1-2. Nemene la hna qaja ngöne Ate Cainöj 11:6 göne la huliwa ne cainöj?

 AME ngöne la itre xaa nöj, alanyimu la itre atr ka ajane troa atre la maca ka loi. Angatr palahi a thele troa atre la aliene la Tusi Hmitrötr! Ame pena ngöne la itre xaa nöj, alanyimu la itre atr ka tha lapaune kö koi Akötresie, nge xele kö angatr ma drenge la maca ne la Tusi Hmitrötr. Tune kaa fe ngöne la nöje së? Ngacama xele kö la itre atr troa drei së, ngo Iehova a sipo së troa catre cainöj utihë la Nyidrëti a umuthe la huliwa.

² Ame ngöne la ijine hna sa hnei Iehova, tro hë Nyidrëti a umuthe la huliwa ne cainöj, “ame hna traqa pi la pun.” (Mat. 24:14, 36) Qëmekene troa traqa la ijine cili, ‘tha tro kö sa sawa la iwanakoime së.’ *—E jë la Ate Cainöj 11:6.

3. Nemene la hne së hna troa ce wang ngöne la tane mekun celë?

³ Ame ngöne la tane mekun hnapan, hne së hna ce wang la foa lao thiina ka nyipiewekë matre “troa thele atr.” (Mat. 4:19) Ame ngöne la tane mekun celë, tro sa ce wang la köni aqane tro sa acatrene la aja së troa cainöj ngacama nyimutre la itre jol. Tro fe sa ce wang la enyipiewekëne troa (1) amë panëne la huliwa ne cainöj, me (2) atreine xomihni aqeany, me (3) catre lapaun.

4. Pine nemene matre loi e tro palahi sa amë panëne la huliwa ne cainöj?

⁴ Hnei Iesu hna perofetane la itre ewekë ka troa traqa  ngöne la itre drai ne la pun. Atre hi nyidrë laka, tro la itre ewekë cili a ajolë së troa catre cainöj. Celë hi matre öni nyidrë, “hmeke jë.” (Mat. 24:42) Ame lo ijine Iwë Atraqatr, tha hna drei Noa kö hnene la itre atr ke, tru catre palaha la itre huliwa i angatr. Ketre tu së fe enehila, ijije hi troa ajolë së troa cainöj hnene la itre huliwa së. (Mat. 24:37-39; 2 Pet. 2:5) Celë hi matre, loi e tro palahi sa amë panëne la huliwa hna ahnithe koi së hnei Iehova.

5. Thenge la Itre Huliwa 1:6-8, troa kökötre tune kaa la huliwa ne cainöj?

⁵ Loi e tro sa wangatrune la huliwa ne cainöj. Hnei Iesu hna perofetan ka hape, thupene la meci nyidrë, tro palakö a kökötre la huliwa ne cainöj. (Ioane 14:12) Thupene la meci Iesu, hnene la itre xaa atre dreng hna nyi ie hmaca. Nge ame la kola amele Iesu hmaca, hnei Iesu hna kuca la ketre iamamanyikeu, nge nyimutre la itre ie hnei angatr hna ea. Hnei Iesu hna amamane koi angatr laka, pëkö ketre huliwa ka sisitria catre kö hune la huliwa ne cainöj. (Ioane 21:15-17) Qëmekene troa elë e hnengödrai, hnei Iesu hna upe la itretre drei nyidrë troa cainöjëne la maca utihë la cane la fene hnengödrai. (E jë la Itre Huliwa 1:6-8.) Itre macatre thupen, hnei nyidrëti hna aijijë Ioane aposetolo troa meköl goeëne la “drai i Joxu.” * Nge hnei Ioane fe hna öhne laka, jëne la ixatua ne la itre angela, troa tro fë la “maca ka loi nge ka epine palua” kowe la “nöjei nöj, me nöjei tribu, me nöjei qene hlapa, me nöjei atr.” (Hna ama. 1:10; 14:6) Eje hi, aja i Iehova tro sa catre cainöj utihë la ijine tro Nyidrëti a afenesine la huliwa.

6. Nemene la ka troa xatua së troa amë panëne la huliwa ne cainöj?

⁶ Maine tro sa lapa mekun la itre hnei  Iehova hna kuca koi së, tro hë sa amë panëne la huliwa ne cainöj. Nyidrëti a hamë së la göxen ngöne la nyipi ijin, ene la itre itusi hna fejan maine ngöne tablet, me itre nyine dreng, itre video, me itre emisio ngöne JW Télédiffusion. Hetrenyi ngöne la site së la itre itus hna ujën ngöne la 1 000 nge hetre munën lao qene hlapa! (Mat. 24:45-47) Ame ngöne la fen celë, kola aisane la itre atr hnei politik me hmi me mo. Ngo ame ngöne la nöje i Iehova, traqa koi 8 milio la itre hlue i Akötresie ka caas. Pane mekune jë së lo Draikatru 19 Eiperem 2019. Caasi hi la topik ne la hmakanyi hna ce wang hnene la itre Temoë Iehova e cailo fen. Nge ame fe lo lai hej, traqa koi 20 919 041 la itre atr ka atrune la Drai Ne Amekunën la meci Iesu. Easa madrin troa hane öhne la “iamamanyikeu” cili! Hapeu, tha kolo kö lai a upi së tro palahi a amë panëne la huliwa ne cainöj?

7. Tro la tulu i Iesu a xatua së tune kaa troa amë panëne la huliwa ne cainöj?

⁷ Maine tro palahi sa lapa mekune la tulu i Iesu, tro hë sa amë panëne la huliwa ne cainöj. Eje hi, pëkö ewekë ekö ka sewe Iesu troa tro fë la nyipici. (Ioane 18:37) Hnei Iesu hna cile catr ngöne la kola tupathi nyidrë hnei Satana me amamane “la nöjei baselaia ne la fen memine la lolo ne itre ej.” Nge tha hnei nyidrëti kö hna kapa la aja ne la itre xan, troa acili nyidrë troa joxu. (Mat. 4:8, 9; Ioane 6:15) Ketre, tha hnei nyidrëti kö hna thele mo. Nge hnei nyidrëti fe hna cile catr ngöne la icilekeu. (Luka 9:58; Ioane 8:59) Haawe, tune kaa la aqane tro sa amë panëne la Baselaia, ngacama traqa ju hë la itre jol? Paulo a ithuecatre koi së troa lapa mekun la tulu i Iesu, matre ‘tha tro kö sa hane kucakuca me cil.’—Heb. 12:3.

8. Ka tune kaa la atr ka xomihni aqeany, nge pine nemene matre ka nyipiewekë la thiina cili?

⁸ Ame la atr ka xomihni aqeany, tre, angeic a treqene hnyawa la ijine kola troa nyinyine lai jol. Nyipici laka, easa ajane troa paatre la itre jol maine pena troa eatre la ketre aja së. Ngo loi e tro sa atreine xomihni aqeany. Celë hi ka traqa ekö koi Habakuka perofeta. Aja i nyidrëti tro la iakötrë e Iudra a canga paatr. (Hab. 1:2) Ketre, itretre drei Iesu a mekun laka, “canga tro hi a mama la Baselaia” me thepe angatr qaathene la musi Roma. (Luka 19:11) Eje hi, easa treqene la ijine tro la Baselaia i Akötresie a apatrene la fen celë ka ngazo, me acile la fen ka hnyipixe hna troa lapan hnene la itre ka “thiina ka meköt.” (2 Pet. 3:13) Ngo loi e tro sa xomihni aqeany me lapa treqene la drai hna sa hnei Iehova. Tro pena sa ce wang la hna ini së hnei Iehova, göne la aqane troa xomihni aqeany.

9. Nemene la ka amamane laka, ka xomihni aqeany Iehova?

⁹ Hnei Iehova hna amamai tulu göne la aqane troa xomihni aqeany. Hnei Nyidrëti hna nue ijine koi Noa troa xupe la aka me “cainöjëne la meköt.” (2 Pet. 2:5; 1 Pet. 3:20) Hnei Nyidrëti fe hna drei Aberahama ngöne lo angeic a hnehengazo göne la traon e Sodroma me Gomora. (Gen. 18:20-33) Ketre, traqa koi itre macatre ne xomihnine Iehova la nöje Isaraela ka tha idrei. (Neh. 9:30, 31) Ame fe enehila, Nyidrëti a nue ijine kowe la itre atr troa “ietra.” (2 Pet. 3:9; Ioane 6:44; 1 Tim. 2:3, 4) Celë hi matre, tui Iehova, loi e tro sa xomihni aqeany me catre cainöj me inine la itre atr. Ngo hetre ketre ceitun hna hamën hnei Iehova e hnine la Tusi Hmitrötr, göne la aqane troa xomihni aqeany.

10. Thenge la Iakobo 5:7, 8, nemene la hna ini së hnene la tulu ne la atre eëny?

 ¹⁰ E jë la Iakobo 5:7, 8. Ame ngöne la tulu ne la atre eëny, kola amamane la enyipiewekëne la troa xomihni aqeany. Ame la itre xaa feja ke, ka canga cia. Ngo ame pena itre xan, tune la itre nyine xen ke, ka hmitre troa cia. Ame e Isaraela, sikisi lao treu ne troa pane itreqe qëmekene troa menu. Thupene la ijine mani e Okotropa, itre ka eëny a jume la itre wene qitr. Nge ame hë e treu Eiperem, angatre ha menuëne la hlapa. (Mar. 4:28) Eje hi laka, tha ka hmaloi kö, ngo loi e tro sa inamacan me catre xomihni aqeany, tune la itre ka eëny.

11. Pine nemene matre nyipiewekë tro sa xomihni aqeany ngöne la hna cainöj?

¹¹ Nyipici laka, tha ka pexeje kö së, matre easa ajane troa canga kepe thangan qa ngöne la itre huliwa së. Ngo pane mekune jë laka, hetre hlapa së. Qëmekene troa menuën, loi e tro sa pane wakeca me tha la dro, me tran, me fi. Ketre tune fe, loi e tro sa nue trengecatr matre troa inine la itre atr. Loi e tro sa xatuane la itre ka ini tus troa xometrije la itre itine ka ngazo, tune la iwangatrehmekunyi atr. Nyipiewekë fe tro sa xomihni aqeany ngöne la kola xele ma drei së hnene la itre atr. Ketre, nyipiewekë fe tro sa atreine xomihni aqeany ngöne la kola kapa la nyipici hnene la ketre atr. Tha tro kö sa musinëne la lapaune i angeic. Ame la itretre dreng ekö, tha canga trotrohnine kö angatr la itre ini hna hamën hnei Iesu. (Ioane 14:9) Tha tro kö sa thëthëhmine laka, easa jum me fi, ngo tro kö Akötresieti a acian.—1 Kor. 3:6.

12. Nemene la aqane tro sa xomihni aqeany memine la itre fami së ka tha hmi kö?

¹² Tha ka hmaloi kö troa xomihni aqean ngöne la easa cainöj kowe la itre fami së ka tha hmi kö. Ngo kola qaja ngöne Ate Cainöj 3:1, 7 (MN) ka hape: “Hetre ijine . . .  lapa thaup, me ijine ithanata.” Jëne la aqane ujë së, ijije hi tro sa tro fë la nyipici. Ngo loi e tro palahi sa thele ijine troa tro fë la nyipici kowe la itre atr. (1 Pet. 3:1, 2) Eje hi laka, easa ajane troa catre cainöj, ngo loi e tro fe sa xomihni aqeanyi la itre xan, tune la itre fami së.

13-14. Qaja jë la itre xaa tulu ekö me enehila.

¹³ Ijije hi tro sa xomi ini qa ngöne la tulu ne la itre hlue i Iehova ekö me enehila, göne la troa xomihni aqeany. Eje hi laka, aja i Habakuka ekö troa canga paatre la iakötrë e Iudra. Ngo hnei angeic hna mejiun me hape: “Tro ni a cile ngöne la hnenge hna hmek.” (Hab. 2:1) Ame Paulo, aja i nyidrëti troa canga “umuthe” la huliwa ne cainöj. Ame pe, hnei nyidrëti palahi hna xomihni me catre “anyipicine la maca ka loi.”—Itre hu. 20:24.

¹⁴ Hane hi la hna melën hnene la lue trefën ka sine la Ini Ne Gileada. Hna upi nyidro troa cainöj ngöne la ketre nöj laka, tha tru kö hnei Temoë. Ketre, tha ka hmi Keresiano kö la itre atr e cili, matre tha aja i angatre kö troa ini Tusi Hmitrötr. Hnene la itre xaa trejin ka sine la Ini Ne Gileada me nyidro hna qaja la thangane la huliwa ne cainöje i angatr. Ngacama tha tru kö hnei atr ka drei nyidro, ngo hnei nyidroti palahi hna catre cainöj. Thupene la eitr lao macatre, hnene la ketre ka ini tusi me nyidro hna xomi bapataiso. Nemene la hna kuca hnene la itre hlue i Akötresieti ekö me enehila? Hnei angatr hna catre cainöj. Tha hnei angatre kö hna sawa la iwanakoime i angatr. Nge hnei Iehova hna amanathithine la aqane xomihni aqeanyi angatr. Haawe, “nyitipune jë lo itre ka kapa la hna thingehnaean, ke hnei angatre hna lapaun me xomihni.”—Heb. 6:10-12.

15. Nemene la aqane tro la lapaun a xatua së matre tha tro kö sa sawa la iwanakoime së?

¹⁵ Nemene la aqane tro la lapaun a xatua së, matre tha tro kö sa sawa la iwanakoime së? Ame la hnapan, easa lapaune kowe la maca hne së hna cainöjën, nge easa ajane troa tro fë koi nöjei atr. Easa mejiune kowe la itre hna thingehnaean e hnine la Tusi Hmitrötr. (Sal. 119:42; Is. 40:8) Ame enehila, kola eatre la itre hna perofetan me saze la mele ne la itre ka trongëne la hna qaja hnei Tusi Hmitrötr. Celë hi kepin, matre nyipiewekë tro la itre atr a atre la maca ne la Baselaia.

16. Thenge la Salamo 46:1-3, nemene la aqane tro la lapaune së koi Iehova me Iesu a xatua së troa catre cainöj?

¹⁶ Ame la hnaaluen, easa lapaune koi Iehova, atrekë ewekëne la maca, me koi Iesu, joxu hna acile hnei Iehova. (Ioane 14:1) Celë hi matre, easa mejiun laka, ngacama kola traqa la itre jol, ngo tro palahi Iehova a thupë së me thue trengecatre së. (E jë la Salamo 46:1-3.) Ketre, xecie hnyawa koi së laka, jëne la men me musi qaathei Iehova, Iesu a elemekene la huliwa ne cainöj qa hnengödrai.—Mat. 28:18-20.

17. Qaja jë la ketre ceitun ka amamane la enyipiewekëne troa cainöj.

¹⁷ Ame la atr ka lapaun ke, xecie koi angeic laka, tro kö Iehova a amanathithin la itre trengecatre i angeic. Ame itre xaa ijin, easa sesëkötre la aqane amanathithi së hnei Iehova. (Ate cai. 11:6) Ame e nöjei drai, alanyimu la itre atr ka tro qëmekene la itre laulau ne ami tus me présentoirs. Hapeu, ka hetre thangane kö la aqane cainöje cili? Eje hi! Kola qaja ngöne la Huliwa Ne Baselaia ne Nofeba 2014, la hna melën hnene la ketre neköjajiny ngöne la uma ne  ini ka tru. Angeic a hnëkë exposé ka qejepengöne la itre Temoë Iehova. Ngo tha öhne kö angeic la Uma Ne Baselaia. Hnei angeice pe hna xom ngöne laulau ne ami tusi së la itre itus hnei angeic hna ajan, thatraqane la qa i angeic. Ame enehila, ketre pionie lapa hë angeic. Haawe, catre pi së troa cainöj matre tro la itre atr a hane drenge la maca ne la Baselaia.

18. Pine nemene matre ka xecie koi së laka, troa nyipune la huliwa ne cainöj ngöne la drai hna sa hnei Iehova?

¹⁸ Xecie koi së laka, troa nyipune la huliwa ne cainöj ngöne la nyipi ijin. Ame ngöne la hneijine i Noa, hnei Iehova hna amaman laka, Nyidrëti la ka musinëne la itre ijin me itre ewekë ka traqa. Eje hi, 120 lao macatre qëmeken, hnei Iehova hna sa la ijine troa traqa la Iwë Atraqatr. (Gen. 6:3) Itre macatre thupen, hnei Nyidrëti hna upi Noa troa xupe la aka. Hnei Noa hna catre huliwa koi 40 maine 50 lao macatre, qëmeken troa traqa la Iwë Atraqatr. Ketre, ngacama tha drei Noa kö hnene la itre atr, ngo hnei angeic hna catre cainöj utihë la Iehova a upi angeic troa alöne la itre öni e hnine la aka. Ame hë la kola traqa la drai hna sa, “hnei Iehova hna thinge qëhnelö.”—Gen. 6:3; 7:1, 2, 16.

19. Nemene la itre manathith hne së hna troa kapa, e tha hne së kö hna sawa la iwanakoime së?

¹⁹ Easenyi hë la ijine tro Iehova a qaja ka hape, tha tro hmaca kö sa cainöj. Thupene lai, ‘tro Nyidrëti a thinge la qëhnelö’ me apatrene la fene i Satana me acile la fene ka hnyipixe hna troa lapan hnene la itre atr ka meköt. Ngo loi e tro sa catre nyitipu Noa enehila, me Habakuka, me itre xaa hlue i Akötresie ka tha sawa kö la iwanakoime i angatr. Loi e tro sa amë panëne la huliwa ne cainöj me xomihni aqeany, me catre lapaun koi Iehova me kowe la itre hnei Nyidrëti hna thingehnaean.