1-2. (a) Pine nemene matre easa troa madrin e Amagedro? (b) Nemene la itre hnying hne së hna troa sa?

HNEI epuni fe kö hna hane dreng la itre atr, a qaja ka hape, ka ceitu hi la “Amagedro” memine la ketre isi atraqatr, maine ketre hulö pena? Tha celë kö la hna qaja hnei Tusi Hmitrötr. Ej a qeje Amagedro ka hape, ketre isi ka troa hamë madrine koi së! (Hna ama. 1:3) Ame ngöne la isi Amagedro, tha kolo kö a troa lep apatrene la nöjei atr asë. Ngo jëne mele së pe! Troa tune kaa?

² Tusi Hmitrötr a qaja ka hape, ame ngöne la isi Amagedro, kola troa lep apatrene la itre mus memine la itre atr ka ngazo, me amelene pe la itre atr ka meköt. Kolo fe a troa thupëne la ihnadro. (Hna ama. 11:18) Tro sa trotrohnine hnyawa la itre mekun cili, e hne së hna pane sa la itre hnying celë: Nemene la aliene la hna hape, Amagedro? Nemene la itre ewekë ka troa traqa qëmekene la ijine cili? Nemene la nyine tro sa kuca matre troa thupë së ngöne la isi Amagedro? Nemene la aqane tro sa mele nyipici qëmekene troa traqa la ijine cili?

3. (a) Nemene la aliene la hna hape, “Amagedro”? (b) Nemene la aqane amamane hnene la tusi Hna Amamane 16:14, 16, laka, tha ëjene kö la ketre götrane la Amagedro?

³ E jë la Hna Amamane 16:14, 16. Aca mama hi la hnaewekë “Amagedro” e hnine la Tusi Hmitrötr, nge hna ujën qa ngöne la hnaewekë qene Heberu hna hape, “Wetr Ne Megido.” (Hna ama. 16:16; ftn.) Ame Megido, tre, ketre traon e Isaraela ekö. (Ios. 17:11) Ame Amagedro ke, tha ëjene kö la ketre götran.  Kolo pe a qaja la itre ewekë ka troa traqa qëmekene tro “la nöjei joxu e celë fen’ asë” a icilekeu koi Iehova. (Hna ama. 16:14) Ngo ame ngöne la tane mekun celë, easa troa xome la hnaewekë “Amagedro” matre troa qaja la isi Iehova ka tru, ka troa traqa thupen la kola icilekeu hnene la itre joxu ne la fen. Nemene la ka amamane laka, ame Amagedro, tre, ketre ceitune hi? Ame la hnapan, tre, pëkö wetr e Megido. Ame la hnaaluen, tre, ka co palaha la nöj e Megido, matre thatreine kö troa lapan hnene me itre trongene isi angatr. Nge ame la hnaakönin, tre, tune la hne së hna troa ce wang ngöne la tane mekun celë, troa nyiqaane la isi Amagedro, ngöne la kola troa lep la nöje i Akötresie hnene la “ite joxu” ne la fen.

4. Hnauëne la Akötresieti a aceitunëne la isi ka tru tixenuë me Megido?

⁴ Pine nemene matre Iehova a aceitunëne la isi ka tru tixenuë me Megido? Ame ekö, nyimutre la itre isi hna kuca e Megido me ngöne la hnathupe i Iezerela. Ame itre xaa ijin, hnei Iehova hna xatuane la nöje i Nyidrë troa hun ngöne la itre isi. Drei la ketre ceitun. Ame “ngöne la ite tim’ e Megido,” hnei Akötresieti hna xatua Baraka, lo atre amekötin e Isaraela, matre troa ngaan la trongene isi Kanana, hna elemeken hnei Sisera. Hnei Baraka me Debora perofeta hna olene koi Iehova. Hnei nyidroti hna nyima, me hape: “Hetete hane ishi qa hnengödrai . . . me Sisera. Hna thei angate hnene la hneopegejë Kisona.”—A. ame. 5:19-21.

5. Nemene la eisapengönene la isi Amagedro memine la isi Baraka?

⁵ Hnei Baraka me Debora hna nyipune la nyima i nyidro, me hape: ‘Iehova fe, tro ha meci asë tune lai la itre ithupëjia me enëtilai; ngo tro la itretre hni nyidrë a tune la jö a xulujë memine la catre ne ej.’ (A. ame. 5:31) Ame ngöne la isi Amagedro, kola troa lep apatrene la itre ithupëjia me Akötresie, nge troa amelene la itre ka hnimi Nyidrë. Ngo hetre ketre ewekë ka isapengöne kö ngöne la lue isi cili. Ame e Amagedro, tha tro kö la nöje i Akötresieti a isi ke, pëkö jiane isi angatr! Tro pe angatr “a egöcate hnene la tingetinge me lapaun” koi Iehova me trongene isi Nyidrë.—Is. 30:15; Hna ama. 19:11-15.

6. Nemene la aqane tro Akötresieti a lep apatrene la itre ithupëjia me Nyidrë e Amagedro?

⁶ Nemene la aqane tro Akötresieti a lep apatrene la itre ithupëjia me Nyidrë e Amagedro? Nyimutre la itre aqane tro Nyidrëti a kuca, jëne la itre sa, me samek, me wene mani ka tru. (Iobu 38:22, 23; Ezek. 38:19-22) Nyidrëti fe a troa upe la itre ithupëjia me Nyidrë troa itö ihumuth. (2 A. l. ite jo. 20:17, 22, 23) Nge Nyidrëti a troa upe la itre angela troa humuthe la itre atr ka ngazo. (Is. 37:36) Tro kö Akötresieti a hun ngöne la isi. Kola troa lep apatren asë la nöjei ithupëjia me Nyidrë. Nge troa mele pe la itre ka meköt.—Ite edomë 3:25, 26.

7-8. (a) Thenge la hna qaja ngöne 1 Thesalonika 5:1-6, nemene la maca hna troa tro fë hnene la itre musi ne la fen? (b) Pine nemene matre hetre ethane la maca cili?

⁷ Qëmekene la “drai Iehova,” kola troa qaja ka hape, ‘Tingetinge hë me lapa xetietë.’ (E jë la 1 Thesalonika 5:1-6.) Ame la “drai Iehova” ngöne 1 Thesalonika 5:2, tre, kola qaja “la akötr atraqatr.” (Hna ama. 7:14) Nemene la aqane tro sa atre la ijine kola troa nyiqane la akötr cili? Tusi Hmitrötr a qaja ka hape, troa tro fë la ketre maca ka ketrepengön. Celë hi ka troa amamane laka, easenyi hë matre nyiqane pi la akötr atraqatr.

⁸ Kola qaja ka hape, ‘tingetinge hë me lapa xetietë.’ Pine nemene matre itre musi ne la fen a tro fë la maca cili? Tro jë kö la itre hmi a  ce xöle me angatr? Maine jë, eje hi. Ame pe, atre hi së laka, ketre trengathoi lai hna sil hnene la itre dremoni, nge ka hetre ethane catr. Tro la itre atr a mekun laka, tingetinge hë la mele i angatr, ngo ame pe, kolo hi lai a nyiqane la akötr atraqatr. Eje hi, “canga traqapi koi angate la hnëjin, tune la aköte sile kowe la föe ka upune.” Nge tune kaa kowe la itre hlue i Iehova ka mele nyipici? Maine jë, troa asesëkötrë angatr ngöne la kola troa nyiqane la drai Iehova, ngo ame pe, ka hnëkë hë angatr.

9. Hapeu, tro kö Iehova a canga lep apatren asë la nöje i Satana? Qejepengöne jë.

⁹ Tha tro kö Iehova a canga lep apatren asë la nöje i Satana, tune lo aqane kuca i Nyidrëti ekö ngöne lo ijine i Noa. Nyidrëti a troa pane lep apatrenyi Babulona Atraqatr, ene la itre hmi ka thoi. Thupene lai, ngöne la isi Amagedro, Nyidrëti a troa lep apatrene la nöje i Satana, ene la itre politik, itre trongene isi, me itre ka salem. Tro sa pane ce wang la aqane trongene la lue ijine cili.

10. Thenge la hna qaja ngöne Hna Amaman 17:1, 6, me 18:24, pine nemene matre Iehova a troa lep apatrene lo Babulona Atraqatr?

¹⁰ “Hna amekötin kowe la föe ne gojeny ka hlemu catr.” (E jë la Hna Amaman 17:1, 6; 18:24.) Hnei Babulona Atraqatr hna silitrengathoi Akötresie, matre pëhë metrötre ne la itre atr kowe la ëje i Nyidrë. Tune la ketre föe ne gojeny, hnene la hmi ka thoi hna nuetriji Iehova me sajuëne la itre musi atr. Hnene la hmi ka thoi hna qanangazone la itre ka mejiune kowe ej me thapa la itre mo i angatr. Nge alanyimu la itre atr hnei angeice hna humuth, tune la itre xaa hlue i Akötresieti ekö. (Hna ama. 19:2) Nemene la aqane tro Iehova a lep apatrene lo Babulona Atraqatr?

11. Nemene la “öni ka ses ka madra palulu,” nge nemene la aqane tro Akötresieti a lep apatrene lo Babulona Atraqatr?

¹¹ Jëne la “treene lao jian” ne la “öni ka ses ka madra palulu,” tro Iehova a lep apatrene “la föe ne gojeny ka hlemu catr.” Ame la öni cili, tre, ej a nyihatrene la organizasio hna hape,  Nations Unies. Ame la ala treene lao jian, tre, kola nyihatrene la itre mus ka sajuëne la organizasio cili. Ame ngöne la ijin hna sa hnei Akötresie, tro la itre ka kuci politik a lepi Babulona Atraqatr. Tro angatr a “thapa la nöjei ewekë i angeic, matre cile xöe pi angeic.” Eje hi, angatr a troa thapa la itre mo i Babulona Atraqatr, me amamane koi nöjei atr la engazone ej. (Hna ama. 17:3, 16) Pine laka troa canga paatre hnei Babulona Atraqatr, kösë caa drai ne tro hi a lep. Troa sesëkötr hnene la itre ka sajuëne ej, ke, eje palahi a sipu selën, me hape: “Eni a lapa tune la isola, nge tha sine föe kö ni, nge tha tro kö ni a hane atre la imecitrij.”—Hna ama. 18:7, 8.

12. Pine nemene matre tha tro kö Iehova a nue la itre nöj, matre troa lep la nöje i Nyidrë?

¹² Tha tro kö Akötresieti a nue la itre nöj matre troa lep la nöje i Nyidrë. Angatr a madrine troa sajuëne la ëje i Nyidrë. Hnei angatr hna drengethenge Nyidrë me trotriji Babulona Atraqatr. (Itre hu. 15:16, 17; Hna ama. 18:4) Ketre, hnei angatr hna xatuane la itre xan troa kötr qaathene ej. Celë hi matre, tha tro kö a lep la itre hlue i Iehova hnei “hulö.” Ame pe, nyipiewekë tro angatr a catre lapaun, matre xomihnine la itre ewekë ka troa traqa.

13. (a) Drei lae Gog? (b) Thenge la hna qaja ngöne Ezekiela 38:2, 8, 9, pine nemene matre Gog a troa lepe la nöje i Akötresie?

¹³ Isi Gog. (E jë la Ezekiela 38:2, 8, 9.) Thupene la hna lep apatrene la nöjei hmi ka thoi asë, caasi pe hi la hmi ka troa lapa, ene la hmi ka wië i Iehova. Tru catre la trenge elëhni Satana. Hnene la “trengewekë ka ngazo,” ene la itre trengathoi hna sil hnene la itre dremoni, hna upe la itre nöj troa lep la itre hlue i Iehova. (Hna ama. 16:13, 14) Hna hëne la itre nöj cili hna acasin ka hape, “Gog ate kë zin’ e Magog.” Ame la angatr a lep la nöje i Iehova, kolo hi lai a nyiqane la isi Amagedro.—Hna ama. 16:16.

14. Nemene la hna troa atrehmekun hnei Gog?

¹⁴ Gog a mejiune kowe la “ime i at,” ene la itre trongene isi angeic. (2 A. l. ite jo. 32:8) Ngo easa mejiune koi Iehova Akötresi  së. Ame kowe la itre nöj, tha ka inamacane kö la aqane ujë së. Pine nemen? Ngacama, ka tru trene mene Babulona Atraqatr, ngo tha hna amele angeice kö hnene la itre haze i angeic! (Hna ama. 17:16) Celë hi matre, kola mekun hnene la itre nöj laka, tha jole kö troa lep apatrenyi së. “Tune la iawe a he la nöj,” angatr a troa lep apatrene la nöje i Iehova. (Ezek. 38:16) Ngo canga tro hi angatr a öhn laka, pëhë jëne kötre i angatr. Tui Farao ekö ngöne lo Hnagejë Ka Palulu, Gog a troa isi me Iehova.—Eso. 14:1-4; Ezek. 38:3, 4, 18, 21-23.

15. Nemene la hna troa kuca hnei Iesu ngöne la isi Amagedro?

¹⁵ Tro Keriso me itre trongene isi nyidrë a isigöline la nöje i Akötresie, me lep apatrene la itre nöj me itre trongene isi angatr. (Hna ama. 19:11, 14, 15) Ngo tune kaa Satana, lo ithupëjia me Iehova, lo ka thoi kowe la itre nöj, me upi angatr troa lep la nöje i Akötresie ngöne la isi Amagedro? Iesu a troa kuië angeic me itre dremoni hnine la hnaop ka jui, koi caa thauzane lao macatre.—Hna ama. 20:1-3.

16. (a) Nemene la aqane tro sa amamane laka, easa ‘atre Akötresie’? (b) Nemne la ka troa traqa kowe la itre ka atre Iehova e Amagedro?

¹⁶ Maine easa xötrei atre la nyipici maine ekö pena, ngo loi e tro sa amamane laka, easa ‘atre Akötresie’ me “drengethenge la maca ka loi göne la Joxu së Iesu.” Celë hi nyine tro sa kuca matre troa mele pe ngöne la isi Amagedro. (2 Thes. 1:7-9) Easa ‘atre Akötresie’ ngöne la easa atre la itre hnei Nyidrëti hna ajan me xelen, me atre la itre wathebo i Nyidrë, me drengethenge Nyidrë, me atrunyi Nyidrëti hmekuje hi. (1 Ioane 2:3-5; 5:3) Ame la itre ka atre Akötresie, angatre hi la “hna atre hnei nyidrë” nge itre ka troa mele pe e Amagedro! (1 Kor. 8:3) Tune kaa? Maine tro sa kuca la itre ewekë cili, tro ha atre së hnei Akötresie, nge tro hë Nyidrëti a kepe së. (1 Kor. 8:3) Nge tro sa mele pe ngöne la isi Amagedro!

17. Kola hapeue la troa “drengethenge la maca ka loi göne la Joxu së Iesu”?

¹⁷ Ame “la maca ka loi göne la Joxu së Iesu,” tre, kola qaja la nöjei ini hna hamën hnei  Iesu, e hnine la Wesi Ula i Akötresie. Easa drengethenge Iesu, ngöne la easa trongën itre ej, me amë panëne la Baselaia ngöne la mele së. Loi e tro fe sa drengethenge la itre hna amekötin hnei Akötresie, me cainöjëne la Baselaia i Nyidrë. (Mat. 6:33; 24:14) Ketre, loi e tro sa sajuëne la itre trejin me Keriso ngöne la huliwa i angatr ka sisitria.—Mat. 25:31-40.

18. Nemene la aqane tro Keriso memine la itre hna iën, a amanathithine la itre ka xatua angatr?

¹⁸ Easenyi hë tro la itre hna iën a amanathithine la “itre xa mamoe” göne la ixatua i angatr. (Ioane 10:16) Tune kaa? Qëmekene troa nyiqane la isi Amagedro, elë asë hë la ala 144 000 hnengödrai eë, me kapa la mel ka pë pun. Tro angatr a sine la trongene isi Akötresie ka troa lep apatrenyi Gog, me amelene “la ka ala nyimu atraqatr,” itre hlue i Iehova. (Hna ama. 2:26, 27; 7:9, 10) Eje hi, ketre manathith ka tru kowe la ka alanyimu troa sajuëne la itre hlue i Iehova hna iën e celë fen!

19-20. Ngacama tru catre la itre jol, ngo nemene la aqane tro sa mele nyipici ngöne la ijine la pun?

¹⁹ Ame ngöne la itre drai tixenuë, nyimutre la itre jol hna melën hnene la nöje i Iehova. Ame pe, ijije hi tro sa madrin me xomihnine itre ej. (Iako. 1:2-4) Ame la ketre ewekë ka troa xatua së, tre, troa catre thith. (Luka 21:36) Loi e tro fe sa inin me lapa mekun la Wesi Ula i Akötresie odrai, memine fe la itre ewekë hna perofetan ka troa eatr. (Sal. 77:12) Maine celë hi hne së hna kuca nge easa catre cainöj, tro ha catrecatre la lapaun me mejiune së!

²⁰ Pane mekune jë la etrune la madrine së, thupene la hna lep apatrene lo Babulona Atraqatr me thupen e Amagedro! Nge the qaja palaha elany, la kola troa metrötrëne la ëje i Akötresie me musi Nyidrë, hnene la nöjei atr asë! (Ezek. 38:23) Celë hi matre, kola trengeneune la isi Amagedro hnene la itre ka atre Akötresie, me drengethenge la Nekö i Nyidrë, me mele nyipici utihë la pun.—Mat. 24:13.