1, 2. Pine nemene matre Itretre Anyipici Iehova a heetre hnyawa? (Wange ju la pane iatr.)

KOLA qejepengöne hnene la ketre zonal ne Pays-Bas la aqane heetre ne la itre hene ne hmi. Kola hape: “Angatr pala hi a heetr, kösë angatr a ngenu maine lapa hnalapa, nge the qaja pala ha e ijine hedredrei.” Ngo önine pala hi lai zonal, tha hane fe kö heetre tun hnene la Itretre Anyipici Iehova ngöne la angatr a asabele. Ame la itre trahmanyi me itre nekönatr, angatr a hetrë ikootr me ami kala, nge ame pena la itre föe me nekö jajiny, angatr a otrë jupe ka mingöming, nge ka tha hopatre kö. Hna majemine qaja aloine la Itretre Anyipici Iehova pine la aqane heetre i angatr. Öni Paulo, loi e troa mama la “qahmihmi [maine ipië] me metöt” ngöne la aqane heetre ne la atre ka nyihlue i Akötresie. (1 Timoteo 2:9, 10) Ngacama Paulo e celë a qeje itre föe, ngo thatraqane fe la itre trahmanyi la eamo celë.

² Ka tru kowe la Itretre Anyipici Iehova la itre hnei Nyidrëti hna amekötin göi aqane heetr, ketre ka tru fe  koi Iehova la aqane heetre së. (Genese 3:21) Kola mama hnyawa e hnine la Tusi Hmitrötr laka, hetre trepene meköti Iehova göi aqane tro sa heetr. Celë hi matre, ame la aqane heetre së, tre tha kolo hmekuje kö a amadrinë së, ngo sisitria catre kö e troa amadrinëne la hni Iehova, Atre Musi koi së.

3. Nemene la hne së hna inin qa ngöne la Trenge Wathebo i Mose?

³ Hnei Iehova ekö hna hamëne la itre wathebo koi angetre Isaraela jëne Mose, matre troa thupë angatr qa ngöne la aqane mele ka sis ne la itre nöj ka lapa xötreithi angatr. Kola mama ngöne la Trenge Wathebo laka, methi Iehova la aqane heetre i angatr, ke, kola imenune la trahmanyi me föe. Hetre aqane heetre enehila laka, ca pengöne hë la aqane heetre i trahmanyi me föe. (E jë la Deuteronomi 22:5.) Haawe, kola ini së hnene la wathebo celë laka, xele catre Iehova ma wange la itre trahmanyi ka heetr tui föe, me itre föe ka heetre tui trahmany, laka thatreine hë së wangatrehmekune la trahmanyi me föe.

4. Nemene la ka xatua së troa iëne hnyawa la aqane heetr?

⁴ Tro la itre trepene meköti ne la Tusi Hmitrötr a xatua së troa iëne hnyawa la itre iheetre së. Matre, mele ju hë së ngöne la ketre nöj nge hetre ketre qenenöje kö, gaa hedredrei maine gaa hnötr, ngo tha saze kö la itre trepene meköti cili. Tha tro kö së lai a e wengëne la itre iheetr ka loi maine ka ngazo pena. Ngo, loi e tro sa isa iëne hnyawa la itre heetre hne së hna ajan, ngo thenge pala hi la itre trepene meköti cili. Tro sa ce ithanatane la itre xa trepene meköti ka xatua së troa atre “la aja i Akötesie ka loi, me nyine amadin, me ka meköt.”—Roma 12:1, 2.

5, 6. Nemene la thangane la aqane heetre së koi itre xan?

⁵ Hnene la uati hmitrötr hna upi Paulo troa cinyihane la itre trenge ewekë ka mama ngöne 2 Korinito 6:4. (E jë.) Ame la aqane heetre së, tre kolo hi lai a qejeqeje së, matre canga tro hi a mama kowe la itre atr la pengö së. (1 Samuela 16:7) Haawe, pine laka Itretre Anyipici Iehova së, tha tro pi kö sa iëne hi la itre iheetr hne së hna ajan. Easë pe a trongëne la itre trepene meköt ka troa xatua së troa neëne la itre iheetr ka fedr koi  ngönetrei, me ka lailai. Kolo hi lai a hape, loi e tro sa thipetrije la itre iheetr ka amamai ngönetrei. Tha loi kö e tro sa athixötrëne la ketre atr, maine upi angeic pena troa thele hna goe pine la aqane heetre së.

⁶ E tro sa heetrëne la itre iheetr ka porop, nge ka amamane la thiina ka ipië, tro hë la itre atr lai a metrötrë së, me wange atrehmekune laka, Itretre Anyipici Iehova së. Nge tro hë angatre lai a hane pi atre la Akötresie hne së hna nyihluen, me organizasio i Nyidrë, memine la maca ne iamele hne së hna tro fë.

7, 8. Eu la itre ijine tro sa thupëne hnyawa la aqane heetre së?

⁷ Qa së lai qëmeke i Akötresie, me qëmekene la itre trejin, me qëmekene la itre atrene la teritoare së, troa heetre thenge la aja i Akötresie, me thenge la maca hne së hna tro fë. (Roma 13:8-10) Matre nyipi ewekë catre tro sa thupëne la aqane heetre së ngöne la easë a icasikeu me cainöje trootro. Loi e troa mama the së laka, itre hlue  i Akötresieti së. (1 Timoteo 2:10) Nge maine nyipici laka, isa aqane heetre së kö ngöne la ketre götran, maine ketre nöj, ngo pine laka Itretre Anyipici Iehova së, tha tro pi kö a athixötrëne la ketre atr hnene la aqane heetre së.

⁸ E jë la 1 Korinito 10:31. Ame fe la easë a tro kowe la itre asabele së, loi e lolo la aqane heetre së, nge troa mama la thiina ka ipië. Tha tro pi kö sa nyitipune la aqane heetre ne la fen. Loi e tro sa thupëne la aqane heetre së qëmekene me thupene la asabele, me ngöne la easë ngöne la hôtel. E cili fe, tha tro pi kö sa heetr tune la easa lapa hnalapa. Tro hë së lai a madrine troa qeje së ka hape, Itretre Anyipici Iehova së, nge tha jole kö koi së troa qaja la maca ka loi o ijin.

9, 10. Pine nemene matre tro sa mekune la itre trejin ngöne la easë a heetr tune la hna qaja ngöne Filipi 2:4?

⁹ E jë la Filipi 2:4. Pine nemene matre tro sa mekune la itre trejin ngöne la easë a heetr? Ame la pane kepin, itre hlue i Akötresie a catre trongëne la eamo celë: “Humutheju hnei nyipunie la ite hnepe ngönetei nyipunie e celë fen ; ene la kuci ngazo, me thina ka sis, me qene tratraij, me aja ka ngazo.” (Kolose 3:2, 5) Hetre itre xan the së ka nue lo aqane mele i angatr ekö, nge angatre pala hi enehila a isi memine la itre aja i angatr ka ngazo. Matre, e tha thupëne kö së la aqane heetre së, jole catre hë koi angatr troa isi memine la itre aja i angatr ka ngazo, me trongëne la itre hna amekötin hnei Tusi Hmitrötr. (1 Korinito 6:9, 10) Matre, tha aja së kö troa thue xa ehnefen la ketre trejin!

¹⁰ Ame la easa ce mele memine la itre trejin, tre kolo hi lai a thupë së qa ngöne la itre huliwa ka sis ne la fen. Matre, e tro sa thupëne la aqane heetre së, tro pala hi lai a lolo la aqane mele së me itre trejin, easë ju hë ngöne la itre icasikeu maine ngöne la itre ijine iamadrinë. Nge maine nyipici laka, isa qanyi së kö iëne la aqane tro sa heetr, ngo qa së mina fe troa thupëne matre tro la aqane heetre së a xatuane la itre trejin troa lapa pë ethan qëmeke i Iehova ngöne la mekun, me ngöne la aqane ithanata me ngöne la aqane ujë i angatr. (1 Peteru 1:15, 16) Ketre, ame la ihnim tre, “tha thina ka qali kö, tha ate thele ewekë i nyëne kö.”—1 Korinito 13:4, 5.

11, 12. Ate Cainöj 3:1, 17 a xatua së tune kaa troa ië ewekë hnyawa?

¹¹ Atre hnyawa hi la itre hlue i Iehova ka hape, “hete ijine la nöjei ewekë asë me nöjei huliwa asë,” matre angatr a iëne la aqane troa heetr thenge la ijin. (Ate Cainöj 3:1, 17) Easa saze hnaheetre thenge la ijin, la kola hedredrei maine hnötr, maine hnene la aqane  mele së, maine hnene la itre ewekë ka traqa koi së, ngo ame pe, tha saze kö la itre trepene meköti Iehova.—Malaki 3:6.

¹² Ame ngöne la itre ijine hedredrei, nango jole pi hë troa iëne la itre iheetr ka ijij nge ka amamane la ipië me metrötr. Ngo hetre madrinene la itre trejin la easa thupëne la aqane heetre së. Tha hna heetrëne kö la itre iheetr ka fedr koi ngönetrei, maine ka hlupahlupa pena. (Iobu 31:1) Matre ame fe la easë a mekune troa sië hnagejë maine sië piscine, loi e tro sa thupëne hnyawa la hnaheetr hne së hna troa sie fë. (Ite Edomë 11:2, 20) Nge, ngacama ala nyimu la itre atr e celë fen ka sie fë maillot de bain, ngo loi e tro sa thupëne la nyine tro sa sie fë matre tro pala kö së a atrunyi Akötresie.

13. Kola xatua së tune kaa hnei 1 Korinito 10:32, 33 göi aqane troa heetr?

¹³ Hetre ketre kepin matre easa thupëne la aqane heetre së. Tha aja së kö troa athixötrën, maine ajolëne la mekuthetheu ne la ketre atr. (E jë la 1 Korinito 10:32, 33.) Matre, qa së lai troa neëne la itre iheetr ka troa ajolëne la ketre trejin me itre ka tha nyihlue i Iehova kö. Hnei Paulo hna cinyihane ka hape: “Tro asë sha isa amadinëne la ate easheny, mate loi angeic, me keukawa.” Öni angeice hmaca jë: “Ke ame Keriso, te, tha hna amadi nyidëti kö.” (Roma 15:2, 3) Matre, loi e troa sisitria koi së la aja i Iehova memine la aja ne la itre atr, hune la itre sipu aja së. Haawe, tha tro kö sa iëne la ketre aqane heetr ka loi koi së, ngo ka sawa pe la atr troa kapa la maca hne së hna tro fë.

14. Tro la keme me thin a xatuane tune kaa la itre nekönatr troa amadrinë Iehova göi aqane heetr?

¹⁴ Hnëqa i keme me thin troa inine la itre nekönatr troa trongëne la itre trepene meköti Iehova. Nge nyidroti a thupëne matre, tro pala hi a amadrinë Iehova hnene la aqane heetre me iseji nyidro me ha nekönatr. (Ite Edomë 22:6; 27:11) Ngo nemene la nyine tro nyidroti a kuca? Loi e tro nyidro a pane amamai tulu kowe la itre nekönatr. Nge, loi e tro fe nyidroti a menyik, ngöne la kola ini nyudreni la aqane troa thele iheetr ka loi. Matre, ame hë la nyudreni a ië iheetr, tha tro jë kö nyudreni lai a mekune hi la itre sipu aja i nyudren, ngo tro pe a meku Iehova la Akötresie hnei nyudreni hna nyihluen.

15. Nemene la ka xatua së troa axecië mekune hnyawa?

¹⁵ Tusi Hmitrötr la ka xatua së troa axecië mekun hnyawa me amadrinë Iehova. Matre, ijiji së asë hi troa iëne la hnaheetr hne së hna ajan. Ketre, tha hna amekötine kö laka, troa cangön hnene itre xa trejin. Ngo ame pe, loi e tro sa thupëne matre tro pala hi a porop la hnaheetre së, me amamane la thiina ka ipië me metrötr. Nge loi e troa ihmeku la hnaheetre memine la hna troa kuca, nge hna majemine hnene la itre atrene la nöj.

16. Pine nemene matre jole pi hë troa öhnyi iheetr ka lolo?

 ¹⁶ Nyipici laka, tha ka hmaloi kö troa öhnyi iheetre ka lolo, ke itre setroa a salemëne la itre iheetr hna ajan hnene la fen. Kola mama e cili la itre iheetr ka hopatr, nge ka fedre koi ngönetrei, tune la itre jupes, me ikimonu, me igödraië me costard me trauziz. Ngo, tru la madrine ne la itre trejine la kola öhne la easa isine pala hi troa heetre hnyawa. Nge, tru catre hmaca kö la madrine ka eje the së la easa atrunyi Iehova, nge tha mekune hë së lo itre traeme hne së hna nue troa thele iheetr ka ijij.

17. Nemene la itre ewekë ka aijijëne la ketre trejin troa hna ienaj?

¹⁷ Ijije kö tro la ketre trejine trahmanyi a hane hna ienaj? Hna amekötin ekö kowe la angetre Isaraela troa hna ienaj. Ngo eje hi laka, tha easë hmaca kö fene la Trenge Wathebo i Mose. (Levitiko 19:27; 21:5; Galatia 3:24, 25) Ame ngöne la itre xa nöj, pëkö ejolene troa hetre ienaj e hna xöje hnyawan, ke tha kolo kö lai a ajolëne la itre atr troa drenge la maca ka loi. Nge hetre itre trejine fe ka trene hnëqa, nge ka hna ienaj. Ngo, hetre itre xan pena ka xele ma hna ienaj. (1 Korinito 8:9, 13; 10:32) Ame pena ha ngöne la itre xa nöj, tha loi kö kowe la itre atr troa öhne la ketre keresiano ka hna ienaj. Tha angeice hë lai a atrunyi Akötresie, nge e cili, hetre gele i angeice hë xajawa i Iehova.—1 Timoteo 3:2, 7; Roma 15:1-3.

18, 19. Mika 6:8 a xatua së tune kaa?

¹⁸ Easa madrine laka, tha hnei Iehova kö hna qaja wengëne la itre iheetr ka loi me ka ngazo. Hnei Nyidrëti pe hna nue së troa huliwane la inamacane së, matre tro sa atreine xomi mekune hnyawa, nge thenge pala hi la itre trepene meköti Nyidrë. Matre loi e troa mama ngöne la aqane ië hnaheetr me aqane iseji së ka hape, hetre aja së troa nyihlue i Akötresie cememine la hni ka ipië.—Mika 6:8.

¹⁹ Atre hnyawa hi së ka hape, ka hmitrötr Iehova nge ka wië Nyidrë, matre ame la itre trepene meköti Nyidrë, tre ka draië mina fe. Maine ka ipië së, tro së lai a thele troa xötrethenge la itre trepene meköti Iehova. Nge tro fe la thiina cili a upi së troa metrötrëne la itre atr, me aqane wai ewekë i angatr.

20. Nemene la thangane la aqane heetre së koi itre xan?

²⁰ Loi e tro la aqane heetre së a amamane hnyawa laka, Itretre Anyipici Iehova së. Nge ngacama ka draië la itre trepene meköti Iehova, ngo easa madrine troa trongëne itre ej. Matre, ame e cailo fen, kola qaja aloine la itre trejin pine la aqane heetre i angatr, me aqane ujë i angatr. Angatre hi lai a upe la itre atr ka hetre hni ne ajan troa drenge la maca ne iamele, me atrunyi Iehova, me amadrinëne la hni Nyidrë. Haawe, e tro pala hi sa huliwane la inamacane së göi aqane troa heetr, tro hë së lai a atrunyi Iehova, Atre thaipi Nyidrëti kö hnene “la atrune me mingeming.”—Salamo 104:1, 2.