1. Tune kaa la aqane hë Iehova hnei Iesu, nge nemene la hna amaman?

AME e hnine la lapa ka cahae i Iehova ke, Iesu, la “haetra ne la itre hna xup asë” memine la nöjei angela. (Kol. 1:15; Sal. 103:20) Ame lo Iesu e celë fen, öni nyidrë kowe la itre ka mele nyipici ka hape, ijiji angatre hi troa goeë Iehova ceitu me Keme i angatr. Eje hi, Iesu a ithanata kowe la itretre drei nyidrë, me hë Iehova ka hape, “Kemeng, me Keme i nyipunieti fe.” (Ioane 20:17) Celë hi matre, ame la easa sa xepu me xomi bapataiso, easë hë sine la lapa ne la itre trejin ka ihnimikeu.—Mar. 10:29, 30.

2. Nemene la hne së hna troa ce wang ngöne la tane mekune celë?

² Ame itre xan, jole koi angatr troa goeë Iehova ceitu me Kem ka tru ihnimin. Ame pena itre xan, thatreine kö angatr amamane la ihnimi angatr kowe la itre trejin. Tro sa ce wange ngöne la tane mekun celë la tulu i Iesu. Tro lai a xatua së troa goeë Iehova ceitu me ketre Kem ka ihnim. Tro fe sa ce ithanatane la aqane tro sa amamane la ihnimi së kowe la itre trejin, tui Iehova.

3. Nemene la hnaewekë hna qaja hnei Iesu ka amamane laka, ijije hi tro sa easenyi koi Iehova?

³ Iehova la ketre Kem ka tru ihnimin. Iesu a ajane tro sa goeë Iehova ceitu me nyidrë. Ame koi Iesu, Akötresieti ka tru ihnimine Iehova nge ijije hi tro sa easenyi koi Nyidrë. Tha ketre Keme kö ka calogitr me ka imusinë. Celë hi lai hna amamane hnei Iesu ngöne lo nyidrëti a inine la itretre drei nyidrë troa thith. Hnei Iesu hna nyiqaane thith me hape: “Kakati.” (Mat. 6:9) Maine ju, ijije hi tro Iesu a thithi  koi Iehova me hape, “Kapucatinasë,” “Ate Xupe,” maine “Joxu ka epine palua.” (Gen. 49:25; Is. 40:28; 1 Tim. 1:17) Itre hnaewekë lai thatraqai Iehova e hnine la Tusi Hmitrötr. Ngo hnei Iesu hna hë Nyidrë ka hape, “Kem.”

4. Nemene la ka amamane koi së laka, Iehova a ajane tro sa easenyi koi Nyidrë?

⁴ Hapeu, jole koi së troa goeë Iehova ceitu me Kem ka tru ihnimin? Celë hi lai mekuna itre xan. Maine tha hna hnimi së kö hnene la sipu kem së, tro ha jole koi së troa goeë Iehova ceitu me Kem ka ihnim. Ngo easa madrin ke, trotrohni së hi hnei Iehova! Nyidrëti fe a könë së ka hape: “Easenyi Akötresieti jë, nge tro nyidrëti a easenyi koi nyipunie.” (Iako. 4:8) Eje hi, Iehova a hnimi së nge Nyidrëti hi la Kem ka sisitria.

5. Thenge la Luka 10:22, tune kaa la aqane xatua së hnei Iesu troa easenyi koi Iehova?

⁵ Ijije hi tro Iesu a xatua së troa easenyi koi Iehova ke atrepengöi Iehova hnyawa hi hnei nyidrë. Hnei nyidrëti hna nyitipune la itre thiina ne la Keme i nyidrë me hape: “Ame la atre öhnyi ni, ketre öhne fe hë angeic la Kem.” (Ioane 14:9) Iesu la neköne haetra matre ijije hi tro nyidrëti a ini së troa metrötrë Iehova me idrengethenge. Iesu fe a ini së la nyine troa kuca matre amadrinë Iehova me kepe së hnei Nyidrë. Ketre, hnei Iesu hna amamane lo nyidrëti e celë fen laka Iehova la Kem ka tru ihnimin. (E jë la Luka 10:22.) Hanawange la aqane amamane Iehova la itre thiina i Nyidrë.

6. Eu la itre ijine Iehova a drei Iesu?

⁶ Iehova a drenge la kola ithanata hnene la itre neköi Nyidrë. Nyidrëti a drenge hnyawa la nöjei thithi Iesu e celë fen. (Luka 5:16) Hnei Iesu hna sipo ixatua koi Iehova, matre troa iëne lo 12 lao aposetolo i nyidrë. (Luka 6:12, 13) Hnei Iesu fe hna thithi ngöne lo nyidrëti a hnehengazo me kucakuca. Nge hnei Iehova palahi hna drei nyidrë. Ketre, hnei Iesu fe hna thithi qëmekene troa wanaxoeë nyidrë hnei Iudra Isakariota, me thatraqane  la itre jol hnei nyidrëti hna troa cile kow. Ngo tha hnei Iehova hmekuje kö hna drenge la itre thithi Iesu, hnei Nyidrëti fe hna upe la ketre angela troa aegöcatrene la Nekö hnimina i Nyidrë.—Luka 22:41-44.

7. Nemene la thangane koi së e tro sa atre laka, Iehova a sa la itre thithi së?

⁷ Ame fe enehila, Iehova a drenge hnyawa me sa ngöne la nyipi ijin la thithi ne la itre hlue i Nyidrë. (Sal. 116:1, 2) Tro sa ce wange la ka traqa kowe la ketre trejin föe e Inde ka hnehengazo catr. Hnei eahlo hna catre thithi koi Iehova me hape: “Hna qejepengöne hnyawa ngöne la porogarame ngöne JW Télédiffusion ne Mei 2019 la nyine tro ni a kuca ngöne la eni a hnehengazo. Celë hi lai ka sa hnyawa la itre thithing.”

8. Tune kaa la aqane amamane Iehova la ihnimi Nyidrëti koi Iesu?

⁸ Tru la ihnimi Iehova koi së. Hnei Nyidrëti hna hnim me thupëne la mele i Iesu e celë fen matre eatrëne la ketre hnëqa ka tru. (Ioane 5:20) Ketre, hnei Iehova hna acatrene la lapaune i Iesu me hamë ithuecatre ngöne lo nyidrëti a hnehengazo me akötr. Hnei Iehova fe hna hnime me nyihnyawane la mele i Iesu me qaja aloinyi nyidrë. (Mat. 3:16, 17) Celë hi matre, xecie hnyawa koi Iesu laka, tro palahi la Keme i nyidrë a xatua nyidrë.—Ioane 8:16.

9. Tune kaa la aqane amamane Iehova laka, Nyidrëti a hnimi së?

⁹ Iehova mina fe a hnimi së. Hnei Nyidrëti hna aijijë së troa nyi sinee i Nyidrë me hane sine la lapa ka cahae i Nyidrë. Easa madrin troa ce memine la itre trejin ka ihnim me ithuecatre ngöne la easa hnehengazo. (Ioane 6:44) Ketre, Iehova a hamë së la nöjei göxeni ka acatrene la lapaune së me xatua së troa hetrenyi la ka ijij thatraqane la mele së. (Mat. 6:31, 32) Celë hi matre, ame la easa lapa mekune la aqane hnimi së hnei Iehova ke, kola acatrene la ihnimi së koi Nyidrë.

10. Maine tro sa lapa mekune la aqane hnime Iehova la itre trejin, nemene la hne së hna troa kuca?

¹⁰ Tru la ihnimi Iehova kowe la itre trejin ne la ekalesia. Ngo ame itre xaa ijin, jole koi së troa hane hnimi angatr. Maine jë, isapengöne kö la aqane hetru së me mel së. Maine pena, easa kuca la ketre ewekë ka aelëhni itre xan me akötrë angatr. Ame pe, ijije hi tro sa acatrene la ihnimi së me caas memine la itre trejin. Tune kaa? Loi e tro sa nyitipu Iehova Keme së. (Efe. 5:1, 2; 1 Ioane 4:19) Hanawange la tulu i Nyidrë.

11. Tune kaa la aqane amamane Iesu ‘la utipine’ i Iehova?

¹¹ “Tru la utipine” i Iehova koi së. (Luka 1:78) Ame la atr ka hetre hni ne utipin ke, angeic a ce akötr memine la itre ka akötr me thele jëne troa xatua angatr. Celë hi lai hna kuca hnei Iesu ngöne lo nyidrëti a nyitipune la Keme i nyidrë. (Ioane 5:19) Ame la ketre ijin, hnei Iesu hna öhne la ka alanyimu, me ‘utipi angatr, ke ceitu i angatr me itre mamoe ka pë atre thupën.’ (Mat. 9:36) Ngo tha hnei Iesu hmekuje kö hna utipi angatr, hnei nyidrëti fe hna amamane koi angatr. Hnei nyidrëti hna aloine la itre sine meci angatr me aegöcatrene la itre ka “ka kucakuca me hace.”—Mat. 11:28-30; 14:14.

12. Tune kaa la aqane tro sa amamane la hni ne utipine së kowe la itre trejin?

¹² Easa amamane la hni ne utipine së, ngöne la easa sa thele troa pane atre la itre jol hna cile kow hnene la itre trejin.  Pane mekune jë së la lue ceitun celë. Maine jë hna tithi hnei mec ketre trejine föe, ngo tha hnei eahlo kö hna qaja koi itre xan. Nyipici maine tro sa xatua eahlo, tro hë eahlo a madrin. Hapeu, hetrenyi eahlo la ka ijij thatraqane la hnepe lapa i eahlo? Ijije kö tro sa tro fë xen maine ixatua göi nyidrawa uma? Maine jë pena, pëhë huliwa ne la ketre trejin trahmany. Tune kaa e tro sa hamë manie koi angeic, ngo tha tro pe sa qaja la ëje së? Eje hi, angeice hi a ajane la ka ijij uti hë la tro angeice a öhne la ketre huliwa.

13-14. Tune kaa la aqane tro sa nyitipune la hni ne hame i Iehova?

¹³ Ame Iehova ke, Akötresieti ka hetre hni ne ham. (Mat. 5:45) Celë hi matre, tha tro kö sa treqene tro la itre trejin a sipo ixatua koi së. Nyipiewekë troa canga thele troa xatua angatr. Eje hi, Iehova a amejëne la jö e nöjei drai, ngacama tha hne së kö hna sipo Nyidrë! Easë asë hi a kepe eloine qa ngöne la idreuthine la jö. Tha kolo hmekuje kö lo itre ka olene koi Iehova. Drei la ketre tulu ne ihnim ka sisitria koi së! Nyipici, Akötresieti ka lolo nge ka hame Iehova. Nyidrëti a hamë së la nöjei ewekë ka lolo thatraqane la mele së. Hapeu, tha kolo kö lai a upi së troa acatrene la ihnimi së koi Nyidrë!

¹⁴ Itre trejine asë a thele troa nyitipune la aqane hame i Iehova. Hanawange la ka traqa e Philippines. Ame lo 2013, hna lepe la nöj hnene la ketre udreli hna hëne ka hape, Haiyan. Hna feje la uma ne la itre trejin matre pëhë ewekë i angatr. Ngo hnene la itre xaa trejin hna xatua angatr. Hnei angatre hna kuië ahnahna me ixatua matre xupe hmaca la 750 lao uma ngöne hmekuje hi la caa macatre! Ketre tune lo kola traqa la meci ka solesol, hna hape, COVID-19. Hnene la itre trejin hna caas me itö ixatua. Easa isa amamane laka, easa hnime la itre trejine ngöne la götrane u.

15-16. Thenge la Luka 6:36, tune kaa la aqane tro sa nyitipu Iehova?

¹⁵ Iehova la Akötresieti ka ihnim ke, Nyidrëti a canga nue la itre ngazo së. (E jë la Luka 6:36.) Nyidrëti a nue la itre ngazo së  e nöjei drai. (Sal. 103:10-14) Hnei Iesu fe hna hnime la itretre drei nyidrë me canga nue la itre ngazo i angatr ke, itre atr ka tha pexeje kö angatr. Ketre, hnei Iesu hna nue xecie la mele i nyidrë thatraqane la itre ngazo së. (1 Ioane 2:1, 2) Hapeu, tha kolo kö lai a ithuecatre koi së troa acatrene la ihnimi së koi nyidro?

¹⁶ Maine tro palahi sa ‘nue hnyawa’ la ngazo ne la itre trejin, tro hë sa acatrene la ihnimi së koi angatr. (Efe. 4:32) Nyipici tha ka hmaloi kö e itre xaa ijin, ngo loi e tro sa kuca la hne së hna atrein. Hanawange la ka traqa kowe la ketre trejine föe. Hna xatua eahlo hnene la tane mekun ne la Ita Ne Thup hna hape, “Isa Catre Pi Së Troa Nue Trije La Itre Hna Ngazo Koi Së Hnei Itre Xan.” * Öni eahlo: “Trotrohnine hë ni la enyipiewekëne troa nue la ngazo i itre xan. Tha kolo kö a hape, troa kapa maine wangacone la ngazo i angatr. Ngo tro pe a xomehnöthe la elëhni së me thele tingeting.” Haawe, easa nyitipu Iehova ngöne la easa hnim me nue la ngazo ne la itre trejin.

17. Thenge la Mataio 5:16, nemene la nyine tro sa kuca matre tro la itre atr a hane atrunyi Iehova?

¹⁷ Tru la madrine së troa sine la lapa ka cahae i Iehova ka ihnim me caas! Eje hi, easa ajane tro la nöjei atr asë a hane ce atrunyi Iehova me easë. Ngo easë fe a thupëne matre tha tro kö a adrone la ëje i Iehova me qaja angazone la nöje i Nyidrë. Celë hi matre, easa amamane la itre thiina ka lolo matre thue aja kowe la itre atr troa hane atre Iehova me nyihlue i Nyidrë.—E jë la Mataio 5:16.

18. Nemene la ka troa ithuecatre koi së troa cainöj?

¹⁸ Ame itre xaa ijin, hnene laka, easa drengethenge Iehova matre kola icilekeu me qaja angazo së. Maine jë, tro sa xou troa qaja la lapaune së. Ngo nemene la nyine tro sa kuca? Tha tro kö sa thëthëhmine laka, tro kö Iehova me Iesu a xatua  së. Hnei Iesu hna qaja kowe la itretre drei nyidrë ka hape, tha tro pi kö angatr a hnehengazo, göne la nyine tro angatr qaja. Öni nyidrë: “Tro kö lai a traqa ngöne la ijin. Nge tha nyipunie casi kö la ka ithanata, ke uati ne la Keme i nyipunie la ka ithanata jëne nyipunie.”—Mat. 10:19, 20.

19. Nemene la ka xatua Robert troa catre cainöj?

¹⁹ Hanawange la hna melën hnei Robert qa Afrique du Sud. Ame lo nyidrëti a nyiqaane ini tus, hna utisai nyidrë koi gaa tru ke, tha aja i nyidrëti kö troa sooc. Hnei Robert hna qaja hnyawa ka hape, tha aja i nyidrëti kö troa lö hnine la kuci politik ke, tru la ihnimi nyidrë kowe la itre trejin. Ketre, nyidrëti a madrine troa sine la lapa ka cahae i Iehova e cailo fen! Hnyinge jë hi la ketre atre amekötin ka hape: “Drei la itre trejin me nyipë?” Robert a pane cil me mekune la aqane tro nyidrëti a sa. Ngo mekune jë hi nyidrë lo xötre ne la drai ngöne Mataio 12:50, lo kola hape: “Ame la atre kuca la aja ne la Kemeng e koho hnengödrai, angeice hi la trejine me eni, me xang, me thineng.” Ngacama Robert a xötrei ini tus ngo hnene la uati hmitrötr i Iehova hna xatua nyidrë troa sa lai hnying me itre xane ju kö. Drei la madrine i Iehova koi Robert! Ketre, tru la madrine i Iehova ngöne la easa mejiune koi Nyidrë me cilëgöline la nyipici.

20. Thenge la thithi Iesu ngöne Ioane 17:11, 15, nemene la nyine tro sa kuca?

²⁰ Haawe, catre jë së wangatrune la göhnë së ngöne la lapa ka cahae i Iehova. Loi e tro xecie koi së laka, kola hnimi së hnei Iehova memine la itre trejin. Ketre, Satana me itre xöle i angeic a methinë së. Angatr a ajane tro sa luelue, göne la ihnimi Iehova me thele troa thë la caasi e hnine la ekalesia. Eloine pe, hnei Iesu hna thith matre sipo Iehova troa thupë së me xatua së matre tro palahi sa caas. (E jë la Ioane 17:11, 15.) Hnei Iehova hna sa la thithi Iesu. Haawe, tui Iesu, loi e xecie koi së laka, tro palahi Iehova a hnimi së me xatua së. Nge catre jë së hnime la itre trejin.