TANE MEKUN 40
NYIMA 30 Tretretrong, Akötresingö Nge Enehmung
Iehova a “Ameune La Itre Hni Ka Awe”
“Nyidrëti a ameune la itre hni ka awe; nyidrëti a atuthe la itre eatre i angatr.”—SAL. 147:3.
MEKUN KA TRU
Tru la ihnimi Iehova kowe la itre atr ka akötr. Tro la tane mekune celë a qejepengöne la aqane tro Nyidrëti a ameune la hni së ka akötr, me aqane tro sa akeukawanyi itre xan jëne la ixatua i Nyidrë.
1. Tune kaa Iehova la Nyidrëti a goeëne la itre hlue i Nyidrë?
AME la Iehova a goeë së itre hlue i Nyidrëti e celë fen, öhne hi Nyidrëti la easa madrin me akötr. (Sal. 37:18) Ngo kola ketri Nyidrë, la Nyidrëti a öhne laka, easa kuca la hne së hna atrein matre nyihlue i Nyidrë ngöne la easa akötr. Tru catre la aja i Nyidrë troa xatua së me akeukawanyi së.
2. Nemene la hnei Iehova hna kuca kowe la itre hni ka awe? Nemene la nyine tro sa kuca matre kapa la ixatua i Nyidrë?
2 Salamo 147:3 a hape, Iehova a “atuthe la itre eatre” ne la itre hni ka awe. Matre kola amamane e celë laka, Iehova a thupëne la itre atr ka akötr. Ngo nemene la nyine tro sa kuca matre kapa la ixatua i Nyidrë? Tro sa ce xome la ketre ceitun. Atreine hi la droketre xatuane la atr ka eatr. Ngo loi e tro la atr ka eatr a xötrethenge hnyawane la itre hna amekötin hnene la droketre, matre tro angeic a loi. Ame ngöne la tane mekune celë, tro sa ce wange la hnei Iehova hna qaja e hnine la Tusi Hmitrötr kowe la itre atr ka akötr, me aqane tro angatr a trongëne la itre eamo i Nyidrë.
IEHOVA A AKEUKAWANYI SË LAKA, KA TRU CATRE SË KOI NYIDRË
3. Pine nemene matre itre xan a mekune ka hape, pëkö eloi angatr?
3 Ame enehila, ka pëkö ihnim la itre atr. Nge ame itre xan, pine la aqane hetru angatr, angatr a mekun ka hape, pëkö eloi angatr. Öni Helen a ketre trejine föe: “Hnenge hna tru ngöne la ketre fami ka pë ihnim. Ka isi catre kaka nge ame e nöjei drai, nyidrëti a qaja ka hape, ka pë hnënyöngöne hun.” Tui Helen, hna hane kö qanangazo eö me thaipië eö? Nge hna hane kö qaja koi eö ka hape, pëkö ka troa hnimi eö? Maine eje hi lai, ke jole koi eö troa mekune ka hape, hetre ka troa hnimi eö.
4. Thenge la Salamo 34:18, nemene la aqane goeëne Iehova la itre ka akötr? Nge nemene la hnei Nyidrëti hna troa kuca koi angatr?
4 Ngacama hna qanangazo eö, ngo the luelue kö laka, Iehova a hnimi eö, nge ka tru eö koi Nyidrë. “Tha nanyi kö [Nyidrë] qaathene la itre hni ka akötr.” (E jë la Salamo 34:18.) Maine eö a “kucakuca,” ke mekune kö laka, hetre ewekë ka loi hnei Nyidrëti hna öhne thei eö, celë hi matre hnei Nyidrëti hna ee eö koi Nyidrë. (Ioa. 6:44) Tro palahi Nyidrëti a xatua eö, ke ka tru eö koi Nyidrë.
5. Nemene la ini hne së hna xom qa ngöne la aqane ujë i Iesu kowe la itre atr hna xele ma wang?
5 Tro sa trotrohnine la ihnimi Iehova koi së, e tro sa ce wange la tulu i Iesu. Ame lo Iesu e celë fen, hnei nyidrë hna wangatrune la itre atr hna xele ma wang, me hnimi angatr. (Mat. 9:9-12) Hnene la ketre föe ka hetre mecin hna ketr la iheetr i nyidrë, matre troa aloine la meci eahlo. Nemene la hnei Iesu hna kuca? Hnei nyidrë hna akeukawanyi eahlo me qaja aloinyi eahlo pine la lapaune i eahlo. (Mar. 5:25-34) Iesu a nyitipune hnyawane la itre thiina ne la Keme i nyidrë. (Ioa. 14:9) Haawe, atre ju hi eö laka, ka tru eö koi Iehova, nge öhne kö Nyidrë la itre thiina i eö, tune la lapaun, me ihnimi eö koi Nyidrë.
6. Nemene la nyine tro eö a kuca e eö a mekune ka hape, pëkö eloi eö?
6 Nemene la nyine tro eö a kuca, e eö palahi a mekune ka hape, pëkö eloi eö? E jë, nge lapa mekune jë la itre xötr ne la Tusi Hmitrötr ka amamane laka, ka tru eö koi Iehova. b (Sal. 94:19) Maine tha eatrëne kö eö lo mekun hnei eö hna ajan, maine eö pena a dekurag, ke tha ijiji eö kö troa kuca tune la itre xan, the upezö eö kö. Tha aja i Iehova kö tro eö a kuca la hnei eö hna thatrein. (Sal. 103:13, 14) Nge maine hna angazo eö ekö, ke the mekune kö ka hape, zö i eö. Ketre, the mekune kö ka hape, hnei eö hna thel matre traqa pi la ewekë cili! The thëthëhmine kö laka, Iehova a methinëne la itre atr ka ngazo, ngo tha itre atr hna qanangazone kö. (1 Pet. 3:12) Öni Sandra, ketre hna qanangazon ekö lo kola nekönatr ka hape, “Hnenge palahi hna sipo Iehova troa xatua ni, troa goeë ni tune la aqane goeë ni hnei Nyidrë.”
7. Tune kaa la aqane tro la hne së hna melën ekö, a xatua itre xan?
7 The luelue kö, tro kö Iehova a ce me eö matre xatuane la itre xan. Mekune kö laka, ketre manathith la troa ce huliwa me Nyidrë ngöne la huliwa ne cainöj. (1 Kor. 3:9) Hnene la hnei eö hna melëne matre ijiji eö hi troa trotrohnine la itre xan, me itre aliene hni angatr. Ka sisitria catre la ixatua i eö. Hnei Helen, lo trejine hne së hna qaja e kula, hna kepe ixatua, matre ijiji angeic hë troa xatua itre xan. Öni angeic: “Hnei Iehova hna saze la ketre atr ka ‘pë hnënyöngöne’ a nyi atre hna hnim me ka loi.” Ame enehila, ka madrine catre Helen, nge pionie lapa ha angeic.
AJA I IEHOVA TRO SA ILOI ME NYIDRË
8. Nemene la ka akeukawanyi së ngöne la tusi Isaia 1:18?
8 Itre xaa hlue i Iehova palahi a hace fë la itre tria hnei angatr hna kuca ekö, qëmeken maine thupen la bapataiso. Ngo hnei Iehova hna hamë së la thupene mel, ke tru catre la ihnimi Nyidrëti koi së. Nge aja i Nyidrë tro sa kapa la ahnahna cili. Hnei Iehova lo hna qaja amë ka hape, e ase hë së “iloi” c me Nyidrë, tha Nyidrëti hmaca kö a mekun la itre ngazo së. (E jë la Isaia 1:18.) Ketre hatrene ihnimi ka tru i Iehova la Nyidrëti a köletrije palua la itre ngazo së! Ngo tha tro pi kö Nyidrëti a thëthëhmine la itre huliwa ka loi hne së hna kuca koi Nyidrë.—Sal. 103:9, 12; Heb. 6:10.
9. Pine nemene matre loi e tro pe sa mekun la itre hne së hna kuca enehila me elany, hune la troa mekun la itre ewekë ka hekö?
9 Maine eö palahi a hace fë la itre huliwa hnei eö hna kuca ekö, isine jë pe troa mekun la itre huliwa i eö enehila me elany. Tro sa ce wang la hna kuca hnei Paulo. Hnei angeic ekö hna axösisin la itre keresiano, nge hace catr angeic pine lai. Ngo atre hi angeic laka, ase hë Iehova nue la ngazo i angeic. (1 Tim. 1:12-15) Angeice kö a mekun lapan la itre ngazo i angeic ekö? Waea. Goi tha mekune fe angeic la itre ewekë hnei angeic hna kuca ekö qëmeken troa keresiano. (Fil. 3:4-8, 13-15) Angeice pe a catre cainöj, me mekun catrën la itre drai elany. Tui Paulo, thatreine kö së saze la itre hne së hna melën ekö. Ngo ijiji eö hi troa atrunyi Iehova enehila, me goeën catrën la mele ka lolo ka treqe eö elany.
10. Nemene la nyine tro sa kuca e hne së hna akötrë itre xan ekö?
10 Tune kaa e hnei eö hna akötrëne la ketre atr ekö, nge kolo palahi a ajolëne la mekuna i eö enehila? Kuca asë jë la hnei eö hna atreine matre troa nyinyine lai jol. Tro jë a pane qeje menu koi angeic. (2 Kor. 7:11) Sipo Iehova jë troa xatuane la itre atr hnei eö hna akötrën hnene la itre huliwa i eö. Tro kö Nyidrëti lai a xatua eö memine la itre hnei eö hna akötrën troa xomihni, me lapa tingeting.
11. Nemene la ini hne së hna xom qa ngöne la hna melën hnei Iona? (Wange ju fe la.)
11 Xomi ini jë qa ngöne la itre tria i eö, nge nue Iehova pi troa huliwa eö. Meku Iona perofeta jë. Hnei Iehova lo hna upi angeic a tro Nineve, ngo hnei angeic hna kötr kowe la ketre götran. Matre hnei Iehova hna ameköti angeic, nge trotrohnine hë angeic la tria i angeic. (Iona 1:1-4, 15-17; 2:7-10) Ka mejiune palahi Iehova koi angeic, matre hnei Nyidrëti hna upi angeice hmaca a tro Nineve. E cili, hnei Iona hna canga drengethenge Iehova. Ngacama Iona palahi a hace fë la tria i angeic, ngo tha celë kö la ka sewe angeic troa kapa la hnëqa qaathei Iehova.—Iona 3:1-3.
Thupene la kola hmitran triji Iona qa ngöne la ie ka tru, hnei Iehova hna upi angeice hmaca a tro Nineve matre matre tro fë la maca Nyidrë (Wange ju la paragarafe 11)
IEHOVA A AKEUKAWANYI SË JËNE LA UATI HMITRÖTRE I NYIDRË
12. Maine easa melën la ketre ewekë ka akötre catr, nemene la nyine tro sa kuca matre kapa la tingeting qaathei Iehova? (Filipi 4:6, 7)
12 Ame la easa melën la ketre akötr ka tru, ke Iehova a akeukawanyi së jëne la uati hmitrötre i Nyidrë. Hna hnöjua la nekö i Ron me Carol trahmany. Öni nyidro: “Hna traqa fe koi nyio la itre xaa itupath ka catrehnin, ngo akötre catre kö la ewekë celë. Tha meköle kö nyio ngöne la itre jidr, matre nyio a thithi koi Iehova, nge hnei Nyidrëti hna hamë nyio la tingeting hna qaja ngöne Filipi 4:6, 7.” (E jë.) Maine eö a qëmek kowe la ketre itupath ka akötre catr, ke the cile kö troa fe la hni i eö koi Iehova jëne la thith o drai. Ketre, pëkö ka troa sewe eö troa ithanata koi Nyidrë. (Sal. 86:3; 88:1) Sipone lapane jë la uati hmitrötre i Nyidrë. Tha tro jë kö Nyidrëti lai a drei simine la itre sipo i eö.—Luka 11:9-13.
13. Tro la uati hmitrötr a xatua eö tune kaa tro palahi a nyihlue i Iehova? (Efeso 3:16)
13 Hna akucakucanyi eö kö hnene la ketre itupath? Maine eje hi, tro la uati hmitrötr a hamë trengecatre i eö matre tro palahi a nyihlue i Iehova. (E jë la Efeso 3:16.) Tro sa ce wang la hna melën hnei Flora, ketre trejin föe. Ka mesinare angeic ekö memine la föi angeic. Ngazo pe, hnei nyidrëti hna nyixetë me seihnacil. Öni angeic: “Hace catre ni pine la ewekë hnei nyidrëti hna kuca. Kösë kola xom akötrëne la meleng. Hnenge hna sipo Iehova la uati hmitrötre matre cile catr, nge hnei Nyidrëti hna hamën la ka ijij, matre ameun la kakötreng. Hnei Nyidrëti mina fe hna xatua ni troa elëhun la jol hnenge hna thatreine cile kow.” Ka xecie koi Flora laka, hnei Iehova hna xatua angeic troa mejiune koi Nyidrë, nge tro palahi Nyidrëti a xatua angeic elanyi troa cil kowe la itre xaa itupath. Öni angeic: “Kolo hi a eatr koi ni la hna qaja ngöne Salamo 119:32 kola hape: ‘Tro ni a nyinyape thele la gojenyi ne la itre hna amekötin hnei nyipë ke nyipëti a nyi göhnen ej ngöne la hning.’ ”
14. Tune kaa la aqane tro sa nue la uati hmitrötr troa xatua së?
14 Thupene la hnei eö hna sipo Iehova la uati hmitrötr, tune kaa la aqane tro eö a trothenge la itre thithi eö? Loi e tro eö a kuca la itre huliwa ka amamane la thangane la uati hmitrötr thei eö. Kola qaja la itre icasikeu, memine la huliwa ne cainöj. Eö a nyialiene la he i eö hnene la itre mekuna i Iehova, la eö a e Tusi Hmitrötr e nöjei drai. (Fil. 4:8, 9) Ame la eö a e Tusi Hmitrötr, cile ju ngöne la itre hna melën hnene la itre hlue i Iehova ka ixelë me itre jol, nge lapa mekune ju la aqane xatua angatr hnei Nyidrë matre cile catr. Eje hi lo hna kuca hnei Sandra, hna qaja ha e caha, lo kola traqa itrai la itre jol koi angeic. Öni angeic: “Hna ketri ni hnene la hna melën hnei Iosefa. Tha hnei angeice kö hna nue la itupath me itre jol troa thë la imelekeu i angeic me Iehova.”—Gen. 39:21-23.
IEHOVA A AKEUKAWANYI SË JËNE LA ITRE TREJIN
15. Drei la ka troa akeukawanyi së, nge tune kaa? (Wange ju fe la iatr.)
15 Ame la easa akötr, ijije hi tro la itre trejin a ‘akeukawanyi së.’ (Kol. 4:11) Kolo lai a mama thei angatr la ihnimi Iehova koi së. Angatr a akeukawanyi së la angatr a ce me easë, me drei easë hnyawa. Angatre fe a ithuecatre koi së jëne la ketre xötr, maine ngöne la angatr a ce thithi me easë. d (Roma 15:4) Ame itre xaa ijin, itre trejin a amekunë së la aqane waiewekë i Iehova me xatua së troa cile catr. Ketre, itre trejin a hamë ixatua koi së, tune la kola kuci xen la easa kucakuca.
Ijije hi tro la itre sinee ka macaj a xatua së me ithuecatre koi së (Wange ju la paragarafe 15)
16. Maine easa ajan tro la itre xaa trejin a xatua së, nemene la nyine tro sa kuca?
16 Ame itre xaa ijin, tro së lai a sipo ixatua thene la itre xaa trejin. Angatr a hnimi së, ke aja i angatr troa xatua së. (It. Ed. 17:17) Ngo thatre hnyawa kö angatr la ka ej e kuhu hni së me itre mekuna së. (It. Ed. 14:10) Maine hetre hace hnei eö hna lapa fë, fe pi la hni eö kowe la itre sinee ka macaj. Qaja jë koi angatr la ixatua hnei eö hna ajan. Maine pena, fe pi la hni eö kowe la cas maine lue qatre thup hnei eö hna kofiasi kow. Hna xatuane la itre xaa trejin föe la angatr a ithanata memine la ketre trejin föe ka macaj.
17. Nemene la itre ewekë ka troa sewe së troa kapa la itre ithuecatr, nge tune kaa la aqane tro sa nuetrij la itre mekune cili?
17 The lapa casi kö. Ame ngöne la itre ijin easa akötr ke, tha pi wai atr kö së. Ketre, tha tro kö lai a trotrohni së hnene la itre xaa trejin, maine tro pena a akötrë së hnene la itre trenge ithanata i angatr. (Iako. 3:2) Ngo loi e tro sa nuetrij la itre mekune cili wanga triane pi pe së la itre ithuecatr ka nyipiewekë. Öni Gavin, ketre qatre thup ka mecifë dépression, ka hape: “Xele ni ma iöhnyi memine la itre sineeng.” Ngo hnei angeic hna isin troa iöhnyi memine la itre xaa trejin, nge hetre madrine i angeice hë. Öni Amy, ketre trejin föe: “Hnene la aqane meleng ekö, matre tha mejiune kö ni koi itre xan. Ngo eni a inine troa hnim la itre trejin me mejiun koi angatr tui Iehova. Atre hi ni ka hape, Nyidrëti a madrin, nge kolo fe a hamë madrine koi ni.”
TRO LA ITRE HNEI IEHOVA HNA THINGEHNAEAN A AKEUKAWANYI SË
18. Pine nemene matre ijije hi tro sa madrin kowe la itre drai elany, nge nemene la nyine tro sa kuca enehila?
18 Loi e tro sa mejiune kowe la itre drai elany. Easenyi hë tro Iehova a apatrene la itre sine mec me itre akötr e kuhu hni së. (Hna Am. 21:3, 4) Nge tha tro hmaca kö la itre akötre së enehila a “ajolëne la hni” së. (Isa. 65:17) Tune la hne së hna ce wang, Iehova a ‘atuth la itre eatre’ së enehila. Huliwane jë la itre hnei Nyidrëti hna hnëkën thatraqai së nyine akeukawanyi së me xatua së. The luelue pi kö ka hape, ‘nyidrëti a meku eö.’—1 Pet. 5:7.
NYIMA 7 Iehova La Trenge Catreng
a Hna saze la itre ëj.
b Wange ju la hna eköhagen “ Iehova a Wangatrunyi Eö.”
c Easa “iloi” me Iehova la easa ietra. Tune kaa? Easa sipo Nyidrë troa nue la itre ngazo së, me saze la aqane ujë së. Maine hne së hna kei kowe la ketre ngazo ka tru, loi e tro sa thele ixatua thene la itre qatre thup ne la ekalesia.—Iako. 5:14, 15.
d Wange ju la itre mekun ka mama ngöne la götrane hna hape “Hacehni” ngöne la Nyine Thele Mekun Ne La Itretre Anyipici Iehova.
