Xötretre Huje Joxu Hna Acile Nyine Loi Kowe La Nöjei Atr Asë
26 MAAC KOI 1 EIPEREM
NYIMA: 60, 102
Xötretre Huje Joxu Hna Acile Nyine Loi Kowe La Nöjei Atr Asë
“Xöte hna iëne nyipunie, me xötete huje joxu, me nöje ka hmitöt, me xöte hna itön.”—1 PET. 2:9.
1. Pine nemene matre kola hëne fe la “jidi ne pui ne xeni ne la joxu” ka hape, Drai Ne Amekunën, nge nemene la aliene ej?
AME ngöne lo jidri ne 14 Nisa 33 M.K., hnei Keriso memine lo 12 lao aposetolo i nyidrë hna atrune la paseka tixenuë i angetre Iudra. Thupene la hna upi Iudra Isakariota lo atre iwanaxoeë, hnei Iesu hna acile la ketre drai ne pui ne xeni ka ketre pengöne kö, hna hëne pëhë e thupene ka hape, “xeni ne jidi ne la Joxu.” (1 Kor. 11:20) Hna alua qaja hnei Iesu ka hape, “kucajë la nyine mekune koi ni.” Hawe, kola hëne mina fe la ijine cili ka hape, Drai Ne Amekunën, kösë ketre drai ne troa amekunëne la ijine meci Keriso. (1 Kor. 11:24, 25) Hawe, kola drenge thenge la hna amekötine celë hnene la Itretre Anyipicine i Iehova, matre ame ngöne la nöjei macatre, angatre a isa aca atrune la Drai Ne Amekunën e cailo fen. Ame la idrai e hnine la Tusi Hmitrötr, tre, kola nyiqane la 14 Nisa ngöne la kola lö la jö, nge ka ihmeku memine la 5 Eiperem 2012.
2. Nemene la hnei Iesu hna qaja göne la itre hatrene hna xom?
2 Kola qaja hnene la lue xötre ne la tusi Luka la hna kuca me qaja hnei Iesu ngöne la ijine cili; easa e ka hape: “Nyidëti a xolomëtine la areto, me olen, me thupathupa, me hamë angat, me hape, Dei la ngöneteinge hna hamëne thatraqai nyipunie ; kucajë la nyine mekune koi ni. ‘Kete tune la inege thupene la hna xen, kola hape, Dei la inege, isisinyikeu ka hnyipixe ngöne la madrang, hna nenge thatraqai nyipunie.’ ” (Luka 22:19, 20) Nemene la aqane trotrohnine la itre aposetolo la itre trenge ewekë celë?
3. Nemene la aqane trotrohnine la itre aposetolo la aliene la itre hatren?
3 Pine laka Itretre Iudra angatr, hawe, atre hnyawa hi la itre aposetolo la aqane hujëne hnene la itretre huje ekö la itre öni koi Akötresie hnine la ēnē e Ierusalema. Kola kuca la itre huje cili matre troa amadrinë Iehova, nge nyimutre kö la itre xane hna kuca matre nyine he la ngazo. (Lev. 1:4; 22:17-29) Qa ngöne lai, ame la Iesu a qaja ka hape, nyidrëti a troa ‘hamëne me nenge thatraqai angatr,’ la madra me ngönalë i nyidrë, tre, canga trotrohnine hi la itre aposetolo laka, nyidrëti a troa sipu hujëne la mele i nyidrëti ka pexej. Ka sisitria catre kö la huje cili hune lo itre öni hna hujëne ekö.
4. Nemene la aliene la trenge ewekë i Iesu ngöne lo nyidrëti a qaja ka hape: “Dei la inege, isisinyikeu ka hnyipixe ngöne la madrang”?
4 Nge tune ka fe lo itre trenge ewekë i Iesu hna hape, “Dei la inege, isisinyikeu ka hnyipixe ngöne la madrang”? Atre hi la itre aposetolo la hna perofetane göne la isisinyikeu ka hnyipixe hna amexeje ngöne Ieremia 31:31-33. (E jë.) Kola amamane hnene la itre trenge ewekë i Iesu laka, nyidrëti hë enehila a acile la isisinyikeu cili ka hnyipixe, ka nyihnane lo Isisinyikeu ne la Wathebo hnei Iehova hna acile jëne Mose. Eka la hna qaja la lue isisinyikeu cili?
5. Nemene la itre hna aijijë angetre Isaraela troa kapa hnene la isisinyikeu ne la Wathebo?
5 Eje hi laka, ka cepunikë nge ka ce tro hnyawa la aliene la lue isisinyikeu. Ame ngöne lo Iehova a acile la isisinyikeu ne la Wathebo, hnei Nyidrëti hna qaja kowe la nöje ka hape: “Maine tro nyipunie a nyipi denge thenge la aqane ewekëng, me trongëne la isisinyikeung, tro nyipunie a atu ka conge hune la nöjei nöje asë, ke, ewekënge la fene hnengödrai asë. Nge tro nyipunie a baselaia angete huj, me nöje ka hmitöte thatraqai ni.” (Eso. 19:5, 6) Nemene la aliene la itre trenge ewekë celë koi angetre Isaraela?
XÖTRETRE HUJE JOXU
6. Nemene la hna thingehnaeane hna troa eatrëne trongëne hnene la isisinyikeu ne la Wathebo?
6 Kola trotrohnine hnei angetre Isaraela la hnëewekë hna hape, “isisinyikeu,” ke, hnei Iehova hna isisinyikeu ekö memine la itre xötrapane i angatr, ene Noa me Aberahama. (Gen. 6:18; 9:8-17; 15:18; 17:1-9) Pine laka Aberahama fe la hna hane isisinyikeu memin, ene pe hnei Iehova hna thingehnaeane ka hape: “Tro ha manathithi qa thene la matra i ’ö la nöjei nöje asëjëihë e celë fen.” (Gen. 22:18) Kola mama trotro e thupene la aqane eatre la hna thingehnaeane cili, ngöne la kola eköthe lo lai isisinyikeu ne la Wathebo. Ngo ame ngöne lo qan, tre, angetre Isaraela hi la “atu ka co [i Akötresie] hune la nöjei nöje asë.” Nemene la hnëqa hna troa ahnithe koi angatr? Troa ‘ketre baselaia ne la itretre huj thatraqai Iehova.’
7. Nemene la aliene la hna hape “xötete huje joxu”?
7 Tha jole kö troa trotrohnine hnei angetre Isaraela la kola qaja la itre joxu me itretre huj, pine laka casi hi ekö la atre ka ce xome la lue hnëqa cili, Melekisedeke la ëje i nyidrë, nge hna kepe nyidrë hnei Iehova. (Gen. 14:18) Ame hë fene la isisinyikeu ne la Wathebo, Iehova hë a hane aijijëne la nöje troa nyi atrene la “xötete huje joxu.” Nge tune la aqane amamane hë hnene la itre hna cinyihan, qa ne la xötretre huje joxu troa joxu me itretre huje mina fe.—1 Pet. 2:9.
8. Nemene la itre huliwa nyine troa kuca hnene la angetre huje hna iëne hnei Akötresie?
8 Ame la hnëqa i joxu, tre, ene la troa mus. Nge tune ka göi atre huj? Kola qaja ngöne Heberu 5:1, ka hape: “Ame angete huje ka sisitia asë hna iëne qa thene la nöjei ate, te, hna acile thatraqane la nöjei ate ngöne la nöjei ewekë i Akötesie, mate tro angat’ a hujëne la nöjei ahnahna me nöjei huje pine la nöjei ngazo.” Hawe, ame la atre huj, tre, hnëqa i angeice qathei Iehova la troa nyi trenge ewekëne la itre atr ka kuca la ngazo xajawai Akötresie; qa i angeice troa hamëne la itre huje matre troa xëwe sai angatre koi Nyidrë. Ame ngöne la ketre götran, kolo fe a nyi trenge ewekë i Iehova hnene la angetre huje kowe la itre atr, matre ini angatre la wathebo i Akötresie. (Lev. 10:8-11; Mal. 2:7) Matre kola mama ngöne la itre hnëqa hna ahnithe hnei Akötresieti kowe la atre huj laka, angeice a huliwa matre troa ailoine hmaca la itre atr me Akötresie.
9. (a) Nemene la nyine troa kuca hnei angetre Isaraela matre aijijë angatre troa “ketre baselaia itre huj”? (b) Pine nemene matre Iehova a acile la angetre huj ekö e Isaraela? (c) Nemene la ka sewe Isaraela troa hamëne la “baselaia angete huj” fene la isisinyikeu ne la Wathebo?
9 Kola aijijë angetre Isaraela hnene la isisinyikeu ne la Wathebo troa hane xötretre huje joxu matre nyine loi kowe “la nöjei nöje asë.” Ngo ame pe, tre, hetre hna thele thene la nöj, kola hape: “Tro nyipunie a nyipi denge thenge la aqane ewekëng, me trongëne la isisinyikeung.” Hapeu, atreine kö tro angetre Isaraela a ‘nyipi drenge thenge la aqane ewekë i Iehova’? Eje hi. Ngo hapeu, atreine jë kö angatre drenge thenge asë la trenge ewekë i Nyidrë? Ohea. (Rom. 3:19, 20) Celë hi kepine matre Iehova a acile me iëne ngöne la ketre hnepe ijine la angetre huje thei Isaralela, ame la angetre huje cili, tre, tha itre joxu fe kö angatr nge ame la huliwa i angatr, tre, ene la troa huje thatraqane la ngazo ne la itre atr. (Lev. 4:1–6:7) Ame la itre huje cili, tre, thatraqane mina fe la itre sipu ngazo i angatr, angetre huj. (Heb. 5:1-3; 8:3) Iehova a kapa la itre huje cili, ngo thatreine kö tro itre eje a he asë la ngazo ne la itre ka hamën, ke, qatre trotro pi kö angatre me meci la angetre huj. Ketre, thatreine kö tro la angetre huj fene la isisinyikeu ne la Wathebo a ailoine hnyawa la angetre Isaraela me Akötresie, ngacama ka hni ka ajane ju hë angatr. Celë hi matre qaja jë Paulo aposetolo, ka hape: “Tha ’teine kö la madra ne la ite boloke me ite gote troa apatene la ite ngazo.” (Heb. 10:1-4) Pine laka hnei angatre hna ena la Wathebo hawe, hnëjine hë angatr. (Gal. 3:10) Celë hi matre thatreine kö angatre troa nyi hluene la itre xa atr ceitu me xötretre huje joxu.
10. Nemene ekö la hnëqa ne la isisinyikeu ne la Wathebo?
10 Tha kolo kö lai a hape, tha tro hmaca kö angetre Isaraela a hane sine la “baselaia ne la angete huj” tune la hna thingehnaeane hnei Iehova. Maine tro angatre a thele cememine la hni ka ajane troa drenge thenge Iehova hawe, ijiji angatre hi, ngo tha fene kö lo Wathebo. Nga hnauëne kö? (E jë la Galatia 3:19-25.) Maine easa ajane troa trotrohnine lai, nyipi ewekë tro sa atre la aliene la isisinyikeu ne la Wathebo. Eje a thupëne la itretre Isaraela ka idrengethenge qa ngöne la hmi ka thoi. Kola xatua angatre fe troa wangatrehmekune laka, itre atr ka ngazo angatre nge nyipi ewekë troa hamëne la huje ka sisitria catre kö hune la itre hna hamëne hnene la atre huje ka sisitria. Kösë ketre atre ini la Wathebo, ka troa eatrongë angatre koi Keriso, maine Mesia; lue hnepe hnëewekë lai nyine troa qaja la “Hna Siën.” Ngo ame hë la kola traqa la Mesia, tro nyidrëti a acile la isisinyikeu ka hnyipixe, lo hna ahnithe hë hnei Ieremia. Ame koi itre ka kepe Keriso hë, tre, hna hane könë angatre troa sine la isisinyikeu ka hnyipixe nge tro mina fe angatre a “kete baselaia ne la angete huj.” Tro sa ce wange la aqane troa eatre lai göi angatr.
KOLA HAMËNE HNENE LA ISISINYIKEU KA HNYIPIXE LA XÖTRETRE HUJE JOXU
11. Hnei Iesu hna nyi trepene tune ka la xötretre huje joxu?
11 Kola mama la Mesia ngöne lo macatre 29 M.K., Iesu atre Nazareta. Ame ngöne la kola 30 lao macatre i nyidrë, hnei nyidrëti hna ketre sipu amamane la aja i nyidrë troa kuca la aja i Iehova, nge hna nyi hatrene lai hnene lo kola bapataiso nyidrë ngöne la tim. Hnei Iehova hna atrehmekune me hë nyidrëti me hape, “Dei la Nekönge hniminang”; ngöne la ijine cili, kola sië nyidrë tha hnei wakacu kö, ngo hnei uati hmitrötre pe. (Mat. 3:13-17; Ite hu. 10:38) Hnei Akötresieti hna sië Iesu matre tro nyidrë a ketre Atre Huje Ka Sisitria thatraqane la itre atr asë ka lapaune koi nyidrë me xomi nyidrë nyine Joxu i angatre elany. (Heb. 1:8, 9; 5:5, 6) Nyidrëti hi la trepene la xötretre huje joxu.
12. Nemene la hna aijijëne hnene la mele hna hujëne hnei Iesu?
12 Pine laka Iesu la Atre Huje Ka Sisitria, nemene la huje hnei nyidrëti hna hamën, huje ka troa he asë la ngazo ne la itre ka lapaun? Tune la ka mama ha ngöne lo kola acile la Drai Ne Amekunëne la ijine meci nyidrë, ame hi la huje cili, tre, ene hi lo sipu mele i nyidrëti ka pexej. (E jë la Heberu 9:11, 12.) Qane ju lo kola bapataiso nyidrë ngöne lo macatre 29 M.K., hnei Iesu lo Atre Huje Ka Sisitria hna cile kowe la itre itupath, me wenë la mele i nyidrë uti hë la meci nyidrë. (Heb. 4:15; 5:7-10) Thupene la hna amele nyidrëti hmaca, hnei nyidrëti hna elë hnengödrai eë me ketre sipu tro fë la huje i nyidrë koi Iehova. (Heb. 9:24) Hawe, ijije hë tro Iesu a easenyi koi Iehova me xëwe fë la itre atr ka lapaune kowe la mele hnei nyidrëti hna hujën, me xatua angatre troa hane nyi hlue i Akötresieti matre troa hetrenyi la mele ka tha ase palua kö. (Heb. 7:25) Ketre, kolo fe a anyipicine me acatrene la isisinyikeu ka hnyipixe.—Heb. 8:6; 9:15.
13. Nemene la ka troa traqa kowe la itre ka troa lapa hnine la isisinyikeu ka hnyipixe?
13 Ame koi itre hna hane könëne troa sine la isisinyikeu ka hnyipixe, tre, hna sië angatre mina fe hnei uati hmitrötr. (2 Kor. 1:21) Hna nyiqane thei angetre Iudra nge thupene lai itre Ethen. (Efe. 3:5, 6) Nemene la ka troa traqa kowe la itre ka lö hnine la isisinyikeu ka hnyipixe? Ame la ewekë ka traqa koi angatre, tre, tro ha senge hnyawa la itre ngazo i angatr. Hnei Iehova hna thingehnaeane ka hape: “Tro ni a nue la thina i angate ka ngazo, nge tha tro hmaca kö ni a hnine la ite ngazo i angat.” (Iere. 31:34) Eje hi lai laka, e ase hë senge la itre ngazo i angatr, ijije hë tro angatr a ketre “baselaia ne la angete huj.” Hnei Peteru hna ithanata kowe la itre Keresiano hna iën, me cinyihane ka hape: “Xöte hna iëne nyipunie, me xötete huje joxu, me nöje ka hmitöt, me xöte hna itön ; mate amamanepi hnei nyipunie la nöjei thina ka loi nyidë ate hë nyipunie qa ngöne la jidi kowe la lai nyidë nyine hain.” (1 Pet. 2:9) Peteru hi lai, a amexeje la itre trenge ewekë i Iehova koi Isaraela ngöne lo kola acile la Wathebo me iupi kowe la itre Keresiano ka lapa fene la isisinyikeu ka hnyipixe troa trongëne ej.—Eso. 19:5, 6.
XÖTRETRE HUJE JOXU, JËNE MANATHITH KOWE LA NÖJEI ATR ASË
14. Eka la hna troa huliwa hnene la xötretre huj?
14 Kola troa huliwa eka hnene la itre ka lapa fene la isisinyikeu ka hnyipixe? Angatre a troa xome la hnëqa ne atre huje e celë fen, me nyi trenge ewekë i Iehova kowe la nöje matre ‘amamanepi hnei [angatre] la nöjei thina ka loi nyidë’ me hamëne la göxeni ngöne la götrane ua. (Mat. 24:45; 1 Pet. 2:4, 5) Nge e meci hë angatr, kola troa amele angatre hmaca hnengödrai eë, matre tro angatre a ce cilëne me ce xome hnyawa me Keriso la hnëqa ne atre huje me joxu. (Luka 22:29; 1 Pet. 1:3-5; Hna ama. 1:6) Kola anyipicine la ewekë cili hnene la hna meköle goeëne hnei Ioane aposetolo, lo nyidrëti a öhne la itre ua ezine la therone e koho hnengödrai. Ame e hnine lo “nyima ka hnyipixe” kola sili nyimane la “Arenio,” hnene la itre ua cili, nge angatre a thinge la nyima me hape: “Hnei enëtilai hna itöne thatraqai Akötesie hnene la qazië i enëtilai lo nöjei ate qa ngöne la nöjei tribu asëjëihë, me ite qene hlapa, me nöjei nöj, me nöjei ethen ; nge hna celohmë angate nyine ite joxu me itete huje thatraqane la Akötesi hun ; nge angat’ a musi e celë fen.” (Hna ama. 5:8-10) Ame ngöne la ketre hnei Ioane hna meköle goeëne pë hë e thupen, öni Ioane göne la itretre musi cili ka hape: “Tro angat’ a itete huje koi Akötesie me Keriso, nge tro angat’a ce musi me nyidë uti hë la ite macate ka ca thausan.” (Hna ama. 20:6) Ce angatre me Keriso a troa nyi atrene la xötretre joxu ka troa thue manathithi kowe la nöjei atr.
15, 16. Nemene la itre manathithi hna troa kapa elanyi hnene la itre atr, itre manathithi ka xulu qathene la xötretre huje joxu?
15 Nemene la itre manathithi hna troa xome elanyi hnene la itre hna iën ka ala 144 000 thatraqane la itre ka troa lapane pë hë la ihnadro, itre manathithi ka xulu qathene la xötretre huje joxu? Kola xomi angatre hnei Hna Amamane mekene 21 ceitu me ketre traone e koho hnengödrai eë ene Ierusalema ka Hnyipixe hna hëne ka hape, “tepu ne la Arenio.” (Hna ama. 21:9) Kola qaja ngöne la xötre 2 koi xötre 4 ka hape: “Ini a goeëne la lapa ka hmitöt, Ierusalema ka hnyipixe, kola uti qa hnengödrai thei Akötesie, hna hnëkë nöj kösë jajinyi kola troa faipoipo hna thaipine thatraqane la fö’ i angeic. Nge hnenge hna denge la aqane ula atraqate e hnengödrai kola hape, Hana wang, thei nöjei ate la uma ne heta i Akötesie, nge tro nyidëti a lapa thei angat, nge tro angat’a nöjei nyidë ; nge tro nyidëti Akötesieti a ce me angat, ene Akötesi angat. Nge tro nyidëti a köle tije la nöjei tenge timida asëjëihë qa ngöne la ite lue meke i angat ; nge pa hmaca kö mec ; me hace hni me teij, me aköt ; ke patë hë la ite ewekë hnapan.” Drei la elolone elanyi la itre manathithi cili! Tha tro hë sa treije me awe, me latresi me akötre, ke, patre hnyawa ha la mec. Kolo lai a hape, tro ha pexeje la itre atre nge iloi hnyawa ha angatre me Akötresie.
16 Kolo mina fe a qaja hnei Hna Amamane 22:1, 2, la itre manathithi hna troa kapa qathene la xötretre huje joxu, kola hape: “Hnei nyidëti hna amamane koi ni la hneopegejë timi ne mel, ka lualai kösë thulu, kola di qa ngöne la therone i Akötesie memine la Arenio. Ngöne nyipine la [Ierusalema ka hnyipixe] gojen’ eje, me ngöne la lue öline la hneopegejë la sinöe hna melen, ate wa wene ka luako la o pengön, me wa thenge la nöjei teu ; nge ame la nöjei döne la sinöe, te, nyine amelene la nöjei nöj.” Kola mama hnene la hna meköle goeëne hnei Ioane la aqane troa thapa la “nöjei nöj” qa ngöne la ngazo i Adamu. Eje hi, ‘pate hnyawa ha la ite ewekë hnapan.’
KOLO HA UMUTHE HNENE LA XÖTRETRE HUJE JOXU LA HULIWA i ANGATR
17. Nemene la huliwa hna troa umuthe hnene la xötretre huje joxu?
17 Ame hë la kola nyipune la 1 000 lao macatre ne huliwa angatr, pexeje hnyawa ha la itre atr hnei angatre hna xatuan. Thupene jë hi lai, tro la Atre Huje Ka Sisitria nge Joxu, ene Keriso a amamane koi Iehova la itre atr ka pexeje hnyawa ha. (E jë la 1 Korinito 15:22-26.) Ame hë ngöne la ijine cili, ase hnyawa ha la xötretre huje joxu umuthe lo huliwa hna ahnithe koi angatr.
18. Thupene la kola umuthe la huliwa hnene la xötretre huj, nemene hmaca kö la hnëqa hnei Iehova hna troa ahnithe kowe la itre sine huliwa i Keriso e thupen?
18 Ngo nemene hmaca kö la hnëqa hnei Iehova hna troa ahnithe kowe la itre sine huliwa i Keriso e thupen? Kola qaja hnei Hna Amamane 22:5, ka hape, “tro angat’ a musi epin’ epine palua.” Ngo drei la hnei angatre hna troa musi kow? Pëkö hna qaja hnei Tusi Hmitrötr. Casi hi laka, tro la itre hnei angatre hna melëne ngöne la fene ka tha pexeje kö memine la mele i angatre e koho, a xatua angatre troa cilëne hnyawa la hnëqa ne joxu uti hë epine palua xajawa i Iehova.
19. Nemene la itre ini hna troa amexeje ngöne la Drai ne Amekunën?
19 Ame ngöne la easë a troa ce traqa itronyi e Drai ka co 5 Eiperem 2012 matre troa sine la Drai ne Amekunëne la meci Iesu, tro hmaca amexeje koi së la itre ini cili. Tro la thelene la itre Keresiano hna iëne e celë fene a xeni la areto hna tha levenëne me iji la waina ka madra zan, matre nyine hatrene laka, angatre fe a hane sine la isisinyikeu ka hnyipixe. Tro la lue hatrene cili ne la mele hna hujëne hnei Keriso a amekunë angatre ka hape, ketre manathithi me hnëqa ka tru catre la hnei Akötresieti hna nue koi angatre matre troa aejëne la aja i Nyidrë ka cile hut. Ame la easa troa sine la Drai cili, epi tro asë hi sa hetre hni ne ole koi Iehova Akötresie, Atre hnëkëne la xötretre huje joxu matre nyine loi kowe la nöjei atr asë.
ATREINE JË KÖ NYIPUNIETI QEJE PENGÖN?
․․․․․
Eue la kola pane thingehnaeane la xötretre huje joxu?
․․․․․
Hapeue la itre atrene la isisinyikeu ka hnyipixe, hna tune ka matre xötretre huje joxu pi angatr?
․․․․․
Nemene la itre manathithi hna troa kapa elanyi hnene la itre atr, itre manathithi ka xulu qathene la xötretre huje joxu?
[Thying]
[Iatr ne la götran 29]
Tro la xötretre huje joxu a axulune elanyi kowe la nöjei atr asë la itre manathithi ka epine palua