”

Tru la thangane hna kapa hnene la itre xaa trejin qa ngöne la itre icasikeu cili. Celë hi hna qaja hnei Charles Martin, ketre ka huliwa (maine ka cainöj) ka 19 lao macatre, nge ka tru e Vancouver (Canada). Öni angeic: “Celë hi ka xatua ni troa ithanata kowe la itre atr ngöne la itre qëhnelö. Alanyimu la itre ka qaja la hnei angatr hna melëne ngöne la angatr a cainöj. Matre eni a nyitipune la aqane ithanata i angatr kowe la itre atr, me aqane elëhun angatr la itre mekun hna majemin qaja.”

Ame la itre “drai ne huliwa,” maine drai ne cainöj, ke ketre ewekë lai ka acatrene la cas  ngöne la organizasio i Iehova. Hane hi la hna amekötine ka mama ngöne la Ita Ne Thup ne 1 Eiperem 1923, kola hape: “Ame la ka troa acatrene la casi së ngöne la huliwa . . . , ke ame e Mardi 1 Mei 1923, ke tro asë hi së a cainöj. Nge celë hi hna troa kuca e nöjei pane Mardi ne la treu . . . Ame ngöne la itre drai cili, loi e tro la itre atrene la ekalesia a xomi ijine troa cainöj.”

Hna hane fe xome la huliwa cili hnene la itre jeunes. Öni Hazel Burford, ka 16 lao macatre lo ijine cili, ka hape: “Ame ngöne lai Bulletin, hna makën la itre aqane nyiqane ithanata, nge nyine tro eahun a inin gufan. a Ame la eni a cainöj me qaqaa, ke nyio a ce kuca la itre huliwa cili.” Ngo hna traqa la ketre jol koi trejine Burford. Öni angeic: “Hnene la ketre trejine qatr ka lolo thiina, hna sewe ni troa cainöj. Ame ngöne la ijine cili, ke tha nyipi trotrohnine kö la itre xan laka, tro asë hi la Itretre Ini Tusi Hmitrötr, “ite thupëtesiji me ite jajinyi” a atrune la Atre Xup Ka Sisitria. (Sal. 148:​12, 13) Ngo tha cile pi kö trejine Burford. Ame hë e thupen, hnei angeic hna sine la Ini Gileada, me mesinare e Panama. Nge hnene la itre trejine hna wenë amekötine la aqane mekune i angatr, me nue la itre jeunes troa hane sine la huliwa ne cainöj.

Hnene fe la itre asabele hna acatrene la casi ne la Itretre Ini Tusi Hmitrötr. Ame ngöne la itre xaa asabele, ke hetre drai ne cainöj, tune hi lo hna hën e thupen ka hape, “Bombardement spécial de Winnipeg.” Ame ngöne la asabele e Winnipeg (Canada), ke hna upe la itre ka sine la asabele, troa cainöj ngöne la traon lai 31 Maac. Kolo itre ijine lai kola nyiqane kökötr la nöje i Iehova. Ame hë lo 5 Ogas, ke traqa koi 7 000 lao atr ka sine la asabele e cili e Winniping. E cili hi lo asabele ka acasine la itre atr ka alanyim e Canada.

Ame la asabele ka ketrepengöne catr, ke kolo hna kuca e Los Angeles (Californie) lo 18 koi 26 Ogas 1923. Ame ngöne la itre wiik qëmeken, ke hnene la itre médias, hna qaja atrune la ijine cili, nge hnene la Itretre Ini Tusi hmitrötr hna hamëne la 500 000 nge hetre munën lao pepa ne ihë. Goi acatrene fe la  itre banderoles publicitaires ngöne la itre train me loto.

Ame hë lo Mecixen 25 Ogas, hnei trejin Rutherford hna cile fë la ketre cainöj, hna hape, “Itre Mamoe Me Nani.” Hnei nyidrë hna qaja ka hape, ame la itre “mamoe,” ke kolo itre atr ka thele la meköt, nge angatr hi lai ka troa mel ngöne la paradraiso e celë fen. Hnei nyidrëti fe hna tro fë la ketre cainöj, hna hape: “Hmeke Kö!” Nyidrëti a qajaqaja la itre aqane ujë ne la hmi ka thoi, me ithuecatr troa lötriji “Babulona atraqatr.” (Hna ama. 18:​2, 4) Matre ame hë e thupen, hnene la Itretre Ini Tusi Hmitrötre hna catre tro fë ngöne la fene hnengödrai, la itre milio lao tarak ka qaja la cainöj.

Ame hë lo drai tixenuë ne lai asabele, ke hnene la 30 000 lao atr hna drenge la cainöje i trejine  Rutherford, hna hape: “Itre Nöje a Tro Koi Amagedro, Ngo Tha Tro Kö a Mec La Milio Lao Atr.” Hnene la itre trejin hna loué la ketre ibatima kowe la asabele, ene la Colisée ne Los Angeles, hna hnyipi xupe hi. Ketre, hna huliwane la itre baffe ka tru matre drenge hnyawa hi angatr la itre cainöj. Ewekë lai ka hnyipixe ekö! Nge alanyimu fe la itre ka sine la porogaram cili ngöne radio.

Ame hë lo 1923, kola kökötre lolo la huliwa ne cainöj e Afrik, e Europe, Inde, me Amérique du Sud. Ame e Inde, hnei trejine Joseph Adavimannathu, hna hane ixatua göi troa kuca la itre itus qene Hindi, me Tamoul, me Telougou, me Ourdou. Nyidrëti a kuca la huliwa cili, me thupëne la fami nyidrë, ene la föi nyidrë me 6 lao nekö i nyidro.

Kolo fe a aja ixatua e Sierra Leone. Matre hnei trejine Alfred Joseph, me trejine Leonard Blackman, hna cinyanyi kowe la Lapa Ne Xomi Meköt e Brooklyn (New York). Ame hë lo 14 Eiperem 1923, ke kolo ha traqa la itre ka ixatua. Öni Alfred ka hape: “Ame lo heji lapa ne mecixen, hna ho la telefon.” Önine jë hi lai ka hë, a kola ithanata catr me hape: “Nyipëti lo ka cinyanyi koi Société Watch Tower troa sipo itre ka cainöj?” Öni Alfred e sa: “Öö, eni hi!” Önine hmaca ju hi lai trejin: “Nga, traqa ha ni!” Ame hi lai ka ithanata, ke trejine William Brown. Nyidrëti a traqa qa Antilles. Nge ce nyidrëti me föi nyidrë Antonia, me lue nekö i nyidroti jajiny, Louise me Lucy. Tha hmitre ju kö, nge kola traqa la itre trejin troa kepe angatr.

Öni Alfred: “Ame hë lo hmakany, tune lo hnei nyio hna majemin, eni me Leonard a kuca la ini Tusi nyio, nge traqa pi hi Trejin Brown. Pi  huliwa palaha nyidrë, matre nyidrëti fe hë a pi cile fë cainöj elanyi ju kö ngöne la icasikeu.” Tha ca treu ju kö, nge ase hë trejin Brown thawa la itre itus hnei nyidrë hna traqa fë. Nge traqa hmaca la 5 000 lao itus, nge tha hmitre ju kö nge pë fe hë. Matre loi e tro hmaca a komad. Nge tha ka salemë itusi pena kö nyidrë. Ame ngöne la itre macatre ne catre huliwa nyidrë koi Iehova, hnei nyidrëti palahi hna huliwane la Tusi Hmitrötr ngöne la itre cainöje i nyidrë. Matre hna ati ëje i nyidrë ka hape, Brown Tusi Hmitrötr.

Ame ngöne la ijine cili, kola öhne laka, coco palaha la Bethela ne Allemagne e Barmen. Ketre, easenyi hë troa thapa la traone cili hnene la musi Faras. Ame e thupen, hnene la Itretre Ini Tusi Hmitrötr hna öhne la ketre batima e Magdebourg, nge ka ihmeku hnyawa memine la hnei angatr hna ajan. Ame hë lo 19 Juun, hnene la itre atrene la Bethela hna xom la itre matériels ne feja itus, me itre meubles me fek a tro cili. Ame hë la kola thuemacane la Lapa Ne Xomi Meköt ka hape, ase hë xom asë la itre ewekë ne la Bethela qa Barmen a tro Magdebourg, itre médias a ithuemacanyi laka, hna thapa la traon e Barmen hnene la musi Faras. Öhne hi la itre trejin ne la Bethela ka hape, hnei Iehova hna amanathithi angatr, me thupë angatr.

Ame e Brésil, hnei trejine George Young, ketre trejine ka majemine tro ngöne la itre xaa nöj troa cainöj, hna acile la ketre filial. Nge hnei nyidrëti hna nyiqane fejane la Ita Ne Thup ngöne la qene portugais. Itre treu thupen, nyidrëti fe hë a tro fë la 7 000 lao itus. Hna xatua Sarah Ferguson hnene la traqa i nyidrë e Brésil. Nyiqan e hë eahlo la itre Ita Ne Thup, qane lo macatre 1899. Ngacama ase hë eahlo nue mel koi Iehova, ngo pëkö ka bapataiso eahlo. Matre itre treu thupen, hna bapataiso trejine Ferguson, me 4 lao nekö i eahlo.

Ame ngöne la Ita Ne Thup ne 15 Diseba 1923, kola qaja la itre thangane ka loi ne la huliwa ne la Itretre Ini Tusi Hmitrötr, me itre trengecatr hna nue matre acatrene la cas ngöne la nyipi hmi. Kola hape: “Mama hnyawa hi laka, lolo catr la itre ekalesia . . . Heetrëne jë la iheetre ne isi, nge catre jë huliwa ngöne la macatre ka troa xulu. Haawe, madrine jë, nge the cile kö!”

Ame la macatre thupen, ke ketre macatre lai ka ketrepengöne kowe la Itretre Ini Tusi Hmitrötr. Itre trejine ne la Bethela a catre huliwa ngöne la hnë xupi uma e Staten Island. Tha nanyi kö la Hnalapa Ne Xomi Meköti e Brooklyn. Hna afenesine la huliwa ne xupi uma, ngöne lo itre pane treu lo 1924. Celë hi ka acatrene la cas ne la Itretre Ini Tusi Hmitrötr, me xatua angatr troa cainöjëne la maca ka loi jëne la itre xaa aqane huliwa.