TANE MEKUN 43
NYIMA 90 Itö Ithuecatre Jë Së
Aqane Tro Sa Lepetrij La Luelu
“Waipengöne hnyawa ju la enyipicine la nöjei ewekë asë.”—1 THES. 5:21.
MEKUN KA TRU
Tro sa ce wang la aqane tro sa elë hun la luelu ka troa sewe së troa huliwa catr koi Iehova.
1-2. (a) Nemene la itre mekun ka troa ajolëne la itre hlue i Iehova? (b) Nemene la hne së hna troa ce wang ngöne la tane mekun celë?
JEUNE ju hë së maine qatr, ngo hna traqa koi së asë la luelu. a Maine jë, tro la ketre jeune a hnying ka hape, ‘Iehova kö a nyipiewekë ni?’ Nge celë hi ka sewe angeic troa xomi bapataiso. Maine pena, ketre trejin ka thupëtresij a hace fë la mekun hnei angeic hna xom ekö, ene la troa amë panëne la Baselaia hune la troa huliwa i maseta. Nge ame hë enehila, tha ijije kö la manie matre troa thupën la fami i angeic. Maine ketre trejine föe ka qatre hë, eahlo a hleuhleu, ke tha ijiji eahlo hmaca kö troa huliwa koi Iehova tun ekö. Hnei eö kö hna hane hnying ka hape: ‘Ka nyipiewekë kö ni koi Iehova? Ka hetre thangane kö la itre trengecatr hnenge hna nue koi Nyidrë? Hapeu, Nyidrëti pala hi a wangatrune la itre huliwang enehila?’
2 Maine pëkö hne së hna kuca, tro la itre mekun cili a angazone la aqane imelekeu së me Iehova. Ame ngöne la tane mekun celë, tro sa ce wang la itre trepene meköt ka troa xatua së, e easa mekun ka hape (1) tha Iehova kö a nyipiewekë së, (2) easa hace fë la itre mekun ka lolo hne së hna axeciën ekö, nge (3) tha Iehova kö a wangatrune la itre huliwa së enehila.
AQANE TROA LEPETRIJ LA LUELU
3. Tro sa apatrene tune kaa la itre mekun ka iajolë?
3 Ame la ketre aqane troa apatren la itre mekun cili, ke ene la troa thele la mekuna i Akötresie ngöne la Tusi Hmitrötr. Maine celë hi hne së hna kuca, troa catr la lapaune së, memine la imelekeu së me Iehova. Nge tro së lai a atreine “cile hut ngöne la lapaun.”—1 Kor. 16:13.
4. Nemene la aqane tro sa “waipengöne hnyawa la enyipicine la nöjei ewekë asë”? (1 Thesalonika 5:21)
4 E jë la 1 Thesalonika 5:21. Tusi Hmitrötr a upi së troa “waipengöne hnyawa la enyipicine la nöjei ewekë asë.” Troa tune kaa? Troa waipengöne la itre mekuna së memine la hna qaja hnei Tusi Hmitrötr. Tro sa ce ithanatan lo jeune ka hnying ka hape, ‘Ka nyipiewekë kö ni koi Akötresie?’ Ka loi kö tro angeic a lapa fë la hnyinge i angeic? Waea, nyipiewekë tro angeic a “waipengöne hnyawa la enyipicine la nöjei ewekë asë,” ene la troa thel la mekuna i Iehova.
5. Tro sa “drei” Iehova tune kaa?
5 Ame la easa e Tusi Hmitrötr, easë hi lai a “drei” Iehova ithanata koi easë. Ngo maine aja i easë troa atre la mekuna i Nyidrë, loi e tro sa nue trengecatr. Nyipiewekë tro sa thel me sine ajuine la itre xötr ka ihmeku memine la jol ka eje the së. Matre loi e tro sa huliwan la itre jia ne huliwa nyine ithel hna hamën hnene la organizasio i Iehova. (It. Ed. 2:3-6) Loi e tro sa sipo Iehova troa xatua së la easa ithel, matre tro sa trotrohnine la aqane waiewekë i Nyidrë. Loi e tro sa thel la itre trepene meköt ka ihmeku memine la jole së, me kapa hnyawan la itre eamo ka troa xatua së. Ketre, catre jë së xomi ini qa ngöne la itre hna melën hnene la itre hlue i Iehova hna qaja ngöne la Tusi Hmitrötr, ka hane cile fe kowe la jol hne së hna melën.
6. Kola xatua së tune kaa hnene la itre icasikeu?
6 Easë fe a “drei” Iehova ngöne la itre ijine icasikeu. Matre loi e tro sa sine lapan la itre icasikeu. Ame ngöne la itre ijine cili, tro la ketre cainöj maine ketre mekun hna hamën, a xatua së troa cil kowe la jol hne së hna melën. (It. Ed. 27:17) Tro pena sa ce wang la aqane tro sa lepetrij la itre xaa mekun ka ajolë së.
E EÖ A LUELU LAKA KA NYIPIEWEKË EÖ KOI IEHOVA
7. Nemene la hna hnyingëne hnei itre xan?
7 Hnei eö kö hna hane hnying ka hape, ‘Iehova kö a nyipiewekë ni?’ Maine eö a mekun ka hape, ka pë hnënyöngön eö, nga tro eö a nyisineen tune kaa la Atre Xup la hnengödrai me fene hnengödrai? Ma eje fe hi lai hna mekun hnei Dravita joxu. Dravita a hain laka, Iehova a wangatrune la itre nekö i atr, matre angeice pa hnyinge jë ka hape: “Iehova fe, ka ue la atr matre tro nyipëti a wangatrun, memine la nekö i atr matre tro nyipëti a thupën?” (Sal. 144:3) Kola sa ekaa la hnyinge celë?
8. Thenge la 1 Samuela 16:6, 7, 10-12, nemene la hnei Iehova hna öhne the së?
8 Tusi Hmitrötr a amamane ka hape, Iehova a nyipiewekëne la itre atr hna wangacon. Pane mekune jë lo ijine Iehova a upi Samuela koi Iese, troa siën la ketre nekö i angeic matre troa joxu ne Isaraela. Hnei Iese hna traqa fë la 7 lao nekö i angeic trahmany koi Samuela, ngo tha traqa sai Dravita kö, lo wene punen. b Ngo Dravita pe lo hnei Iehova hna iën. (E jë la 1 Samuela 16:6, 7, 10-12.) Hnei Iehova hna öhne la sipu pengöi Dravita laka, ketre nekötrahmany ka hnimi Nyidrëti catr.
9. Pine nemene matre loi e troa xecie koi eö laka, Iehova a nyipiewekë eö? (Wange ju la iatr.)
9 Ase hë Iehova amamane ka hape, Nyidrëti a nyipiewekë eö. Tune kaa? Pane mekune jë la: Nyidrëti a hamë eö la itre eamo ka ihmeku hnyawa memine la jol hnei eö hna melën. (Sal. 32:8) Tha kolo kö lai a amamane ka hape, atre eö hnyawa hi hnei Nyidrë? (Sal. 139:1) Maine tro eö a trongëne la itre eamo i Nyidrë, tro eö a öhne laka, ka hetre thangan itre ej. Nge tro ha xecie koi eö laka, Nyidrëti a wangatrunyi eö. (1 Aq. Jo. 28:9; It. Hu. 17:26, 27) Öhne hi Iehova la itre trengecatre hnei eö hna nu. Atre hi Nyidrëti la nyipi pengöi eö memine la itre thiina ka lolo ka eje thei eö. Nge aja i Nyidrë troa nyisinee i eö. (Iere. 17:10) Ketre, aja i Nyidrëti fe tro eö a nyisinee i Nyidrë.—1 Ioa. 4:19.
“E tro eö a thele [Iehova], tro hë nyidrëti a mama koi ö.”—1 Aq. Jo. 28:9 (Wange ju la paragarafe 9) c
E EÖ A LUELU PINE LA ITRE MEKUN HNEI EÖ HNA AXECIËN EKÖ
10. Ame la easë hmaca a mekun la itre aqane axecië mekune së ekö, nemene la itre hnyinge së?
10 Maine jë, tro itre xan a hnying ka hape, ‘Ame lo itre mekun hnenge hna xom ekö lo eni a jeune, ke ka loi kö?’ Ame la itre xan, hnei angatre hna nue la huliwa i angatr hna nyithupene hnyawan maine entreprise i angatr, matre catre nyihlue i Iehova. Ngo ame enehila, thupene la itre macatre, angatr a öhne la itre xan ka iën troa huliwa i maseta, a hetre mani me mele ka loi. Matre angatre ha hnying ka hape: ‘Ka loi kö la mekun hnenge hna xom ekö troa huliwa i Iehova? Tha hnenge kö hna aluzi traem?’
11. Nemene la ka ajolën la atre cinyihan la Salamo 73?
11 Maine eö fe a hane mekun tun, ke pane mekune jë la atre cinyihan la Salamo 73. Ame la angeic a öhne la mele ne la itre xan, ke kösë lo angatr a mele ka loi, me tingeting, nge tha ka hnehengazo kö. (Sal. 73:3-5, 12) Ame la angeic a goeë angatr, ke ame koi angeic, ka gufa la itre huliwa hnei angeic hna kuca koi Iehova. Angeic a dekurag, nge ‘o drai, angeic a hnehengazo.’ (Sal. 73:13, 14) Nemene la ka xatua angeic troa lepetrij la itre mekune cili?
12. Thenge la Salamo 73:16-18, nemene la aqane lepetrij la atre cinyihan la Salamo, la itre mekun ka iajolë?
12 E jë la Salamo 73:16-18. Hnene la atre cinyihan la Salamo hna tro kowe la uma ne hmi i Iehova. Ame hë la angeic a traqa e cili, ke kolo ha lolo trootro la itre mekuna i angeic. Trotrohnine hi angeic laka, ame lo itre ka mele ka loi enehila, ke pëkö mejiune i angatr kowe la itre drai elany. Celë hi ka amamane koi angeic laka, ka nyipiewekë catre kö troa amë panëne la itre huliwa i Iehova. Tingetinge hmaca ha angeic, nge xecie koi angeic tro pala hi a catre huliwa i Iehova.—Sal. 73:23-28.
13. Nemene la ka troa xatua eö troa tingeting, e eö a mekun ka hape, tha ka loi kö la itre mekun hnei eö hna axeciën ekö? (Wange ju la iatr.)
13 Ijije hi tro la Tusi Hmitrötr a xatua eö tro hmaca a tingeting. Tune kaa? Pane mekune jë la itre hnei eö hna hetreny enehila, memine la itre trengamo hnei eö hna xawan e hnengödrai. Nge waipengöne jë la mele i eö memine la mele ne la itre atr ka tha nyihlue i Iehova kö. Itre atr a isine troa hetre mele ka loi enehila, ke eje pe hi lai hnei angatr hna hetreny. Ngo ame kö eö, tro kö Iehova a nenge la manathith hune la hnei eö hna mekun. (Sal. 145:16) Pane mekune jë la: Tune kaa fe la mele i eö enehila, e hnei eö ju hna xom la ketre mekun? Thatre kö së. Ngo ame la hne së hna atre, ke ame la atr ka axecië mekun thenge la ihnim i angeic koi Iehova me kowe la itre xan, ke tro pala hi angeic a madrin.
Lapa mekune jë la itre manathith hnei Iehova hna thingehnaean (Wange ju la paragarafe 13) d
E EÖ A LUELU LAKA IEHOVA A MADRINE KOI EÖ
14. Nemene la ka traqa kowe la itre xaa hlue i Iehova, nge nemene la hnying ka eje thei angatr?
14 Ame la itre xaa hlue i Iehova, ke angatr a uti ipië trootro, me wezipo, me adikape. Matre tro angatre lai a mekun ka hape, tha nyipiewekë hë angatr koi Iehova. Maine jë, angatr a hnying ka hape, ‘Nyidrëti kö a madrin kowe la itre huliwang?’
15. Nemene la ka xecie kowe la atre cinyihan la Salamo 71?
15 Hnene fe la atre cinyihan la Salamo 71 hna hane qaja tun koi Iehova. Öni angeic koi Nyidrë: “The nue ni kö ngöne la kola ae la trengecatreng.” (Sal. 71:9, 18) Ngo ka xecie koi angeic laka, e tro pala hi angeic a nyihlue i Iehova, tro kö Nyidrëti a eatrongë angeic me xatua angeic. Atre hi angeic laka, Iehova a madrin kowe la itre ka catre nyihlue i Nyidrë, ngacama ka hetre ifegon.—Sal. 37:23-25.
16. Pine nemene matre tha tro kö la itre trejin ka qatre hë a mekun ka hape, tha nyipiewekë kö la itre huliwa i angatr koi Iehova? (Salamo 92:12-15)
16 Itre trejin ka qatre hë, isine jë troa goeë epun tune la aqane goeë epun hnei Iehova. Tro Nyidrëti a xatua epun troa catre nyihlue i Nyidrë, ngacama epuni a uti ipië trootro. (E jë la Salamo 92:12-15.) The mekune hmaca kö lo itre ewekë hnei epuni hna thatreine kuca. Ngo catre jë pe kuca la hnei epuni hna atrein. Ijiji epun troa xatua itre xan jëne la tulu i epun, me jëne la itre ithuecatr hnei epuni hna hamën. Qaja jë koi angatr la aqane xatua epun hnei Iehova qaane ekö. Nge amamane jë koi angatr laka, ka mele pala hi koi epun la itre hna thingehnaean. The thëthëhmine kö laka, ka men la itre thithi epun thatraqai itre xan. (1 Pet. 3:12) Ijiji easë asë troa hamën la ketre ewekë koi Iehova me koi itre xan.
17. Pine nemene matre tha tro kö sa goeëne la huliwa i itre xan?
17 Maine eö a hleuhleu, ke thatreine hë eö huliwa koi Iehova tun ekö, the thëthëhmine kö laka, Nyidrëti a wangatrune la hnei eö hna kuca. Maine jë, hnei eö hna majemine goeëne la hna kuca hnei itre xan. Ngo lepetrije pi la mekune cili! Pine nemen? Pine laka, tha Iehova kö a ujë tune lai koi së. (Gal. 6:4) Pane mekune jë la, hnei Maria hna hamë Iesu la butei oel ka pui lolo, ka tru thupene catr. (Ioa. 12:3-5) Nge ame pena lo sine föe ka pë ewekë, ke hnei eahlo hna kuiën ngöne la uma ne hmi i Iehova, la lue neköi pies ka co catr. (Luka 21:1-4) Ngo ame la ka ketri Iesu, ke ene la lapaune i nyidro. Ame koi Iehova, ka sisitria catr la hnei eö hna kuca, matre amamane la ihnim i eö koi Nyidrë, ngacama ame koi eö, ka pë pengön.
18. Nemene la ka xatua së troa elë hune la luelu? (Wange ju la hna eköhagen, “ Tusi Hmitrötr a Xatua Së Troa Elë Hune La Luelu.”)
18 Hnei easë asë hi hna hane luelu. Ngo tune la hne së hna ce wang, ijije hi tro sa mejiune kowe la Tusi Hmitrötr, matre tro ej a xatua së troa lepetrij la itre mekun cili. Isine jë troa elë hune la itre mekun cili, matre troa catr la mejiune i eö. The luelue kö laka, Iehova a wangatrunyi eö, nge Nyidrëti a madrin kowe la itre trengecatr hnei eö hna nu. Tro kö Nyidrëti a amanathithi eö. Nyidrëti a hnim me thupëne la itre hlue i Nyidrëti asë.
NYIMA 111 Itre Kepin Matre Easë Madrin
a GÖI TROA TROTROHNIN: Ame ngöne la tane mekun celë, tro sa ce ithanatane la luelu ka eje thene la atr ka mekun ka hape, tha nyipiewekë kö angeic koi Iehova, maine ame la itre mekun hnei angeic hna axeciën ekö, ke tha ka loi kö. Tha kolo kö a qaja, la luelu ka eje thene la atr ka pë lapaune koi Iehova me kowe la itre hna thingehnaean.
b Tha Tusi Hmitrötre kö a qaja la macatre i Dravita lo Iehova a ië angeic, ngo kola mekun ka hape, nekönatr pala kö angeic.—Wange ju la Ita Ne Thup 1 Semitrepa 2011, g. 29, par. 2 (Qene Wiwi).
