Xötrethenge Jë La Thiina Ka Meköti Iehova!
“Tro ni a amamane la atesiwa i Iehova . . . , Akötesie ka nyipici, nge pë engazon.”—DEUTERONOMI 32:3, 4.
NYIMA: 110, 2
1, 2. (a) Nemene la ewekë ka tha meköti kö hna kuca koi Nabotha me itre nekö i angeic? (b) Nemene la lue thiina ka lolo hne së hna troa ce ithanatane ngöne la tane mekune celë?
HNENE la lue atr ka ngazo hna upezön menune la ketre atr. Matre hna jelengazo angeic, me humuthi angeic. Pane mekune jë la kola goeëne lai hnene la itre atr ka hnine la meköt, me öhne la kola tranyi humuthi angeic memine la itre nekö i angeic! Tha ketre ifejicatre kö lai. Celë hi ka traqa koi Nabotha, ketre hlue i Iehova ka nyipici, me ka mel lo ijine Ahaba joxu a mus e Isaraela.—1 Ite Joxu 21:11-13; 2 Ite Joxu 9:26.
2 Ame ngöne la tane mekune celë, tro sa ce ithanatane la ewekë ka traqa koi Nabotha. Tro fe sa ce wange la tria ne la ketre qatre thup ngöne la ketre ekalesia ekö. Jëne la lue tulu celë, troa mama koi së la enyipiewekëne la troa ipië, me troa nue la ngazo i ketre, e hetre aja së troa xötrethenge la thiina ka meköti Iehova.
EWEKË KA THA MEKÖTI KÖ HNA KUCA
3, 4. Nemene la pengöi Nabotha, nge pine nemene matre xele kö angeic ma salemëne la vine i angeic koi Ahaba joxu?
3 Nabotha la ketre hlue i Iehova ka nyipici, ngo ame ngöne la ijine i angeic, ala nyimu la angetre Isaraela ka xötrethenge la tulu ka ngazo i Ahaba joxu, me Iezebela föi angeic. Angatr a thil koi Baala, haze ka thoi, nge angatr a wangaconyi Iehova, me itre wathebo i Nyidrë. Ngo, ame Nabotha, ka tru koi angeic la aqane imelekeu i angeic me Iehova, nge co pë hë koi angeic la sipu mele i angeic.
4 E Jë la 1 Ite Joxu 21:1-3. Ame la Ahaba a qaja koi Nabotha la aja i angeic troa itöne la vine i Nabotha, me hamëne la vine ka sisitria i angeic, hna thipëne hnei Nabotha. Öni angeic e qaja la kepin ka hape: “Ohe, hmitöte e Iehova tro ni a hamëne la zi ne la ite kemenge koi cilie.” Hnei Nabotha hna thipëne la sipo i Ahaba joxu ke, ka icilekeu memine la wathebo i Iehova. Kola wathebone la angetre Isaraela troa salemëne paluane la hnepadro ne la itre xötrapane i angatr. (Levitiko 25:23; Numera 36:7) Matre, Nabotha a drengethenge Iehova.
5. Nemene la hna kuca hnei Iezebela matre troa xome la vine i Nabotha?
5 Ame la Nabotha a xele ma salemëne la vine i angeic, hetre ewekë ka ngazo hna kuca hnei Ahaba joxu me föi angeic. Ame la aja i Iezebela, tro Ahaba a xome la vine i Nabotha. Matre hnei angeic hna upe la lue atr troa thoi me hape, hetre huliwa ka ngazo hna kuca hnei Nabotha. Ame la pune lai, hna humuthi Nabotha me itre nekö i angeic. Nemene la hna kuca hnei Iehova göne la ewekë cili ka tha meköti kö?
THIINA KA MEKÖTI AKÖTRESIE
6, 7. Nemene la ka amamane ka hape, ka hnine Iehova la thiina ka meköt, nge nemene la ka akeukawane la hnepe lapa i Nabotha, me itre sinee i angeic?
6 Hnei Iehova hna canga upi Elia troa cile koi Ahaba. Öni Elia koi Ahaba ka hape, atre ihumuthi angeic, me atrekënö. Nemene la hna amekötine hnei Iehova? Troa humuthi Ahaba, me föi angeic, me itre nekö i angeic trahmanyi tune la hna kuca koi Nabotha me itre nekö i angeic trahmany.—1 Ite Joxu 21:17-25.
7 Tru la akötre ne la hnepe lapa i Nabotha, me itre sinee i angeic ngöne la itre ewekë hna kuca hnei Ahaba. Ngo, öhne kö Iehova la ewekë ka tha meköti kö hna kuca, matre saqe hi Nyidrë troa amekötin. Celë hi ka akeukawane la hni angatr. Ngo, hetre ketre ewekë kö ka tupathe la ipië i angatr, memine la mejiune i angatr koi Iehova.
Öni Elia koi Ahaba, tha tro kö Iehova a nyithupene koi angeic ke, hnei angeic hna aipië angeice kö
8. Nemene la aqane ujë i Ahaba la angeic a dreng la maca i Iehova, nge nemene la thangane lai?
8 Ame la Ahaba a drenge la hna amekötine hnei Iehova koi angeic, “angeic’ a kuie zezene [pi] ite ixete i angeic, me xetëne la sine mano ka tru thenyin, me tha xen, me meköle fë la sine mano ka tru thenyin, me tro [hleuhleu].” Hnei Ahaba hna aipië angeice kö. Nemene hë la ewekë ka traqa? Öni Iehova koi Elia, “Qa ngöne laka hnei 1 Ite Joxu 21:27-29; 2 Ite Joxu 10:10, 11, 17) Hnei Iehova, “ate tupathe la ite hni,” lo ka atre pengö së hnyawa, hna utipi Ahaba, me nue la ngazo i angeic.—Ite Edomë 17:3.
angeice hna aconyi angeice kö qëmekeng, tha tro kö ni a axulune la ngazo ngöne la ite drai angeic ; ngo tro pe ni a axulune la ngazo kowe la lapa i angeice ngöne la ite drai ne la nekö i angeic”. (ENYIPIEWEKËNE LA TROA IPIË
9. Pine nemene matre nyipiewekë troa ipië hnene la hnepe lapa i Nabotha me itre sinee i angeic?
9 Ketre itupath ka tru kowe la lapaune ne la hnepe lapa i Nabotha me itre sinee i angeic la angatr a dreng laka, tha tro kö a nyithupene kowe la hnepe lapa i Ahaba uti hë la tro angeic a mec. Ngo e tro angatr a ipië, tha tro pi kö a ajolëne la lapaune i angatr. Nge, tro pala hi angatre lai a nyihlue i Iehova, me mejiune laka, ka meköti pala hi Nyidrë. (E jë la Deuteronomi 32:3, 4.) Hetre manathith hna troa melën hnene la hnepe lapa i Nabotha elany, ene la troa öhne la itre atrene la hnepe lapa i angatr hna troa amelene hmaca. Celë hi meköti lai ka pexeje hna troa kuca koi Nabotha me itre nekö i angeic trahmany. (Iobu 14:14, 15; Ioane 5:28, 29) Atre hnyawa hi la atr ka ipië ka hape, “tro Akötesieti a hnyingëne la nöjei huliwa asë, me nöjei ewekë asë ka sihngöd, ite loi me ite ngazo.” (Ate Cainöj 12:14) Öhne asë hi Iehova uti fe hë la itre ewekë hne së hna thatre. Haawe, e tro sa ipië, tha tro pi kö a ajolëne la lapaune së koi Iehova.
E tro sa ipië, tha tro kö a ajolëne la lapaune së koi Iehova
10, 11. (a) Nemene la itre jol ka tupathe la thiina ka meköti së? (b) Nemene la aqane xatua së hnene la thiina ka ipië?
10 Tune kaa e hetre mekune hna axeciën hnene la itre qatre thup, nge tha nyipi trotrohnine kö epuni maine tha nyipi kapa kö epun? Tune kaa e hna xome qaathei epun, maine qaathene la sinee i epun la ketre hnëqa ngöne la huliwa i Iehova? Tune kaa e upetröneëne jë la föi epun, maine nekö i epuni trahmanyi maine jajiny, maine ketre enehmu i epuni pena, nge tha nyipi kapa kö epuni la hna axeciëne hnene la itre qatre thup? Tune kaa e mekune jë epuni ka hape, tria kö la hna axecië mekune hnene la itre qatre thup ke, hnei angatr hna utipin la atr ka kuca la ngazo? Tro la itre ewekë cili a tupathe la lapaune së koi Iehova, memine la aqane amekötine Nyidrë la ekalesia enehila. Tro la thiina ka ipië a xatua epuni tune kaa e traqa ju koi epun la ketre jol ka tune lai? Tro sa ce wange la lue aqane tro la thiina ka ipië a xatua së.
Tune kaa e ithuemacanyine jë la ketre mekune hna axeciëne hnene la itre qatre thup, ngo tha nyipi kapa kö epuni? (Wange ju la paragarafe 10, 11)
11 Ame la hnapan, e ka ipië së, tro së lai a kapa laka, hetrenyi fe la itre ithuemacanyi hne së hna thatre. Nge, maine ame koi së, atre asë hi së la itre götrane ne lai jol, ngo ame pe, Iehova hmekuje hi la ka öhne la hni ne la atr. (1 Samuela 16:7) E ka ej la mekune cili the së, tro së lai a ipië me kapa laka, hetre ifego së, nge loi e tro sa wenë amekötine la itre mekune së. Ame la hnaaluen, maine hetre ewekë ka tha meköti kö hne së hna öhn, maine hna kuca koi së pena, tro la thiina ka ipië a xatua së troa drengethenge Iehova, me xomihni, me treqene hnyawane tro Nyidrëti a amekötin. Öni Tusi Hmitrötr: “Troa loi koi angete qoue Akötesie . . . Ngo tha tro kö a loi la ate ka ngazo, nge tha tro kö a nyimu drai nyën.” (Ate Cainöj 8:12, 13) E tro pala hi së a ipië ngöne la itre ijine jol, tro hë sa kepe eloine qa ngön, memine fe la itre atr hna ketr hnene lai.—E jë la 1 Peteru 5:5.
MELE HNIHNI E HNINE LA EKALESIA
12. Nemene la hna melëne hne së hna troa ce ithanatan, nge pine nemen?
12 Hetre ewekë ka traqa kowe la itre pane keresiano ekö e Suria Anetioka, nge ka ajolë angatr troa ipië, me nue la ngazo i ketre. Tro sa ce ithanatane lai me isa waipengö së göi troa nue la ngazo i ketre. Tro së lai a trotrohnine la kepine matre Iehova a eatrëne la aja i Nyidrë jëne la itre atr ka tha pexeje kö, me nyipiewekëne pala hi la itre trepene meköti Nyidrë.
13, 14. Nemene la itre hnëqa i Peteru, nge nemene la ka amamane ka hape, ketre atr ka catr angeic?
13 Peteru aposetolo la ketre qatre thup hna atre hnyawa hnene la itre pane keresiano ekö. Ketre enehmu i Iesu angeic, nge trene hnëqa ka tru. (Mataio 16:19) Ame ngöne la macatre 36, hna upi Peteru troa cainöj koi Konelio memine la nöjei atrene la hnalapa i angeic. Pine nemene matre ketre ijine ka tru lai? Pine laka, ame Konelio, tha atre Iudra kö, ngo atre ethen. Ame la Konelio memine la itre atre i angeic a kapa la uati hmitrötr, trotrohnine ju hi Peteru ka hape, loi e tro ha bapataiso angatr. Öni angeic: “Dei la ate ateine troa cipane la tim, mate tha tro kö a bapataiso angate la angete hane kapa la [u]ati [h]mitöte tui eëshë?”—Ite Huliwa 10:47.
14 Ame lo macatre 49, hnene la itre aposetolo, me itre qatre thup e Ierusalema hna icasikeu matre troa axeciëne ka hape, troa peritomone maine tha tro kö a peritomone la itre ethen ka kapa la hmi keresiano. Ame ngöne la ijine cili, hnei Peteru hna catre me amexeje kowe la itre trejin laka, hnei angeic hna sipu öhne la kola kapa la uati hmitrötr hnene la itre ethen hna tha peritomon. Matre, hnene la hna melëne hnei Peteru hna xatuane la lapa ne xomi meköt troa axecië mekun. (Ite Huliwa 15:6-11, 13, 14, 28, 29) Eje hi laka, tru la madrinen la itre Keresiano, itretre Iudra me itretre ethen laka, hna catr hnei Peteru troa qaja la itre mekune cili. Matre, tha jole kö kowe la itre keresiano asë troa mejiune kowe la trejine ka macaje cili, ene Peteru!—Heberu 13:7.
15. Nemene la hna kuca hnei Peteru lo angeic e Suria Anetioka? (Wange ju la pane iatr.)
15 Tha qea ju kö thupene la icasikeu e Ierusalema, nge Peteru a wang la ekalesia ne Suria Anetioka. Matre, hnei angeic hna nue la traeme angeic kowe la itre keresiano itretre ethen. Easa mekune la madrine i angatr troa drei Peteru e ithawakeune la hnei angeic hna atre, memine la hnei angeic hna melën. Ngo, ame hë la Peteru a hmaca hna xen me angatr, angatr a sesëkötr, me hace. Hnei Peteru fe hna ukune la itre xa keresiano itretre Iudra, Banaba la ketre, troa hane ujë tui angeic. Pine nemene matre ujë jë Peteru tune lai, ngo ketre qatre thup pe ka macaj? Nge, nemene la ini hne së hna xome qa ngöne la aqane ujë i Peteru? Tro la ini hne së hna troa xome a xatua së e akötrë së jë hnene la itre ithanata, maine itre huliwa ne la ketre qatre thup.
Nemene la aqane ujë ne la itre keresiano itretre ethen la kola akötrë angatr hnei Peteru?
16. Hna ameköti Peteru tune kaa, nge nemene la itre hnying hna amejën?
16 E jë la Galatia 2:11-14. Hna traqa koi Peteru la xoue atr. (Ite Edomë 29:25) Atre hnyawa hi Peteru la mekuna i Iehova göne la itre ethen. Ngo, angeic a xouene e tro la itre keresiano itretre Iudra ka traqa qa Ierusalema a wang angazo angeic pine ce tro memine la itre keresiano itretre ethen. Hnei Paulo hna jelë Peteru ka hape, ka lue ialamek angeic, nge ka mele hnihni. Angeic a qaja tune ke, drenge hë angeic laka, Peteru hi lo ka isigöline la itretre ethen ngöne la ijine icasikeu e Ierusalema lo macatre 49. (Ite Huliwa 15:12; Galatia 2:13) Nemene la aqane ujë ne la itre keresiano itretre ethen la kola akötrë angatr hnei Peteru? Hnei angatre kö hna thixötr? Hna xome kö qaathei Peteru la itre hnëqa i angeic pine la tria i angeic?
NUE PI LA NGAZO I KETRE
17. Nemene la thangane koi Peteru la hna nue la ngazo i angeic hnei Iehova?
17 Ka ipië Peteru, matre hnei angeic hna kapa la kola ameköti angeic hnei Paulo. Tha hna qaja kö hnei Tusi Hmitrötr ka hape, hna xom qaathei Peteru la itre hnëqa i angeic. Hnei angeic hna cinyihane e thupen la lue tusi laka, itre igötranene pë hë la Tusi Hmitrötr. Ame ngöne la hnaaluene tusi angeic, angeic a qeje Paulo ka hape, “tejine me eëshë hnimina.” (2 Peteru 3:15) Eje hi laka, hace pi hë kowe la itre keresiano ne ethen la hna tria hnei Peteru. Ngo, hnei Iesu, tane la ekalesia hna thue huliwa i angeice pala hi. (Efeso 1:22) Ijine hi lai tro la itre trejin ne la ekalesia a nyitipu Iesu, memine la Keme i nyidrë, ene la troa nue la ngazo i Peteru. Eloine pe, pëkö trejin ka thixötr hnene lai.
18. Eue la itre ijine tro sa xötrethenge la thiina ka meköti Iehova?
18 Pëkö qatre thup ka pexej ngöne la itre ekalesia ekö, nge ketre pëkö ngöne la itre ekalesia enehila. Öni Tusi Hmitrötr: “Menu hë shë asë ngone la ite ewekë ka nyimute.” (Iakobo 3:2) Ka hmaloi hi troa kapa lai, ngo tune kaa e akötrë së jë hnene la hna tria koi së hnei ketre? Tro kö sa xötrethenge la thiina ka meköti Iehova? Tune kaa e qaja jë hnene la qatre thup koi epuni la ketre mekune ka nango mama ka hape, ka ië hna hnim? Tro kö epuni a thixötr e qaja menune jë hnene la qatre thup la ketre ewekë ka akötrë epun? Tha loi kö e troa canga mekune ka hape, tha tro fe kö a hane qatre thup lai trejine cili. Ngo, loi e tro pe a xomihni me treqene hnyawane tro Iesu, tane la ekalesia a amekötine lai. The wangatrune catrëne kö la tria i angeic, ngo mekune ju pe la itre macatre ka nyimutre ne huliwa nyipici angeic koi Iehova. Nge, e tria jë ketre koi epun, nge kolo pala hi a qatre thup, nge hetre itre xa hnëqa hmaca kö hna kapa, loi e tro epuni a madrine koi angeic. E saqe hi epuni nue la ngazo i angeic, epuni hi lai a xötrethenge la thiina ka meköti Iehova.—E jë la Mataio 6:14, 15.
19. Nemene la nyine tro sa kuca?
19 Pine laka easa hnine la meköt, haawe, easa lapa treqene la drai ne tro Iehova a apatrene trij la nöjei thiina ka tha meköti kö ka xulu qaathei Satana, memine la fene i angeic. (Isaia 65:17) E hetre ewekë ka tha meköti kö hna kuca koi së, loi e tro sa ipië, me kapa laka, thatre pengöne asë kö së la itre götranen lai jol. Nge, nue hnyawane pi la ngazo ne la itre ka tria koi epun. Maine celë hi hnei epuni hna kuca, epuni hi lai a xötrethenge la thiina ka meköti Iehova.