Loi E Tro Sa Nyipici Cememine La Hni Ka Pexej
Ita Ne Thup göi 12 Okotropa
Nyima 09 me 01 Qene Drehu
Loi E Tro Sa Nyipici Cememine La Hni Ka Pexej
“Tro ni a trongëne la nyipici ciIie; a ca pengönëne ju la hninge mate qouju ni ene la atesiwa i cilie.”—SALAMO 86:11.
1, 2. (a) Thenge la hna qaja ngöne Salamo 86:2, 11, nemene la ka troa xatua së troa mele nyipici koi Iehova, ngöne la easa qëmeke kowe la itre itupath maine ngöne la kola iaö së? (b) Eu la tro sa catre nyipici catre koi Iehova?
HETRENYI la itre xaa Keresiano ka mele nyipici ngöne la itre macatre ka nyimutre ngacama hna akalabusi angatr me icilekeu me angatr; ngo ame pë hë thupen, tre, angatre hë a kei hnene la aja mo maine kuci ngazo pena. Pine nemene lai? Ame la mekune ka sa la hnyinge celë, tre, kola qaja la hni së ngöne la götrane la ua, ene la pengö së e kuhu hni së. Ka ce tro la Salamo 86 memine la troa nyipici cememine la hni ka caas, kolo lai a qaja la ketre hni ka pexej, laka thaa hna thawaluëne kö. Celë hi matre kola thithi hnei Davita, atre cinyihane la Salamo, me qaja ka hape: “Thupëneju la ung, ke ini la hna hnim; Akötesingöti fe, amelene la hluewa i cilie, lo ate lapaune koi cilie.” Kolo mina fe a qaja hnei Davita, ka hape: “Iehova fe, ini ni jë la kala i cilie; tro ni a trongëne la nyipici cilie; a ca pengönëne ju la hninge mate qouju ni ene la atesiwa i cilie.”—Sal. 86:2, 11.
2 Maine thaa lapaune kö së koi Iehova cememine la hni ka pexej, haawe, tro hë la itre xaa huliwa me itre sinee së a ananazijëne la aqane nyipici së kowe la nyipi Akötresie. Ame la itre sipu aja së, tre, kösë itre dranemaitr hna kelem ngöne la gojenyi hne së hna trongën. Ngacama hne së hna catre mele nyipici koi Iehova ngöne la itre itupathi ka tru, ngo ijije tro sa kei ngöne la itre xaa theth, tune la aja mo me kuci ngazo. Drei enehila la enyipiewekëne la tro sa nyipici catre koi Iehova, qëmekene troa traqa elanyi koi së la itre itupath maine troa iaö së pena! Kola qaja hnei Tusi Hmitrötr, ka hape: “Nyipi thupëne hnyawa ju la hni ö.” (Ite edomë. 4:23) Hetrenyi la itre ini ka sisitria catr ngöne la götrane celë hne së hna troa xom, qa ngöne la hna melëne hnene la ketre perofeta ne Iudra, hna upe hnei Iehova koi Ieroboama Joxu ne Isaraela.
“Tro Ni a Thue Ewekë i ’ö”
3. Tune kaa la aqane ujë i Ieroboama kowe la perofeta i Akötesie ngöne lo angeic a tro fë la ketre maca ne iameköti?
3 Tro sa pane mekune la ketre ewekë ka traqa ekö. Kolo petre hi a ase qaja la ketre maca ka catrehnine catr hnene la atre i Akötresie koi Ieroboama Joxu; nyidrëti hi lo atre acile la hmi koi kau gool ngöne lo treene lao tribu ne la götrane ailopi ne la baselaia ne Isaraela. Ene pe elëhni jë hi la joxu. Ame hnei nyidrëti hna upe la itre atre i nyidrë troa xölehuje la atre tro fë la maca. Ngo ce Iehova memine la hlue i Nyidrë. Canga fitre ju hi la iwanakoime hna line hnene la joxu cememine la elëhni, nge ame lo ita ne huj hna xupe thatraqane la hmi ka thoi, tre, ej a kaqa luë. Ene pe saze pi hi la aqane ujë i Ieroboama. Nyidrëti a sipone ielene kowe la atre i Akötresie, me hape: “Epi xëwe koi Iehova Akötesi nyipë enehila, me sipo thatraqai ni mate loi hmaca la iwanakoimeng.” Ene pe kola thithi hnene la perofeta, nge canga loi hmaca ju hi la iwanakoime ne la joxu.—1 Ite jo. 13:1-6.
4. (a) Pine nemene matre, ame la ihë ne la joxu, tre, ketre itupathi lai kowe la aqane mele nyipici ne la perofeta koi Iehova? (b) Nemene la hna sa hnene la perofeta?
4 Thupene lai hnei Ieroboama hna qaja kowe la atre ne la nyipi Akötresie, ka hape: “Tro sho kowe la hnalapang, mate mano, nge tro ni a thue ewekë i ’ö.” (1 Ite jo. 13:7) Nemene jë la hna troa kuca enehila hnene la perofeta? Hapeu, tro jë kö la perofeta a kapa la kola ikepi hnene la joxu, thupene la hna qaja koi nyidrë la ketre maca ne hnëjin? (Sal. 119:113) Maine tro pena nyidrëti a thipetrije la kola könë nyidrë hnene la joxu, ngacama mama ju hë laka hna ietra hnei Ieroboama? Ame Ieroboama, tre, ka trene mani nyidrë nge ka hame catr. Maine hna nango eënyine ju pe hnene la perofeta i Akötresie la aja troa hetrenyi la itre ewekë ne ngönetrei, eje hi laka, tro ha tupathi nyidrë hnene la ihë ne la joxu. Ngo hnei Iehova hë hna ahnithe hnyawa kowe la perofeta, ka hape: “The tro kö eö a xeni areto me iji tim, nge the tro kö a trongëne hmaca lo jë i ’ö.” Celë hi matre kola sa hnene la perofeta, ka hape: “Maine tro nyipëti a hamë ni la hafe ne la uma i nyipë, tha tro kö ni a ce tro me nyipë, nge tha tro kö ni a xeni areto me iji tim’ e celë.” Ame hnene la perofeta hna tro pi qa Bethela ngöne la ketre gojenyi pena ha. (1 Ite jo. 13:8-10) Nemene la ini hne së hna xome qa ngöne la hna axecië mekune hnene la perofeta, göne la nyipici ka eje e kuhu hni?—Rom. 15:4.
“Mejihnineju”
5. Tune kaa la aqane tupathe la nyipici së hnene la aja mo?
5 Maine jë thaa mama kö, ka hape, ame la aja mo ne fen, tre, ketre itupath kowe la aqane tro sa nyipici koi Iehova, ngo celë fe ketre jole lai. Hapeu, easë kö a mejiune kowe la hna thingehnaeane hnei Iehova, laka, tro Nyidrëti a hamëne la itre ka nyipi ewekë kowe la mele së? (Mat. 6:33; Heb. 13:5) Ijiji së kö troa mejihnine la itre ewekë “ka lolo”, laka thaa ijiji së kö troa itön? (E jë la Filipi 4:11-13.) Hapeu, kolo kö a sewe së hnene la itre ewekë hne së hna pi hetrenyi enehila troa huliwa koi Akötresie? Hne së kö hna amë panëne la aqane huliwa nyipici së koi Iehova ngöne la mele së? Tro la aqane sa së la itre hnyinge celë a amamane, ka hape, pexeje maine thaa pexeje pena kö la hni së kowe la huliwa i Akötresie. Hna cinyihane hnei Paulo aposetolo, ka hape: “Ngo mo ka tru alamekene la thina ka ijiji Akötesie ce me mejihnin. Ke tha hne shë kö hna xome la fene la kete ewekë, nge tha ’teine kö shë troa xome kete ewekë qa ngön. Nge e hetenyi hë shë la xeni me ixete, ea mejihnineju hë lai.”—1 Tim. 6:6-8.
6. Nemene jë la itre “ewekë” hna troa hamë së, nge nemene la ka troa xatua së troa axecië mekun?
6 Drei la ketre ceitun, kola hamëne hnene la maseta së la ketre huliwa ka sisitria catre kö nge hna nyithupene hnyawa nge hetrenyi kö la itre xaa thangane ka lolo. Maine pena easa atrehmekune laka, maine tro sa tro kowe la ketre nöje troa thele huliwa, haawe, tro hë sa kapa la itre manie ka tru. Ame ngöne la qaan, tre, maine jë tro sa canga goeëne lai kösë, ketre manathithi qaathei Iehova. Ngo qëmekene troa axecië mekun göne lai, hapeu nyipi ewekë kö tro sa pane atrepengöne la itre aliene hni së? Ame la pane hnyinge nyine tro sa wanga atrun, tre, kola hape, “Troa hetre thangane tune kaa la mekune celë hnenge hna axeciën, ngöne la imelekeu i eni me Iehova?”
7. Pine nemene matre nyipi ewekë catre troa xometrije la itre aja mo ne fen qa kuhu itre hni së?
7 Kolo pala hi a sajuëne la aja mo hnene la fene i Satana. (E jë la 1 Ioane 2:15, 16.) Ame la aja hna thele troa eatrëne hnene la Diabolo, tre, ene la troa angazone la itre hni së. Qa ngöne lai, nyipi ewekë tro sa hmekën, matre troa atrehmekune la itre aja mo ne fen e kuhu hni së me thele troa xometrije itre ej. (Hna ama. 3:15-17) Thaa jole ju kö koi Iesu troa thipetrije la ewekë i Satana, ene lo nöjei baselaia asë e celë fen. (Mat. 4:8-10) Öni nyidrëti e hmekë së, ka hape: “Wange kö, thupë nyipunie, ke meciunejë; qa ngöne la tha mele kö la ate hnene la etrune la nöjei ewekë hnei angeice hna heteny.” (Luka 12:15) Tro la aqane mele nyipici së a xatua së troa mejiune koi Iehova hune la troa sipu mejiune koi së kö.
Hnene La Ketre Perofeta Qatr Hna “Thoi Koi Angeic”
8. Hna tupathi tune kaa la aqane mele nyipici ne la perofeta i Akötresie?
8 Maine trongëne hnyawa ju kö lai perofeta i Akötresie la gojenyi ne bëeke hmaca, thaa tro ju kö a traqa koi angeice la ewekë ka ngazo. Ngo canga traqa hmaca ju hi koi nyidrë la ketre itupath. Hanawange la hna qaja hnene la Tusi Hmitrötr: “Kola lapa e Bethela la kete perofeta qat, nge traqa ha la ite nekö i angeice me thue macanyi angeice” la nöjei ewekë ka traqa ngöne la drai cili. Thupene la nyidrëti a ase drenge la itre trenge ewekë i angatr, ene pe hnei nyidrëti hna upi angatre troa nue ibiritene la asina, matre tro nyidrëti a canga tro me ea la perofeta i Akötresie e cahu gojeny. Thaa hmitre kö, nge nyidrëti a öhne la perofeta kola lapa fene la ketre isinöe ka tru; ame hnei nyidrëti hna qaja, ka hape: “Tro sho kowe la hnalapang, mate pane xeni waölen.” Ame ngöne la kola thipëne hnene la atre ne la nyipi Akötresie la ihë, tre, hnene la qatre trahmanyi hna sa, ka hape: “Ini la kete perofeta tui nyipë; nge hnei angela hna qaja koi ni ngöne la wesi ula i Iehova, me hape, ‘Ahmacanyi angeice ju kowe la uma i ’ö, mate xeni areto me iji tim.’ ” Ngo kola qaja hnei Tusi Hmitrötr, ka hape: “Nyën’ a thoi koi angeic.”—1 Ite jo. 13:11-18.
9. Pine nemene matre ka ngazo catre la troa “lue hni”?
9 Thatre kö së la itre aliene hni ne la perofeta qatr, ngo ame pe, tre, hnei nyidrëti hna thoi. Maine jë ame la qatre trahmany, tre, ketre perofeta ekö ka mele nyipici koi Iehova. Ngo ame ngöne la ijine celë, tre, hnei nyidrëti hna huliwa thoi. Kola jelengazone la thiina celë hnene la itre Hna Cinyihan. (E jë la Ite edomë 3:32.) Ame la itre ka huliwa thoi tune lai, tre, angatr a sipu angazone la aqane imelekeu i angatre me Iehova, nge kolo mina fe a angazon, e itre xaa ijin, la aqane imelekeu ne la itre xan.
“Hnei Angeice Hna Ce Hmaca” Memine La Qatre Trahmany
10. Tune kaa la aqane ujë ne la perofeta i Akötresie ngöne la kola könë nyidrë hnene la qatre trahmany, nge nemene la pune lai?
10 Thaa jole kö ekö tro la perofeta ne Iudra a atrehmekune la aqane iaö ne la perofeta qatr. Maine ju tro hi nyidrëti a ketre sipu thele, ka hape, ‘Pine nemene matre Iehova a jëne la ketre angela matre troa tro fë koi ni la itre hna amekötine ka hnyipixe?’ Ketre, ijiji angeice hi troa sipo Iehova troa eatrongë angeice hnyawa; ngo thaa mama kö hnine la itre Hna Cinyihane laka, hnei angeic hna ujë tune lai. Ngo “hnei angeice hna ce hmaca memine [la qatre trahmanyi] , nge angeic’ a xeni areto ngöne la uma i nyëne me iji tim.” Thaa madrine kö Iehova. Celë hi matre ame ngöne la kola bëeke hmaca a tro Iudra hnene lai perofeta hna amenun, tre, ixelë ju hi angeice memine la ketre liona, ene pe heji angeice ju hi me humuthi angeic. Drei la ketre pune ka hleuhleu catre kowe la perofeta!—1 Ite jo. 13:19-25. a
11. Nemene la tulu ka lolo hnei Ahia hna amë pe koi së?
11 Ame ngöne la ketre ceitun, tre, kola qeje perofeta Ahia, lo hna upe troa sië Ieroboama troa joxu, laka, hna mele nyipici hnyawa uti hë la qatre nyidrë. Qatre hë Ahia nge ti hë la lue meke i nyidrë, ame hnei Ieroboama hna upe la föi nyidrë troa atre thei Ahia, la pengöne la nekö i nyidrëti trahmanyi ka wezipo. Ene pe hnei Ahia hna ahnithe catrëne, ka hape, ka tro ha meci la nekö i Ieroboama trahmany. (1 Ite jo. 14:1-18) Ngöne la itre manathithi hna kapa hnei Ahia, tre, kolo mina fe a qaja la hnëqa ka tru, ene la hna ixatua troa hane eköthe hnyawa la Wesi Ula i Akötresie. Hna tune kaa? Hnei Ezera lo atre huuj, hna xome la itre hna cinyihane cili nyine troa ithuemacany.—2 A. l. ite jo. 9:29.
12-14. (a) Nemene la ini hne së hna xome qa ngöne la ewekë ka traqa kowe la perofeta ka co? (b) Qaja jë la enyipiewekëne la troa thele ngöne la thith, la itre eamo ka eje e hnine la Tusi Hmitrötr hna hamëne hnene la itre qatre thup.
12 Thaa hna qaja kö hnei Tusi Hmitrötr la kepine matre thaa hnene kö la perofeta ka co hna thele ewekë thei Iehova, qëmekene tro angeic a hmaca hmaca me xeni me iji thene la qatre trahmany. Maine jë hnene la qatre trahmanyi hna qaja kowe la perofeta ka co la hnei angeice hna ajane troa dreng? Nemene la ini nyine tro sa xome qa ngöne lai? Nyipi ewekë troa xecie hnyawa e kuhu hni së laka, ame la itre hna amekötine hnei Iehova, tre, thaa ka qali kö ngo ka nyipici pala hi. Ketre, loi e eje e kuhu itre hni së la ajane troa catre xötrethenge itre ej, ngacama troa traqa koi së la nöjei itupath.
13 Ame la itre xan, tre, ame la kola hamë eamo koi angatr, tre, angatre hi a drenge la hnei angatre hna ajane troa dreng. Drei la ketre ceitun, maine jë kola hamëne kowe la ketre trejine la ketre huliwa ka troa xome la traeme hna majemine xome hnei angeic thatraqane la hnepe lapa i angeic, memine la itre huliwa qaathei Akötresie. Maine jë tro angeic a sipo ixatua thene la ketre qatre thup. Eje hi laka, tro la qatre thup a nyiqaane qaja koi angeice, ka hape, thaa hnëqa i nyidrëti kö troa qaja la aqane tro angeice a xatuane la hnepe lapa i angeic. Thupene lai, maine jë tro la qatre thupe a pane ce ithanatane memine la trejine trahmanyi la pengöne la huliwa cili, memine la itre ethanyine ej ngöne la götrane la ua, e traqa ju angeic kapa la huliwa cili. Hapeu, tro kö la trejine a wanga atrune hmekuje hi lo pane eamo, maine tro mina fe angeice a hane nyipine hnyawa lai hnaluene eamo? Qa ngöne lai, nyipi ewekë catre kowe la trejine troa atrehmekune la ka sisitria koi angeic ngöne la götrane la ua.
14 Tro pena sa ce wange la ketre ceitun. Maine jë tro la ketre trejine föe a hnyingëne kowe la ketre qatre thup, ka hape, maine ijiji eahlo hi troa isa lapa memine la föi eahlo ka hane hmi. Eje hi laka, tro la qatre thup a qeje pengöne hnyawa, ka hape, ame göi mekune troa isa lapa, tre, eahlo kö la ka troa sipu axeciëne la mekune cili. Thupene lai, tro la qatre thup a ce wange me eahlo la itre eamo ka eje e hnine la Tusi Hmitrötr nge ka ithanatane la mekune cili. (1 Kor. 7:10-16) Hapeu, tro kö la trejine föe a wanga atrune hnyawa la itre hna qaja hnene la qatre thup? Maine ase jë hë eahlo lapa fë la mekun, ene la troa isa lapa memine la föi eahlo? Qa ngöne lai, qëmekene tro eahlo a axecië mekun, loi e tro eahlo a pane thele ngöne la thith, la itre eamo celë hna nyi trepene hnei Tusi Hmitrötr.
Loi e Troa Qahmihmi
15. Nemene la ini hne së hna xome qa ngöne la ngazo ne la perofeta i Akötresie?
15 Nemene fe la itre xaa ini hne së hna xome qa ngöne la ewekë ka ngazo hna kuca hnene la perofeta ne Iudra? Kola qaja ngöne Ite Edomë 3:5, ka hape: “Lapauneju koi Iehova hnene la hni ’ö ka pexej, ngo the lapa qale kowe la hnei ’ö hna trotrohnin.” Thaa hnene kö la perofeta ne Iudra hna catre lapaune koi Iehova tune ekö lo, ngo ame ngöne la ijine celë, hnei angeice pena ha hna lapaune kowe la sipu inamacane i angeice kö. Ene pe hetre ethanyine la menu i nyidrë kowe la mele i nyidrë me kowe la aqane imelekeu i nyidrë me Iehova. Drei la ketre tulu hna amë pe hnei Davita, kola amamane la enyipiewekëne la troa hni ka ipië me nyipici ngöne la huliwa së koi Iehova!
16, 17. Nemene la ka troa xatua së troa nyipici pala hi koi Iehova?
16 Ame la troa sipu mus, tre, celë hi ketre aja lai ka eje e kuhu hni, nge canga tro hi ej a amenu së. “Ate nyipi iaö la hni hune la nöjei ewekë asëjëihë, nge nyipi ngazo ej.” (Iere. 17:9) Maine easa ajane troa nyipici koi Iehova, haawe, nyipi ewekë tro sa catre huliwa matre troa trije la atr ka hekö ka ngazo memine la itre thiina ne ej, tune la pi tru me ajane troa sipu mus. Nge nyipi ewekë tro pena sa xetrëne la atr ka hnyipixe, “lo hna xupe tui Akötesie ngöne la thina ka meköt, la thina ka hmitöte me nyipici.”—E jë la Efeso 4:22-24.
17 Kola qaja ngöne Ite Edomë 11:2, ka hape: “Ngo thei angete ipië la inamacan”. Ame la easa mejiune koi Iehova cememine la hni ka ipië, tre, celë hi ka troa xatua së troa neëne la itre ewekë ka troa hetre thangane ka ngazo kowe la mele së. Drei la ketre ceitun, canga tro hi a angazone la aqane tro sa waiewekë, hnene laka, easa kucakuca. (Ite edomë 24:10) Maine jë easa kucakuca troa kuca la itre xaa götrane la huliwa ka hmitrötr, me nyiqaane mekune fe, ka hape, tru catre hë la hne së hna kuca ekö ngöne lo itre macatre ka ase hë, nge qanyine pena ha la itre xan enehila troa hane thue lai ehnef. Maine jë easë pena a ajane troa tune la itre atr ka lapa ezi së, ene la troa hetrenyi la ketre aqane mele “ka lolo.” Ngo maine tro sa ‘isa catre’ me “catre huliwa i Joxu pala hi,” haawe, tro ha thupëne hnyawa la itre hni së.—Luka 13:24; 1 Kor. 15:58.
18. Nemene la nyine tro sa kuca, maine thatre kö së la mekune nyine troa axeciën?
18 Ame ngöne la itre xaa ijin, tre, maine jë tro sa qëmeke kowe la itre mekune ka jole troa axeciën, nge thaa ewekë ka hmaloi kö la troa atrehmekune la ewekë nyine troa kuca ka loi koi së. Maine jë tro sa mekune, ka hape, ketre ka lolo catre hi tro sa ketre thele nyin la jole ka eje the së; Nemene la nyine troa kuca? Ame la easë e hnine la itre jole cili, tre, loi e tro sa ujë cememine la inamacan me sipo Iehova troa xatua së. Kola qaja ngöne Iakobo 1:5, ka hape: “Maine kete e nyipunie ka pë inamacan, tro angeic’ a sipo Akötesie, ate hamëne atrune kowe la nöjei ate asëjëihë.” Haawe, tro hë la Tretretro së e koho hnengödrai a hamë së la uati hmitrötr matre tro sa atreine axecië mekune hnyawa.—E jë la Luka 11:9, 13.
Loi e Tro Sa Catre Troa Nyipici
19, 20. Nemene la nyine tro sa catre kuca pala hi?
19 Ame lo itre macatre thupene la hna jea hnei Solomona qa ngöne la nyipi hmi, tre, kola akötr la itre hlue i Akötresie nge ngazo pi hë la aqane tupathe la aqane nyipici angatr. Eje hi laka nyimutre la itre atr ka lue hna hnim, laka thaa hna fedre hmekuje kö kowe la nyipi hmi, ngo kowe mina fe la itre xan. Ngo hetrenyi pe kö la itre xaa atr ka catre nyipici koi Iehova.
20 Ame ngöne la nöjei drai, tre, easa qëmeke kowe la itre ewekë nyine tro sa iën me kowe la itre mekune hne së hna troa axeciën; nge itre eje hi lai ka troa tupathe la aqane tro sa nyipici koi Iehova. Ngo ijije mina fe tro sa hane amamane laka, itre ka nyipici së kowe la Tretretro së. Qa ngöne lai, loi e tro pala hi sa nyipici koi Iehova me ce hni, me mejiune atraqatre laka, tro pala hi Nyidrëti a amanathithine la itre ka nyipici hnyawa koi Nyidrë ngöne la nöjei götrane la mele i angatr.—2 Sam. 22:26.
[Ithueamacany]
a Thaa hna qaja kö hnene la Tusi Hmitrötr, maine Iehova la qaane la meci ne la perofeta qatr.
Tune Kaa La Aqane Tro Nyipunieti a Sa?
• Pine nemene matre loi e tro sa xome trije qa kuhu hni së la aja mo?
• Nemene la ka troa xatua së troa nyipici koi Iehova ngöne la itre thiina hne së hna kuca?
• Tune kaa la aqane troa xatua së hnene la qahmihmi, göne la aqane së koi Akötresie?
[Thying]