TANE MEKUN 42
NYIMA 103 Itretre Thupë Mamoe, Itre Atr Nyine Ahnahna
Olene Jë Kowe La Itre “Ahnahna” Ngöne La Ekalesia
“Ame lo nyidrëti a elë, hnei nyidrëti hna . . . upi angatre jë troa itre ahnahna.”—EFE. 4:8.
MEKUN KA TRU
Tro sa ce wang la ixatua hna hamën hnene la itretre ixatua, me itre qatre thup, me itretre thupë sirkoskripsio, me aqane tro sa olene kowe la huliwa hnei angatr hna kuca.
1. Nemene la itre ahnahna hnei Iesu hna hamë së?
PËKÖ ketre atr ka ham tui Iesu. Ame lo nyidrëti e celë fen, hnei nyidrëti hna huliwane la mene i nyidrë matre xatuane la itre xan. (Luka 9:12-17) Hnei nyidrëti fe hna hamë së la ahnahna ka sisitria, ene la mele i nyidrë. (Ioa. 15:13) Qaane lo kola amele nyidrë, nyidrëti pala hi a ham. Nge tune la hnei nyidrëti hna qaja, hnei nyidrëti hna sipo Iehova la uati hmitrötr matre troa ini së me akeukawanyi së. (Ioa. 14:16, 17, ithuemacany; 16:13) Ketre, jëne la itre icasikeu, nyidrëti a hamë së la ka nyipiewekë matre inine la itre atr ngöne la fen asë.—Mat. 28:18-20.
2. Drei la itre “ahnahna” hna qaja ngöne Efeso 4:7, 8?
2 Nemene la ketre ahnahna hna hamë së hnei Iesu? Öni Paulo aposetolo, thupene la Iesu a elë hnengödrai, hnei nyidrëti hna hamën la itre trahmany matre nyi “ahnahna.” (E jë la Efeso 4:7, 8.) Paulo a qaja ka hape, hnei Iesu hna hamën la itre trahmanyi cili matre acatrene la itre ekalesia. (Efe. 1:22, 23; 4:11-13) Ame la itre “ahnahna” enehila, ke kola qaja la itretre ixatua, me itre qatre thup, me itretre thupë sirkoskripsio. a Nyipici laka, tha ka pexeje kö la itre atr cili, nge angatre fe a hane tria. (Iako. 3:2) Ngo Iesu Keriso joxu së, a upi angatr troa xatua së; angatre la itre ahnahna qaathei nyidrë.
3. Qaja jë la ketre ceitune ka amamane la aqane tro sa xatuane la itre trejin trahmany hna acil ngöne la ekalesia.
3 Hnei Iesu hna acil la itre trahmany cili, matre troa acatrene la ekalesia. (Efe. 4:12) Ngo qa së asë troa xatua angatr troa eatrëne hnyawa la hnëqa i angatr. Tro sa xom la ketre ceitun: Ame la kola xupe la ketre Uma Ne Baselaia, hetre ka kuca la huliwa, nge ame itre xan, angatr a xatuane la itre ka huliwa. Angatr a traqa fë xen, maine itrothei, maine kuca la itre xaa jol. Ketre tune mina fe, easa xatuane la itretre ixatua, me itre qatre thup, me itretre thupë sirkoskripsio jëne la hne së hna qaja me kuca. Tro sa ce wang la aqane tro sa kepe thangan qa ngöne la itre huliwa i angatr, me aqane tro sa amamane koi angatr me koi Iesu, la hni ne ole së.
ITRETRE IXATUA A KUCA LA “ITRE HULIWA KA NYIPIEWEKË”
4. Nemene la itre huliwa hna kuca hnene la atre ixatua ngöne la hneijin ne la itre pane keresiano?
4 Ame ngöne la hneijin ne la itre pane keresiano, hna acil la itre xaa trejin trahmany troa atre ixatua. (1 Tim. 3:8) Maine jë, Paulo a qeje angatr la kola hape, “itre ka ixatua.” Kolo itre trejin ka kuca la itre xaa jol ngöne la ekalesia. (1 Kor. 12:28) Angatr a kuca la itre xaa huliwa ka nyipiewekë ngöne la ekalesia, matre aijijëne la itre qatre thup troa hamë ini, me xatuane la itre trejin. Maine jë, itretre ixatua ekö a fejan la Itre Hna Cinyihan, maine itöne pena la itre nyine fejan thatraqane la itre copiste.
5. Nemene la itre xaa huliwa hna kuca hnene la itretre ixatua enehila?
5 Nemene la itre xaa huliwa hna kuca hnene la itretre ixatua enehila? (1 Pet. 4:10) Angatr la ka hlem la manie ne la ekalesia, me kuca la itre teritoar, me komadën me hamën la itre itus kowe la itre trejin, me kuca la sono me video ngöne la itre ijine icasikeu, me ikep, me nyihnyawan la Uma Ne Baselaia. Itre huliwa lai ka nyipiewekë matre troa tro loi la ekalesia. (1 Kor. 14:40) Ame la itre xan, angatr a cile fë la itre xaa götran ne la icasikeu, Mel Me Huliwa Ne La Keresiano, me cile fë cainöj ngöne la ekalesia, me xatuane la atre thupën la gurup ne cainöj. Nge ijije hi tro la atre ixatua ka macaj a ce tro memine la itre qatre thup troa wang la itre trejin.
6. Pine nemene matre easa olene kowe la huliwa ne la itretre ixatua?
6 Nemene la thangan hne së hna kapa qa ngöne la huliwa ne la itretre ixatua ngöne la ekalesia? Öni Beberly b ketre trejine föe qa Bolivie ka hape: “Jëne la huliwa ne la itretre ixatua, lolo catr la itre icasikeu. Eni a nyima, me hamë mekun, me dreng la itre cainöj, me xomi ini qa ngöne la itre video me itre iatr. Angatr a thupë eahun ngöne la Uma Ne Baselaia, nge jëne la huliwa i angatr, itre xan a sine la icasikeu jëne visio-conférence. Thupene la itre icasikeu, angatr a hëne la itre xaa trejin troa nyidrawan la Uma Ne Baselaia, me e mani, me isin matre tro pala hi eahuni a hetre itus. Eni a olene koi angatr!” Öni Leslie ka mel e Colombie, nge föi qatre thup ka hape: “Itretre ixatua a xatuane la föeng matre troa eatrën la itre xaa hnëqa. Maine patre ju angatr, ke troa hace catr la huliwa i nyidrë. Eni a madrin, ke pi tro catre angatre hamë ixatua.” Tha eje fe kö lai mekuna i eö?—1 Tim. 3:13.
7. Tune kaa la aqane tro sa amamane la hni ne ole së kowe la itretre ixatua? (Wange ju la iatr.)
7 Ka nyipiewekë catr troa hetre hni ne ole kowe la itretre ixatua. Ngo Tusi Hmitrötr a upi së ka hape: “Amamane jë la hni ne ole i nyipunie.” (Kol. 3:15) Krzysztof ketre qatre thup ne Finlande, a qaja la aqane amamane nyidrë la hni ne ole i nyidrë ka hape: “Eni a iupifë xötr koi angatr jëne la sine tus maine sms, nge eni a qaja la aqane ithuecatr koi ni hnei angatr, memine la kepin matre madrine catre ni kowe la huliwa hnei angatr hna kuca.” Ame pena Pascal me Jael, lue ka mel e Nouvelle-Calédonie, ke nyidroti a thithi fë la itretre ixatua. Öni Pascal: “Qaane eue hi lo, nyio pala hi a thith koi Iehova thatraqane la itretre ixatua, me sipo nyidrë troa ceme angatr, me xatua angatr.” Iehova a drenge la itre thithi cili, nge hetre thangane catr kowe la ekalesia.—2 Kor. 1:11.
ITRE QATRE THUP A “HULIWA MEC THEI NYIPUNIE”
8. Hnauëne la Paulo a cinyanyin ka hape, ka “huliwa mec” la itre qatre thup ekö? (1 Thesalonika 5:12, 13)
8 Ame la itre qatre thup ngöne la hneijin ne la itre pane keresiano, ke angatr a huliwa mec kowe la ekalesia. (E jë la 1 Thesalonika 5:12, 13; 1 Tim. 5:17) Angatr a “xomiujine” la ekalesia, me elemeken la itre icasikeu. Nge ame la angatr a icasikeu, angatr a axecië mekun thatraqane la ekalesia. Nge angatre fe a “eamon” la itre trejin cememine la ihnim, matre tro pala hi a thupën la ekalesia. (1 Thes. 2:11, 12; 2 Tim. 4:2) Ngo angatre mina fe a isin troa thupën la isa fami i angatr, me acatren la imelekeu i angatr me Iehova.—1 Tim. 3:2, 4; Tito 1:6-9.
9. Nemene la hnëqa ne la itre qatre thup enehila?
9 Tru catr la huliwa ne la itre qatre thup enehila. Angatr a cainöjëne la maca ka loi. (2 Tim. 4:5) Angatr a hnëkën la huliwa ne cainöj ngöne la teritoar ne la ekalesia, me amamai tulu göi troa catre cainöj, me inine la itre trejin troa maca hnyawa ngöne la huliwa cili. Angatre fe a amekötin la itre trejin cememine la ihnim me utipin. Ame la kola kuca la ngazo hnene la ketre trejin, angatr a thele tro hmaca angeic a imelekeu hnyawa me Iehova, me thupën matre tro pala hi a wië la ekalesia. (1 Kor. 5:12, 13; Gal. 6:1) Ngo ame la pane hnëqa i angatr, ke troa thupën la itre neköi mamoe i Akötresie. (1 Pet. 5:1-3) Angatr a hnëkëne hnyawan la itre cainöj nyine cile fë, me thel troa atre hnyawa la itre atrene la ekalesia, me wange trootro la itre trejin ngöne la itre hnalapa i angatr. Nge ame la itre xaa qatre thup, angatr a sine la huliwa ne xup me nyihnyawane la itre Uma Ne Baselaia, me hane hnëkëne la itre asabele katru, me sine la Komite Ka Ixatua Göi Itre Ejolen e Pital (CLH), maine vizitën la itre trejin ka wezipo e pital. Nyipici, tru catr la itre huliwa hna kuca koi së hnene la itre qatre thup!
10. Pine nemene matre easa olene kowe la itre qatre thup i easë?
10 Ase hë Iehova qaja amë ka hape, tro la itre atre thup a thupë së matre tha tro hmaca kö sa “meci hnei xou.” (Iere. 23:4) Celë hi hna öhne hnei Johanna, ketre trejine föe qa Finlande, lo kola wezipo hnene la thine i angeic. Öni angeic: “Ngacama ka jole koi ni troa fe la hning koi itre xan, ngo hna thel troa xatua ni hnene la ketre qatre thup laka, thatre nyidrëti hnyawa kö ni. Hnei nyidrë hna ce thithi me ni, me qaja ka hape, Iehova a hnimi ni. Thëthëhmine hë ni la hnei nyidrëti hna qaja, ngo mekune palahi ni la aqane akeukawanyi ni hnei nyidrë. Xecie hnyawa koi ni laka, Iehova hi la ka upi nyidrë la eni a aja ixatua.” Tune kaa la aqane xatua eö hnene la itre qatre thup ne la ekalesia?
11. Tune kaa la aqane tro sa olene kowe la itre qatre thup? (Wange ju la iatr.)
11 Aja i Iehova tro sa olene kowe la itre qatre thup “pine la itre huliwa i angatr.” (1 Thes. 5:12, 13) Öni Henrietta ka mel e Finlande, ka hape: “Madrine catre la itre qatre thup troa xatua së, ngo tha kolo kö lai a qaja ka hape, tru catre kö la traem me trengecatre i angatr hune la itre xaa trejin, maine pëkö jol hnei angatr hna hane melën. Ame itre xaa ijin, eni a qaja koi angatr ka hape: ‘Dreng, ka lolo catr la huliwa i nyipë koi eahun, nge tha eni kö la a ihnyima.’ ” Öni Sera, ketre trejine föe qa Turquie ka hape: “Loi e troa ithuecatr kowe la itre qatre thup, matre tro palahi angatr a catre huliwa. Tune hi la troa cinyanyine la ca neköi kart, maine hë angatr troa ce xen me easë, maine ce cainöj me angatr.” Madrine kö eö kowe la huliwa hna kuca hnene la ketre qatre thup ne la ekalesia i eö? Nga thele jë la aqane tro eö a olene koi nyidrë.—1 Kor. 16:18.
Loi e tro sa ithuecatre kowe la itre trejin trahmany hna acil, matre tro pala hi angatr a eatrëne hnyawan la hnëqa i angatr (Wange ju la paragarafe 7, 11, 15)
ITRETRE THUPË SIRKOSKRIPSIO A ACATREN LA ITRE EKALESIA
12. Nemene la hna kuca matre acatrene la itre ekalesia ekö? (1 Thesalonika 2:7, 8)
12 Hnei Iesu Keriso hna acil la itre xaa trahmany, matre troa xatuane mina fe la ekalesia. Hnei nyidrë hna aijijëne la itre qatre thup ne Ierusalema troa acili Paulo, me Banaba, me itre xaa trejin trahmany, matre troa wange trongëne la itre ekalesia. (It. Hu. 11:22) Pine nemen? Aja i angatr tro la itre trahmanyi cili a acatrene la itre ekalesia, tune la aqane kuca hnene la itretre ixatua me itre qatre thup. (It. Hu. 15:40, 41) Hnei angatr hna ahmaloeëne la mele i angatr me huliwa mec, matre inin me hamë ithuecatr kowe la itre xaa trejin.—E jë la 1 Thesalonika 2:7, 8.
13. Nemene la itre hnëqa ne la atre thupëne la sirkoskripsio?
13 Itretre thupë sirkoskripsio a feke trootro, matre troa wang la itre ekalesia. Ame la itre xan, angatr a trongëne la 100 lao kilomet matre troa wang la ketre ekalesia. E nöjei wiik, tro la atre thupëne la sirkoskripsio a cile fë cainöj, me wang la itre trejin, me icasikeu me itre pionie, memine la itre qatre thup, me kuca la itre icasikeu göi cainöj. Nyidrëti fe a hnëkën la itre cainöj, me hnëkën la itre asabele ne sirkoskripsio me itre asabele katru. Ketre, nyidrëti a kuca la itre ini koi itre pionie, me icasikeu memine la nöjei pionie ne la sirkoskripsio, me wange la itre xaa jol hna upi nyidrë hnene la filial.
14. Pine nemene matre hetre hni ne ole së kowe la atre thupëne la sirkoskripsio së?
14 Nemene la itre eloin ne la huliwa ne la itretre thupë sirkoskripsio kowe la ekalesia? Önine la ketre trejin qa Turquie, göne la itretre thupë sirkoskripsio ka hape: “Ame la angatr a wang la ekalesiang, ke kola ithuecatre koi ni troa xatuane la itre xaa trejin. Alanyimu la itre trejin ka iwai trootro hnenge hna ce huliwa memin, ngo pëkö ala casi thei angatr ka hane qaja ka hape, tru pala ha hnei jole i angatr, maine pëkö ijine i angatr koi eahun.” Ame lo ketre drai, hnei Johanna lo trejine föe hne së hna qaja ekula, hna ce cainöj memine la ketre atre thupëne la sirkoskripsio. Pëkö atr hnei nyidroti hna öhn. Ngo öni angeic: “Tha tro pi kö ni a thëthëhmine la drai cili. Hnene la lue trejin me ni hna trotrij la hnalapa, nge tru catr la hnenge hna meku nyidro. Hnene la atre thupëne la sirkoskripsio hna ithuecatre koi ni. Hnei nyidrëti hna xatua ni troa trotrohnine ka hape, ame la easa nyihlue i Iehova, ke tha tro palahi sa ce lapa memine la fami së me itre sinee së. Ngo ame ngöne la fene ka hnyipixe, thatreine kö së e la itre ijine tro sa ce lapa me angatr.” Alanyimu la itretre thupëne la sirkoskripsio hna hnim hnene la itre trejin tui Johanna, pine la itre huliwa i angatr.—It. Hu. 20:37–21:1.
15. (a) Thenge la 3 Ioane 5-8, tro sa amamane tune kaa la hni ne ole së kowe la itretre thupëne la sirkoskripsio? (Wange ju la iatr.) (b) Hnauëne la tro sa wangatrune la itre föe ne la itre trejin hna acil, nge tro sa tune kaa? (Wange ju la hna eköhagen, “ The Thëthëhmine Kö La Itre Föi Angatr.”)
15 Hnei Ioane aposetolo hna ithuecatre koi Gaio troa kapa hnyawa la itre trejin ka traqa me “upi angatre hnyawa thenge la ka amadrinë Akötresie.” (E jë la 3 Ioane 5-8.) Easa trongën la eamo i Ioane la easa hën la atre thupëne la sirkoskripsio troa xen, maine catre cainöj ngöne la ijine traqa i nyidrë. Hetre ketre aqane kuca i Leslie, lo trejin hne së hna qaja ekula, matre troa amamane la hni ne ole i angeic kowe la atre thupëne la sirkoskripsio. Öni angeic: “Eni a sipo Iehova troa hamën la ka ijij koi nyidro. Eni me föeng a cinyanyi tus koi nyidro, matre qaja la madrine i nyio kowe la traqa i nyidro.” Itre ka tui easë hi la itretre thupëne la sirkoskripsio. Itre ka wezipo me kucakuca fe. Maine jë, tro Iehova a sa la itre thithi angatr, jëne la hne së hna ithuecatr maine hamë ahnahna koi angatr!—It. Ed. 12:25.
KA NYIPIEWEKË LA ITRE TREJIN TRAHMANYI HNA ACIL
16. Nemene la itre hnying nyine tro la itre trejin trahmanyi a isa mekun? (Itre Edromë 3:27)
16 Ame ngöne la fen asë, kola aja itre trejin trahmany, matre xom la itre hnëqa ka tru. Maine eö la ketre trejin trahmany, hnyinge jë ka hape, ‘Ijijinge kö’ troa xatuane la itre ka aja ixatua? (E jë la Itre Edromë 3:27.) Aja i eö kö troa hane atre ixatua? Maine atre ixatua hë eö, ijiji eö kö troa hane qatre thup, matre xatuane la itre trejin? c Ijiji eö kö troa ahmaloeëne la mele i eö, matre sine la Ini Koi Itre Ka Cainöj? Tro la itre ini hnei eö hna troa kapa e cili, a xatua eö troa xome hnyawan la itre hnëqa hnei Iesu hna troa hamë eö. Maine ame koi eö, tha ijiji eö kö troa hane eatrëne la itre hnëqa cili, ke thithi jë koi Iehova. Sipo Nyidrëti jë la uati hmitrötr, matre xatua eö troa eatrëne hnyawan la itre hnëqa hna ahnithe koi eö.—Luka 11:13; It. Hu. 20:28.
17. Nemene la hna amaman hnene la itre trejin trahmany hna acile hnei Iesu?
17 Kolo hi a amamane hnene la huliwa hna kuca hnene la itre trejin trahmany hnei Iesu hna acil laka, nyidrëti la ka xomiuji së enehila, ngöne la itre drai ne la pun. (Mat. 28:20) Hapeu, tha madrine kö epun laka, hnene la Joxu së ka ihnim me ka ham hna acil la itre trejin trahmany, matre thupë së enehila? Haawe, thele jë la aqane troa amamane la hni ne ole i epun kowe la itre trejin cili ka huliwa catr. Nge the thëthëhmine kö troa olene koi Iehova, qaane la “nöjei loi me nöjei ahnahna ka pexej.”—Iako. 1:17.
NYIMA 99 Itre Trejin Ka Ala Nyimu Atraqatr
a Ame la itre qatre thup ka sine la Lapa Ne Xomi Meköt, maine ka xatuane la Lapa Ne Xomi Meköt, maine ka nyiatrene la komite ne filial, maine ka xome la itre xaa hnëqa, ke angatre fe la itre “ahnahna.”
b Hna saze la itre ëj.
c Maine aja i epun troa atre la aqane troa hane atre ixatua, maine qatre thup, wange ju la lue tane mekun hna hape, “Itre Trejin Trahmany—Epuni Kö a Thel Troa Atre Ixatua?” me “Itre Trejin Trahmany—Epuni Kö a Thel Troa Qatre Thup?” ngöne la Ita Ne Thup ne Nofeba 2024.
