1. Pine nemene matre loi e tro sa drengethenge Iehova?

LOI e troa drengethenge * Iehova ke, Nyidrëti la Atre Xupe la nöjei ewekë asë. Meköti e tro Nyidrëti a qaja la nyine tro sa kuca. (Hna ama. 4:11) Ketre, easa drengethenge Iehova ke, ka lolo me meköt la aqane musi Nyidrë. Hetrenyi fe la itre atr ka mus. Ngo isapengöne kö la aqane musi angatr me Iehova, Joxu ka inamacan, ka tru ihnimin me ka lolo me utipin.—Eso. 34:6; Rom. 16:27; 1 Ioane 4:8.

2. Thenge la tusi Heberu 12:9-11, pine nemene matre loi e tro sa drengethenge Iehova?

² Iehova a ajane tro sa drengethenge Nyidrë. Tha hnene kö laka, easa xoue Nyidrë, matre easa drengethenge. Ngo hnene pe la ihnimi së koi Nyidrë. Ame ngöne la tusi Paulo koi angetre Heberu, hnei nyidrëti hna qaja ka hape, loi e tro sa “dreng asisitriane la Keme së” ke, Nyidrëti a ini së matre “nyine loi koi së.”—E jë la Heberu 12:9-11.

3. (a) Tro sa drengethenge Iehova tune kaa? (b) Nemene la itre hnying hne së hna troa sa?

³ Easa drengethenge Iehova, ngöne la easa isi memine la aja së troa ketre sipu axecië mekun, göne la loi me ngazo. (Ite edomë 3:5) Maine atre hnyawa hi së la itre thiina i Iehova, tro ha hmaloi koi së troa drengethenge Nyidrë. Pine nemen? Pine laka, itre eje la ka upi Nyidrë troa kuca la itre ewekë. (Sal. 145:9) Haawe, maine tro sa atrepengöi Iehova  hnyawa, tro ha kökötre la ihnimi së koi Nyidrë. Nge tro hë sa kuca la nöjei ewekë asë ke, hetre aja së troa kuca, ngo tha hnene kö laka, hna musinë së. Ketre, tro hë sa kuca la aja i Iehova me sisine la ngazo. (Sal. 97:10) Ngo pine nemene matre jol e itre xaa ijin, troa drengethenge Iehova? Nge nemene la ini hna xom hnene la itre qatre thup me itre kem me thin, qa ngöne la tulu i Nehemia Gavena me Dravita joxu, me Maria thine i Iesu? Tro la tane mekun celë a sa la itre hnying.

4-5. Thenge la tusi Roma 7:21-23, pine nemene matre jole koi së troa drengethenge Iehova?

⁴ Ame la pane kepin matre jol troa drengethenge Iehova, tre, itre atr ka ngazo së nge tha ka pexeje kö. Ame itre xaa ijin, tha canga drengethenge Akötresieti kö hne së. Hnei Adramu me Eva hna tha idrei, me ketre sipu axeciëne la ka loi me ka ngazo. (Gen. 3:22) Ame enehila, alanyimu la itre ka wangaconyi Akötresie. Angatr a nyitipu Adramu me Eva, me ketre sipu amekötine la ka loi me ka ngazo.

⁵ Tha ceitu i easë kö me angatr. Atrepengöi Iehova hnyawa hi së, nge tru la ihnimi së koi Nyidrë. Ngo ame pe, jol koi së troa catre kuca la aja i Iehova. Celë hi la hna melën hnei Paulo aposetolo. (E jë la Roma 7:21-23.) Tui Paulo, easa ajane troa kuca la itre ewekë ka lolo xajawa i Iehova. Celë hi matre, loi e tro palahi sa isi memine la aja troa kuca la itre ewekë ka ngazo.

6-7. Nemene la hnaaluene kepin, matre jol troa drengethenge Iehova? Qaja jë la ketre ceitun.

⁶ Ame la hnaaluene kepin, tre, hetrenyi la itre hna majemin me itre aqane mekun ne la itre atr ngöne la isa nöje i angatr. Alanyimu la itre ka icilekeu memine la itre hna qaja hnei Iehova. Celë hi matre, loi e tro palahi sa thupën wanga tro fe sa ixomi thiina. Hanawang la ketre ceitun.

⁷ Ame kowe la itre thöth enehila, tre, loi e tro nyudreni a huliwa catr matre troa trenamo. Celë hi hna melën hnei Mary. * Qëmekene tro angeic a atre Iehova, hnei angeic hna ini ngöne la itre uma ne ini ka tru. Hna iele angeic hnene la itre atrene la hnepe lapa i angeic troa thele huliwa hna nyithupene hnyawa, matre troa metrötrë angeic. Celë fe hi hnei angeic hna ajan. Ame hë lo angeic a atre Iehova me acatrene la ihnimi angeic koi Nyidrë, kolo ha saze la mekuna i angeic. Ngo tha ka hmaloi kö. Öni angeic: “Ame itre xaa ijin, eni a öhn la ketre huliwa hna nyithupene hnyawa. Ngo atre hi ni laka, troa sewe ni troa nyihlue i Iehova. Hnene la aqane hetru ni matre jol troa canga thipëne la huliwa. Ngo hnenge palahi hna sipo Iehova troa xatua ni, matre tha tro kö ni a xome la ketre huliwa ka troa sewe ni troa nyihlue i Nyidrë.”—Mat. 6:24.

8. Nemene la hne së hna troa ce wang?

⁸ Eje hi, hetre eloine la troa drengethenge Iehova. Ngo hetre ketre kepin, matre loi e troa drengethenge hnene la itre ka cilë hnëqa, tune la itre qatre thup me itre kem me thin. Angatr a troa xatuane la itre xan. Easa troa ce wang la itre xaa tulu qa hnine la Tusi Hmitrötr, ka ini së la aqane troa cilëne hnyawa la hnëqa së, matre troa amadrinë Iehova.

9. Nemene la itre jol ka traqa koi Nehemia?

⁹ Hnei Iehova hna acile la itre qatre thup, matre troa thupëne la nöje i Nyidrë. (1 Pet.  5:2) Hetre ini hna troa xom hnene la itre qatre thup qa ngöne la aqane nyihnyawane Nehemia la nöje i Iehova. Nehemia ekö la ketre gavena e Iudra, nge nyimutre la itre hnëqa i angeic. (Neh. 1:11; 2:7, 8; 5:14) Pane mekune jë la itre jol ka traqa koi Nehemia. Hnei angeic hna öhn laka, tha metrötrëne kö la ēnē hnei angetre Iudra. Angatr a kuca la itre ewekë ka ngazo. Tha hnei angatre kö hna hamëne la edrö i angetre Levi, tune lo hna amekötin e hnine la Wathebo i Iehova. Nge tha hnei angatre kö hna metrötrëne la sabath. Ketre, hnei angatr hna faipoipo memine la itre föe ka tha nyihlue i Iehova kö. Loi e tro Nehemia a kuca la ketre ewekë.—Neh. 13:4-30.

10. Nemene la hna kuca hnei Nehemia, matre troa atreine cile kowe la itre jol?

¹⁰ Tha hnei Nehemia kö hna musinëne la nöj, matre troa sajuëne la itre mekuna i angeic. Hnei angeice pe hna sipo ixatua koi Iehova jëne la thith, me inine la nöje i Iehova jëne la Wathebo i Nyidrë. (Neh. 1:4-10; 13:1-3) Hnei Nehemia mina fe hna metrötr. Hnei angeic hna ce huliwa memine la nöj, ngöne lo angatr a ce xup la itre hag e Ierusalema.—Neh. 4:15.

11. Thenge la hna qaja ngöne 1 Thesalonika 2:7, 8, nemene la aqane tro la itre qatre thup a ujë kowe la ekalesia?

¹¹ Maine jë, isapengöne kö la itre jol hna cile kow hnene la itre qatre thup me Nehemia. Ngo ame pe, loi e tro angatr a nyitipu angeic ngöne la kola traqa la itre jol. Loi e troa catre huliwa, matre troa xatuane la itre trejin. Ketre, tha angatre kö a pi draië me pi mama fë la hnëqa i angatr. Angatre pe a thiina ka menyik kowe la ekalesia. (E jë la 1 Thesalonika 2:7, 8.) Angatr a ithanata amenyikeny ke, ka metrötre i angatr me hnime la itre xan. Öni Andrew, ketre qatre thup laka, nyimu macatre hë enehila: “Maine tro la ketre qatre thup a loi thiina me menyik,  tro ha hetre thangane kowe la itre trejin. Troa hetre aja i angatr troa ce huliwa memine la itre qatre thup.” Öni Tony, ketre qatre thup: “Hnenge palahi hna thel troa trongëne la hna qaja ngöne Filipi 2:3, me wangatrune la itre xan. Celë hi ka xatua ni, matre tha tro kö ni a musinëne la itre trejin troa drei ni.”

12. Pine nemene matre loi e tro la itre qatre thup a hni ka ipië?

¹² Loi e tro la itre qatre thup a hni ka ipië tui Iehova. Ngacama Iehova la Atre Musi e koho hnengödrai me e celë fen, ngo hnei Nyidrëti hna “aconyi nyidëti kö,” matre troa adraiëne la itre “ka pë mo qa ngöne la xaxau.” (Sal. 18:35; 113:6, 7) Methi Iehova la itre atr ka pi tru.—Ite edomë 16:5.

13. Pine nemene matre itre qatre thup a thupëne la aqane ithanata i angatr?

¹³ Ame la qatre thup ka drengethenge, tre, nyidrëti a thupëne la aqane ithanata i nyidrë. Tha aja i nyidrëti kö troa ithanata akökötreny ngöne la kola tha metrötrë nyidrë. (Iako. 1:26; Gal. 5:14, 15) Öni Andrew: “Ame itre xaa ijin, eni a pi sa angazone kowe la trejin ka tha metrötrë ni. Ngo, hnenge palahi hna lapa mekun la itre hna melën hnene la itre hlue i Iehova ekö. Trotrohnine hë ni la enyipiewekën troa hni ka ipië me thiina ka menyik.” Ame la qatre thup ka drengethenge Iehova, tre, nyidrëti a ithanata amenyikeny me hnime la itre trejin me itre xaa qatre thup.—Kol. 4:6.

14. Nemene la hnëqa ne la itre kem qaathei Iehova, nge nemene la nyine tro angatr a kuca?

¹⁴ Hnei Iehova hna ahnith kowe la itre kem, itre he ne la hnepe lapa, troa inine me iujine me hajine la itre nekönatr. (1 Kor. 11:3; Efe. 6:4) Ngo tha kolo kö lai a hape, tro angatr a sipu kuca la mekuna i angatr. Iehova la ka eköth la hnepe lapa. Celë hi matre, itre kem a thupën me nyihnyawane la hnepe lapa i angatr. (Efe. 3:14, 15) Ame la itre kem ka drengethenge me amadrinë Iehova, angatr a xome hnyawa la hnëqa i angatr. Nyimutre la itre ini hnei angatr hna troa xom qa ngöne la hna melën hnei Dravita joxu.

15. Pine nemene matre ketre tulu ka lolo Dravita joxu kowe la itre kem?

¹⁵ Hnei Iehova hna acili Dravita, matre troa he ne la hnepe lapa i angeic, me elemekene la nöje Isaraela. Ka trene men Dravita joxu. Ame itre xaa ijin, ngazo la aqane musi Dravita, nge tria la aqane ameköti ewekë i nyidrë. (2 Sam. 11:14, 15) Ame pe, hnei Dravita palahi hna drengethenge Iehova. Tune  kaa? Hnei nyidrëti hna kapa la ihaji qaathei Iehova. Ame lo nyidrëti a thith, nyidrëti a qaja asë la aliene hni nyidrë. Nge nyidrëti a drengethenge la itre eamo i Iehova. (Sal. 51:1-4) Ketre, hnei Dravita hna hni ka ipië. Hnei nyidrëti hna kapa la itre eamo qaathene la itre trahmany me föe. (1 Sam. 19:11, 12; 25:32, 33) Hnei Dravita hna xomi ini qa ngöne la itre tria i nyidrë, me amë panëne la huliwa i Iehova ngöne la mele i nyidrë.

16. Nemene la itre xaa ini hna xom hnene la itre kem qa ngöne la tulu i Dravita?

¹⁶ Nemene la itre xaa ini hna xom hnene la itre kem qa ngöne la tulu i Dravita? Tha tro kö angatr a huliwane menune la aqane musi angatr. Loi e tro angatr a atrehmekune la itre tria i angatr, me kapa la itre eamo hna hamën hnei itre xan. Tro ha metrötrë angatr ke, ka hni ka ipië. Ame la epuni a ce thith memine la fami epun, loi e troa fe la aliene hni epun. Tro ha mama koi angatr laka, epuni palahi a thele ixatua thei Iehova. Ngo ame la ka sisitria, tre, troa amë panëne la huliwa i Iehova ngöne la mele i epun. (Deut. 6:6-9) Tro hë epuni a amamai tulu kowe la hnepe lapa i epun!

17. Nemene la hnëqa hna hamën hnei Iehova kowe la itre thin?

¹⁷ Hnei Iehova hna hamë hnëqa kowe la itre thin, troa thupëne la itre nekönatr. (Ite edomë 6:20) Nyipici laka, hetre eloine la hna kuca me qaja hnei thin. (Ite edomë 22:6) Hanawang la itre ini hna troa xom hnene la itre thin qa ngöne la tulu i Maria, thine i Iesu.

18-19. Nemene la ini hna xom hnene la itre thin qa ngöne la tulu i Maria?

¹⁸ Atrepengöne hnyawa hi Maria la Itre Hna Cinyihan. Hnei eahlo palahi hna metrötrë Iehova me acatrene la aqane imelekeu i nyidro. Aja i Maria troa kuca hmekuje hi la aja i Iehova, ngacama kola saze la mele i eahlo.—Luka 1:35-38, 46-55.

¹⁹ Nemene la itre ini hna xom hnene la itre thin qa ngöne la tulu i Maria? Ame la hnapan, nyipiewekë troa inine la Tusi Hmitrötr me catre thith, matre acatrene la aqane imelekeu me Iehova. Ame la hnaaluen, loi e troa canga saze aqane mel, matre kuca la aja i Iehova. Maine jë, hnene la kem me thine i epun hna wesitrë epuni ekö me ithanata akökötreny. Celë hi matre, epuni ha mekun laka, aqane tro hi lai a hetrune la itre nekönatr. Ketre, ngacama hnei Iehova hna ini epun la aqane troa hiane la itre nekönatr, ngo jol palahi  troa thele tingeting me trotrohni nyudren, ngöne la nyudreni a tha idrei. (Efe. 4:31) Maine celë hi hnei epuni hna melën, sipo ixatua jë koi Iehova. Öni Lydia, ketre thin: “Ame itre xaa ijin, eni a catre thith matre tha tro kö a ithanata angazony kowe la neköng trahmany ka tha idrei. Qëmekene troa ithanata, eni a pane cil me thithi thaup. Hnei Iehova hna xatua ni, matre troa tingeting la hning.”—Sal. 37:5.

20. Nemene la jol hna cile kow hnene la itre thin, nge nemene la aqane troa cile catr qëmekene la jol cili?

²⁰ Jol kowe la itre xaa thin troa amamane la ihnimi angatr kowe la itre nekönatr. (Tito 2:3, 4) Maine jë, tha hna nyihnyawane kö la mele i angatr ekö, me hnimi angatr hnei kem me thin. Ame pe, tha tro kö a nyitipu nyidro. Ame la thin ka drengethenge Iehova ke, nyiidroti a hnime la itre nekönatr. Tha ka hmaloi kö troa saze la aqane mekun me aqane ujë ekö. Ngo ame pe, ijije hi troa saze. E cili, troa hetre madrine e hnine la hnepe lapa.

21-22. Thenge la hna qaja ngöne Isaia 65:13, 14, nemene la itre eloin e tro sa drengethenge Iehova?

²¹ Öhne hi Dravita joxu la enyipiewekëne troa drengethenge Iehova. Öni nyidrë: “Meköti la ite hna ahnithe hnei Iehova, kola amadine la hni; wië la wathebo i Iehova, ate alaine la ite lue mek. Ke hna ainamacanëne la hlue i cilie hnen’ it’ ej; nge atraqate la june trongën’ it’ ej.” (Sal. 19:8, 11) Ame enehila, easa öhne la eisapengönene la itre ka drengethenge Iehova me itre ka thipetrije la itre eamo qaathei Nyidrë. Ame la itre ka drengethenge Iehova, angatr a “hë draië kola aciaci la hni.”—E jë la Isaia 65:13, 14.

²² Maine tro la itre qatre thup me itre kem me thin a drengethenge Iehova, tro ha tro loi la mele i angatr. Troa madrine me caasi la hnepe lapa memine la ekalesia. Ngo ame la ka sisitria, tre, angatr a amadrinë Iehova. (Ite edomë 27:11) Drei la ketre manathith ka tru koi së!