1. Nemene la hna melën hnene la itre trejine föe? (Wange ju la pane iatr.)

 EASA madrin laka, nyimutre la itre trejine föe e hnine la ekalesia ka catre nyihlue i Iehova! Ngacama angatr a cile kowe la itre jol, ngo angatr a sine la itre icasikeu me catre cainöj me hnime la itre trejin. Angatre fe a nyihnyawane la Uma Ne Baselaia. Itre xan a thupëne la itre kem me thine i angatr ka qatre hë. Ame itre xan, kola icilekeu hnene la itre atrene la hnepe lapa i angatr. Nge ame la itre xaa trejine föe, angatr a hetrune caasine la itre nekö i angatr me huliwa thatraqai nyudren.

2. Pine nemene matre loi e tro sa wangatrune la itre trejine föe?

² Pine nemene matre loi e tro sa wangatrune la itre trejine föe? Pine laka, kola wangaconyi angatr enehila. Celë hi matre, Tusi Hmitrötr a ithuecatre koi së troa metrötrë angatr. Celë hi hna kuca hnei Paulo aposetolo. Hnei nyidrëti hna ithuecatre kowe la ekalesia ne Roma troa kepe Fibi me ‘xatua angeic e kola aja ixatua.’ (Rom. 16:1, 2) Ame Paulo ke, atre Faresaio nyidrëti ekö. Nge ame koi angetre Faresaio, sisitria catre kö la itre trahmany hune la itre föe. Ngo pine laka, ketre Keresiano hë Paulo, matre hnei nyidrëti hna metrötrëne me thiina ka loi kowe la itre föe tui Iesu.—1 Kor. 11:1.

3. Nemene la aqane ujë i Iesu kowe la itre föe, nge nemene la aqane goeëne nyidrëti la itre föe ka kuca la aja ne la Keme i nyidrë?

³ Hnei Iesu hna metrötrëne la itre föe. (Ioane 4:27) Tha hnei nyidrëti kö hna wangacone la itre föe, tune la itre hene ne hmi angetre Iudra. Kola qaja ngöne la ketre itus ka hape: “Tha hnei Iesu kö hna ithanata akökötrenyi maine thaipiëne la itre föe.” Hnei nyidrëti hna wangatrune la itre föe ka kuca la aja ne la Keme i nyidrë, nge Nyidrëti a  goeë angatr tune la itre sipu xa i nyidrë. Nge ame la itre trahmany, tune la itre sipu trejin me nyidrë.—Mat. 12:50.

4. Nemene la hne së hna troa ce wang ngöne la tane mekun celë?

⁴ Hnei Iesu palahi hna xatuane la itre föe ka kuca la aja i Iehova. Hnei nyidrëti hna hnimi angatr me cilëgöli angatr. Tro sa ce wang la aqane tro sa nyitipu nyidrë.

5. Pine nemene matre tha ka hmaloi kö kowe la itre trejine föe troa hetre nyipi sinee?

⁵ Ame la itre trejin, tre, angatr a ajane troa hetre nyipi sinee. Ngo tha ka hmaloi kö kowe la itre trejine föe. Pine nemen? Hane hi la itre xaa hna melën. Öni Jordane *: “Tha ka faipoipo kö ni, matre kösë tha ka nyipiewekë kö ni e hnine la ekalesia.” Nge öni Kristen, ketre pionie ka cainöj ngöne la ketre nöj: “Ame la easa saze ekalesia, easa mekun ka hape, pëkö sinee së.” Ame la itre xaa trejine föe, tha ka hmi kö la itre atrene la hnepe lapa i angatr, matre tha loi kö la aqane imelekeu i angatr. Ketre, tha majemine kö angatr troa ce memine la itre trejin ne la ekalesia. Celë hi matre kösë pëkö sinee i angatr. Nge ame itre xan, angatr a umë ke, hna tithi angatr hnei mec. Ame pena itre xan, angatr a thupën la ketre sinee i angatr ka wezipo. Öni Annette: “Hnenge hna thipën la kola hë ni troa xen ke, pëkö ka thupë nenë.”

6. Thenge la Luka 10:38-42, nemene la aqane xatua Maretha me Maria hnei Iesu?

⁶ Hnei Iesu hna xomi ijine kowe la itre trejine föe ke, itre nyipi sinee angatr. Tro sa ce wang la aqane imelekeu i nyidrë me Maretha me Maria, lue ka tha faipoipo kö. (E jë la Luka 10:38-42.) Hnene la itre trengewekë i Iesu me aqane ujë i nyidrë, matre tha xou nyidroti kö troa ithanata me nyidrë. Ame lo Iesu a traqa kowe la hnalapa i nyidro, tha hnei Maria kö hna xou troa lapa ngöne la lue ca i Iesu, tune la itretre dreng. * Ame Maretha ke, kola wesitr pine laka, tha hna xatua angeice kö hnei Maria. E cili, hnei Maretha hna qaja la mekuna i angeic koi Iesu. Pine laka, lolo la aqane imelekeu i Iesu me nyidro matre hnei nyidrëti hna hamë ini koi nyidro. Hnei nyidrëti fe hna traqa lapa troa wai angatr ke, tru la ihnimi nyidrë koi nyidro me Lazaro. (Ioane 12:1-3) Nge ame la kola tithi Lazaro hnei mec, hnei Maretha me Maria hna canga sipo ixatua koi Iesu.—Ioane 11:3, 5.

7. Nemene la aqane tro sa wangatrune la itre trejine föe?

⁷ Ame la itre trejine föe, angatr a madrine troa iöhnyi memine la itre xaa trejin ngöne la itre icasikeu. Celë hi matre, nyipiewekë tro sa kepe angatre hnyawa, me ithanata me angatr, me wangatrunyi angatr. Öni Jordane: “Eni a madrin ngöne la itre trejin a amamane la ihnimi angatr koi ni. Itre xan a sipo ni troa ce cainöj me angatr, me olene la mekun hnenge hna hamën.” Eje hi, loi e tro sa wangatrune la itre trejine föe. Ketre, öni Kia: “Maine eni a paatre ngöne la hna icasikeu, atre hi ni laka, tro kö la ketre trejin a hë. Mama hi laka, ka tru la ihnimi angatr koi ni.”

8. Nemene la aqane tro sa nyitipu Iesu?

⁸ Tui Iesu, loi e tro sa xomi ijine kowe la itre trejine föe. Maine jë, tro sa hë  angatr troa ce xen. Ngo loi e tro palahi sa ithuecatrekeu ngöne la itre ijine cili. (Rom. 1:11, 12) Loi e tro la itre qatre thup a atreine waiewekë tui Iesu. Atre hi Iesu laka, tha ka hmaloi kö la mele ne la itre ka tha faipoipo kö. Öni nyidrëti fe ka hape, tha jëne madrine kö la troa faipoipo me hnaho. (Luka 11:27, 28) Maine easa ajane troa madrin, nyipiewekë tro sa amë panëne la huliwa i Iehova.—Mat. 19:12.

9. Nemene la aqane tro la itre qatre thup a wangatrune la itre trejine föe?

⁹ Loi e tro la itre qatre thup a wangatrune la itre trejine föe, ceitu me itre thin me itre xa. (1 Tim. 5:1, 2) Maine jë, tro la itre qatre thup a xomi ijin matre troa ithanata me angatr, qëmekene maine thupene la itre icasikeu. Öni Kristen: “Hnene la ketre qatre thup hna öhn laka, tru catr palaha hnei huliwang, matre hnei nyidrëti hna xatua ni. Eni a madrine la aqane wangatrunyi ni hnei nyidrë.” Eje hi, ame la ketre qatre thup a xomi ijine troa ithanata memine la itre trejine föe, angeice hi lai a wangatrunyi angatr. * Ketre, madrine catre Annette thupene la hnei eahlo hna ithanata memine la itre qatre thup. Öni  eahlo: “Celë hi ka aijijë huni troa iatre hnyawa. Tha xounge hë troa sipo ixatua koi angatr ngöne la itre ijine jol.”

10. Nemene la ka troa hamë madrin kowe la itre trejine föe?

¹⁰ Easa madrine ngöne la itre xan a wangatrune me olene la itre huliwa së. Maine pëkö ka hetre hni ne ole kowe la itre hne së hna kuca, tro hë sa kucakuca. Öni Abigail, ketre pionie ka tha faipoipo kö: “Itre xan a atre ni jëne kaka maine jëne la trejin me eni. Thatre ni hnyawa kö hnei angatr.” Ngo hane hi la hna melën hnei Pam, ketre trejine föe ka tha faipoipo kö, nge ka mesinare koi itre macatre. Hnei Pam hna bëeke hmaca kowe la nöje i eahlo, matre troa thupëne la kem me thine i eahlo. Ketre pionie palahi Pam enehila ngacama 70 hë lao macatre i eahlo. Öni Pam: “Ame la ka xatua ni troa catre nyihlue i Iehova ke, ene la hna qaja aloin me olene la itre hnenge hna kuca.”

11. Nemene la aqane wangatrune Iesu la itre föe ka xötrethenge nyidrë?

¹¹ Hnei Iesu hna wangatrune la itre föe ka xötrethenge nyidrë nge ka “ixatua hnene la itre ewekë i angatr.” (Luka 8:1-3) Hnei Iesu fe hna qaja amamane koi angatr la nyipici göi nyidrë me göne la aja i Akötresie. Hnei nyidrëti hna qaja ka hape, tro nyidrëti a mec nge troa amele nyidrëti hmaca. (Luka 24:5-8) Ketre, hnei Iesu hna canga thuemacanyine la itre föe laka, tro angatr a cile kowe la itre jol. Celë hi aqane hnëkëne nyidrëti ekö la itre aposetolo. (Mar. 9:30-32; 10:32-34) Ame lo kola othi Iesu, hnene la itre aposetolo hna kötr. Ngo ame pe la itre föe ka xötrethenge Iesu, hnei angatr hna ceme nyidrë utihë la nyidrëti a mec hune la sinöe.—Mat. 26:56; Mar. 15:40, 41.

12. Nemene la itre hnëqa ka tru hna hamën hnei Iesu kowe la itre föe?

¹² Hnei Iesu hna hamë hnëqa ka tru kowe la itre föe. Thupene la kola amele Iesu hmaca, hnei nyidrëti hna pane mama kowe la itre föe me upi angatr troa thuemacanyine la itre aposetolo. (Mat. 28:5, 9, 10) Ame ngöne lo Penetekos 33 M.K., hnene la itretre drei Iesu hna tiqa hnei uati hmitrötr, nge hetrenyi fe thei angatr la itre föe. E cili, matre atreine hë angatre qaja la “itre ewekë nyine haine i Akötresie” ngöne la nyimu qene hlapa.—Itre hu. 1:14; 2:2-4, 11.

13. Nemene la itre huliwa hna kuca hnene la itre trejine föe koi Iehova, nge nemene la aqane tro sa amamane la hni ne ole së koi angatr?

¹³ Loi e tro sa amamane la hni ne ole së kowe la itre trejine föe ka catre huliwa koi Iehova. Angatr a saen troa xom la Huliwa Ne Xupi Uma Ne Baselaia, me sine la itre ekalesia ka qaja la ketre qene hlapa, maine huliwa ngöne la Bethela. Angatre fe a xatuane la itre hna lepe hnei hulö, maine xom la huliwa ne ujë qene hlapa, maine pionie me mesinare. Ketre, tune la itre trahmany, itre trejine föe a sine la itre ini, tune la Ini Koi Itre Pionie, me Ini Koi Itre Ka Cainöj, me Ini Ne Gileada. Nge angatr a xatuane la itre föi angatr ka hetre hnëqa e hnine la ekalesia maine e hnine la organizasio i Iehova. Eje hi, maine tha xatua angatre kö hnene la itre föe i angatr, thatreine kö angatr troa “itre ahnahna” qaathei Akötresie. (Efe. 4:8) Loi e tro sa isa hnying ka hape: ‘Nemene la aqane tro ni a xatuane la itre trejine föe cili?’

14. Thenge la Salamo 68:11, nemene la hna kuca hnene la itre qatre thup?

 ¹⁴ Itre qatre thup a wangatrehmekune laka, “trongene isi ka alanyimu” la itre trejine föe nge itre ka catre cainöj. (E jë la Salamo 68:11, MN.) Celë hi matre angatr a hane thele ixatua thene la itre trejine föe. Abigail a madrin ngöne la itre trejin trahmany a hnyingë angeic la itre iamacany ka canga ketr la itre atr ne la teritoar. Öni angeic: “Eni a öhne laka, hetre göhneng ngöne la organizasio i Iehova.” Ketre, atre hnyawa hi la itre qatre thup laka, ijije hi tro la itre trejine föe ka macaj a xatuane la itre trejine föe ka co ngöne la itre ijine jol. (Tito 2:3-5) Epi tro sa hnim me amamane la hni ne ole së kowe la itre trejine föe!

15. Eu la ijine easa cilëgöline la itre trejine föe?

¹⁵ Ame itre xaa ijin, loi e tro sa cilëgöline la itre trejine föe. (Is. 1:17) Maine jë, tro sa xatuane la itre trejine föe hna mecitrij maine ka seihnacil, matre troa nyialiene la itre pepa. Maine pena tro sa ce tro memine la ketre trejine föe ka qatre hë koi droketre. Ijije fe tro sa cilëgöline la ketre pionie ka hetre hnëqa ngöne la organizasio. Maine jë, kola qaja angazo angeic pine laka, tha ijiji angeice kö troa catre cainöj tune la itre xaa pionie. Nemene la itre xaa aqane tro sa cilëgöline la itre trejine föe? Tro sa ce wang la hna kuca hnei Iesu.

16. Thenge la Mareko 14:3-9, nemene la aqane cilëgöli Maria hnei Iesu?

¹⁶ Hnei Iesu hna cilëgöline la itre trejine föe ngöne la kola qaja angazo angatr. Hnei nyidrëti hna cilëgöli Maria ngöne la kola wesitr hnei Maretha. (Luka 10:38-42) Hnei Iesu hmaca hna cilëgöli Maria ngöne la kola upezö angeic hnei itre xan. (E jë la Mareko 14:3-9.) Nge hnei nyidrëti hna qaja aloinyi Maria. Öni nyidrë: “Ka lolo hi la hna kuca hnei eahlo koi ni. . . . Ase hë eahlo kuca la hnei eahlo hna atrein.” Hnei nyidrëti fe hna qaja ka hape, troa atre la hna kuca hnei Maria ngöne “la itre götran ne la fen hna troa cainöjëne la maca ka loi.” Celë hi matre easë palahi a qeje Maria enehila. Ketre, hnei Iesu hna wangatrune la hna kuca hnei Maria me qaja ka hape, troa cainöjëne la maca e cailo fen. Eje hi, hna akeukawane la hni Maria hnene la itre trengewekë i Iesu!

17. Qaja jë la ketre ceitun ka amamane laka, nyipiewekë tro sa cilëgöline la itre trejine föe.

¹⁷ Hapeu, easë kö a hane cilëgöline la itre trejine föe? Pane mekune jë së la ketre trejine föe ka faipoipo nge tha ka hmi kö la föi angeic. Kola öhn hnene la itre xaa trejin laka, angeic palahi a traqa hmitr, me canga tro thupene la itre icasikeu. Ketre, tha ce traqa hmaca kö angeic memine la itre nekö i angeic. Celë hi matre, angatr a xöjetriji angeic me hape, ka loi tro angeic a catr memine la föi angeic. Ngo thatre kö angatr laka, angeic a kuca la hnei angeic hna atrein, nge föi angeic la ka axecië mekun kowe la itre nekönatr. Nemene la nyine tro sa kuca? Loi e tro sa qaja aloine lai trejine föe, matre tha tro kö la itre xan a xöjetriji angeic.

18. Nemene la itre xaa aqane tro sa wangatrune la itre trejine föe?

¹⁸ Easa wangatrune la itre trejine föe, ngöne la easa xatua angatr. (1 Ioane 3:18) Öni Annette, lo trejine ka thupëne la thine i angeic ka wezipo: “Itre xaa trejin a xatua ni troa thupë nenë. Ame itre xan,  angatr a tro fë xen koi nyio. Eni a öhne laka, kola hnimi ni me wangatrunyi ni e hnine la ekalesia.” Hnene fe la itre trejin hna xatua Jordane. Hnene la ketre trejin hna amamane koi angeic la aqane troa nyidrawane la loto i angeic. Öni angeic: “Eni a madrin ke, kola meku ni hnene la itre trejin.”

19. Nemene la aqane tro la itre qatre thup a xatuane la itre trejine föe?

¹⁹ Nyipiewekë tro la itre qatre thup a xatuane la itre trejine föe. Atre hi angatr laka, Iehova a ajane troa thupëne hnyawa la itre trejine föe. (Iako. 1:27) Celë hi matre angatr a nyitipu Iesu. Tha angatre kö a acili wathebo menu. Ngo angatre pe a thele troa trotrohnine la itre trejine föe. (Mat. 15:22-28) Ame la ketre qatre thup a xatuane la itre trejine föe, angeice hi lai a amamane la ihnimi Iehova memine la organizasio i Nyidrë. Hane hi la ka traqa koi Kia. Ame la kola atre hnene la atre thupëne la gurupe ne cainöje i angeic laka, angeic a saze uma, hnei nyidrëti hna canga thele troa xatua angeic. Öni Kia: “Tha eni kö a hnehengazo ke, jëne la itre hna qaja me kuca hnene la itre qatre thup, eni a öhn laka, ka nyipiewekë ni ngöne la ekalesia. Xecie koi ni laka, tro palahi a xatua ni ngöne la itre ijine jol.”

20-21. Nemene la aqane tro sa amamane la ihnimi së kowe la itre trejine föe?

²⁰ Alanyimu la itre trejine föe ka aja ixatua. Tui Iesu, loi e tro sa xomi ijin koi angatr me thele troa atrepengöi angatre hnyawa. Loi e tro fe sa amamane la hni ne ole së kowe la aqane catre huliwa i angatr koi Iehova. Nge loi e tro fe sa cilëgöli angatr.

²¹ Ame la Paulo a nyipune la tusi nyidrë koi angetre Roma, hnei nyidrëti hna qaja la 9 lao Keresiano föe. (Rom. 16:1, 3, 6, 12, 13, 15) Hnei Paulo hna qaja aloinyi angatr me ithuecatre koi angatr. Tui Paulo, loi e tro sa wangatrune la itre trejine föe e hnine la ekalesia. Easë hi lai a amamane la etrune la ihnimi së koi angatr, me amamane laka, ka sisitria catr angatr e hnine la ekalesia.