1. Nemene la aqane aegöcatren Akötresie la itre hlue i Nyidrë ekö?

 HNEI Tusi Hmitrötr hna qaja la itre xaa hlue i Akötresie ka tru trengecatr. Ngo hnei angatre fe hna hane pë trengecatr. Tui Dravita Joxu, ka catr angeic tune la wetr, ngo ame itre xaa ijin, angeic a “shesheu.” (Sal. 30:7) Ngacama atr ka catr Samasona, ngo öni angeic, e patre hë la uati hmitrötre i Iehova, ke tro fe a ‘patr thei angeic la egöcatr, nge tro angeic a kucakuca tune la nöjei atr.’ (A. ame. 14:​5, 6; 16:17) Lue ka catr nyidro, ke Iehova la ka hamë trengecatr koi nyidro.

2. Hnauëne la Paulo a qaja ka hape, ame la angeic a kucakuca, kolo fe hi a tru la trengecatre i angeic? (2 Korinito 12:​9, 10)

² Öni Paulo aposetolo ka hape, nyipiewekë fe koi angeic la mene i Iehova. (E jë la 2 Korinito 12:​9, 10.) Tui easë, hna hane tithi Paulo fe hnene la itre sine mec. (Gal. 4:​13, 14) Ame itre xaa ijin, angeice fe a isine troa kuca la loi. (Rom. 7:​18, 19) Nge angeice fe a seseu me luelu. (2 Kor. 1:​8, 9) Ngo ame la Paulo a kucakuca ke, kolo hi a tru la trengecatre i angeic. Pine nemen? Pine laka Iehova a hamë angeic la trengecatre ka ijij. Nyidrë a aegöcatrenyi angeic.

3. Nemene la lue hnying hne së hna troa sa ngöne la tane mekune celë?

³ Ase hë Iehova qaja ka hape, tro Nyidrëti a aegöcatrenyi së. (1 Pet. 5:​10) Ngo tha tro kö Nyidrëti a xatua së e pëkö hne së hna kuca. Hane hi la ketre ceitun: tro la loto a ulil e hetre motör. Ngo tro ej a nyinyape e tro la ka xomi loto a waja la accélérateur. Ketre tun, aja i Iehova troa hamë  trengecatre së, ngo hetre ewekë nyine tro sa kuca. Nemene la hnei Iehova hna hnëkën, ka troa hamë trengecatre së? Nemene la nyine tro sa kuca matre kapa la men qaathei Nyidrë? Tro sa ce wang la aqane aegöcatrene Iehova la köni hlue i Nyidrë ekö, ene Iona perofeta, Maria thine i Iesu me Paulo aposetolo. Tro fe sa ce wang la aqane aegöcatrene Nyidrë la itre hlue i Nyidrë enehila.

4. Tro sa kapa tune kaa la mene i Iehova?

⁴ Ame la ketre aqane tro sa kapa la men qaathei Iehova ke, ene la tro sa thith. Nge tro Iehova a hamë së la “men atraqatr.” (2 Kor. 4:7) Ketre, tro fe a aegöcatrenyi së e tro sa e la Tusi Hmitrötr me lapa mekun. (Sal. 86:​11) Ame la maca hnei Iehova hna qatreng e hnine la Tusi Hmitrötr ke, ka “mene.” (Heb. 4:​12) Maine tro epuni a thith me e la Tusi Hmitrötr, ke tro epuni hi lai a kapa la trengecatr ka ijij matre xomihni, me madrin, me kuca la ketre hnëqa ka tru. Tro sa ce wang la aqane aegöcatrenyi Iona hnei Iehova.

5. Pine nemene matre Iona a aja ixatua?

⁵ Hnei Iona perofeta hna aja ixatua. Hnei angeic hna kötrene la hnëqa hnei Iehova hna athip koi angeic. Maine ju, meci hë Iona me itre ka ti he me angeic hnene la ketre wene ka catr. Ame la kola kuië angeic e kuhu hnagejë, hna ulumi angeic hnene la ketre ie ka tru. Traqa pi angeic ngöne la ketre götrane gaa mit hnei angeic hna thatre, e kuhu hni ne la ie ka tru. Tune kaa Iona la ijine cili? Angeice kö a mekun ka hape, traeme ne tro hë angeic a mec? Ma angeice jë a mekune ka hape, ase hë nuetriji angeic hnei Iehova. Tru catr la hna seseu hnei Iona.

6. Thenge la Iona 2:​1, 2, 7, nemene la ka aegöcatrenyi Iona e kuhu hni ne la i?

⁶ Nemene la hnei Iona hna kuca matre kapa la trengecatre i Iehova e kuhu hni ne la i? Hnei angeic hna pane thith. (E jë la Iona 2:​1, 2, 7.) Ngacama hnei Iona hna tha idrei, ngo xecie koi angeic laka, tro Iehova a dreng me kapa la thithi angeic. Ketre, hnei Iona hna lapa mekun la itre xötr hnei angeic hna e ekö. Pine nemene matre easa qaja tune lai? Ame ngöne la thithi angeic ka mama ngöne Iona mekene 2, ke hetre hnëewekë me itre trengewekë hna xom qa ngöne la itre Salamo. (Wange ju la Iona 2:​2, 5 memine Salamo 69:1; 86:7.) Eje hi, atre hnyawa hi Iona la itre xötre cili. Ame la angeic a lapa mekun la itre xötre celë e kuhu hni ne la i, ke xecie pi hi koi angeic laka, tro kö Iehova a xatua angeic. E thupen, hnei Iehova hna amele Iona, nge hetre aja i angeice hë troa kuca la hnei Iehova hna upi angeic.​—Iona 2:⁠10–​3:4.

7-8. Nemene la hna kuca hnene la ketre trejin qa Taïwan matre hetre trengecatr?

⁷ Tro la tulu i Iona a xatua së troa cil kowe la itre itupath. Ame Zhiming, b ketre trejin qa Taïwan, ke hna tith nyidrë hnene la itre mec ka tru. Ketre, itre fami nyidrë a icilekeu pine nyidrë Temoë Iehova. Nyidrë a kapa la ixatua qaathei Iehova jëne la thith, me jëne la hna ini Tusi cas. Öni nyidrë, “Ame la kola traqa la itre jol, tru palaha la hnenge hna seseu matre thatreine kö ni ini Tusi cas.” Ngo nyidrëti a thele ixatua thei Iehova. Öni nyidrë, “Eni a pane thith, e thupen, eni a amë la itre écouteurs me dreng la itre nyima ne Baselaia. Ame itre xaa ijin, eni a nango nyima hmidran matre tingetinge pi la hning. Thupene lai, eni ha ini Tus.”

 ⁸ Jëne la ini Tusi cas, hnei Zhiming hna kapa la trengecatre matre elëhune la itre jol ka traqa koi nyidrë. Thupene la kola ase xöji nyidrë, hna thuemacanyi nyidrë hnene la ketre infirmière ka hape, tha tru kö hnei globules rouges i nyidrë matre loi e tro nyidrë a xomi madra. Ame lo jidr qëmekene troa xöji nyidrë hmaca, hnei nyidrë hna e la hna melën hnene la ketre trejin föe ka hane melën lai jol cili. Tru ju kö la globules rouges i Zhiming hui eahlo, ngo tha hnei eahlo kö hna xomi madra. Ame enehila ke, egöcatre hë eahlo. Celë hi ka xatua Zhiming troa catre mele nyipici.

9. Maine epuni a seseu pine la ketre jol, nemene la nyine tro epuni a kuca? (Goeëne ju fe la itre iatr.)

⁹ Ame la kola traqa koi epun la itre jol, epuni kö a seseu utihë la thatreine hë epun thith? Maine pë pena trengecatre i epun troa ini Tus? Trotrohni epuni hi hnei Iehova. Matre e hopatre ju hë la thithi epun, ngo tro kö Iehova a hamë epun la ka nyipiewekë. (Efe. 3:​20) Maine epuni a wezipo, maine kucakuca, nge thatreine hnyawa ha epun e me ini Tus ke, ijije hi tro epuni a dreng la itre enregistrement audio ne la Tusi Hmitrötr, me itre itusi së. Maine pena, drenge ju la itre nyima me itre video ngöne jw.org. Ame la easa thithi koi Iehova me thele ixatua ngöne la Tusi Hmitrötr me itre itusi së, ke easë hi lai a thele trengecatre thei Nyidrë.

10. Tune kaa la aqane aegöcatrenyi së hnene la itre trejin ne la ekalesia?

¹⁰ Ijije hi tro Iehova a aegöcatrenyi së jëne la itre trejin ne la ekalesia. Angatr a “akeukawanyi” së la easa cil kowe la ketre jol, maine ngöne la easa xom la ketre hnëqa ka tru. (Kol. 4:​10, 11) Ka nyipiewekë catr troa hetre sinee “ngöne la [ijine] aköte.” (Ite edomë 17:17) Ame la easa kucakuca, itre trejin a hamë së la ka nyipiewekë, me akeukawanyi së, me xatua së troa catre mele nyipici koi Iehova. Tro sa ce wang la aqane aegöcatrenyi Maria, thine i Iesu hnei itre xan.

11. Pine nemene matre Maria a aja ixatua?

¹¹ Hnei Maria hna aja ixatua. Pane mekune jë la xou i Maria la Gaberiela a  ahnith koi angeic la ketre hnëqa ka tru. Tha ka faipoipo pala kö angeic, ngo tro angeic a upune. Ketre, thatreine kö angeic hetru nekönatr, nge kolo pena upi angeic troa hetrune la nekönatr ka troa Mesia epin. Nge tha ka ce meköle palakö Maria me trahmany, matre tro angeic a qejepengöne tune kaa koi Iosefa la ewekë cili?​—Luka 1:​26-​33.

12. Thenge la Luka 1:​39-​45, nemene la ka aegöcatrenyi Maria?

¹² Nemene la ka xatua Maria troa kapa lai hnëqa ka tru cili? Hnei angeic hna sipo ixatua koi itre xan. Hnei angeic hna pane sipo Gaberiela troa hamën la itre xaa ithuemacanyi göne la hnëqa cili. (Luka 1:​34) Thupene lai, hnei angeic hna “tro kowe la itre wetr” e Iudra matre iöhnyi me Elisabeth, sinee i angeic. Tru la ixatua hnei angeic hna kapa. Hnei Elisabeth hna pane felisite Maria, nge hnei Iehova hna upi eahlo troa qaja la ketre hna perofetan göne la nekönatr hna upunen. (E jë la Luka 1:​39-​45.) Öni Maria, “Hnei [Iehova] hna kuca la itre huliwa ka men hnene la ime i nyidrë.” (Luka 1:​46-​51) Jëne la ixatua i Gaberiela me Elisabeth, hnei Iehova hna aegöcatrenyi Maria.

13. Nemene la ka traqa la kola sipo ixatua kowe la itre trejin hnene la ketre trejin föe ne Bolivie?

¹³ Tui Maria, ijije hi troa hamë trengecatre së hnene la itre trejin. Hnei Dasuri, ketre trejin föe qa Bolivie, hna aja ixatua. Hna tith la keme i angeic hnene la ketre mec ka pë nyin. Matre ame la nyidrë a lö e pital, tru la aja i Dasuri troa thupë nyidrë. (1 Tim. 5:4) Tha ka hmaloi kö. Öni angeic, “Ame itre xaa ijin, thatreine hë ni.” Hnei angeic kö hna sipo ixatua? Waea. Öni angeic, “Ame lo xötrei, xele kö ni ma ajolëne la itre trejin. Ame koi ni, tro kö Iehova a hamëne la ixatua ka ijij. Ngo hnenge hna öhne laka, ame la eni a iananyi memine la itre trejin, ke eni hi lai a thel troa thue casine la jol.” (Ite edomë 18:1) Matre hnei Dasuri hna cinyanyi kowe la itre sinee i angeic, me qaja koi angatr la hnei angeic hna melën. Öni angeic, “Thatreine kö ni troa qaja la aqane aegöcatrenyi ni hnene la itre trejine cili. Hnei angatr hna traqa fë xen e pital me ce thawa me ni la itre xötr ka iakeukawany. Tha aqane madrine kö ni ke, tha eni casi kö. Easa sine la fami Iehova, ketre fami ka itöixatua, me ka ce treije me easë, nge ka catre nyihlue i Iehova.”

14. Hnauëne la tro sa kapa la ixatua qaathene la itre qatre thup?

¹⁴ Ame la ketre aqane aegöcatrenyi së hnei Iehova, ke jëne la itre qatre thup. Angatr la itre ahnahna hnei Nyidrëti hna hamë së matre thue trengecatr me akeukawanyi së. (Is. 32:​1, 2) Matre ame la epuni a seseu, ke the cile kö troa thele ixatua thene la itre qatre thup. Canga kapa ju la ixatua hna hamën hnei angatr. Jëne angatr, tro Iehova a hamë trengecatr koi epun.

15. Nemene la mejiun ne la itre keresiano?

¹⁵ Tro la mejiune së qa hnine la Tusi Hmitrötr a hamë trengecatr koi së. (Rom. 4:​3, 18-​20) Ame easë itre keresiano, easa mejiun troa mele palua ngöne la paradraiso e celë fen, maine ngöne la Baselaia e hnengödrai. Tro la mejiune së a xatua së troa xomihnine la itre jol, me catre cainöj, me xom la itre xaa hnëqa ngöne la ekalesia. (1 Thes. 1:3) Celë fe hi ka hamë trengecatr koi Paulo.

16. Hnauën la Paulo a aja ixatua?

 ¹⁶ Paulo a aja ixatua. Ame ngöne la tusi Korinito, Paulo a aceitunë angeic memine la trengene iengen ka kaqakaqa. Hna öj, me “axösisi” angeic, nge hnei angeic hna “luelu” me “kei.” Ketre, anyimua qëmek angeic kowe la mec. (2 Kor. 4:​8-​10) Hnei Paulo hna cinyanyine lai ngöne la hnaakönine tronge i angeic troa mesinare. Nge thupene lai, hnei angeic hna cil kowe la itre xaa jol hmaca kö. Hna lepi Paulo hnene la ka alanyim, me othi angeic, me akalabusi angeic, goi lö fe la he hnei angeic hna tith.

17. Thenge la 2 Korinito 4:​16-​18, nemene la ka xatua Paulo troa xomihnine la itre jol?

¹⁷ Hetre trengecatre i Paulo troa xomihnine la itre jol, ke ka mel la mejiune i angeic e kuhu hni angeic. (E jë la 2 Korinito 4:​16-​18.) Öni angeic kowe la angetre Korinito ka hape, ngacama kola “hnyiqetre la ngönetrei” angeic, ngo tha tro kö angeic a kucakuca. Hnei Paulo hna lapa mekun la mele i angeic elany. “Atraqatr” koi Paulo la mejiune i angeic troa mel e hnengödrai matre ame koi angeic, ka pë pengöne la itre jol hnei angeic hna melën. Paulo a lapa mekun la mejiune i angeic matre ‘o drai, kolo pala hi a ahnyipixene la hni me mekuna i angeic.’

18. Tune kaa la aqane thuecatre Tihomir me fami angeic hnene la mejiune i angatr?

¹⁸ Kola thuecatr Tihomir, ketre trejin qa Bulgarie, hnene la mejiune i angeic. Itre macatre hë enehila ne aksida me mec la jini angeic, Zdravko la ëjen. Tru catr la akötre i Tihomir. Matre hnei angeic me föi angeic memine la nekö i nyidro hna thel troa lapa mekun la ijine troa amelene hmaca la itre ka mec. Öni angeic: “Eahuni a qaja la götrane hnei eahun hna troa iöhnyi me Zdravko, me itre xen hnei eahun hna troa hnëkën, me itre atr hnei eahun hna troa hën matre ce xen me angeic. Tro fe eahun a qejepengöne koi angeic la itre drai ne la pun.” Tihomir a qaja ka hape, ame la angeic me fami angeic a lapa mekun la mejiune i angatr, ke kola xatua  angatr troa xomihnin la itre jol me lapa treqene la ijin tro Iehova a amele Zdravko.

19. Tro sa acatrene tune kaa la mejiune së? (Wange ju fe la iatr.)

¹⁹ Tro sa acatrene tune kaa la mejiune së? Maine epuni a mejiune troa mele palua e celë fen, ke e jë la aqane qejepengöne Tusi Hmitrötr la paradraiso, nge lapa mekune jë. (Is. 25:8; 32:​16-​18) Lapa mekune jë la mele i epun ngöne la fene ka hnyipixe. Drei la hnei epun hna öhn? Nemene la hnei epun hna dreng? Tune kaa epun e cili? Maine tro epun a goeëne la itre foto ne paradraiso ngöne la itre itusi së me goeëne la itre video tun la hna hape, Le monde nouveau, me E Cili Hi Ezi Eö, maine Imagine ce jour, tro lai a xatua epun troa lapa mekun la ijine cili. E ka xeci e kuhu hni së la mejiune së, ke tro sa öhne laka, “tha cile palua kö la itupath nge ka hmaloi hi.” (2 Kor. 4:​17) Jëne la mejiune qaathei Iehova, Nyidrëti a aegöcatrenyi së.

20. Ame la easa kucakuca, tro sa hetre trengecatr tune kaa?

²⁰ Ame la easa kucakuca, ‘Akötresie la ka hamë trengecatr.’ (Sal. 108:13) Ase hë Iehova hnëkëne koi së la itre ewekë ka troa xatua së troa kapa la trengecatr qaathei Nyidrë. Matre ame la kola hamë së la ketre hnëqa, maine easa cil kowe la ketre jol, maine kola pë madrine së, ke thithi jë koi Iehova, nge thele ixatua jë ngöne la epuni a ini Tusi cas. Kapa ju la ixatua qaathene la itre trejin. Lapa mekune jë la mejiune i epun koi elany. Ame e cili, “tro la men atraqatr i Akötresie a aegöcatrenyi nyipunie, matre atreine jë nyipunie cile hut, me itreqe, me madrin.”​—Kol. 1:​11.