Troa Xome La Ita Ne Thup Celë e 1 Maac Me Wiike Cili

Pine Nemen Matre Epuni A Sa Xepu Koi Iehova?

“Qa i angela i Akötesie hna cile thenge eid, ewekë i nyidëti ni.”—ITRE HU. 27:23.

1. Nemene la itre ewekë hna kuca ha hnene la itre ka ajane troa xome la bapataiso, nge nemene la itre hnyinge hna amejën?

 “JËNE la mele hna huujëne hnei Iesu Keriso, ase kö epuni ietrane la itre ngazo i epun, me sa xepu koi Iehova matre troa kuca la aja i Nyidrë?” Celë hi la ketre hnying hna qaja kowe lo itre ka ajane troa xome la bapataiso, ngöne lo pune la cainöj ne Bapataiso. Pine nemen matre nyipi ewekë tro la itre Keresiano a sa xepu koi Iehova? Nemene la thangane hne së hna kapa, e hne së hna sa xepu koi Akötresie? Pine nemen matre thaa Akötresieti kö a kapa la hmi ne la ketre atr ka thaa sa xepu kö koi Nyidrë? Tro hë sa trotrohnine la itre mekune ka sa la itre hnyinge celë, e hne së hna pane ce wange la aliene la hna hape troa sa xepu.

2. Nemene la aliene la kola sa xepu la ketre atr koi Iehova?

² Nemene la aliene la hna hape kola sa xepu la ketre atr koi Akötresie? Hanawange la aqane qeje pengöne Paulo aposetolo la aqane imelekeu i angeic me Akötresie. Qëmekene troa të hnene la ka ala nyim hune la ketre he ngöne ijine kola holehol la hnagejë, hnei angeic hna hape koi Iehova, “Ewekë i [Akötresieti] ni.” (E jë la Itre Huliwa 27:22-24.) Ewekë i Iehova asë hi la nöjei nyipi Keresiano asë. Ngo ame la fen asë, tre, ej a “meköle thene la ate ka ngazo.” (1 Ioane 5:19) Tro ha ewekë i Iehova la itre Keresiano ngöne la ijine Nyidrëti a kapa la sa xepu i angatr koi Nyidrë hna jëne la thith. Ceitune hi la easa sa xepu memine la easa sisiny. Thupene lai, kola bapataisone lai atr ngöne la tim.

3. Nemene la hna nyihatrene hnene la bapataiso i Iesu, nge kola xötrethenge tune kaa la tulu i nyidrë hnene la itretre drei nyidrë?

³ Hnei Iesu hna hamë së la ketre tulu ka lolo, ngöne la nyidrëti a sipu axeciëne troa kuca la aja i Akötresie. Pine laka hna hnaho nyidrë e hnine la nöje i Isaraela ka sa xepu hë koi Akötresie, ene pe ase hë nue la mele i nyidrë koi Akötresie. Ngo ame ngöne lo kola bapataiso nyidrë, hetrenyi la ketre ewekë hnei nyidrëti hna kuca ka sisitria catre kö hune la hna amekötine hnene la Wathebo. Eje hi, jëne la bapataiso i nyidrë, kösë nyidrëti a qaja, ka hape: “Akötesieti fe, xajawatineju, ini a tro troa kuca la aja i cilie.” (Heb. 10:7; Luka 3:21) Qa ngöne lai, kola nyihatrene hnene la bapataiso i Iesu, la mele hnei nyidrëti hna huujëne koi Akötresie göi troa kuca la aja ne la Tretretro i nyidrë. Ketre, kola xötrethenge la tulu i Iesu hnene la itretre drei nyidrë, ngöne la angatr a xome la bapataiso. Ngo ame la bapataiso hnei angatr hna xom, tre, ej a anyipicine kowe la nöjei atr asë, laka, hnei angatre hna ketre sipu sa xepu koi Akötresie ngöne la thith.

Aqane Kepe Thangane Së Qa Ngöne La Hna Sa Xepu

4. Nemene la hna ini së göne la troa saen, hnene la aqane imelekeu i Davita me Ionathana?

⁴ Thaa nyine tro kö a wangahmalohmaloeën la troa sa xepu. Thaa kolo hmekuje kö a saen, ngo hetre ketre nyine tro pala kö a catre kuca. Matre nemene la eloine koi së la troa sa xepu? Tro sa pane ce wange la eloine la tro sa saen matre troa eköthe la ketre aqane imelekeu memine la itre xan. Ame la ketre ceitun, tre, ene ngöne la easa eköthe la ketre aqane imelekeu ka lolo memine la ketre enehmu së. Tro sa kepe thangane la aqane imelekeu cili, e hne së hna pane kapa la hnëqa ka eje the së, ene la troa nyi enehmu. Kolo lai a hape easa saen, laka xecie hnyawa koi së troa thupëne la enehmu së. Tusi Hmitrötr a qaja la lue xaa treme enehmun, ene Davita me Ionathana. Pine laka lolo la aqane ce mele i nyidro, haawe, hnei nyidroti hna isisinyikeu. (E jë la 1 Samuela 17:57; 18:1, 3.) Ngacama xalaithe hi la itre atr ka melëne la aqane imelekeu cili, ngo tro ha cile huti la itre treme enehmun, e ka xecie hnyawa koi angatr troa itö ixatua.—Itre edomë 17:17; 18:24.

5. Maine tro la ketre maseta ka lolo thiina a xome la ketre hlue matre ewekë i nyidrë, tro la hlue a kepe thangane tune kaa lai?

⁵ Kola qaja ngöne la Wathebo hnei Akötresieti hna hamëne koi angetre Isaraela la ketre pengöne aqane imelekeu, ene laka ijije troa kepe thangane qa ngön hnene la itre atr, e hna sipu saen. Maine kola ajane hnene la ketre hlue troa lolo pala hi la mele i angeic thene la maseta i angeic ka lolo thiina, nyipi ewekë tro angeic a ce axeciëne me nyidrë troa eatrëne la isa hnëqa i nyidro. Kola qaja hnene la Wathebo, ka hape: “E troa qaja amamane hnene la hlue, ka hape, Ini a hnine la tixeng, me ifëneköng, me ite neköng; tha tro kö ni a tro gufa; hawe, tro ha la tixe i angeic’ a tro sai angeice kowe la itete amekötin; nge tro fe angeic’ a tro sai nyëne kowe la thingene qëhnelö, maine sinete qënehlö; nge tro la tixe i nyën’ a kuje la inengenyë i nyëne hnene la nyine thin; nge tro palua kö nyën’ a nyi hlue i angeic.”—Eso. 21:5, 6.

6, 7. Tune kaa la aqane troa kepe thangane ka loi hnene la itre atr qa ngöne la hna cinyihane ngöne pepa la hna troa ce axecië mekune ngön?

⁶ Ka sisitria mina fe la kola saen ngöne la ijine kola faipoipo. Eje hi, thaa kolo hmekuje kö a ce axeciëne memine la ketre atr ngöne ipepa la ewekë nyine troa ce eatrën, ngo kola xecie hnyawa ekuhu hni la iaja ne la lue atr. Thatreine kö troa kapa hnene la lue atr ka ce lapa nge ka thaa faipoipo kö, la itre eloine la hna faipoipo; ketre, tune mina fe kowe la itre nekö i angatr. Ngo ame kowe la itre trefën ka saen troa faipoipo, tre, hetrenyi angatr la ketre kepin ka sisitria qa hnine la Tusi Hmitrötr, ka uku angatr troa catre nyinyine la itre jol ngöne la ihnim.—Mat. 19:5, 6; 1 Kor. 13:7, 8; Heb. 13:4.

⁷ Ame ngöne lo hneijine ekö, hnene la itre atr hna kepe thangane ka loi qa ngöne la hna cinyanyine ngöne pepa, la itre huliwa hna troa kuca. (Mat. 20:1, 2, 8) Ka  nyipici pala hi lai ngöne la hneijine së. Drei la ketre ceitun, qëmekene tro sa nyiqaane huliwa i maseta, hetre loi hne së hna kapa qa ngöne la hna cengöne sija la sine pepa ka anyipicine la huliwa së. Qa ngöne lai, maine ame la kola ce axeciëne troa eatrëne la hna cengöne mekun, tre, kola acatrene la nöjei pengöne aqane imelekeu, tune la itre treme enehmun, me itre trefëne ka faipoipo, me itre ka huliwa i maseta; drei la kola troa acatrene fe la aqane imelekeu së me Iehova hnene la hna sa xepu hnyawa koi Nyidrë! Tro sa pane ce wange la aqane kepe thangane hnene la nöje i Iehova Akötresie ekö, qa ngöne la hnei angatre hna sa xepu koi Nyidrë, memine la esisitriane lai hune la tro hi a ce axeciëne troa eatrëne la itre ewekë nyine kuca.

Aqane Kepe Thangan Hnei Isaraela Qa Ngöne La Hna Sa Xepu Koi Akötresie

8. (a) Nemene la aliene koi angetre Isaraela, la troa sa xepu koi Akötresie? (b) Nemene la itre ewekë hnei Iehova memine la nöje Isaraela hna ce axeciëne troa kuca?

⁸ Hna nyi xepu koi Iehova hnene la nöje Isaraela asë, ngöne lo angatr a sisinyi koi Nyidrë. Hnei Iehova hna iacaasinekeu angatr fene la Wetr Sinai me qaja koi angatr, ka hape: “Maine tro nyipunie a nyipi denge thenge la aqane ewekëng, me trongëne la isisinyikeung, tro nyipunie a atu ka conge hune la nöjei nöje asë.” Ene pe, hnene la nöje hna cengöne qaja asë, ka hape: “Tro nyihunie a kuca la nöjei ewekë asë hnei Iehova hna ulatin.” (Eso. 19:4-8) Ame la kola sa xepu hnei angetre Isaraela, tre thaa ene kö la tro hi a xecie koi angatre troa kuca la hnëqa i angatr. Kolo lai a hape, ewekë i Iehova hë angatr, nge tro hë Nyidrëti a ujë koi angatr ceitune me “atu ka co” i Nyidrë.

9. Kola kepe thangane tune kaa hnei angetre Isaraela, qa ngöne la hnei angatre hna sa xepu koi Akötresie?

⁹ Nyimutre la itre manathithi hna kapa hnei angetre Isaraela qa ngöne laka, ewekë i Iehova angatr. Hnei Nyidrëti hna nyipici me thupë angatre hnyawa, kösë ketre keme ka ihnim a thupëne la nekö i angeic. Öni Akötresieti koi angetre Isaraela, ka hape: “Hape u, tro la fö’ a thëthëhmine la nekö i nyido hna iji thin, mate tha utipine la nekö ne la hni nyido? Maine tro angat’ a thëthëhmin, loi pe tha tro kö ni a thëthëhmi ’ö.” (Isa 49:15) Hnei Iehova hna eatrongë angatr jëne la Trenge Wathebo, me thuecatre jëne la itre perofeta, me hane thupë angatr jëne la itre angela. Hnene la atre cinyihane la salamo hna hape: “Nyidëti a amamane la wesi ula i nyidë koi Iakobo, la ite wathebo i nyidë me ite hna amekötine hnei nyidë koi Isaraela. Tha hnei nyidëti kö hna kuca tune lai koi kete nöje kö.” (Sal. 147:19, 20; E jë la Salamo 34:7, 19; 48:14.) Tune la aqane thupëne Iehova la nöje i Nyidrëti ekö, tro mina fe Nyidrëti enehila a thupëne hnyawa la itre atr ka sa xepu koi Nyidrë.

Kepin Matre Loi e Tro Sa Sa Xepu Me Nue La Mele Së Koi Akötresie

10, 11. Hapeu hna hnaho së kö hnine la lapa ka cahae i Akötresie e koho hnengödrai me e celë fen? Qeje pengöne jë.

¹⁰ Ame ngöne la itre xan a mekune la pengöne la troa sa xepu me xome la bapataiso, tre, angatr a isa hnyinge ka hape, ‘Pine nemen matre thatreine kö tro ni a hmi koi Akötresie, nge thaa hnenge kö hna sa xepu koi Nyidrë?’ Kola mama hnyawa la kepine lai, ngöne la easa atrehmekune la nyipi pengö së xajawa i Akötresie. The thëthëhmine kö së laka, hnene la ngazo i Adamu matre thaa easë hmaca kö a hane sine la lapa i Akötresie. (Rom. 3:23; 5:12) Celë hi matre, nyipi ewekë tro sa sa xepu koi Akötresie matre tro Nyidrëti a kepe së hnine la lapa ka cahae, e koho hnengödrai me e celë fen. Tro sa ce wange la itre kepine lai.

¹¹ Pëkö ketre kem e celë fen ka atreine troa hamë së la mele ka thaa ase palua kö, tune lo hna mekune troa kuca koi së hnei Akötresie. (1 Tim. 6:19) Pine laka hnene lo lue pane atr hna kuca la ngazo, ene pe thaa itre nekö i Akötresieti hmaca kö së, nge iananyi hë së memine la Tretretro ka ihnim me Atre Xup. (Aceitunëne jë me Deuteronomi 32:5.) Qaane ju hi la ijine cili, thaa kolo hmaca kö a hane sine hnene la fen asë, la lapa ka cahae i Iehova e koho hnengödrai me e celë fen, ngo kolo pe a iananyi me Akötresie.

12. (a) Tune kaa la aqane tro la itre atr ka ngazo a nyi atrene la lapa ka cahae i Akötresie? (b) Nemene la itre ewekë nyine tro sa kuca qëmekene troa xome la bapataiso?

¹² Ngo ijije hi tro së isa ala casi a sipone koi Akötresie troa kepe së, matre tro sa hane lö hnine la fami i Nyidrë, ene la itre hlue hnei Nyidrëti hna kapa. * Nemene la ka aijijë së, easë itre atr ka ngazo, matre troa kepe së hnei Nyidrë? Hnei Paulo aposetolo hna cinyihan, ka hape: “Maine loi hë shë e Akötesie hnene la elelengëti ne la Hupuna i anganyidë nge ite ithupëjia eëshë pete kö.” (Rom. 5:10) Ame la easa bapataiso, tre, easë hi lai a sipo Akötresie hnene la mekuthethew ka loi, troa kepe së hnei Nyidrë. (1 Pet. 3:21) Ngo qëmekene la bapataiso, hetrenyi la itre ewekë nyine tro sa pane kuca. Nyipi ewekë tro sa atrepengöi Akötresieti hnyawa me inine troa lapaune koi Nyidrë, me ietra me ujë qa ngöne la itre jë së. (Ioane 17:3; Itre Hu. 3:19; Heb. 11:6) Nge hetrenyi pala kö la ketre ewekë nyine tro sa kuca, matre tro Akötresieti a kepe së hnine la lapa ka cahae i Nyidrë. Nemene la ewekë cili?

13. Pine nemen matre ka meköt e tro la ketre atr a sisiny troa nue la mele i angeic koi Akötresie, matre troa hane e angeic thene la itre hlue hnei Nyidrëti hna kapa?

¹³ Qëmekene tro la ketre atr ka iananyi ekö me Akötresie  a hane lö hnine la lapa ne la itre hlue hnei Nyidrëti hna kapa, nyipi ewekë tro angeic a pane sisinyi koi Iehova. Tro sa ce xome la ketre ceitun matre troa trotrohnine hnyawa la kepine lai; mekune jë së la ketre keme hna metrötrën, nge ka lolo thiina, nyidrëti a wanga atrune la ketre nekönatr, me ajane troa xome matre ketre nekö i nyidrë. Atre asë hi la nöjei atr, ka hape, ketre atr ka thiina ka lolo la keme cili. Ngo qëmekene troa kepe nyën ceitune me sipu nekö i nyidrë, kola ajane hnene la trahmanyi tro la nekönatr a sisiny koi nyidrë. Önine jë hi la trahmany, ka hape, “Qëmekene tro ni a kepe eö ceitune me sipu neköng, loi e tro ni a pane atre, ka hape, tro eö a hnimi ni me metrötrë ni ceitune me keme i ’ö.” Tro hë la keme a xome la nekönatr matre troa ketre atrene la hnepe lapa i nyidrë, e ka hmalahnine hi nyën troa sisiny. Hapeu, thaa ketre aqane ujë kö lai ka lolo me ka meköt? Ketre tune mina fe, Iehova hmekuje hi a kapa hnine la hnepe lapa i Nyidrë, la itre atr ka ajane troa sisinyi koi Nyidrë me sa xepu. Kola qaja ngöne la ketre Tusi Hmitrötr, ka hape: “Hamënepi hnei nyipunie la ite ngönetei nyipunie huje ka mel, [“hna sa xepune koi Akötresie,” La Bible en français courant], lo aja i Akötesie.”—Rom. 12:1.

Ketre Hatrene Ihnim Me Lapaun La Kola Sa Xepu

14. Kola hapeue la kola hape, ketre hatrene ihnim la easa sa xepu?

¹⁴ Easa amamane la aqane pexeje la ihnimi së koi Iehova, hnene la hna sisiny troa nue la mele së koi Nyidrë. Ame ngöne la itre xaa götran, ej a troa ceitu memine la hna sisiny ngöne la ijine kola faipoipo. Kola mama la hatrene la ihnimi ne la Keresiano trahmanyi kowe la föi angeic, hnene la hnei angeice hna sisinyi troa nyipici koi nyiidro ngacama traqa ju hë la itre jol. Ame e celë, tre, kola sisinyi troa nyipici kowe la ketre atr, ngo thaa kolo kö a sisinyi troa kuca la ketre ewekë. Trotrohnine hnyawa hi la trahmanyi Keresiano, laka, thaa ijije kö tro angeic a ce mele memine la föi angeic e thaa hnei angeice kö hna sisiny kowe la föi angeic ngöne la ijine kola faipoipo. Ketre tune mina fe, thaa ijije kö tro sa kapa la itre manathithi qa ngöne la hna ketre atrene la lapa i Iehova e thaa hne së kö hna sisiny troa nue la mele së koi Nyidrë. Qa ngöne lai, itre atr ka thaa pexeje ju hë së, ngo easa sa xepu koi Akötresie, ke, eje the së la ajan troa ewekë i Nyidrë me catre troa nyipici koi Nyidrë ngacama traqa ju hë la itre jol.—Mat. 22:37.

15. Kola hapeue la kola hape, ketre hatrene la lapaune së, la easa sa xepu?

¹⁵ Ame la easa sa xepu koi Akötresie, tre, easë mina fe lai a amamane la lapaune së. Pine nemene lai? Hnene laka easa lapaune koi Iehova, ene pe xecie koi së laka, ketre ewekë ka loi koi së troa easenyi koi Akötresie. (Sal. 73:28) Atre hnyawa hi së laka, thaa tro kö a hmaloi koi së troa ce tro me Akötresie e nyipine la ketre “xöte ka qaliqali me ka ena,” ngo ame pe, tre, easa mejiune laka tro Nyidrëti a xatua së. (Fil. 2:15; 4:13) Atrehmekune hi së laka, itre atr ka thaa pexeje kö së ngo easa lapaune laka, tro Iehova a hnimi së me nue la itre ngazo së, ngacama tria ju hë së. (E jë la Salamo 103:13, 14; Roma 7:21-25.) Easa lapaune fe laka, tro Iehova a nyijune la aqane thele së troa pë ethan la mele së.—Iobu 27:5.

Jëne Manathithi La Troa Sa Xepu Koi Akötresie

16, 17. Pine nemene matre jëne manathithi la troa sa xepu koi Iehova?

¹⁶ Hetre madrine me manathithi hne së hna kapa qa ngöne la easa sa xepu koi Iehova, pine laka, easa hamëne la sipu mele së koi Nyidrë. Hnei Iesu hna qaja la ketre nyipici ka sisitria ngöne la nyidrëti a hape: “Sisitia la manathithi e troa hame hune la troa kapa.” (Ite Hu. 20:35) Hnei Iesu hna melëne hnyawa la manathithi me madrin qa ngöne la hna ham ngöne lo nyidrëti a cainöj e celë fen. Pine laka aja i nyidrë tro la itre atr a xötrëne la gojenyi ne mel, ene pe thaa hnei nyidrëti kö hna xomi ijine troa mano me xen me thele mo. (Ioane 4:34) Atraqatre la madrine i Iesu troa amadrinëne la hni ne la Tretretro i nyidrë. Öni nyidrëti, ka hape: “Ini a kuca pala hi la nöjei ewekë nyine amadi nyidë.”—Ioane 8:29; Itre edomë 27:11.

¹⁷ Qa ngöne lai, hnei Iesu hna amamane kowe la itretre drei nyidrë la jëne troa hetrenyi la mele ka lolo ngöne la nyidrëti a hape: “Maine kete ate a ajane troa xöte thenge ni, loi e tro angeic’ a xele angeice kö.” (Mat. 16:24) Hapeu, tro kö epuni a nue la mele i epun kowe la ketre atr ka troa thupë epuni me hnimi epun?

18. Pine nemene matre ame la itre manathithi ka xulu qa ngöne la hna mele thenge la hna sa xepu koi Iehova, tre, atraqatre catre kö itre ej hune la hna sa xepu kowe la ketre ewekë maine ketre atr pena?

¹⁸ Atraqatre catre kö la itre manathithi hne së hna kapa qa ngöne la hna sa xepu koi Iehova me mele thenge la hna sa xepu cili, ene la troa kuca la aja i Nyidrë, hune la hna sa xepu kowe la ketre ewekë maine kowe la ketre atr pena. Drei la ketre ceitun, nyimutre la itre atr ka nue la mele i angatr matre troa nyinyape thele la itre mo, ngo thaa eatrëne kö la nyipi madrin nge thaa lolo kö la mele i angatr. Ngo ame pe la itre ka nue la mele i angatr koi Iehova, tre, ka cile huti la madrine i angatr. (Mat. 6:24) Atraqatre la madrine i angatr troa xome la hnëqa ka tru, ene la troa itretre “ce huliwa tro me Akötesie,” ngo thaa angatre kö a nue la mele i angatr kowe la ketre huliwa ngo kowe pe la Akötresi së nyine hain. (1 Kor. 3:9) Nyidrëti hmekuje hi la ka ijije troa wanga atrune me olene la mele hnei angatre hna huujën. Tro Nyidrëti elanyi a aijijëne la itre qatre ka nyipici koi Nyidrë, tro hmaca angatr a itre thupëtresij, matre tro pala hi angatr a kepe thangane qa ngöne la aqane thupë angatre hnei Nyidrë.—Iobu 33:25; E jë la Heberu 6:10.

19. Nemene la manathithi ka tru ka eje thene la itre atr ka sa xepu koi Iehova?

¹⁹ Maine tro së a sa xepu koi Iehova, eje hi laka, tro hë sa eköthe la ketre aqane imelekeu ka lolo me Nyidrë. Öni Tusi Hmitrötr, ka hape: “Eashenyijë koi Akötesie, nge tro Nyidrëti a eashenyi koi nyipunie.” (Iako. 4:8; Sal. 25:14) Tro pë hë sa ce wange ngöne la hna cinyihane ka troa xulu, la kepine matre ijije tro sa lapaune ngöne la easa sipu axeciëne troa ewekë i Iehova.

[Ithueamacany]

Tro Nyipunieti a Sa Tune Kaa?

• Nemene la aliene la troa sa xepu koi Akötresie?

• Pine nemen matre nyipi ewekë tro la itre Keresiano a sa xepu koi Iehova?

• Tro sa kepe thangane tune kaa qa ngöne la hna sa xepu koi Akötresie?

[Thying]