1. Nemene la itre xa hna amekötin ka mama e hnine la Tusi Hmitrötr, nge pine nemene matre nyine loi koi së?

AME e hnine la Tusi Hmitrötr, hetre itre hna amekötin hnei Iehova hna hamëne koi së. Hnei Nyidrë hna wathebo së troa thili kowe la itre idrola, me atrekënö, me iji menu la ka haitr, me kuci ngazo. (1 Korinito 6:9, 10) Ketre, hnei Iesu, nekö i Akötresie, hna ahnithe la ketre huliwa kowe la itretre drei nyidrë. Öni nyidrë: “Trojë nyipunie a inine la nöjei nöj’ asëjëihë, me bapataiso angate kowe la atresiwa i Tetetro, me Hupuna, me [u]ati [h]mitöt; ini angate jë troa trongëne la nöjei ewekë asëjëihë lo hnenge hna ahnithe koi nyipunie ; nge hana wang ini a ce me nyipunie ngöne la nöjei drai asëjëihë uti hë la pune la fene hnengödrai.” (Mataio 28:19, 20) Ame asë hi la itre ewekë hnei Iehova me Iesu hna amekötine koi së, tre, nyine loi koi së. Itre hna amekötine lai ka xatua së troa thupëne la mele së, memine la mele ne la hnepe lapa së. Kolo fe a xatua së troa lolo la ngönetrei së me mele madrin. Nge ame la ka tru koi së, tre ene la troa amadrinë Iehova, nge ketre Nyidrëti fe a amanathithi së.

2, 3. (a) Pine nemene matre tha Tusi Hmitrötr kö a qaja asë la itre nyine tro sa kuca? (b) Nemene la itre hnying nyine tro sa ce wang ngöne la tane mekune celë? (Wange ju la pane iatr.)

 ² Tha hna qaja asë kö la itre nyine tro sa kuca e hnine la Tusi Hmitrötr, tune la aqane tro sa heetr. Ngacama isa hetre aqane heetre ne la itre atr thenge la itre nöj, nge kola saze trootro la aqane heetr thenge la hneijin, ngo ame la hnei Tusi Hmitrötr hna qaja ha ekö, tre tha saze kö. Kolo hi lai a amamane la inamacane ka eje thei Iehova. Ketre, tha Tusi Hmitrötre kö a amekötine la pengöne huliwa nyine tro sa xom, maine itre nyine iamadrinë, maine itre ewekë nyine tro sa kuca matre troa lolo la ngönetrei së. Iehova kö a nue kowe la itre atr, maine kowe la itre hene ne hnepe lapa, troa isa axecië mekune ngöne la itre götrane cili.

³ Nge maine hetre mekune ka tru nyine tro sa axeciën, nge pëkö hna qaja hnei Tusi Hmitrötr, loi e tro sa isa hnying me hape: ‘Iehova kö a nyipi ewekëne la itre mekun hnenge hna axeciën? Nge e pë ju hna qaja hnei Tusi Hmitrötr, tro kö Nyidrëti a kapa la mekun hnenge hna axeciën? Tro ni a atre tune kaa ka hape, Iehova a madrin kowe la mekunang?’

4, 5. Nemene la thangane la itre mekune hne së hna axeciën kowe la mele së me koi itre xan?

⁴ Ala nyimu la itre atr enehila ka isa kuci mekun. Ngo ame la aja së, tre ene la troa amadrinë Iehova. Matre, qëmekene tro sa axecië mekun, loi e tro sa pane wai pengöne hnyawa la hna qaja hnei Tusi Hmitrötr, me ujë thenge la hne së hna trotrohnin. Kola tune la hna amekötin göi aqane wai pengöne Iehova la madra me aqane tro sa huliwan ej. Nyipi ewekë tro sa trongëne hnyawa. (Genese 9:4; Ite Huliwa 15:28, 29) Ijije fe tro sa sipo ixatua koi Iehova, matre tro la itre mekun hne së hna xom a amadrinë Nyidrë.

⁵ Ame la itre mekun hne së hna xom, tre troa hetre thangane kowe la mele së. Maine itre mekune ka loi la hne së hna xom, tro ha aeasenyi së catre koi Iehova. Nge e ka ngazo, troa hetre ethanyine kowe la aqane imelekeu së me Nyidrë. Tro fe lai a ajolëne maine athixötrëne la ketre trejin. Nge ketre, tha aja së kö troa aciane la gomegom e hnine la ekalesia. Matre, nyipi ewekë catre tro sa axecië mekune hnyawa.—E jë la Roma 14:19; Galatia 6:7.

6. Nemene la aqane tro sa axecië mekune hnyawa?

⁶ Nemene la aqane tro sa axecië mekune hnyawa e pëkö hna amekötine hnei Tusi Hmitrötr göne la jole ka traqa koi së? Tha loi kö e tro hi sa kuca la sipu aja së, ngo loi e tro sa pane mekune hnyawa lai jol me itre xa ewekë ju kö, me thele la aqane tro sa amadrinë Iehova. Maine aqane ujë së hi lai, tro hë Iehova lai a xatua së, me amanathithine la mekun hne së hna axeciën.—E jë la Salamo 37:5.

7. Nemene la nyine tro sa kuca matre troa amadrinë Iehova e pëkö hna amekötine hnei Tusi Hmitrötr?

⁷ Nemene la nyine tro sa kuca matre troa amadrinë Iehova? Öni Efeso 5:17: ‘Trotrohnine ju la aja i Iehova.’ Haawe, maine pëkö hna amekötine hnei Tusi Hmitrötr göne la jole hne së hna qëmeke kow, nyipi ewekë tro sa trotrohnine maine atrehmekun la aja i Iehova. Matre nemene  la nyine tro sa kuca? Nyipi ewekë tro sa thithi koi Nyidrë me thele troa kepe thangane la emenen ej ngöne la mele së.

8. Nemene la ka amamane ka hape, atrehmekune hi Iesu la aja i Iehova?

⁸ Hnei Iesu hna amamane laka, atrehmekune pala hi nyidrë la aja i Iehova. Kola mama lai ngöne lo nyidrëti a thithi me kuca la ketre iamamanyikeu göi troa ithue ane la ka ala nyim. (Mataio 14:17-20; 15:34-37) Ketre, ame lo Satana a tupathi Iesu me upi nyidrë troa ujëne la etë koi falawa, tha kuca kö Iesu ngacama ka mecijine nyidrë. (E jë la Mataio 4:2-4.) Atre hnyawa hi Iesu la pengöne la Keme i nyidrë, matre atre hi nyidrë ka hape, tha aja i Iehova kö tro nyidrëti a huliwane la uati hmitrötr thatraqane la itre sipu aja i nyidrë. Ketre, xecie hnyawa koi Iesu ka hape, tro kö Iehova a xatua nyidrë me thue a i nyidrë.

9, 10. Nemene la ka aijijë së troa axecië mekune hnyawa? Qaja jë la ketre ceitun.

⁹ Tui Iesu, tro hi së a atreine axecië mekune hnyawa e hne së hna mejiune kowe la ixatua i Iehova. Önine la Tusi Hmitrötr: “Lapauneju koi Iehova hnene la hni ’ö ka pexej, ngo the lapa qale kowe la hnei ’ö hna trotrohnin. Mekuneju koi nyidë ngöne la nöjei goje i ’ö asë, nge tro pena nyidëti a amekötine la ite jë i ö. The pi inamacane kö ngöne la mekune i ’ö, qouju e Iehova, nge kötenejë la ngazo.” (Ite Edomë 3:5-7) E hne së hna inine la Tusi Hmitrötr matre troa atre hnyawa la aqane waiewekë i Iehova, canga tro hi a mama koi së la aqane troa mele thenge la aja i Nyidrë ngöne la kola traqa la ketre jol koi së. Nge e hne së pala hi hna thele troa atre la aqane waiewekë i Akötresie, tro ha hmaloi koi së troa axecië mekune hnyawa me amadrinëne la hni Nyidrë. Celë hi aqane tro së lai a hetrenyi “la hni ijön,” kola hape, canga mama hi koi së la ixatua i Akötresie.—Ezekiela 11:19.

¹⁰ Hanawange la ketre ceitun: Kola komisio hnene la ketre föe ka faipoipo, nge öhne ju hi angeice la ketre ibutr ka za. Ngazo pe, tru pala ha la thupen. Ngacama patre kö la föi angeic, ngo atre hi angeic la hna troa qaja hnei trahmanyi e traqa ju angeic itöne lai ibutr. Ekö hë nyidroti faipoipo, matre atre hi angeic la aja ne la trahmanyi göi aqane troa huliwane hnyawane la manie i nyidro. Ketre tune mina fe, e atrepengöne hnyawa hi së la aqane waiewekë i Iehova, me aqane ujë i Nyidrëti ekö, tro hë a mama cile koi së la aja i Nyidrë.

11. Nemene la itre hnying nyine tro sa mekun ngöne la easa e me inine la Tusi Hmitrötr? (Wange ju la itre mekune hna eköhagen, “Ame La Epuni a Ini Tusi Hmitrötr, Isa Hnyinge Jë Ka Hape.”)

¹¹ Nemene la nyine tro sa kuca matre mama hnyawa koi së la aqane waiewekë i Iehova? Nyipi ewekë tro pala hi sa e me inine la Tusi Hmitrötr. Nge ame ngöne la  ijine cili, loi e tro sa isa hnying me hape: ‘Nemene la hna ini ni göi Iehova? Pine nemene matre Nyidrëti a ujë tune lai?’ Nge tui Davita, loi e tro fe sa sipo Iehova troa atrepengöi Nyidrëti hnyawa. Öni Davita e thith: “Iehova fe, amamai ni jë la ite kala i cilie ; ini ni jë la ite jë i cilie. E ni jë ngöne la nyipici cilie, me ini ni jë, ke cilieti la Akötesieti ate amele ni ; ini a teqe cilie o drai.” (Salamo 25:4, 5) Nge e öhne mina ha së la ketre ithuemacanyi göi Iehova, pane mekune jë së la itre ijine tro sa trongëne lai. Maine jë, kolo itre ijin easë me itre atrene la hnepe lapa së, maine ngöne la hna huliwa, maine ngöne hna ini, maine ngöne la hna cainöje trootro. E mama hnyawa ha koi së la itre ijine cili, ketre mama pi hi koi së la aqane tro sa trongëne la mekune cili matre ihmeku memine la aqane waiewekë i Iehova.

12. Nemene la nyine tro fe sa kuca matre mama koi së la aqane waiewekë i Iehova?

¹² Ame la ketre nyine kuca, tre, ene la troa wange atrune la itre ini hne së hna kapa qaathene la organizasio i Nyidrë. Maine kola traqa koi së la ketre jol, ijije tro sa hane thele la aqane waiewekë i Iehova jëne la itus, Index des publications  des Témoins de Jéhovah memine la itus, Nyine Thele Mekun Ne La Itretre Anyipici Iehova. Ketre, hetre ixatua hne së hna kapa qa ngöne la itre icasikeu e hne së hna drenge hnyawa, me qeje mekun, me mekune hnyawa la itre ini hne së hna kapa e cili. Tro itre eje lai a aijijë së troa atre la mekuna i Iehova. Nge celë hi ka troa xatua së troa axecië mekune hnyawa, me amadrinë Iehova, nge tro fe lai a hetre thangane koi së.

13. Hamëne jë la ketre ceitun ka amamane la aqane tro sa atreine axecië mekune hnyawa thenge la aqane waiewekë i Iehova.

¹³ Tro sa pane ce wange la ketre aqane troa axecië mekune hnyawa thenge la aqane waiewekë i Iehova. Epuni a ajane troa hane xome la huliwa ne pionie. Maine jë, hnei epuni hë hna ahmaloeëne la mele i epun göi troa cainöj atrun. Ngo epuni pala kö a luelu, ke öni epun, tro ha pë madrine i epuni elanyi hnene laka, co hë la manie me mo i epun. Matre maine ju, tro hi epuni a cainöj trootro tune la hna kuca hnei itre xa trejin, ke tha hna musinë së kö hnei Akötresie troa pionie. Ngo atre hnyawa hi epuni lo hna qaja hnei Iesu ka hape, tro Iehova a amanathithine la itre ka nue la itre ewekë i angatr thatraqane la huliwa ne Baselaia. (E jë la Luka 18:29, 30.) Ketre, Tusi Hmitrötr a amamane ka hape, Iehova a madrine la easa kuca asë la hne së atreine thatraqai Nyidrë, nge aja i Nyidrë tro sa hane madrin ngöne la easa nyihlue i Nyidrë. (Salamo 119:108; 2 Korinito 9:7) Maine tro epuni a thithi thatraqane lai, me lapa mekune la itre ewekë cili, tro hë epuni lai a atreine axecië mekune hnyawa, thenge la hnei epuni hna atrein, me thenge la aqane waiewekë i Iehova.

14. Tro sa atre tune kaa la mekuna i Iehova göne la ketre pengöne aqane heetr?

¹⁴ Hanawange la ketre ceitun: Aja i epuni la ketre aqane heetr, ngo atre hi epuni laka, tro ha athixötrëne la itre xa trejin hnene la aqane heetre cili. Nge ame ngöne ketre götran, pëkö hna qaja hnei Tusi Hmitrötr göne lai. Matre tro epuni a atre tune kaa la mekuna i Iehova? Öni Tusi Hmitrötr: “The tro kö ite föe a thaipine la ixete ne wesiwes, loi pe tro qahmihmi me metöt ; the eli nyiatëne kö la ihe, kete the xetëne kö la ixete ka tru thupen, me gole me penina ; ngo loi la nöjei huliwa ka loi.” (1 Timoteo 2:9, 10) Maine hna qeje itre “föe” e celë, ngo ame lai eamo tre, thatraqane fe la itre trahmany. Maine ka “tro qahmihmi” së, ene la troa hetre hni ka ipië, tro së lai a nyipi ewekëne la mekuna ne la itre trejin. Nge pine laka tru la ihnimi së koi angatr, tha ajane kö së troa athixötrëne la ketre. (1 Korinito 10:23, 24; Filipi 3:17) Haawe, maine hne së hna majemine thel e hnine la Tusi Hmitrötr la mekuna i Iehova, tro hë sa xomi mekune hnyawa thenge la aqane waiewekë i Nyidrë.

15, 16. (a) Nemene la ewekë ka ej e kuhu hni Iehova e hne së pala hi hna mekune la itre ewekë ka sis (b) Nemene la aqane tro sa amadrinë Iehova göi itre nyine iamadrinë (c) Nemene la aqane tro sa axeciëne la itre mekune ka tru?

¹⁵ Easë a atre jëne la Tusi Hmitrötr laka, kola akötrëne la hni Iehova hnene la itre huliwa me itre mekune ka ngazo ne la itre atr. (E jë la Genese 6:5, 6.) Kola mama e celë laka, tha aja i Iehova kö la tro sa lapa fë la itre mekune ka sis, wanga  kei pi së kowe la ngazo. Ngo Iehova pe a ajane tro sa mekune la itre ewekë ka loi. Hna qejepengöne hnei Iakobo la inamacane i Iehova ka hape, “ame la inamacane qa koho, te, pane la pë ethan, ame hna tingeting, me menyik, me canga deng, ka tiqa hnei ihnim, me ite wene ka loi, ka pë ikelikelë me pë thoi ngön.” (Iakobo 3:17) Haawe, Tusi Hmitrötr a amamane ka hape, loi e tro sa thipetrije la itre nyine iamadrinë ka troa acian e kuhu hni së la itre aja ka ngazo. Matre, e mama hnyawa ha koi së la aja i Iehova me itre hnei Nyidrëti hna methinën, tha tro pi kö së lai a hnyingë ketre me ketre la itre itus nyine troa e, me film nyine troa goeën, me elo nyine troa elon.

¹⁶ Ame la easë a troa axecië mekun, loi e tro sa pane atre laka, tha ca mekune hi la ka troa amadrinë Iehova. Nge maine hetre ketre mekune ka tru nyine tro sa axeciën, loi e tro sa pane sipo ixatua thene la itre qatre thup, me itre trejin trahmanyi me föe ka macaj. (Tito 2:3-5; Iakobo 5:13-15) Ngo eje hi laka, isa qanyi së kö axecië mekun. Celë hi matre, loi e tro sa pane atreine huliwane la mekun me hni së, thenge la hne së hna inine qa hnine la Tusi Hmitrötr. (Heberu 5:14) Öni Paulo: “Tro nöjei ate asë a isa thue ehnefen.”—Galatia 6:5.

17. Nemene la thangane la hna axecië mekune thenge la aqane waiewekë i Iehova?

¹⁷ Ame la easë a axecië mekun hnyawa, ketre easë fe hi lai a easenyi catr koi Iehova, nge Nyidrëti a kepe së me amanathithi së. (Iakobo 4:8) Ame hë e cili, tro ha catrecatre la lapaune së. Haawe, the mano kö së e, me lapa mekune la hne së hna e hnine la Tusi Hmitrötr. Celë hi ka troa aijijë së troa atre la aqane waiewekë i Iehova. Ngo eje hi laka, hetre itre xa ini pala kö hne së hna troa atre göi Nyidrë. (Iobu 26:14) Matre, e hne së pala hi hna thele troa atre la aqane waiewekë i Iehova, tro hë sa inamacane me atreine axecië mekun. (Ite Edomë 2:1-5) Maine nyipici laka, ka saze pala hi la itre mekun me aja ne la itre atr, ngo tha ka saze kö Iehova. Önine la ketre atre cinyihane la Salamo ka hape: “Troa cile huti epine palua la aja i Iehova, ite mekuna ne la hni nyidë kowe la nöjei xöt.” (Salamo 33:11) Kolo hi lai a amamane laka, e ka ihmeku la itre mekun me itre huliwa së memine la aqane waiewekë i Iehova, tro pala hi lai a lolo la itre mekun hne së hna axeciën.