Ame ngöne lo 40 lao macatre ne lapa hnapapa hnene la angetre Isarala, ke mana la pane xen i angatr. (Eso. 16:35) Ketre, hnei Iehova mina fe hna alua thue öni angatr waco. (Eso. 16:​12, 13; Num. 11:31) Nge hetre itre xaa xen ngöne la ijine cili, ngo tha tru menu kö.

Eje hi, ame ekö, ke hnei Iehova hna majemine troxome la nöje i Nyidrë kowe la itre “hnamano,” gaa hetre xen me tim. (Num. 10:33) Tune hi e Elima. Hetrenyi e cili, ‘la 12 lao qeqe ne tim, me 70 lao palmiers,’ ma kolo jë lo itre palmiers ka hamë wene dat. (Eso. 15:27) Kola qaja ngöne la ketre itus (Plants of the Bible) ka hape, ame la itre palmiers ka hamë wene dat, ke “hetrenyi fe ngöne la itre xaa nöj, . . . nge celë hi sinöe ka sisitria ngöne la hnapapa, ke ka hamë xen, me oel, nge gaa xapo kowe la itre milio lao atr.”

Ma hnene jë fe la angetre Isaraela hna pane cil ngöne la oasis ka tru, lo hna hëne enehila ka hape, Feiran ngöne la hnathup ne Feiran. a Önine la ketre itus (Discovering the World of the Bible) ka hape, ame la etrun ej, ke, “130 km la eqean, nge ketre hnathupe hi lai ka tru, ka mingöming nge hna atre hnyawa ngöne la Wetr e Sinai.” Önine hmaca jë la itus: “Maine tro la ketre atr a trongëne la 45 lao kilomet qa cili, tro angeic a traqa ngöne la Oasis e Feiran. Ame lai oasis cili ke, ej ngöne la 610 lao mètre e koho hun la hnagejë, nge 4,8 lao kilomet la eqean. Tru catr hnei itre palmiers e cili, nge ka mingöming matre kola aceitunë ej memine la hlapa e Edrena. Qane ekö, tiqa catr hnei trenyiwa ka tro cili ke, tru catr la itre palmiers ka hamë wene dat.”

Ame lo angetre Isaraela a tro qa Aigupito, ke hnei angatr hna xometrongën la itre pâte, me itre nyine lepe farin, nge ma hnei angatr fe hna xome la itre céréales, me oel. Eje hi, ame la itre xeni cili, ke ka canga pë. Nge goi xometrongëne fe angatr “la itre mamoe trahmany me kau trahmany, nge nyimutre catr la itre öni angatr.” (Eso. 12:​34-​39) Nge pine laka, jole catr la mele ngöne la hnapapa, matre tru hë la itre öni ka mec. Ame la itre xan, ke hna öni hnene la nöj, maine hna huujëne koi Iehova me kowe la itre idrola. b (Itre hu. 7:​ 39-​43) Ketre, angetre Isaraela a axö öni ke, hna ameköti angatr hnei Iehova pine pë lapaun. Öni Nyidrë: “Tro la itre nekö i epuni trahmanyi a axö mamoe ngöne la hnapapa koi 40 lao macatre.” (Num. 14:33 NWT) Hnene la itre öni angatr hna hamë melek me miitr, ngo tha ijije kö troa thuane la 3 milio lao atr ngöne la 40 lao macatre. c

Ekaa la gaa hetre tim me xen kowe la itre öni? d Ame ngöne la hnapapa ekö, ke ka mani lapa, matre tru catr la hnitr. Ame ngöne la itus Étude perpicasse des Écritures, kola qaja ka hape, ame ekö e Arabie, a 3 500 lao macatre enehila ke, “tiqa catr hnei tim hune enehila. Eje hi, qaqacile hë la itre hnaop, me itre jë i tim ne rivière, ke tha mani hmaca kö tun ekö.” Nyipici laka, ame ngöne la hnapapa, ke tha tru kö hnei tim. (Deu. 8:​14-​16) Matre e tha thue ime i angatr ju hnei Iehova jëne la itre iamamanyikeu, tro hë angatr a ce mec me itro öni angatr.​—Eso. 15:​22-​25; 17:​1-6; Num. 20:​2, 11.

Hnei Mose hna qaja kowe la angetre Isaraela ka hape, hnei Iehova hna thua i angatr mana, matre tro angatr a atre ka hape: “Ame la atr, tha angeice kö a mele hnei falawa hmekuje hi, ngo hnene la nöjei trengewekë hna qaja hnei Iehova.”​—Deu. 8:3.