1. Thenge la Malaki 3:16, nemene la itus hnei Iehova hna nyiqane cinyanyin qaan ekö? Nge nemene la hna cinyanyin e kuhu hnin?

 ITRE macatre hë enehila, hnei Iehova hna nyiqane cinyanyine la ketre itus. Hna cinyanyin e hnine la itusi cili la ëje ne la itre hlue i Iehova ka mele nyipici, nge hna nyiqane hnei Abela. * (Luka 11:50, 51) Kola tro la itre macatre, nge Nyidrëti palahi a nyialiene la itusi cili. Ame enehila, traqa ha koi itre milio lao ëje ka mama e kuhu hnin. Ame e hnine la Tusi Hmitrötr, hna hëne la itusi cili ka hape, “tusi ne amekunëne,” me “tusi ne mel.” Ame ngöne la tane mekune celë, tro sa hëne ej ka hape, “tusi ne mel.”​—E jë la Malaki 3:16; Hna ama. 3:5; 17:8.

2. Ëje i drei la hna cinyanyin e hnine la tusi ne mel, nge nemene la nyine tro sa kuca matre cinyanyine la ëje së e hnine la itus?

² Hna cinyanyin e kuhu hnine la itus la ëje ne la itre atr ka xoue Iehova me hnimi Nyidrë. Nge angatre hi la ka troa hetrenyi la mele ka pë pun. Tro fe a hane cinyanyine la ëje së e hnine lai itus, e tro sa acatrene la imelekeu së me Iehova, me lapaune kowe la mele hna huujëne hnei Iesu. (Ioane 3:16, 36) Mejiune ju hë së troa mel e hnengödrai maine e celë fen, ngo easë asë hi a ajan troa hetrenyi la ëje së ngöne la itus.

3-4. (a) Tro kö sa mele palua, ke hna cinyanyine la ëje së e hnine la tusi ne mel? Qejepengöne jë. (b) Nemene la itre hnying hne së hna troa sa ngöne la tane mekune celë, me e thupen?

³ Hapeu, ame asë hi la itre atr ka hetre ëjen ngöne la  tusi ne mel, ke tro asë hi angatr a kapa la mele ka pë pun? Hane hi la hna qaja hnei Iehova koi Mose ngöne Esodro 32:33. Öni Nyidrë: “Tro hmekuje hi ni a apatrene la ëjene la atre kuca la ngazo qa ngöne la itusing.” Kolo hi lai a amamane ka hape, ijije hi troa xometrij la itre ëje hna cinyanyine ngöne la itus. Kösë hnei Iehova hna cinyanyine hnei crayon la itre ëj. (Hna ama. 3:5, ithuemacany.) Haawe, loi e tro palahi sa isine matre tro la ëje së a lapa e hnine la itusi cili, utihë la Iehova a cinyianyine ej hnei peen.

⁴ Maine jë, easa a isa hnying ka hape, ‘Nemene la hna qaja hnei Tusi Hmitrötr göne la itre ëj hna cinyanyine e hnine la itus, me itre ëj ka paatr? Eue la ijine troa kapa la mele ka pë pun hnene la itre ka hetre ëjen e hnine la itus? Tune kaa pena kowe la itre ka mec, nge ka thatre Iehova, tro kö a hane cinyanyine la ëje i angatr elany?’ Tro la tane mekune celë, me e thupen a sa la itre hnyinge celë.

DREI LA ITRE ËJ HNA CINYANYINE NGÖNE LA TUSI NE MEL?

5-6. (a) Thenge la Filipi 4:3, drei la itre ëj hna cinyanyin ngöne la tusi ne mel? (b) Eue la troa cinyanyine palua la ëje ne la itre hna iën ngöne la tusi ne mel?

⁵ Drei la itre ëj hna cinyanyine ngöne la itusi ne mel? Tro sa ce wang la 5 lao gurup. Ame thene la itre gurupe cili, alaköne hi la hna cinyanyine la ëje ngöne lai itus.

⁶ Ame la pane gurup, kola qaja la itre hna iën troa ce musi me Iesu e hnengödrai. Hna cinyanyine kö la ëje i angatr ngöne la tusi ne mel? Öö. Öni Paulo kowe la itre trejin ne Filipi ka hape, hna cinyanyine la ëje ne la itre hna iën troa ce musi me Iesu ngöne la tusi ne mel. (E jë la Filipi 4:3.) Ngo maine aja i angatr tro  la ëje i angatr a lapa palua ngöne la itus, loi e tro angatr a mele nyipici. Nge e tro angatr a mele nyipici utihë la mec maine utihë la kola nyiqane la akötr atraqatr, tro ha cinyanyine palua la ëje i angatr e hnine la itus.​—Hna ama. 7:3.

7. Thenge la Hna Amaman 7:16, 17, eu la troa cinyanyine palua la ëje ne la ka alanyimu atraqatr ngöne la tusi ne mel?

⁷ Ame la hnaaluene gurup, ke kola qaja la ka alanyimu atraqatr. Ëje i angatre kö e hnine la tusi ne mel? Öö. Nge thupene Amagedro, tro palahi a mama la ëje i angatr e hnine la itus. (Hna ama. 7:14) Ame la itre ka troa mele pe qa ngöne la isi Amagedro, ke angatre hi la ‘itre xa mamoe’ ka troa kapa “la mele ka pë pun.” (Mat. 25:46) Ngo tha tro kö angatr a canga kapa la mele ka pë pun. Kösë hna cinyanyine palahi la ëje i angatr hnei crayon ngöne la tusi ne mel. Ame ngöne la 1 000 lao macatre, tro Iesu a “troxomi angatr kowe la itre qeqe ne timi ne mel.” Matre ame la itre ka xötrethenge Iesu me mele nyipici koi Iehova ngöne la itupath tixenuë, ke tro ha cinyanyine palua la ëje i angatr ngöne la tusi ne mel.​—E jë la Hna Amaman 7:16, 17.

8. Drei la itre ëje hna tha cinyanyine kö ngöne la tusi ne mel, nge nemene la pun koi angatr?

⁸ Ame la hnaakönine gurup, ke kola qaja la itre nani, ene la itre hna troa apatrene ngöne la isi Amagedro. Tha hna cinyanyine kö la ëje i angatr ngöne la tusi ne mel. Öni Iesu, tro angatr a “tro kowe la meci ka epine palua.” (Mat. 25:46) Nge öni Paulo, troa ‘ameköti angatr . . . . tro ha apatrene palua’ angatr. (2 Thes. 1:9; 2 Pet. 2:9) Celë fe hi la pun kowe la itre ka qaja angazone la uati hmitrötr, ene la itre ka iën troa ithupëjia me Iehova. Tha tro kö angatr a kapa la mele ka pë pun, ngo meci ka epine palua. Eje hi, pëkö mele hmaca ka ijij koi angatr. (Mat. 12:32; Mar. 3:28, 29; Heb. 6:4-6) Tro pena sa ce wang la lue gurup, hna troa amelene hmaca e celë fen.

ITRE HNA TROA AMELENE HMACA

9. Thenge la Itre Huliwa 24:15, drei la lue gurup hna troa amelene hmaca e celë fen, nge nemene la eisapengöne i nyidro?

⁹ Tusi Hmitrötr a qaja la lue gurup hna troa amelene hmaca e celë fen, nge ka troa kapa la mele ka pë pun, ene la “itre atre ka meköt,” me “ka tha meköti kö.” (E jë la Itre Huliwa 24:15.) Ame la “itre atre ka meköt,” ke kolo itre ka nyihlue i Iehova qëmekene tro angatr a mec. Nge ame pena la itre “ka tha meköti kö” ke, kolo itre atr ka thatre Iehova kö, nge ka kuca la itre huliwa ka ngazo qëmekene tro angatr a mec. Pine laka, troa amelene hmaca la lue gurupe cili, kolo kö lai a hape, hna cinyanyine la ëje i angatr ngöne la tusi ne mel? Tro sa ce wang la pengöne la lue gurup cili.

10. Hnauëne la troa amelene hmaca la “itre atre ka meköt,” nge nemene la hnëqa hna troa kapa hnene la itre xan thei angatr? (Wange ju la tane mekun “Itre Hnyinge Ne La Itre Ka e” göne la melehmaca e celë fen.)

¹⁰ Ame la hnaafoane gurup, ke kolo “itre atre ka meköt.” Ame lo mele palakö angatr, ase hë cinyanyine la ëje i angatr ngöne la tusi ne mel. Ngo tune kaa la angatr a mec, hna köletrije kö la ëje i angatr? Waea, ke “itre ka mel asë hi angatr” ngöne la mekuna i Akötresie. Ame Iehova, “tha nyidrëti kö la Akötresi ne la itre ka mec, ngo itre ka mele pe.”  (Luka 20:38) Kolo lai a hape, ame la kola amele angatr hmaca e celë fen, ke hna cinyanyine palahi la ëje i angatr hnei crayon ngöne la tusi ne mel. (Luka 14:14) Nge ame la itre xan thei angatr, ke troa “acili joxu angat’ e celë fene hnengödrai asë.”​—Sal. 45:16.

11. Nemene la nyine tro la itre “ka tha meköti kö” a kuca matre tro fe a hetre ëjen ngöne la tusi ne mel?

¹¹ Ame la hnaafaifine gurup, ke kolo itre “ka tha meköti kö.” Qëmekene tro angatr a mec, tha ka meköti kö la aqane mele i angatr ke, thatre Iehova kö angatr. Celë hi matre tha hna cinyanyine kö la ëje i angatr ngöne la tusi ne mel. Ngo ame hë la Akötresie a amele angatr hmaca, Nyidrëti hi lai a aijijë angatr troa hetre ëj ngöne la tusi ne mel. Nyipiewekë tro sa xatua angatr, ke hnei angatr ekö hna kuca la itre huliwa ka sis me ka ngazo catr. Hnëqa së troa ini angatr la itre trepene meköti Iehova. Ame ngöne la ijine cili, tro la Baselaia i Akötresie a acil la ketre porogaram ne ini Tusi Hmitrötr ngöne la fen asë.

12. (a) Drei la ka troa hamë ini kowe la itre ka tha meköti kö? (b) Nemene la pun kowe la itre ka thipetrij la itre ini hna kapa?

¹² Drei la ka troa hamë ini kowe la itre ka tha meköti kö? Hnëqa ne la ka alanyimu atraqatr memine la itre atr ka meköt hna amelene hmaca. Troa cinyanyine la ëje ne la itre ka tha meköti kö ngöne la tusi ne mel, e tro angatr a imelekeu me Iehova me nue la mele i angatr koi Nyidrë. Tro Iesu memine la itre hna iëne a goeën qa hnengödrai ka hape, angatre kö a kapa hnyawa la itre ini hna hamën koi angatr. (Hna ama. 20:4) Maine tro la ketre e angatr a thipetrij la itre ini cili, troa apatrenyi angeic ngacama 100 ju hë lao macatre i angeic. (Is. 65:20) Öhne hi Iehova me Iesu la hni ne la itre atr, nge tha tro kö nyidro a nue la ketre atr troa qanangazone la fene ka hnyipixe.​—Is. 11:9; 60:18; 65:25; Ioane 2:25.

 MELEHMACA KOWE LA MEL ME KOWE LA IAMEKÖTI

13-14. (a) Nemene la aqane trotrohnine easë ekö la hna qaja hnei Iesu ngöne Ioane 5:29? (b) Nemene hë la aqane trotrohnine së enehila?

¹³ Hnei Iesu fe hna qaja la itre ka troa melehmaca e celë fen. Öni nyidrë: “Easenyi hë la hawa ne tro la itre ka meköl hnine la itre hua ne amekunën, a drenge la aqane ewekë i angeic me lö pi. Troa amelene hmaca la itre ka kuca [ekö] la loi kowe la mel, me itre ka kuca [ekö] la ngazo kowe la iameköti.” (Ioane 5:28, 29) Kola hapeue lai?

¹⁴ Ame ekö, easa mekun ka hape, Iesu a qaja la itre hna kuca hnene la itre atr thupene la kola amele angatre hmaca. Kolo lai a hape, ame ngöne la fene ka hnyipixe, hetre ka troa kuca la itre ewekë ka loi, nge itre ka troa kuca la itre ewekë ka ngazo. Ngo tha Iesu kö a qaja ka hape, tro la itre ka melehmaca a kuca la itre huliwa ka loi maine ka ngazo. Nyidrëti pe a qaja la itre hnei angatr hna kuca ekö. Kola qaja la itre huliwa i angatr qëmekene tro angatr a mec. Nge ka meköti hi lai, ke tha tro kö Iehova a nue la ketre atr troa kuca hmaca la itre ewekë ka ngazo ngöne la fene ka hnyipixe. Matre easa trotrohnine laka, ame la itre huliwa ka ngazo hna qaja ngöne la xötr, ke itre huliwa hna kuca qëmekene tro angatr a mec. Ngo nemene la aliene la Iesu a qaja la melehmaca “kowe la mel,” me “kowe la iameköti”?

15. Drei la itre hna troa amelene hmaca “kowe la mel,” nge pine nemen?

¹⁵ Ame la itre ka meköt, ene la itre ka kuca la aja i Iehova qëmekene troa mec, troa amele angatr hmaca “kowe la mel,” ke ase hë cinyanyine la ëje i angatr ngöne la tusi ne mel. Kolo hi lai a amamane ka hape, casi hi la melehmaca ne la “itre ka kuca la loi” hna qaja ngöne Ioane 5:29 memine la melehmaca ne la “itre atre ka meköt” hna qaja ngöne Itre Huliwa 24:15. Roma 6:7 a hape: “Ame la atre ka mec, tre pëhë ngazo i angeic.” Haawe, thëthëhmine hë Iehova la itre ngazo hna kuca ekö hnene la itre ka meköt, ngo tha thëthëhmine kö Nyidrë la itre huliwa ka loi i angatr. (Heb. 6:10) Maine aja i angatr tro la ëje i angatr a lapa palua ngöne la tusi ne mel, ke nyipiewekë tro angatr a mele nyipici koi Iehova.

16. Nemene la nyine troa kuca hnene la itre hna troa amelene hmaca “kowe la iameköti”?

¹⁶ Nge tune kaa kowe la itre ka kuca la itre ewekë ka ngazo qëmekene troa mec? Ngacama ase hë köletrij la itre ngazo i angatr ngöne la angatr a mec, ngo ame pe tha hnei angatre kö hna nyihlue i Iehova. Celë hi matre tha hna cinyanyine kö la ëje i angatr ngöne la tusi ne mel. Casi hi la melehmaca ne la “itre ka kuca la ngazo” memine la melehmaca ne la itre “ka tha meköti kö” hna qaja ngöne Itre Huliwa 24:15. Kola qaja la melehmaca “kowe la iameköti.” * Ame la kola amekötine la itre ka tha meköti kö, kola qaja la troa nue ijine koi angatr troa saze. (Luka 22:30) E thupen, qanyi Iesu pë hë amekötine ka hape, tro kö a hane cinyanyine la ëje i angatr ngöne la tusi ne mel. Haawe, troa cinyanyine la ëje i angatr, e tro angatr a nuetrij la aqane  mele i angatr ekö, me nue la mele i angatr koi Iehova.

17-18. Nemene la nyine troa kuca hnene la itre atr hna troa amelene hmaca e celë fen, nge nemene la itre “huliwa” hna qaja ngöne Hna Amaman 20:12, 13?

¹⁷ Tro asë hi la itre ka troa melehmaca, itre ka meköt me ka tha meköti kö, a drengethenge la itre wathebo ka hnyipixe hna qaja ngöne la itre itus hna ewath hna troa fe ngöne la 1 000 lao macatre. Hane hi la hnei Ioane aposetolo hna meköle goeën. Öni angeic: “Nge hnenge hna öhne la itre ka mec, itre ka tru me ka co, angatr a cil qëmekene la theron, nge hna fe la itre tusi hna ewath, ngo fe pi hi la ketre, ene lo tusi ne mel. Hna amekötine la itre ka mec qa ngöne la hna cinyihan ngöne la itre tus, thenge la isa huliwa i angatr.”​—Hna ama. 20:12, 13.

¹⁸ Nemene “huliwa”? Tro kö a ameköti angatr thenge la itre huliwa hnei angatr hna kuca ekö qëmekene troa mec? Waea! Hna köletrij la itre ngazo i angatr la angatr a mec. Matre ame la itre “huliwa” hna qaja e celë ke, tha kolo kö lo itre huliwa hnei angatr hna kuca ekö. Ngo, kolo pe a qaja la itre huliwa i angatr ngöne la fene ka hnyipixe. Ngacama itre ka mele nyipici Noa, me Samuela, me Dravita, me Daniela ekö, ngo nyipiewekë tro angatr a atrepengöi Iesu Keriso, me lapaune kowe la thupene mel. Nge the qaja palaha la itre hna troa inin hnene la itre ka tha meköti kö!

19. Nemene la pun kowe la itre atr ka pëkö ëj e hnine la tusi ne mel?

¹⁹ Nemene la pun kowe la itre atr ka pëkö ëj e hnine la tusi ne mel? Öni Hna Amaman 20:15: “Ame la nöjei atr ka pë ëjen hnine la tusi ne mel, hna kuië angatre fe hnine la hneopegejë eë.” Troa apatrene palua angatr. Celë hi matre loi e tro sa isine tro palahi la ëje së a lapa e hnine la tusi ne mel!

20. Nemene la huliwa hna troa kuca ngöne la 1 000 lao macatre? (Wange ju la icetrön.)

²⁰ Tru catre la itre manathith hne së hna troa kapa ngöne la 1 000 lao macatre! Troa acil la ketre porogaram ne ini Tusi Hmitrötr ngöne la fen asë. Nge ijine hi lai troa amekötine la aqane ujë ne la itre ka meköt me ka tha meköti kö. (Is. 26:9; Itre hu. 17:31) Troa eköthe tune kaa la huliwa ne hamë ini elany? Ame ngöne la tane mekun e thupen, tro sa sa la hnyinge celë, me ce wang la enyipiewekëne la huliwa cili.