Tune Kaa e Traqa Pi La Baselaia i Akötresie?
“Kola pate la fene hnengödrai, memine la hna aja kow ; ngo troa cile huti epine palua la ate kuca la aja i Akötesie.” —1 IOANE 2:17.
NYIMA: 134, 24
1, 2. (a) Nemene la ewekë ka ceitu thene la fene ka ngazo celë memine la atr hna troa humuth? (Wange ju la pane iatr.) (b) Nemene la mekuna ne la itre atr asë thupene la kola apatrene la fen?
PANE mekune jë la ewekë celë: Hna amekötine kowe la atr ka ihumuth hnene la hnakotr laka, tro hë angeic a mec. Ame enehila, kola tro sai angeic hnene la itre ka thup matre troa humuthi angeic. Ngacama mele pala kö lai atr ka ihumuth, me egöcatr, ngo angeice pë hë a treqen troa mec.
2 Kola aceitunëne la fen ka ngazo celë memine lai atr ka ihumuth ka treqen troa mec. Öni Tusi Hmitrötr: “Kola pate la fene hnengödrai.” (1 Ioane 2:17) Ase hë Iehova axeciëne ka hape, easenyi hë tro la fene celë a patr. Matre tha luelue kö së laka, tro lai a eatr. Ngo, ka isapengöne catr la pune la fene celë memine la kola humuthe lai atr hna kotrën. Eje hi laka, tro la itre atr a mekune ka hape, tha meköti kö la pun hna amekötin koi angeic, nge angatr a icilekeu memine la hna amekötine cili. Nge, angatr a thele jëne matre tha tro kö angeic a mec. Ngo ame Iehova, Nyidrëti hi la Atre Amekötine Ka Pexej, nge meköt la mekun hnei Nyidrëti hna axeciën, ene la troa apatrene la fene celë. (Deuteronomi 32:4) Tha hmiitre kö matre nyipune pi hë la fene celë. Thupene la hna apatrene la fene celë, tro la itre atrene la hnengödrai, me fene hnengödrai asë a öhne ka hape, meköti la hna amekötine hnei Iehova. Drei la ketre madrine ka tru!
3. Nemene la foa lao jol ka troa patr ngöne la ijine traqa la Baselaia i Akötresie?
3 Nemene la aliene la hna hape, “fene hnengödrai”? Kola qaja la itre ewekë ka ngazo hna kuca hnene la fen enehila. Easenyi catre hë matre apatrene pi la itre ewekë cili. Celë hi aliene ‘la maca ka loi ne la baselaia.’ (Mataio 24:14) Ame ngöne la tane mekune celë, tro sa ce wang la foa lao jol ka troa patr ngöne la ijine traqa la Baselaia i Akötresie, ene la itre atr ka ngazo, me itre organizasio ka huliwa thoi, me itre huliwa ka ngazo, me pengöne la mel enehila. Nge ame kowe la isa ca jol, tro sa ce wang (1) la aqane akötrë së enehila, memine (2) la hnei Iehova hna troa kuca kowe itre ej, memine (3) la itre ka troa nyihnan itre ej.
ITRE ATR KA NGAZO
4. Nemene la aqane akötrë së enehila hnene la itre atr ka ngazo?
4 Nemene la aqane akötrë së enehila hnene la itre atr ka ngazo? Öni Paulo aposetolo ka hape, ame ngöne la itre drai ne la pun “tro ha traqa la nöjei ijine ka aköte.” Thupene lai, öni angeice hmaca jë: “Ame la nöjei ate thina ka ngazo me itete iaö, tro pala kö angat’ a ngazo.” (2 Timoteo 3:1-5, 13) Hna ketri epuni kö hnene lai? Ala nyimu the së la itre hna akötrëne hnene la itre atr ka iangazo, maine hnene la itre ka ihumuth, maine hna akötrë së pena pine la hane ngönetrei së. Ame itre xan, kola kuca amamane la itre ewekë ka ngazo. Nge, ame itre xan, angatr a qaja ka hape, kola ixatua, ngo itre ka iaö pe. Ngacama tha hna sipu ketri së kö hnene lai, ngo akötre pi hë la hni së la kola qanangazone la itre nekönatr, me itre qatr, memine la itre ka kucakuca. Itre atr ka ngazo a ujë ceitu me itre öni, me itre dremoni. (Iakobo 3:15) Eloine pe, hnene la Wesi Ula i Iehova hna thue mejiune së.
5. (a) Nemene la nyine troa kuca hnene la itre atr ka ngazo? (b) Nemene la pun kowe la itre ka xele ma ujë?
5 Nemene la hnei Iehova hna troa kuca? Iehova a nue enehila la ijine matre tro la itre atr ka ngazo a ujë. (Isaia 55:7) Ngacama ase hë amekötine troa apatrene la fene celë, ngo tha traqa pala kö la ijine troa amekötine la itre atr ka ngazo. Nemene la pun kowe la itre atr ka xele ma ujë, nge ka sajuëne la fene celë la kola traqa la akötr atraqatr? Ase hë Iehova thingehnaean laka, tro Nyidrëti a apatrene la atr ka ngazo qa ngöne la ihnadro. (E jë la Salamo 37:10.) Ala nyimu enehila la itre atr ka kuca juetrëne la ngazo, nge tha hna tranyi angatre pi kö. (Iobu 21:7, 9) Ngo Tusi Hmitrötr a amekunë së ka hape: “Eje kö la lue xajawa i nyidë hune la ite jëne la nöjei at, nge öhne asë nyidë la ite hna feke ca hnei angat. Pëkö melöhlem, nge pëkö ahnuene la mec, mate troa za ngöne hnei angete kuca la ngazo.” (Iobu 34:21, 22) Matre, pëkö ewekë ka sihngödr xajawa i Iehova. Öhne asë hi Nyidrë la nöjei ewekë ka ngazo hna kuca. Thupene e Amagedo, tro sa goeëne la hna jilapa hnene la itre atr ka ngazo, ngo tha öhnyi angatre hë së. Patre palua ha angatr!—Salamo 37:12-15.
6. Drei la itre ka troa mele pe thupene la kola apatrene la itre atr ka ngazo, nge pine nemene matre ketre maca ka loi lai?
6 Drei la itre ka troa mele pe thupene la Salamo 37:11, 29) Drei la “ange ka menyike” memine la “ange ka meköti”? Ame la itre ka menyik tre, itre atr ka ipië, nge ka thele troa atre Iehova me drengethenge la itre hnei Nyidrëti hna amekötin. Ame la itre ka meköt, kola qaja la itre ka hetre aja troa kuca la itre ewekë ka meköti koi Nyidrë. Ame ngöne la fen enehila, nyimutre catre kö la itre ka ngazo hune la itre ka meköt. Ngo ame ngöne la fene ka hnyipixe, itre ka menyik, me ka meköti hmekuje hi la itre ka troa nyialiene la fen, nge tro angatr a aparadraisone la ihnadro!
kola apatrene la itre atr ka ngazo? Hnei Iehova hna thingehnaeane ka hape: “Tro la ange ka menyike a hetenyi la nöj, nge tro angat’ a madine la tingetinge atraqat.” Kolo fe a qaja e thupen ka hape: “Tro ha la ange ka meköti a hetenyi la nöj, me lapa palua kö ngön’ ej.” (ITRE ORGANIZASIO KA HULIWA THOI
7. Nemene la aqane akötrë së enehila hnene la itre organizasio ka huliwa thoi?
7 Nemene la aqane akötrë së enehila hnene la itre organizasio ka huliwa thoi? Nyimutre la itre ngazo enehila laka, tha hna kuca kö hnei ketre atr, ngo hnene la itre organizasio. Itre milio lao atr hna amenune hnene la itre organizasio i hmi. Itre ej a qaja la trenga thoi göi Akötresie, me hape, tha ijije kö troa mejiune kowe la Tusi Hmitrötr. Itre eje fe a amenune la itre atr göne la pengöne la ihnadro elany memine la itre atr. Ame la itre mus ka huliwa qene atrekënö, itre ej a ukune la itre atr troa isi, me xele ma wange la itre atr ka isa hane ngönetrei kö. Itre eje fe a qanangazone la itre ka pë ewekë me ka pë atre xatuan. Kola hlemu, me trenamo la itre organizasio cili ke, hnene itre ej hna ië hna hnim, me kapa la itre thupene hna hamëne juetrën. Hnene la itre xa organizasio ka thele mani hna adrone la ihnadro, me angazone la itre aliene ej. Nge itre ej a nyijëne la itre atr matre troa trenamo hnene la ala xalaith. Haawe, mama hnyawa hi ka hape, itre organizasio ka huliwa thoi la atrekë zöne la itre akötr ne la fen enehila.
8. Nemene la hna qaja hnei Tusi Hmitrötr göne la itre organizasio ka catr kowe la itre atr?
8 Nemene la hna troa kuca hnei Iehova? Troa nyiqaane la akötr atraqatr la kola lepe la hmi thoi hnene la itre politik. Tusi Hmitrötr a hëne la hmi thoi ka hape, Babulona Atraqatr, nge hna aceitunën me föe ne gojeny. (Hna Amaman 17:1, 2, 16; 18:1-4) Troa lepe apatrene la nöjei hmi asë. Ngo, nemene la hna troa kuca kowe la itre xa organizasio ka huliwa thoi? Tusi Hmitrötr a aceitunën itre ej me itre wetr, me itre hnapet ke, kösë ka cile catr itre ej. (E jë la Hna Amaman 6:14.) Ngo, kolo fe a qaja ka hape, troa apatrene asë la itre mus, me itre organizasio ka tha hane kö sajuëne la Baselaia i Akötresie. Celë hi götrane tixenuë ne la akötr atraqatr. (Ieremia 25:31-33) Thupene lai, pë hë organizasio ka huliwa thoi e celë fen!
9. Nemene la ka anyipicine koi së ka hape, troa tro loi la fene ka hnyipixe elany?
9 Nemene la ka troa nyihnane la itre organizasio ka huliwa thoi? Hapeu, tro pe kö a hetre ketre organizasio e celë fen thupene e Amagedo? Öni Tusi Hmitrötr: “Tro sha teqene thenge la hnei nyidëti hna thinge hnaean, la hnengödrai ka hnyipixe memine la fene hnengödrai ka hnyipixe, nge eje la thina ka meköti e cili.” (2 Peteru 3:13) Ame la hnengödrai, me fene hnengödrai, kola qaja la itre mus ka huliwa thoi, memine la itre atr hnei angatr hna musinën. E patre hë angatr elany, drei la ka troa nyihna i angatr? “Hnengödrai ka hnyipixe memine la fene hnengödrai ka hnyipixe.” Ame la hnengödrai ka hnyipixe, kola qaja la musi ka hnyipixe, ene la Baselaia hna cilën hnei Iesu Keriso, memine la ala 144 000 hna iën troa ce musi me nyidrë. Nge, ame la fene hnengödrai ka hnyipixe, kola qaja la itre atr ka sajuëne la Baselaia i Akötresie. Tro Iesu, memine la itretre ce musi me nyidrë a nyitipu Iehova hnyawa, lo Akötresie Atre Ameköti Huliwa. (1 Korinito 14:33) Haawe, troa tro loi la “fene hnengödrai ka hnyipixe” ke, itre trahmanyi ka loi la ka troa ameköti ewekë. (Salamo 45:16) Troa xomiujine la itre atr cili hnei Keriso, memine la ala 144 000. Pane mekune jë la ijine troa nyihnane la itre organizasio ka huliwa qene atrekënö hnene la organizasio ka cas, nge ka troa huliwa nyipici!
ITRE HULIWA KA NGAZO
10. Nemene la itre huliwa ka ngazo hna kuca ngöne la nöje i epun, nge nemene la thangane lai koi epun, me hnepe lapa i epun enehila?
10 Nemene la aqane akötrë së enehila hnene la itre huliwa ka ngazo? Ame ngöne la fen enehila, ala nyimu la itre atr ka kuca la itre ewekë ka sis, me huliwa qene atrekënö, me isi. Hnene la itre nyine iamadrinë hna jeleloine la itre ewekë cili, me thaipiëne la itre trepene meköti Iehova göi loi me ngazo. (Isaia 5:20) Matre, loi e tro la itre keme me thin a hmekëne la itre nekö i angatr qa ngöne la itre ewekë ka ngazo celë. Eje hi laka, tro la itre keresiano asë a isine matre tro pala hi a catre la imelekeu i angatr me Iehova ngöne la fene celë, fen ka wangacone la itre trepene meköti Nyidrë.
11. Nemene la hne së hna inine qa ngöne la iameköti Iehova koi Sodoma me Gomora?
11 Nemene la hna troa kuca hnei Iehova? Pane mekune jë la hnei Iehova hna kuca kowe la lue lapa, ene Sodoma me Gomora pine la itre huliwa i angatr ka ngazo. (E jë la 2 Peteru 2:6-8.) Lota la ketre atr ka meköt, nge hnei angeic me hnepe lapa i angeic hna akötre pine la itre ngazo hna kuca hnene la itre atr ka lapa xötreithi angatr. Hnei Iehova hna lepe la lue lapa cili matre patre pi la itre huliwa ka ngazo. Nyidrëti fe a amë lai “nyine hatene” kowe la itre atr ka ngazo enehila. Tune lo aqane apatrene Iehova la itre huliwa ka sisi ekö, tro fe Nyidrëti a apatrene itre ej enehila ngöne la Nyidrëti a troa lepe la fen celë.
12. Nemene la itre xa huliwa hnei epuni hna ajane troa kuca e patre hë la fene celë?
12 Nemene la ka troa nyihnane la itre huliwa ka ngazo elany? Ame ngöne la fen ka hnyipixe, nyimutre la itre huliwa ka lolo hne së hna troa kuca. Tro sa aparadraisone la ihnadro, me xup la itre uma koi së me kowe la itre atr hne së hna hnim. Nge, easë fe a troa kapa la itre milio lao atr hna amelene hmaca, me ini angatr la pengöi Iehova, memine la itre hnei Nyidrëti hna kuca kowe la itre atr. (Isaia 65:21, 22; Ite Huliwa 24:15) Ame ngöne la ijine cili, tro sa kuca la itre huliwa ka troa amadrinë së, nge ka atrunyi Iehova!
PENGÖNE LA MEL ENEHILA
13. Nemene la thangane la icilekeu e Edena?
13 Tune kaa la aqane akötrë së hnene la pengöne la mel enehila? Hnene laka, kola haöthe la fen hnene la itre atr ka ngazo, me itre organizasio ka huliwa qene atrekënö, me itre huliwa ka ngazo, haawe, kolo fe a ngazo la pengöne la mel. Hna ketri së asë hi hnene la itre jole celë, ene la itre isi, me pë ewekë, me wezipo, me mec, me ixelemaiwai pi hane ngönetrei. Kola traqa la itre ewekë cili ke,
hnei Satana, me Adamu, me Eva hna icilekeu me Iehova. Matre, easë asë hi a melëne la itre ethanyine la icilekeu cili.14. Nemene la hna troa kuca hnei Iehova göne la pengöne la mele celë?
14 Nemene la hna troa kuca hnei Iehova göne la pengöne la mele celë? Ase hë Iehova qaja amë ka hape, tro Nyidrëti a apatrene paluane la itre isi. (E jë la Salamo 46:8, 9.) Nge, tro Nyidrëti a apatrene la itre sine mec. (Isaia 33:24) Pë hmaca kö mec. (Isaia 25:8) Nge, pë hmaca kö atre pë ewekë. (Salamo 72:12-16) Tro Iehova a apatrene la pengöne la mele celë ka iakötrë enehila. Tro fe Nyidrëti a apatrenyi Satana me itre dremoni angeic!—Efeso 2:2.
Mekune jë la mele së elanyi e pë hë isi, me wezipo, me mec! (Wange ju la paragarafe 15)
15. Nemene la itre xa ewekë ka troa patre palua thupei Amagedo?
15 Pane mekune jë së la pengöne la mele së elany, e pë hë isi, me wezipo, me mec! Pë hmaca kö trongene isi, me kuqa, maine itre monument thatraqane la itre ka mec. Tha nyipiewekë hmaca kö troa hetre pital, maine droketre, me infirmié, me hnë mec, me kele wezipo. Pëhë ka ihumuth, matre tha nyipiewekë hë troa hetre polis, me alarme, me troa ki qëhnelö! Ame la nöjei ewekë celë ka axouenyi së tre, tro ha patre palua.
16, 17. (a) Nemene la aliene hni ne la itre ka troa mele pe elany e Amagedo? Qaja jë la ketre ceitun. (b) Nemene la nyine tro sa kuca matre tro pe kö sa mel elanyi e patre hë la fene celë?
16 Tune kaa la mele së elanyi e patre hë la pengöne la mel enehila? Jole pi hë troa lapa mekune la pengöne la mele së elany. Ekö hë së melëne la itre ewekë ka ngazo matre tha öhne kö së la itre ethane koi së. Ceitune hi lai memine la itre atr ka lapa ezine la hnë kei avio, tha drenge hë angatr la mejene ej. Nge ame la itre atr ka lapa ezine la hnë triji salite, tha drei punepune hë angatr. Ngo, drei la ketre madrine ka tru koi së la Iehova a apatrene elanyi la pengöne la mele celë!
17 Nemene la ka troa nyihnane la itre hne së hna hace fë enehila? Öni Salamo 37:11: “Tro angat’ a madine la tingetinge atraqat.” Kola akeukawane la hni së, la easa trotrohnine la aja i Iehova koi së. Ame ngöne la itre ijine hace enehila, isine jë troa lapa qale catre koi Iehova, me kowe la organizasio i Nyidrë. Ame la mejiune i epuni göi elany tre, ka tru alameken, haawe, lapa mekun ju. Nge thupëne kö matre tro pala hi a mel e kuhu hni epun la mejiune cili, nge ce thawa jë lai me itre xan. (1 Timoteo 4:15, 16; 1 Peteru 3:15) Ame hë e cili, tha tro kö epuni a luelue laka, tro pe kö epuni a mel ngöne la ijine troa apatrene la fene celë, me mele madrin epine palua!