‘Hnei Hupunati Hna Ajane Troa Amamane La Tretretro’
28 MEI KOI 3 JUUN
NYIMA: 106, 112
‘Hnei Hupunati Hna Ajane Troa Amamane La Tretretro’
“Pëkö ate wangate hmekune la Tetetro, ngo Hupunati hi, memine la hnei Hupunati hna ajane troa amamane kow.”—LUKA 10:22.
TRO NYIPUNIETI A SA TUNE KAA?
Pine nemene matre Iesu hmekuje hi la ka ijij troa amamane la pengöne la Tretretro i nyidrë?
Hnei Iesu hna amamane tune kaa la pengöi Tretretro kowe la itre atr?
Tune kaa la aqane tro sa nyitupu Iesu göi troa amamane la pengöi Tretretro?
1, 2. Nemene la hnyinge ka ajolëne la mekuna ne la itre atr, nge pine nemen?
‘DREI lae Akötresie?’ Ketre hnyinge lai ka ajolëne la mekuna ne la itre atr. Maine nyipici laka, nyimutre la itre atr ka hmi ka lapaune ka hape, ame Akötresieti tre Tirinite, ngo ame pe, ala nyimu fe la itre ka qaja ka hape, jole koi angatre troa trotrohnine la ini cili. Drei la hna qaja hnene la ketre hene ne hmi ka cinyihany: “Hana lai ketre ini ka jole kowe la atr troa trotrohnin. Kösë lo hna hmaca hi la inamacane ne la atr e cili.” Ame pena la itre ka kapa la ini évolution, angatr a mekune ka hape, pëkö Akötresie. Angatre lo itre ka qaja ka hape, ka xulu xane la itre ewekë ka mingöming. Ngo ketre thatreine ju kö lo atre hamëne la ini cili, ene Darwin, troa jelenyipicine laka pëkö Akötresie. Öni angeice ju pe hi ka hape: “Maine jë ka loi la tro hi a qaja ka hape, thatreine jë kö tro ketre atr a atreine qeje pengöi Akötresieti hnyawa.”
2 Ala nyimu catre ekö la itre atr ka isa hmi, ka thele troa atre la pengöi Akötresie. Ngo, ame ju hi la angatr a öhne la ejolene troa sa la itre hnyinge i angatr, tre, tha thele hmaca ju kö angatre troa atrepengö Nyidrëti hnyawa. Ase hë Satana “atimekëne la ite hni angete tha lapaune kö.” (2 Kor. 4:4) Celë hi matre jole kowe la itre atr ka ala nyimu troa qeje pengöi Akötresie, nge ka thatre Nyidrëti kö, Atre Xupe la hnengödrai me fene hnengödrai asë!—Is. 45:18.
3. (a) Drei la ka atreine qeje Tretretro koi së? (b) Nemene la itre hnyinge hne së hna troa sa?
3 Emele ne la atr la troa atrepengöi Akötresieti hnyawa. Pine nemen? Pine laka, tro hmekuje hi a mele hnei “angat’ asë angete hëne la atesiwa i Joxu.” (Rom. 10:13) Ame la atr ka hëne la ëje i Akötresie, tre, ka atrepengöi Iehova, ceitu me angeice a atrepengöne hnyawa la ketre atre hi. Celë hi ini hnei Iesu Keriso hna hamëne kowe la itretre drei nyidrë. Hnei nyidrëti hna ini angatre la pengö i Tretretro. (E jë la Luka 10:22.) Hnauëne laka pëkö ketre atr ka ijije troa qeje Tretretro, tune la aqane qeje pengöi Nyidrëti hnei Iesu? Nemene la aqane qeje pengöi Akötresieti hnei Iesu? Nge nemene la nyine tro sa kuca matre atreine së qeje Tretretro koi itre xa atr, tune lo aqane kuca hnei Iesu ekö? Tro sa ce sa la itre hnyinge celë.
IESU KERISO HMEKUJE HI LA KA IJIJ
4, 5. Pine nemene laka, Iesu hmekuje hi la ka ijije troa qaja la Tretretro i nyidrë?
4 Iesu hmekuje hi la ka ijije troa qeje Tretretro. Pine nemen? Pine laka ame ekö lo tha ase petre kö xupe la itre xa xupuana, pane kö la “Nekö i Akötesieti ka cas” mele e koho hnengödrai, ene hi lo atr hna troa ati ëjene pëhë e thupene ka hape Iesu. (Ioane 1:14; 3:18) Nyipici, tha ijiji ketre kö la göhnë celë! Pë petre kö ekö ketre xupuana ka mel, nge kolo ha mele madrine hnene la Hupuna thene la Tretretro i nyidrë, nge kola thele troa atrepengöi Tretretroti hnyawa me kepe ini qaa ngöne la itre aqane ujë i Nyidrë. Ma drei jë kö la itre macatre ne lue Trenekön a pane ce porotrike hnyawa me akökötrene la ihnimi ketre koi ketre. (Ioane 5:20; 14:31) Haawe, drei hë enehila la aqane atre Keme hnyawa hnei Nekön!—E jë la Kolose 1:15-17.
5 Hnene la Tretretro hna iëne la Hupuna i Nyidrë matre troa nyi trenge ewekë i Nyidrë, ene lo hna hape, “Logo i Akötesie.” (Hna ama. 19:13) Celë hi matre, Iesu hmekuje hi la ka ijije troa qeje pengöi Tretretro koi itre xan. Nge hnei Ioane, hna qeje Iesu ngöne la evangelia, ceitu me “Logo” atre lapa “ngöne la imano ne la Tetetro.” (Ioane 1:1, 18) Hnei Ioane hna xome la hna ithanata cili, ke, hnei angeic hna mekune la ketre hna majemine kuca ekö ngöne la hneijine i angeic, ngöne la itre ijine xen: tro la atrekë hnalapa a ce amë la lue atr ngöne la ca göhnë matre tro nyidroti a iqëmekekeu hnyawa. Celë hi lai ka troa aijijë nyidro troa porotrike hnyawa. Haawe, trotrohnine hë së laka, ame la kola qaja ka hape Hupunati a lapa “ngöne la imano ne la Tetetro,” tre kolo lai a hape ka jui la itre mekune hna porotrikëne hnei nyidrë memine la Tretretro.
6, 7. Nemene la ka acatrene hnyawa la aqane imelekeu ne la lue Trenekön?
6 Kola tro la itre macatre nge kola catre trootro la aqane imelekeu ne la lue Trenekön. Nge “hanyi [Akötesieti] . . . o drai” la Hupuna. (E jë la Ite Edomë 8:22, 23, 30, 31.) Qaa ngöne lai, tha sesëkötre kö së laka, kola catre la aqane imelekeu ne la lue Trenekön, ke, nyidroti a ce huliwa, nge ketre kolo fe a thele hnene la Hupuna troa xome la itre thiina ne la Tretretro i nyidrë. Ame la Hupunati ha öhne e thupene la Iehova a xupe la itre xa xupuana, memine la aqane ujë i Nyidrëti koi angatr, tre, kolo ha kökötre catre la ihnimi ne la Neköne koi Kem.
7 Hnei Hupunati mina fe hna xomi ini qaa ngöne la aqane amamane Iehova la ihnimi me thiina ka meköti Nyidrë, me aqane huliwane Nyidrëti la inamacane me men, ngöne lo ijine Satana a icilekeu memine la musi cile i Nyidrë. Ame cili, hna hnëkëne la Hupuna troa cile kowe la itre jole hnei nyidrëti hna troa melëne e thupen, ngöne la huliwa ne cainöje i nyidrë e celë fen.—Ioane 5:19.
8. Kola xatua së tune kaa hnene la evangelia troa atrepengöne hnyawa la itre thiina i Akötresie?
8 Hnene la aqane ce mele ne la lue Trenekön hna aijijëne la Hupuna troa atreine qeje pengöi Iehova hnyawa. Casi hi la jëne troa atrepengöi Tretretroti hnyawa, ene la troa atre la hna kuca hnene la Hupuna, memine la itre ini hnei nyidrëti hna hamën. Pane mekune ju së la hnaewekë hna hape, “ihnim”: thatreine kö tro sa drenge hnyawa la ejuine la hnaewekë cili, hnene la hna e hi la aqane qeje pengöne hnene la ketre dictionnaire la aliene ej. Ngo maine tro sa mekune la aqane tro fë Iesu la huliwa ne cainöj, memine la aqane nyipine nyidrëti la itre atr, tune la aqane qaja hnene la itre ka cinyihane la evangelia, haawe, tro hë së e cili a atrehmekune la aliene la kola hape, “Akötesieti la ihnim.” (1 Ioane 4:8, 16) Ngo tha ihnimi hmekuje kö la hnei Iesu hna amamane kowe la itretre drei nyidrë e celë fen. Hnei nyidrëti fe hna amamane la itre xa thiina ne la Tretretro i nyidrë.
AQANE AMAMANE IESU LA TRETRETRO
9. (a) Nemene la lue aqane amamane Iesu la Tretretro i Nyidrë? (b) Nemene la ceitun hnei Iesu hna xome matre troa amamane la pengöne la Tretretro i nyidrë?
9 Nemene la lue hna kuca hnei Iesu matre tro la itretre drei nyidrëti ekö me easë fe enehila, a hane atrepengöne la Tretretro? Lue ewekë: ini me thiina. Tro sa pane ce ithanatane la itre ini hnei Iesu hna hamëne kowe la itretre drei nyidrë. Kola mama ngöne la itre ini cili, laka atrepengöne catre nyidrë la itre mekune me itre aliene hni me itre jë i Iehova. Drei la ketre ceitun, hnei Iesu hna aceitunëne la Tretretro memine la ketre atre thupë mamoe, ka thele la ketre mamoe ka patr. Öni Iesu ka hape, ame la kola öhne la mamoe ka patr, “angeic’ a madi nyëne hune la ekate nge ekeqaihano [naitre naen] ka tha tro menu.” Nemene la ini hna hamëne hnene la ceitune cili? Öni Iesu e qeje pengöne ka hape, “Kete tune tha ajane kö la Tetetro i nyipunie e hnengödrai, laka troa pate la kete ka co celë.” (Mat. 18:12-14) Nemene la ini koi së? Maine easa mekune e itre xa ijine ka hape, pëkö eloi së nge pëkö ka hane meku së, the thëthëhmine kö së laka Tretretro së e koho hnengödrai a meku së, me hnehengazo së. Easë fe hi la ketre ne la itre “ka co” xajawa i Nyidrë.
10. Tune kaa fe la aqane amamane Iesu la pengöi Tretretro?
10 Hnei Iesu hna amamane jëne la aqane ujë i nyidrë la pengöne la Tretretro. Celë hi matre ame la Filipo aposetolo a hnyinge koi Iesu ka hape: ‘Amamai huni pi la Tetetro ,’ Iesu a sa ju ka hape, “Ame la ate goeë ni, angeice fe a goeëne la Tetetro.” (Ioane 14:8, 9) Tro sa pane ce wange la itre xa aqane amamane Iesu la thiina ne la Tretretro i nyidrë. Ame la ketre atr ka sipo Iesu ekö troa aloine la meci angeic, tre, “sihngödipi hë hnei lepera,” ngo ame pe hnei Iesu hna ketri angeic, me hape: “Ini a ajan, loi hë eö.” Ame hë e cili, mama pi hi kowe la lepera laka, mene Iehova la ka aijijë Iesu troa aloine la meci angeic. (Luka 5:12, 13) Ame fe la kola meci hnei Lazaro, hna hane öhne hnene la itretre dreng la aqane utipine i Iehova Tretretro; kola mama la utipine cili ngöne la Iesu a “simano e kuhu hnin, me manomano cat” me ‘treij.’ Ngacama atre hi Iesu laka, tha jole kö koi nyidrëti troa amele Lazaro hmaca, ngo drenge fe hi nyidrëti la akötre ne la hnepe lapa Lazaro me itre sinee i angeic. (Ioane 11:32-35, 40-43) Isa atre kö së la itre hna melëne hnei Iesu ka hane ketri së, nge ka amamane la utipine i Tretretro.
11. (a) Nemene la hnei Iesu hna amamane göi Tretretro ngöne la aqane ahmitrötrëne nyidrë la ēnē? (b) Pine nemene matre kola xatua së hnene la hna kuca hnei Iesu?
11 Nemene pena ha la mekuna i epuni göne la aqane ahmitrötrëne Iesu la ēnē? Pane mekune ju la ewekë ka traqa: Hnei Iesu hna ele la itre eno ka co nyine wameuc, me helëne la itre ka salemë mamoe me bolok. Nyidrëti a nenge trije pi la trenge manie ne la itre ka itö mani me qene ipiëne la itre laulau i angatr. (Ioane 2:13-17) Hnene la ecatrene la aqane ujë i Iesu, hna amekunëne la itretre drenge lo trenge ewekë i Davita Joxu hna perofetane ka hape: “Ase hë ulumi ni hnene la aja atraqate kowe la ēnē i cilie.” (Sal. 69:9) Kola mama ngöne la aqane ujë i Iesu, laka ka tru koi nyidrëti la nyipi hmi. Kolo mina fe a amamane hnene la aqane ujë cili la pengöi Tretretro, laka, atreine hi Nyidrëti troa apatrene la iangazo qa celë fen, ke, celë hnyawa hi aja i Nyidrëti lai. Drei jë kö la Nyidrëti a akötre ngöne la Nyidrëti a goeëne la iangazo e cailo fen! Ketre mekune lai ka xatua së troa atreine xomihnine la itre ewekë ka akötrë së!
12, 13. Nemene la hne së hna inine göi Iehova ngöne la easa goeëne la aqane ujë i Iesu kowe la itretre drei nyidrë?
12 Tro pena sa ce wange la aqane ujë i Iesu kowe la itretre drei nyidrë. Tha sese kö angatre iwesitrë pine la ca ewekë: angatr a thele ka hape, drei la ka sisitria e angatr. (Mar. 9:33-35; 10:43; Luka 9:46) Pine laka hnei Iesu hna ce mele memine la Tretretro, atre hnyawa hi nyidrëti la aqane goeëne Iehova la itre ka pi tru. (2 Sam. 22:28; Sal. 138:6) Ketre, hnei Iesu hë hna öhne la thiina ka tune lai thei Satana Diabolo. Hnene la aqane pi tru i angeic hna upi angeice troa thele troa hlemu me cilëne la itre göhnë ka tru. Haawe, trotrohnine hi së la hleuhleu ka eje thei Iesu ngöne la nyidrëti a öhne la itine cili thene la itre atr hnei nyidrëti hna inin, nge thene la itre aposetolo i nyidrëti mina fe! Tha patre pi kö la itine cili qaathei angatr, uti hnyawa ju kö lo drai tixenuë i Iesu e celë fen. (Luka 22:24-27) Ngo hnei Iesu pala hi hna ameköti angatre cememine la menyik, ke, xecie hnyawa koi nyidrë laka tro kö angatr elanyi a hane thele troa xome la tulu i Nyidrë, ene la troa hni ka ipië.—Fil. 2:5-8.
13 Öhne kö epuni la pengöi Tretretro ngöne la aqane amekötine Iesu la itretre drei nyidrë? Öhne kö epuni la pengöi Tretretro ngöne la thiina i Iesu me aqane ewekë i nyidrë? Tha tro pi kö la Tretretro a nuetrije la itre hlue i Nyidrë ngacama angatre a tria lapa. Ame hë la easa atre la pengöi Akötresie, canga ietra hi së nge pi tro fe së a hane qeje menu koi Nyidrë pine la itre ngazo së.
KOLA QEJE TRETRETRO HNENE LA HUPUNA CEMEMINE LA AJA ATRAQATR
14. Hnei Iesu hna amamane tune kaa ka hape atraqatre la aja i nyidrëti troa qeje Tretretro?
14 Nyimutre la itretre musi ka iwajahuj, nge ka thele troa juetrëne la itre ithuemacanyi nyine tro la nöje a atre. Ame pena ha Iesu, atraqatre la aja i nyidrëti troa thawakeune la itre ithuemacanyi göi Tretretro, me qeje Nyidrëti koi itre atr. (E jë la Mataio 11:27.) Ketre, hnei Iesu hna hamëne kowe la itretre drei nyidrë “la trotrohnin, mate ate hmekunyi [Iehova Akötresie] la ka nyipici.” (1 Ioane 5:20) Kola hapeue lai? Hnei Iesu hna fe la lue meke ne la itretre drei nyidrë matre tro angatre a trotrohnine la itre ini hnei nyidrëti hna hamëne göi Tretretro. Tha hnei nyidrëti kö hna juetrëne la pengö i Tretretro, nge ketre, tha hnei nyidrëti kö hna inine ka hape, ketre igötranene la Tirinite Akötresie.
15. Pine nemene matre hnei Iesu hna lapa fë la itre xa ithuemacanyi göi Tretretro i nyidrë?
15 Hapeu, hnei Iesu kö hna qaja asë la nöjei ithuemacanyi hnei nyidrëti hna atre göi Tretretro? Ohea, nyimutre pala kö la itre ewekë hnei nyidrë hna lapa fë. (E jë la Ioane 16:12.) Pine nemene lai? Pine laka ame la ijine cili, “tha ’teine kö [la itretre drenge] troa kapa” la itre ithuemacanyi cili. Tune la hna qeje pengöne hnei Iesu, tro ha mama la atrehmekune e traqa jë elanyi la “Ixatua,” ene la uati hmitrötr, ka troa e angatr “kowe la ite nyipici asë.” (Ioane 16:7, 13) Tune la keme me thine ka inamacane a pane lapa fë la itre xa ithuemacany, matre aca qaja jë hi elanyi e tru hë la itre nekö i nyidro, haawe hnei Iesu hna treqene uti hë la tro la itretre drei nyidrë a maca me atreine troa trotrohnine la itre xa ithuemacanyi göi Tretretro. Hnei Iesu hna wange atrune la hna atreine hnei angatr.
NYITIPU IESU JË HNENE LA HNA XATUANE LA ITRE ATR TROA ATREPENGÖI IEHOVA
16, 17. Pine nemene matre ijiji së hë troa qeje Tretretro kowe la itre xa atr?
16 Ame la epuni a atrepengöne hnyawa la ketre atr, me madrine la thiina ka lolo i angeic, hapeu, tha tro kö lai a upi epuni troa qeje angeice koi itre xa atr? Ame lo Iesu e celë fen, hnei nyidrëti hna qeje Keme i nyidrë. (Ioane 17:25, 26) Hapeu, ijiji së kö troa nyitipu nyidrë, ene la troa qeje Iehova koi itre xa atr?
17 Tune lo hne së hna ce wange hë, sisitria catre kö la hnei Iesu hna atre göi Keme i nyidrë hune la nöjei atr asë. Ketre, aja i nyidrëti la troa thawakeune la itre hnei nyidrëti hna atre, nge goi hamëne fe nyidrë kowe la itretre dreng la atreine troa trotrohnine la itre götrane ga jui ne la thiina i Akötresie. Haawe, Iesu a xatua së troa atrepengöne hnyawa la Tretretro së. Atraqatre la hni ne ole së koi Iesu laka hnei nyidrëti hna catre qeje Tretretro jëne la itre ini me aqane ujë i nyidrë. Qa ngöne lai, meköti e tro sa selëne laka atre Tretretro hë së. (Iere. 9:24; 1 Kor. 1:31) Ame ngöne la easa thele troa easenyi Iehova, ketre, Nyidrëti mina fe a easenyi së. (Iako. 4:8) Haawe, ijije hi tro sa ce thawa me itre xan la atrehmekune së. Tune kaa lai?
18, 19. Tune kaa la aqane tro sa amamane la pengöi Tretretro kowe la itre xan? Qeje pengöne jë.
18 Nyipi ewekë tro sa nyitipu Iesu hnene la hna amamane la pengöi Tretretro jëne la trenge ewekë së me aqane ujë së. Tha tro pi kö sa thëthëhmine ka hape, nyimutre la itre atrene la teritoare së ka thatre Akötresieti pala kö. Maine jë hajihaji koi angatre la pengöi Nyidrë, pine laka hna hamëne koi angatre la itre ini ka thoi. Haawe, loi e tro sa ce thawa me angatr la itre ini hne së hna kapa qaa hnine la Tusi Hmitrötr, göne la ëje i Akötresie, me aja i Nyidrë kowe la itre atr, memine fe la thiina i Nyidrë. Ketre, kola xatua së hnene la itre hna edromën hnei Tusi Hmitrötr, troa atrehmekune la itre xa thiina i Nyidrë ka sihngödri koi së ekö. Loi e tro sa ithanatane la itre hne së hna atre kowe la itre xa trejin, matre tro fe a ketre ithuecatre koi angatr.
19 Loi e tro sa nyitipu Iesu me amamane la pengöi Tretretro jëne la aqane ujë së. Maine troa mama koi nöjei atr la aqane melëne së la ihnimi Keriso, eje hi lai laka tro fe hë angatre a ajane troa easenyi Iesu me Tretretro i nyidrë. (Efe. 5:1, 2) Ketre, Paulo aposetolo mina fe a xatua së troa ‘nyitupu nyidrë, tune la aqane nyitipu Keriso hnei nyidrë.’ (1 Kor. 11:1) Drei la ketre manathithi ka tru troa xatuane la itre atr troa atrepengö Iehova jëne la aqane ujë së! Epi tro së asë a catre nyitipu Iesu hnene la hna amamane la pengöi Tretretro kowe la itre atr.
[Thying]