Tha tro pi kö sa mekun ka hape, patre kö lo ala 70 lo Iesu a acile la Xeni Hej Ne La Joxu, ke tha ase kö angatr mele nyipici maine nuetriji nyidrë. Ame lo heji cili, Iesu a pi ce lapa memine hi lo itre aposetolo i nyidrë.

Iesu a kapa madrin lo ala Truelof, memine fe lo ala 70. Hnei Iesu hna pane iën thene la itretre dreng la 12 lao trahmany, hna hën ka hape, itre aposetolo. (Luka 6:​12-​16) Nyidrë e Galilaia lo nyidrëti a ‘hën lo ala Truelof’ me upi angatr troa cainöjëne la Baselaia i Akötresie “me aloine la itre trene mec.” (Luka 9:​1-6) Nge ame hë la nyidrëti a tro e Iudra, hnei nyidrë hna ‘iëne lo ala 70 me upi angatr isa ala lu.’ (Luka 9:​51; 10:1) Ame ngöne la itre götran asë, hetre atre drei Iesu ka cainöjëne la maca ka loi.

Ame la angetre Iudra ka xötrethenge Iesu ke, angatr palahi a atrune la Paseka e nöjei macatre memine la itre fami angatr. (Eso. 12:​6-​11, 17-​20) Qëmekene tro Iesu a mec, hnei nyidrë hna tro Ierusalema memine la itre aposetolo i nyidrë. Ngo tha ase kö nyidrë acil la ketre Paseka ka tru, matre acasine la itretre drei nyidrë qa Iudra, me Galilaia, me Pere. Ame la aja i nyidrë, ke tro hi a ce lapa memine la itre aposetolo i nyidrë la ijine cili. Öni nyidrëti lo koi angatr: “Atraqatre la trenge ajange troa ce xeni me nyipunie la Paseka celë, qëmekene tro ni a melëne la akötr.”​—Luka 22:15.

Hetre kepin matre nyidrëti a kuca lai. Easenyi hë tro Iesu, “Nekö i Mamoe i Akötresie, lo atre apatrene la itre ngazo ne la fen” a mec. (Ioa. 1:​29) Nge troa traqa lai e Ierusalema, lo traon hnë trofë huuj koi Akötresie qaan ekö. Ame lo mamoe hna öni ngöne la ijine Paseka, ke kola amekunëne la angetre Isaraela lo ijin Iehova a thepe angatr qa Aigupito. Ngo sisitria catre kö la meci Iesu, ke kola thapa la nöjei atr asë qa ngöne la ngazo me mec. (1 Kor. 5:​7, 8) Hnene la huuje i Iesu hna aijijëne lo ala Truelof troa pane nyiatrene la ekalesia, nge troa hetre hnëqa ka tru. (Efe. 2:​20-​22) Ame ngöne la “12 lao trepen la ihag” ne la Ierusalema ne hnengödrai, “hna sija la 12 lao ëje ne la 12 lao aposetolo ne la Nekö i Mamoe.” (Hna Am. 21:​10-​14) Tru catre la hnëqa ne la itre aposetolo ngöne la aja i Iehova. Trotrohnine hi easë la kepin matre Iesu a pi ce lapa me angatr ngöne la kola atrune la Paseka tixenuë, me acil la Xeni Heji Ne La Joxu.

Patre fe kö lo ala 70 memine la itre xaa atre dreng lo ijine cili. Ngo e tro angatr asë a mele nyipici, tro fe angatr a hane kapa la itre manathith ka xulu qa ngöne la Xeni Heji Ne La Joxu hnei Iesu hna acil. Ame asë hi la itre hna iën e thupen ke, tro fe angatr a sine lo isisinyikeu göne la ketre baselaia, lo hnei Iesu hna qaja kowe la itre aposetolo lo heji cili.​—Luka 22:​29, 30.