Itre Föe Fe—metrötrëne Ju La Itre Fö I Nyipunie
Ita Ne Thup göi 1 EIPEREM
Nyima 14 me 23 Qene Drehu
Itre Föe Fe—metrötrëne Ju La Itre Fö I Nyipunie
“Ange fö’, denge thenge ju nyipunie la ite fö’ i nyipunie.”—EFESO 5:22.
1. Pine nemene matre thaa hmaloe kö troa metrötrëne la trahmanyi ngacama tro loi ekö ngöne la qaan la pane faipoipo?
NGÖNE la itre nöje ka nyimutre, ame la kola ikötresae hnene la lue trefën, tre, kola sisinyi hnene la föe kowe la trahmanyi laka tro nyiidro a “metrötrë” nyidrë. Ngo, thenge la aqane ujë ne la itre trahmanyi kowe la itre föe i angatr, tro ha hmaloi maine jole pena troa aeatrëne la hna isisinyikeu cili. Mingöminge pi hë ekö la qaane la faipoipo, ngacama sesei (nunue) me utretre trootro hë la itre otren ‘ej enehila. Hnei Akötresieti hna xome la ketre june wengesisila i Adamu, pane trahmany, me xupe la föe. Nge öni Adamu ka hape: “Dei lola june sine la ite juneng, me ijöne sine la ijöng.”—Genese 2:19-23.
2. Nemene la ka saze trootro thene la itre föe memine la aqane goeëne i angatre la faipoipo ngöne la itre hnedrai së?
2 Ngacama tro loi ej ekö ngöne la xötrei, ngo ame lo macatre 1960 e Amerika (U.S.A), hna xötrei acile la caa gurup nge hna hën ka hape, “Trongene sei itre föe—ketre hna mejiune catre kow hnene la itre föe matre sei angatr qa hnine la musi ne la trahmany. Ngo ame petre kö ngöne la ijine cili, tre, e 300 lao trahmanyi ka itrotrij, tre, caa föe ka tro tun. Ame la kola nyipune lo macatre 1960, hna e pe hi la 100 lao trahmany ka itrotrij koi caa föe. Ame enehila, ceitune hë la itre föe me itre trahmany, ceitune hë la aqane qeje ka sis, me iji ka haitr, me ufi sixa me kuca fe la itre thiina ka sis. Ngo hapeu, hetre loi kö hnei angatr hna kapa qa ngöne a aqane ujë ka tune lai? Ohea! Ame ngöne itre xaa nöj, traqa koi caa sei hna cil e lue faipoipo. Haawe, ngöne laka hnei itre föe hna thele jëne troa ahmadradran la aqane lapa trefëne i angatr; hapeu, hmaloi hë maine hna ahacene hmaca pena ha la aqane lapa trefëne i angatr?—2 Timoteo 3:1-5.
3. Nemene la jëne ngazo ka amenune la faipoipo?
3 Nemene la jëne ngazo? Maine tro sa atrehmekune hnyawan, ame la jëne ngazo, tre, ka qaane hë ekö ngöne lo kola iaö Eva hnene la angela ka thaa idrei, “celë hi une ekö, ëjene Diabolo nge Satana.” (Hna Amaman 12:9; 1 Timoteo 2:13, 14) Hnei Satana hna haöthe hnene la itre ithuemacanyi ka thoi, jëne zonal, ipoos, me televizio (itre jiane huliwa i angeic) matre jelengazone la itre ini qaathei Akötresie, nge matre thaa nyipi ewekë hë itre ej ngöne la hnedrai së. Easa öhne la ngöne la faipoipo, ngöne laka, hnei Satana hna ujën matre tro la faipoipo a tune la ketre ewekë ka öj la mele ne la atr, me ketre ehnef nge ka iakötrë. Ame la angeic a haöthe hnene la itre ithuemacanyi ka thoi jëne la zonal, me radio me televizio me itre xane ju kö e celë fen, itre ewekë hnei angeice hna musinën, tre, nyine tro lai a jelengazone la itre ini qaathei Akötresie, nge thaa ihmeku hmaca kö memine la itre hnedrai së. (2 Korinito 4:3, 4) Ngo ame pe la easa trotrohnine hnyawane la hnei Iehova hna qaja göne la hnëqa ne la föe hnine la faipoipo, canga mama hi koi së la einamacanen me thangane ka loi, e troa melëne ej.
Ithuemacanyi kowe la itre ka faipoipo
4, 5. (a) Pine nemene matre nyipi ewekë tro la föe a pane wange hnyawa la pengöne la faipoipo? (b) Nemene la nyine tro angeic a kuca qëmekene troa hmalahnine la ikötresae?
4 Tusi Hmitrötr a hamë së la trenge ewekë ne ithuemacany. Ej a qaja ka hape, ame ngöne la fene celë hna musinëne hnei Satana, tro ha “hete aköte” uti fe hë kowe lo itre trefën ka catre ce mele madrin. Hna acile hnei Akötresie la faipoipo, celë hi matre Tusi Hmitrötr a canga hamë ithuemacanyi kowe la itre hna troa iothekeun hnene la faipoipo. Hna qaja hnene la ketre atre cinyihane la Tusi Hmitrötr göne la ketre sine föe, laka ijiji nyiidro troa ikötresae hmaca: “Ngo sisitia la manathithi nyido e lapa a sine föe pala kö.” Hnei Iesu fe hna ithuecatre kowe la itre ka “ateine troa kapa lai,” troa lapa sine föe ju hi. Ngo maine ketre a iëne troa ikötresae, ijije tro angeic a kuca “ngo göi Joxu hmekuje hi,” kola hape, troa iothekeu angeic hnine la faipoipo me ketre hlue ka nue apexejenyi angeice kö nge atre i Akötresie hna bapataisonë hë.—1 Korinito 7:28, 36-40; Mataio 19:10-12.
5 Ame la kepin matre tro la föe a wange hnyawa la trahmanyi hnei angeic hna troa faipoipo memin tre, eje ngöne la ithuemacanyi celë hnine la Tusi Hmitrötr: “Ke ame la föe tene fö, hna othe hnene la wathebo kowe la fö’ i nyido.” ‘Troa shenge la föe qa ngöne la wathebone la trahmany’ e meci hë nyidë, maine eahlo pena a troa sei hna cil pine laka hna nyixetë hnei trahmany. (Roma 7:2, 3) Maine jë troa thele hnene la itre xan la emingömingöne la ngönetrei, ngo thaa celë kö la ka tro lai a nyi trepene la faipoipo matre troa cile huti la madrinene la lue trefën. Haawe, nyipi ewekë tro la jajinyi a pane hnying, ka hape, ‘Hapeu, kapa kö ni la hna amekötin ene la troa lapa fene la musi ne la trahmany?’ Celë hi mekune lai nyine troa trotrohnine hnyawa qëmekene troa faipoipo, ngo thaa e thupene kö.
6. Nemene la mekune ka tru nyine axeciën enehila hnene la itre föe, nge hna uëne matre nyipi ewekë catr?
6 Ame ngöne itre xaa götran enehila, ijije tro la föe a hmalan maine xelene la sipo faipoipo ne la trahmany. Ngo troa jole catr koi angeic troa axecië mekun, qa ngöne laka, catre thei angeice la aja ne troa ce meköle trefën memine la ajane troa melëne la ihnimi trefën, ene lo lue ewekë hna aijijën hnene la faipoipo. Önine la ketre trahmanyi: “Ame la faipoipo, ceitune me ketre wetr ka tru hne së hna pi elën. E catrë hë la aja së, tre, easë fe hë a wangesixane la itre engazon, nge easë pë hë a pi hnangenyë kowe pe hi la itre hne së hna pi dreng.” Hna mecin la troa eli wetr e thaa hna hmekëne kö la itre ethanyin; ketre ceitune hnyawa hi memine la tro sa sesë menu hnine la faipoipo nge thaa hna thele ewekë hnyawa kö.
7. Nemene eamo ka inamacan hna hamën qëmekene troa thele hna troa ce faipoipo memin?
7 Tro la föe a atrehmekune hnyawa la aliene la hna hape troa mele fene la musi ne la trahmanyi ka sipo faipoipo me angeic. Itre macatre hë enehila, hnene la ketre jajinyi qaa Ëëd hna qaja amamane ka hape: “Eloine pe itre ka macaje hë la itre keme me thine së, nge inamacane kö angatre hu së matre thatreine kö troa canga amenu angatr.” Sisitria catre la ixatua hna hamëne hnene la itre keme me thine me itre xane ju kö. Hna ithuecatrene la itre thöth troa atrepengöne la itre keme me thinene la ka troa föi angatr elany me aqane imelekeu i angatr me itre lapa i angatr.
Tune kaa la aqane amamane Iesu la idrengethenge
8, 9. (a) Nemene la aliene la drengethenge Iesu koi Akötresie? (b) Nemene la thangane ka loi hna kapa qa ngöne la hna drengethenge?
8 Ngacama thaa ka hmaloi kö troa metrötr, nyipi ewekë tro la itre föe a kapa ej, ke celë hi ketre hnëqa ka tru, tune la aqane amamane Iesu. Ngacama ame la nyidrëti a drengethenge Akötresie, tre, hna nyi sinatrongene hnei akötr me meci hune la sinöe, ngo manathithi pe la pun kowe la hna drengethenge Akötresie. (Luka 22:41-44; Heberu 5:7, 8; 12:3) Ijije fe tro la itre föe a xötrethenge la tulu i Iesu, ke hna qaja hnei Tusi Hmitrötre ka hape: “Keriso la he ne la nöjei trahmany nge trahmanyi la he i fö ; nge Akötesieti la he i Keriso.” (1 Korinito 11:8-10) Ngo thaa kolo hmekuje kö a lapa hnene la itre föe fene la musi ne la itre trahmany, ngöne la angatr a faipoipo.
9 Kola qeje pengöne hnei Tusi Hmitrötr laka, tro la itre föe ka ikötresae hë maine jajinyi petre kö, a drenge thenge la musi ne la itre trahmanyi ka macaje ngöne la ua, ene lo itre qatre thup hnine la ekalesia i Keresiano. (1 Timoteo 2:12, 13; Heberu 13:17) Maine kola xötrethenge la musi Akötresie tune lai hnene la itre föe, angatr a amamai tulu kowe la itre angela ngöne la hna amekötine hnine la organizasio i Akötresie. (1 Korinito 11:8-10) Ketre, tro fe la itre qatre föe a inine la itre föe ka xötrei faipoipo, troa “denge thenge la ite föi angat,” jëne la tulu me itre ixatua.—Tito 2:3-5.
10. Hnei Iesu hna amamane tune kaa la tulu ne drengethenge?
10 Hnei Iesu hna öhne la etrune la troa drenge thenge ngöne la ijine ka ijij. Ngöne la ketre ijin, hnei nyidrëti hna upi Peteru troa nyi thupene la hotre i nyidro kowe la itretre mus, nyidrëti pë hë lo a nyithupene pi la hotre i nyidro. Hna cinyihane pë hë thupene hnei Peteru ka hape: “Qa ngöne lai drenge thenge ju hnei nyipunie göi Joxu la nöjei watheboi ate asë.” (1 Peteru 2:13; Mataio 17:24-27) Ame göne la tulu ne idrengethenge ka mama catre hna amamane hnei Iesu tre, easa e ka hape: “Hnei nyidëti hna aipië nyidëti kö, me xome la pengöi hlu, nge hna longëtine mate ate. Nge mama ha laka pengöne atë hë nyidë, ame hnei nyidëti hna aipië nyidëti kö, me denge thenge uti hë la mec.”—Filipi 2:5-8.
11. Pine nemene matre Peteru a hamë ithuecatr kowe la itre föe matre tro angatr a drenge thenge la itre trahmanyi nyudreni ngacama itre ka thaa hmi kö?
11 Ame ngöne la ithuecatre i Peteru kowe la itre keresiano troa drenge thenge, ngacama kola akötrë angatre hnene la itretre musi ka thaa meköti kö ne la fen, öni nyidrë: “Ke hna hë nyipunie kowe lai ; ke hnei Keriso hna xomi aköte thatraqai nyipunie ; mate tro nyipunie a xöte thenge la ite thupaca i nyidrë.” (1 Peteru 2:21) Thupene la hna qeje pengöne la aqane akötre hnei Iesu me aqane xomihnine thaupune nyidrë la itre akötre cili, Peteru a hamë ithuecatre ju kowe la itre föe, lo thaa hna ce hmi kö memin hnei itre föi angatr, ka hape: “Loi e tune fe nyipunie ite fö, denge thenge ju la ite fö’ i nyipunie ; thatraqan e hetete tha denge thenge la wesi ula, mate ahmalanyi angate hnene la thina ne la ite ifënekö i angat, ngo tha hnei wesi ula ; e goeëne hnei angate la thina i nyipunie a pë ethan, nge kola qou.”—1 Peteru 3:1, 2.
12. Nemene la itre manathithi hne së hna kapa e tro sa xötrethenge la tulu i Iesu?
12 Hna xome ceitune me hnyima fë la atr ka drengethenge, kösë ketre atr ka kucakuca me pujehnin. Ngo, thaa celë kö la aqane waiewekë i Iesu. Hnei Peteru hna cinyihane ka hape: “Lo hna qaqan, ngo tha hane pena kö qaqa ; hnei nyidëti hna aköt, ngo tha hna ikuiajojo pe kö.” (1 Peteru 2:23) Ame koi itre xaa atr ekö ka hane öhne la kola akötrë Iesu, tre, hnei angatre fe hna kapa la nyipici thupene lai, tune lo atrekënö hna ce athipe me Iesu, memine fe lo keneturio, atrekë huliwane lo troa athipi Iesu hune la sinöe. (Mataio 27:38-44, 54; Mareko 15:39; Luka 23:39-43) Ketre tune mina fe, Peteru a amamane laka, hetrenyi la itre trahmanyi ka thaa lapaune kö, memine fe lo itre xan ka iakötrë, atreine hi tro angatr a hane keresiano thupene la hna goeëne la aqane idrei ne la itre föi angatr. Easë fe a jele nyipicine lai ngöne la itre hnedrai së enehila.
Aqane Tro La Itre Föe a Ahmalahnine La Itre Trahmanyi Angatr
13, 14. Nemene la itre manathith hna kapa e troa drenge thenge la föe hmunë ka thaa hmi kö?
13 Ame la itre föe ka hane fe hë kapa la nyipici, tre hnei angatre hna ahmalahnine la itre trahmanyi angatre jëne la aqane ujë i angatr thenge la tulu Iesu. Ame ngöne lo ijine kovasio ne distrik ne la Itretre Anyipicin, hnene la ketre trahmanyi hna qaja göne la ifëneköi angeice keresiano ka hape: “Atre hmekune hi ni laka thaa meköti kö la aqane ujëng kowe la ifëneköng. Ngo hnei nyiidro pala hi hna metrötrë ni. Thaa hane fe kö nyiidro wajahuji ni me tupathe troa huli ni pena kowe la itre hnei nyiidro hna lapaune kow. Nyiidro pe a nyihnyawa ni cememine la ihnim. E maine nyiidro a tro kowe la ketre asabele, nyiidro a catre troa pane canga hnëkëne la nyine tro ni a xen me kuca la itre huliwa ne hnalapa. Hnene hi lai aqane ujë i nyiidro cili hna aciane theng la aja troa inine la Tusi Hmitrötr. Enehila, ketre Atre Anyipici Iehova fe hë ni!” Eje hi, ase hnyawa ha, “ahmalanyi angeic hnene la thiina ne la ifënekö i angeic, ngo tha hnei wesi ula”.
14 Tune la hna amamamane hnyawane hnei Peteru, thaa hnene kö la hna qaja hnei föe, ngo hnene pe la hna kuca hnei nyiidro matre traqa pi kowe la pune ka loi. Celë hi la hna melëne hnene la ketre föe ka inine la trenge nyipici qa hnine la Tusi hmitrötr nge nyipiewekëne catre eahlo la itre icasikeu. Hna wesitrën me catrë Anyes hnene la föi angeic me qaja ka hape: “E sasaithë hë eö la qene qëhnelö celë; the mekune kö eö troa bëeke hmaca!” Tha hnei Anyes kö hna lö pi qa ngöne la qëhnelö cili hna köjan, ngo eahlo a lö pi qa ngöne la ketre qëhnelö kö. Ame hmaca la ketre jidri ne icasikeu, nyidrëti a axounyi eahlo ka hape: “Traqa eö e draehe nge paatre hë ni.” Thupene jë hi lai, paatre pi hi nyidrëti lai a köni drai. Ame la nyidrëti a bëeke hmaca, öni Anyes e hnyingëne amenyikëne ka hape: “Mecijiine kö nyipë matre tro ni a canga kuci a i nyipë?” Tha hna athixötrë Anyesi kö hnene la itre pengöne la föi eahlo, ngo hnei eahlo pala hi hna atrunyi Iehova hnene la aqane ujë i eahlo. Thupene lai, kolo ha kapa hnei föi eahlo troa ini Tusi hmitrötr, me nue la mele i nyidrëti koi Akötresie, nge ketre qatre thupe fe hë nyidrë me huliwane la itre hnëqa ka nyimutre.
15. Nemene “ipië” hna thele thene la itre keresiano föe?
15 Hnei Peteru aposetolo hna ahnithe la ketre ewekë hna trongëne hë hnene la itre föe hna qaja e caha hun, ene la troa “ipië”, ngo thaa ene kö la troa thaipi ngönetrei ngöne la “kola ele hnaihe” maine “xetëne la ite ixet.” Peteru pe a qaja: “Ngo loi pe troa amingömingöne la ate ka sihngödi e kuhu hni, ene la ixete ka tha hnyeqete kö, ene la hni ka menyike me thili mek, celë hi nyipi ewekë atraqate xajawa i Akötesie.” Kola mama la thiina cili, jëne la hnenyinawa ka menyike me lolo la aqane ujë; thaa hnei catre që kö me thele iwesitrë. Celë hi aqane tro la föe keresiano a pane amamane la nyipi aqane troa metrötrëne la trahmany.—1 Peteru 3:3-5.
Itre Tulu Nyine Troa Xötrethenge
16. Nemene la tulu ka lolo hna amamane pe hnei Sara kowe la itre föe keresiano?
16 Hna cinyihane hnei Peteru ka hape: “Ke hna tune lai hnei nöjei föe hmitöte ekö, angete lapaune koi Akötesie, hna amingömingö angate kö, kola denge thenge la itre fö’ i angat.” Atrehmekune hi angatre ekö laka, e tro angatr a amadri Iehova jëne la hna drenge thenge la itre eamo i Nyidrë, haawe, ame la pun tre kola ce mele madrine la fami; memine lo manathith, ene la mele ka thaa ase palua kö. Peteru a qeje Sara, lo föe ka mingöminge i Aberahama, me hape, hnei eahlo “hna denge thenge Aberahama, kola hë nyidë ‘joxu.’ ” Hnei Sarah hna xomexatuane la föi eahlo atre qoue Akötesie, lo hna upe hnei Akötesie troa nyi hlue ngöne la nöje gaa nany. Hnei eahlo hna nuetrije la aqane mele ka pipixenyë kowe la mele ka nyimu ethanyin. (Genese 12:1, 10-13) Peteru a qaja aloinyi Sara pine la tulu ne idrengethenge. Öni Peteru: “Nge nyipunie la ite nekö i nyido e nyipunie a kuca la loi, me tha qouene kö la nyine qouen.”—1 Peteru 3:6.
17. Hna uën matre meku Abigaila jë hnei Peteru la nyidrë a qaja la ketre tulu kowe la itre föe Keresiano?
17 Abigaila la ketre föe ekö ka hetre mejiune koi Akötresie nge föe ka thaa qou kö, matre thaa hna thëthëhmi eahlo kö hnei Peteru lo nyidrëti a hape, eahlo la ketre “föe ka nyipi inamacane,” ngo ame Nabala föi eahlo, tre “ka wathöthöle . . . me ngazo thina.” Hna xele hnei Nabala ma hamë ixatua, ene pe hna mekune hnei Davita me itre atre i nyidrë troa apaatrenyi Nabala me lapa i angeic. Ngo hnene la hna ujë maca hnei Abigaila matre mele pi la lapa i nyiidro. Hnei eahlo hna sadrelëne me ati xenine la itre asina me itronyi me Davita me itre soocei nyidrë ngöne la gojeny. Canga öhnyi Davita petre kö hnei eahlo matre canga uti qa hune la asina me keiqe ipië me xëwe angatr matre thaa tro kö nyidrëti a thixötr. Ketri Davita catr ke öni nyidrë: “Ole koi Iehova Akötesi angete Isaraela, ate upi ’ö troa ixelë me ini ngöne la drai celë!” nge, “ole la hna eamo hnei ’ö.”—1 Samuela 25:2-33.
18. Maine sipo iatre hnei ketre trahmanyi kö, nemene tulu tro la itre föe a xom, nge pine nemen?
18 Hanawange la ketre tulu ka lolo kowe la itre föe, ene la jajinyi ne Sulami lo ka mele nyipici, me lapa treqene hnyawane la atre thupë mamoe lo hnei angeic hna troa faipoipo memin. Catre la otrene la ihnimi angeic kowe la atre thupë mamoe, ngacama catre la hna sipo ihanyi me angeice hnene la ketre joxu trene mani. Hnei angeic hna fe amamane la ihnimi angeic kowe la ate thupë mamoe ka thöth, kola hape: “Ami ni jë e kuhu hni nyipë tune la hna pele haten, tune la hna pele hatene ngöne la ime i nyipë ; ke cate la ihnimi tune la mec . . . Tha ’teine kö la timi atraqate troa apine la ihnim, nge tha ‘teine kö la hneopegejë troa alön’ej.” (Nyima i Solomona 8:6, 7) Epi ketre nyipi xecie hnyawa fe kowe la itre föe hna troa ikötresaeën troa mele nyipici kowe la itre trahmanyi angatr me metrötrë angatr.
Xaa ihaji qa koho
19, 20. (a) Nemene la kepin ka troa upe la itre föe troa drenge thenge la itre föi angatr? (b) Nemene tulu ka lolo hna hamëne kowe la itre föe?
19 Qëmekene tro sa umuth, tro sa pane ce wange la hna ithanatan qëmeken me thupene la xötr ka nyi taan la topike së, hna hape: “Ange fö’, denge thenge ju nyipunie la ite fö’i nyipunie.” (Efeso 5:22) Pine nemene matre nyipi ewekë la drenge thenge? Önine la xötre thupen e sisedrën ka hape: “Ke he i föe la trahmany, tui Keriso he ne la ekalesia.” Haawe, kola ithuecatre kowe la itre föe, ka hape: “Qa ngöne lai ame la aqane denge thenge Keriso hnene la ekalesia, loi e tune la ite föe kowe la ite fö’ i angate ngöne la nöjei ewekë asëjëihë.”—Efeso 5:23, 24, 33.
20 E troa atreine drengethenge la wathebo celë, nyipi ewekë tro la itre föe a pane inine me xötre thenge la tulu ne la itretre drenge hna iëne ne la ekalesia i Keriso. Pane ce e jë së la 2 Korinito 11:23-28, matre tro sa atre la aqane thue la itre akötr ka nyimutre hnene la ketre atrene la ekalesia, ene Paulo aposetolo, pine la hna nyipici kowe le He i angeic, Iesu Keriso. Tui Paulo, nyipi ewekë koi itre föe me kowe fe la lapa ne la ekalesia troa mele nyipici me drenge thenge Iesu ngacama atraqatre me nyimutre ju hë la itre jol ka fetra itrai pine la drenge thenge i angatr.
21. Nemene la ka troa upe la itre föe matre troa lapa drenge thenge pala hi la itre föi angatr?
21 Maine nyimutre la itre föe enehila ka wai engazone la hna amekötine troa drenge thenge la itre trahmany, ame la föe ka inamacan, canga saqe hi angeic goeëne la itre thangan ka loi qa ngön ej. Hane la ketre ceitun: Maine troa catre drengethenge la föe hmunë ka thaa hmi kö ngöne la nöjei götrane ka ihmeku pala hi memine itre wathebo i Akötresie maine itre trepene meköti Nyidrëti pena, eje hi laka tro ha wawene ka loi, nge drei fe la thupene ka mingöming koi eahlo ke hna atreine matre “tro ha mele la trahmanyi hnei nyidro.” (1 Korinito 7:13, 16) Ketre, mele madrine angeic ke xecie hnyawa koi angeic ka hape, Iehova a kepe angeic me amanathithi angeic pine la hna nyi tupun la tulu ne la Neköne Hnimina i Nyidrë.
Tha thëthëhmine kö nyipunie?
• Pine nemen matre hace kowe la föe troa drenge thenge la föi angeic?
• Pine nemene matre tha tro kö a wanga ahmalohmaloeëne la troa kapa la hna sipo faipoipo?
• Nemene la aqane amamai tulu hnei Iesu kowe la itre föe nge, nemene la itre thangane ka loi hna kapa e troa nyi tupune la tulu i nyidrë?
[Thying]