1, 2. (a) Nemene la hna qaja hnei Elifaza me Biledad göne la aqane goeëne Iehova la huliwa së koi Nyidrë? (b) Nemene la hna qaja hnei Iehova göne lai?

HNENE la köni trahmanyi ekö hna tro matre ithanata koi Iobu, ketre hlue i Iehova ka nyipici. Hnei Elifaza atre Temana, hna hnyinge koi Iobu me hape: “Hapeu, ka nyipiewekë kö la atr koi Akötresie? Ka hetre eloine kö koi Nyidrë la atr ka inamacan? Hetre madrinene kö la Kapucatinasë e meköti nyipë? Hetre thangane kö koi Nyidrë e pë ethane la thiina i nyipë?” (Iobu 22:1-3, MN) Eje hi laka, ame koi Elifaza tre, pëkö eloine la atr koi Akötresie. Hnei Biledad atre Sua, hna nyixane me hape, thatreine kö troa jele mekötine la atr hnei Akötresie.—E jë la Iobu 25:4.

² Hnei Elifaza me Biledad hna thele jëne matre tro Iobu a mekune ka hape, pëkö eloine la itre trengecatre hnei angeic hna nu troa nyihlue i Iehova. Ame la aja i nyidro, tro Iobu a mekune ka hape, pëkö eloine la atr xajawa i Akötresie, ka sisitria kö koi Nyidrë la neköi fenifen ka coco catr, maine wanak pena hu së. (Iobu 4:19; 25:6) Hapeu, nyidro a ithanata tune lai ke, lue  ka ipië nyidro? (Iobu 22:29) Nyipici laka, ka sisitria catr Iehova, nge itre atr ka pë pengöne së xajawa i Nyidrë. E tro sa cil hune la wetr, maine goe pena qa ngöne la mamala ne la avio, easë e cili a öhne laka, ka pë pengöne së, nge pëkö eloi së. Ngo, hapeu, celë fe kö mekuna i Iehova lai göne la itre trengecatre së troa huliwa i Nyidrë, memine la Baselaia i Nyidrë? Ohea! Öni Iehova koi Elifaza, me Biledad, me Zofar, lo hnaakönin ka hape, itre trengathoi la hnei angatr hna qaja. Nge, öni Nyidrë, tru la madrine i Nyidrë koi Iobu, ame hnei Nyidrëti hna hë angeic ka hape, “hluenge.” (Iobu 42:7, 8) Haawe, xecie hnyawa koi së ka hape, ‘ka nyipiewekë la atr koi Akötresie.’

3. Nemene la hna qaja hnei Elihu göne la itre trengecatre së troa huliwa i Iehova? Nemene la aliene lai?

³ Hnei Elihu, ketre thupëtresij hna dreng la kola ithanata hnei Iobu memine la köni sinee i angeic. Ame hë la pune la ithanata i angatr, öni Elihu jë hi e hnyinge koi Iobu göi Iehova ka hape: “Maine ate thina ka meköti nyipë, tro nyipëti a hamë nemene koi nyidë ? nge tro nyidëti a kepe nemene qa ngöne la iwanakoime i nyipë ?” (Iobu 35:7) Hapeu, Elihu fe e celë a qaja ka hape, ka pë pengöne la itre trengecatre së troa huliwa i Akötresie? Ohea. Tha hnei Iehova kö hna wenë amekötine la mekuna i Elihu, tune la aqane kuca i Nyidrë kowe la ala kön. Ame koi Elihu, tha Iehova kö a aja së troa huliwa koi Nyidrë. Ka hetrenyi asë hi Nyidrë, matre pëkö ketre ewekë hne së hna troa kuca ka troa atrenamo Nyidrë, maine aegöcatrenyi Nyidrë. Eje hi lai laka, ame la itre thiina ka loi ka ej the së, me itre hne së hna atreine kuca tre, qaathei Akötresie, nge öhne kö Nyidrë la aqane huliwane së itre ej.

4. Nemene la mekuna i Iehova la easa thiina ka loi koi itre atr?

⁴ Ame la easa hnim la itre hlue i Iehova, me huliwa nyipici koi angatr tre, ame koi Nyidrë kösë itre huliwa hi lai hna kuca mekötine koi Nyidrë. Öni Ite Edomë 19:17: “Ame la ate hnime la ate pë ewekë, te, kola pane hamëne koi Iehova ; nge tro anganyidëti a të la huliwa i angeic.” E nöjei ijin, öhne hi Iehova la easa utipine la ketre hlue i Nyidrë. Maine nyipici laka, Nyidrë la Atre Xup la hnengödrai me fene hnengödrai, hetre aja i Nyidrë troa goeëne la itre huliwa hne së hna kuca koi angeic ceitu me ewekë hna kuca koi Nyidrë, nge tro Nyidrëti lai a të hnene la itre ahnahna ka nyimutre. Celë hi hna qaja hnei Iesu, nekö i Akötresie.—E jë la Luka 14:13, 14.

5. Nemene la itre hnying hne së hna troa ce ithanatan?

⁵ Hnei Iehova ekö hna xatua Isaia perofeta troa nyitrengewekë i Nyidrë, me kuca la ketre huliwa thatraqai Nyidrë. (Isaia 6:8-10) Hnei Isaia hna canga kapa, me hape: “Eni hi la! Upi ni jë!” Iehova fe enehila a aijijëne la itre atr ka nyihlue i Nyidrë troa hane ce huliwa me Nyidrë. Ala thauzane lao  itre hlue i Iehova ka ujë tui Isaia. Angatr a nyimenyime kapa la itre hnëqa ka nyimu pengön ngöne la itre xa götrane matre troa nyihlue i Iehova. Nge hetre aja i angatre fe troa cile kowe la itre jol ka traqa koi angatr. Ngo, tro ketre lai a qaja e kuhu hni angeic ka hape: ‘Hetre madrineng troa nue xanë ni kö kowe la huliwa i Iehova, ngo hapeu, ka nyipiewekë kö la hnenge hna kuca? Tro Iehova lai a kuca matre tro pala hi a eatr la aja i Nyidrë.’ Hapeu, celë fe kö aqane mekune i epuni hi lai? Tro sa ce ithanatane la itre ewekë ka traqa kowe la lue hlue i Iehova ekö, Debora me Baraka. Tro lai a xatua së troa sa la itre hnyinge cili.

6. Pine nemene matre tha jole kö kowe la itre soce i Iabin troa ngaa angetre Isaraela?

⁶ Baraka la ketre atre isi e Isaraela, nge Debora la ketre perofeta föe. Traqa koi 20 lao macatre ne akötrëne la angetre Isaraela hnei Iabin, joxu i angetre Kanana. Ka iakötrë catr la itre soce i Iabin, matre tru la xou ne la angetre Isaraela ngöne la itre hlapa, goi xou i angatre fe ma lö qa ngöne la itre hnalapa i angatr. Traqa koi 900 lao ikariota fao i Iabin, ngo ame thei angetre Isaraela, pëkö jia ne isi ka loi, matre atreine troa cil koi angatr.—Angete Amekötin 4:1-3, 13; 5:6-8. * (Wange ju la ithuemacany.)

7, 8. (a) Nemene la itre hna amekötine hnei Iehova koi Baraka? (b) Nemene la aqane ngaan la itre isi Iabin hnene la angetre Isaraela? (Wange ju la pane iatr.)

⁷ E troa goeëne la itre soce i Iabin, tha jole kö troa ngaane la angetre Isaraela. Hnei Iehova hna amekötine koi Baraka jëne Debora perofeta ka hape: “Troja icasikeu ngöne la wete Tabora, nge xomejë nyipëti la ala [10 000] la ite nekö i Nafatali me ite nekö i Zebulona ? Nge tro ni a ea koi nyipë kowe la hneopegejë Kisona, Sisera tane ishi Iabin, me ite ikariota i nyën, me ite ishi nyën, nge tro ni a nue nyëne kowe la ime i nyipë.”—Angete Amekötin 4:4-7.

⁸ Ame la kola ase hëne la ala 10 000 lao atre isi, hnei angatr hna icasikeu hune la Wetr e Tabora. Ame hnei Baraka me itre atre i angeic hna tro troa isi memine la ithupëjia ngöne la götrane hna hëne ka hape, Tanaka. (E jë la Angete Amekötin 4:14-16.) Hnei Iehova kö hna xatuane la angetre Isaraela? Eje hi. Hna aca traqa la mani ka tru, matre hna si trëtr la hnë isi. Ame hnei Baraka hna weje la itre isi Sisera uti hë Haroseth, traqa koi 24 lao kilomet. Nge e cahu gojeny, hnene la ikariota i Sisera hna lö hnine la trëtr. Angeic a uti pi qa ngön, me nyapë ihnadro a tro Zananim, tha nanyi kö qa Kadesi. Ame e cili, Sisera a zae ju ngöne la uma mano i Iaela, ketre föe. Kucakuca catre Sisera, ame hnei angeic hna hmulizië. Iaela a humuthi angeic e cili ngöne la angeic a meköl. (Angete Amekötin 4:17-21) Hnei Iehova hna xatuane la angetre Isaraela troa ngaan la itre ithupëjia me angatr! * (Wange ju la ithuemacany.)

9. Nemene la ithuemacanyi hne së hna kapa qa ngöne la hna e la Angete Amekötin 5:20, 21?

⁹ Hetre itre xa ithuemacanyi hne së hna kapa e tro sa e la mekene 5 ne la tusi  Angete Amekötin. Hna qaja ngöne Angete Amekötin 5:20, 21: “Hetete hane ishi qa hnengödrai ; hna ishi me Sisera hnene la ite wëtesiji ngöne la ite jën’ it’ ej. Hna thei angate hnene la hneopegejë Kisona.” Hapeu, kolo kö lai a hape, hnene la itre angela hna xatuane la angetre Isaraela ngöne la ijine isi, maine hna mala tranyi angatr hnene la itre météorite? Pëkö hna qaja hnei Tusi Hmitrötr. Ngo, kola mama laka, hnei Iehova hna amelene la itre hlue i Nyidrë, me axulune la ketre mani ka tru ngöne la götran, me ngöne la ijine ka ijij, matre thatreine hë enij hnene la 900 lao ikariota. Kola qaja ngöne Angete Amekötin 4:14, 15 ka hape, akönia mama laka, Iehova la atrekë huliwane la kola hune hnei angetre Isaraela. Pëkö ala casi thene la ala 10 000 i angetre Isaraela ka ijij troa selëne la kola hun hnei angatr.

10, 11. Nemene la hna hape, Meroza? Pine nemene matre hna ëjin ej?

¹⁰ Tro sa ce wang enehila la ketre ewekë. Thupene la hna hun hnei angetre Isaraela, hnei Debora me Baraka hna atrunyi Iehova jëne la ketre nyima. Kola hape: “Önine la angela i Iehova, ka hape, Ëji Meroza pi, ëjine catëne la itete lapan’ ej, ke tha hnei angate hna tro troa xatua Iehova, troa xatua Iehova qa ngöne la itete cat.”—Angete Amekötin 5:23.

¹¹ Nemene la hna hape, Meroza? Tha nyipi mama kö koi së. Ngo, hnene la hna ëji Meroza matre pëkö ca nyine anyipicine ka hape, ketre götrane nöj ekö. Maine jë ketre hlapa Meroza ekö, ngo pëkö ca ka saen e cili troa xatua Baraka ngöne la isi. Pine laka ala 10 000 lao ka saen troa isi memine la angetre Kanana, ma drenge hë la itre atr ne Meroza lo kola ihë troa isi. Maine pena, Meroza la ketre hlapa hna kötre kow hnei Sisera matre troa zae Baraka. Maine jë, ijine hi lai tro la itre atr ne Meroza a othi Sisera, ngo tha kuca kö angatr. Pane mekune jë la angatr a goeëne la atre isi ka iakötrë, kola kötre mel ngöne la itre gojenyi angatr! Maine ju ijiji angatre hi troa sajuëne la aja i Iehova. Maine ujë ju angatr tune lai, tro hë Nyidrëti a amanathithi angatr. Maine nyipici laka, ijine ka ijije hi lai koi angatr troa sajuë Iehova, ngo tha kuca kö angatr. Matre isa pengöi angatre catr, me Iaela, ka catre sajuë Iehova.—Angete Amekötin 5:24-27.

12. Nemene la eisapengönene la aqane ujë ne la itre atr ka mama ngöne Angete Amekötin 5:9, 10? Nemene la nyine tro sa kuca?

¹² Ame ngöne Angete Amekötin 5:9, 10, kola mama laka, isapengöne catr la aqane ujë ne la ala 10 000 la ka saen memine la aqane ujë ne la itre ka tha saen. Hnei Debora me Baraka hna atrune la “itete musi ne Isaraela, angete nue xanë angate kö thene la nöj.” Isapengöi angatre kö memine la “itete tithe la ite asina ka wië,” lo itre ka mekune ka hape, ka sisitria catre angatr matre tha thatraqai angatre fe kö la troa saen kowe lai. Hna qeje angatr ka hape, itre ka “lapa hune la mano ka loi,” me “itete trongë hnadro,” angatr a mel ka loi. Tha ceitu i angatre kö memine la itre ka saen, ene lo itre ka ce tro me Baraka troa tro kowe la hna isi ngöne la Wetr e Tabora, me ngöne la hnathup ne Kisona. Kola qaja kowe la itre ka ajane la mele  ka loi ka hape: “Mekuneju.” Nge, loi e tro angatr a pane cil, me mekun la itre ijine hnei angatr hna trian troa saen kowe la huliwa i Iehova. Loi e tro fe së enehila a hane waipengöne la aqane ujë së kowe la huliwa i Iehova.

13. Nemene la isa aqane ujë i angetre Reubena, Dana, me Asera memine la angetre Zebulona me Nafatali?

¹³ Hetre ijine kowe la ala 10 000 lao ka saen troa ketre sipu öhne la aqane mejë hnei Iehova, Atre Mus ka sisitria. Tha jole kö koi angatr troa ce thawa lai me itre xan ngöne la ijine angatr a ithanatane “la ite huliwa ka meköti Iehova.” (Angete Amekötin 5:11) Ame pena ha la angetre Reubena, Dana, me Asera, ka tru catre kö koi angatr la itre mo, ene la hnënge öni, me itre he, me itre hnë qathë, nge co pë hë koi angatr la troa kuca la huliwa i Iehova. (Angete Amekötin 5:15-17) Tha hna ujë tune kö lai hnene la itre tribu asë. Hnene la angetre Zebulona me Nafatali hna nue la mele i angatr matre troa xatua Debora me Baraka. (Angete Amekötin 5:18) Hetre ini ka tru nyine tro sa xome qa ngöne la isa aqane ujë ne la itre atre celë kowe la huliwa i Iehova.

14. Nemene la aqane tro sa sajuë Iehova enehila?

¹⁴ Ame enehila, tha easë hmaca kö a isi matre troa sajuëne la musi Iehova. Easë pe a sajuë Nyidrë ngöne la easa catre cainöj. Ka sisitria catre kö enehila troa ixatua ngöne la huliwa i Iehova. Itre milio lao trejin trahmany, me föe, me thöth, ka saen troa huliwa i Iehova o drai. Hetre itre xa trejin ka pionie, maine ka huliwa ngöne la Bethela, maine ka ixatua xupi Uma ne Baselaia. Nge ame itre xan, itre ka saene ngöne la itre ijine asabele. Nge, hetrenyi fe la itre xa qatre thup ka catre huliwa ngöne la Komite Ne Ixatua e Pital (CLH), maine pena ka hnëkëne la itre asabele. Tha luelue kö së laka, madrine Iehova la easa nue xanë së kö troa  huliwa i Nyidrë ngöne la kola aja ixatua. Nge tha tro kö Nyidrëti lai a thëthëhmine la itre trengecatr hne së hna nu.—Heberu 6:10.

15. Nemene la itre hnying ka troa xatua së matre hetre madrine së ngöne la huliwa i Iehova?

¹⁵ Nyipiewekë tro sa isa waipengö së kö göi troa nue xanë së kö kowe la huliwa i Iehova, me hape: ‘Eni kö a nue la itre xan troa kuca asë la huliwa? Ka tru kö koi ni la itre mo ne fen, hune la troa huliwa i Iehova? Maine pena, eni kö a xötrethenge la lapaun, memine la catre i Baraka, me Debora, me Iaela, memine lo ala 10 000 lao ka saen, ene la troa huliwane la itre hnenge hna hetrenyi thatraqane la huliwa i Iehova? Nge maine eni a mekune troa feke kowe la ketre götran, maine ketre nöj göi troa thele mani, me hetre mele ka loi, eni kö a thithi koi Iehova göne la itre thangane lai kowe la hnepe lapang, me kowe la ekalesia?’ * (Wange ju la ithuemacany.)

16. Nemene la ewekë hne së hna atreine hamëne koi Iehova?

¹⁶ Ketre ahnahna ka tru la hnei Iehova hna hamë së, ene la troa sajuëne la musi Nyidrë. Qaane lo ijine i Adamu me Eva, aja i Diabolo pala hi tro la itre atr a thipetriji Iehova. Ngo, ame la easa sajuëne la musi Iehova, easë hi lai a amamane hnyawa koi Satana ka hape, Iehova la hne së hna ce xöl memin. Hnene la lapaune së, memine la aqane nyipici së koi Iehova hna upi së troa nue xanë së kö kowe la huliwa i Nyidrë. Nge, celë hi ka amadrinë Nyidrë. (Ite Edomë 23:15, 16) Tro la aqane idrengethenge së me aqane nyipici së koi Akötresie a aijiji Nyidrë troa sa koi Satana. (Ite Edomë 27:11) Ame la ewekë hne së hna atreine hamëne koi Iehova, nge ka sisitria, nge ka hamë madrin koi Nyidrë tre, ene la troa idrengethenge.

17. Nemene la ewekë ka troa traqa elanyi thenge la hna qaja ngöne Angete Amekötin 5:31?

¹⁷ Calemi hë la ijine tro la itre atr a mele madrine fene la musi Iehova hmekuj. Easa trengeneune catrëne la ijine cili! Casi hi la mekuna së me Debora me Baraka lo nyidroti a nyima, me hape: “Iehova fe, tro ha [patre] asë tune lai la ite ithupëjia me enëtilai ; ngo tro la itete hni nyidë a tune la jö a xulujë memine la cate ne ej.” (Angete Amekötin 5:31) Celë hi ewekë lai ka troa traqa ngöne la ijine tro Iehova a apatrenyi Satana me fene i angeic. Ame la kola nyiqaane la isi Amagedo, tha Iehova kö a aja atr troa xatua Nyidrë ngöne la ijine cili. Ame e cili, tro pe sa ‘cile’ me ‘öhne la iamele i Iehova.’ (2 Aqane lapa ite joxu 20:17) Ngo, ame enehila, loi e tro sa catre sajuëne la musi Nyidrë.

18. Nemene la thangane kowe la itre trejin e tro sa nue xanë së kö kowe la huliwa i Iehova?

¹⁸ Hna nyiqaane la nyima i Debora me Baraka hnene la iatruny, tha koi atre kö ngo, koi Iehova. Öni nyidro: “Atrunyi Iehova jë . . . hna nue xanë angate hnene la nöj.” (Angete Amekötin 5:1, 2) Ketre tune mina fe, ame la easa nue xanë së kö e aja ixatua jë ngöne la huliwa i Iehova, easë hi lai a xatuane la itre trejin troa “atrunyi Iehova!”