Xatuane Jë La Itre Atr Troa “Hlë . . . Qa Hna Meköl”
30 EIPEREM KOI 6 MEI
NYIMA: 65, 96
Xatuane Jë La Itre Atr Troa “Hlë . . . Qa Hna Meköl”
“Ate hë shë la ijine laka, ijine hlë hë nyipunie qa hna meköl.”—ROM. 13:11.
IJIJE KÖ TRO NYIPUNIETI A QEJE PENGÖN?
Pine nemene matre ka nyipi ewekë catre kowe la itre Keresiano troa lapa hmeke ngöne la götrane la ua?
Pine nemene matre tro la itretre cainöje ka hmek, a drenge me atreine goe?
Nemene la enyipiewekëne la thina ka loi me menyike ngöne la huliwa ne cainöje së?
1, 2. Ngöne nemene götrane matre nyipi ewekë tro la itre atr a hlë qa hna meköl?
AME ngöne la nöjei macatre, itre thauzane lao ka meci pine la hna fefenedremu maine meköl, nge kolo pe a xomi loto. Ame itre xan, hna upe hnei maseta, ke, ka lapa hlë hmitre troa huliwa, maine pena hna meköle ngöne la hna huliwa. Ngo ame kö la troa fefenedremu ngöne la götrane ua, tre, ka tru catre kö la ethan. Celë hi mekune lai ka nyipi ewekë catr, ene pe qaja jë hnei Tusi Hmitrötre ka hape: “Manathithi hë angeic’ ate hmek.”—Hna ama. 16:14-16.
2 Kola easenyi trootro la drai ka tru i Iehova, nge ka meköle pala hi la itre atr ngöne la götrane ua. Ame la itre xa hene ne hmi, angatre a qaja la itre atrene la itre hmi ka tru, ka hape, ‘itre atr ka meköl.’ Nemene la aliene la kola hape kola meköle ngöne la götrane ua? Pine nemene matre nyipi ewekë kowe la itre nyipi Keresiano troa hmek, maine angatre a ajane troa mel? Tro sa ahlëne tune kaa la aja ne la itre atr ngöne la götrane la ua?
ALIENE LA HNA HAPE, KA MEKÖLE NGÖNE LA GÖTRANE UA
3. Tro epuni a qejepengöne tune kaa la atr ka tha hlëmeke ngöne la götrane la ua?
3 Ame la atr ka meköl, tre, pëkö hnei angeice hna kuca. Ngo maine tro sa goeëne la itre atr ka meköle ngöne la götrane ua, tre, tru catre hnei jole i angatr, ngo tha itre huliwa i Akötresieti kö la hnei angatre hna kuca. Hna lapa xomi angatre hnene la itre ewekë hnei angatre hna hnehengazone o drai, nge angatre fe a nyinyape thele mo me itre nyine iamadrinë, me thele troa hlemu. Hnene laka angatre a nyinyape thele la itre ewekë cili, ene pe, pë hë traeme i angatre thatraqane la itre aja i angatre ngöne la götrane la ua. Ngo ame la itre atr ka hlëhmeke ngöne la götrane la ua, tre atrehmekune hi angatre laka easa melëne la “ite drai hnapin,” celë hi matre angatre a catre kuca la aja i Akötresie.—2 Pet. 3:3, 4; Luka 21:34-36.
4. Pine nemene matre nyipi ewekë troa trongëne la eamo hna hamëne koi së hna hape: “The tro kö sha meköle tui ite xan”?
4 Ame la ka hmulizië, tre, thatre kö angeice ka hape ngazo hë cahmijë. (E jë la 1 Thesalonika 5:4-8.) Celë hi matre Paulo aposetolo a qeje itre ka meköle ngöne la götrane la ua ka hape, tha atrehmekune kö angatre la enyipiewekëne la itre trepene meköti Akötresie. Ketre, tha atrehmekune kö angatre laka easenyi catre hë la ijine tro Iehova a apatrene trije la itre atr ka ngazo. Paulo a eamo kowe la itre Keresiano, me hape: “The tro kö sha meköle tui ite xan.” Nyipi ewekë troa xecie hnyawa koi së ka hape, tha hna hane kö huli së hnene la itre mekune me itre thina i angatr.
5. Nemene la aqane amamane hnene la itre atr ka ala nyimu laka, kösë lo pu ne jidri la aqane mele i angatr?
5 Ame itre xa ijine easa meköl, tre, easa pu. Hna tune mina fe lai ngöne la götrane la ua. Itre atr a mele ngo kösë lo ame koi angatr, tre pëkö Akötresie. (Sal. 53:1) Itre xane a mekune ka hape, pine laka, tha meku së kö itre atr hnei Akötresie, haawe ketre tha nyipi ewekë kö tro sa thele troa atre Nyidrë. Ngo ame pe, hetrenyi kö la itre xane ka mekune ka hape, ame la troa hane sine la ketre hmi, tre celë hi jëne tro angatre lai a ce sinee me Akötresie. Nyipi ewekë troa ahlëne la ajane la itre atr cili ngöne la götrane la ua. Tro sa xatua angatre tune kaa?
CATRE JË SË HLËHMEK
6. Pine nemene matre nyipi ewekë tro la itre Keresiano a catre hlëmeke ngöne la götrane la ua?
6 Tro sa atreine ahlëne la aja ne la itre atr ngöne la götrane la ua, e ka hlëmeke së. Kola hapeue lai? Wesi Ula i Akötresie a ieakeune la troa meköle ngöne la ua memine la “huliwa ne jid”—mele ne feet, me hmo hnei kahaitr, me kuci ngazo, me inagala, me ikucany. (E jë la Roma 13:11-14.) Ketre itupathi koi së la troa catre hlëhmek, nge kolo pe a lapa xötreithi së hnene la nöjei atr ka imekölenyi ngöne la götrane ua, me xome la itre thina ne la huliwa ne jidr. (Efe. 4:17-19) Nyipi ewekë la troa hmek. Ame la atr ka xomi loto, tha tro kö angeice a thëthëhmine ka hape, troa hetre ethane kowe la mele i angeice e tro angeice a meköle ngöne la angeice a nyinyap. Drei la enyipiewekëne kowe la Keresiano la troa catre hlëhmek, wanga meci pi angeice ngöne la götrane ua!
7. Nemene la aqane waiewekë ka tria ka troa ananazijë së?
7 Hetrenyi la ketre aqane waiewekë ka troa ananazijëne la ketre Keresiano, ene la troa mekune ka hape, ka tro asë hi la itre atrene la götrane hnei angeice hna mele ngön a thipetrije la maca ka loi. (Ite edomë 6:10, 11) Ene pe tro angeice a mekune ka hape, ‘Maine pëkö atr ka kapa, nga hnauëne hö la tro sa catre thele me xatuane la itre atr?’ Maine nyipici laka nyimutre la itre atr enehila ka meköle ngöne la götrane la ua, ngo ijije hi troa saze la aqane waiewekë i angatre memine la aqane mele i angatr. Celë jë hi ka troa ahlëne la aja i angatre ngöne la götrane la ua, me hane upi angatre troa kapa la maca ka loi. Nge tro sa atreine xatua angatr e itre ka hlëmeke së, hnene la hna xome la itre aqane troa tro fë la maca ne Baselaia matre troa ketri angatr. Ame la ketre ewekë ka upi së troa catre hlëmek, tre, hnene la hne së hna isa mekune pala hi la kepine matre jëne iamele la troa cainöjëne la maca ka loi.
KEPINE MATRE JËNE IAMELE LA HULIWA NE CAINÖJE SË
8. Pine nemene matre jëne iamele la huliwa ne cainöje së?
8 Loi e tro sa lapa mekune laka, maine kapa ju hë maine xele pena ma drei së hnene la itre atr, ngo ame pe kola atrunyi Iehova hnene la huliwa ne cainöje së, nge hetre enyipiewekëne eje ngöne la aqane eatre la aja i Nyidrë ngöne la itre drai ka nyipi ewekë catre enehila. Easenyi hë matre nyithupene jë hë kowe la itre atr ka xele ma drenge la maca ka loi. Troa amekötine elanyi la itre atr thenge la aqane ujë i angatre kowe la huliwa ne cainöje së. (2 Thes. 1:8, 9) Qa ngöne lai, ka tria la aqane waiewekë ne la Keresiano ka mekune ka hape, tha nyipi ewekë kö troa nue la trenge catre së pine laka “tro ha mele hmaca la nöjei ka meköt, me ka tha meköti kö.” (Ite hu. 24:15) Easa trotrohnine jëne la Wesi Ula i Akötresie ka hape, ame la itre hna aceitunëne me “got,” tre, tro hë angatr a tro “kowe la hna troa nyi thupene ka tha ase palua kö.” Kola mama jëne la huliwa ne cainöje së la aqane utipine i Akötresieti la itre atr, me aijijë angatre hnei Nyidrë troa saze me hetrenyi la “mele ka tha ase palua kö.” (Mat. 25:32, 41, 46; Rom. 10:13-15) Ngo troa drenge tune ka hnene la itre atr la maca ne mel, e tha hne së kö hna cainöje koi angatr?
9. Nemene la thangane la hnei epuni hna cainöje trootro?
9 Easë fe a hane kepe thangane qa ngöne la hna cainöjëne la maca ka loi. (E jë la 1 Timoteo 4:16.) Tune kaa la epuni a qeje Iehova memine la Baselaia, kolo kö a acatrene la lapaune me ihnimi epuni koi Nyidrë? Kolo kö lai a akökötrene thei epuni la itre thina ne Keresiano? Nge eje kö thei epuni la madrin, qa ngöne la hnei epuni hna hane sine la huliwa ne cainöj? Eje hi laka, nyimutre la itre trejine ka öhnyi madrine troa inine la itre atr la nyipici, me hane öhne la aqane xatuane la itre atr cili hnene la uati hmitrötr, matre troa saze me kökötre lolo la mele i angatr.
LOI E TROA ATREINE GOE
10, 11. (a) Tune kaa la aqane amamane Iesu me Paulo ka hape lue ka hmeke nyidro me ka atreine goe? (b) Amamane jë hnene la ketre ceitun, la aqane troa hetre thangane ka loi la huliwa ne cainöje së, hnene la hna catre hmeke me atreine goe?
10 Nyimu aqane troa ahlëne la aja ne la itre atr kowe la maca ka loi. Celë hi matre nyipi ewekë troa hmeke me goe hnene la itre Keresiano. Iesu hi la tulu së. Hnene laka ka pexeje nyidrë, öhne hi nyidrëti la aqane lapa fë elëhni ne la atre Faresaio, memine la hni ne ietra ka eje thene la ketre föe ka ngazo, memine la hni ne huuje ne la ketre sine föe. (Luka 7:37-50; 21:1-4) Ijiji Iesu hi troa aejëne la itre aja së isa ala casi ngöne la götrane la ua. Ngo tha kolo kö a thele thene la hlue i Akötresie troa pexej ngöne la aqane troa goe. Paulo aposetolo la ketre atr ka atreine goe. Hnei angeice hna eköthe la aqane nyiqane ithanata i angeic, hmekune la aja ne la itre atr memine la qene nöje i angatr.—Ite hu. 17:22, 23, 34; 1 Kor. 9:19-23.
11 Maine tro sa catre hmeke me atreine goe tui Iesu me Paulo, ijije hi tro sa atrehmekune hnyawa la nyipi aqane troa ahlëne la aja ne la itre atr hne së hna iöhnyi memin. Drei la ketre ceitun, ame ngöne la epuni a easenyine la itre atr, thele jë la itre ewekë ka qajaqaja la zi angatr, maine itre aja i angatr, maine aqane mele ne la hnepe lapa. Maine jë hetre ewekë hnei angatre hna kuca ngöne la epuni a traqa, ene pe pane nango ithanatane jë la ewekë hna kuca ngöne la epuni a nyiqane la porotrik.
12. Ame ngöne la huliwa ne cainöj, pine nemene matre nyipi ewekë tro sa thupëne la itre porotrike së?
12 Ame la ka atreine goe, angeice a thupëne matre tha tro kö a ajeane la mekuna i angeice qa ngöne la huliwa ne cainöj. Maine jë troa catrehnine la porotrike së memine la ka ce cainöje me easë, ke easa ithuecatrekeu. Ngo tha tro kö sa thëthëhmine la sipu aliene la huliwa ne cainöj, ene la troa cainöje kowe la itre atr. (Ate cai. 3:1, 7) Celë hi matre, loi e tro sa hmekëne la aqane porotrike së akawane la itre hnalapa, matre tha tro kö a triane la nyipi aliene la huliwa së. Ame la ketre jëne ka lolo catre matre tro sa lapa mekune la nyipi aliene la huliwa së, tre, ene la tro sa ce ithanatane la itre mekune hne së hna pi ce ithawakeune memine la itre atr ka ajan. Ketre, maine nyipici laka ixatua e itre xa ijine la mobilis ngöne la hna cainöje trotro, ngo nyipi ewekë tro sa thupëne wanga thupa pi la porotrike së memine la ketre atr.
WANGATRUNE JU LA ITRE ATR
13, 14. (a) Tro sa atrehmekune tune kaa la ewekë hna ajane hnene la ketre atr? (b) Nemene la itre ewekë ka troa ahlëne la aja ne la itre atr ngöne la götrane la ua?
13 Ame la itretre cainöje ka hlëhmek, tre, angatre a drenge hnyawa la itre atr hnei angatre hna cainöje kow. Nemene la itre hnyinge hnei epuni hna troa qaja, matre tro la itre atrene la teritoare a hane fe amamane la mekuna i angatr? Angeice kö a hnehengazone la etrune la itre hmi, memine la iangazo ngöne la götrane hnei epuni hna mele ngön, maine pena ngöne la hna thatreine kuca hnene la itre musi qëmekene la itre jol? Ijije kö troa ahlëne la aja ne la itre atr ngöne la götrane la ua hnene la hna qejepengöne la emingömingöne la itre ewekë ka mele hna xup, maine hnene pena la hna qaja atrune la thangane ka loi hna kapa qa ngöne la hna trongëne la ketre eamo qa hnine la Tusi Hmitrötr? Ka tru kowe la itre atr ne la nöjei nöje troa thith, ene mina fe lo itre xa ka thatre Akötresie. Nyimutre la itre atr ka isa thele ka hape, hetre ka hane jë kö drenge la itre thithi angatr. Maine jë itre xane a pi atre la itre mekune ka sa la lue hnyinge celë hna hape: Akötresieti kö a drenge la nöjei thithi asë? Nge maine tha drenge asë kö, nemene la nyine tro sa kuca matre tro Akötresieti a drenge la thithi së?
14 Ijije hi tro sa xomi ini qaathene la itretre cainöje ka maca, maine ngöne la aqane nyiqane porotrike angatre memine la itre atr. Goeëne hnyawane ju la aqane neëne angatre troa hnyinge menu pala ha maine troa pi atre koilo. Nge kola mama tune ka jëne la nine nyinawa me iqëmeke i angatre kaa hape, angatre a wangatrune la mekuna ne la atr?—Ite edomë 15:13.
THIINA KA LOI ME ATREIN
15. Pine nemene matre ka nyipi ewekë catre la thina ka loi ngöne la easa catre cainöje trootro?
15 Madrine kö epuni troa aca tro ahlë epuni qa hna meköl? Pëkö atr ka madrine ngöne la kola ahlëne sesë angeic. Ketre tune mina fe, hetre aqane tro kö a ahlëne la aja ne la itre atr ngöne la götrane la ua. Maine jë tro la ketre atr a wesitr ngöne la epuni a ithanata koi angeic; nemene la aqane tro epuni a ujë? Amamane jë laka, epuni a trotrohni angeic, nge olene jë la kola fe amamane la mekuna i angeic, nge nue angeice pi cememine la hni ka menyik. (Ite edomë 15:1; 17:14; 2 Tim. 2:24) Maine jë tro la elolone la thina i epuni a xatuane lai atr troa kapa ngöne la ketre ijin, la ketre Atre Anyipicine i Iehova.
16, 17. Tune kaa la aqane tro sa atreine waiewekë ngöne la hna cainöje së?
16 Ame itre xa ijin, kola qeje jole hnene la ketre atr. Maine jë tro ketre a qaja ka hape, “Ase hë olen. Hetre hmi huni hë,” maine pena, “Tha pi drei epuni kö ni,” ke celë hi ketre aqane troa thupatëne la porotrik. Ngo maine jë atreine hi tro epuni a catre hni ka menyike me amejëne la ketre hnyinge ka troa ahlëne la aja ne la atr kowe la itre ewekë ngöne la götrane la ua.—E jë la Kolose 4:6.
17 Ame itre xa ijin, maine easa öhne la itre atr ka qaja ka hape hetre jole i angatr, ma ka loi hi tro sa nue angatr. Ngo e ijij, hamëne ju la ketre hnepe mekune ka tru alien. Ame itre xa trejin, hnei angatre hna inine la aqane troa xome hi la ca hnepe menetre matre troa fe Tusi Hmitrötr, me e kowe la itre atr la ketre xötre ka troa upi angatre troa thele mekun, me nue angatre pe memine la ketre hnying. Ame itre xa ijin, xoxopatre hi la aqane nyiqane ithanata, ngo ame pe hna canga ahlëne fe la aja ne la atr, ene pe hetre hnepe traeme i angeice hi troa pane nango porotrike me easë. Hapeue matre kuca tune lai?
18. Nemene la nyine tro sa kuca matre troa hetre thangane la hne së hna cainöje ngöne la nöjei ijin?
18 Maine hne së hna hnëkë hnyawa göi troa cainöje ngöne la nöjei ijin, ijije hi tro sa ahlëne la aja ne la itre atr kowe la maca ka loi, ene lo itre atr hne së hna iöhnyi memin ngöne la nöjei drai ne mele së. Nyimutre la itre trejine ka amë la itre itus hnine pos maine hnine sine watrenge pena. Maine jë angatre a hnëkëne amë la ketre xötre matre troa ce thawa memine la itre atr ngöne la itre ijine ka ijij. Pane hnyingëne ju kowe la atre thupëne la huliwa ne cainöje maine kowe la itre pionie pena la aqane troa hnëkë thatraqane lai.
LOI E MENYIKE LA AQANE TRO EPUNI A AHLËNE LA AJA NE LA ITRE SINEE I EPUNI NGÖNE LA UA
19. Pine nemene matre tha tro kö sa cile hnö troa xatuane la itre sinee së?
19 Nyipici laka, aja së asë hi troa xatuane la itre sinee së troa kapa la maca ka loi. (Ios. 2:13; Ite hu. 10:24, 48; 16:31, 32) Maine hna xele ma kepe së hnene la sinee së ngöne la easa xötrei cainöje koi angeic, maine jë tro sa cile hnö troa cainöje hmaca koi angeic. Maine jë tro sa mekune ka hape, pëkö ewekë nyine tro sa kuca maine qaja pena ka troa saze la aqane ujë i angeic. Ngo hnene laka kola traqa la itre ewekë ngöne la mele ne la itre sinee së, ene pe ijije hi troa ujë la mekuna i angatr. Maine pena tro ha saze la aqane ujë i angatr, hnene laka, atreine hë së enehila qejepengöne hnyawa la nyipici.
20. Pine nemene matre nyipi ewekë tro epuni a maca ngöne la epuni a ithanata kowe la itre sinee i epun?
20 Loi e tro sa wangatrune la mekuna ne la itre sinee së. (Rom. 2:4) Tro mina fe sa ithanata amenyikenyi me metrötrë angatr, tune la aqane kuca së kowe la itre atr hne së hna cainöje kow. Tha easa kö a troa traqa ne nyi ka meköt, ngo easë pe a amamane la thangane ka loi hne së hna kapa qa ngöne la nyipici. (Efe. 4:23, 24) Amamane hnyawane jë la aqane amanathithine la mele së hnei Iehova, “Ate ini [së] troa hete thangan.” (Is. 48:17) Nge amamane jë la tulu ne mele ne Keresiano, matre tro la itre sinee së a goeën.
21, 22. Qaja jë la hna melëne hnene la ketre trejin, ka amamane la thangane la tro sa catre xatuane la itre sinee së ngöne la götrane la ua.
21 Tha ka hekö catre kö la hna cinyihane hnene la trejine föe, kola hape: “Hnenge pala hi hna thele troa cainöje kowe la itre trejine me eni ala 13 angatr, jëne la aqane ithanatange me aqane ujëng. Hnenge pala hi hna cinyanyi koi angatre isa ala casi ngöne la nöjei macatre. Ngo thupene la 30 lao macatre ne ketre Anyipicine i Iehova ni, pë pala hi ka kapa la nyipici ngöne la faming.”
22 Eahlo a sisedrëne ka hape: “Ame la ketre drai, hnenge hna hëne la ketre trejine me eni ngöne telefon, nge nanyi catre la hna lapa hnei angeic. Angeice a qaja koi ni ka hape hnei angeice hna sipone koi hnamiatre troa ini angeice la Tusi Hmitrötr, ngo tha traqa pi kö nyidrë. Ame la eni a qaja ka hape, madrine ni e tro ni a xatua angeic, öni angeice jë hi ka hape: ‘Ka loi, ngo tro eö a atre ka hape, tha tro jë kö ni a hane lö hnine la hmi eö.’ Thupene la hnenge hna iupi fë koi angeice la itus Ini Tusi Hmitrötr, eni pë hë a hë angeice lapa. Ngo tha fe pi kö angeice la itus. Ame hë ngöne la ketre drai, eni ha upi angeice troa xome la itusi angeic, nge nyiho a xome la 15 lao menetre ngöne la telefone matre troa ce e me ce ithanatane la itre mekene tus. Ame hë e thupen, tha ijije hë koi angeice la 15 lao menetre ne ini Tus. Angeice pena ha la ka hë ni troa ini Tusi e hmahmakanyi petre kö, nge ame itre xa ijin, isa alua ini Tusi nyiho ngöne la drai. Ame ngöne la macatre ka xulu, angeice a xome la bapataiso, nge ame ju fe kö lai macatre thupen, angeice hë a hane xome la huliwa ne pionie.”
23. Pine nemene matre tha tro kö sa cile hnö troa ahlëne la aja ne la itre atr ngöne la götrane la ua?
23 Nyipi ewekë tro sa maca me catre troa xatuane la itre atr matre troa ahlëne la aja i angatre ngöne la götrane la ua. Hetrenyi pala hi la itre atr ka hetre hni ne ajane ngöne la easa catre tro fë la maca ka loi. Ame e nöjei treu, kola e la 20 000 lao atr ka xome la bapataiso. Celë hi matre loi e tro sa wangatrune la eamo hna hamëne hnei Paulo ekö kowe la ketre trejin, Arekipo la ëjen, kola hape: “Wange kö la qâ i nyipë hnei nyipëti hna kapa qa thei Joxu, mate umutheju.” (Kol. 4:17) Tro la hna cinyihane ka troa xulu a xatua së asë troa trotrohnine la aliene la kola hape troa sikusikune troa cainöj.
[Thying]
[Hna eköhagen götran 3]
AQANE TRO EPUNI A LAPA HMEK
▪ Catre jë kuca la aja i Akötresie
▪ The kuca kö la itre huliwa ne jidr
▪ Tro sa hmeke wanga kei pi së kowe la ethanyine la troa meköle ngöne la götrane la ua
▪ Tro sa catre wangatrune la itre atr ne la götrane hne së hna cainöje ngön
▪ Thele jë la itre jëne ka hnyipixe göi troa cainöje kowe la itre xa atr
▪ The thëthëhmine kö la enyipiewekëne la huliwa ne cainöje së