1-2. Tune kaa la aqane xupi së hnei Iehova, nge pine nemene matre easa qaja ka hape, nyine loi lai koi së?

 HNEI Iehova hna xupe la atr matre tro angeic a madrine la kola ham, hune la kola kapa. (It. Hu. 20:35) Kolo kö lai a qaja ka hape, tha madrine kö së la easa kapa la ketre ewekë? Waea. Ka madrine hi së la easa kapa la ketre ahnahna, ngo madrine catre kö së la easa ham. Nge ame la Iehova a xupi së tun, ke matre tro sa madrin. Kola hapeue lai?

² Hnei Iehova hna xupi së tune lai, matre tro sa sipu akökötren la madrine së. Tro sa akökötrene la madrine së, e tro sa ham. Mingöminge catr la aqane xupi së hnei Iehova!​—Sal. 139:14.

3. Pine nemen matre Tusi Hmitötr a qeje Iehova ka hape, “Akötresie ka madrin”?

³ Öni Tusi Hmitrötr ka hape, ka madrine la atr ka ham. Celë hi matre kola hë Iehova ka hape, “Akötresie ka madrin.” (1 Tim. 1:​11) Nyidrëti hi la ka pane ham, nge pëkö ka ham tui Nyidrë. Öni Paulo aposetolo ka hape, “easë a mel me enij hnei nyidrë.” (It. Hu. 17:28) Eje hi, “ame la nöjei loi me nöjei ahnahna ka pexej,” ke qaathei Nyidrë.​—Iako. 1:​17.

4. Nemene la ka troa xatua së troa acatrene la madrine së?

⁴ Aja i easë asë hi troa kapa la madrine ka xulu qa ngöne la hna ham. Tro sa kapa la madrine cili, e tro sa nyitipune la aqane hame i Iehova. (Efe. 5:1) Ame ngöne la  tane mekune celë, tro sa ce wange la aqane tro sa nyitipu Iehova, memine la nyine tro sa kuca e pëkö hni ne ole ne la itre atr koi së. Tro la itre mekune cili a xatua së tro palahi a ham, me acatren la madrine së.

HAME JË TUI IEHOVA

5. Nemene la hnei Iehova hna hamë së?

⁵ Tune kaa la aqane hame i Iehova koi së? Ame la ketre aqane hame i Iehova, ke Nyidrëti a hamë së la ka nyipiewekë kowe la mel. Ame la itre xane easë tha itre ka trenamo kö, ngo Iehova a hamëne la ka ijij. Nyidrëti a hamëne koi së la xen, me iheetr, me uma. (Sal. 4:8; Mat. 6:​31-​33; 1 Tim. 6:​6-8) Hapeu, Iehova kö a hamëne la ka nyipiewekë koi së ke hnëqa i Nyidrë? Waea! Nga hnauëne la Nyidrëti a kuca lai?

6. Nemene la ini hne së hna xome qa ngöne Mataio 6:​25, 26?

⁶ Iehova a hamë së la ka nyipiewekë kowe la mel, ke tru la ihnimi Nyidrëti koi së. Pane mekune jë lo hnei Iesu hna qaja ngöne la Mataio 6:​25, 26. (E jë.) Ame ngöne la itre xötre celë, nyidrëti a xomi ini qa ngöne la itre waco. Öni nyidrë: “Tha nyudreni kö a jumi feja, me menuën, me xawane me amë acon ngöne la itre uma të.” Nge öni nyidrëti hmaca jë hi: “Ngo Keme i nyipunie e koho hnengödrai a thue a i nyudren.” Nyidrëti pa hninge jë ka hape: “Hapeu, tha sisitria kö nyipunieti hui nyudren?” Nemene la ini koi së? Sisitria kö koi Iehova la itre hlue i Nyidrë hune la itre öni. Haawe, e Nyidrëti a thuane la itre öni, ke tro kö Nyidrëti lai a hane thua i easë! Ceitui Nyidrë memine la ketre kem ka thupëne hnyawane la fami Nyidrë, cememine la ihnim.​—Sal. 145:16; Mat. 6:​32.

7. Qaja jë la ketre aqane tro sa nyitipune la aqane hame i Iehova. (Wange ju fe la iatr.)

⁷ Easa nyitipu Iehova la easa hnim me xatuane la itre xan. Hapeu, hetre trejine kö hnei eö hna atre ka thë xen me ka aja iheetr? Ijije hi tro Iehova a xatua angeic jëne eö. Hna atre la itre Temoë Iehova ke, ka hame catr angatr ngöne la itre ijine jol. Ame ngöne lo ijine COVID-19, hnene la itre trejin hna hamë xen, me iheetr, me itre xaa ka nyipiewekë kowe la itre ka aja ixatua. Tru la itre ka kuië ahnahna thatraqane la itre huliwa ne la  Baselaia e cailo fen. Celë hi ka aijijë së troa xatuane la itre xaa trejin. Itre trejin a ham, ke angatr a trongëne la hna qaja hnei Heberu 13:16: “The thëthëhmine kö troa kuca la loi, me ce thawa me itre xan la hnei nyipunieti hna hetreny, ke Akötresieti a madrine kowe la itre huuje cili.”

8. Nemene la hna aijijë së troa kuca hnene la trengecatre i Iehova? (Filipi 2:​13)

⁸ Iehova a hamë trengecatr koi së. Madrine catre Iehova troa hamëne la men ka catre i Nyidrë, kowe la itre hlue i Nyidrë ka mele nyipici. (E jë la Filipi 2:​13.) Hapeu, hnei eö kö hna hane sipo trengecatre koi Nyidrë, matre cile kowe la ketre itupath, maine xomihnine la ketre jol, maine tro hi a madrine ngöne la drai? Ame la Nyidrëti a sa la thithi eö, ke eö a canga mekune lo hnei Paulo hna qaja ka hape: “Ngöne la nöjei ewekë asë, hetre trengecatreng qaathene la atre hamë men koi ni.”​—Fil. 4:​13.

9. Tune kaa la aqane tro sa huliwane la trengecatre së tui Iehova? (Wange ju fe la iatr.)

⁹ Ngacama itre atr ka tha pexeje kö së, ngo ijije hi tro sa huliwane la trengecatre së tui Iehova. Nyipici, tha ijije kö tro sa hamë trengecatre i itre xan, ngo ijije hi tro sa xatua angatr. Tune kaa? Troa komisio, me nyidrawane la uma ne la itre trejin ka qatre hë maine ka adikape. E ijiji së hi, loi e tro sa nyidrawane me nyihnyawane la Uma Ne Baselaia së. Maine tro sa huliwane tun la trengecatre së, ke tro së lai a kuca la loi kowe la itre hlue i Iehova.

10. Tune kaa la aqane tro la itre hne së hna qaja a hamë trengecatr koi itre xan?

¹⁰ The thëthëhmine kö laka, ka hetre emenene la itre hne së hna qaja. Hetre atre kö hnei eö hna atre ka aja ixatua maine ithuecatr? Maine eje hi, ke amamane jë ka hape, eö a meku angeic. Tro jë troa wai angeic, maine hë angeic, maine iupi fë la ketre sine tus, me mail maine message. Tha nyipiewekë troa ithanata aqeany. Tro la itre trenge ithanata qa kuhu hni, a xatua angeic troa mele nyipici me akeukawanyi angeic.​—It. Ed. 12:25; Efe. 4:​29.

11. Tune kaa la aqane hamëne Iehova la inamacane i Nyidrë?

¹¹ Iehova a hamë inamacan koi së. Öni Iakobo, “Maine ketre thei nyipunie a aja inamacan, loi e tro pala hi angeic a sipo Akötresie, ke nyidrëti a hamën atrun koi nöjei atr, nge tha ka thele gele së kö.”  (Iako. 1:5) Tune la hna qaja ngöne la xötr, tha Iehova kö a cipane la inamacane i Nyidrë, ngo Nyidrëti pe a hamëne koi nöjei atr asë. Ame la Nyidrëti a hamën, ke tha Nyidrëti kö a “thele gele.” Tha aja i Nyidrëti kö tro sa hmahma troa sipo ixatua koi Nyidrë. Nyidrëti pe a upi së troa sipo inamacan koi Nyidrë.​—It. Ed. 2:​1-6.

12. Eu la itre ijine tro sa ini itre xan la hne së hna atrein?

¹² Tune kaa la aqane tro sa hamëne la inamacane së maine itre hne së hna atre koi itre xan, tui Iehova? (Sal. 32:8) Nyimu aqane tro la itre hlue i Iehova a ini itre xan la hnei angatr hna atre. Angatr a inine la itre ka xötrei cainöj. Nge itre qatre thup a inine la itretre ixatua me itre xaa trejin trahmanyi la aqane troa eatrën la hnëqa i angatr ngöne la ekalesia. Nge itre xaa trejin ka atreine huliwa ngöne hnë xupi Uma Ne Baselaia me nyihnyawane itre ej, a inine la itre ka xötrei huliwa.

13. Tune kaa la aqane tro sa nyitipu Iehova la easa ini ketre?

¹³ Ame la easa ini ketre, loi e tro sa nyitipune la aqane kuca i Iehova. The thëthëhmine kö laka, Nyidrëti a madrine troa hamëne la inamacane i Nyidrë. Ketre tune fe, the cipane kö la inamacane së memine la hne së hna atrein. The hamëne sinëne kö ke, xou epun tro angeic a xome la göhne i epuni elany. The qaja kö ka hape: ‘Pëkö ka hane ini ni! Matre ketre isine jë kö angeic.’ Tha tro pi kö la hlue i Iehova a mekune tun. Tha tro hmekuje kö sa hamëne la hne së hna atrein, ngo loi pe tro sa hamën asë. (1 Thes. 2:8) Easë fe a ajan tro angeic a “ini itre xan” elany. (2 Tim. 2:​1, 2) Maine tro asë hi së a ce thawa me itre xan la hne së hna atrein, ke tro së asë a inamacane me madrin.

E PËKÖ KA OLENE KOI SË

14. Nemene la hna kuca hnei itre xan la easa ham?

¹⁴ Ame la easa ham kowe la itre xan, tune la itre trejin, ke canga tro hi angatre lai a olene koi së. Maine jë, tro angatr a iupi fë neköi tus, maine kuca la ketre ewekë matre olene koi së. (Kol. 3:​15) Easa madrine la kola olene koi së.

15. Nemene la nyine tro sa kuca e pëkö hni ne ole i itre xan?

¹⁵ Ngo ame itre xan, pëkö hni ne ole i angatr kowe la itre hne së hna kuca. Ame itre xaa ijin, easa hamëne la traeme së, me trengecatre së, me itre mo së, ngo kösë ame koi së, pëkö hni ne ole ne la atr. Maine eje hi, nemene la nyine tro sa kuca matre tro palahi sa madrin? Mekune ju la xötre ka nyitane la tane mekune celë, Itre Huliwa 20:35. Ame la madrine hne së hna kapa qa ngöne la hna ham, ke tha ka xulu kö qa ngöne la aqane ujë i itre xan. Ijije hi tro palahi së hamëne madrin, ngacama pëkö hni ne ole ne la itre xan. Nemene la ka troa xatua së? Nyimu ewekë.

16. Nemene la nyine tro sa isine troa kuca?

¹⁶ Isine jë troa nyitipu Iehova. Iehova a hamëne la itre ewekë ka loi koi nöjei atr, ngacama pëkö hni ne ole i itre xan. (Mat. 5:​43-​48) Nge Iehova a qaja ka hape e ‘tro sa hamëne gufane’ koi itre xan, ke ‘tro ha atraqatr la thupe i easë.’ (Luka 6:​35) Ame la hna hape, “hamëne gufane” ke, kola qaja la troa ham, nge tha tro kö a treqene tro itre xan a olen. Ngacama pëkö ka olene koi së, ngo tro palahi Iehova a amanathithi së ke, easa kuca la  loi koi itre xan, me “hamëne madrin.”​—It. Ed. 19:17; 2 Kor. 9:7.

17. Nemene la ka troa xatua së la easa ham? (Luka 14:​12-​14)

¹⁷ Ame ngöne Luka 14:​12-​14 (E jë.) kola mama la ketre trepene meköt ka troa xatua së la easa ham. Tha ka ngazo kö troa kapa, me ham kowe la itre ka ijij troa të hmaca koi së. Ngo nemene la nyine tro sa kuca, e öhne hi easë ka hape, ame la easa ham, ke easë palahi a treqen tro la atr a të hmaca koi së? Loi e tro sa trongëne la eamo i Iesu. Loi e tro sa kapa la itre atr laka, tha ijiji angatre kö troa të hmaca koi së. E tro sa nyitipu Iehova tune lai, ke tro së lai a madrin, ngacama pëkö ka olene koi së.

18. Nemene la ka troa xatua së e tha olene kö koi së hnene la itre trejin?

¹⁸ The canga mekune menune kö koilo. (1 Kor. 13:7) E tha hna olene kö koi epun, pane hnyinge jë ka hape: ‘Hapeu ka pë hni ne ole angeic maine hnei angeice hi hna thëthëhmin?’ Maine jë, hetre xaa kepin matre tha olene kö angeic. Ame la itre xan, ke hetre hni ne ole i angatr, ngo thatreine kö angatr la aqane troa amaman. Ame la itre xan, angatr a hmahma la kola xatua angatr, ke ame ekö, angatr la ka xatua itre xan. Tha tro kö easë a mekune menune koilo, e tha ase kö olene koi së. E cili, tro palahi sa madrine troa ham.​—Efe. 4:2.

19-20. Pine nemene matre loi e tro sa atreine itreqe la easa ham? (Wange ju fe la iatr.)

¹⁹ Troa atreine itreqe. Öni Solomona joxu göne la troa ham ka hape: “Kuiëne pi la falawa i ö hune la itre tim, ke thupene la itre drai ka nyimutre, tro hë eö a öhne hmaca.” (A. Cai. 11:1) Kola amamane hnene la xötre celë ka hape, ame itre xan, tro angatr a olen “thupene la itre drai ka nyimutre” maine thupene la itre macatre. Tro sa ce wange la ketre hna melën.

²⁰ Itre macatre qëmeken, hnene la föe  ne la ketre atre thupëne la sirkoskripsio hna hamë sine tus kowe la ketre trejin föe ka xötrei bapataiso. Aja i eahlo troa ithuecatr koi angeic. Thupene la 8 lao macatre, hnene la trejin föe hna cinyany koi eahlo ka hape: “Eni a pi qaja koi nyipo ka hape, tru la hnei nyipoti hna xatua ni ngöne la itre macatre ka ase hë. Ka ithuecatr la sine tusi nyipo, ngo ame la ka ketri ni, ke kolo xötr ne Tusi Hmitrötr. a Nge uti palahi enehila, tha thëthëhmine kö ni.” Hnene la trejine föe hna qaja la itre jol hnei angeic hna cile kow me hape: “Ame itre xaa ijin, eni a pi nu asë, nge xele hë ni ma nyihlue i Iehova. Ngo ame la eni hmaca a mekune la xötr hnei nyipoti hna hamën, ke kolo hmaca a hamë trengecatre koi ni.” Hnei angeic hna afenesine la tus ka hape: “Ame ngöne la 8 lao macatre, pëkö ketre ewekë ka xatua ni tune lai.” Pane mekune jë la madrine ne la föe ne la atre thupëne la sirkoskripsio la eahlo a kapa la tus “thupene la itre drai ka nyimutre”! Maine jë, tro la atr hne së hna xatuane enehila, a olene koi së thupene la itre macatre.

21. Pine nemene matre aja së troa nyitipun la aqane hame i Iehova?

²¹ Tune lo hne së hna qaja ha, hnei Iehova hna xupi së matre troa tru catre kö la madrin la easa ham, hune la easa kapa. Easa madrin la easa xatuane la itre trejin. Nge easa madrine mina fe la angatr a olene koi së. Ngacama tha olene kö angatr, ngo easa madrin, ke hnei easë hna ham. The thëthëhmine kö laka, tru maine co la hnei easë hna hamën, ngo “atreine kö Iehova nyixan atrun hmaca kö koi” së. (2 Aq. Jo. 25:9) Tro Nyidrëti palahi a hamën atrun hmaca kö koi së hune la hne së hna hamëne koi itre xan! Nge pëkö madrine ka sisitria hune la troa amanathithi së hnei Iehova. Matre catre jë së nyitipune la Keme së e hnengödrai ka ham.