Öni Paulo ngöne 1 Korinito 15:8: “Thupei angatr asë, nyidrëti a mama pi fe koi ni, matre kösë eni la ketre nekönatre ka malaija.” Ame ekö, easa mekune ka hape, Paulo a qaja lo ijine Iesu a mama koi angeic ngöne la lolo i nyidrë e hnengödrai, kösë kolo hmaca a hnaho angeic, maine amele angeic hmaca e hnengödrai. Ame pe, thenge la itre hna ithel, loi e tro hmaca a amekötine la aqane trotrohnine së la xötre celë.

Nyipici laka, Paulo e celë a qaja lo ijine kola saze la mele i angeic. Ngo, hnauëne la Paulo a qaja ka hape, “ketre nekönatre ka malaija” angeic? Hane hi la itre mekune ka sa la hnyinge cili.

Kola sesëkötr hnei Paulo la kola aca tro saze la mele i angeic. Eje hi, ka iasesëkötrë la kola malaija la nekönatr. Ame lo Saulo (hna hëne pë hë e thupen ka hape, Paulo) a tro Damaseko troa axösisine la itre keresiano, sesëkötre ju hi angeic la angeic a meköle goeë Iesu a mele hmaca ha. E cili, hna aca tro saze la mele i Paulo. Ewekë lai ka asesëkötrë angeic, memine fe la itre keresiano hnei angeic hna troa axösisin e Damaseko. Nge hnene laka, hna aca traqa la ewekë cili, ene pe, ti ju hi la luemeke i angeic koi hnepe ijine hi.​—Itre hu. 9:1-9, 17-19.

Hna saze la mele i Paulo, ngo “tha ngöne kö la nyipi ijin.” Ame la Qene Geres ne la hnaewekë, “malaija,” ke hna hape, “hna hnahon, ngo tha ngöne kö la nyipi ijin.” Kolo fe a qaja ngöne la ketre Tusi Hmitrötr ka hape: “Kösë hna hnaho ni, ngo pëkö ka atre.” Ame lo kola saze la mele i Paulo, Iesu hë e hnengödrai. Nge angeic a qaja ngöne la itre xötre ka he hun laka, tha ceitu i angeice kö memine la itre xan ka öhnyi Iesu a mele hmaca ha, qëmekene tro nyidrë a elë hnengödrai. (1 Kor. 15:4-8) Ngacama tha hna traqa kö la ewekë cili “ngöne la nyipi ijin,” ngo hnei Paulo fe hna hane öhnyi Iesu a mele hmaca ha.

Paulo a qeje angeic me wangaconyi angeic. Önine la itre ka ithel ka hape, ame la itre trengeithanata i Paulo ke, tha ka loi kö. Paulo ithanata tun, ke ame koi angeic, tha ijiji angeice kö troa kapa la manathithi cili. Celë hi matre öni angeic: “Eni la aposetolo ka co catr ne la nöjei aposetolo, nge tha ijije kö troa hë ni ka hape, aposetolo, ke hnenge lo hna axösisine la ekalesia i Akötresie. Ngo pine la ihnimi gufa i Akötresie, aposetolo fe hë ni.”​—1 Kor. 15:9, 10.

Ma Paulo jë a qaja e celë la aqane asesëkötrë angeic hnene la aqane mama i Iesu, memine la hna aca tro saze la mele i angeic. Ame koi angeic, tha ijiji angeic kö troa kapa la iamamanyikeu cili. Ngo ame pe, hnei Paulo hna wangatrune la aqane mama Iesu koi angeic. Ketre, xecie hnyawa koi angeic ka hape, mele hmaca ha Iesu qa hna mec. Celë hi matre hnei angeic hna anyimua amexej, ngöne la angeic a qeje mele hmaca.​—Itre hu. 22:6-11; 26:13-18.