“Thipe Tiji Diabolo Pi” Tui Iesu
Ita Ne Thup göi 1 Febuare e Normandie
Nyima 16 me 23 Qene Drehu
“Thipe Tiji Diabolo Pi” Tui Iesu
“Thipe tiji diabolo pi, nge tro nyën’ a köte qa thei nyipunie.”—IAKO. 4:7.
1. Nemene pengöne itupathi la hnei Iesu hna atre nge hnei nyidrëti hna troa cile kow, nge nemene la ka traqa koi nyidrë?
Atre hë Iesu Keriso laka, troa icilekeu me nyidrëti hnei Diabolo. Kola mama hnyawa lai ngöne lo hnei Akötresieti hna qaja ekö kowe lo un, ene lo öni hnene la ua ka ngazo hna xome matre troa iamenu; öni Nyidrëti ka hape: “Tro ni a aithupëjia hmunë memine la fö [organizasio i Iehova e koho hnengödrai], me matra i hmunë memine la matra i angeic ; tro angeic [Iesu Keriso]’a athe la he i hmunë, nge tro hmunë a athe la tidöca i angeic.” (Gen. 3:14, 15; Hna ama. 12:9) Ame la troa athe la tidröca i Iesu, tre, kolo lai a hape, troa hetre ketre hnepe ijine tro nyidrëti a akötr ngöne lo kola humuthi nyidrë e celë fen, ngo tro hmaca kö Iehova a amele nyidrëti hmaca me ami nyidrë ngöne la göhnë ka draië e koho hnengödrai. Ngo ame la hna qaja ka hape, troa athe la he ne la un, tre, kolo lai a hape, ame la troa humuthi Diabolo, tre, pë kö mele hmaca ka ijije koi angeic.—E jë la Ite Huliwa 2:31, 32; Heberu 2:14.
2. Pine nemene matre Iehova a mejiune laka, atreine hi Iesu troa thipetriji Diabolo?
2 Mejiune hi Iehova laka, tro Iesu a eatrëne la hnëqa hna athipe koi nyidrë, nge tro fe nyidrëti a cile catre koi Diabolo e celë fen. Pine nemene matre xecie hnyawa koi Iehova la mekune celë? Pine laka, hnei Iehova hna xupi Iesu ekö, hnei Nyidrëti hna goeëne la pengö i Iesu, nge atrehmekune hnyawa ha Akötresie laka, ka idrei me nyipici la “ate xup” cili me “haetra ne la nöjei hna xup’ asë.” (Ite edomë 8:22-31; Kol. 1:15) Haawe, hnei Iehova hna upi Iesu kowe la fene hnengödrai me nue Diabolo troa tupathi nyidrë uti fe hë la humuthi nyidrë; ngo mejiune hnyawa hi Akötresieti laka, tro la Nekö i Nyidrëti ka Caas a nga Satana.—Ioane 3:16.
Iehova A Thupëne La Itre Hlue i Nyidrë
3. Nemene la aqane goeëne Diabolo la itre hlue i Iehova?
3 Hnei Iesu hna qaja göi Diabolo ka hape, “tane celë fen” nge hnei nyidrëti fe hna thuemacane la itretre drei Nyidrëti laka, troa akötrë angatr tune lo aqane akötrë nyidrë. (Ioane 12:31; 15:20) Fene i Satana Diabolo a methinëne catrëne la itre nyipi Keresiano; hnene la hnei angatr hna nyi hlue i Iehova, me cainöjëne la maca ka loi. (Mat. 24:9; 1 Ioane 5:19) Ame la hnei Diabolo hna alamekëne hnyawa, tre, kolo itre thelene lo itre hna iën; angatre hi lo itre ka troa ce musi me Keriso hune la Baselaia ekoho hnengödrai. Angeice fe a thele troa tupath la itretre Anyipicine i Iehova, ene lo itre ka mejiune troa mele epine palua ngöne la paradraiso e celë fen. Tusi Hmitrötr a hmekë së ka hape: “Ithupëjia me nyipunie, ene diabolo, a tro agö, kösë liona a ho, kola thele tha i nyën.”—1 Pet. 5:8.
4. Nemene la ka amamane ka hape, hnene la itre atre i Akötresieti hna thipetriji Diabolo ngöne la hneijine së?
4 Pine laka easë e hnine la organizasio hna sajuëne hnei Iehova Akötresie, haawe, atreine hi tro sa icilekeu me Diabolo. Hanawange la itre ewekë ka traqa ekö, laka caa hadredre hë lao macatre enehila: hnene la itretre musi ka iakötrë catr hna thele troa apaatrene asë la itretre Anyipicine i Iehova. Ngo kökötre catr pala hi la etrune la itretre Anyipicin, matre kola easenyi enehila koi sevene milio la itre atren la itre ekalesia, nge 100 000 la etrun e cailo fen. Eka lo itre musi ka iakötrë catr ka icilekeu memine la nöje i Iehova? Thaa öhne hmaca kö la hmekune itre ej enehila!
5. Hna eatre tune kaa thene la itre hlue i Iehova la hna perofetane ngöne Isaia 54:17?
5 Hnei Akötresieti hna ithanata kowe la ekalesia ne Isaraela ekö, lo hna xome ceitune me “fö” i Nyidrë; öni Nyidrëti e ahnithe hnyawa ka hape: “Pëkö ewekë hna kuca nyine ishi me nyipo hna troa ien ; nge tro nyipoti a jele ngazone la ite sesepeneqë asëjëihë itete ikelikelë me nyipo ngöne la hna amekötin. Celë hi edö ne la ite hlue i Iehova ; nge qa thenge la meköti angat.” (Is. 54:11, 17) Kola eatre mina fe la hna thingehnaeane cili hune la nöje i Iehova e cailo fen ka melëne la “itre drai hnapin” ene lo itre drai tixenuë ne la fene ka ngazo celë. (2 Tim. 3:1-5, 13) Easë pala hi a catre cile koi Diabolo; nge pë jë kö jiane isi i angeic ka troa apatrene la nöje i Akötresie, pine laka, ce Iehova me easë.—Sal. 118:6, 7.
6. Nemene la hna qaja koi së hnene la hna perofetane hnei Daniela göne la musi Diabolo?
6 Easenyi catre hë matre apatrene pi la fene ka ngazo celë, nge tro ha paatr epine palua la nöjei pengöne aqane musi Satana. Hnei Daniela perofeta hna cinyihane la hna thingehnaeane hnei Akötresie, kola hape: “Ngöne la ite drai ne la ite joxu cili [la hneijine së] tro Akötesieti ne hnengödrai a axulune la kete baselaia ka tha tro kö a apaten’ epine palua; nge tha tro kö a nue la baselaia cili [e koho hnengödrai] kowe la ite xa nöj, tro ej’ a lep’ anyilanyilane me apatene la nöjei baselaia asëjëihë cili, nge tro ej’ a cile hut’ epine palua.” (Dan. 2:44) E traqa ha la ijine cili, tro la musi Satana memine la itre musi ne la itre atr a paatr. Tro ha paatre palua la itre ewekë asë ne la fene i Diabolo, nge pë hë ka troa icilekeu memine la Baselaia i Akötresie.—E jë la 2 Peteru 3:7, 13.
7. Easë a atre tune kaa laka, ijije tro la itre hlue i Iehova, angatr isa ala caas a thipetriji Diabolo?
7 Thaa luelue kö së laka, troa thupëne la organizasio i Iehova nge tro fe ej a kökötre ngöne la götrane la ua. (E jë la Salamo 125:1, 2.) Tune kaa fe së? Tusi Hmitrötr a amamane laka, ijiji së hi troa thipetriji Diabolo tui Iesu. Nyipici, kola mama hnyawa ngöne la hna perofetane hnei Iesu hna jëne Ioane aposetolo, ka hape, ngacama troa icilekeu hnei Satana, ngo ame pe hetrenyi kö la “ka ala nyimu atraqat” ene lo itre ka mejiune troa mele e celë fen, nge itre ka tro pe kö a mele ngöne la ijine kola troa apaatrene la fene ka ngazo celë. Thenge la hna qaja hnene la itre Hna Cinyihan, tro angatr a sue draië me madrine ka hape: “Ame la mele, te, qa thei Akötesi shë, ate tuenietine la theron, me qa thei Arenio [Iesu Keriso].” (Hna ama. 7:9-14) Kola qaja göne la itre hna iën, ka hape, angatr a thipetriji Satana, angatr memine la itre sine tronge i angatr, ene lo itre “xa mamoe.” (Ioane 10:16; Hna ama. 12:10, 11) Ngo eje hi lai laka, maine easa ajane troa ‘amele së qa thene la atre iakötrë,’ tre, loi e tro së a catre me thith.—Mat. 6:13.
Tulu Ka Sisitria Ngöne La Aqane Troa Thipetriji Diabolo
8. Nemene la pane itupathi Satana koi Iesu ngöne la hnapapa, nge hnei Iesu hna ujë tune kaa?
8 Hnei Diabolo hna thele troa sewe Iesu troa mele nyipici. Ame ngöne la hnapapa, hnei Satana hna thele troa tupathi Iesu matre tro nyidrëti a hmaca troa drengethenge Iehova. Ngo hnei Iesu pe hna amamai tulu ngöne la aqane troa thipetriji Satana. Thupene la footre lao drai me jidri ne thaa xeni nyidrë, kolo ha traqa koi nyidrë la pi xen. Öni Satana jë hi: “Maine cilieti la Hupuna i Akötesie, te, ulatinejë mate aretopi la it’ etë celë.” Ngo hnei Iesu hna thipën troa xome la trenge catre i nyidrë qaa thei Akötresie matre troa eatrëne la itre sipu aja i nyidrë. Öni nyidrëti e sa koi Satana ka hape: “Ase hë cinyihane, ‘tha tro kö a mele la ate hnei areto hmekuje hi, ngo hnene la nöjei tenge ewekë asë ka xulu qa ngöne la ine ula i Akötesie.’ ”—Mat. 4:1-4; Deu. 8:3.
9. Pine nemene matre loi e tro së a thipetrije la itre itupathi Satana ngöne la angeic a thele troa akökötrene la itre aja ne la ngönetrei së?
9 Ame enehila, tre, Satana mina fe a tupathi së me ajojezine la itre aja ka ej e kuhu itre hni ne la itre hlue i Iehova. Qa ngöne lai, loi e tro sa thele troa thipetrije la itre ewekë ka troa ahlëne la itre aja ne troa kuci ngazo; itre aja ka haöthe la fene ka ngazo celë. Kola qaja catrëne hnene la Tusi Hmitrötr ka hape: “Ke tha ’te kö nyipunie laka tha tro kö a hane sine la baselaia i Akötesie hnei ange ka tha meköti thina? The amenu nyipunieti kö ; ame angete nyi xetë, me itete thithi koi idola, me angete kuci ngazo, me angete hni koi fö, me itete qene sodoma . . . tha tro kö angate a hane sine la baselaia i Akötesie.” (1 Kor. 6:9, 10) Haawe, kola mama hnyawa e celë laka, ame la itre atr ka mele ne kuci ngazo, nge ka xele troa saze, tre, thaa tro kö angatr a mele ngöne la fene ka hnyipixe qa thei Akötresie.
10. Thenge la hna qaja ngöne Mataio 4:5, 6, nemene la ketre itupath hnei Satana hna amë matre angazone la aqane mele nyipici Iesu?
10 Drei la hna qaja hnene la Itre Hna Cinyihane göne lo itupathi hnei Iesu hna melëne ngöne la hnapapa: “Hnei diabolo hna tro sai nyidëti kowe la lapa ka hmitöt, me ati nyidë hune la he ne la ēnē, me hape koi nyidëti, ‘Maine cilieti la Hupuna i Akötesie, sheshëpi ; ke ase hë cinyihan, ka hape, “Tro anganyidëti a ahnithe kowe la nöjei angela i anganyidë thatraqai ’ö, nge tro angat’a kapa trongë eö hnei ite iwanakoim, wanga thëjë la iwanakoca i’ö hnei etë.” ’ (Mat. 4:5, 6) Kösë Satana hi lai a qaja ka hape, matre mama hnyawa pi laka, Iesu hi la Mesia. Ngo maine drei angeice ju hnei Iesu, ke, celë hi aqane ujë lai ka tria me ka nyi tru, nge thaa Akötresieti kö a kapa me sajuëne la thiina cili. Hnei Iesu hmaca kö hna catre mele nyipici koi Iehova, nge hnei nyidrëti pala hi hna sa jëne la Tusi Hmitrötr. Öni nyidrëti ka hape: “Kete ase hë cinyihan, ‘The tro kö eö a tupathi Joxu Akötesi ’ö.’ ”—Mat. 4:7; Deu. 6:16.
11. Tune kaa la aqane tupathi së hnei Satana, nge nemene hë la pun?
11 Maine jë tro Satana a thele troa tupathi së matre tro sa thele la itre aqane troa mama ka isapengön. Angeic a thele troa uku së troa nyitipune la aqane heetr me aqane iseji ka hnyipixe enehila, lo hna kuca hnene la itre atr ngöne la fene celë; hetrenyi mina fe lo itre nyine iamadrinë ka isazikeu memine la itre trepene meköt qa hnine la Tusi Hmitrötr. Ngo maine tro sa thipetrije la itre eamo qa hnine la Tusi Hmitrötr me nyitipune la fene celë, hapeu, tro kö la itre angela a thupë së elanyi qa ngöne la itre ethanyine hnene la aqane ujë celë? Ngacama hnei Davita Joxu hna ietra pine la ngazo hna kuca me Batheseba, ngo thaa trianyi nyidrëti kö hnene lo itre akötr ka xulu qa ngöne la itre huliwa i nyidrë. (2 Sam. 12:9-12) Loi e tro pala hi sa thupëne matre thaa tro kö sa tupathi Iehova, maine jë hnene la hna ce sinee me fen.—E jë la Iakobo 4:4; 1 Ioane 2:15-17.
12. Nemene lo itupathi hna cinyihane ngöne Mataio 4:8, 9, nge tune kaa la aqane ujë i Iesu?
12 Ame la ketre itupathi hnene la Diabolo hna amë qëmeke i Iesu ngöne la hnapapa, tre, ene la troa musi me kuci politik. Hnei Satana hna amamane la itre musi e cailo memine la lolo ne itre ej; nge öni angeice jë hi: “Tro ni a hamë cilie la nöjei ewekë cili, e tro cilieti a kei a thili koi ni.” (Mat. 4:8, 9) Drei la ketre aqane iaö, ene la troa thele tro Iesu a thili koi angeic me nuetriji Iehova! Ngacama ketre angela ka mele nyipici fe ekö, ngo hnei angeice hna ajane tro la itre atr a hane thili koi angeic; haawe, angela ka ngazo hë angeic, nge eje ekuhu hni angeice la meciune me iakötrë, ke Satana me Diabolo angeic. (Iako. 1:14, 15) Ngo isapengöi Iesu kö me angeic, ke, hnei nyidrëti pala hi hna thele troa mele nyipici kowe la Tretretro i nyidrëti e koho hnengödrai; qa ngöne lai, öni nyidrëti ka hape: “Satana, kötejë ; ke ase hë cinyihan, ka hape, ‘Tro eö a thili koi Joxu, Akötesi ’ö, me nyi hlue i anganyidëti hmekuje hi.’ ” Haawe, hnei Iesu hmaca hna thipetriji Diabolo, kola mama hnyawa ngöne la itre trenge ewekë i nyidrë. Thaa ajane kö la Hupuna i Akötresieti troa hane sine la fene i Satana, nge ketre thaa aja i nyidrëti kö troa nyi hluene la ka iakötrë!—Mat. 4:10; Deu. 6:13; 10:20.
“Thipe Tiji Diabolo Pi, Nge Tro Nyën’a Köte Qa Thei Nyipunie”
13, 14. (a) Ame la Satana a amamane koi Iesu lo itre musi asë e cailo, nemene la hnei angeice hna hamën? (b) Tune kaa la aqane thele Satana troa ajojezi së?
13 Ame lo Diabolo a amamane koi Iesu la itre musi e cailo fen, tre, angeice hi lai a hamëne la ketre musi hna thaa hane kö cilëne hnene la ketre atr. Maine jë kola mekune ekö hnei Satana ka hape, ame la hnei Iesu hna goeën, tre, celë hi ka troa upi nyidrëti troa cilëne la ketre musi ka hlemu e celë fen. Ame enehila, thaa Satana kö a hamë së la itre mus, ngo angeic a thele troa löthe me athixötrëne la itre hni së hnene la itre ewekë hne së hna goeën, me dreng, me mekun.
14 Satana la ka musinëne la fene celë. Fene mina fe la ihnatrapaime i angeic la itre aqane ithuemacanyi me iamadrinë, tune la televizio me itre xaa ewekë ju kö. Celë hi matre thaa sesëkötre kö së laka, ame la itre ewekë ne fen hne së hna goeëne me dreng, me e, tre, itre hna löth me haöth hnene la kuci ngazo me iakötrë. Ame la hna thele troa kuca hnene la itre ka huliwane la ‘publicité,’ tre, ene la troa akökötrene la aja the së troa pi hetrenyi asë la itre ewekë, ngacama thaa ka nyipi ewekë kö itre ej kowe la mele së. Celë hi aqane thele hnei Satana troa tupathi së hnene la itre mo hne së hna pi goeëne me dreng, me mekun. Ngo ame la easë a xele troa goeën, me drenge me e la itre ewekë hna upi së hnei Tusi Hmitrötr troa thipetrij, haawe, easë hi lai a qaja ka hape: “Satana, kötejë!” Qa ngöne lai, easë a nyitipu Iesu ngöne la easë a cile catre me nyipici ngöne la troa thipetrije la fene i Satana ka ngazo. Ketre, easë mina fe a amamane hnyawa laka, thaa hane kö së sine la fene i Satana, ngo easë pe la itretre Anyipicine i Iehova nge itre ka xötrethenge Keriso; easë ju hë ngöne la hna huliwa maine hna ini, ngöne la itre hnalapa së, maine pena cememine la itre sinee së.—E jë la Mareko 8:38.
15. Pine nemene matre ame la troa thipetriji Satana, tre, kola hape, tro pala hi së a hmek?
15 Aköni a tupathi Iesu hnei Diabolo matre angazone la aqane mele nyipici nyidrëti koi Akötresie, ngo thaa ie kö; thupene jë hi lai, “hna nue nyidëti pi hnei diabolo.” (Mat. 4:11) Ngo, thaa hna hmaca kö hnei Satana troa tupathi Iesu, pine laka kola qaja koi së ka hape: “Nge tixenuë hë la itupathi diabolo, ame hnei nyëne hna nue anganyidëti uti hë e kete ijin.” (Luka 4:13) Loi e tro pala hi sa olene koi Iehova ngöne la nöjei ijine easa atreine thipetriji la Diabolo. Ngo loi e tro fe sa thele pala hi la ixatua qa thei Akötresie, ke, tro Diabolo a bëeke hmaca ngöne la ketre ijine ka loi koi angeic; a thaa ngöne hmekuje kö la ijine easa hmek. Qa ngöne lai, loi e tro pala hi së a hmek, me hnëkë matre tro sa catre nyi hlue i Iehova me atrunyi nyidrë, ngacama tru catre la itre jole hne së hna cile kow.
16. Nemene la trenge catre hnei Akötresieti hna hamëne koi së, nge pine nemene matre loi e tro së a thithi matre hetrenyi la trenge catre cili?
16 Maine easa aja ixatua matre troa cile koi Diabolo, haawe, loi e tro sa catre thith, nge eje hi lai laka tro hë së a kapa la ketre trengecatre ka tru catr, hna jëne la uati hmitrötre i Akötresie. Celë hi lai ka troa xatua së troa kuca la itre ewekë, nge kola mama hnyawa laka thaa ijiji së kö troa kuca cememine la trenge catre së hmekuje hi. Nge hnei Iesu hna ahnithe kowe la itretre drei nyidrë laka, thaa hna cipaane kö la uati hmitrötr, ke öni nyidrëti ka hape: “Maine nyipunie ite [ate ka ngazo nge qa ngöne lai ite] ka menu a wangate hmekune troa hamëne la ite ewekë ka loi kowe la ite nekö i nyipunie, hawe, tha tro kö la Tetetro i nyipunie e koho hnengödrai a hamëne la Uati Hmitöte koi angete sipo anganyidë?” (Luka 11:13) Epi tro pala hi sa thithi me sipone koi Iehova troa hamëne koi së la uati hmitrötre i Nyidrë. Pine laka, e hetrenyi hë së lai trenge catr ka tru nge ka troa xatua së troa thipetriji Diabolo, haawe, ijiji së hë lai troa ngaa Satana. Ketre, loi e tro së a catre thithi lapa, nge tro fe sa xetrëne la ixetre ne isi ka pexeje i Akötresie matre ‘ateine [së] troa thipe tije la ite nyinyithina maine ite aqane ujë ka iaö i diabolo.’—Efe. 6:11-18.
17. Nemene lo ka amadrinë Iesu nge ka xatua nyidrëti troa thipetriji Diabolo?
17 Hetrenyi kö la ketre ewekë ka xatua Iesu ekö troa thipetriji Diabolo, nge ka troa xatua së mina fe enehila? Öni Tusi Hmitrötr ka hape: “Ate xomi hnine la [“sinöe,” MN], nge tha nyipine la hmahma, ngöne la madine hna amë xajawa i nyidë, ame hna munëti ngöne la götrane maca ne la therone i Akötesie.” (Heb. 12:2) Ijiji së fe troa öhnyi madrine hnene la hna sajuëne la musi cile i Akötresie, me atrune la ëje i nyidrë, nge hnene mina fe la hne së hna mekune pala hi la ahnahna, ene la mele ka thaa ase palua kö hna amë qëmeke së. Drei la madrine së ngöne la ijine troa apaatrenyi Satana memine la itre aqane nyinyithiina i angeic asë; nge tro hë la ‘ange ka menyike a hetenyi la nöj, nge tro angat’ a madine la tingetinge atraqat’! (Sal. 37:11) Qa ngöne lai, epi tro pala hi së a catre thipetriji Diabolo tui Iesu.—E jë la Iakobo 4:7, 8.
Tro Hë Nyipunieti A Sa Tune Kaa?
• Nemene la ka amamane laka Iehova a thupëne la nöje i Nyidrë?
• Hnei Iesu hna amamai tulu tune kaa ngöne la aqane troa cile koi Satana?
• Nemene la itre aqane tro nyipunieti a cile koi Satana?
[Thying]