Ita Ne Thup göi 05 Okotropa

Nyima 21 me 11 Qene Drehu

Thaa Tro Kö Iehova A Nuetrije La Itre Atre I Nyidrë Ka Mele Nyipici

“Tha [hnei Iehova kö] hna tije la ite ka hmitöte i nyidë. Hna thupë angate palua kö.”—SALAMO 37:28.

1, 2. (a) Ame ngöne lo hnaatreene hadredre ne macatre M.P.K., nemene la itre ewekë ka tupathi la aqane mele nyipici ne la itre hlue i Akötresie? (b) Nemene lo köni götran, la Iehova a thupëne la itre ka mele nyipici koi Nyidrë?

 EASË ngöne lo itre macatre 900 M.P.K., nge celë hi ketre ijine kola troa axeciëne la ketre mekun hnene la itre hlue i Iehova. Hna neëne hi la ketre isi hnene la hna nue la Isaraela ne la götrane ahuë troa ketre sipu mus. Hnei Ieroboama, joxu i angatr hna hnyipi acilën, hna canga acatrene la musi nyidrë hnene la hna acile la ketre hmi ka hnyipixe. Nyidrëti a upe jë la itre atre i nyidrë troa mele nyipici me drengethenge nyidrë. Nemene la hna kuca hnene la itre hlue i Iehova? Tro jë kö angatre a mele nyipici kowe la Akötresie hnei angatre hna hmi kow? Itre thauzan la ka ujë tune lai, nge Iehova pala hi a thupë angatr pine laka, angatr a catre mele nyipici koi Nyidrë.—1 Ite jo. 12:1-33; 2 A. l. ite. jo. 11:13, 14.

² Ame ngöne la hneijine së, tre, kolo mina fe a tupath la aqane mele nyipici ne la itre hlue i Akötresie. Kola hmekë së hnei Tusi Hmitrötr, ka hape: “Inamacanepi me hmekënejë; ke ithupëjia me nyipunie, ene diabolo, a tro agö, kösë liona a ho, kola thele tha i nyiën.” Hapeu, ijije kö tro sa “thipe tiji nyën, me cile huti ngöne la lapaun”? (1 Pet. 5:8, 9) Qa ngöne lai, loi e tro sa ce wange hnyawa la itre xaa ewekë ka traqa ngöne lo kola acili Ieroboama troa Joxu ngöne lo macatre 997 M.P.K., me hane xomi ini qa ngöne itre ej. Ame ngöne la itre drai ka akötre celë, tre, hna axöxösisine pala hi la itre atr ka mele nyipici koi Iehova. Ketre, kolo mina fe a ajojezi angatre hnene la iajojezi ne la itre atr ka iamenumenu, nge thaa ka hmaloi kö la itre hnëqa hnei angatr hna xom. Ngo ame ngöne la itre ijine cili, tre, thaa hnei Iehova kö hna nuetrije la itre ka mele nyipici koi Nyidrë, nge thaa tro jë kö Nyidrëti a nuetriji së enehila.—Sal. 37:28.

Ngöne La Kola Axösisi Angatr

3. Pine nemene matre, pë ju fe kö iaxösisi fene la musi Davita?

³ Loi e tro sa pane ce wange la itre aqane mele ne la itre atr, ngöne lo kola xötrei acilë Ieroboama troa joxu. Kola qaja ngöne Ite Edomë 29:2: “E musi la ate ka ngazo, te, troa awe la nöj.” Fene la musi Davita, Joxu i angetre Isaraela ekö, tre, thaa hna awe kö la nöj. Thaa ka pexeje kö Davita, ngo ame pe, tre, hnei angeice hna mele nyipici koi Akötresie me mejiune koi Nyidrë. Ketre, thaa ka iaxösisi kö Davita ngöne lo nyidrëti a musinëne lo nöj. Hnei Iehova hna isisinyikeu me Davita me qaja, ka hape: “Nge tro ha acile hutine la lapa i ’ö memine la baselaia i ’ö epine palua qëmeke i ’ö; tro ha acatene la therone i ’ö epine palua kö.”—2 Sam. 7:16.

4. Ame ngöne lo musi Solomona, nemene la nyine troa kuca matre tro pala hi a melëne la itre manathith?

⁴ Ketre tune mina fe la musi Solomona, nekö i Davita, laka, ame ngöne lo qaan, tre, ka tingetinge me loi xölen, nge eje a nyi hatrene hnyawa elanyi la Musi Keriso Iesu ka Caa Thauzane Macatre. (Sal. 72:1, 17) Ame ngöne la ijine cili, pëkö ala caas ngöne lo lai 12 lao tribu ne Isaraela ka mekune troa icilekeu memine la musi nyidrë. Ngo tro Solomona memine la itre atre i nyidrë a kapa la itre manathith, e hnei angatre hna kuca la ketre ewekë. Celë hi matre hnei Iehova hna qaja koi Solomona, ka hape: “E tro eö a trongëne la ite wathebong, me kuca la ite hnenge hna amekötin, me thupëne la ite hnenge hna ahnith’ asë, mate trongën’ it’ ej; tro ni a aeatene koi ’ö la tenge ewekeng, lo hnenge hna qaja koi Davita keme i ’ö; nge tro ni a lapa thene la ite nekö i Isaraela, nge tha tro kö ni a nue tije la nöjeng’ angete Isaraela.”—1 Ite jo. 6:11-13.

5. Pine laka thaa hna mele nyipici kö hnei Solomona koi Iehova, nemene hë la pune koi angeic?

⁵ Ame hë lo Solomona a qatre trootro, tre, thaa hnei nyidrëti hmaca kö hna hane mele nyipici koi Iehova, ke, hnei nyidrë hna nyiqaane lö hnine la hmi ka thoi. (1 Ite jo. 11:4-6) Canga nuetrije hi nyidrëti la itre wathebo i Iehova, nge kolo fe ha kökötre trootro la aqane iaxösisi nyidrë. Hnene laka tru catre pala ha la hna iaxösisi hnei nyidrë, ene pe ame la nyidrëti a mec, tre, kolo pala hi a awe la nöj me sipo Reoboama nekö i nyidrë, nge atre nyihnai nyidrë troa akeukawane la itre hni angatr. (1 Ite jo. 12:4) Pine laka thaa hna mele nyipici kö hnei Solomona, haawe, tune kaa la aqane ujë Iehova?

6, 7. Ngacama hna nuetriji Solomona, ngo tune kaa la aqane thupëne Iehova la itre ka mele nyipici koi Nyidrë?

⁶ Kola qaja koi së hnene la Tusi Hmitrötr, ka hape: “Hnei Iehova hna elëhni koi Solomona pine la hna aukene la hni angeice qa thei  . . Akötesie angete Isaraela, at ’ a lu amamai nyidëti kö koi angeic.” Öni Iehova koi Solomona, ka hape: “Qa ngöne laka . . . tha hnei ’ö hna thupëne la isisinyikeunge me wathebonge lo  hnenge hna ahnithe koi ‘ö, tro ni a thapa qa thei ’ö la baselaia, me hamën’ eje kowe la kete jini ’ö.”—1 Ite jo. 11:9-11.

⁷ Thupene lai hnei Iehova hna upi Ahia perofeta troa siëne la atr ka troa nue amacane la nöj qa ngöne la iaxösisi i Solomona. Ame la atre cili, tre, Ieroboama, ketre atr ka macaj nge ka huliwa i Solomona ekö, ngöne lo nyidrëti pala kö a joxu. Ngacama hnei Iehova hna nyipici ngöne lo hnei Nyidrëti hna isisinyikeu me Davita göne lo Baselaia, ngo hnei Nyidrëti hna kapa troa thawaluëne la 12 lao tribu. Tro ha hamëne la 10 lao tribu koi Ieroboama, nge ame pe hë lo lue xan, tre, tro ha hamëne kowe la itre xötre nekö i Davita, laka hna musi hun hnei Reoboama Joxu. (1 Ite jo. 11:29-37; 12:16, 17, 21) Qa ngöne lai öni Iehova koi Ieroboama, ka hape: “Maine tro eö a denge asë la hnenge hna troa ahnithe koi ’ö, me trongëne la ite jëng, me kuca la ka meköti qëmekeng, mate thupëne la ite wathebonge me ite hna ahnithe hneng, tune lo hna kuca hnei Davita hlueng; tro ni a ce me eö me kuca thatraqai ’ö la lapa ka huti tune lo hnenge hna kuca thatraqai Davita, nge tro ni a hamë Isaraela koi ’ö.” (1 Ite jo. 11:38) Hnei Iehova hna xatuane la nöje i Nyidrë me akeukawane la itre hni angatr qa ngöne la iaxösisi.

8. Ame enehila, nemene la itre jole ka axösisine la itre atre i Akötresie?

⁸ Ame enehila, tre, kola elë catre la iaxösisi memine la itre thiina ka thaa meköti kö. Kola qaja ngöne Ate Cainöj 8:9, ka hape: “Kete ate a musinëne la kete mate angazo nyëne kö.” Ame jë la kola aja mani me hetre musi ka iaxösisi, tre, hnene laka catrehnine catr la itre ejolene göi mani. Ketre ame ngöne la itre xaa ijin, tre, thaa hna hamë tulu ka loi kö hnene la itre hene ne la mus, memine la itre ka trene mani, memine la itre hene ne hmi. Tui Lota, ketre atr ka meköt, ame la itre atre i Akötresie ka mele nyipici enehila, tre, itre “hna ahace hnine hnene la qene tretreije ne la nöjei ka ngazo.” (2 Pet. 2:7) Ketre, pine laka easa catre troa drengethenge la itre trepene meköti Akötresie, ame itre xaa ijin, tre, easë hi lo itre hna pane icilekeu memin hnene la itre atr ka pi tru ka cilëne la mus.—2 Tim. 3:1-5, 12.

9. (a) Nemene la hnei Iehova hna kuca matre troa nue amacane la nöje i Nyidrë? (b) Pine nemene matre xecie hnyawa koi së laka, tro Iesu a mele nyipici?

⁹ Ijije tro sa mejiune hnyawa kowe la trenge nyipici celë: thaa tro kö Iehova a nuetrije la itre atre i Nyidrë ka mele nyipici! Pane mekune jë la itre hnei Iehova hna hnëkëne amë, matre troa nyihnane la itre musi asë ka iaxösisi e celë fen. Ase hë acile la Baselaia ne la Mesia i Akötresie, nge hna hamëne koi Iesu Keriso. Nyipici, easenyi hë matre traqa pi kowe la ala hadredr lao macatre ne musi Iesu e hnengödrai. Ketre, easenyi hë tro nyidrëti a akeukawane la hni ne la itre ka metrötrëne la atresiwa i Akötresie. (E jë la Hna Amamane 11:15-18.) Hnei Iesu mina fe hna amamane la aqane mele nyipici nyidrë uti hë la mec. Thaa tro kö nyidrëti a hane ahmahmane la itre atre i nyidrë, tune lo hna kuca hnei Solomona.—Heb. 7:26; 1 Pet. 2:6.

10. (a) Tune kaa la aqane tro sa amamane laka, ka nyipi ewekë koi së la Baselaia i Akötresie? (b) Ngöne la kola catrehnine catre la itre jol, nemene la ka xecie hnyawa koi së?

¹⁰ Nyipi Baselaia la Baselaia i Akötresie, nge tro hë eje a lepe apaatrene la nöjei iaxösisi asë. Celë hi matre, ame la aqane mele nyipici së me idrengethenge së, tre, itre ewekë i Iehova Akötresie memine la Baselaia i Nyidrë. Ngöne laka tru la mejiune së ngöne la Baselaia, haawe, kola uku së troa xelene la nöjei aja ne la fen nge hane catre kuca la itre huliwa ka loi. (Tito 2:12-14) Ketre easë mina fe a thele troa pë ethan ngöne la fene celë. (2 Pet. 3:14) Ngacama ame enehila, tre, easa qëmeke kowe la itre jol, ngo ijije tro sa mejiune laka tro Iehova a thupë së ngöne la kola tupathe la lapaune së. (E jë la Salamo 97:10.) Kolo mina fe a akeukawane la itre hni së hnene la Salamo 116:15, ka hape: “Nyipi ewekë koi Iehova la meci ange ka hmitöte i nyidë,” ngacama nöjei atr maine caasi hi.

Ngöne La Kola Ajojezi Së Hnene La Itre Atr Ka Iamenumenu

11. Tune kaa la aqane amamane Ieroboama laka thaa hnei nyidrëti kö hna mele nyipici?

¹¹ Ijije hi ekö ngöne lo ijine musi Ieroboama Joxu troa akeukawane la hni ne la nöje i Akötresie. Ngo eje hi laka, hna tupathe la aqane mele nyipici i angatr koi Akötresie hnene la itre aqane ujë i nyidrë. Thaa hnei Ieroboama hi hna madrine la hnëqa ka lolo hna hamëne hë koi nyidrë, ene la troa joxu, ngo hnei nyidrëti pe hna nyiqaane thele la itre aqane troa acatrene la göhnë i nyidrë. Öni nyidrëti e mekun, ka hape: “Maine tro la nöje ce troa huje ngöne la ēnē i Iehova e Ierusalema, te, troa hmaca la hni ne la nöje ce kowe la joxu i angat, ene Reoboama joxu ne Iuda, nge tro angat’ a humuthi ni, me hmaca koi Reoboama joxu ne Iuda.” Celë hi matre hnei Ieroboama hna kuca la lue hnë troa thili kowe la nekö i kau gool, nge eje hi lai hmi ka hnyipixe hnei nyidrëti hna acil. “Nge hnei nyidëti hna acile la kete e Bethela nge hna amë la kete e Dana. Nge ame la ewekë cili, te, ate aciane la ngazo; nge hnene la nöje hna tro kowe la kete uti hë e Dana. Nge hnei nyidëti hna nyi uma hune la ite ga draië; me acile la ite ate qa cailo nyine itete huj, lo tha ite nekö i Levi.” Ketre, hnei Ieroboama hna sipu acile kö la drai ne “pui ne xeni thatraqai ite nekö i Isaraela,” nge hnei nyidrëti mina fe hna “huje hune la ita ne huj, me deu sinöe ka pui loi.”—1 Ite jo. 12:26-33.

12. Ame ngöne la Ieroboama a acile la lue hnë troa thili kowe la lue kau gool, tre, nemene la hna kuca hnene la itre atre i Akötresie, ka lapa ngöne la götrane ailopi ne la baselaia i Isaraela?

¹² Nemene jë hë la hna troa kuca hnene la itre atre i Akötresie ka mele nyipici, ene lo itre ka lapa ngöne la götrane ailopi ne la baselaia i Isaraela? Tune lo itre xötrapane  i angatre ka mele nyipici fe, hna canga tro la itretre Levi, ene lo itre ka mele ngöne la itre traone hna hamëne koi angatr e hnine la hnepadro ne la baselaia ne ailopi. (Eso. 32:26-28; Num. 35:6-8; Deu. 33:8, 9) Hnei angatre hna kötrene la itre hnepadro me itre zi i angatr, matre troa ce tro memine la itre hnepe lapa i angatr kowe la götrane ailojë e Iudra, ke, pëkö ka atreine e cili troa sewe angatre troa hmi koi Iehova. (2 A. l. ite jo. 11:13, 14) Ame la itre xaa angetre Isaraela ka mele ekö e Iudra, tre, hnei angatre hna iëne troa lapa huti e cili, nge thaa tro hmaca kö a bëeke kowe lo 10 lao tribu ne la baselaia i Ieroboama. (2 A. l. itre jo. 10:17) Hnei Iehova hna öhne la aqane bëeke hmaca i angatr troa sajuëne la nyipi hmi, ceitune me ketre jëne troa upe la itre xaa xötre elany troa nue la hmi koi kau gool, me bëeke hmaca e Iudra eë.—2 A. l. itre jo. 15:9-15.

13. Ame ngöne la hneijine së, tre, tune kaa la aqane ajojezine me icilekeu memine la itre hlue i Akötresie hnene la itre ka iamenumenu?

¹³ Ame enehila, tre, kola ajojezine me icilekeu memine la itre hlue i Akötresie, hnene la itre atr ka iamenumenu. Hnene la itre xaa ka musi hna thele troa eköthe la sipu hmi i angatr, me hane ukune la itre atre i angatre troa kapa la hmi cili. Ketre, hnene la itre taan la hmi ka thoi me itre xaa ka pi tru hna uune ka hape, angatre hi lo ka eatrëne lo hna thingehnaeane göne lo “xötete huje joxu”. Ngo atre hi së laka, ame la itre “xötete huje joxu,” tre, kolo hmekuje hi lo itre Keresiano ka nyipici, ene lo itre hna iën.—1 Pet. 2:9; Hna ama. 14:1-5.

14. Tune kaa la aqane tro sa ujë kowe la itre mekuna ne la itre ka iamenumenu?

¹⁴ Ceitune la itre hlue i Akötresie ka mele nyipici koi Nyidrëti enehila memine lo itre Levi ka mele nyipici ngöne lo itre macatre 900 M.P.K, laka, thaa hna amenu angatre kö hnene la mekuna ne la itre ka iamenumenu. Hnene la itre hna iëne memine la itre Keresiano ka ce tro me angatr hna canga neëne me thipetrije la itre mekune ka thoi cili. (E jë la Roma 16:17.) Ngacama easa thele troa drengethenge la itre musi ngöne la itre hna huliwa i maseta, me thaa hane lö hnine la itre isi e cailo fen, ngo ame pe, tre, troa sisitria la aqane mele nyipici së kowe la Baselaia i Akötresie. (Ioane 18:36; Rom. 13:1-8) Ketre easë mina fe a thipetrije la hna uune fë hnene la itre ka iamenumenu ka hape, angatr a nyihlue i Akötresie, ngo jele ngazo Nyidrëti pe hnene la itre huliwa i angatr.—Tito 1:16.

15. Pine nemene matre loi e tro sa mele nyipici kowe “la hlue ka nyipici me ka inamacan”?

¹⁵ Pane mekune ju së la hnei Iehova hna kuca matre troa xome la itre atr ka hni ka menyik qa celë fene ka ngazo, kowe la ketre paradraiso hna xupe hnei Nyidrëti ngöne la götrane la ua. (2 Kor. 12:1-4)Easa qale catre cememine la hni ne ole kowe “la hlue ka nyipici me ka inamacan, lo hnene la joxu i angeic hna acile troa musinëne la hnalapa i nyidë, troa thewe xeni koi angate ngöne la nyipi ijin.” Hnei Keriso hna acile la hlue celë matre “troa musinëne la nöjei ewekë i nyidëti asë.” (Mat. 24:45-47) Qa ngöne lai, ngacama ame itre xaa ijin, tre, thaa trotrohnine kö së la ketre mekune hna axeciëne hnene la hlue ka nyipici me ka inamacan, ngo thaa ketre kepine kö lai troa thipetrij ej, maine troa bëeke hmaca kowe la fene i Satana. Loi pe tro la aqane mele nyipici së a uku së troa ujë cememine la hni ka ipië, me treqene hnyawa matre tro Iehova a qeje pengöne la itre ewekë.

Ngöne La Angatr a Xome La Itre Hnëqa Hna Ahnithe Hnei Akötresie

16. Nemene la hnëqa hna kapa hnene la perofeta ne Iudra?

¹⁶ Hnei Iehova hna hnëjinë Ieroboama pine laka hnei angeice hna ujë tune lo itre ka iamenumemu. Ene pe hnei Nyidrëti hna upe la ketre perofeta ne Iudra matre troa tro kowe la götrane ailopi e Bethela, me wai Ieroboama, ngöne la angeic a cile ngöne la ita ne huj. Nge tro la perofeta cili a qaja la ketre maca ne iameköti ka akötre catre koi Ieroboama. Thaa sihngödri kö koi së laka, ketre hnëqa lai ka hace catre hna athipe kowe la perofeta cili.—1 Ite jo. 13:1-3.

17. Tune kaa la aqane thupëne Iehova la atre tro fë la maca i Nyidrë?

¹⁷ Nyipici, hnei Ieroboama hna elëhni ngöne la angeic a drenge la kola ahnëjinë angeice hnei Iehova. Hnei angeice hna line pi la iwanakoime i angeic kowe la hlue i Akötresie me sue kowe la itre atr easenyi nyidrë, ka hape: “Xölehuji nyëne ju!” Ngo qëmekene tro la ketre e angatre a enij, “ame hna fite la iwanakoime i [angeic] lo hnei [angeic] hna line koi [nyidrë], nge tha ‘teine kö [angeic] troa sa hmaca. Nge kaqa ha la ita ne huj, me neni la ite hnatesiji qa hune la ita ne huj.” Ene pe hnei Ieroboama hna sipone ielen kowe la perofeta troa xëwe koi Iehova Akötresie me thithi koi Nyidrë matre troa aloine hmaca la iwanakoime i angeic. Ene pe thithi jë hi hnene la perofeta, ame hna loi hmaca la iwanakoime i angeic. Celë hi matre hnei Iehova hna thupëne la atre tro fë la maca i Nyidrë qa ngöne la iakötrë.—1 Ite jo. 13:4-6.

18. Pine laka pëkö xou së troa nyihlue i Iehova, haawe, tune kaa la aqane thupë së hnei Nyidrë?

¹⁸ Ngöne laka easa nyipici troa kuca la huliwa ne cainöj me inine la itre atr, haawe, ijij e itre xaa ijin, tro sa qëmeke kowe la ketre atr ka thaa semesine së kö, maine ka icilekeu me xele ma drei së pena. (Mat. 24:14; 28:19, 20) Ngo thaa tro pi kö sa nue la xou troa thipetriji së hnene la itre atr, troa ananazijëne la aqane catre cainöje së. Tune lo perofeta laka thaa hna qaja kö la ëjen ngöne lo hneijine i Ieroboama; hna “nue koi shë troa nyi hlue i [Iehova] nge pëkö qou, memine la thina ka metöt.” a (Luka 1:74, 75) Ngacama thaa easë  kö a treqene troa amele së, ngo Iehova pala hi a thupë së, itretre Anyipicine i Nyidrë, jëne la uati hmitrötr memine la itre angela. (E jë la Ioane 14:15-17; Hna Amamane 14:6.) Thaa tro jë kö Akötresieti a nuetrije la itre atr ka thaa xou troa catre cainöjëne la Wesi Ula i Nyidrë.—Fil. 1:14, 28.

Tro Iehova a Thupëne La Itre Ka Mele Nyipici Koi Nyidrë

19, 20. (a) Pine nemene matre xecie hnyawa koi së, laka, thaa tro jë kö Iehova a nuetriji së? (b) Nemene la hna troa ce ithanatane ngöne la hna cinyihane ka troa xulu?

¹⁹ Iehova la Akötresi së ka nyipici. (Hna ama. 15:4; 16:5) Ame Nyidrëti, tre, ka “ihnimi [nyipici] ngöne la ite huliwa i nyidë asë.” (Sal. 145:17) Nge ketre kola akeukawane la itre hni së hnene la Tusi Hmitrötr ngöne la kola qaja, ka hape: “Nyidëti a thupëne la gojene la ite ka hmitöt [nyipici].” (Ite edomë. 2:8) Ame ngöne la easa qëmeke kowe la itre itupath maine itre mekune ka ngazo, maine pena kola ahnithe koi së la ketre hnëqa ka hace catr, tre, ijije tro së, itre hlue i Akötresie ka mele nyipici, a mejiune kowe la ixatua qaathei Iehova.

²⁰ Drei la ewekë nyine tro së isa ala caasi a mekune hnyawa enehila: Nemene la ka troa xatua ni troa mele nyipici pala hi koi Iehova, ngacama eni a qëmeke kowe la itre itupath maine itre ewekë ka iaö? Kösë kolo lai a hape, tune kaa la aqane tro ni a acatrene la aqane mele nyipicing koi Akötresie?

[Ithueamacany]

Tune Kaa La Aqane Tro Nyipunieti a Sa?

• Tune kaa la aqane amamane Iehova laka, thaa tro jë kö Nyidrëti a nuetrije la itre ka mele nyipici koi Nyidrë, ngöne la kola axösisi angatr?

• Tune kaa la aqane tro sa ujë kowe la itre ka iamenumenu memine la itre mekuna i angatre ka ngazo?

• Tune kaa la aqane thupëne Iehova la itre ka mele nyipici koi Nyidrë, ngöne laka angatr a kuca la huliwa ne cainöj ne la Keresiano?

[Thying]