1. Nemene la hnei Iesu hna troa kuca?

 EASË hi la a melëne la itre drai ne la pun! Nge easenyi hë, tro Iesu a amekötine la itre atr. Hnei Iesu hna qaja kowe la itretre drei nyidrë la ketre “hatrene” laka, celë hë nyidrë, nge easenyi hë la “pune la fene celë.” (Mat. 24:3) Kola qaja la hatrene cili ngöne Mataio mekene 24 me 25 me ngöne la tusi Mareko mekene 13 me tusi Luka mekene 21.

2. Nemene la hne së hna troa ce wang ngöne la tane mekune celë, nge pine nemen matre ka nyipiewekë koi së?

² Hnei Iesu hna xome la köni ceitun matre troa hmekë së, ene la ceitune la itre mamoe me itre nani, memine la itre nekö jajinyi ka inamacan me nekö jajinyi ka hmo me itre talan. Tro la itre ceitune cili a xatua së troa trotrohnine laka, tro Iesu a amekötine la ketre atr elanyi thenge la aqane ujë i angeic. Tro sa ce wang la itre ini nyine troa xom, me aqane troa trongëne itre ej. Ame la pane ceitune hne së hna troa ce wang, ke ceitun ne la itre mamoe me itre nani.

ITRE MAMOE ME ITRE NANI

3. Eu la ijine tro Iesu a amekötine la itre atr?

³ Ame la iameköti hnei Iesu hna qaja ngöne la ceitune la itre mamoe me itre nani, kola qaja la itre atr ka kapa la maca ka loi, me xatuane la itre trejine hna iën. (Mat. 25:​31-​46) Tro Iesu a ameköti angatr qëmekene troa nyipun la “akötr atraqatr,” me nyiqane la isi Amagedro. (Mat. 24:21) Tune la aqane aisane la itre mamoe me itre nani, tro Iesu elanyi a aisane la itretre drei nyidrë ka xatuane la itre hna iën, me itre xan.

4. Thenge la Isaia 11:​3, 4, pine nemen matre ka xecie koi së laka, tro kö Iesu a amekötin cememine la meköt? (Wange ju la )

 ⁴ Kola amaman hnene la itre hna perofetan laka, Iesu la hna acil hnei Iehova troa amekötin “ce memine la meköt.” (E jë la Isaia 11:​3, 4.) Nyidrëti a goeën la aqane ujë, me waiewekë, me ithanata ne la itre atr, ngo memine fe la aqane ujë i angatr kowe la itre trejin hna iën. (Mat. 12:​36, 37; 25:40) Tro nyidrëti a atre e cili ka hape, drei la ka xatuane la itre trejine hna iën ngöne la huliwa hnei nyidrëti hna ahnith koi angatr. a Ame la huliwa ka sisitria, nyine tro la ketre atr a kuca matre xatuane la itre trejine me Keriso me amamane ka hape, mamoe angeic, ke ene la troa catre cainöjëne la maca ka loi. Tro ha jelemekötine la itre atr cili, nge tro angatr a kapa la mel ka pë pun e celë fen. (Mat. 25:46; Hna Am. 7:​16, 17) Ketre ahnahna lai ka mingöming! E tro angatr a mele nyipici ngöne la kola akötr atraqatr, nge thupen, tro ha lapa palua la ëje i angatr ngöne la “tusi ne mel.”​—Hna Am. 20:15.

5. Nemene la ini hne së hna xom qa ngöne la ceitune la itre mamoe me itre nani, nge thatraqai drei?

⁵ Mele nyipici jë. Ame la ceitune la itre mamoe me itre nani, ke thatraqane la itre atr ka troa mele palua e celë fen. Angatr a lapaun me mele nyipici la angatr a xatuane la itre trejine me Keriso troa catre cainöj, me trongëne la itre hna amekötine hnene la hlue ka nyipici me ka inamacan, lo hna acile hnei Iesu. (Mat. 24:45) Ngo loi e tro mina fe la itre trejin hna iën a xomi ini qa ngöne la ceitun hna hamëne hnei Iesu. Pine nemen? Pine laka, Iesu a goeën la aqane ujë me aqane waiewekë me aqane ithanata i angatr. Loi e tro fe angatr a mele nyipici. Celë hi matre, hnei Iesu hna hamëne la lue xaa ceitun thatraqai angatr. Hna amë la lue ceitune cili ngöne Mataio mekene 25. Tro së a pane ce wang la ceitune la itre nekö jajinyi ka inamacan me itre nekö jajinyi ka hmo.

ITRE NEKÖ JAJINYI KA INAMACAN ME ITRE KA HMO

6. Tune kaa la aqane inamacan la 5 lao nekö jajiny? (Mataio 25:​6-​10)

⁶ Ame ngöne la ceitune celë, Iesu a qaja la 10 lao nekö jajinyi ka tro troa ixelë memine la atr faipopo. (Mat. 25:​1-4) Aja i angatr asë troa ce lapa me angeic ngöne la ijine xeni nyikein. Öni Iesu ka hape, ala 5 lao ka inamacan, nge 5 lao ka hmo. Ame la itre nekö jajinyi ka inamacan, ke itre ka hmek. Hnei angatr hna hnëkë troa treqene la ka faipopo, ngacama traqa e hnenyipajidri ju hë angeic. Eje hi, hnei angatr hna xome trongëne la itre laam, matre thina gojenyi angatr. Hnei angatre fe hna xome trongën oele ne trem e traqa ju hmitr la ka faipopo. Hnei angatr hna hnëkë hnyawa matre tha tro kö a pi la itre laame i angatr. (E jë la Mataio 25:​6-​10.) Ame hë la kola traqa la atr faipopo, hnei angatr hna ce lö ngöne la hnë nyikein. Ketre tune mina fe, tro la itre keresiano hna iën a ce me Iesu ngöne la Baselaia ne hnengödrai, b e tro angatr a hmek me  mele nyipici uti hë la ijine traqa i nyidrë. (Hna Am. 7:​1-3) Nge tune kaa pë hë lo 5 lao nekö jajinyi ka hmo?

7. Nemene la pun kowe la itre nekö jajinyi ka hmo, nge pine nemen?

⁷ Tha ka hnëkë kö lo 5 lao nekö jajinyi ka hmo tune lo itre nekö jajinyi ka inamacan. Ame la angatr a atre ka hape, hane hë cahmi jë lo atr faipopo, ke kola nyiqane pi la itre laame i angatr. Pine laka tha ase kö angatr hnëkë trem, hnei angatr hna tro troa itön. Ame la kola traqa la atr faipopo, ke tha bëeke palakö angatr. Ame e cili, hnene la itre nekö jajinyi ka hnëkë hë hna ce lö memine lo atr faipopo kowe la hnë nyikein, nge hna thinge ju la qëhnelö. (Mat. 25:10) Ame hë lo kola traqa lo itre nekö jajinyi ka hmo me pi lö, önine la atr faipopo: “Thatre nyipunieti kö ni.” (Mat. 25:​11, 12) Tha ka hnëkë kö angatr troa treqen la atr faipopo uti hë la traqa i angeic. Nemene la ini kowe la itre keresiano hna iën?

8-9. Nemene la ini nyine tro la itre keresiano hna iën a xom qa ngöne la ceitune la itre nekö jajiny? (Wange ju fe la iatr.)

⁸ Hnëkë jë nge hmeke jë. Ame ngöne la ceitune celë, tha Iesu kö a qaja ka hape, hetre trejin hna iën ka troa hnëkë utihë la pune la fen celë, nge ame la itre xan, tha ka hnëkë kö. Nyidrëti pe a qaja la pun kowe la itre keresiano hna iën, e tha ka hnëkë kö angatr me mele nyipici utihë la pun. Eje hi, tha tro kö angatr a hane kapa la thupen. (Ioa. 14:​3, 4) Kolo fe hi lai a hmekë së! Mejiune ju hë së troa mel e celë fen maine e koho hnengödrai, ngo loi e tro asë hi së a wangatrune la eamo i Iesu, hna qaja ngöne la ceitune cili. Nyipiewekë tro asë hi së a hnëkë me hmek, matre mele nyipici utihë la pun.​—Mat. 24:13.

⁹ Thupene la hnei Iesu hna hamëne la ceitun la itre nekö jajinyi matre troa amaman la enyipiewekën troa hnëkë me hmek, hnei nyidrëti hna hamën la ceitune  la itre talan. Kola amaman hnene la ceitun celë la enyipiewekëne troa catre huliwa.

ITRE TALAN

10. Tune kaa la aqane mele nyipici la lue hlu kowe la maseta? (Mataio 25:​19-​23)

¹⁰ Ame ngöne la ceitune la itre talan, Iesu a qaja la lue hlue ka mele nyipici koi maseta, memine la ketre ka tha mele nyipici kö. (Mat. 25:​14-​18) Hnene la lue hlu hna mele nyipici koi maseta me catre huliwa. Hnei nyidro hna nyixan hmaca la manie hnei nyidrë hna hamën koi nyidro. Qëmekene tro nyidrëti a tro kowe la ketre nöj, hnei nyidrëti hna isa hamë talan koi angatr, ene la ketre manie ka tru. Hnei nyidro hna catre huliwa, me huliwan inamacanëne la mani. Nemene hë la thangan? Ame la kola bëeke hmaca la maseta, hnei nyidro hna nyixan la manie hna hamën koi nyidro. Matre hnei nyidrë hna qaja aloinyi nyidro, me hë nyidro troa “ce madrine me [nyidrë].” (E jë la Mataio 25:​19-​23.) Nemene la ka traqa kowe la hnaakönine hlu? Nge hnei angeic pë hë hna uëne lo manie i angeic?

11. Nemene la ka traqa kowe lo hlue ka “genyi,” nge pine nemen?

¹¹ Hna hamën kowe la hnaakönine hlu la ca talan. Aja i maseta tro angeic a huliwan inamacanëne lai talan. Ngo pine laka ka “genyi” angeic, hnei angeic hna kelem lai talan. Ame la kola bëeke hmaca hnene la maseta, tha ase kö angeic nyixan lai talan. Tha ka loi kö la aqane ujë i angeic, nge tha hna qeje menu kö koi maseta. Ngo hnei angeic pe hna qeje nyidrë ka hape, atr ka imusinë. Matre tha madrine kö la maseta. Ketre, hnei nyidrë hna xom hmaca lai talan, me upe lai hlu.​—Mat. 25:​24, 26-​30.

12. Drei la hna nyihatrene hnene la lue hlu?

¹² Ame lo lue hlue ka huliwa, ke kola nyihatrene lo itre keresiano hna iën. Ame la Maseta, ke Iesu. Nyidrëti a hë angatr troa ce madrin me nyidrë, ene la troa kapa la edrö i angatr, lo pane mele  hmaca. (Mat. 25:​21, 23; Hna Am. 20:5b) Nge ame la aqane ujë hnene la hlue ka genyi ke, nyine hmekë angatr. Tune kaa?

13-14. Nemene la ini nyine tro la itre keresiano hna iën a xom qa ngöne la ceitune la itre talan? (Wange ju fe la iatr.)

¹³ Catre jë huliwa. Tha hnei Iesu kö hna hamën la ceitune la itre talan me itre nekö jajiny matre troa qaja ka hape, tro la itre xaa hna iën a geny. Nyidrëti pe a hmekë angatr, e tro angatr a wangacone la hnëqa i angatr. Nge e tha ‘lapa xome catrëne kö angatr la manathith,’ ke tha tro kö angatr a hane lö kowe la Baselaia ne hnengödrai.​—2 Pet. 1:​10.

¹⁴ Kola amamane hnene la ceitune la itre nekö jajinyi me itre talan laka, nyipiewekë tro la itre keresiano hna iën a hnëkë me hmek me catre huliwa. Ngo hetre ketre aqane hmekë angatre kö hnei Iesu. Ame la hna qaja ngöne Mataio 24:​40, 41 ke, thatraqai angatr mina fe.

DREI LA HNA TROA “XOM”?

15-16. Nemene la aqane amamane Mataio 24:​40, 41 laka, nyipiewekë tro la itre keresiano hna iën a hmek?

¹⁵ Qëmekene tro Iesu a hamën la köni ceitun, hnei nyidrë hna pane qaja la aqane troa amekötin la itre trejin hna iën elany. Hnei nyidrë hna hamën la ceitun la lue trahmanyi ka huliwa ngöne la hlapa, me lue föe ka ahmudrohmudrone la qitr. Casi hi la huliwa hnei nyidro hna kuca, ngo öni Iesu, “troa xomi ketre, me nue pë hë la ketre.” (E jë la Mataio 24:​40, 41.) Öni nyidrë jë hi kowe la itretre drei nyidrë: “Hmeke jë, ke thatre kö nyipunie la drai ne traqa la Joxu i nyipunie.” (Mat. 24:42) Nge casi hi la aqane hmekë angatr lo nyidrëti a hamën la ceitun ne la itre nekö jajiny. (Mat. 25:13) Ka ce tro kö la lue ceitun cili? Öö. Ame elany, tro hi a “xom” la itre hna iën ka mele nyipici. Kolo hi lai a qaja ka hape, tro Iesu a kepe angatr ngöne la Baselaia ne hnengödrai.​—Ioa. 14:3.

¹⁶ Hmeke jë. E tha hmeke kö la ketre keresiano hna iën, tha tro kö a ‘acasi’ angeic elanyi me itre xaa hna iën. (Mat. 24:31) Matre, loi e tro asë hi la itre hlue i Akötresie ka troa mel e hnengödrai me e celë fen a wangatrune la hna qaja hnei Iesu me hmek.

17. Pine nemene matre tha tro kö sa seseu laka, Iehova palahi a iëne la itre keresiano enehila?

¹⁷ Pine laka, atre Iehova hnyawa hi së, ka xecie koi së laka, ka meköt la aqane ujë i Nyidrë. c Mekun palahi së lo hnei Iesu hna qaja ngöne la ceitune la vin, göne la itre ka huliwa ngöne la hna 11ne hawa. (Mat. 20:​1-​16) Casi hi la thupene hna hamën kowe la itre ka nyiqane huliwa e hnaipajö memine la itre ka nyiqan e hmahmakany. Ketre tune mina fe, tro asë hi la itre hna iëne ka mele nyipici a kapa la edrö i angatr e hnengödrai, ngacama hna hnyipi iëne hi la itre xan.

NEMENE LA HNE SË HNA ININ?

18-19. Nemene la itre ini hne së hna kapa qa ngöne la itre ceitune i Iesu?

¹⁸ Nemene la ini koi së? Kola amamane hnene la ceitun ne la itre mamoe me itre nani, la enyipiewekën kowe la itre ka troa mele palua e celë fen troa mele nyipici koi Iehova enehila, nge utihë la kola traqa la akötr atraqatr. Ame hë la kola iameköti ngöne la pun la akötr atraqatr, tro Iesu a hamën la “mele ka pë pun” kowe la itre ka mele nyipici.​—Mat. 25:46.

 ¹⁹ Hnei easë fe hna ce wang la lue ceitun ka hmekën la itre trejin hna iën. Ame ngöne la ceitune la itre nekö jajiny, ala 5 la ka inamacan. Hnei angatr hna hnëkë me hmek. Hnei angatr hna hnëkë hnyawa, matre troa lapa treqene la atre faipoipo, ngacama hmiitr ju hë angeic. Ngo ame lo itre nekö jajinyi ka hmo, ke tha ka hnëkë kö. Celë hi matre, tha hna alö angatre kö ngöne la hnë nyikein hnene la atre faipoipo. Loi e tro mina fe sa hnëkë, matre tro sa atreine treqene hnyawa la ijine tro Iesu a apatrene la fen. Ame ngöne la ceitune la itre talan, ke lue hlu la ka catre huliwa. Hnei nyidro hna nyixane la manie ne la maseta, matre hnei nyidrë hna kepe nyidro. Ame pë hë lo hlue ka geny, ke hna upi angeic. Nemene la ini? Loi e tro sa catre huliwa koi Iehova utihë la pun. Nge hne së hna ce wang laka, loi e tro la itre keresiano hna iën a catre hmek e aja i angatr tro Iesu a ‘xomi’ angatr kowe la mel e hnengödrai. Angatr a lapa treqene la ijin troa ‘acasi angatr me nyidrë.’ Thupene la isi Amagedro, tro ha faipoipo ne la Neköi Mamoe memine la ala 144 000.​—2 Thes. 2:1; Hna Am. 19:9.

20. Nemene la aqane tro Iehova a amanathithine la itre ka wangatrune la itre ceitune i Iesu?

²⁰ Ngacama easenyi hë troa amekötine la itre atr, ngo tha tro kö sa xou. Maine tro sa mele nyipici kowe la Keme së ka tru ihnimin, tro hë Nyidrëti a hamë së la “men atraqatr” matre tro sa atreine “cil qëmekene la Nekö i Atr.” (2 Kor. 4:7; Luka 21:36) Ka mejiune ju hë së troa mel e koho hnengödrai maine e celë fen, ngo tro Iehova a madrine koi së, e tro sa wangatrune la itre ini hne së hna xom qa ngöne la itre ceitune i Iesu. Nge pine laka, tru la ihnimi gufa i Nyidrë, tro ha cinyanyine la ëje së ngöne la “tusi ne mel.”​—Dan. 12:1; Hna Am. 3:5.