Eamo Ka Lolo Göi Troa Lapa Cas Me Faipoipo
Troa Xome La Ita Ne Thup Celë e 5 Diseba Me Wiike Cili
Nyima 85 Me 36
Eamo Ka Lolo Göi Troa Lapa Cas Me Faipoipo
“Ini a qaja lai . . . mate lolo, nge mate pëkö jolen’ e tro nyipunie a nyi hlue ne la Joxu.”—1 KOR. 7:35.
1, 2. Pine nemene matre loi e tro la atr a thele eamo e hnine la Tusi Hmitrötre göi itre ka lapa cas, me itre ka fapoipo hë?
MADRIN, xou, hnehengazo, drei la itre ewekë hne së hna melëne ngöne la easa imelekeu itre jajinyi me nekö trahmanyi maine pena easë itre trefën. Pine laka, itre ewekë lai hne së hna troa melën, hawe, nyipi ewekë tro sa thele ixatua thei Akötresie. Nyipi ewekë troa inamacane ngöne la aqane troa cile kowe la itre aliene hni cili, celë hi matre nyipi ewekë fe koi së troa thele la ixatua i Akötresie, ngo hetrenyi pala kö la itre xa kepine matre nyipi ewekë tro sa nue Akötresieti troa eatrongene la mele së. Maine jë troa mekune hnene la ketre Keresiano ka pë föen, laka kola uku angeice hnene la fami angeice me itre enehmu i angeice troa faipoipo. Nge ame pena ha ketre Keresiano, tre, kola ajane troa faipoipo, ngo tha öhne petre kö la trejine hna troa ikötresae memine ka ihmeku me angeic. Ame koi itre ka iatre, angatre a aja ixatua göi aqane troa hnëkëne la itre hnëqa hna athipe, koi trahmanyi maine koi föe pena. Ketre, itre Keresiano ju hë ka lapa casi maine ka faipoipo pena, ngo hna tupathi angatre asë hi troa kuca la thina ka sis.
2 Ka hetre thangane la itre mekune celë kowe la sipu mele së, ngo kowe mina fe la aqane imelekeu së me Iehova Akötresie. Ame ngöne la mekene 7 ne la pane tusi Paulo koi angetre Korinito, hnei nyidrëti hna hamë eamo göi itre ka lapa cas, memine la itre ka faipoipo hë. Ame la aja i nyidrë, tre, troa upe la itre ka e la tusi nyidrë “mate lolo, nge mate pëkö jolen’ e tro [angatr] a nyi hlue ne la Joxu.” (1 Kor. 7:35) Ame ngöne la epuni a wange hnyawa la itre eamo i nyidrë, ngöne la itre götrane cili ka nyipi ewekë catr, thele jë troa wange la pengöi epun—ka lapa cas maine ka faipoipo hë—me xome lai ceitu, me ketre jëne troa nyi hluei Iehova hnyawa.
Ketre Mekune Nyine Axeciëne Ka Tru Alien
3, 4. (a) Nemene la itre jole ka cia qa ngöne la hna semesinene menune hnene la itre atr, la ketre enehmu maine ketre sine ka tha faipoipo pala kö? (b) Tro la eamo i Paulo a xatuane tune ka la ketre atr, matre tro angeice a hetrenyi la aqane waiewekë ka meköti göi faipoipo?
3 Nyimutre la itre nöje enehila ka tune lo angetre Iudra ekö ngöne lo hneijine i Iesu, laka, angatre a xome la faipoipo ceitune me ketre manathith. Maine macatre ne tro ha faipoipo la nekö trahmanyi maine jajiny, nge ka lapa casi pala hi, maine jë tro la itre enehmu me itre sine i angeice a pi hane hamë eamo koi angeic. Ame ngöne la angatre a porotrik, maine jë tro angatre a upi angeice troa catre thele föi angeic. Angatre mina fe a mekune la ketre atr ka ijije troa nyi föi angeice elany. Nge angatre a thele jëne tro nyidroti a iöhny. Ngo ka hetre ethane la aqane ujë cili, pine laka, ame e itre xa ijin, hmahma la pune koi nyidro, troa thë mina fe la aqane imelekeu ne la itre enehmu, me akötrëne la hni ne la itre xan.
4 Tha hna hane kö upe ielene hnei Paulo la itre xa trejine troa faipoipo, maine lapa casi pena. (1 Kor. 7:7) Maine Ka madrine angeice troa lapa cas me nyi hluei Iehova tune lai, ngo angeice a metrötrëne fe la aja ne la itre xane troa madrine e hnine la faipoipo. Ketre tune mina fe enehila, isa qanyine kö la itre Keresiano, angatre isa ala cas troa axeciëne maine troa faipoipo, maine troa lapa casi pena. Tha tro kö ketre me ketre, a upe iele angatre troa faipoipo maine troa lapa casi pena.
Thangane Ka Loi Qa Ngöne La Hna Lapa Cas
5, 6. Pine nemene matre Paulo a ithuecatre kowe la itre trejine troa lapa cas?
5 Kola mama ngöne la itre trenge ewekë hnei Paulo hna qaja koi angetre Korinito, laka, nyidrëti a wangatrune hnyawa la troa lapa cas. (E jë la 1 Korinito 7:8.) Ngacama tha ka faipoipo kö Paulo, ngo tha hnei angeice kö hna thele troa pi draië hune la itre ka faipoipo hë, tune lo aqane ujë ne la itre hene ne hmi ne la itre nöje ka uune ka hape, itre Keresiano angatr. Hnei angeice pe hna amamane hnyawa la ketre thangane ka loi, hna kapa hnene la itre ka tha faipoipo kö nge ka cainöjëne la maca ka loi. Nemene la eloine lai?
6 Ame ngöne la huliwa i Iehova, tre, hetrenyi la itre hnëqa hna thatreine troa hane xome hnene la ka faipoipo. Hna upi Paulo troa xome la ketre hnëqa ka ketre pengön, ene la troa ketre “aposetolo ne la nöjei ethen.” (Rom. 11:13) E jë la mekene 13 uti hë mekene 20, nge wange trongëne ju la hnei angeice hna kuca memine la itre xa sine ce tro i angeice mesinare, ngöne lo angatre a xötrei cainöje ngöne la itre teritoare me eköthe trotro la itre ekalesia. Xalaithe hi the së enehila la itre ka cile kowe la itre itupathi hnei Paulo hna qëmeke kow ngöne la angeice a cainöje trotro. (2 Kor. 11:23-27, 32, 33) Ngo pine laka hnei Paulo hna catre cile kowe la itre itupathi cili me catre inine la itre atr, hawe, celë hi ewekë lai ka hamëne koi angeice la madrine atraqatr. (1 Thes. 1:2-7, 9; 2:19) Maine ka faipoipo ju Paulo, thatreine kö tro angeice a eatrëne la nöjei hnei angeice hna ajane troa kuca.
7. Hamëne jë la tulu ne la lue trejine ka tha faipoipo kö, nge ka xome la mele i nyidro thatraqane la itre huliwa ne la Baselaia.
7 Nyimutre la itre Keresiano ka tha faipoipo, angatre a xome la mele i angatre matre troa catre cainöj. Drei la lue trejine jajinyi ka pionie e Bolivie, Sara me Libania. Hnei nyidroti hna feke kowe la ketre tribu; nge nyimutre catre la itre macatre ne tha hane cainöje ngöne la tribu cili. Ketre pëkö tirisite; ngo tha ewekë kö lai hna hnehengazone hnene la itre atr. Öni nyidro: “Pine laka, pëkö ipoos maine televizio pena, hawe, pëkö ka ajolëne la itre atre troa eatrëne la aja i angatr, ene la troa e tus.” Hna amamane hnene la itre xa atrene la tribu la itre itusi sasaiatri ekö, a tha hna fejane hmaca kö. Ketre, thatreine kö troa umuthe la teritoare hnene la lue trejine föe, ke, kola drei nyidroti me kepe nyidro ngöne la nöjei hnalapa asë hnei nyidroti hna cainöje ngön. Hna qaja koi nyidro hnene la ketre qatre föe ka hape: “Tha hmitre kö matre traqa pi la pun, ke, ase fe hë ketri së hnene la Itretre Anyipicine i Iehova.” Tha qea kö nge kolo fe ha hane sine la itre icasikeu hnene la itre xane e angatr.
8, 9. (a) Nemene la mekuna i Paulo ngöne la angeice a qaja aloine la troa lapa cas? (b) Nemene la itre eloine la troa nyi hluei Iehova hnene la Keresiano ka pë föen?
8 Tha sihngödri kö koi së laka, hetre thangane ka lolo fe hna kapa hnene la itre Keresiano ka fapoipo hë, ngöne la angatre a cainöje ngöne la itre teritoare ka jole catr. Ngo ame pe, tre, hetrenyi la itre xa hnëqa hna kapa hnene la itre pionie ka pë föen, a ka jole catre e troa hane eatrëne hnene la itre ka faipoipo hë me ka trene kuku. Ame lo lai Paulo a cinyanyi kowe la itre ekalesia, tre, atre hi angeice laka, tru catre la itre nyine kuca ngöne la huliwa ne cainöje trotro. Nge ame la aja i angeic, tre, tro la itre trejine asë a hane madrine tui angeic. Celë hi kepine matre angeice a qaja aloine la troa lapa cas matre troa nyi hluei Iehova.
9 Hna cinyihane hene la ketre trejine föe ka pionie qa Etazini, ka hape: “Kola mekune hnei itre xan ka hape, thatreine kö troa hetrenyi la madrine ka cile hut hnene la ka tha faipoipo. Ngo eni ha öhne hnyawa laka, ame la ka hamë madrine ka cile huti kowe la atr, tre, aqane imelekeu i angeice me Iehova. Maine nyipici laka, ame la troa lapa casi, tre, celë hi ketre aqane troa hujëne la mel, ngo tro eje a ketre ahnahna ka lolo, e hne së hna huliwane hnyawa.” Öni angeic: “Ame la troa lapa cas, tre, celë hi ketre jëne troa hetrenyi la nyipi manathith, ngo tha eje kö a hnöthi së me sewe së. Atre hnyawa hi ni laka Iehova a hnime ceitune la ka faipoipo memine la ka lapa cas.” Ame hë enehila, tre, eahlo ha cainöje ngöne la ketre götrane ga aja ixatua. Maine ketre trejine epuni ka tha faipoipo, ijije kö tro epuni a xome la traeme i epuni matre troa inine la nyipici kowe la itre xa atr? Ijiji epuni fe troa ketre sipu öhne laka ketre ahnahna ka sisitria qathei Iehova la troa lapa cas.
Itre Ka Ajane Troa Faipoipo
10, 11. Iehova a xatuane tuneka la itre ka ajane troa faipoipo, ngo tha öhne pala kö la atr ka ihmeku me angatr?
10 Ala nyimu la Itretre Anyipicine Iehova ka mele casi ngöne la itre macatre, nge angatre hë enehila a mekune troa faipoipo. Atre hnyawa hi angatre la enyipiewekëne la troa sipone la ixatua qathei Iehova, matre troa thele la atr hna troa ce mele memine elanyi ka ihmeku me angatr.—E jë la 1 Korinito 7:36.
11 Maine epuni a ajane troa faipoipo memine la ketre atre ka ce thawa me epuni la ajane troa nyi hluei Iehova cememine la hni ka pexej, hawe, loi e tro epuni a thithi fë la aja cili koi Nyidrë. (Fil. 4:6, 7) Nge ame göi troa itreqe, tha tro pi kö epuni a hnehengazo menu. Mejiune ju pe kowe la Akötresie ka tru ihnimin, Nyidrëti lo ka troa xatua epuni matre tha tro kö a hace menu la hni epun.—Heb. 13:6.
12. Pine nemene matre loi e tro pala hi la Keresiano a waiewekë hnyawa e sipone jë koi angeice hnene la ketre atr troa faipoipo?
12 Maine jë troa pi faipoipo me epuni hnene la ketre trejine ka nanazije ngöne la götrane ua maine ketre atr ka tha hmi pena. Maine atraqatre la aja i epuni troa faipoipo, thupëne hnyawa kö la aqane troa axecië mekun, ke, maine troa ngazo la mekune hnei epuni hna xom, hawe, loi ju kö lo epuni ekö a lapa cas. Ketre, e ase hë faipoipo, ngazo ju hë maine loi, ngo meci pe hi la ka troa aisa epone lue trefën. Ketre, ka loi la tro epuni a faipoipo memine la atr hnei epuni hna ketre iën, ke, epuni a troa ce mele me angeice uti hë mec. Tha tro kö a wangesixane la aqane axecië mekune i epuni enehila, ke, hetre thangane eje kowe la mele i epuni elany. (1 Kor. 7:27) Celë hi matre, tha hnene kö laka pë pala ha ka ihmeku me epun, ke, tro hë epuni a faipoipo memine la ketre atr ka pi faipoipo me epun.—E jë la 1 Korinito 7:39.
Hnëkë Jë Kowe La Itre Ewekë Ka Troa Traqa e Hnine La Faipoipo
13-15. Nemene la itre jole nyine tro la lue ka iatre a ithanatane qëmekene tro nyidroti a faipoipo?
13 Maine nyipici laka hnei Paulo hna qaja aloine la atr ka tha faipoipo kö nge ka nyi hluei Iehova, ngo tha hnei angeice pi kö hna wangacone la itre ka mekune troa faipoipo. Hnei angeice pe hna hamë ixatua kowe la itre trefën, matre tro angatre a cile kowe la itre jole ka eje e hnine la faipoipo me thele troa cile huti la faipoipoi angatr.
14 Nyipi ewekë troa wenë hnyawa hnene la itre trefëne la aqane waiewekë i angatr, göne la itre ewekë ka troa traqa elanyi e hnine la faipoipo. Ame ngöne la kola iatre hnene la lue atr, maine jë tro nyidroti a mekune ka hape, ketre pengöne kö la ihnimi nyidro, nge nyidroti hmekuje hi la ka ihnimi tune lai. Nyidroti a nyi tane la faipoipo i nyidro hnene la itre mekune ka menu cili, nge xecie hnyawa koi nyidroti laka, pë jë kö ka troa thapa la madrine ka eje thei nyidro. Ngo pu ne jidri la aqane mekune cili. Maine nyipici laka, ka mingöminge la iaja cili ngöne la mele ne trefën, ngo tha celë kö lai ka troa xatuane la trahmanyi me föe, troa cile kowe la itre jole ka traqa e hnine la nöjei faipoipo asë.—E jë la 1 Korinito 7:28. a
15 Ala nyimu la itre ka xötrei faipoipo ka sesëkötr, me hleuhleu, ke, ame la kola xome la itre mekune ka tru hnene la lue trefën, tre, tha ca jëne mekune kö. Maine jë, isa pengöne catre la aqane goeëne nyidroti la aqane troa xome la mani me traeme ne mano, me götrane hnë tro nyidroti a mele ngön, memine la etrune la traeme hna xome matre troa wai itre keme me thin. Ketre, isa hetre hnepe ngazo i nyidro nge canga tro hi a jele la trengehni ne la ketre. Ame ngöne la ijine iatre, canga hmaloi hi troa wangahmalohmaloeëne la itre ewekë cili, ngo itre eje hi elanyi la ka troa aciane la itre jole e hnine la faipoipo. Loi e tro la lue ka iatre a canga thele nyine la itre ewekë cili, qëmekene tro nyidroti a faipoipo.
16. Pine nemene matre nyipi ewekë troa ce mekune hnene la lue trefën, ngöne la nyidroti a troa cile kowe la itre ejolene la mele ne trefën?
16 Maine kola ajane hnene la lue trefëne troa madrine me tro loi la faipoipo i nyidro, nyipi ewekë tro nyidroti a cas me ce cile kowe la itre jole ka traqa koi nyidro. Troa ce mekune i nyidroti ngöne la aqane troa hajine la itre nekö i nyidro, me ngöne la aqane troa thupëne la lue keme me thine i nyidroti ka qatre hë. Tha tro pi kö nyidroti a nue la itre jole ka traqa e hnine la hnepe lapa, troa aisa nyidro. Maine tro nyidroti a trongëne la eamo qa hnine la Tusi Hmitrötr, tro hë nyidroti a nyinyine la itre jole ka nyimutre, me xomihnine la itre xan, nge troa eje pala hi thei nyidroti la madrin.—1 Kor. 7:10, 11.
17. Nemene la “ite ewekë ne fen” nyine troa hetrenyi hnene la lue trefën?
17 Hnei Paulo hna qaja la ketre ewekë ka jole hna cile kow hnene la itre trefëne ngöne la 1 Korinito 7:32-34. (E jë.) Ame la itre ka faipoipo, angatre a “kuke hnine la ite ewekë ne fen,” tune la xen, me ihetr, me uma, me itre xa ewekë ju kö. Pine nemene lai? Ame ngöne la angeice cas, maine jë tro la ketre trejine trahmanyi a nue la mele i angeice troa cainöj. Ngo ame la trahmanyi ka faipoipo, angeice a isine troa xome la traeme me trenge catre i angeice troa thupëne la föi angeic, me thele troa amadrinë nyiidro. Ketre tune mina fe kowe la föe, laka, angeice a troa ujë tune lai kowe la trahmanyi nyiidro. Tha sihngödri kö koi Iehova la isa aja i nyidro. Atre hnyawa hi Nyidrëti la enyipiewekëne tro la lue trefëne a xome la itre xa hnepe traeme me trenge catre i nyidro matre troa madrin e hnine la faipoipo; kolo hi lo traeme me trenge catre hnei nyidroti ekö hna isa xome thatraqane la huliwa i Nyidrë ngöne lo tha faipoipo petre kö nyidro.
18. Nemene la itre ewekë nyine troa wenë amekötine göi itre nyine iamadrine thupene la hna faipoipo?
18 Ngo hetrenyi pala kö la ketre ini hna xome qa ngön. Maine nyipici laka nyipi ewekë kowe la lue trefëne troa xome la itre xa traem, me trenge catre i nyidro qa ngöne la huliwa i Akötresie matre troa acatrene la aqane imelekeu i nyidro, hapeu, ame lo tha faipoipo petre kö nyidro, tha celë kö lo hnei nyidroti lai hna hane kuca, ngöne lo nyidroti a xome la traeme me trenge catre thatraqane la itre nyine iamadrinë. Nemene la thangane elanyi kowe la föe, e tro hmaca la trahmanyi a lö hnine menu la itre elo me ce tro hmaca memine lo itre sine ce elo i angeice ekö lo tha faipoipo petre kö angeic? Nge tune ka elanyi e hane jë föe xome la traeme ka nyimutre matre troa ce kuci nyine iamadinë memine la itre enehmu i nyiidro? Maine jë troa ha drenge hnene la trahmanyi la akötrene la troa lapa cas, me mekune menune ka hape, tha hnimi angeice hë, nge pë hë madrin. Tha tro jë kö a traqa la itre ewekë cili, e troa kuca asë hnene la lue ka faipoipo la hnei nyidroti hna atreine matre troa acatrene la otrene ihnimi nyidro, trahmanyi me föe.—Efe. 5:31.
Aja i Iehova Tro Sa Pë Ethane Ngöne La Thina
19, 20. (a) Pine nemene matre ijije tro fe a hane ketre la itre ka faipoipo hnene la kuci ngazo? (b) Nemene la ethanyine kowe la lue trefëne e troa qea la hnei nyidroti hna lapa iananyi?
19 Kola isine hnene la itre hlue i Iehova troa pë ethane ngöne la thina. Itre xane a mekune troa faipoipo, ke, angatre a xouene e sasaithe pi elanyi la itre trepene meköti göi thina. Ngo tha hnene kö laka e faipoipo hë së, ke, tha tro ha hane ketri së hnene la kuci ngazo. Ame ekö lo hneijine i Tusi Hmitrötr, mele ne hi la itre atr e hnei angatre hna lapa hnyawa e hnine la hna xupi hag. Maine troa lö pi hnene la ketre qa hnine la hag, maine jë troa kötre sai angeice maine humuthi angeice pena hnene la itretre ënö, maine itre ka isi. Ceitune hi lai memine la itre trefën, laka, tha tro kö a kei kowe la kuci ngazo, e hnei angatre hna mele thenge la itre ifego hna eköthe amë hë thatraqai angatre hnene la Atre acile la faipoipo göi troa ce meköle trefën.
20 Hnei Paulo hna qejepengöne la götrane cili ngöne 1 Korinito 7:2-5. Ka meköti e tro föe a ce meköle memine la trahmanyi nyiidro, nge thatraqai nyiidro hmekuje la ewekë cili. Ketre tune mina fe la trahmany, laka meköti e tro angeice a ce meköle me föi angeic, nge thatraqai angeice hmekuje hi la ewekë cili. Tusi Hmitrötr a qaja ka hape, tro la itre trefëne a isa hamëne la “[ka meköti]” thatraqai ketre, maine edrö i ketre, kola qaja la troa ce meköle trefën. Ngo, pine laka, qea la hna lapa iananyi hnei itre xan—maine kola isa xomi ijine mano, maine kola huliwa ga nanyi hnei ketre, ene pe tha hamëne hë lo edrö, ene lo ewekë “[ka meköti]” thatraqai ketre. Maine jë tro hë angeice a kei hnene la ecatrene la ihuline la fen, ene pe nyixetë triji ketre pi hi, hnene laka, thatreine hë xomehnöthe la itre aja ne ngönetrei; drei la ketre hulö ka tru kowe la mele ne trefën. Iehova a amanathithine la itre hene ne fami ka thupëne hnyawa la itre hnepe lapa i angatr, me catre thele matre tha tro kö a ethitre la faipoipoi angatr.—Sal. 37:25.
Itre Eloine e Troa Trongëne La Eamo Qa Hnine La Tusi Hmitrötr
21. (a) Pine nemene matre tha ka hmaloi kö troa axecië mekune göi troa lapa cas me faipoipo? (b) Pine nemene matre ka lolo catre la eamo hna hamëne ngöne 1 Korinito mekene 7?
21 Ketre mekune ka jole catre e troa xom, la troa lapa casi maine troa faipoipo. Ame la qane la itre jole ka traqa ngöne la aqane imelekeu ne la itre atr, tre, kolo hi lo ngazo ka eje the së asë. Celë hi matre, hna kapa ju hë me amanathithine hnei Iehova la ka lapa casi maine ka faipoipo pena, ngo hetrenyi pala hi la itre akötre hna thatreine troa neën. Maine tro epuni a trongëne la eamo ka lolo hna hamëne ngöne 1 Korinito mekene 7, tha tro ha tru menu pala ha la itre jol. Ka lapa casi ju hë epuni maine ka faipoipo pena, ngo ame xajawai Iehova, “loi la hnei [epuni] hna kuca.” (E jë la 1 Korinito 7:37, 38.) Ame la troa kepe epuni hnei Iehova, tre, celë hi mekune lai ka sisitria catre kö hune la nöjei mekune asë hnei epuni hna thele tro eatrën. Qa ngöne laka, Nyidrëti a kepe epun, hawe, tro hë epuni a catre trongëne la gojenyi ne tro kowe la mele ngöne la fene ka hnyipixe. Ame hë e cili, patre hë la itre jole ka akötrë së enehila, nge ka tupathe la aqane imelekeu ne la itre trefën.
[Ithueamacany]
a Wange ju la itus Jëne Madrine Kowe La Fami, mekene 2, paragarafe 16-19.
Atreine Hë Epuni Troa Sa?
• Pine nemene matre tha loi kö tro la ketre atr a upe ielene la ketre troa faipoipo?
• Itre hluei Iehova fe ka tha faipoipo petre kö, tro epuni a xome hnyawa tuneka la traeme i epun?
• Tro la lue ka iatre a hnëkë tuneka kowe la itre jole ka troa traqa elanyi e hnine la faipoipo?
• Pine nemene matre tro fe a hane ketre la itre ka faipoipo hnene la kuci ngazo?
[Thying]