Mejiune Jë Koi Iehova, “Akötesieti Ate Akeukawan’ Asë”
Troa Xome La Ita Ne Thup Celë e 12 Diseba Me Wiike Cili
Nyima 75 Me 115
Mejiune Jë Koi Iehova, “Akötesieti Ate Akeukawan’ Asë”
“Qaja aloinyi Akötesie me Tetetroti ne la Joxu shë Iesu Keriso, ene la Tetetroti ka ihnimi me Akötesieti ate akeukawan’ asë.”—2 KOR. 1:3.
1. Nemene la aja ka eje thene la nöjei pengöne atr?
QANE la kola hnaho së, easa aja iakeukawany. Ame la medreng, tre, nyën a treij matre tro sa atre laka nyën a aja keukawa. Maine jë nyën a ajane troa xepi nyën, maine ka pi xeni pena. Ame mina fe la easa tru, hetrenyi pala hi the së la ajane troa akeukawane la hni së. Kola catrehnine la aja cili ngöne la easa cile kowe la itre jole ka tru.
2. Nemene la hna qaja xeciëne hnei Iehova kowe la itre ka mejiune koi Nyidrë?
2 Hna majemine akeukawane la itre hni së hnene la itre atrene la fami me itre enehmu së. Ngo ame itre xa ijin, thatreine kö la atr troa nyinyine la itre jole ka nyi ehacene la mele së. Akötresieti hmekuje hi la ka atreine akeukawane la hni së, ngacama catrehnine ju hë la itre ewekë ka akötrëne la mele së. Kola hamë mejiune koi së hnene la Wesi Ula i Nyidëti ka hape: “Eashenyi Iehova koi angat’ asë angete hë nyidë, . . . tro nyidëti a shamatine la hnei angate hna teij.” (Sal. 145:18, 19) Eje hi, “Eje la lue xajawa i Iehova hui ange ka meköt, nge ame la lue hnashama i nyidë, te, kola shamatine la nine hë i angat.” (Sal. 34:15) Ngo maine easa ajane troa kapa la ixatua me keukawa qathei Akötresie, nyipi ewekë tro sa mejiune koi Nyidrë. Hnei Davita, atre cinyihane la salamo hna anyipicine lai ngöne la nyidrëti a sili nyima ka hape: “Tro Iehova a hunapo i ange hna angazon, hunapo ngöne la nöjei drai ne aköt. Nge ame angete ate la atesiwa i cilie, te, troa lapau cilie ; ke tha hnei cilieti kö, Iehova, hna nue tiji angete thele cilie.”—Sal. 9:9, 10.
3. Nemene la ceitune hnei Iesu hna xome matre troa amamane la ihnimi Iehova kowe la nöje i Nyidrë?
3 Ka tru koi Iehova la itre hluei Nyidrë. Hnei Iesu hna acatrene la mekune cili ngöne la nyidrëti a qaja ka hape: “Hape u, tha hna itöne kö la ite sisi ka tripi thupene lue asari ? nge pëkö kete e nyudeni hna thëthëhmine hnei Akötesie. Ngo asesë hë e la ite pene he i nyipunie ; the qou kö, ke nyipunieti e hune la ite sisi ka kösau.” (Luka 12:6, 7) Hnei Iehova hna qaja kowe la nöje i Nyidrëti ekö jëne Ieremia perofeta ka hape: “Ini a hnimi ’ö hnene la ihnimi ka epine palua ; qa ngöne lai hnenge hna ahoeane la ihnimi koi ’ö.”—Iere. 31:3.
4. Pine nemene matre easa mejiune kowe la itre hna thingehnaeane hnei Iehova?
4 Tro la mejiune së koi Iehova me kowe la itre hna thingehnaeane hnei Nyidrë, a akeukawane la hni së ngöne la itre ijine akötr. Qa ngöne lai, loi e tro la mejiune së koi Akötresie a tune la mejiune i Iosua ka mama ngöne la itre trengewekë i angeic: “Tha tia kö la kete ewekë ne la nöjei ewekë ka loi asë hnei Iehova Akötesi nyipunie hna ulatine koi nyipunie ; eate asë hë koi nyipunie, ngo tha tia kö la kete ewekë ka cas.” (Ios. 23:14) Ketre, ka xecie hnyawa koi së laka, maine hna hutra hnyija la hni së hnene la itre jol, ngo ka “nyipici Akötesie,” nge tha tro pi kö Nyidrëti a nuaxöje la itre hlue i Nyidrë ka mele nyipici.—E jë la 1 Korinito 10:13.
5. Nemene la ka aijijë së troa hane akeukawane la hni ne la itre xa atr?
5 Paulo aposetolo a qeje Iehova ceitu me “Akötesieti ate akeukawan’ asë.” Kolo lai a hape, tro Iehova a akeukawane la hni ne la itre ka akötre maine ka thë fë hni. (E jë la 2 Korinito 1:3, 4.) Pëkö hna thatreine hnei Iehova, nge ketre pëkö ka atreine troa sewe Nyidrë troa akeukawane la hni ne la itre ka hnimi Nyidrë. Easë mina fe, ijiji së hi troa hane “akeukawa angat’ angete aköt.” Atreine hi së troa ujë tune lai “hnene la keukawa hna akeukawa [së] hnei Akötesie.” Pëkö atr ka atreine troa hane akeukawanyi së tui Iehova!
Itre Kepine Matre Easa Akötr
6. Qaja jë la itre xa kepine matre easa akötr.
6 Easë asë hi a ajane troa akeukawane la hni së ngöne la kola traqa la itre jole kowe la mele së. Ame la ka akötrë së catr, tre, ene la kola meci triji së hnene la föe hmunë maine hnene la kuku pena. Kolo mina fe a akötrë së hnene la iwangatrehmekunyi atr, memine la aqane qanangazo së pine la pengö së. Ketre, kola nyixane fe la akötre së hnene la kola wezipo, maine qatr, maine puafala, maine kola melëne la itre ejolene la lue trefën, me itre xane ju kö.
7. (a) Ame ngöne la itre ijine akötr, nemene pengöne ixatua hne së hna ajan? (b) Nemene la hnei Iehova hna kuca matre troa axapone la hni “hna thë fë me hna hutra hnyija”?
7 Ame ngöne la itre ijine akötr, easa aja iakeukawanyi matre troa axapone la hni së, me aloine la mekune së, me itre aliene hni së, me aegöcatrenyi së ngöne la götrane ngönetrei me ua. Hanawange la pengöne la hni. Kola amamane hnene la Wesi Ula i Akötresie laka ame itre xa ijin, tre, easa xomi akötrëne la hni “hna thë fë me hna hutra hnyija.” (Sal. 51:17) Eje hi laka, atreine hi Iehova troa nyinyine la jole celë, ke, Nyidrëti “lo ate axapone la angete thë fë hni, me atuthe la ite eate i angat.” (Sal. 147:3) Ngacama catrehnine ju hë la akötr, ngo atreine hi Akötresie troa akeukawane la atre ka thë fë hni, e tro angeice a thithi koi Nyidrë fë la lapaune me trongëne la itre wathebo i Nyidrë.—E jë la 1 Ioane 3:19-22; 5:14, 15.
8. Iehova a xatua së tuneka troa cile kowe la itre akötre ne la mekuna së?
8 Ame la easa cile kowe la itre jol, tre, easa ajane troa aloine la itre mekuna së. Thatreine kö tro sa cile casi kowe la itre jole cili ka tupathi la lapaune së. Ngo hna nyimane hnene la atre cinyihane la salamo ka hape: “Ngöne la nyimu mekun’ e kuhu hning, kola akeukawane la hninge hnene la ite nyine aupune qa thei cilie.” (Sal. 94:19) Hnei Paulo mina fe hna cinyihane ka hape: “The kuke hnine kö la kete ewekë ; ngo loi e cengöne amamane koi Akötesie la ite aja i nyipunie hnene la thith, me sipo, me ole. Nge tro ha thupëne la ite hni nyipunie me ite mekune i nyipunie göi Keriso Iesu, hnene la tingetinge ka sisitia qa thei Akötesie hune la nöjei mekun’ asë.” (Fil. 4:6, 7) Hawe, ame la nyinyine kowe la itre akötre ne la mekuna së, tre, ene la troa e me sine thele la Itre Hna Cinyihan.—2 Tim. 3:15-17.
9. Tro sa cile tune ka kowe la itre aliene hni ka iananazijë?
9 Ame itre xa ijin, kola apujene la trenge catre së hnene la itre aliene hni ka iananazijë. Maine jë, easa mekune ka hape, tha ijiji së kö troa xome la ketre hnëqa hnine la ekalesia. Ame ngöne la götrane cili, atreine hi tro Iehova a akeukawanyi së me xatua së. Hanawange la pengö i Iosua: Ame ngöne la kola upi angeice troa elemekene la tronge i angetre Isaraela me lepe la itre nöje ithupëjia ka catr, öni Mose kowe la nöje ka hape: “Catejë nyipunie, nge iahlëpi, the qou kö, nge the hmengöhmengöne kö e angat, ke Iehova Akötesi ’ö a ce tro me eö ; tha tro kö nyidëti a pate thei ’ö, me nue tiji ’ö.” (Deu. 31:6) Ame laka lö fë jë Iosua la nöje i Akötresie kowe la la Nöje Hna Thingehnaean, me atreine ngane asë la itre ithupëjia me angatr, tre, hnene la ixatua i Akötresie. Hnei Mose hë hna hane öhne la ixatua i Akötresie ngöne la Hnagejë Ka Palulu.—Eso. 14:13, 14, 29-31.
10. Maine kola kucakuca la ngönetrei së pine la itre akötr, nemene la ka troa xatua së?
10 Ka hetre thangane ka ngazo kowe la ngönetrei së, la itre akötre së. Nyipici laka, hetre thangane ka loi koi së la troa xen, me mano hnyawa, me enijë ngönetrei, me porop. Ketre, maine tro sa mekune la itre ewekë ka lolo hna thingehnaeane hnei Tusi Hmitrötr, tro ha hetre eloine kowe la mele së. Hawe, ame la easa akötr, tre, loi e tro sa mekune la hna melëne hnei Paulo memine la trengewekë i nyidrë ka hape: “Hna cile xöteithi hun, ngo tha peixete pe ; luelue hun, ngo tha sheshëthou ; hna axösisin, ngo tha hna nue tije kö ; hna akein, ngo tha patepi kö.”—2 Kor. 4:8, 9.
11. Tro sa nyinyine tuneka la meci së ngöne la götrane ua?
11 Hetre ethanyine la itre xa itupathe kowe la mele së ngöne la götrane ua. Atreine mina fe tro Iehova a xatua së ngöne la götrane celë. Kola anyipicine koi së hnene la Wesi Ula i Nyidrë ka hape: “Iehova la ate sajuë ange ka troa kei asë, me acili ameköti angete wewë asë.” (Sal. 145:14) Maine easa ajane troa nyinyine la meci së ngöne la götrane ua, loi e tro sa thele ixatua thene la itre qatre thup. (Iako. 5:14, 15) Ketre, loi e tro sa lapa mekune la mejiune troa mele epine palua matre atreine së troa cile catre ngöne la itre itupath.—Ioane 17:3.
Aqane Aupune Akötresie La Itre Hluei Nyidrëti Ekö
12. Qejepengöne la aqane akeukawanyi Aberahama hnei Iehova.
12 Önine la atre cinyihane la salamo ka hape: “Mekunejë la wesi ula kowe la hlue i cilie, lo hnei cilieti hna upi ni troa mejiun. Celë hi ate aupunyi ni ngöne la aköteng ; ke ate amele ni la wesi ula i cilie.” (Sal. 119:49, 50) Ame enehila, easa e hnine la Wesi Ula i Iehova la aqane akeukawane Nyidrëti ekö la itre atr. Hanawange la pengö i Aberahama: Hnei nyidrëti hna drenge ka hape, tro Iehova a apatrenyi Sodoma me Gomora, ene pe nyidrëti a hnehengazon, me hnyinge koi Akötresie ka hape: “Olongati u, jötëti cilieti a ce apatene la ka meköti me ka ngazo ?” Iehova a akeukawanyi Aberahama me qaja xeciëne ka hape, maine hetrenyi la 50 lao atre ka meköt, tha tro kö Nyidrëti a apatrenyi Sodoma. Ngo afaifi a hnyinge Aberahama koi Iehova ka hape: Ue e hetrenyi ju la 45 lao atre ka meköt? Maine 40? Maine 30? Maine 20? Maine 10? Aberahama pala hi a hnying, nge ketre kolo pala hi a sa amenyikenyi hnei Iehova ka hape, tha tro kö Nyidrëti a apatrenyi Sodoma. Ngo goi tha traqa fe koi ala trene lao atre ka meköti e cili; hnei Iehova pë hë hna amele Lota me lue nekö i angeice jajiny.—Gen. 18:22-32; 19:15, 16, 26.
13. Hnei Hana hna amamane tuneka ka hape, ka mejiune nyidro koi Iehova?
13 Atraqatre la aja thei Hana föi Elekana, troa hetre nekönatr. Ngo ka safëje nyidro, celë hi ka ahleuhleunyi nyidro. Hnei nyidro hna thithi fë la jole cili, ame hnei Elia lo Atre Huje Ka Sisitria hna qaja koi nyidro ka hape: “Tro Akötesi angete Isaraela a hamëne la ewekë hnei ’ö hna sipone thei nyidë.” Mama pi hi ka hape, hna akeukawanyi Hana hnene la trengewekë celë, ke “ame la qëmeke i angeice, te, tha iëzi hmaca kö.” (1 Sam. 1:8, 17, 18) Hnei Hana hna mejiune koi Iehova me nue asë la itre ewekë cili koi Nyidrë. Ngacama thatre kö nyidro la ewekë elanyi ka troa traqa, ngo ka tingetinge hnyawa la hni nyidro. Ame hë e thupen, hnei Iehova hna kapa la thithi nyidro. Ame hna upune pi Hana, me hnahone la ketre nekönatre Samuela la ëjen.—1 Sam. 1:20.
14. Pine nemene matre Davita a aja keukawa, nge hnei angeice hna xëwe koi drei?
14 Davita Joxu i angetre Isaraela ekö, la ketre atre hna akeukawane hnei Akötresie. Hnene laka “Iehova a wange la hni” ame la Nyidrëti a ië Davita troa joxu e Isaraela, atre hnyawa hi Nyidrëti laka ka hni ka nyipici angeice nge ka tru koi angeice la nyipi hmi. (1 Sam. 16:7; 2 Sam. 5:10) Ngo ame hë e thupen, hnei Davita hna tria me Batheseba, nge angeice a humuthe pi fe la trahmanyi nyidro matre troa juetrëne la ngazo. Ame hë la Davita a öhne la etrune la ngazo i angeic, ene pe angeice a thithi jë koi Iehova, me hape: “Köle tije pi la ite hnenge hna shashaithe thenge la etrune la tenge ihnimi cilie. Nyipi sië ni pi qa ngöne la menung, me nyidrawa ni jë qa ngöne la ngazong. Ke ate hë ni la ite hnenge hna shashaith, nge eje pala hi qëmekenge la ngazong.” (Sal. 51:1-3) Ka nyipi ietra Davita, ame hnei Iehova hna nue la ngazo i angeic. Ngo ame pe, tre, tro pë hë Davita a xeni pune la ngazo hnei angeice hna kuca. (2 Sam. 12:9-12) Lolo catre la aqane ihnimi ipitö i Iehova, ke, celë hi ka akeukawane lai la hni ne la hlue i Nyidrëti ka ipië.
15. Qëmekene tro Iesu a mec, nemene la ixatua hna hamëne hnei Iehova?
15 Ame lo Iesu e celë fen, hnei nyidrëti hna cile kowe la itre itupathi ka tru. Hnei Akötresieti hna nue troa tupathe tune lai la lapaune i Iesu, ketre atre ka pexej, ngo hnei nyidrëti pala hi hna mele nyipici me mejiune koi Iehova me sajuëne la musi cile i Nyidrë. Ame ngöne lo kola wanaxoeë nyidrë me humuthi nyidrë, hnei Iesu hna thithi koi Iehova, ka hape: “Tha eje kö troa [kuca] la hanengëngö, ngo [loi] pe la hanengë i cilie.” Ame hna mama pi la angela koi Iesu me aegöcatrenyi nyidrë. (Luka 22:42, 43) Hnei Akötresieti hna akeukawanyi Iesu, ithuecatre koi nyidrë me hamëne la ixatua ka ijij ngöne la ijine cili.
16. Maine troa thele troa humuthi së pine laka easa catre mele nyipici, nemene la hna kuca hnei Akötresie matre troa akeukawane la hni së?
16 Maine troa thele troa humuthi së pine laka easa catr itre Keresiano, ijije hi tro Iehova a xatua së nge tro kö Nyidrëti elanyi a ceme së, matre tro sa mele nyipici koi Nyidrë. Ketre, kola akeukawane la hni së hnene la mejiune kowe la melehmaca. Nge drei kö la madrine së elanyi la troa mekune laka, meci la ithupëjia hnapine “hna troa apaten”! (1 Kor. 15:26) Ame la itre hluei Iehova ka mele nyipici nge ka meci hë, angatre ngöne la mekuna i Iehova, nge tha sihngödri kö koi së laka tro Nyidrëti a amele angatre hmaca qa hna mec. (Ioane 5:28, 29; Ite Huliwa 24:15) Hnene la lapaune së kowe la melehmaca, hawe, keukawa la itre hni së nge hetre mejiune së ngöne la itre ijine itupath.
17. Nemene la aqane akeukawane la hni së ngöne la kola meci la itre atre hne së hna hnim?
17 Drei la ithuecatre koi së, e troa atre laka itre atre hne së hna hnime a meköle treqene troa amele angatre hmaca! Angatre a troa hane mele elanyi ngöne la ketre fene ka hnyipixe, laka mingöminge hë, ke, pë hë iakötrë. Nge drei kö la ketre manathithi elanyi kowe la itre hluei Iehova “ka alanyimu atraqat,” troa mele pe ngöne la kola apatrene la fene celë ka ngazo! Angatre a troa kapa la itre atre hna amelene hmaca me hamë ini koi angatr!—Hna ama. 7:9, 10.
E Kuhu Fe Së La Lue Ime Ka Epine Palua i Akötresie
18, 19. Nemene la aqane akeukawane hnei Akötresie la hni ne la itre hluei Nyidrë ngöne la angatre a cile kowe la itre itupath?
18 Ame e hnine la ketre nyima, hetrenyi la itre trengewekëne ka ithuecatre me iakeukawanyi hna cinyihane hnei Mose matre troa acatrene la lapaunene la nöje Isaraela; kola hape: “Hnamunë i ’ö la Akötesie ka epine palua, nge e kuhu fei ’ö la lue ime ka epine palua.” (Deut. 33:27) Hna qaja pë hë e thuepene hnei Samuela perofeta koi angetre Isaraela, ka hape: “the tro kö nyipunie a jea qa thei Iehova, ngo tro nyipunie a nyi hlue i Iehova hnene la ite hni nyipunie ka pexej. . . . tha tro kö Iehova a tije la nöje i nyidë, qa ngöne la atesiwa atraqate i nyidë.” (1 Sam. 12:20-22) Tha tro jë kö Iehova a nuetriji së, e hne së hna qale catre pala hi koi Nyidrë. Tro pala hi Nyidrëti a hamëne la ixatua koi së.
19 Akötresieti a hamëne la ixatua me akeukawane la hni ne la nöje i Nyidrë, ngöne la itre ijine ka akötre ne la itre drai tixenuë celë. Ame ngöne la hneijine së, nyimutre la itre trejine e cailo fene hna axösisine maine hna akalabusine pena, pine laka itre ka nyihluei Iehova angatr. Kola mama ngöne la mele i angatre laka, hnei Iehova pala hi hna akeukawane la hni angatre ngöne la angatr e hnine la itre itupath. Drei la ketre ceitun, 23 la etrune la itre macatre ne lapa kalabusi la ketre trejine ne Rusia pine la lapaune i angeic. Ngacama hna umë nyidrë, ngo hnei nyidrëti fe hna hane kapa la göxeni ngöne la götrane la ua; celë hi ka aegöcatrenyi nyidrë me akeukawane la hni nyidrë. Hnei nyidrëti hna qaja ka hape: “Ame ngöne la itre drai ne lapa kalabusi ni, tre, hnenge hna kökötre la mejiunenge koi Iehova, nge hnenge hna kapa la trengecatre qathei Nyidrë.”—E jë la 1 Peteru 5:6, 7.
20. Pine nemene matre xecie hnyawa koi së laka tha tro jë kö Iehova a nuetriji së?
20 Ame la easa cile kowe la itre itupath, loi e tro sa lapa mekune la itre trengewekë ne la atre cinyihane la salamo, ka akeukawane la itre hni së kola hape: “Tha tro kö Iehova a nue tije la nöje i nyidë.” (Sal. 94:14) Maine nyipici laka easa ajane troa hane akeukawane la hni së, ngo hnëqa së mina fe troa hane akeukawane la hni ne la itre xa atr. Easë a troa ce wange ngöne la hna cinyihane ka troa xulu laka, Ijije fe tro sa hane akeukawane la hni ne la itre atre ka hleuhleu me akötre ngöne la fene ka ngazo celë.
Tro Nyipunieti a Sa Tune Ka?
• Nemene la itre xa ewekë ka ahleuhleune la mele së?
• Nemene la aqane akeukawane Iehova la itre hluei Nyidrë?
• Maine kola troa humuthi së, nemene la ka troa akeukawane la hni së?
[Thying]