Hna Kapa Hnyawa La Maca Hnene Lo Itre Atr Ka ‘Hni Ka Ajan’
Sabath drai 2 Maac
Nyima 4 me 23
Hna Kapa Hnyawa La Maca Hnene Lo Itre Atr Ka ‘Hni Ka Ajan’
“Nge hna lapaune hnei angate asë lo ‘[itre hni ka ajan, MN]” kowe la mele ka tha ase palua kö.’—ITE HULIWA 13:48.
1, 2. Nemene la aqane ujë ne la itre pane Keresiano kowe la hna perofetane hnei Iesu, laka troa cainöjëne la maca ka loi e cailo fen?
HNEI Iesu hna thingehnaean ka hape, tro ha cainöjëne la maca ka loi e cailo fen asë. Kola mama hnyawa e hnine la tusi Ite Huliwa, la thangane lai hna thingehnaean thene la itre pane Keresiano ekö. (Mat. 24:14) Hnene la itretre catre cainöj hna amamane la gojenyi kowe la itre ka ajane troa nyitipu angatr. Ame la thangane la hna catre cainöje hnene la itretre drei Iesu e Ierusalema, tre, itre thauzane lao atr, “nge kösaue la nöjei ate huj,” ka hane caasi memine la ekalesia ne lo hneijine i Iesu.—Ite Huliwa 2:41; 4:4; 6:7.
2 Ame lo itre pane mesinare ekö ngöne lo hneijine i Iesu, tre, hnei angatre hna xatuane la ka ala nyim troa kapa la nyipici. Ame la ketre, tre, Filipo la ëjen, qai angeice Samaria, nge e cili, ala nyimu la ka drenge la itre trenge ewekë i angeic. (Ite Huliwa 8:5-8) Hnei Paulo me itre sinetronge i angeice ka nyimutre hna tro fë la maca ne keresiano ngöne la itre traon e Kupero, me itre götran ne Asia, me Makedonia, me Heleni, me Italia. Nyimutre la angetre Iudra, me angetre Heleni ka kapa la nyipici matre itre Keresiano fe hë angatr ngöne la itre traone cili hna cainöje ngön. (Ite Huliwa 14:1; 16:5; 17:4) Nge ame Tito, hnei angeic hna cainöje e Kerete. (Tito 1:5) Nge ame göi Peteru, tre, tru catre la huliwa i nyidrëti e Babulona, nge ame ngöne la ijine nyidrëti a cinyihane la pane tusi nyidrë, lo macatre 62-64 M.K., tre, kola hlemu la huliwa ne cainöje ne la itre Keresiano e Ponoto, me Galatia, me Kapadokia, me Asia, me Bitunia. (1 Pet. 1:1; 5:13) Hneijine ka lolo catre lo hneijine i Iesu Keriso, hnene laka hna catre cainöj hnene la itre Keresiano, ene pe kola mekune hnene lo itre ithupëjia me angatr, ka hape, angatr a “agomegomëne la fene hnengödrai.”—Ite Huliwa 17:6; 28:22.
3. Nemene la thangane la hna huliwa hnene la itretre cainöjëne la Baselaia, nge qa ngöne lai nemene la hnei epuni hna mekun?
3 Ketre tune mina fe ngöne la hneijine së, kola kökötre catre la ekalesia i Keresiano. Hapeu, ketre ithuecatre ka tru kö la epuni a hane e la rapore ne la Itretre Anyipicine i Iehova ngöne la macatre, me öhne la itre wene ne la hna huliwa e cailo fen? Thaa ithuecatre kö lai koi nyipunie? Nge hapeu, madrine kö nyipunie la kola mama ngöne la macatre 2007, laka, sikisi milio nge sin la etrune la itre ka inine la Tusi Hmitrötr? Ketre, kola mama ngöne la itre ka sine la Drai Ne Amekunën la meci Iesu Keriso lo macatre hnapan laka, traqa kowe la treen milio lao atr ka thaa hmi kö koi Iehova, nge ka hetre hni ka ajan troa hane sine la hna amekunëne cili ka sisitria. Kolo lai a amamane laka tru catre pala kö hnei huliwa nyine kuca.
4. Drei la itre ka kapa la maca ne Baselaia?
4 Ame enehila, tune mina fe lo hneijine Iesu, kola kapa la nyipici “hnei angate asë lo “[itre hni ka ajan, MN]” kowe la mele ka tha ase palua kö.” (Ite Huliwa 13:48) Iehova a ea koi Nyidrë la itre atr cili kowe la organizasio i Nyidrë. (E jë la Hagai 2:7.) Maine easa ajane troa ce xome pala hi la huliwa ne iacasinekeune la itre atr, nemene la aqane tro sa goeëne la huliwa ne cainöj ne la Keresiano?
Thaa Tro Kö a Iwangatrehmekunyi Atr Ngöne La Kola Cainöj
5. Nemene la nyine troa kuca matre kapa la ihnimi Iehova?
5 Ame lo itre pane Keresiano, tre, trotrohnine hnyawa ha angatre laka, “tha hnei Akötesieti hna iwangate hmekunyine ite ate, ngo hna kapa hnei nyidëti la ate qoue nyidë me kuca la thina ka meköt, ngöne la nöjei nöj’ asë.” (Ite Huliwa 10:34, 35) Maine kola ajane hnene la ketre atr troa lolo la aqane imelekeu i angeic me Iehova, nyipi ewekë tro angeic a lapaune kowe la mele hna huujëne hnei Iesu. (Ioane 3:16, 36) Nge aja i Iehova “tro la nöjei ate asëjëihë troa mele me wangate hmekune la nyipici”.—1 Tim. 2:3, 4.
6. Nemene la nyine troa thupëne hnene la itretre cainöjëne la Baselaia, nge pine nemen?
6 Loi e tro la atre cainöjëne la maca ka loi a thupëne matre thaa tro kö a mekuhnine la atr hna cainöje kow, pine la hane ngönetrei ne la atr, maine aqane mele i angeice pena, maine itre ewekë hna öhne thei angeic, maine hmi angeic, maine ketre ewekë pena ka aisapengönë angeic memine la atre cainöj. Pane mekune jë la: Hetre hni ne ole i nyipunieti kö kowe la ketre atr ka xötrei hane ce thawa me nyipunie la trenge nyipici qa hnine la Tusi Hmitrötr? Maine ka iwangatrehmekunyi atre ju angeic, thaa tro kö angeic a hane ithanata me epun. Hnauëne hö laka tro nyipunieti a hmaca troa cainöjëne la maca ne iamele kowe la itre atr ka troa dreng ej?—E jë la Mataio 7:12.
7. Pine nemene matre nyipi ewekë tro sa thupën matre thaa tro kö sa mekuhnine la itre atr hne së hna cainöje kow?
7 Hnei Iehova hna acili Iesu matre atre amekötin, qa ngöne lai, thaa ijiji së kö troa amekötine la ketre atr. Ketre ewekë ka loi lai, pine laka thaa ceitu së kö me Iesu, laka easa mekuhnine la atr “thenge la hna öhne hnei lue mek” maine “thenge la hna drenge hnei lue hnangenyë,” ngo ame Iesu, atre hnyawa hi nyidrë la itre mekun, me itre aja ne la hni ne la atr.—Is. 11:1-5; 2 Tim. 4:1.
8, 9. (a) Nemene la pengö i Paulo ekö qëmekene tro angeic a ketre Keresiano? (b) Nemene la ini hne së hna troa xom qa ngöne la hna melëne hnei Paulo aposetolo?
8 Nyimutre la itre atr ka xulu qa ngöne la nöjei götran, angatr a hane nyihlue i Iehova. Ame la ketre tulu ka ketre pengön, tre, Saulo atre Taraso, laka hna hë nyidrëti e thupen, ka hape, Paulo aposetolo. Saulo ekö la ketre Faresaio ka catre icilekeu memine la itre Keresiano. Nyidrëti a icilekeu me angatr, ke, xecie hnyawa e kuhu hni nyidrë laka, ka tria la ekalesia i Keresiano. (Gal. 1:13) Ame kowe la itre atr, thatreine jë kö tro Paulo a hane Keresiano elany. Ngo ame pe, hnei Iesu hna öhne e kuhu hni Saulo la ewekë ka loi, me ië nyidrë troa kuca la ketre hnëqa ka ketre pengön. Thupene jë hi lai, Saulo hë la ketre atrene la pane ekalesia i Keresiano ka catre ngöne la huliwa ne cainöj.
9 Nemene la ini hne së hna kapa qa ngöne la hna melëne hnei Paulo aposetolo? Ame ngöne la teritoare së, maine jë hetrenyi kö lo itre atr ka pi icilekeu memine la maca hne së hna tro fë. Ngacama kola mama laka, pë jë kö caasi e angatre ka troa hane ketre nyipi Keresiano elany, ngo thaa tro pi kö sa cile hnö troa ce thawa me angatre la itre mekune matre upi angatre troa ketre thele ewekë. Ame itre xaa ijin, ke, kolo hi lo itre atr laka, thaa hane kö së mekune ka hape tro angatr a hane drenge la maca. Ame la hnëqa së, tre, ene la troa catre cainöje kowe la nöjei atr asë, “nge tha mano kö.”—E jë la Ite Huliwa 5:42.
Troa Amanathithine La Itre Ka Cainöj, “Nge Tha Mano Kö”
10. Pine nemene matre thaa tro kö sa cile hnö troa cainöje kowe la itre atr, lo kösë hna xouen? Qaja jë la itre hna melëne ngöne la nöje së.
10 Ka iaö la itre ewekë ka mama koi lue meke i atr. Drei la ketre ceitun, hnei Ignacio a hna nyiqaane inine la Tusi Hmitrötr me Itretre Anyipicine i Iehova ngöne la angeice e hnine la kalabus, ngöne la götrane ailojë ne Amerika. Pine laka ka isi catre angeic, ame la itre hna akalabusine ka kuca la itre hnepe ewekë me salemën itre ej, tre, hnei angatre hna upi Ignacio troa wange lo itre trene gufa matre tro angatr a të itre ej. Ngo, qa ngöne laka, Ignacio a kökötre pala hi ngöne la götrane la ua me trongëne la hnei angeic hna inin, ene pe thaa pi isi hë angeic nge ketre atr ka menyike hë. Pëhë ka pi upi angeic troa wange trongëne lo itre trene gufa, ngo madrine catre pe Ignacio, ke, hnene la trenge nyipici qa hnine la Tusi Hmitrötr memine la uati hmitrötre i Akötresie hna saze la thiina i angeic. Ketre, hetre hni ne ole i angeice kowe la itre ka inine la Tusi Hmitrötr me angeic, ke, thaa hnei angatre kö hna iwangatrehmekunyi atr.
11. Pine nemene matre easa bëeke hmaca troa wange la itre atr?
11 Ame la ketre kepine matre easa catre wange hmaca la itre atr hne së hna cainöje kow, tre, hnene laka kola saze la aqane mele i angatr, memine la itre aqane waiewekë i angatr. Thupene lo hne së hna pane iöhny, hna tithe la itre xan hnei mec, maine luuzi hë la huliwa i angatr, maine pena meci hë la ketre atr hnei angatre hna hnim. (E jë la Ate Cainöj 9:11.) Tro fe a upe la itre atr troa ketre sipu thele la pengöne la itre drai elanyi hnene la hna goeëne la itre ewekë ka traqa e cailo fen. Qa ngöne lai, tro la itre ewekë celë ka traqa kowe la ketre atr ka thaa semesine së kö ekö, maine ka icilekeu pena, a ahmalane la hni angeic matre troa kapa la maca ka loi. Eje hi lai, thaa tro pi kö sa cile hnö troa ce thawa la maca ka loi memine la itre xaa atr ngöne la nöjei ijine ka ijij.
12. Tro sa goeëne tune kaa la itre atr hne së hna cainöje kow, nge pine nemen?
12 Ame la itre atr, tre, pengöi angatr troa imekuhni me iwangatrehmekunyi atr. Ngo ame Iehova, tre, Nyidrëti a goeë së isa ala caas nge öhne kö Nyidrëti la hne së hna atreine troa kuca. (E jë la 1 Samuela 16:7.) Nge, tro pala hi sa thele troa ujë tune lai. Nyimutre la itre hna melëne ngöne la nöj ka amamane la itre thangane ka loi hna kapa, qa ngöne la hna wanga aloine la nöjei atr asë hne së hna cainöje kow.
13, 14. (a) Pine nemene matre kola goeëne angazone hnene la ketre pionie la ketre föe hnei eahlo hna iöhnyi memine ngöne la hna cainöje trootro? (b) Nemene la ini hne së hna kapa qa ngöne la hna melëne celë?
13 Ame ngöne la ketre hnapet e Antilles, kola cainöje ngöne itre hnalapa trootro hnene la ketre trejine föe ka pionie lapa, Sandra la ëjen, nge öhne ju hi nyiidro la ketre föe, Rutha la ëjen. Ka catre eahlo sine la itre feet ne karnaval e nöjei macatre. Alua ië Rutha matre troa isola ne la karnaval ngöne la nöj. Qa ngöne laka kola ajane hnei Rutha troa atre la nyipici, ene pe kola isa pui ju hnei Sandra me angeic troa nyiqaane inine la Tusi Hmitrötr. Kola qaja hnei Sandra, ka hape: “Ame la eni a lö hnine la uma i eahlo, tre, eni a öhne la ketre foto i Rutha me ihnaheetr ne karnaval, memine fe la itre hatr hnei eahlo hna kapa qa ngöne la hnei eahlo hna hun. Hnenge hna mekune menune ekö laka, pë fe kö atr ka hlemu tui eahlo nge ka catre sine la itre ewekë hna majemine kuca göi karnaval, a troa hane hetre hni ne aja kowe la nyipici. Haawe, thaa tro ju hi ni troa wai eahlo hmaca.”
14 Thupene jë hi lai, kola fetra hnei Rutha ngöne la Uma Ne Baselaia, nge ame la kola ase la icasikeu, öni eahlo jë hi koi Sandra ka hape; “Pine nemene matre thaa traqa hmaca kö nyipo troa ini tus me eni?” Sandra a qeje menu jë koi eahlo me isapui troa sisedrën la ini tus. Hna canga kökötre hnei Rutha ngöne la götrane la ua, me xometrije lo itre foto ne karnaval, me catre kuca la nöjei huliwa ne la ekalesia, me nue la mele i eahlo koi Iehova. Hnei Sandra pë hë hna atrehmekune e thupen, laka thaa meköti kö la aqane waiewekë i nyiidro ngöne lo xötrei.
15, 16. (a) Nemene la thangane la hna cainöje hnene la ketre trejine kowe la ketre sinee i angeic? (b) Pine nemene matre thaa tro kö sa sixele troa cainöje kowe la ketre sinee së ka catre ngöne la hmi angeic?
15 Ketre, hetre thangane ka loi hna kapa hnene la itre ka cainöj kowe la itre sinee i angatr ka thaa ce hmi kö me angatr, nge kösë thaa mama kö ka hape, tro angatr a hane kapa la maca ka loi. Tro sa ce wange la hna melëne hnei Joyce. Hetre trejine föe me angeic ka catre hmi Katolik, nge hna iëne troa hane kapa la ketre ini ka ketre pengön e Roma. Ngo qëmekene tro la trejine me eahlo a tro, hnei Joyce hna amejëne la ketre hnyinge koi angeic ka troa saze hnyawa la aqane waiewekë angeic. Eahlo a hnyinge ka hape: “Nemene la hnei eö hna troa kuca e tro ni a amamane koi eö qa hnine la Tusi Hmitrötr, ka hape, thaa loi kö e troa xome la itre iatr nyine thili koi Akötresie?” Thupene jë hi lai, hnei eahlo hna e la foa lao xötre kowe la trejine me eahlo. Jëne hi la itre mekune celë, xecie hë kowe la trejine me eahlo laka, thaa nyipi hmi kö la hmi i angeic. (Deu. 7:25, 26; Sal. 115:4-8; Is. 45:20; 1 Ioane 5:21) Ketre, hnene la trejine föe me Joyce hna amamane la itre xötre cili kowe la nöjei föe ka nue la mele i angatre kowe la hmi katolik me kowe la itre hene ne hmi angatr, nge pëkö caasi e angatr ka atreine troa hamëne la ketre mekune ka sa la hnying, ene la kepine matre troa xome la itre iatr nyine thili koi Akötresie. Haawe, hnei angeic hna tro trije pi la hmi, me nyiqaane inine la Tusi Hmitrötr; thaa hmiitre ju kö nge bapataiso angeice jë fe hi, ene pe ketre Anyipicine i Iehova hë angeic enehila. Drei la madrine ka tru ka eje thei Joyce!
16 Maine jë epuni a nango cile hnö troa ithanatane la trenge nyipici qa hnine la Tusi Hmitrötr kowe la itre hnepe lapa i epun, pine laka angatr a catre ngöne la hmi angatr. Ngo, thaa hnei Joyce kö hna hmaca troa cainöje kowe la trejine me eahlo. Ketre, troa atre tune kaa la aliene hni ne la ketre atr? Maine jë angeice hi lai a thele la nyipi hmi cememine la hni ka menyik. Qa ngöne lai, the cile hnö kö troa amamane la nyipici kowe la itre atr ngöne la nöjei ijine ka ijij.—E jë la Ite Edomë 3:27.
Ketre Itus Nyine Xom Troa Ini Tusi Hmitrötr
17, 18. (a) Nemene la hna amamane hnene la itre rapore qaa cailo fen göne la enyipiewekëne la itus Ini Tusi Hmitrötr? (b) Nemene la itre hnei epuni hna melën ka lolo hnene la hna xome la itusi celë?
17 Kola mama ngöne la itre rapore ne la itre nöje e cailo fen laka, ame la itus Nemene La Nyipi Ini Hna Hamën Hnei Tusi Hmitrötr?, tre, ej a ahlëne la aja thene la itre atr ka hni ka menyik. Hnei Peni, ketre trejine föe ka pionie e Amerika, hna nyiqaane etid memine la itre atr jëne la itusi celë. Ame la lue xan, tre, lue atr ka huliwa catre ngöne la hmi i nyidro. Thaa nyipi mama kö koi Peni la aqane tro nyidroti elanyi a ujë kowe la itre ini ka nyipici qa hnine la Tusi Hmitrötre hna amamane hnine la itus Ini Tusi Hmitrötr. Ngo angeic a cinyihane, ka hape, “Pine laka ka nualai la itre mekune hna amaman hnin ej, nge hna eköthe wengëne hnyawa itre ej, nge thaa qea menu kö, haawe thaa jole kö koi nyidro troa kapa la hnei nyidroti hna inin, laka celë hi nyipici lai, nge pëkö mekune ka ajolë nyidro maine alueluë nyidro.”
18 Hnei Pat ketre trejine föe ne Agele hna nyiqaane inine la Tusi Hmitrötr memine la ketre föe ka kötr qaa Asia troa zae. Hnei eahlo hna tro qa ngöne la nöje i eahlo, ke, ase hë thapa la föi eahlo me itre nekö i eahlo trahmany hnene la itre sooc ka icilekeu, nge thaa iöhnyi pala kö angatr uti hë enehila. Kola thele pala hi troa humuthi eahlo, hna dreuthe la uma i eahlo, nge hna ce uti me angazo eahlo hnene la itre trahmany. Itre ewekë lai ka uku eahlo troa kötre qa ngöne la nöje i eahlo; nge pine la itre akötr hnei eahlo hna melën, pë hmaca kö aja i eahlo troa mel, caasi hi la ewekë hnei eahlo hna mekune lapaan, ene la troa hnöjua. Ngo hnene laka hnei eahlo hna inine la Tusi Hmitrötr, ene pe hetrenyi hmaca jë thei eahlo la mejiun. Pat a cinyihane ka hape: “Eahlo a haine la itus Ini Tusi Hmitrötr; ke thaa jole kö troa trotrohnine la aqane qejepengöne la itre mekun, memine la itre ceitun e hnine ej.” Celë hi matre, canga kökötre jë hi eahlo ngöne la götrane la ua uti hë la ijiji eahlo troa hane ketre atre cainöje nge thaa bapataisone petre kö, nge eahlo fe ha qaja la aja i eahlo troa bapataiso ngöne la asabele ka xulu. Drei la ketre madrine ka tru troa xatuane la itre atr ka hni ka menyik matre tro angatr a hane trotrohnine me wanga atrune la mejiune hna hamën koi angatre hnene la Tusi Hmitrötr!
“The Kucakuca Kö Shë Ngöne La Huliwa Ka Loi”
19. Pine nemene matre nyipi ewekë catre la huliwa ne cainöj?
19 Kola tro la itre drai, nge kolo pala hi a mama catre la enyipiewekëne la hnëqa së troa cainöj, me inine la itre atr. Itre thauzane lao atr ka kapa la maca hne së hna tro fë ngöne la nöjei macatre. Ngo “eashenyi hë la drai ka tru i Iehova,” kolo hi lai ka hape, ame la itre atr ka lapa kö ngöne la jidr ngöne la götrane la ua, tre, itre atr lai ka tro “ewë a troa humuth.”—Zef. 1:14; Ite edomë 24:11.
20. Nemene la nyine tro sa catre kuca, easë isa ala caas?
20 Ijine tro pala kö sa xatuane la itre atr cili. Ngo, maine easa ajane troa kuca lai, nyipi ewekë catr tro sa xome la tulu ne lo itre pane Keresiano, itre ka “tha mano kö angate o drai troa ini, me cainöjë Iesu Keriso.” (Ite Huliwa 5:42) Xötrethenge jë së la tulu i angatr, ene la troa cile catr kowe la itre itupath, me wanga atrune la “ini,” me cainöje kowe la nöjei atr, nge thaa tro kö a imekuhni me iwangatrehmekunyi atr! “The kucakuca kö shë ngöne la huliwa ka loi,” ke, maine tro sa cile catr, tro hë sa kapa la itre manathith ka nyimutre qaathei Akötresie.—2 Tim. 4:2; E jë la Galatia 6:9.
[Ithueamacany]
a Hna saze la ëje ne la itre xan.
Tro Epuni a Sa Tune Kaa
• Drei la itre atr ka kapa la maca ka loi?
• Pine nemene matre thaa tro kö sa mekuhnine la itre atr hne së hna cainöje kow?
• Nemene la itre thangane la hna xome la itus Ini Tusi Hmitrötr?
[Thying]