1-2. Nemene la hna perofetan hnei Hagai göne la hneijine së?

AME lo 2015, hna traqa la ketre sa e Népal. Önine la itre xan ka melën ej: “Kösë samek la kola kei la itre magazë me itre uma ka hekö.” “Kola xou me nyenyape hmohmo la itre atr.” Öni itre xan: “Lue menetre hi, ngo ame koi ni, kösë qea palaha.” Maine tro fe a traqa koi së la ewekë celë, tha tro kö sa canga thëthëhmin.

² Ame enehila, tha ketre traone kö maine ketre nöj la hna jumejum. Ngo nöjei nöj asë la hna jumejum, qaane ekö uti hë enehila. Celë hi lai hna perofetan hnei Hagai, lo kola hape: “Dei la hna ulatine hnei Iehova ne sabaoth, ka hape, A casi pe hi, tha hmite kö, nge tro ni a jumejume la hnengödrai memine la fen, me hnagejë memine la hnadro.”—Hag. 2:6.

3. Pine nemene matre isapengöne kö la hna perofetan hnei Hagai memine la ketre sa?

³ Isapengöne kö la hna perofetan hnei Hagai memine la ketre sa. Itre sa a jumejume la nöj me akeine la nöjei uma. Ngo ame la hna perofetan hnei Hagai ke, ka hetre thangane fe ka loi kowe la nöj. Öni Iehova: “Tro ni a jumejume la nöjei nöj’ asë, nge tro ha traqa la nöjei ewekë lo hna ajane hnei nöjei nöj’ asë; nge tro ni a atiqane la uma ce hnei lolo.” (Hag. 2:7) Hna eatre tune kaa la hna perofetan celë ngöne lo hneijine i Hagai? Nge tune kaa la aqane eatr enehila? Celë hi la hne së hna troa ce wang. Tro fe sa ce wang la nyine troa kuca matre sine la huliwa ka jumejume la nöjei nöj asë.

4. Nemene la hnëqa hna ahnith hnei Iehova koi Hagai perofeta?

⁴ Hnei Iehova hna ahnithe koi Hagai perofeta la ketre hnëqa ka tru. Maine jë, Hagai la ketre atre Iudra ka bëek e Ierusalema lo 537 M.P.K., thupene la hna po e Babulona. Itre treu thupen, hnei angetre Iudra hna nyiqaane xupe la uma ne hmi. (Ezera 3:8, 10) Ngo hna icilekeu me angatr matre hnei angatr hna kucakuca me nue la huliwa. (Ezera 4:4; Hag. 1:1, 2) Celë hi matre, ame lo 520 M.P.K, hnei Iehova hna upi Hagai troa ithuecatr koi angetre Iudra, troa xupe hmaca la uma ne hmi me afenesin ej. *—Ezera 6:14, 15.

5. Pine nemene matre hna thuecatrene la angetre Iudra hnene la maca i Hagai?

⁵ Hnei Iehova hna upi Hagai troa acatrene la lapaune la angetre Iudra. Angatr a kucakuca me hnehengazo, matre öni Hagai: “Catejë nyipunie, nöjei ate ne la nöj’ asë, öni Iehova, nge huliwajë; ke ce ini hë me nyipunie, öni Iehova ne sabaoth.” (Hag. 2:4) Ame la hnaewekë, “Iehova ne sabaoth” ke, celë hi ka aegöcatrene la angetre Iudra. Eje hi, hetre trongëne isi Iehova, ene la itre angela. Celë hi matre, loi e tro angetre Iudra a mejiune koi Nyidrë matre umuthe la huliwa.

6. Nemene la thangane la hna jumejume la nöjei nöj asë?

⁶ Hnei Iehova hna upi Hagai troa thuemacanyine la angetre Iudra ka hape, tro Nyidrëti a jumejume la nöjei nöj asë. Celë hi ka ithuecatr koi angatr ngöne lo angatr a nue la huliwa ne xupe la uma ne hmi. Hnei Hagai hna perofetan ka hape, tro Iehova a jumejume la musi angetre Peresi. Nemene hë la thangan? Tro angetre Iudra a umuthe la uma ne hmi. Nge tro la itre atrene fen a hane ce atrunyi Iehova me angatr. Drei la ketre maca ka aegöcatrene la itre hlue i Akötresie!—Zaka. 8:9.

7. Nemene la huliwa ka jumejume la fene hnengödrai enehila? Qejepengöne jë.

⁷ Kola eatre tune kaa la hna perofetan hnei Hagai enehila? Ame fe enehila, Iehova a jumejume la nöjei nöj asë, nge hetre hnëqa së fe. Ame lo 1914, hnei Iehova hna acili Iesu troa joxu ne la Baselaia i Nyidrë e hnengödrai. (Sal. 2:6) Ketre maca lai ka ngazo kowe la itre musi ne fen. Kola amamane koi angatr laka, ase hë nyipune “la hneijine ne la itre nöj,” ene la ijine laka, pë palakö mus hnei Iehova hna acil e celë fen. (Luka 21:24) Celë hi matre, ame lo 1919, hnene la itre hlue i Iehova hna cainöjëne la Baselaia i Akötresie laka, eje hmekuje hi la ka hamë mejiune kowe la nöjei atr asë. Hnene la “maca ka loi ne la Baselaia” hna jumejume la fene hnengödrai asë.—Mat. 24:14.

8. Thenge la Salamo 2:1-3, nemene la aqane ujë ne la itre atr göne la maca?

⁸ Tune kaa la aqane ujë ne la itre atr göne la maca? Alanyimu la itre ka thipëne ej. (E jë la Salamo 2:1-3.) Xele kö la itre nöje ma kapa la Joxu hna acile hnei Iehova. Ame koi angatr, tha “maca ka loi” kö la hne së hna tro fë. Celë hi matre, itre musi a wathebone la huliwa ne cainöj. Önine la itre xaa ka mus ka hape,  angatr a nyihlue i Akötresie, ngo xele pe angatre ma nue la musi angatr. Celë hi kepin matre, angatr a icilekeu memine la Joxu hna acile hnei Iehova. Nge tune lo hneijine la itre pane Keresiano, angatr a qanangazone la itretre drei nyidrë.—Itre hu. 4:25-28.

9. Nemene la aja i Iehova kowe la itre ka icilekeu?

⁹ Nemene la aja i Iehova kowe la itre ka icilekeu me Nyidrë? Kola qaja ngöne Salamo 2:10-12: “Qa ngöne lai, inamacanejë nyipunie ite joxu, nge ame nyipunie itete amekötine la fene, te, kapaju. Nyi hlue jë koi Iehova memine la qou, nge madinejë memine la hmengöhmengön. Idemijë nyipunie memine la Nekön, wanga elëhnijë nyidë, nge patepi nyipunie e kuhu gojeny, ke tha hmite kö cia la elëhni nyidë. Manathithi angat’ asë angete lapaune koi nyidë.” Eje hi, Iehova a utipine la itre nöj, matre Nyidrë a nue ijine koi angatr troa saze me kapa la Baselaia i Nyidrë. Ngo xoxopatre pe hi la ijin. Easa melëne “la itre drai ne la pun” la fene celë. (2 Tim. 3:1; Is. 61:2) Haawe, enehila hi la ijine troa thele la nyipici me axecië mekune hnyawa.

10. Thenge la Hagai 2:7-9, nemene la aqane ujë ne la itre xan ngöne la kola jumejume la nöjei nöj?

¹⁰ Ame itre xan ke, lolo la aqane ujë i angatr ngöne la kola jumejume la nöjei nöj. Öni Hagai ka hape, “tro ha traqa la nöjei ewekë lo hna ajane hnei nöjei nöj’ asë [itre atr ka hetre hni ne aja]” e hnine la uma ne hmi matre troa atrunyi Iehova. * (E jë la Hagai 2:7-9.) Celë fe hi la hna perofetan hnei Isaia me Mika, nge kola eatr “ngöne la ite drai hnapin.”—Is. 2:2-4; Mika 4:1, 2.

11. Tune kaa la aqane ujë i Ken ngöne la nyidrëti a xötrei dreng la maca ne Baselaia?

¹¹ Hanawang la hna melën hnei Ken, ketre trejin ka huliwa ngöne la Hnalapa  Ne Xomi Meköt. Tune kaa la aqane ujë i Ken ngöne la nyidrëti a dreng la maca ne Baselaia? Mekun palahi Ken lo nyidrëti a xötrei dreng la maca cili laka, 40 hë lao macatre enehila. Öni Ken: “Madrine catre ni troa atre laka, easë ngöne la itre drai ne la pun. Hnenge hna trotrohnine laka, nyipiewekë troa trotrije la fene celë me catre nyihlue i Iehova, matre hane kepe ni hnei Nyidrë me hetrenyi la mel ka pë pun. E cili, hnenge hna pane thith koi Iehova. Thupene lai, hnenge hna iananyi memine la fene celë me sajuëne la Baselaia i Akötresie, ene la musi hna thatreine troa jumejum.”

12. Pine nemene matre kola atiqane hnei lolo la uma i Iehova ngöne la itre drai ne la pun?

¹² Iehova a amanathithine la nöje i Nyidrë. Ame ngöne la itre drai ne la pun, kola elë la etrune la itre hlue i Nyidrë. Ame lo 1914, ala xalaithe hi angatr. Ngo ame hë enehila, ase hë sasaithe la 8 milio lao hlue i Iehova. Alanyimu fe la itre ka ce sine me easë la Drai Ne Amekunën. Eje hi, kola atiqane la uma i Iehova (ene la hmi ka wië) “hnene la nöjei ewekë lo hna ajan.” Ketre, kola atrune la ëje i Iehova ngöne la itre atr a heetrëne la itre thiina ka lolo me saze.—Efe. 4:22-24.

13. Nemene la hna perofetan ekö göne la aqane kökötre la nöje i Iehova? (Wange ju la icetrön.)

¹³ Ase hë perofetan ekö laka, troa elë la etrune la itre hlue i Iehova. Kola qaja ngöne Isaia 60:22: “Tro ha ala thausane la ala xalaith, nge tro ha nöje ka cate la ka co; tro ni Iehova a asaqen’ eje ngöne la ijin’ ej.” Eje hi, alanyimu la itre ka traqa ngöne la hmi ka wië. Angatr a traqa fë la itre hnei angatr hna atrein me inamacan. Ketre, aja i angatr troa cainöjëne “la maca ka loi ne la Baselaia.” Ijije hi tro la itre hlue i Iehova a huliwane la itre talan cili, hna aceitunën ekö hnei Isaia memine la “zane thi ne la nöjei nöj.” (Is. 60:5, 16) Jëne la ixatua i angatr, easa cainöj ngöne la 240 lao nöj, me ujëne la itre itus ngöne la 1000 lao qene hlapa.

14. Nemene la nyine tro la itre atr a canga mekun enehila?

¹⁴ Ame ngöne la itre drai ne la pun, kola jumejume la nöjei nöj. Matre, nyipiewekë tro la itre atr a iën. Hapeu, tro kö a sajuëne la Baselaia i Akötresie, maine mejiune kowe la itre musi ne la fen? Enehila hi la ijine troa axecië mekune hnyawa. Itre hlue i Iehova a trongëne la itre wathebo i mus, ngo tha angatre kö a sine la kuci politik. (Rom. 13:1-7) Atre hi angatr laka, Baselaia i Akötresie hmekuje hi la ka troa apatrene la nöjei akötr, nge tha qaa kö celë fene la Baselaia cili.—Ioane 18:36, 37.

15. Thenge la tusi Hna Amaman, troa tupathe tune kaa la lapaune së?

¹⁵ Kola qaja ngöne la tusi Hna Amaman la aqane troa tupath la lapaune la itre hlue i Iehova, ngöne la itre drai ne la pun. Eje hi, troa catrehnine la icilekeu. Tro la itre musi a musinëne la itre atr troa sajuë angatr. Nge tro angatr a qanangazone la itre ka tha idrengethenge kö. (Hna ama. 13:12, 15) Tro angatr a “upe la itre atr—itre ka co me ka tru, itre trenamo me ka pë ewekë, itre hna nue kö me itre hlu—troa ati hatrene la ime maca i angatr, maine göpadri angatr.” (Hna ama. 13:16) Ame ekö, itre maseta a ati hatrene la itre hlue i angatr hnei fao hna dreuth. Ketre tune fe enehila, tro la itre musi a upe la itre atr troa amamane ngöne la aqane ujë i angatr laka, angatr a sajuëne la itre ka mus.

16. Hnauëne laka, nyipiewekë tro sa acatrene la lapaune së koi Iehova enehila?

¹⁶ Hapeu, tro kö sa kapa la hatrene cili me sajuëne la itre musi atr? Ame la itre ka thipëne la hatrene cili, tro angatr a cile kowe la itre jol ka tru. Önine la tusi Hna Amamane ka hape: “E pëkö hatren, thatreine kö tro ketre a itö maine salem.” (Hna ama. 13:17) Ame pe, atre hi së la mekuna i Akötresie göne la itre ka kapa la hatrene cili. (Hna ama. 14:9, 10) Celë hi matre, easa cinyihane ngöne la ime së ka hape: “Ate i Iehova ha ni.” (Is. 44:5) Haawe, catre jë së mele nyipici koi Iehova enehila. Tro hë Iehova a madrin laka, itre hlue i Nyidrëti së!

17. Nemene la hna qaja göne la aqane xomihni aqeanyi Iehova?

¹⁷ Iehova a catre xomihni aqeany ngöne la itre drai ne la pun. Tha aja i Nyidrëti kö troa paatre hnei ketre. (2 Pet. 3:9) Iehova a ajane tro la nöjei atr a ietra me axecië mekune hnyawa. Ngo hetre ifego la aqane xomihni aqeanyi Iehova. Ame la itre ka tha hane kö sajuëne la Baselaia i Akötresie, tro hë angatr a tui Farao ngöne la hneijine i Mose. Öni Iehova koi Farao: “Enehila tro ni a xejë la imenge me lepi ’ö me nöjei jini ’ö hnene la meci ka sholeshol; nge tro ha apatenyi ’ö qa ngöne la nöj. Nge ngöne hi lai hnenge hna acilë eö nyine amamane la menenge göi ’ö, nge mate hlemu la ëjeng’ e celë fen’ asë.” (Eso. 9:15, 16) Tro hë la nöjei nöj a atre laka, Iehova la nyipi Akötresie. (Ezek. 38:23) Tune kaa?

18. (a) Nemene la ketre ijine hna jumejume hna qaja ngöne Hagai 2:6, 20-22? (b) Easa atre tune kaa laka, troa eatr elanyi la itre trengewekë i Hagai?

¹⁸ Ngacama meci hë Hagai ekö, ngo öni Paulo ka hape, troa eatr elanyi la hna perofetan ngöne Hagai 2:6, 20-22. (E jë.)  Öni Paulo: “Enehila, nyidrëti a sisinyi ka hape: ‘Nyipici, tro hmaca ni a enienijëne la ihnadro, me hnengödrai fe.’ Ame la hna hape, ‘tro hmaca,’ tre kola amamane ka hape, tro ha patre la itre ewekë hna enienijën, itre hna kuca matre lapa ju pe hi la itre ewekë tha hna enienijën.” (Heb. 12:26, 27) Isapengöne kö la aqane ijumejume celë memine lo hna qaja ngöne Hagai 2:7. Ej a amamane laka, troa apatren epine palua la itre ka thipetrij la musi Iehova tui Farao.

19. Nemene la ewekë tha hna troa jumejume kö?

¹⁹ Nemene la ewekë tha hna troa jumejume kö maine enienijën? Öni Paulo: “Pine laka, tro hë së a kapa la Baselaia hna thatreine enienijën, loi e tro pala hi sa kapa la ihnimi gufa, ihnimi gufa ka aijijë së troa kuca la huliwa ka hmitrötr thatraqai Akötresie, cememine la xou me hmengöhmengön, nge huliwa ka amadrinë nyidrë.” (Heb. 12:28) Thupene la ijumejume tixenuë, Baselaia i Akötresie hmekuje hi la ka troa lapa me mus. Tro ej a cile hut epine palua!—Sal. 110:5, 6; Dan. 2:44.

20. Nemene la mekun nyine tro la itre atr a iën, nge nemene la aqane tro sa xatua angatr?

²⁰ Haawe, enehila hi la ijine troa axecië mekune hnyawa! Emele së hi lai! Loi e tro la itre atr a iën. Maine tro angatr a sajuëne la fene celë, tro ha apatrenyi angatre palua. Ngo maine tro angatr a sajuëne la Baselaia i Iehova, tro hë angatr a hetrenyi la mel ka pë pun. (Heb. 12:25) Jëne la huliwa ne cainöj, easa xatuane la itre atr troa axecië mekun. Haawe, catre jë së xatuane la ka alanyimu troa sajuëne la Baselaia i Akötresie. Öni Iesu: “Tro ha cainöjëne la maca ka loi ne la Baselaia e cailo fen nyine anyipicine kowe la nöjei nöj; ame hna traqa pi la pun.”—Mat. 24:14.