Iehova a Amamane La “Nöjei Ewekë Ka Ijije Troa Canga Traqa”
6 OGAS KOI 12 OGAS
NYIMA: 63, 32
Iehova a Amamane La “Nöjei Ewekë Ka Ijije Troa Canga Traqa”
“Dei la amamane i Iesu Keriso, lo nöi Akötesie hna nunuë nyidë troa amamane kowe la ite hlue i nyidë la nöjei ewekë ka ijije troa canga traqa.”—HNA AMA. 1:1.
TRO NYIPUNIETI A SA TUNE KAA?
Nemene la igötranene la hnasaatr ka nyi hatrene la Musi Agele me Amerika?
Nemene la aqane amamane Ioane la pengöne la Organisation des Nations unies me Musi Agele me Amerika?
Nemene la aqane qeje pengöne Daniela me Ioane la aqane troa apatrene elany la itre musi ne la itre atr?
1, 2. (a) Nemene la ixatua koi së hnene la itre hna perofetane hnei Daniela me Ioane? (b) Nemene la hna nyi hatrene hnene la sikisi lao he ne lo öni ka ses?
AME la itre hna perofetane hnei Daniela me Ioane, tre, itre eje a xatua së troa trotrohnine la aliene la itre ewekë ka traqa enehila e cailo fen, memine fe la itre ewekë ka troa traqa elany. Ame ngöne la easa wange la öni ka ses hna meköle goeëne hnei Ioane memine la öni ka iaxoueny ka treene lao jon, lo hnei Daniela hna qaja memine la aqane qeje pengöne angeice la hnasaatre atraqatr, nemene la hne së hna trotrohnin? E trotrohnine hnyawa ha së la itre hna perofetan, nemene ju hë lai hna upi së troa kuca?
2 Tro sa pane ce wange lo öni ka ses hna meköle goeëne hnei Ioane. (Hna ama., mek. 13) Tune lo hne së hna ce wange hë ngöne lo hna cinyihane hnapan, hna nyi hatrene hnene lo sikisi lao he ne la öni, la itre musi celë, Aigupito, me Asuria, me Babulona, me Madai me Peresi, me Heleni me Roma. Ame asë hi la itre musi celë, tre, itre ka imethinë asë hi memine la matra ne la föe. (Gen. 3:15) Ame la kola cinyihane hnei Ioane la itre hnei nyidrëti hna meköle goeën, tre, Roma lo hnaasikisine he, la musi ka cil. Traqa koi itre hadredr la etrune la itre macatre ne cilëne Roma la mus. Ngo troa fetra e thupene la hnaasevenene he ka troa nyihnai Roma. Drei jë la musi cili, nge nemene la hna troa kuca hnene la hnaasevenene he kowe matra ne la föe?
CILE HË LA MUSI AGELE ME AMERIKA
3. Nemene lo hna qajaqaja hnene lo öni ka iaxoueny nge ka treene lao jon, nge nemene la hna nyi hatrene hnene lai treene lao jon?
3 Ijije tro sa atre la pengöne lo hnaasevenene he ne la öni ka ses hna qaja ngöne la tusi Hna Amamane mekene 13. Celë hi matre loi e tro sa atrepengöne la öni ka iaxoueny, nge ka treene lao jon hna meköle goeëne hnei Daniela. a (E jë la Daniela 7:7, 8, 23, 24.) Ame la öni hna meköle goeëne hnei Daniela, tre, nyine qajaqaja lo Musi Roma. Thupene la 400 lao macatre thupei Keriso, kaqa pi hi la Musi Roma, nge nyimu wapicine pi hi la musi cili. Treene lo e jon, ka fetra qaa ngöne la he ne la öni ka iaxoueny; kolo hi lo itre wapicine lai ka pici qaa ngöne la Musi Roma.
4, 5. (a) Nemene la hna kuca hnene la jon ka co? (b) Musi drei la hna nyi hatrene hnene la hnaasevenene he ne la öni ka ses?
4 Ka ketre pengöne pë hë la foa lao jon ka fetra qaa ngöne he ne lo öni ka iaxoueny. Köni jon hna feje hnene “la kete jone ka co.” Kola eatre lai lo ijine kola hlemu hnei Agele, ketre wapicine la Musi Roma. Qëmekene la itre macatre 1600, tha hlemu petre kö la musi Agele. Sisitria kö la köni xa wapicine i Musi Roma, ene Espagne, Les Pays-Bas, me France. Hnei Agele hna ukapiëne trije la itre musi cili me xome pena la göhne i angatr. Ame hë e nyipine la itre macatre 1700, Agele pë hë la ka hlemu e cailo fen. Ngo tha eje petre kö lo hnaasevenene he ne lo öni ka ses.
5 Cile jë hi la Agele, nge kolo fe hi lai a utretre trootro la itre nöje ngöne la götrane kolopi ne Amerika ka lapa ekö fene la musi Agele. Matre tha icilekeu pe Agele me Amerika, ngo hna ce xöle pe memin me upe la itre he ne isi angeice troa thupën e Amerika. Macatre 1914 lo kola nyiqaane la drai Joxu; musi Agele la ka cile ngöne la ijine cili nge Amerika la nöje ka trena mo. b Ame ngöne la Pane Isi Ka Tru, ce xöle hë Amerika me Agele. Kolo ha mama enehila la hnaasevenene he ne la öni, ene hi lo ka Musi E Cailo Fen, hna hëne ka hape, Agele me Amerika. Nemene la hna kuca hnene la hnaasevenene he kowe matra ne la föe?
6. Nemene la hna kuca hnene la hnaasevenene he kowe la itre hlue i Akötresie?
6 Tha qea ju kö thupene la kola nyiqaane la drai Joxu, nge cile jë hi la hnaasevene ne he kowe la nöje i Akötresie, ene la thelene lo itre trejine me Keriso e celë fen. (Mat. 25:40) Hnei Iesu hna qaja ka hape, ame ngöne la ijine tro nyidrëti a joxu, tre, celë fe hi la ijine kola huliwa hnene la thelene la matran. (Mat. 24:45-47; Gal. 3:26-29) Hnene la Musi Agele me Amerika hna thele troa isi memine la itre ka hmitrötr, ene lo itre hna iën. (Hna ama. 13:3, 7) Ame ngöne la ijine Pane Isi Ka Tru, hnene eje hna axösisine la itre hlue i Akötresie, me wathebone la itre xa itus, me akalabusine fe la itre ka elemekene la huliwa ne la hlue ka nyipici me inamacan. Kösë lo hna apëne la huliwa ne cainöje hnene la hnaasevene he ne la öni ka ses ngöne hi la hnepe ijine ka xalaith. Hnei Iehova hna ahnithe hë lai ewekë ka troa traqa koi Ioane. Hnei Akötresieti fe hna qaja koi Ioane ka hape, tro la sine la matran, lo itre hna iën, a xeji huliwa hmaca. (Hna ama. 11:3, 7-11) Kola mama hnene la aqane trongene la mele ne la itre hlue i Iehova ka hape, kola eatre la itre hna qaja amë hë ekö.
MUSI AGELE ME AMERICA HNA NYI HATRENE HNENE LO LUE IWACA FAO ME DRO KA FEDR
7. Nemene la ewekë ka cas hna nyi hatrene hnene lo hnaasevenene he ne la öni ka ses memine la hnasaatre atraqatr?
7 Nemene la ewekë ka cas hna nyi hatrene hnene lo hnaasevenene he ne la öni ka ses memine la hnasaatr atraqatr? Atre hi së laka, Musi Agele me Amerika a fetra qaa ngöne la Musi Roma. Nga nemene jë la pengöne la lue iwaca ne la hnasaatr? Hna qeje pengöne lue eje ka hape, kola casi la dro ka fedr me fao. (E jë la Daniela 2:41-43.) Ka ihmeku la aqane qeje pengöne celë memine la ijine troa cile hnene la hnaasevenene he, lo Musi Agele me Amerika. Tha ka catrehnine kö la dro ka fedre hna ce lonekeune me fao, haawe ketre tune mina fe tha catrecatre kö la Musi Agele me Amerika hui Roma ekö. Pine nemene lai?
8, 9. (a) Hnei nemene matre kola xome ceitunëne la musi ne la hnaasevenene he memine la ecatrene la fao? (b) Nemene la hna nyi hatrene hnene la dro ka fedr ngöne la lue iwaca ne la hnasaatr?
8 Hnene la hnaasevene he hna pane tune lo fao, ngöne la kola hun ngöne lo Pane Isi Ka Tru. Kolo fe a mama hnyawa la musi ne eje hna aceitunëne me fao ngöne la Hnaaluene Isi Ka tru. c Thupene la isi cili, ka catre pala hi la aqane musi ne eje tune la fao. Ngo, ame hë thupen, kola ce enexöle hnene la fao me dro ka fedr.
9 Hnene la itre hlue i Iehova hna thele troa atrepengöne la aliene la lue iwaca ne la hnasaatr. Ame la fao me dro ka fedr hna qeje pengöne hnei Daniela 2:41, tre, kola nyi hatrene “la baselaia” ka cas, ngo tha ala nyimu kö. Haawe, dro ka fedr a nyi hatrene la itre atr me itre ewekë ka eje hnine la Musi Agele me Amerika nge ka troa apujene la ecatrene la musi ne ej matre thatreine kö troa tune lo Musi Roma ekö. Ame la dro ka fedr, tre kola qaja la “ite matra ne la ate,” ene hi lo itre atrene la nöj. (Dan. 2:43) Hnene la itre atr ka lapa fene la Musi Agele me Amerika hna isigöline la itre aja i angatr, hnene la hna lö hnine la itre huliwa i politik me syndicat me isine tro la nöje i angatre a ketre sipu mus. Itre atrene la nöje a apujene la trenge catre ne la Musi Agele me Amerika matre tha catre hmaca kö tune lo fao. Hnene laka tha kolo hmekuje kö a isazikeu la itre mekune ne la itre hene ne politik; ngo goi tha casi fe la itre ka ce huliwa. Nyipici kö lo hna perofetane hnei Daniela kola hape, “tro ha cate la sine la baselaia, nge nga la sin.”—Dan. 2:42; 2 Tim. 3:1-3.
10, 11. (a) Nemene la ewekë ka troa traqa kowe la lue iwaca? (b) Hapeu, hetre hna nyi hatrene kö hnene la etrune la itre he ne wanakoca?
10 Tha cile kö Agele me Amerika troa cas uti hë enehila, ngöne la itre mekune me itre huliwa hnei nyidro hna kuca e cailo. Easa trotrohnine jëne la itre hna perofetane göne lo hnasaatr atraqatre me öni ka ses, ka hape, pë hmaca kö ketre musi elanyi ka troa cile thupei Musi Agele me Amerika. Maine nyipici laka, ka puje kö la musi nyidro hune la musi ne lo lue iwaca fao, ngo ame pe, tha nyidroti kö a troa kei xan.
11 Hapeu, hetre hna nyi hatrene kö hnene la etrune la itre he ne wanakoca? Ame ngöne la itre xa hna perofetan, hnei Daniela hna qaja la etrune la itre jone lo itre xa öni hnei nyidrëti hna meköle goeën. Hetre sipu aliene la etrune la itre ewekë cili. Ngo ame göne lo itre he ne wanakoca, tha hnei Daniela kö hna qaja la etrun. Qaa ngöne lai, pëkö sipu aliene la etrune la itre he ne wanakoca, a ka tune fe hi la etrune lao im, me wanakoim, me he ne wanakoim, me etrune lao ca, me iwaca ne la hnasaatr. Hnei Daniela hmekuje hi hna qaja ka hape, fao hna ithuenyiköne me dro ka fedr lo lue iwaca ne la hnasaatr. Qaa ngöne lai, ijije hi tro sa qaja ka hape, ame ngöne la ijine kola cile la Musi Agele me Amerika, tre, kolo fe hi lo ijine kola nue la “etë” ene la Baselaia i Akötresie, troa lepe la lue iwaca ne la hnasaatr.—Dan. 2:45.
MUSI AGELE ME AMERICA HNA NYI HATRENE HNENE LO ÖNI KA SES KA LUE JON
12, 13. Nemene la hna nyi hatrene hnene lo öni ka ses ka lue jon, nge nemene la hnene ej hna kuca?
12 Maine nyipici laka, kola xome ceitunëne la Musi Agele me Amerika memine la fao hna ithuenyiköne me dro ka fedr, ngo kola mama jëne la itre ewekë hnei Iesu hna amamane koi Ioane ka hape, hetre hnene lai musi cili hna troa kuca ngöne la itre hneijine la pun. Nemene jë la hna troa kuca? Hnei Ioane hna meköle goeëne la ketre öni ka ses ka lue jon a ewekë tune la drakona. Nemene la hna nyi hatrene hnene la öni ka ses celë? Pine laka, ka lue jon ej, haawe kolo hi lai a nyi hatrene la lue nöje ka ce mus. Musi Agele me Amerika pala hi lai hnei Ioane hna öhn, ngo ketre pengöne hë, ke, hetre ewekë ka ketre pengöne hna troa kuca hnene lai musi cili.—E jë la Hna Amamane 13:11-15.
13 Hnene lai öni ka lue jon hna ukune la itre atr troa acile la hnaijine la öni ka ses. Hnei Ioane hna cinyihane ka hape, troa pane cile la hnaijine la öni ka ses, matre patre pi hi, me fetra hmaca jë. Celë hi ewekë lai hna kuca hnene la ketre organizasio hna sajuëne hnei Agele me Amerika, lo hna qaja ka hape, troa acasine la nöjei nöje me nyi qene qaja ne itre ej. d Hna pane cile lai organizasio cili thupene lo Pane Isi Ka Tru, nge hna ati ëjene ka hape, Société des Nations. Thupene jë hi lai, patre pi ej ngöne lo kola nyiqaane lo Hnaaluene Isi Ka Tru. Ngo önine la itre hlue i Akötresie ngöne lo ijine Hnaaluene Isi Ka Tru, ka hape, thenge lo itre hna perofetane ngöne la tusi Hna Amaman, tro hmaca kö a fetra lai organizasio cili. Nge nyipici hi, hnene eje hmaca hna fetra, ngo hna ati ëjene pena ka hape, Organisation des Nations unies.—Hna Ama. 17:8.
14. Pine nemene matre qaja jë hnei Ioane ka hape, ame la hnaijine la öni ka ses tre, eje hi la “hnaaköningemenën [joxu]”?
14 Öni Ioane göne lo hnaijine la öni ka ses ka hape, eje hi la “hnaaköningemenën [joxu].” Pine nemene lai? Tha eje fe kö a hane sine lo trongene la ala sevene lao he ne la öni ka ses, ngo hnaijine eje pe. Kola hetre ecatrene la musi ne la hnaijine la öni ka ses hnene la itre qene qaja ne la nöjei nöje asë ka nyi atrene ej, laka Musi Agele me Amerika mina fe. (Hna ama. 17:10, 11) Ngo kösë hnene la hnaijine ne la öni ka ses hna kapa la ketre hnëqa ne joxu matre troa aeatrëne la ketre huliwa nge ka troa hetre thangane catre kowe la aqane mele ne la atr.
TROA ÖNI LA FÖE NE GOJENY HNENE LA HNAIJINE LA ÖNI KA SES
15, 16. Nemene la hna nyi hatrene hnene la föe ne gojeny, nge nemene hë la aqane ujë ne lo itre ka ce me nyiidro ekö?
15 Öni Ioane ka hape, kola të la föe ne gojeny hune la öni ka ses ka palulu, ene hi lo hnaijine ne la öni ka ses. Hna ati ëje i nyiidro ka hape, “Babulona Atraqat.” (Hna ama. 17:1-6) Ame lai föe ne gojenyi celë, tre, nyiidro a nyi hatrene la nöjei pengöne hmi ka thoi asë, ene fe hi lo itre hmi ka selëne ka hape, itre Keresiano angatr. Thenge lo itre hna perofetane hë, hnene la itre hmi cili hna qaja atrune la hnaijine lo öni ka ses, me thele troa hane ce memine ej.
16 Ngo ame pala hi ngöne la drai Joxu, Babulona Atraqatre ha öhne la kola hmeje kötre la itre atr ka ce me nyiidro ekö, ene lo itre hna nyi hatrene hnene la tim ngöne la tusi Hna Amaman. (Hna ama. 16:12; 17:15) Drei la aqane trongen, ame ngöne lo ijine kola pane mama la hnaijine la öni ka ses, musi hë ngöne la itre götrane e kohië lo ketre hmi ka tru thei Babulona Atraqatr, ene lo itre ka selëne ka hape, itre Keresiano angatr. Ngo ame hë enehila, tha metrötrëne hë la itre atr lai hmi cili, memine fe kö la itre hene ne ej. Ala nyimu hë la itre atr ka mekune ka hape, eje hi la jëne gomegome me atre aciane la itre isi. Goi thele fe hnene la itre ka inamacane ne la itre nöje e kohië matre tha tro hmaca kö la hmi a hane lö hnine la itre huliwa ne la nöj.
17. Nemene la ewekë ka troa traqa kowe la itre hmi ka thoi, nge pine nemen?
17 Tha tro kö a patre xane ju hi la föe ne gojeny. Atreine pala kö la föe ne gojenyi thele jëne matre tro la itretre musi a aeatrëne la aja i nyiidro, ngo uti hi elanyi la tro Akötresieti a amë e kuhu hni ne la itretre mus la ketre mekun. (E jë la Hna Amamane 17:16, 17.) Easenyi hë la ijine tro Iehova a kuca matre tro la itre musi ne la fene i Satana memine la Organisation des Nations unies, a lepe la itre hmi ka thoi. Tro angatr a ce thë matre tha tro hmaca kö la itre hmi ka thoi a hane lö hnine la itre huliwa i angatr, me apatrene fe hë la itre trengamo ne la itre hmi cili. Ame petre kö ngöne lo itre macatre ka ase hë, thatreine kö troa jele nyipicine la itre ewekë celë. Ame enehila, kösë lo kolo hi a nango të ezi la föe ne gojenyi e koho hune la öni ka ses ka palulu. Ngo ame pe, thatreuna ju hi së la kola troa hnai nyiidro, nge tha co kö elany la eatre i nyiidro.—Hna ama. 18:7, 8, 15-19.
TRO FE HA PATR LA ITRE ÖNI
18. (a) Nemene la hna troa kuca elany hnene la öni ka ses, nge nemene la pune lai? (b) Thenge la hna qaja ngöne Daniela 2:44, drei musi la hna troa lepe apatrene hnene la Baselaia i Akötresie? (Goeëne ju fe lo itre mekun hna eköhagen ngöne götrane 7.)
18 Thupene jë hi la hna apatrene la itre hmi ka thoi, tro Satana a kuca matre tro pena ha la öni ka ses, ene la politik a isi memine la Baselaia i Akötresie. Ngo pine laka thatreine kö tro la itretre musi a isi memine la Baselaia ka cile e hnengödrai, haawe tro pena ha angatr a nue la elëhni angatre kowe la itre ka sajuëne la Baselaia i Akötresie e celë fen. Ngazo pe, hulö la pune koi angatr. (Hna ama. 16:13-16; 17:12-14) Ase hë Daniela qeje pengöne la aqane troa umuthe la isi tixenuë. (E jë la Daniela 2:44.) Tro ha lepe apatrene asë lo öni ka ses hna qaja ngöne Hna Amamane 13:1 memine la hnaijine ej, memine fe kö lo öni ka ses ka lue jon.
19. Nemene la ka xeci hnyawa koi së, nge nemene la nyine tro sa kuca enehila?
19 Easa melëne la hneijine kola musi hnene la hnaasevenene he. Pëkö ketre he ka troa fetra hmaca qaathene la öni ka ses celë. Musi Agele me Amerika hi la ka troa cile ngöne la ijine troa lepe apatrene la itre hmi ka thoi. Kola mama laka kola eatre hnyawa la itre hna perofetane hnei Daniela me Ioane. Qaa ngöne lai, xeci hnyawa koi së laka, easenyi hnyawa ha la ijine troa apatrene la itre hmi ka thoi nge calemi fe hë la isi Amagedo. Hnei Akötresieti hna ahnithe amë hë ekö la itre ewekë cili. Ngo hapeu, tro jë kö sa nyipine la itre hnei Nyidrëti hna perofetan? (2 Pet. 1:19) Ijine tro hi së la a ce me Iehova, me sajuëne la Baselaia i Nyidrë.—Hna ama. 14:6, 7.
[Ithueamacany]
a Ame la kola hape treen, e hnine la Tusi Hmitrötr, tre, kola amamane la itre ewekë ka pexej. Ame e celë kola qaja la itre musi asë ka pici qaathene la Musi Roma.
b Ngacama eje hë qaane lo itre macatre 1700 la lue mus, ene Agele me Amerika, ngo öni Ioane tro nyidroti a mama cile hnyawa ngöne la kola nyiqaane la drai Joxu. Eje hi laka, tro ha eatre la hna meköle goeëne hnei Ioane ngöne tusi Hna Amaman, ngöne la “drai Joxu.” (Hna ama. 1:10) Kolo ijine Pane Isi Ka Tru la Agele me Amerika a ce huliwa hnine la musi ka cas.
c Hnei Daniela fe hna qaja amë la ecatrene la aqane isi angeice ngöne la kola cinyihane ka hape: “Kete pengöne kö la aqane iapatenyi angeic.” (Dan. 8:24) Drei la ketre ceitun, hnei Amerika hna nue kowe la ketre nöje ithupëjia la lue bob atomik matre hunapake ju pë hë.
d Wange ju la itus La Révélation : le grand dénouement est proche ! ngöne götrane 240, 241, me 253.
[Thying]
[Hna eköhagen götran 7]
A DREI JË “LA NÖJEI BASELAIA ASËJËIHË CILI” HNA QAJA?
Kola qaja hnene la hna perofetane ngöne Daniela 2:44 ka hape, tro la Baselaia i Akötresieti a “lep’ anyilanyilane me apatene la nöjei baselaia asëjëihë cili.” Ame la itre baselaia hna qaja ngöne la hna perofetane celë, tre, kolo hmekuje hi lo itre musi hna nyi hatrene hnene la itre igötranene lo hnasaatr.
Nge tune kaa fe göi itre xa mus? Kola sa hnene la tusi Hna Amaman. Tro “la nöjei joxu e celë fen’ asë” a casi matre troa isi me Iehova ngöne “la drai atraqate i Akötesie kapucatinasë.” (Hna ama. 16:14; 19:19-21) Qaa ngöne lai, tha kolo hmekuje kö a troa apatrene e Amagedo lo itre musi hna nyi hatrene hnene lo hnasaatr, ngo ene mina fe la itre xa musi ne la fen asë.