Kepine Matre Tro Sa Nue La Uati Hmitrötr Troa Eatrongë Së
Troa Xome La Ita Ne Thup Celë e 6 Febuare Me Wiike Cili
Nyima 71 Me 63
Kepine Matre Tro Sa Nue La Uati Hmitrötr Troa Eatrongë Së
“Cilieti la Akötesingö ; jiniati la [“ua,” MN] i cilie ; loi e tro [“ej,” MN] a e ni.”—SAL. 143:10.
1. Nemene la aqane troa köja gojenyine la ketre atr hnene la mene tha hna öhne kö hnei lue mek?
HETRENYI la ketre jiane huliwa hna hape kabas. Ame la huliwa ne ej ke troa ixatua köja gojeny. Maine hetrenyi epun, ame ngöne la nöjei gojenyi epun, tre tro pala hi ej a köja kolopi. Qa ngöne lai, atreine hi eje troa xatua së troa tro kohië, maine kolojë maine kuë maine kolopi pena. Ame la ka hule kolopine la ka köja, tre ene la mene ka emu kanothe la ihnadro. Nge ekö catre hë la itre atr huliwane lai kabas.
2, 3. (a) Nemene la trengecatre hnei Iehova hna huliwane ekö qa? (b) Pine nemene matre xecie hnyawa koi së, laka, tro la trengecatre i Akötresie ka tha mama kö a eatrongë së enehila?
2 Hetrenyi la ketre mene ka catre ka tha mama kö nge ka nyipi ewekë kowe la mele së, pine laka, eje a eatrongë së. Nemene jë lai trengecatre cili? Kola qejepengöne la mene cili ngöne la qane la Tusi Hmitrötr. Kola qaja hnei Genese la hna kuca ha ekö qa hnei Iehova, kola hape: “Hnei Akötesieti hna xupe la hnengödrai memine la fene hnengödrai ngöne la qan.” Hnei Nyidrëti hna upe la mene ka catre i Nyidrë matre troa xupe la itre ewekë cili, celë hi matre qaja jë ka hape: “Kola jöeë la Ua i Akötesie.” (Gen. 1:1, 2) Hawe, Uati hmitrötre hi lo trengecatre hna xome hnei Akötresie matre troa xupe la nöjei ewekë. Celë hi matre, ame la easë pi la, tre, hnene la hnei Iehova hna xome la uati hmitrötre i Nyidrë, matre troa kuca la nöjei huliwa i Nyidrë.—Iobu 33:4; Sal. 104:30.
3 Hapeue easë itre atr ka mel, tro jë kö a hetre thangane lai trengecatre i Akötresie kowe la mele së? Atre hnyawa hi la Hupuna i Akötresie laka, tha nyine tro kö së lai a lueluën, ke öni nyidrëti kowe la itretre drenge ka hape: “[Tro] la Uati . . . a e nyipunie kowe la ite nyipici asë.” (Ioane 16:13) Tro sa trotrohnine tune ka la pengöne la uati cili, nge nemene la kepine matre loi e tro sa nue eje troa eatrongë së?
Pengöne La Uati Hmitrötr
4, 5. (a) Nemene la hnene la itre ka lapaune kowe la Trinité, hna mekune menune göi uati hmitrötr? (b) Nemene la aqane tro epuni a qejepengöne la uati hmitrötr?
4 Maine jë, hetrenyi la itre atr hne së hna cainöje kow, ka lapaune kowe la Trinité. Celë hi matre angatre a mekune menune laka, casi hi la uati hmitrötre me Akötresie. (1 Kor. 8:6) Ngo nyimutre la itre nyine anyipicine laka, ka ifekethi la ini hna hape Trinité memine la ini hna hamëne hnei Tusi Hmitrötr.
5 Nga nemene kö la nyipi pengöne la uati hmitrötr? Drei la hna qaja hnene la itre ithuemacanyi ka he kuhu fene la Tusi Hmitrötr Traduction du monde nouveau — avec notes et références göi Genese 1:2; kola hape: “Ame la hnaewekë qene Heberu hna hape, ‘rouah’ tre hna ujëne ka hape ‘ua,’ ngo hna ujëne mina fe ka hape ‘enyi’ me itre xa hnaewekë ju kö ka qaja la ketre trengecatre ka tha mama kö.” (Wange ju fe la itre ithuemacany ka he kuhu fene göi Genese 3:8; 8:1, MN.) Tune la enyi laka tha ka mama kö koi lue meke i atr, ngo ka hetre ecatrene pe, hawe, ketre tune mina fe la uati hmitrötre laka tha ka mama kö, ngo mama hnyawa hi la thangane ej. Celë hi trengecatre i Akötresieti lai hnei Nyidrëti hna huliwane thene la itre atr me itre ewekë, matre troa eatrëne la aja i Nyidrë. Hapeu tro kö sa luelue laka, qathei Akötresie Kapucatine asë la trengecatre cili? Ohea!—E jë la Isaia 40:12, 13.
6. Nemene la hna sipone ielene koi Iehova hnei Davita?
6 Hapeu tro hmaca jë kö Iehova a xome la uati Nyidrë, matre troa eatrongë së ngöne la mele së? Drei la hnei Nyidrëti hna ahnithe koi Davita, atre cinyihane la salamo ka hape: “Tro ni a ini ’ö me köjane koi ’ö la jëne qâ i ’ö troa trongën.” (Sal. 32:8) Hapeu, celë jë kö la aja i Davita? Eje hi, ke hnei angeice hna sipone ielene koi Iehova ka hape: “Ini ni jë troa kuca la hanengë i cilie, ke cilieti la Akötesingö ; jiniati la [ua] i cilie ; loi e tro [ej] a e ni.” (Sal. 143:10) Loi e tro fe a eje the së la ajane troa eatrongë së hnene la uati Akötresie. Pine nemen? Tro sa ce wange la foa lao kepin.
Tha Hna Aijijë Së Kö Troa Ketre Sipu Eatrongë Së Kö
7, 8. (a) Pine nemene matre thatreine kö së troa ketre sipu eatrongë së kö? (b) Hamëne jë la ketre ceitune ka amamane la kepine matre, tha tro pi kö sa thele troa ketre sipu köja gojenyi së kö ngöne la fene celë ka ngazo.
7 Ame la hnapan, tre loi e tro sa thele troa eatrongë së hnene la ua i Akötresie, pine laka thatreine kö së troa ketre sipu eatrongë së kö. Ame la hnaewekë hna hape “eatrongën” tre kola hape, “troa amamane maine köjane la gojenyi nyine troa trongën.” Ngo tha hnei Iehova kö hna hamëne koi së la atreine troa ketre sipu eatrongë së kö. Nge maine tro sa thele troa ketre sipu eatrongë së kö, tre tro sa anyimua tria, pine laka atre ka ngazo së. Hnei Ieremia perofeta i Iehova hna cinyihane ka hape: “Iehova fe, ate hë ni laka tha qâ i ate kö la jë i angeic ; tha qâ i ate troa amekötine la ite hna feke ca hnei angeic.” (Iere. 10:23) Pine nemen? Hnei Ieremia hna drenge la aqane qejepengöne Akötresie la kepine matre tha ijije kö tro sa ketre sipu eatrongë së kö. Öni Iehova göne la atr ka eje e kuhu hni së ka hape: “Ate nyipi iaö la hni hune la nöjei ewekë asëjëihë, nge nyipi ngazo ej ; dei la ate ate hmekun’ ej?”—Iere. 17:9; Mat. 15:19.
8 Pane mekune jë së laka ketre atr a ihamë ngöne la ketre götrane hna thatrepengöne kö hnei nöjei atr, nge ga ngazo pena, tune la hnapapa maine hnenyipa hnitre pena. Tha loi kö troa tro casi nge pë kö atre köja gojenyi angeic, maine pë pena kö map. Maine thatre kö la atr la aqane tro angeice a mele ngöne la götrane ka tune lai, nge ketre thatrepengöne pena kö angeice la gojeny, hawe tro hë angeice a patr. Ketre tune mina fe, ame la sipu aqane tro sa mele pe ngöne la fene celë, tre ene la troa sipone koi Iehova tune la aqane kuca i Davita, ka hape: “Hnyöke la ite hnenge hna feke ca ngöne la ite kala i cilie, nge tha uke kö la lue cang.” (Sal. 17:5; 23:3) Troa amekötine la hna feke ca hne së tune ka?
9. Tro la uati Akötresieti a köja gojenyi së tune ka?
9 Maine ka hni ka ipië së nge eje the së la ajane troa eatrongë së hnei Iehova, tro hë Nyidrëti a hamëne la uati hmitrötre i Nyidrë matre nyine köja gojenyi së ka loi. Tro la trengecatre i Nyidrëti a xatua së tune ka? Hnei Iesu hna qaja kowe la itretre drei nyidrë ka hape: “Ame la Ixatua, ene la [Uati Hmitöt], la hnei Tetetroti hna troa upe ngöne la ëjeng, tro nyidëti a ini nyipunie la nöjei ewekë asë, me amekunë nyipunie la nöjei ewekë asë hnenge hna qaja koi nyipunie.” (Ioane 14:26) Maine tro sa thithi me inine pala hi la wesi ula i Akötresie, memine fe lo itre trengewekë i Keriso, tro hë la uati hmitrötre a akökötrene the së la aqane trotrohnine së la inamacane i Iehova, matre atreine jë së troa xötrethenge hnyawa la aja i Nyidrë. (1 Kor. 2:10) Ketre, e traqa jë la ketre jole ngöne la mele së, tro la uati a köja gojenyi së. Tro eje a amekunë së la itre trepene meköti ne la Tusi Hmitrötre hne së hna inine hë, me xatua së troa trotrohnine la aqane tro sa trongëne itre ej.
Hna Eatrongë Iesu Hnene La Uati Hmitrötre i Akötresie
10, 11. Tune ka la aqane kapa hnene la Nekö i Akötresieti Ka Casi la uati hmitrötr, nge nemene la hna aijijë nyidrëti troa kuca?
10 Ame la hnaaluene kepine matre tro sa thele troa eatrongë së hnene la uati hmitrötr, tre, hnene laka, hnei Akötresieti hna ketre eatrongëne la Hupuna i Nyidrë jëne la ua i Nyidrë. Qëmekene tro nyidrëti a traqa e celë fen, atre hë la Hupuna i Akötresie lo hna perofetane hna hape: “Troa të hui nyidë la [Uati] Iehova, [“ua,” MN ] ne inamacane me trotrohnin, [“ua,” MN ] ate qeje pengöne me egöcat, [“ua,” MN ] ne wangate hmekune me qoue Iehova.” (Is. 11:2) Tha hmaloi kö koi Iesu ekö troa mele e celë fen. Drei jë kö la madrine ka eje thei nyidrë troa kapa la uati Akötresie!
11 Kola eatre la itre trengewekë i Iehova. Kola qaja hnene la evangelia i Luka la ewekë ka canga traqa thupene lo kola bapataiso Iesu: “Nge tiqa ha Iesu hnei [Uati Hmitöt], anganyidëti a hmaca qa Ioridano, ame hna e nyidëti jë hnene la [Ua] ngöne la hnapapa.” (Luka 4:1) Ame e cili, hnei Iesu hna mecijine me thithi me catre sinethele la itre hna cinyihan, nge hnei Iehova hna amamane kowe la Hupuna i Nyidrë la itre ewekë hna troa cile kow elanyi hnei Iesu. Kolo fe ha huliwa la trengecatre i Akötresie ngöne la mekune me hni Iesu, me eatrongëne la itre mekune me aqane axecië mekune i nyidrë. Ame hë la thangane lai, tre atre hnyawa ha Iesu la aqane troa cile kowe la nöjei jol, nge nyidrëti a kuca asë thenge la hnei Keme i nyidrëti hna ajan.
12. Pine nemene matre nyipi ewekë tro sa sipone la uati Akötresie matre troa eatrongë së?
12 Pine laka atre hnyawa ha Iesu la thangane la uati Akötresie ngöne la mele i nyidrë, hnei nyidrëti hna amamane hnyawa kowe la itretre drenge la enyipiewekëne troa sipone la uati hmitrötr, me nue eje troa eatrongë angatr. (E jë la Luka 11:9-13.) Pine nemene matre ka nyipi ewekë catre fe la uati hmitrötre koi së? Pine laka eje a wenë la mekuna së matre troa ceitu memine la mekuna i Keriso. (Rom. 12:2; 1 Kor. 2:16) Maine tro sa nue la uati Akötresie troa e së ngöne la mele së, tro hë sa mekune tui Keriso me nyitipu nyidrë.—1 Pet. 2:21.
Ka Iamenumenu La Ua Ne Fen
13. Nemene la ua ne fen, nge eje a ukune la itre atr troa kuci nemen?
13 Ame la hnaakönine kepine matre aja së troa nue troa eatrongë së hnene la ua i Akötresie, tre hnene laka, maine patre kö eje the së, tro ha amenu së hnene la ua ne fene ka löthe la mele ne la itre atr ka ala nyimu enehila. Celë hi mene lai ka ukune la itre atr, troa kuca la itre ewekë ka isazikeu memine la hna upi së troa kuca hnene la uati hmitrötr. Tha ua ne fene kö a xatuane la itre atr troa xome la mekuna i Keriso, ngo eje pe a kuca matre troa casi la mekuna i angatre me itre huliwa i angatre memine la tane la fene celë, ene Satana. (E jë la Efeso 2:1-3; Tito 3:3.) Maine troa nue hnene la ketre atr troa löthi angeice hnene la ua ne fen, me uku angeice troa kuca la itre aja ne ngönetrei, tro ha hetre ethane lai koi angeic, nge tro fe ha sewe angeice troa hetrenyi la baselaia i Akötresie.—Gal. 5:19-21.
14, 15. Tro sa atreine cile tune ka kowe la ua ne fen?
14 Hnei Iehova hna hnëkë së troa cile kowe la ua ne fen. Hnei Paulo aposetolo hna ithuecatre koi së troa “[cate] thei Joxu, hnene la tenge cate ne la mene i nyidë . . . mate ateine [së] cile cate ngöne la drai ne ngazo.” (Efe. 6:10, 13) Jëne la uati hmitrötr, Iehova a thue trengecatre koi së matre atreine së troa cile kowe la itre aqane nyinyithina i Satana. (Hna ama. 12:9) Ka catrehnine la ua ne fen, nge maine thatreine kö tro sa neëne ej ngo ame pe, ijiji së hi troa cile kow. Ka catrecatre kö la uati hmitrötre hune la ua ne fen, nge tro kö eje a xatua së!
15 Öni Peteru aposetolo göi itre ka nuetrije la hmi Keresiano ekö, ka hape “angete nue tije la gojenyi ka meköt, me tro menu.” (2 Pet. 2:15) Ngo easë pe a olene laka, tha hne së kö hna kapa, “la [ua] ne la fen, loi pe la [ua] qa thei Akötesie”! (1 Kor. 2:12) Jëne la mene ne eje memine la aqane thele së troa trongëne la itre hnei Iehova hna hnëkëne thatraqai së ngöne la ua, tro hë sa atreine cile kowe la ua ne la fene i Satana.—Gal. 5:16.
Ka Loi La Wene Ne La Uati Hmitrötr
16. Nemene la wene ne la uati hmitrötr ka mama ngöne la mele së?
16 Ame la hnaekene kepine matre easa ajane troa eatrongë së hnene la uati hmitrötre i Akötresie, tre hnene laka, hetre wene ka loi la hna troa kapa e tro sa nue eje troa huliwa ngöne la mele së. (E jë la Galatia 5:22, 23.) Easë asë hi a ajane troa catre ihnimi me madrin, me thele tingeting. Ketre, easë asë hi la a ajane troa xomihni ahoeanyi me metrötr, me thina ka loi. Easë mina fe a ajane troa kökötre ngöne la lapaun, me thina ka menyik me xome hnöth. Itre thina la ka lolo catre koi së me fami së, me kowe mina fe la itre atrene la ekalesia. Loi e tro pala hi sa catre eënyine la wene ne la ua, ke, ijije hi tro sa akökötrene asë la itre thina cili ngöne la mele së.
17. Tro sa akökötrene tune ka la ketre igötrane ne la wene ne la ua?
17 Loi e tro sa thupëne la itre trengewekë së me itre huliwa së matre troa mama laka hna eatrongë së hnene la uati hmitrötr, nge wene ne eje fe la hne së hna kapa ngöne la mele së. (2 Kor. 13:5a; Gal. 5:25) Nemene la nyine tro sa kuca e öhne jë së ka hape, jole tro sa eënyine la itre xa igötrane ne la wene ne la ua? Loi e tro sa catre nue la uati hmitrötr troa akökötrene la itre thina cili the së. Kola hape, tro sa inine la nöjei thina tune la aqane amamane koi së hnene la Tusi Hmitrötr memine la itre itusi sasaiatri. Hawe, tro hë sa atrehmekune me trotrohnine la aqane troa melëne o drai la wene ne la ua, nge tro fe sa thele troa catre akökötrene ej. a Ame la easa öhne la thangane la aqane huliwa la uati hmitrötre ngöne la mele së, me ngöne la mele ne la itre trejine me easë, mama hnyawa pi hi la kepine matre nyipi ewekë tro sa thele troa hane eatrongë së hnene ej.
Hapeu, Nyipunieti Kö a Nue La Uati Hmitrötr Troa Eatrongë Nyipunie?
18. Nemene la ini hne së hna kapa qa ngöne la tulu i Iesu göne la aqane troa nue la uati hmitrötre i Akötresie troa eatrongë së?
18 Tusi Hmitrötre a qaja ka hape, hnei Iesu hna öhne la emenene la ua i Akötresie ngöne la mele i nyidrë. Atraqatre la aja i nyidrë troa eatrongë nyidrë hnene ej. Nge ame la kola e nyidrë hnene la uati hmitrötr troa kuca la ketre ewekë, canga kapa hi nyidrëti la ixatua ne ej, nge nyidrëti mina fe a ujë thenge ej. (Mar. 1:12, 13; Luka 4:14) Celë fe kö aqane ujë i nyipunieti lai?
19. Nemene la aqane tro sa nue la uati hmitrötre troa eatrongë së?
19 Kola huliwa la trenge catre i Akötresie ngöne la itre mekune me hni ne la itre atr ka kapa la ixatua ne ej. Tro epuni a nue eje tune ka, troa ea ameköti epun? Thithi lapa jë koi Iehova, matre tro Nyidrëti a hamëne la uati Nyidrë, me xatua epuni troa kapa la ixatua ne ej. (E jë la Efeso 3:14-16.) Loi e tro nyipunie a ujë thenge la itre thithi nyipunie, me thele la itre eamo qa hnine la Tusi Hmitrötr, ketre itusi hna cinyihane qa thene la uati hmitrötr. (2 Tim. 3:16, 17) Epi tro pala hi sa drengethenge la itre hna amekötine ka loi hnene eje hna hamën, me canga ujë thenge la ixatua ne la uati hmitrötr. Catre jë së lapaune kowe la atreine i Iehova troa eatrongë së hnyawa ngöne la fene ka ngazo celë.
[Ithueamacany]
a Ame göi itre igötrane ne la wene ne la ua isa ala cas, tre thele ju ngöne la lue tane celë hna hape “Fruit de l’esprit de Dieu” me “Chaque facette du fruit sous son nom” ngöne lo itus Index des publications de la Société Watch Tower.
Hapeu, Mekune Kö Nyipunie La Itre Ini Ka Tru?
• Troa hetre thangane tune ka la uati hmitrötre kowe la mele së?
• Nemene lo foa lao kepine matre nyipi ewekë troa nue la uati hmitrötre i Akötresie troa eatrongë së?
• Nemene la nyine tro sa kuca matre tro sa kepe thangane hnyawa la ixatua ne la uati hmitrötr?
[Thying]