TANE MEKUN 39
Kola Trotriji Iehova Hnene La Ketre Sinee Së
“A nyimu a . . . akötë nyidë.”—SAL. 78:40.
NYIMA 102 “Xatuane Jë La Ite Ka Kucakuca”
MEKUN KA TRU *
1. Nemene la thangane kowe la hnepe lapa la kola upetröneë la ketre sinee i angatr?
HAPEU, hna upetröneë la ketre sinee i epun? Drei la ketre akötr ka tru! Öni Hilda *: “Hace catre koi ni ngöne la kola meci la föeng, thupene la 41 lao macatre ne faipoipo i nyio. Ngo ketre akötr ka tru catre kö koi ni ngöne la neköng a trotriji Iehova me nue la föi angeic me lue nekönatr.”
Trotrohnine hi Iehova la akötr ne la itre trejin, ngöne la kola trotriji Nyidrë hnene la ketre sinee (Wange ju la paragarafe 2-3) *
2-3. Thenge la Salamo 78:40, 41, nemene la mekuna i Iehova ngöne la kola trotriji Nyidrë hnei ketre?
2 Pane mekune jë së la akötr ka eje thei Iehova ngöne lo kola trotriji Nyidrë hnene la itre angela! (Iudra 6) Ketre tune lo kola anyimua tha idrei hnei angetre Isaraela, nöj hnei Nyidrëti hna hnim. (E jë la Salamo 78:40, 41.) Atre hnyawa hi së laka, Iehova a akötr ngöne la kola nuetriji Nyidrë hnene la ketre sinee së. Celë hi matre, trotrohnine hi Nyidrë la easa akötr. Tro kö Nyidrëti a xatua së me akeukawane la hni së.
3 Ame ngöne la tane mekune celë, kola qaja la nyine tro sa kuca matre tro Iehova a xatua së ngöne la kola trotrije la nyipici hnene la sinee së. Tro fe sa ce ithanatane la aqane tro sa xatuane la itre trejin ne la ekalesia ka hetre sinee hna upetröneë. Ngo tro sa pane ce wange la itre xaa mekun nyine tro sa thipetrije ngöne la kola traqa la jole cili.
THA TRO KÖ SA UPEZÖ SË
4. Nemene la thangane ngöne la kola trotriji Iehova hnene la ketre nekönatr?
4 Pane jë së la kola trotriji Iehova hnene la ketre nekönatr! Ame koi itre kem me thin, tha hnei nyidroti kö hna xatua angeice troa lapa ngöne la nyipici. Celë hi lai hna melën hnei Luke. Thupene la kola upetröneë la neköi nyidrë trahmany, öni nyidrë: “Hace catre la meleng matre ame itre xaa ijin, eni a treij. Tha meköle hë ni e jidr. Ame koi ni, zöi eni la angeic a trotriji Iehova.” Ketre tui Elizabeth, hna upetröneë la neköi eahlo trahmany. Öni eahlo: “Maine jë zöi eni ke, tha hnenge kö hna kuca hnyawa la hnëqang ne thin. Tha hnenge kö hna xatua angeice troa acatrene la ihnimi angeice koi Iehova.”
5. Zöi drei matre kola trotriji Iehova hnei ketre?
5 Tha tro kö sa thëthëhmine laka, hnei Iehova hna hamë së la ketre ahnahna, ene la atreine troa ië ewekë. Eje hi, isa qanyi së kö iëne troa drengethenge Iehova maine tha drei Nyidrëti pena. Ame la itre xaa nekönatr, ngacama tha loi kö la thiina ne la itre kem me thine i nyudren ngo hnei nyudreni hna iëne troa nyihlue i Iehova. Ame itre xan, kola ini nyudren hnei itre kem me thin troa hnimi Iehova, ngo nyudreni pe a trotrije la nyipici. Celë hi matre, isa qanyi së kö iën troa nyihlue i Iehova. (Ios. 24:15) Itre kem me thine fe, tha tro kö epuni a mekun laka, zöi epun matre kola trotriji Iehova hnene la itre nekö i epun!
6. Nemene la thangane koi itre nekönatr la kola trotriji Iehova hnene la ketre kem me thine i nyudren?
6 Ame itre xaa ijin, ketre kem maine thine la ka trotriji Iehova memine la hnalapa. (Sal. 27:10) Eje hi, ketre akötr ka tru kowe la itre nekönatr ke nyudreni a hnim me metrötrë angatr. Celë hi lai hna melën hnei Esther. Öni angeic : “Eni a treij me akötr ke atre hi ni laka, tha nyidrëti hmekuje kö a iananyi memine la nyipici. Ngo hnei nyidrëti hna iëne troa trotriji Iehova. Ngacama hna upetröneë kaka, ngo eni a hnimi nyidrë me meku nyidrë.”
7. Nemene la mekuna i Iehova göne la itre nekönatr ka hetre kem maine thine hna upetröneë?
7 Itre nekönatr fe, ketre akötre ka tru koi hun ngöne la kola upetröneë la kem me thine i epun! Ketre, trotrohnine hi Iehova la akötre i epun. Nyidrëti a hnimi epun nge madrine catre Nyidrë ngöne la epuni a cile catr me mele nyipici koi Nyidrë. Ketre, tha zöi epuni kö e ngazo la aqane axecië mekun ne la itre kem me thin. Hnei Iehova hna isa hamë së la atreine troa ië ewekë. Celë hi matre, ame la itre atr ka sa xepu me xomi bapataiso ke, “isa hnëqa” i angatre kö lai.—Gal. 6:5, ftn.
8. Nemene la nyine tro sa kuca e tha bëekë palakö la sinee së kowe la nyipici? (Wange ju la hna eköhagen, “ Bëeke Jë Koi Iehova.”)
8 Eje hi, trotrohnine hi Iehova la aja i së tro la ketre sinee së a canga bëeke kowe la nyipici. Ngo nemene la nyine tro sa kuca? Loi e tro sa acatrene la lapaune së koi Iehova. E cili, tro hë sa amamai tulu kowe la itre atrene la hnepe lapa së me kowe la sinee së hna upetröneë. Ketre, tro hë sa hetre trengecatre ngacama easa akötr. Nemene la nyine tro sa kuca matre troa acatrene la lapaune së?
NYINE TRO SA KUCA MATRE TROA ACATRENE LA LAPAUNE SË
9. Nemene la nyine tro sa kuca matre acatrene la lapaune së? (Wange ju la hna eköhagen, “ Itre Xötr Ka Ithuecatr Ngöne La Kola Upetröneë La Sinee Së.”)
9 Nyipiewekë tro sa acatrene la lapaune së me itre atrene la hnepe lapa së. Tune kaa? Loi e tro sa sipo trengecatre koi Iehova jëne la hna e me lapa mekun la hna qaja hnei Tusi Hmitrötr, me sine la itre icasikeu. Hanawange la hna melën hnei Joanna. Hna upetröneë la kem me trejin me angeic jajiny. Öni angeic: “Tingeting me lolo la hning ngöne la eni a e la itre hna melën hnei Abigaila, Esetera, Iobu, Iosefa, me Iesu. Kola hamë trengecatre koi ni me xatua ni troa lapa mekun la itre ewekë ka loi. Hnenge fe hna öhne la itre nyima ngöne la site së ka aegöcatrenyi ni.”
10. Maine easa kucakuca, nemene la ixatua hna hamën ngöne Salamo 32:6-8?
10 Ame ngöne la easa thith, loi e troa qaja koi Iehova la itre aliene së me itre akötre së. Loi e tro fe sa sipo Iehova troa xatua së matre atreine waiewekë tui Nyidrë, me “köjane koi [së] la jëne qâ [së] troa trongën.” (E jë la Salamo 32:6-8.) Maine jë jole koi së troa qaja la itre aliene hni së koi Iehova. Ngo trotrohnine hi Nyidrëti la akötr ka eje the së. Iehova a hnimi së me ithuecatre koi së troa nenge la itre aliene hni së koi Nyidrë.—Eso. 34:6; Sal. 62:7, 8.
11. Thenge la Heberu 12:11, pine nemene matre loi e tro sa mejiune kowe la ihaji Iehova? (Wange ju la hna eköhagen “ Hatrene Ihnimi Iehova La Kola Upetröneë La Ketre Atr.”)
11 Ame la troa upetröneë la ketre atr ke, hna amekötine hnei Iehova. Hatrene la ihnimi Nyidrë la kola haji angeic, ke nyine loi kowe la hna upetröneë me koi itre xane fe. (E jë la Heberu 12:11.) Ijije hi tro sa qaja ka hape, tha ka loi kö la aqane axecië mekun ne la itre qatre thup. Ngo atre hi së laka, tha tro pi kö angatr a qaja la ngazo ne lai trejin. Ketre, thatre kö së la itre hnei angeice hna kuca. Loi e xecie koi së laka, hnene la itre qatre thup hna axecië mekun thenge la hna qaja hnei Tusi Hmitrötr me amekötine “koi Iehova.”—2 A. l. ite jo. 19:6.
12. Nemene la thangane kowe la lue trefën ngöne la nyidroti a drengethenge la ihaji Iehova?
12 Nyipiewekë tro sa sajuëne la ihaji ne la itre qatre thup ngöne la kola upetröneë la ketre sinee së. Easë hi lai a xatua angeic troa canga bëeke koi Iehova. Celë hi lai hna kuca Elizabeth. Öni eahlo, “Hace catre koi ni la kola upetröneë la neköng. Ngo ame la angeic a bëeke hmaca koi Iehova, öni angeice ka hape, mekune ka loi la kola upetröneë angeic. Hetre ini hnei angeice hna xomi ini qa ngön. Xecie hnyawa koi ni laka, meköti la ihaji Iehova.” Ketre, öni Mark, föi Elizabeth: “Hnene la neköi nyio hna qaja ka hape, hnei nyio hna mele nyipici koi Iehova me iananyi me angeic, matre hnei angeice hna mekun troa canga bëeke koi Iehova. Madrine catre ni ke, hnei Iehova hna xatua nyio troa drengethenge Nyidrë.”
13. Nemene la nyine tro sa kuca ngöne la kola upetröneë la ketre sinee së?
13 Loi e tro sa fe la itre aliene hni së kowe la itre trejin ka trotrohni së. Loi e tro fe sa ithanata memine la itre trejin ka macaj. Tro angatre lai a xatua së troa mejiune laka, tro la sinee së a canga bëeke koi Iehova. (Ite edomë 12:25; 17:17) Öni Joanna: “Hace catre la meleng ke, kösë eni caasi pe hi. Ngo ame la eni a ithanata memine la itre trejin ka trotrohni ni, ke kola akeukawane la hninge ka akötr.” Ngo tune kaa e pëkö ixatua ne la itre trejin?
14. Pine nemene matre nyipiewekë tro sa “ixomihnikeu me inualoinekeun, ngacama kola ngazo” koi së?
14 Maine jë, tha trotrohni së kö hnene la itre trejin. Ngo loi e tro sa catre xomihni. (Iako. 3:2) Itre atr ka tha pexeje kö së. Maine jë, thatre kö angatre la nyine troa qaja maine angatre penaqaja la itre trenge ewekë ka akötr. Loi e tro sa lapa mekun la eamo i Paulo aposetolo, lo kola hape: “The mano kö nyipunie ixomihnikeu me inualoinekeun, ngacama kola ngazo koi nyipunie.” (Kol. 3:13) Önine la ketre trejin ka hetre sinee hna upetröneë: “Hnei Iehova hna xatua ni matre tha tro kö ni a drenge akötrëne la itre hna qaja hnene la itre trejin. Angatre a ajane troa xatua ni.” Tune kaa la aqane tro la ekalesia a xatuane la itre atrene la hnepe lapa ka mele nyipici pe?
IXATUA NE LA EKALESIA
15. Tune kaa la aqane tro sa xatuane la itre trejin ka hetre sinee hna upetröneë?
15 Nyipiewekë tro sa thiina ka loi me thiina ka menyik kowe la itre trejin ka hetre sinee hna upetröneë. Thupene la kola upetröneë la trejin me Miriam ke, angeice a hnehengazo troa tro kowe la hna icasikeu. Öni angeic: “Eni a xouene la hna troa qaja hnene la itre trejin. Ngo hnei itre xan hna utipi ni me trotrohnine la akötr ka eje theng. Tha hnei angatre kö hna qaja angazone la trejin me eni. Hnei angatr palahi hna xatua ni, matre kösë tha eni caasi kö.” Önine fe la ketre trejine föe: “Ame la kola upetröneë la neköng trahmany, hna ithuecatre koi ni hnene la itre trejin. Ame itre xan, thatre kö angatre la nyine troa qaja. Hnei angatre pe hna ce treij me eni me cinanyi tus. Itre ewekë lai ka akeukawane la hninge ka akötr!”
Ijije hi tro la itre xaa trejin a xatuane la trejin ka hetre sinee hna upetröneë (Wange ju la paragarafe 17) *
16. Tune kaa la aqane tro sa xatuane la itre trejin ka hetre sinee hna upetröneë?
16 Nyipiewekë tro sa xatuane la itre trejin ka hetre sinee hna upetröneë. Angatre a ajane tro sa hnimi angatr me hamë ithuecatr. (Heb. 10:24, 25) Itre xan a qaja ka hape, tha ithanata hë me angatr hnene la itre xaa trejin maine kolo pena iananyi me angatr. Celë hi matre, loi e tro sa thupëne la aqane ujë së. Ketre, loi e tro sa qaja aloin me ithuecatre kowe la itre thöth ka mele nyipici koi Iehova, ngacama hna upetröneë la kem me thine i nyudren. Hanawange la hna melën hnei Maria. Hna upetröneë la föi angeic me trotriji angeice me itre nekönatr. Öni Maria: “Hnene la itre trejin hna xatua ni troa kuci xen me kuca la hmi ne fami. Angatre a ce treije me eni me xatua ni troa xomihnine la akötre cili. Angatre fe a ithuecatre koi ni me cilëgöli ni ngöne la kola silitrengathoi ni hnei itre xan!”—Rom. 12:13, 15.
17. Nemene la nyine troa kuca hnene la itre qatre thup matre ithuecatre kowe la itre trejin ka akötr?
17 Itre qatre thup fe, loi e tro epuni a ithuecatrene la itre trejin ka hetre sinee hna upetröneë. Hnëqa i epuni troa akeukawane la hni angatr ka akötr. (1 Thes. 5:14) Loi e tro epuni a xomi ijine qëmeken me e thupen la itre icasikeu matre troa ithanata me angatr. Ijije hi tro epuni hane wai angatr me ce thithi me angatr. Ketre, loi e tro epuni a ce cainöje me angatr maine könë angatre kowe la hmi ne fami epun. Celë hi aqane tro la itretre thupë mamoe a hnime la itre mamoe i Iehova ka akötr me aja ixatua.—1 Thes. 2:7, 8.
TROA CILE CATR ME MEJIUNE KOI IEHOVA
18. Thenge la 2 Peteru 3:9, nemene la aja i Iehova kowe la itre atr ka trotriji Nyidrë?
18 Ame Iehova ke, “xele kö Nyidrë troa apatrene la ketre e nyipunie, ngo loi e tro pe nyipunieti asë a ietra.” (E jë la 2 Peteru 3:9.) Hnei Nyidrëti hna hamëne la thupene mel thatraqane la nöjei atr asë. Celë hi matre, ngacama kola tria hnene la ketre trejin, ngo nyipiewekë la mele i angeice koi Iehova. Ketre, Akötresieti ka tru ihnimine Iehova matre Nyidrëti a mejiune tro angatre a canga bëeke kowe la nyipici. Aja i Iehova tro angatr a ceitu memine lo neköne ka mejengön ngöne la ceitune i Iesu. (Luka 15:11-32) Nyimutre la itre ka trotriji ekö la nyipici ngo ka bëeke hmaca. Hna kepe angatr hnyawa hnene la itre trejin. Tui Elizabeth, madrine catre eahlo ngöne la kola bëeke hmaca hnene la neköi eahlo trahmany. Öni eahlo, “Tru la hni ne oleng kowe la itre trejin ka ithuecatre koi ni me xatua ni troa mejiune laka, troa bëeke hmaca la neköng koi Iehova.”
19. Pine nemen matre loi e tro palahi sa catre mejiune koi Iehova?
19 Nyipiewekë tro palahi sa mejiune koi Iehova. Tha Nyidrëti kö a upi së troa kuca la itre hne së hna thatrein. Ketre, hetre eloine la itre eamo i Iehova. Nyidrëti la Kem ka ham nge ka utipine la itre ka hnimi Nyidrë. Loi e tro fe a xecie koi së laka, tha tro kö Iehova a nuaxöji së ngöne la itre ijine akötr. (Heb. 13:5, 6) Celë hi lai hna anyipicine hnei Mark. Öni nyidrë: “Tha tro kö Iehova a nue së ngöne la itre ijine akötr. Tro palahi Nyidrëti a ceme easë.” Eje hi, tro palahi Iehova a hamë së “la men atraqatr” i Nyidrë. (2 Kor. 4:7) Haawe, catre jë së nyihlue i Iehova me mejiune laka, tro la itre sinee së a bëeke hmaca kowe la nyipici!
NYIMA 44 Thithi Ne La Atr Ka Hni Ka Menyik
^ par. 5 Hace catre së ngöne la kola trotriji Iehova hnene la ketre sinee së! Tro sa ce wange ngöne la tane mekun celë, la mekuna i Iehova göne lai memine la ka troa xatuane la itre atrene la hnepa lapa ka mele nyipici pe koi Iehova. Tro fe sa ce ithanatane la aqane tro la itre trejin ne la ekalesia a xatua angatr.
^ par. 1 Hna saze la itre ëj.
