Xatua Angatre Jë Troa Canga Bëeke Hmaca!
Ita Ne Thup göi 18 Januare 2009 e Normandie
Nyima 11 me 23 Qene Drehu
Xatua Angatre Jë Troa Canga Bëeke Hmaca!
“Ithuëti nyihunieti koi deti? Thawai cilieti la nöjei wesi ula ne shewengönie ka tha ase palua kö.”—IOANE 6:68.
1. Nemene la hnei Peteru hna qaja ngöne la kola nuetriji Iesu hnene lo itre ka xötrethenge nyidrë?
AME ngöne la ketre ijin, tre, hnene la itre ka xötrethenge Iesu Keriso hna nuetriji nyidrë, ke, xele kö angatr ma kapa la ketre ini hnei nyidrëti hna hamën. Öni nyidrëti jë hi e hnying kowe la itre aposetolo i nyidrë, ka hape: “Aja nyipunieti fe troa hmaca?”. Ene pe hnei Peteru hna sa, ka hape: “Joxu, ithuëti nyihunieti koi nyideti? Thawai cilieti la nöjei wesi ula ne shewengönie ka tha ase palua kö.” (Ioane 6:51-69) Pëkö ketre götran nyine troa tro kow. Thaa thene kö lo angetre Iudra la “nöjei wesi ula ne shewengönie ka tha ase palua kö,” nge ketre, ame enehila, thatreine kö tro sa öhne itre ej ngöne la Babulona Atraqatr, ene lo hmi ka thoi ka musi e cailo fen. Ame kowe lo itre mamoe ka tro trije la hna axö mamoe i Akötresie ngo ka ajane hmaca troa amadrinë Iehova, tre, “ijine hlë hë . . qa hna meköl” me bëeke hmaca kowe la hna axö mamoe.—Rom. 13:11.
2. Nemene la nyine tro sa lapa fë ngöne la itre mekuna së, göne lo itre götrane ka sihngödri maine itre götrane pena ne iameköti?
2 Hnei Iehova hna amamane laka Nyidrëti a kukehnine lo itre mamoe ka paatr ne la nöje i Isaraela. (E jë la Ezekiela 34:15, 16.) Ketre ceitune mina fe, kowe la itre qatre thup ene laka ajane angatre me hnëqa i angatre troa xatuane la ketre atr, ceitu me ketre mamoe ka nuetrije la hna axö mamoe. Maine angatre a athipe kowe la ketre trejine la hnëqa troa ini tus memine la ketre atr ka nanazij nge ka aja ixatua, haawe, nemene hë la nyine troa kuca e kola atre hnene la ka xomiujine la etid laka, hnene la atr cili hna kuca la ketre ewekë ka ngazo catr? Loi e tro la trejine a upe lai trejine ka nanazij troa qaja la hnei angeice hna kuca kowe la itre qatre thup matre tro angatr a thele nyine la jole celë, hune la tro angeice a ketre sipu hamë eamo göne la itre götrane ka sihngödr maine itre götrane pena ne iameköti. Ngo maine thaa tro kö angeic troa wange la itre qatre thup, haawe, tro la trejin a tro troa thuemacane la itre qatre thup.—Lev. 5:1; Gal. 6:1.
3. Tune kaa la aqane ujë hnene la atre thupëne la itre mamoe ka ala caa hadredr, ngöne la kola öhne hmaca lo mamoe ka paatr?
3 Ame ngöne lo hna cinyihane hnapan, tre, hne së hna qaja lo ceitune i Iesu göne la ketre atr ka trene mamoe, nge ala caa hadredr la etrun. Ame la kola paatre la ketre qa ngöne la hna axö mamoe, tre, hnei nyidrëti hna nue pe lo ala naitre naen (99), matre troa thele la mamoe ka paatr. Drei la madrine i nyidrë ngöne la nyidrëti a öhne hmaca lo lai mamoe cili! (Luka 15:4-7) Easë mina fe a madrine ngöne la kola bëeke hmaca hnene la ketre trejine ka nanazije kowe la hna axö mamoe i Akötresie. Maine jë hnene la ihnimi kowe la atre cili hna ukune la itre qatre thup memine la itre xaa atrene la ekalesia, troa wai angeic. Ketre, aja i angatre mina fe tro la trejine cili ka nanazij a bëeke hmaca kowe la hna axö mamoe, me hane kepe thangane ka loi qa ngöne la ixatua, me manathith i Akötresie. (Deu. 33:27; Sal. 91:14; Ite edomë. 10:22) Maine hetre ijine i angatre troa xatuane la ketre trejine ka nanazije troa bëeke hmaca kowe la ekalesia, haawe, nemene la nyine tro angatr a kuca?
4. Nemene la hne së hna trotrohnin qa ngöne la tusi Galatia 6:2, 5?
4 Maine jë ijije tro angatr a thuecatre kowe la ketre atr troa bëeke hmaca kowe la ekalesia, jëne la hna amamane hnyawa koi angeic laka, Iehova a hnime la itre mamoe i Nyidrë, nge Nyidrëti a ajane tro sa hamë Nyidrë la hne së hna atrein troa kuca. Kolo lai a qaja la troa inine la Tusi Hmitrötr me sine la itre icasikeu ne Keresiano, me hane cainöjëne mina fe la maca ka loi ne la Baselaia. Maine jë ijije tro sa e koi angeic la Galatia 6:2, 5 me qaja, ka hape, ijije tro la itre Keresiano a thue ithöeëne la itre ehnefe ne la itre xan, ngo “tro nöjei ate asë a isa thue ehnefen” xajawa i Iehova. Isa easë kö a isa lapaune koi Akötresie.
Hapeu, Hna Ananazijë Angatr Hnene La Hna “Kuke Hnine Kowe La Mele Celë”?
5, 6. (a) Pine nemene matre ka nyipi ewekë troa drenge hnyawa la itre trejine ka nanazij, ngöne la angatr a fe la itre aliene hni angatr? (b) Tune kaa la aqane troa xatuane la itre ka nanazij troa atrehmekune laka, thaa ka loi kö koi angatr troa thaa sine la itre icasikeu ne la ekalesia?
5 Nyipi ewekë tro la itre qatre thup memine la itre xaa trejine ka macaj, a drenge hnyawa la itre trejine ka nanazij, ngöne la nyudreni a isa fe la itre aliene hni nyudren. Pane mekune jë nyipunie laka, ketre qatre thupe nyipunie ka troa wange la lue trefëne ka nanazij pine la hna “kuke hnine kowe la fene celë.” (Luka 21:34) Maine jë hna sewe nyidroti trootro troa kuca la itre huliwa ne Keresiano, hnene la itre ejolene la mani maine hnene pena laka, kola elë catre la itre hnëqa e hnine la fami. Maine jë tro nyidroti a mekun, ka hape, ka nyipi ewekë tro nyidroti a pane mano; ngo ame cili, tre, ijije tro nyipunieti a amamane laka, thaa tro kö a xatua angatre hnene la hna lapa iananyi. (E jë la Ite Edomë 18:1.) Ijije tro nyipunieti fe a hnyingë angatr cememine la hni ka menyik, ka hape: “Hapeu, atraqatre kö la madrine i nyipunie thupene la hnei nyipunie hna hmaca troa sine la itre icasikeu? Tingetinge kö la mele i nyipunieti e hnine la fami? Hapeu, madrin qaathei Iehova pala hi la egöcatre i nyipunie?”—Neh. 8:10.
6 Maine tro la itre ka nanazije a mekune thele la itre hnying celë, haawe, tro hë angatr a atrehmekune, ka hape, pine laka thaa sine hë angatr la itre icasikeu, eje hi laka, angatre ha nanazije trootro ngöne la götrane la ua, nge pë hë manathithi hnei angatre hna kapa. (Mat. 5:3; Heb. 10:24, 25) Ijije tro lai a xatua angatr troa atrehmekune mina fe laka, paatre hë la madrine i angatr lo hna hetrenyi ekö qa ngöne la hna cainöjëne la maca ka loi. (Mat. 28:19, 20) Haawe, nemene la ewekë nyine tro angatr a kuca, cememine la inamacan?
7. Nemene la ixatua hna hamëne kowe lai itre ka tro trije la hna axö mamoe?
7 Öni Iesu, ka hape: “Wange kö nyipunie, wanga hacepi la ite hni nyipunie hnene la hna xeni atrun, me hna iji atrun, me kuke hnine kowe la mele celë . . . Hmekëneju nyipunie, me lapa thith, mate ateine nyipunie troa kötene la nöjei ewekë asë celë ka tro ha traqa.” (Luka 21:34-36) Ame la itre ka nuetrije la hna axö mamoe ngo ka ajane hmaca troa kapa lo itre manathithi ekö, tre, nyipi ewekë tro angatr a sipone la uati hmitrötr memine la ixatua qaathei Akötresie, me ujë thenge la itre thith i angatr.—Luka 11:13.
Hapeu, Hna Athixötrë Angatre Kö?
8, 9. Tune kaa la aqane tro nyipunieti a thele ewekë memine la ketre trejine hna athixötrën?
8 Pine laka ka ngazo asë la itre atr, maine jë ijije troa athixötrëne la ketre hnene laka, kola isazikeu la itre mekun. Ame la itre xan, tre, hna athixötrë angatr ngöne la kola ena la itre trepene meköti Akötresie hnene la ketre atr ka thiina ka lolo hnine la ekalesia. Maine hna ananazijëne la ketre trejine hnene lai, haawe, ijije tro la qatre thup ka iwai a amamane koi angeic laka, thaa Iehova kö a athixötrëne la ketre atr. Pine nemene matre tro la ketre atr a thë la imelekeu i angeice me Iehova memine fe la nöje i Nyidrë? Hapeu, thaa ka loi kö ekö tro angeic a catre nyihlue i Akötresie, me mejiune laka, ame la “ate amekötine la fene hnengödrai asë,” tre, atre hi Nyidrëti la itre ewekë hna kuca, nge easenyi hë tro Nyidrëti a mus ngöne la meköt? (Gen. 18:25; Kol. 3:23-25) Maine hna athixötrëne la ketre atr, ene pe kei ju angeic e thupen, tre, thaa ka loi kö e tro angeice a lapa tune lai nge thaa hna thele kö troa mejë hmaca.
9 Ame ngöne la kola thele troa xatuane la ka nanazij ngöne la götrane la ua, tre, maine jë tro la ketre qatre thup a qaja, ka hape, kola tro la itre drai nge kola wanga atrehmekune hnene la itre xan laka, ame la ewekë ka athixötrë angatr, tre, thaa ka nyipi ewekë menu kö. Eje hi laka, thaa ijije kö troa huti la ewekë ka sewe angatr troa nyihlue i Iehova. Maine kola thixötre la ketre trejine ka nanazij thupene la hna haji angeic, haawe, ijije troa xatua angeice hnene la hna sine thele ngöne la thith laka, ka nyipi ewekë catre koi angeic la eamo cili, nge loi e thaa tro pi kö la ihaji a athixötrë angeic.—Sal. 119:165; Heb. 12:5-13.
Hapeu, Hna Athixötrëne Kö La Ketre Atr Hnene La Ketre Ini Hna Hamën Hnei Tusi Hmitrötr?
10, 11. Nemene la mekune ka lolo ka ijij troa xom, matre troa xatuane la itre ka xele ma kapa la itre xaa ini hna hamëne hnei Tusi Hmitrötr?
10 Ame la itre xaa atr, tre, hnei angatre hna nue la hna axö mamoe i Akötresie, ke, thaa kapa kö angatr la itre xaa ini hna qaja hnine la Tusi Hmitrötr. Ame lo angetre Isaraela hna thapa qa ngöne la hna ithahluë e Aigupito, nge hnei angatre hna “canga thëthëhmine la ite hnei [Akötresieti] hna kuca” koi angatr, nge “tha [hnei angatre kö hna] teqene . . la eamo i nyidë.” (Sal. 106:13) Maine jë ijije troa xatuane la trejine ka nanazij hnene la hna amekunë angeice laka, ame la “hlue ka nyipici me ka inamacan” tre, angeice a thawa la xeni ka sisitria ngöne la götrane la ua. (Mat. 24:45) Ame la atre jë la nyipici hnene la ketre atr, tre, hnene la hlue cili. Qa ngöne lai, nemene la kepin matre thaa angeice kö a catre troa tro hmaca ngöne la nyipici?—2 Ioane 4.
11 Ame ngöne la kola catre xatuane la itre ka nuetrije la hna axö mamoe i Akötresie, tre, maine jë ijije tro la qatre thup a amexeje koi angatr la pengöne ne lo itretre drei Iesu ka nue nyidrë, ke, thaa kapa kö angatre la ketre ini hnei nyidrëti hna hamën. (Ioane 6:53, 66) Maine tro angatr a thë la imelekeu i angatr me Iesu memine la itre hlue i nyidrë, haawe, tro ha paatre la aja i angatr kowe la itre ewekë ngöne la götrane la ua, memine fe la madrine i angatr. Hapeu, ame lo itre ka thaa hane sine hmaca kö lo itre icasikeu ne la ekalesia, tre, hane kö angatre öhne la ketre götrane ka hamë xeni ka sisitria ngöne la götrane la ua? Ohea!
Hapeu, Hna Kuca La Ketre Ewekë Ka Ngazo?
12, 13. Maine kola qaja amaman hnene la ketre trejine ka tro trije la hna axö mamoe, ka hape, hnei angeic hna kuca la ketre ngazo ka tru, haawe, tune kaa la aqane troa xatua angeic?
12 Hnene la itre xan hna nue la huliwa ne cainöj me trije la itre icasikeu, ke, hnei angatre hna kuca la ketre ngazo ka tru. Maine jë angatr a mekun, ka hape, e tro angatre a qaja amamane la ngazo i angatr kowe la itre qatre thup, tre, tro ha upi angatr e tröne la ekalesia. Ngo thaa tro kö a upi angatr, e hnei angatre hna hmaca troa kuca lai ngazo cili, me ietra hnyawa. (2 Kor. 7:10, 11) Ngo tro pe a kepe angatr, nge ketre tro hë la itre qatre thupe a hamë angatr la ixatua ka ijij ngöne la götrane la ua.
13 Maine ketre trejine nyipunie ka macaj, nge hna athipe koi nyipunie troa xatuane la ketre trejine ka nanazij; hapeu, nemene la nyine tro nyipunieti a kuca, e angeice a qaja koi nyipunie, ka hape, hnei angeice hna kuca la ketre ngazo ka tru? Tune lo hne së hna wange hë, nyipi ewekë tro nyipunieti a thuecatre koi angeice troa qaja lai kowe la itre qatre thup, hune la tro nyipunieti a lö hnin la jole cili. Maine thaa ajane kö angeice troa kuca lai, haawe, tro nyipunieti a amamane koi angeic la aqane nyipi ewekë koi nyipunie la atresiwa i Akötresie memine la mele ne la ekalesia, e hna ujë thenge la itre hna amekötine i Akötresie, tune la troa metrötrëne la itre huliwa. (E jë la Levitiko 5:1.) Ame la itre qatre thup, tre, atrei angatr la nyine troa kuca matre troa xatuane la ketre trejin ka ajan troa bëeke hmaca me mele thenge la aja i Akötresie. Ka nyipi ewekë troa haji angeic cememine la ihnim. (Heb. 12:7-11) Maine kola atrehmekune hnene la atr cili laka, hnei angeice hna tria xajawa i Akötresie me hmaca troa kuca la ewekë cili, me amamane fe laka angeice a ietra hnyawa, haawe, tro hë la itre qatre thup a xatua angeic nge ketre ijije hë tro Iehova a senge trije la ngazo i angeic.—Is. 1:18; 55:7; Iako. 5:13-16.
Atraqatre La Madrin Ngöne La Kola Bëeke Hmaca La Ketre Nekön
14. Sipu qaja jë la aliene la ceitune i Iesu göne lo nekönatre ka mejengön.
14 Ame ngöne la kola thele troa xatuane la ketre mamoe ka tro menu, tre, ijije troa amexeje lo ceitune i Iesu hna qaja ngöne Luka 15:11-24. Ame ngöne la ceitune cili, tre, hnene la ketre trahmanyi hna huliwane menune la mani hna hamë angeic hnene la keme i angeic. Ene pe angeice ha xelene catrëne la mele hnei angeice hna melën. Mecijine hë angeic, ketre, angeice ha mekun la hnepe lapa i angeic; ene pe axeciëne jë hi angeic troa bëeke hmaca koi hnalapa. Hnene la keme hna öhnyi angeic nge nanyi pala kö angeic, ame hnei nyidrëti hna nyenyape me kei hune la nyinawa i angeic, me idremi me angeic, ke, atraqatre la madrine i nyidrë. Ame la kola mekune thele la ceitune celë, tre, ijije troa ukune la ketre atr ka nue la hna axö mamoe troa bëeke hmaca. Ngöne laka, calemi catre hë la troa lepe apaatrene la fene ka ngazo celë, eje hi laka, loi e tro angeic a canga ‘bëeke koi Iehova.’
15. Pine nemene matre kola nuetrije trootro la ekalesia hnene la itre xan?
15 Thaa ceitu hnyawa kö la itre xaa atr ka nuetrije la ekalesia memine lai nekönatre ka mejengön. Ame la itre xan, tre, angatr a nango nue trootro la ekalesia, ceitu memine la ketre bootr hna thaa othe a kola nango iananyi trootro memine la ihnadro. Ame la itre xan, tre, hnene laka angatr a hnehengazone menune la itre ejolene la mel, haawe, angatre ha wange sixane la itre imelekeu i angatr me Iehova. Ketre, hnene la itre xan hna nue angatre kö troa athixötrë angatr hnene la ketre trejin ne la ekalesia, maine hnei angatre hna nuetrije pena la ekalesia pine laka, thaa kapa kö angatre la ketre ini hna hamën hnei Tusi Hmitrötr. Ame la itre xan, tre, hnei angatre hna kuca la ketre ngazo ka tru. Ngo ijije troa xatua së hnene la itre eamo hna hamën göne la itre götrane celë, matre troa xatuane la itre ka nuetrije la hna axö mamoe pine la itre kepin celë maine itre xaa kepine kö, troa canga bëeke hmaca.
“Ekölö Hi Ni Neköng, Eni a Italofa Me Hmunë!”
16-18. (a) Hnene la ketre qatre thupe hna xatuane tune kaa la ketre trejine laka, itre macatre ne nanazije angeic? (b) Nemene la kepine matre kola nanazije la trejine cili, tune kaa la aqane xatua angeic, nge hna kepe angeice tune kaa hnene la ekalesia?
16 Hnene la ketre qatre thup Keresiano hna qaja, ka hape: “Ame la lapa ne qatre thupe hun, tre, eahuni a madrine ngöne la kola tro troa wange la itre trejine ka nanazij. Eni a mekune la ketre trejin trahmanyi hnenge hna ini tusi memin me xatuane mina fe troa atre la nyipici. Traqa koi 25 lao macatre ne nanazije angeic, nge ame la jol hnei angeice hna qëmeke kow, tre, thaa ka hmaloi kö; haawe, hnenge hna qaja koi angeice ka hape, ijije troa xatua angeic hnene la hna trongëne la itre trepene meköti ne la Tusi Hmitrötr. Ame ngöne la itre drai thupen, tre, angeice ha nyiqaane traqa kowe la Uma ne Baselaia nge hane kapa mina fe troa inine la Tusi Hmitrötr matre troa xatua angeice troa acatrene la aja ka eje thei angeic, ene la troa bëeke hmaca kowe la hna axö mamoe.”
17 Pine nemene matre kola nanazije lai trejin? Angeic a qaja, ka hape: “Hnenge hna nyiqaane hnine catrëne la itre ewekë ne fen hune la itre ewekë ne la götrane ua. Thupene lai, hnenge hna hmaca troa ini tus me cainöj, me hane sine mina fe la itre icasikeu. Thaa wanga atrehmekune fe kö ni laka, thaa eni hmaca kö a sine la itre icasikeu. Ngo hna xatua ni troa bëeke hmaca hnene la aja ka eje thene la qatre thup.” Kola nango co la itre jole ne la trejine cili hnene la hna kapa troa inine la Tusi Hmitrötr. Öni angeice, ka hape: “Hnenge hna wanga atrehmekun laka, ame la itre ewekë ka paatr ngöne la meleng, tre, ene la ihnim me ixatua qaathei Iehova me qaathene mina fe la organizasio i Nyidrë.”
18 Tune kaa la aqane ikep hnene la ekalesia kow la trejine cili? Öni angeice, ka hape: “Kösë ceitunge memine lo nekönatre ka mejengön, lo hna qaja hnei Iesu Keriso. Kola qaja koi ni ngöne la ijine cili hnene la ketre trejine föe ka qatre hë laka, eahlo pala hi a catre nyihlue i Iehova enehila, ka hape, ‘Ekölö hi ni neköng, eni a italofa me hmunë!’ Hna ketr hnyawa la hning hnene la itre trenge ewekë cili. Eni a atrehmekune hnyawa laka, ame la ekalesia, tre, kösë hnalapang. Nge eni a ajane troa amamane la hni ne oleng kowe la ihnim me keukawa me xomihni ahoeanyi memine la hni ne ajan hna amamane koi ni hnene lai qatre thupe cili memine la ekalesia asë. Hna xatua ni hnene la ihnim i angatr koi Iehova me kowe la atre lapa easenyi angatr, troa bëeke hmaca kowe la hna axö mamoe.”
Thuecatre Jë Koi Angatr Troa Canga Enij!
19, 20. Tune kaa la aqane tro nyipunieti a ithuecatre kowe la itre ka nanazij troa canga bëeke kowe la hna axö mamoe, nge tune kaa la aqane troa amamane koi angatre ka hape, Akötresieti a treqene tro sa kuca la hne së hna atreine koi Nyidrë?
19 Easa melëne la itre drai tixenuë, nge ketre calemi catre hë la pun kowe la fen ka ngazo celë. Haawe, loi e tro sa ithuecatre kowe la itre ka nanazij troa hane sine la itre icasikeu. Canga thuecatre jë koi angatre troa nyiqaane sine itre ej. Amekunë angatre hmaca jë laka, Satana a thele troa thë la itre imelekeu i angatr me Akötresie, me uku angatre mina fe troa mekun, ka hape, ijije tro angatr a hetrenyi la itre manathithi ne la mele elany, e hnei angatre hna nuetrije la nyipi hmi. Ijije tro nyipunieti a akeukawane la itre hni angatre jëne la hna qaja, ka hape, tro hmekuje hi la itre ka nyihlue i Iesu me mele nyipici koi nyidrë, la itre ka troa kepe thangane ka loi qa ngöne la hna mano i nyidrë.—E jë la Mataio 11:28-30.
20 Amekunëne hmaca jë kowe la itre ka nanazije laka, Akötresieti a treqene tro sa kuca la hne së hna atrein. Ame ngöne la kola xöjetriji Maria, xa i Lazaro, pine la hna sië Iesu hnene la ketre wakacu ka tru thupen, qëmekene la tro nyidrëti a mec, öni nyidrëti, ka hape: “The qeje nyidoti kö. . . . Ase hë nyidoti kuca la hnei nyidoti hna atein.” (Mar. 14:6-8) Hnei Iesu hna qaja atrune la ketre sine föe ka hamëne la hnei eahlo hna hetrenyi kowe la ēnē. Ketre, hnei eahlo mina fe hna kuca la hnei eahlo hna atrein. (Luka 21:1-4) Ijije tro së fe a hane sine la itre icasikeu ne Keresiano me hane cainöjëne la maca ka loi ne la Baselaia. Jëne la ixatua qaathei Iehova, ijije tro mina fe la itre ka nanazije enehila a hane kuca la itre ewekë cili.
21, 22. Nemene la ewekë ka troa akeukawane la hni ne lai itre ka bëeke hmaca koi Iehova?
21 Maine luelu pala kö la ketre trejine ka nanazije troa sine la itre icasikeu, haawe, maine jë ijije tro nyipunieti a amekunë angeice hmaca la madrin hna amaman, ngöne la kola bëeke hmaca koi hnalapa hnene lo nekönatr ka mejengön. Ketre eje fe la madrine cili thene la itre trejin, ngöne la kola bëeke hmaca kowe la ekalesia hnene la itre ka nanazij. Haawe, ithuecatre jë koi angatre troa canga ujë matre troa thipetriji Diabolo me fedre catre koi Akötresie.—Iako. 4:7, 8.
22 Ame la itre ka bëeke hmaca koi Iehova, tre, kola treqe angatre hnene la ketre ikep ka keukawa. (Ite teije. 3:40) Ame ngöne la angatre ekö a nyihlue i Akötresie, tre, nyimutre la itre manathithi hnei angatre hna kapa. Ketre, nyimutre fe la itre manathithi elanyi hna troa kapa hnene la itre ka canga bëeke hmaca kowe la hna axö mamoe!
Tune Kaa La Aqane Tro Nyipunieti a Sa?
• Tune kaa la aqane tro nyipunieti a xatuane la ketre Keresiano hna athixötrën nge ka nanazij?
• Nemene la mekune ka lolo ka ijije troa xatuane la ketre trejine ka tro trije la hna axö mamoe i Akötresie, pine laka, thaa kapa kö angeic la ketre ini?
• Tune kaa la aqane tro sa xatuane la ketre trejine ka luelu troa bëeke hmaca kowe la ekalesia?
[Thying]