1. Eu la ijine ka hmaloi troa nyihlue i Iehova?

 AME koi epun, eu la ijine ka hmaloi troa nyihlue i Iehova? Hapeu, ngöne la kola traqa la itre jol maine ngöne la ijine loi? Eje hi laka, ame la kola traqa la itre jol, easa canga sipo ixatua koi Iehova. Ngo tune kaa ngöne la ijine loi? Hetre ewekë kö ka ajolë së troa catre huliwa i Akötresie? Celë hi kepin matre hnei Iehova hna hmekën la angetre Isaraela.—Deu. 6:10-12.

2. Nemene la ini hne së hna xom qa ngöne la tulu i Asa?

² Hetre ini hne së hna xom qa ngöne la tulu i Asa, joxu ne Iudra. Hnei nyidrëti hna inamacan me mejiune koi Iehova. Hnei nyidrëti hna nyihlue i Iehova ngöne la itre ijine jol me ijine loi. “Ka pexeje la hni Asa koi Iehova” ngöne la mele i nyidrë. (1 Ite jo. 15:14) Hnei Asa hna apatrene la itre hmi ka thoi ngöne la nöje i nyidrë. Öni Tusi Hmitrötr: “Hnei nyidëti hna apatene la ite ita ne huje tenyiwa, me ite ga draië, me axeciëne la ite idola, me sha tije la ite Aseira.” (2 A. l. ite jo. 14:3, 5) Ketre, hnei Asa hna xome la hnëqa qaathene la qaaqa i nyidrë, matre “tha ishola hmaca kö” eahlo. Pine nemen? Pine laka, eahlo a upe la nöj troa thil kowe la ketre idrola.—1 Ite jo. 15:11-13.

3. Nemene la hne së hna troa ce wang ngöne la tane mekun celë?

³ Tha hnei Asa hmekuje kö hna apatrene la itre hmi ka  thoi. Hnei nyidrëti fe hna ithuecatr kowe la nöje troa bëek koi Iehova. Hnei Iehova hna amanathithi nyidrë memine la nöj, me aijijë angatr troa mele tingeting. * Ame fene la musi Asa, “hna lapa hnyawa la nöje . . . [10] la o macate.” (2 A. l. ite jo. 14:1, 4, 6) Ame ngöne la tane mekun celë, tro sa ce wang la hna kuca hnei Asa ngöne la itre ijine loi cili. Nge tro fe sa ce wang la hna kuca hnene la itre pane Keresiano. Thupene lai, tro sa ce wang la mekun ka sa la hnying celë: Maine tha hna wathebone kö la nyipi hmi ngöne la nöje së, nemene la aqane tro sa inamacan ngöne la itre ijine loi cili?

4. Thenge la 2 Aqane lapa ite joxu 14:2, 6, 7, nemene la aqane inamacane Asa ngöne la itre ijine loi?

⁴ E jë la 2 Aqane lapa ite joxu 14:2, 6, 7. Öni Asa kowe la nöj ka hape, hnei Iehova “hna amanonyi shë xöteith.” Ame pe, tha hnei nyidrëti kö hna mekun laka, pëkö hnei angatr hna troa kuca ke, lolo la mele i angatr. Ngo hnei nyidrëti hna xup la itre traon, me itre hag, me itre qanahag. Öni nyidrëti kowe la nöje Iudra: “Eje kö la nöje qëmeke shë.” Ame koi nyidrë, tha tro kö la itre ithupëjia a sawa la nöje Iudra troa kuca la hnei angatr hna ajan, tune la troa xupi uma. Nyidrëti hi lai a ithuecatre kowe la nöj troa inamacan ngöne la itre ijine loi.

5. Pine nemene matre hnei Asa hna acatrene la trongene isi nyidrë?

 ⁵ Ame ngöne la itre ijine loi cili, hnei Asa hna acatrene la trongene isi nyidrë. (2 A. l. ite jo. 14:8) Hapeu, pëkö mejiune i Asa koi Iehova? Waea. Atre hi Asa joxu laka, nyipiewekë tro nyidrëti a hnëkëne la nöj troa cile kowe la ithupëjia. Ame koi nyidrë, tha tro kö a cile hut la itre ijine loi cili. Nge celë hi lai ka traqa.

6. Nemene la hna kuca hnene la itre pane Keresiano ngöne la itre ijine loi?

⁶ Eje hi laka, alanyimu la itre ka icilekeu memine la itre pane Keresiano. Ngo hnei angatre fe hna melëne la itre ijine loi. Nemene la hnei angatr hna kuca ngöne la itre ijine cili? Kola qaja ngöne la tusi Itre Huliwa ka hape, hnei ‘angatr hna xoue Iehova,’ matre “kolo pala hi a elë la etrune la itretre dreng.” Mama hi laka, hnei Iehova hna amanathithine la itre huliwa i angatr ngöne la itre ijine loi.—Itre hu. 9:26-31.

7-8. Nemene la hna kuca hnei Paulo me itre xaa Keresiano ngöne la itre ijine loi?

⁷ Hnene la itre pane Keresiano hna cainöjëne la maca ka loi kowe la nöjei atr asë ngöne la itre ijine loi. Celë hi hna kuca hnei Paulo. Hnei nyidrëti hna pane lapa e Efeso matre troa cainöj me inine la itre atr.—1 Kor. 16:8, 9.

⁸ Ame lo 49 M.K., hnei Paulo me itre xaa Keresiano hna melën la itre ijine loi thupene la jol göi troa xötrehatren. (Itre hu. 15:23-29) Thupene la hnei angatr hna qaja kowe la itre ekalesia la hna amekötin göne lai jol, hnene la itretre dreng hna catre “cainöjëne la maca ka loi ne la trengewekë i Iehova.” (Itre hu. 15:30-35) Nemene hë la thangan? Öni Tusi Hmitrötr: “Kolo pala hi a kökötre o drai la itre ekalesia me catre ngöne la lapaun.”—Itre hu. 16:4, 5.

9. Nemene la pengöne la huliwa ne cainöj ngöne la itre xaa nöj, nge nemene la nyine tro sa isa hnyingën?

⁹ Ame ngöne la itre xaa nöj, tha hna wathebone kö la huliwa ne cainöj. Hapeu, tha celë kö ka traqa ngöne la nöje i epun? Maine eje hi, isa hnyingëne jë ka hape: ‘Nemene la nyine tro ni a kuca ngöne la itre ijine loi?’ Tha tro kö sa thëthëhmine laka, easa melën la itre drai ne la pun. Hnene la organizasio i Iehova hna eköth la huliwa ne cainöj e cailo fen. (Mar. 13:10) Eje hi, nyimutre la itre nyine troa kuca hnene la itre hlue i Iehova.

10. Nemene la hna ithuecatre koi së hnei Paulo ngöne 2 Timoteo 4:2?

¹⁰ Nemene la nyine tro sa kuca ngöne la itre ijine loi? (E jë la 2 Timoteo 4:2.) Loi e tro sa isa waipengö së me hnying ka hape, hapeu, ijijinge kö maine ketre sineeng pena, troa catre cainöj me hane pionie? Ame enehila, tha ijine tro hmaca kö sa thele mo pine laka, tha ka nyipiewekë kö itre ej ngöne la akötr atraqatr.—Ite Edomë 11:4; Mat. 6:31-33; 1 Ioane 2:15-17

11. Nemene la hna kuca hnene la itre trejin matre troa catre cainöj?

¹¹ Alanyimu la itre trejin ka inine la ketre qene hlapa matre troa cainöj me inine la itre atr. Celë hi matre kola xatua angatr hnene la organizasio i Akötresie. Kola elë la etrune la itre itus hna ujëne ngöne la nöjei qene hlapa. Ame lo 2010, hna ujëne la itre itusi së koi 500 lao  qene hlapa. Nge ame enehila, traqa koi 1 000 lao qene hlapa!

12. Nemene la thangan e tro sa cainöj ngöne la sipu qene hlapa ne la itre atr? Qaja jë la ketre ceitun.

¹² Nemene la thangan e tro sa cainöj ngöne la sipu qene hlapa ne la itre atr? Hane hi la ka traqa kowe la ketre trejine föe ka sine la asabele katru e Etazini. Hna cile fë la itre cainöj ngöne la sipu qene hlapa i eahlo, qene kinyarwanda, nge ketre qene hlapa hna qaja e Rwanda, Congo-Kinshasa me Ouganda. Thupene lai asabele, öni eahlo: “Traqa koi 17 lao macatre ne eni a lapa e Etazini, ngo eni petre hi a trotrohnin asë la porogaram.” Hna ketr la hni eahlo ngöne la kola dreng la itre cainöj ngöne la sipu qene hlapa i eahlo. Hapeu, ijiji epuni kö troa hane inine la ketre qene hlapa? Maine jë, tro la itre atr ne la teritoare i epun a ajane troa dreng la maca ngöne la sipu qene hlapa i angatr. Tha luelu kö së laka, troa hetre thangan la trengecatre hne së hna kuca.

13. Nemene la hna kuca hnene la itre trejin e Russie ngöne la itre ijine loi?

¹³ Ame ngöne la itre xaa nöj, hnene la itre musi hna wathebone la hmi memine la huliwa ne cainöj. Hane hi la ka traqa kowe la itre trejin e Russie. Nyimutre la itre macatre hna wathebone la huliwa së. Ame lo treu Maac 1991, hna nue hmaca la huliwa së. Ame ngöne lo ijine cili, traqa koi 16 000 lao trejin e Russie. Nge thupene la 20 lao macatre, kola elë la etrune la itre trejin koi 160 000! Kola mama laka, hnene la itre trejin hna inamacan ngöne la itre ijine loi me catre cainöj. Ngacama tha ka cile huti kö la itre ijine loi, ngo hnei angatr palahi hna cilëgöline la nyipi hmi. Angatr palahi a catre huliwa koi Iehova.

14-15. Nemene la aqane xatua Asa hnei Iehova?

¹⁴ Ame ngöne lo ijine i Asa, tha hna cile huti kö la ijine loi. Hna traqa la trongene isi angetre Aithiope. Xecie koi Zera, tane la trongene isi angetre Aithiope laka, tro angeic memine la 1 milio lao sooc a lep la nöje Iudra. Ngo tha celë kö mekuna i Asa. Hnei nyidrëti hna mejiune koi Iehova Akötresi nyidrë, me thith ka hape: “Iehova fe, Akötresi hun, xatua huni jë ke, eahuni a lapaune koi nyipë; nge eahuni a cile kow la ithupëjia ngöne la ëje i nyipë.”—2 A. l. ite jo. 14:8-13, MN.

¹⁵ Alanyimu catre kö la trongene isi angetre Aithiope hune la trongene isi Asa. Ngo xecie koi Asa laka, pëkö sai Iehova nge tro kö Nyidrëti a amelene la nöje i Nyidrë. Celë hi lai hna kuca hnei Iehova. Hnei Nyidrëti hna lep la trongene isi angetre Aithiope.—2 A. l. ite jo. 14:8-13.

16. Pine nemene matre xecie koi së laka, tha tro kö a cile huti la itre ijine loi?

¹⁶ Nyipici laka, thatre kö së la itre ewekë ka troa traqa koi së elany. Ngo atre hi së laka, tha tro kö a cile hut la itre ijine loi. Hnei Iesu hna perofetan ka hape, ame ngöne la itre drai ne la pun, “tro la nöjei nöj” a methinëne la itretre drei nyidrë. (Mat. 24:9) Ketre, hnei Paulo aposetolo hna cinyihan, ka hape: “Ame la itre ka ajane troa mele thenge la aja i Akötresie, me casi me Keriso Iesu, tro fe a hane axösisi angatr.” (2 Tim. 3:12) Eje hi, “atraqatr la trenge elëhni” Satana. Celë hi matre, easa akötr nge tha tingetinge kö la mele së.—Hna ama. 12:12.

17. Nemene la aqane troa tupathe la lapaune së?

¹⁷ Easenyi hë la ijine troa tupathe la lapaune së. Eje hi, kola troa traqa la “akötr atraqatr, ewekë ka tha hane kö traqa qaane lo Akötresie a nyiqaane xupe la fene hnengödrai.” (Mat. 24:21) Maine jë, troa icilekeu hnene la itre hnepe lapa së, nge tro fe a wathebone la huliwa ne cainöj. (Mat. 10:35, 36) Hapeu, tro kö sa mejiune tui Asa laka, tro Iehova a xatua së me thupë së?

18. Thenge la Heberu 10:38, 39, nemene la nyine tro sa canga kuca e ijine loi palakö?

 ¹⁸ Iehova a hnëkë së kowe la itre drai ne la pun. Jëne la “hlue ka nyipici me ka inamacan,” Iehova a “hamë xeni ngöne la nyipi ijin” matre hamë trengecatre së troa cilëgöline la nyipi hmi. (Mat. 24:45) Haawe, nyipiewekë tro sa acatrene la lapaune së koi Iehova e ijine loi palakö.—E jë la Heberu 10:38, 39.

19-20. Thupene la hna e la 1 Aqane lapa ite joxu 28:9, nemene la itre hnying nyine tro sa mekun, nge pine nemen?

¹⁹ Tui Asa, nyipiewekë tro sa “thele Iehova.” (2 A. l. ite jo. 14:4; 15:1, 2) Loi e tro sa pane thele troa atrepengöi Iehova me xomi bapataiso. Thupene lai, loi e tro sa acatrene la ihnimi së koi Nyidrë. Isa hnyinge jë së ka hape: ‘Eni kö a majemine sine la itre icasikeu?’ Hnene la organizasio i Iehova hna hnëkëne la itre icasikeu, matre troa acatrene la lapaune së. Ketre, ijije hi tro sa ithuecatrekeu ngöne la itre ijine icasikeu. (Mat. 11:28) Loi e tro fe sa isa hnying ka hape: ‘Hnenge kö hna majemine ini tusi caas? Hnenge kö hna ami ijine kowe la hmi ne la fami? Maine eni a mele caas, eni kö a ami ijine troa ini tus? Eni kö a catre cainöj me inine la itre atr?’

²⁰ Pine nemene matre nyipiewekë tro sa isa hnyinge tun? Tusi Hmitrötr a qaja ka hape, atre hi Iehova la itre mekuna së me itre aliene hni së. Celë hi matre loi e tro sa isa waipengö së hnyawa. (E jë la 1 Aqane lapa ite joxu 28:9.) Maine thatreine kö së troa eatrëne la itre aja së me saze la aqane waiewekë së, loi e tro sa sipo ixatua koi Iehova. Enehila hi la ijine tro sa hnëkë kowe la itre itupath ka troa traqa. Epi tro sa inamacan ngöne la itre ijine loi!