Ketre Hatren La Ihnimi Gufa I Iehova La Troa Ketre Atre I Nyidrë
Troa Xome La Ita Ne Thup Celë e 8 Maac Me Wiike Cili
Ketre Hatren La Ihnimi Gufa I Iehova La Troa Ketre Atre I Nyidrë
“Ite ate i [Iehova] shë.”—ROM. 14:8.
1, 2. (a) Nemene la manathithi ka tru hne së hna kapa? (b) Nemene la itre hnyinge hne së hna troa ce ithanatan?
DREI la ketre manathithi ka tru hnei Iehova hna hamëne kowe la nöje Isaraela, ngöne la Nyidrëti a qaja, ka hape: “Tro nyipunieti a atu ka conge hune la nöjei nöje asë.” (Eso. 19:5) Ame enehila, tre, ketre manathithi ka tru mina fe kowe la itre Keresiano ne la ekalesia troa itre atre i Iehova. (1 Pet. 2:9; Hna ama. 7:9, 14, 15) Celë hi la ketre manathithi ka troa ithue loi koi së uti hë epine palua.
2 Nyipici laka ketre manathithi la troa ketre atre i Iehova, ngo ketre hnëqa mina fe lai ka tru. Kola hnyingëne thele hnene la itre xan, ka hape: ‘Ijije kö tro ni a eatrëne asë la itre ewekë hnei Iehova hna upi ni troa kuca? Maine tro ni elanyi a kuca la ngazo, hapeu tro jë kö Nyidrëti a thipetriji ni? Maine tro ni a ketre atre i Iehova, hapeu tro jë kö lai a xome acone la meleng?’ Ka nyipi ewekë catr troa ce wange la itre mekune celë. Ngo hetrenyi la ketre hnying nyine tro sa pane ce ithanatan, kola hape: Nemene la itre thangane ka loi hna kapa qa ngöne la hne së hna ketre atre i Iehova?
Jëne Manathithi La Troa Ketre Atre i Iehova
3. Hnei Rahaba hna kepe thangane tune kaa qa ngöne la hna iëne troa nyihlue i Iehova?
3 Hapeu, hetre thangane ka loi kö hne së hna kapa hnene la itre atr ka ajane troa itre atre i Iehova? Tro sa pane ce wange la pengö i Rahaba, ketre föe ne gojenyi ka mele ekö e Ieriko. Nyiidro mina fe la ketre föe hna hian ngöne la aqane hmi ka sis, ene la troa thili kowe la itre haze ne Kanana. Ngo ame la nyiidro a drei mejene la aqane nue hnei Iehova kowe la angetre Isaraela troa thapa la itre isi, tre, e cili hi la nyiidro a atrehmekune laka, Iehova la nyipi Akötresie. Celë hi kepine matre hnei nyiidro hna nue la mele i nyiidro matre troa juetrëne la itre atre i Akötresie, me sipo angatr troa hane amele nyiidro. Önine la Tusi Hmitrötr, ka hape: “Kete . . . tha hna qaja ameköti Rahaba föe ne gojenyi hnene la ite huliwa, ngöne la hnei nyido hna kapa aloine la lue maca, me upi nyido ngöne la ketre gojenyi kö?” (Iako. 2:25) Pane mekune jë së la itre manathithi ka xulu koi Rahaba ngöne lo nyiidro a hane ketre atrene la nöje ka hmitrötre i Akötresie, nöje hna inine ngöne la Wathebo i Nyidrëti cememine la ihnimi me thiina ka meköt. Drei la madrine i nyiidro troa trije la mele i nyiidro ka hekö! Hnei nyiidro hna faipoipo memine la ketre atre i Isaraela me hane hiane la neköi nyiidro nekö trahmany, Boaza la ëjen, matre troa ketre atr ka thiina ka loi xajawai Akötresie.—Ios. 6:25; Rutha 2:4-12; Mat. 1:5, 6.
4. Pine laka hnei Rutha hna iëne troa nyihlue i Iehova, nemene hë la itre thangane hnei angeic hna kapa?
4 Rutha la ketre föe ne Moaba ka iëne troa hane nyihlue i Iehova ekö. Maine jë hnei eahlo mina fe hna hane thili koi Kemosa memine lo itre xaa haze ne Moaba ekö, ngöne lo eahlo a jajiny; ngo hnei eahlo hna atre la nyipi Akötresie ene Iehova, me faipoipo memine la ketre atre i Isaraela ka traqa ngöne la nöje i eahlo troa thele hna zae. (E jë la Rutha 1:1-6.) Ame pë hë e thupen, kola bëeke hmaca a tro Betheleema hnei Naomi. Hna xötrethenge eahlo hnene lo lue tresi eahlo, ene Rutha me Orepa, ngo hnei Naomi hna iele nyidro troa lapa ngöne la nöje i nyidro. Eje hi laka, thaa tro kö a hmaloi koi nyidro troa mele e Isaraela. Maine nyipici laka hnei Orepa hna “hmaca . . . kowe la nöjei sine i [nyiidro] memine la ite haze i [nyiidro],” ngo ame Rutha, tre, hnei angeic pë hë hna ce tro me Naomi. Hnei angeichna ujë thenge la lapaune i angeic, nge ketre, atre hnyawa hi angeic la pengöne la Akötresie hnei angeic hna ajan troa nyihluen. Haawe, öni Rutha jë hi koi Naomi, ka hape: “The iele ni kö troa nue tiji eapo, me hmaca qa thei eapo, ke ame la tro eapo kowe la kete tro fe ni kow; nge ame la tro eapo a lapa ngöne kete tro fe ni a lapa ngön; ame la nöjei ate i eapo nöjei atenge fe; ame la Akötesi eapo Akötesingöti fe.” (Rutha 1:15, 16) Pine laka hnei Rutha hna iëne troa nyihlue i Iehova, ene pe hnei angeic hna hane kepe thangane ka loi qa ngöne la Wathebo i Akötresie; nge eje e hnine la Wathebo cili la itre hna amekötin thatraqane la itre sine föe me itre puafala, memine fe lo itre atr ka pëkö götranen. Ame lo angeic thei Iehova, tre, angeic a atre la mele madrin, me mele tingeting, me mele xetietë mina fe.
5. Nemene la hnei epuni hna öhne thene la itre ka nyihlue i Iehova cememine la nyipici?
5 Maine jë hetrenyi la itre xaa atr hnei epuni hna atre, ka hane nue la mele i angatre koi Iehova, nge itre macatre ne nyihlue i Nyidrëti hë hnei angatr. Pane hnyingë angatre jë la itre manathithi hnei angatre hna kapa qa ngöne la hna nyihlue i Nyidrë. Ngacama hetrenyi la itre hnepe jol hnei angatr hna cile kow ngöne la mele i angatr, ngo kola mama hnyawa la enyipicine la itre trenge ewekë ne la atre cinyihane la salamo, ka hape: “Manathith la nöj’ e Iehova la Akötesi angat!”—Sal. 144:15.
Thaa Ka Sasaithi Tulu Kö La Itre Hna Amekötine Hnei Iehova
6. Pine nemen matre thaa tro kö sa xou, hnene la hna mekun, ka hape, ma thaa ijiji së kö troa kuca la itre ewekë hnei Iehova hna thele the së?
6 Maine jë easa isa hnyingëne thel, ka hape, maine ijiji së kö troa eatrëne asë la itre hnei Iehova hna amekötine koi së. Canga cile hnö hi së la easa mekune, ka hape, easa troa nyihlue i Akötresie me mele thenge la hna qaja hnine la Wathebo i Nyidrë, me tro fë la atresiwa i Nyidrë. Drei la ketre ceitun, hnei Mose hna mekun, laka, thaa ijiji angeice kö troa tro Aigupito matre troa ithanata kowe la nöje Isaraela me koi Farao. Ngo thaa ka sasaithi tulu kö la hnei Akötresieti hna thele thei Mose. Hnei Iehova hna ‘köjane koi angeic la nyine troa kuca.’ (E jë la Esodo 3:11; 4:1, 10, 13-15.) Pine laka hnei Mose hna kapa la ixatua cili, haawe, hetre madrine hnei angeice hna kapa qa ngöne la hna kuca la aja i Akötresie. Casi hi la aqane ujë i Iehova ekö me enehila, laka, thaa Nyidrëti kö a upi së troa kuca la hne së hna thatrein. Atrehmekune hi Nyidrëti laka, itre atr ka thaa pexeje kö së, nge eje thei Nyidrë la aja troa xatua së. (Sal. 103:14) Thaa ka ithahluë kö la troa xome la tulu i Iesu ngöne la aqane troa hmi koi Akötresie, ngo ka iakeukawanyi pe, ke, hetrenyi hë la itre xaa atr ka kepe thangan ka loi qa ngöne la aqane mele ka tune lai, nge ketre, celë hi la ka amadrinëne la hni Iehova. Öni Iesu, ka hape: “Trohemi koi ni, . . . nge tro ni a amanonyi nyipunie. Xomejë la nyine isilikeunge hui nyipunie me inine theng; ke menyike ni, me ipië la hning.”—Mat. 11:28, 29.
7. Pine nemen matre ijije tro epuni a lapaun, laka, tro Iehova a xatua epuni troa kuca la itre ewekë hnei Nyidrëti hna thele thei epun?
7 Tro pala hi Iehova a hamëne koi së la ixatua ka ijij, e hne së hna catre lapaune kowe la trenge catre i Nyidrë. Drei la ceitune i Ieremia ekö, ketre atr ka thaa hane kö ithaithanata ngo ka nango lapa pe hi. Celë hi kepin matre, ame la Iehova a ië angeic troa perofeta i Nyidrë, tre, öni angeic, ka hape: “Ekölö hi ni, Joxu Iehova, hana xajawatin, tha ’teine kö ni troa ewekë, ke nekönate ni.” Hnei angeice mina fe hna qaja e thupen, ka hape: “Tha tro kö ni a . . . ewekë hmaca ngöne la atesiwa i nyidë.” (Iere. 1:6; 20:9) Ngo hnene laka hnei Iehova hna hamë ithuecatre koi angeic, ene pe atreine hë angeice tro fë koi 40 lao macatre, la ketre maca hna xele ma dreng hnene la itre xaa atr. Anyimua akeukawane Iehova la hni angeic hnene la hna qaja, ka hape: “Ini a ce me eö troa thupë eö me amele eö.”—Iere. 1:8, 19; 15:20.
8. Tro sa amamane tune kaa, ka hape, easa lapaune koi Iehova?
8 Tune la aqane hamëne Iehova la trenge catre koi Mose me Ieremia, haawe, tro mina fe Nyidrëti a xatua së troa eatrëne la itre hnei Nyidrëti hna amekötine kowe la itre Keresiano enehila. Ame la ewekë ka sisitria catr nyine troa kuca, tre, ene la troa lapaune koi Nyidrë. Kola qaja hnei Tusi Hmitrötr, ka hape: “Lapauneju koi Iehova hnene la hni ’ö ka pexej, ngo the lapa qale kö kowe la hnei ’ö hna trotrohnin. Mekuneju koi nyidë ngöne la nöjei goje i ’ö asë, nge tro pena nyidëti a amekötine la ite jë i ö.” (Ite edomë 3:5, 6) Easa amamane laka, easa lapaune koi Iehova hnene la hna thele troa kepe thangane qa ngöne la ixatua hnei Nyidrëti hna hamë së, jëne la Wesi Ula me ekalesia i Nyidrë. Maine tro sa nue Iehova troa eatrongë së ngöne la mele së, eje hi laka, pëkö ketre ewekë ka troa sewe së troa mele nyipici koi Nyidrë.
Iehova a Thupëne La Itre Atre i Nyidrë, Angatr Isa Ala Caas
9, 10. Thenge la hna thingehnaeane ngöne Salamo mekene 91, tro ha thupë së tune kaa?
9 Hetrenyi la itre xan ka mekune troa nue la mele i angatr koi Iehova; angatr a cile hnö me xou, wanga kuca ju la ngazo, me thiina ka thaa ijiji Akötresie, ene pe tro ha thipetriji angatre hnei Nyidrë. Loi pe, Iehova a hamëne koi së la ixatua ka ijij matre troa thupëne hnyawa la aqane imelekeu së me Nyidrë. Tro sa pane ce wange la aqane qeje pengöne lai ngöne la mekene 91 ne la tusi Salamo.
10 Drei la itre pane mekune hne së hna nyiqaane e ngöne lai tusi salamo, kola hape: “Kola jilapa ngöne la ahnuene la Kapucatin asë hnene la ate lapa ngöne la ga sihngödi ne la Kasisitia. Tro ni a ulatine koi Iehova, Cilieti la hniteng, me hnapong, me Akötesingö; ini a lapaune kow. Ke hana wang, tro nyidëti a uni eö qa ngöne la hnö ne la ate hnö.” (Sal. 91:1-3) Akötresieti a ahnithe amë koi së e celë, ka hape, tro Nyidrëti a thupëne la itre ka hnimi Nyidrë me lapaune koi Nyidrë. (E jë la Salamo 91:9, 14.) Ngo Nyidrëti a thupë së tune kaa? Nyipici laka, hnei Iehova hna thupëne ekö la itre xaa hlue i Nyidrë ngöne la götrane la ngönetrei; ame ngöne la itre xaa ijin, hnei Nyidrëti mina fe hna ujë tune lai, göne hi matre troa thupëne lo itre xötrapane ne lo Mesia hna thingehnaean. Ngo nyimutre mina fe la itre xaa atr ka mele nyipici hna akalabusine me axösisin, me humuth; itre hatrene hi la itre aqane nyinyithiina i Satana matre troa thë la aqane mele nyipici angatr koi Akötresie. (Heb. 11:34-39) Hnene la itre atr cili hna atreine xomihni ahoeany, pine laka, hnei Iehova hna thupë angatr ngöne la götrane la ua, qa ngöne la itre ewekë ka hetre ethan nge ka troa angazone la aqane mele nyipici angatr koi Akötresie. Haawe, trotrohnine hë së laka, Iehova a thingehnaeane ngöne la tusi Salamo mekene 91, ka hape, tro pala hi Nyidrëti a thupë së ngöne la götrane la ua.
11. Nemene la “ga sihngödi ne la Kasisitia,” nge drei la itre atr hnei Akötresieti hna thupën e cili hnin?
11 Ame la “ga sihngödi ne la Kasisitia” hna qaja hnene lo atre cinyihane la salamo, tre, ej a nyihatrene la ketre götrane hnë tro sa mele xetietë ngöne la götrane la ua. Ame la itre atr hna könën hnei Akötresie troa hane hunuma e cili hnin, tre, hna thupë angatr qa ngöne la itre ewekë me itre atr ka troa angazone la lapaune me ihnimi angatr koi Nyidrë. (Sal. 15:1, 2; 121:5) Ka sihngödri la götrane cili, ke, thatreine kö troa atrehmekune lai hnene la itre atr ka pëkö lapaun. Iehova a thupën e cili la itre atr ka qaja, ka hape: ‘Cilieti la . . . Akötesingö; ini a lapaune kow.’ Maine tro pala hi sa zae ngöne la hnapo cili, haawe, thaa tro hë sa hnehengazo menu, ka hape, ma tro hë Akötresieti a thipetriji së hnene la hna kei ngöne la ketre hnö i Satana, lo “ate hnö.”
12. Nemene la itre ewekë ka troa angazone la aqane imelekeu së me Akötresie?
12 Nemene la itre ewekë ka troa angazone la aqane imelekeu së me Akötresie? Kola qeje pengöne hnene la atre cinyihane la salamo la itre ewekë cili, laka, “meci ka sholeshol’ ate tro agö e melöhlem” la ketre, nge ame ketre, tre, “meci ka ngazothan’ ate iapatenyi e hnaipajö”. (Sal. 91:5, 6) Ala nyimu hë la itre tha ne la “ate hnö” ka kei kowe la aja ka ngazo troa ketre sipu mus. (2 Kor. 11:3) Ame pena la itre xan, tre, hna jeli angatr hnene laka hnei angatr hna akökötrene la meciun e kuhu hni angatr, me pi draië me aja mo. Ketre, angeic a amenune la itre xan hnene la hna atrune la itre mekuna i atr, tune la troa isa pi mama fë nöjen, me sajuëne la ini celë, ene laka ka xulu xan la itre ewekë, memine fe la hmi ka thoi. (Kol. 2:8) Nge ketre, nyimutre la itre ka kei kowe la kuci ngazo. Hnene la itre ewekë cili ceitu me ketre meci ka solesol, hna ukune la itre milio lao atr troa trije la ihnimi angatr koi Akötresie.—E jë la Salamo 91:7-10; Mat. 24:12.
Aqane Troa Thupëne La Ihnimi Epuni Koi Akötresie
13. Iehova a thupë së tune kaa qa ngöne la itre ewekë ka troa angazone la mele së ngöne la götrane la ua?
13 Iehova a thupëne tune kaa la nöje i Nyidrë qa ngöne la itre ethanyine la itre ewekë cili ngöne la ua? Önine la atre cinyihane la salamo, ka hape: “Tro nyidëti a ahnithe kowe la ite angela i nyidë thatraqai ’ö, mate troa thupë eö ngöne la ite jë i ’ö asë.” (Sal. 91:11) Kola eatrongë së me thupë së hnene la itre angela e koho hnengödrai, matre tro pala hi sa cainöjëne la maca ka loi. (Hna ama. 14:6) Ngo thaa itre angela hmekuje kö; kolo fe a hane xome hnyawa la Tusi Hmitrötr hnene la itre qatre thup Keresiano matre troa hamëne la itre ini ka troa thupë së matre thaa tro kö a iaö së hnene la itre aqane mekune ka tria. Kolo mina fe a xatuane la itre trejin, angatr isa ala caas, lo itre ka catre thele la aqane troa thipetrije la itre thiina ne la itre atr ne la fene celë. (Tito 1:9; 1 Pet. 5:2) Ketre, kolo mina fe a hamëne la göxeni ne la ua hnene “la hlue ka nyipici me ka inamacan” matre troa thupë së qa ngöne la itre ini ka thoi, tune la ini hna hape Evolisio; kolo fe a thupë së qa ngöne la aja ne troa kuci ngazo, me nyinyape thele la itre mo, me piine la itre göhnë ka tru, memine la itre xaa aja me itre xaa aqane ujë me mekun ka iaö. (Mat. 24:45) Nemene hë la ka xatua epuni troa cile kowe la itre ewekë cili ka ngazo?
14. Tro sa nue Akötresieti tune kaa troa thupë së?
14 Nemene la nyine tro sa kuca, matre tro pala hi sa zae ngöne la götrane “ga sihngödi” Akötresie? Ame ngöne la nöjei ijin, tre, easë pala hi a thele la aqane troa thupë së hnyawa qa ngöne la itre ethanyine la mel, ke, xou së troa eatr me mec maine troa humuthi së pena; haawe, nyipi ewekë mina fe tro sa catre troa thupën, wanga löthi së jë fe hnene la itre ewekë ka troa hetre ethan kowe la mele së ngöne la ua. Qa ngöne lai, loi e tro pala hi sa kapa la ixatua hnei Iehova hna hamë së jëne la itre itus, me itre icasikeu ne la ekalesia me itre asabele. Ketre, loi e tro fe sa thele ixatua thene la itre qatre thup. Nge ketre, ka hetre thangane ka loi mina fe koi së la hna ce memine la itre trejine me easë, trahmanyi me föe ka loi thiina. Nyipici laka ame la troa ce memine pala hi la ekalesia, tre, celë mina fe ka troa xatua së troa inamacan.—Ite edomë 13:20; e jë la 1 Peteru 4:10.
15. Pine nemen matre easa lapaun, ka hape, tro Iehova a thupë së qa ngöne la itre ewekë ka troa aiananyi së me Nyidrë?
15 Thaa easë fe kö a luelu, laka, tro Iehova a thupë së qa ngöne la itre ewekë ka troa aiananyi së me Nyidrë. (Rom. 8:38, 39) Hnei Nyidrëti hna thupëne la ekalesia qa ngöne la itre ithupëjia ka kuci hmi me politik, ka thele troa aiananyi së memine la Akötresi së ka hmitrötr, ngo thaa göne kö la troa humuthi së. Kola jele nyipicine hnyawa la hna thingehnaeane celë hnei Iehova, ka hape: “Pëkö ewekë hna kuca nyine ishi me nyipo hna troa ien.”—Is. 54:17.
Drei La Ka Nue Amacanyi Së?
16. Pine nemene matre thatreine jë kö tro la fen a nue amacanyi së?
16 Hapeu, tro kö a xome acone la mele së hnene la hna iëne troa ketre atre i Iehova? Ohea, tro pe a xome acone la mele së hnene la hna sine la fene celë. Ame la fene celë, tre, ka nanyi catre ej qaathei Iehova, nge hna musinëne ej hnene la ketre haze ka iaxösisi nge ka thahluëne la itre atr. (Ioane 14:30) Drei la ketre ceitun, kola xome acone la mele ne la itre atr hnene la fene i Satana hna jëne la itre ejolene la mani. (Aceitunëne jë me Hna Amamane 13:16, 17.) Ketre, ka hetre mene ne mina fe la ngazo nge ka thahluëne la itre atr. (Ioane 8:34; Heb. 3:13) Qa ngöne lai, ngacama uune ju hë hnene lo itre ka thaa lapaune kö koi Iehova, ka hape, ka inuamacany la aqane mele ka icilekeu memine la itre ini qaathei Iehova, ngo ame la itre atr ka drei angatr, tre canga tro hi a musinëne hnene la ngazo, nge canga tro hi a ethitr la mele i angatr.—Rom. 1:24-32.
17. Iehova a nue amacanyi së tune kaa?
17 Ame ngöne la ketre götran, tro hë Iehova a thepe së qa ngöne la nöjei ewekë ka troa akötrë së, e tro sa lapaune koi Nyidrë. Ceitune hi la pengö së memine la ketre atr ka nue la mele i angeic kowe la ketre atre ixöj ka maca, nge ka troa thepe angeic qa ngöne la ketre ewekë ka troa ajolëne la mele i angeic. Ame hi la ewekë ka ajolëne la mele së, tre, ene lo ngazo i Adamu. Ngo maine tro sa lapaune koi Iehova me kowe la mele hna huujën hnei Keriso, haawe, ijije tro sa mejiune troa kötrene la itre ethanyine la ngazo, me hane kapa la mele ka thaa ase palua kö. (Ioane 3:36) Maine atre hnyawa hë së la pengöne la atre ixöj, tre, hmaloi hë koi së troa nue nyidrë troa xöji së; ketre tune mina fe, tro ha catre la lapaune së koi Iehova e hne së pala hi hna thele troa atrepengö Nyidrë hnyawa. Qa ngöne lai, loi e tro sa catre inine hnyawa la Wesi Ula i Akötresie, ke, celë hi lai ka troa xatua së troa hnimi Nyidrë me xome trije qaathe së la xou troa nyihlue i Nyidrë.—1 Ioane 4:18.
18. Nemene la thangane hna troa kapa hnene la itre ka nyihlue i Iehova?
18 Iehova a nue kowe la nöjei atr asë troa isa ië ewekë. Kola qaja hnene la Wesi Ula i Nyidrë, ka hape: “Iënejë la mele mate mele eö memine la ite matra i ’ö; mate tro eö a hni Iehova Akötesi ’ö.” (Deu. 30:19, 20) Iehova a ajane tro sa amamane la ihnimi së koi Nyidrë hnene la hna sipu iëne troa nyihlue i Nyidrë. Thaa kolo kö a xome acone la mele së hnene la hna nyihluene la Akötresie hne së hna hnim, ngo kolo pe a hamë madrine së.
19. Pine nemen matre kola qaja, ka hape, ketre hatren la ihnimi gufa i Iehova la troa ketre atre i Nyidrë?
19 Pine laka itre atr ka ngazo së, thaa ijije kö tro sa hane nyihluene la ketre Akötresie ka pexej. Ngo hnene la ihnimi gufa i Akötresieti matre ijije hmaca ha tro sa hane nyihlue i Nyidrë. (2 Tim. 1:9) Qa ngöne lai hnei Paulo hna cinyihan, ka hape: “E mele shë, eësha mele koi [Iehova]; nge e meci shë, eësha meci koi [Iehova]. Celë hi mate e mele shë, nge e meci shë, te, ite ate i [Iehova] shë.” (Rom. 14:8) Thaa tro jë kö sa nanazije me ietrane fë la mekune hne së hna iën, ene la troa ketre atre i Iehova.
Tro Epuni a Sa Tune Kaa?
• Nemene la itre manathithi hne së hna troa kapa, e tro sa ketre atre i Iehova?
• Pine nemen matre ijije hi tro sa kuca la itre ewekë hnei Akötresie hna thele the së?
• Iehova a thupëne tune kaa la itre hlue i Nyidrë?
[Thying]