3-9 SEMITREPA 2012

NYIMA: 120, 129

Nyihluene Jë La Akötresie Ka Inuegufa

“Dei lola aja koi Akötesie, laka eësha denge thenge la ite wathebo i nyidë ; nge tha hace kö la ite wathebo i nyidë.”—1 IOANE 5:3.

ATREINE HI NYIPUNIETI SA?

Nemene la hnei Satana hna kuca, matre tro sa mekune ka hape, ka jole e troa trongëne la itre wathebo i Akötresie?

Pine nemene matre ka nyipi ewekë catr tro sa iëne hnyawa la itre sine tronge së?

Nemene la ka troa xatua së troa mele nyipici kowe la Akötresieti ka inuegufa?

1. Nemene la aqane huliwane Iehova la inuegufa, nge hna mama tune kaa thei Adamu me Eva?

 NGACAMA Iehova hmekuje hi la ka hetrenyi la inuegufa ka pë ifegon, ngo ame pe, tha hnei Nyidrëti kö hna huliwane menune ej, maine acili wathebone pena la nöjei ewekë asë nyine xom acone la mele ne la itre hlue i Nyidrë. Hnei Nyidrëti pe hna nue angatre hnyawa, matre ijiji angatre troa ië ewekë nge atreine angatre troa kuca la itre aja i angatr. Hanawange la ketre hatren, casi hi lo wathebo hnei Akötresieti hna hamë Adamu me Eva. Hnei nyidrëti hna amekötine laka, tha tro kö nyidro a xeni qa ngöne “la sinöe ne ate hmekune la loi me ngazo.” (Gen. 2:17) Hane hi lai aja ne la Atre Xupi nyidro. Tha fene inuegufa kö la hnei nyidro hna kapa!

2. Pine nemene matre luzi pi qaathene lo lue pane keme me thine së la inuegufa qaathei Akötresie?

² Pine nemene matre Akötresieti a nue gufa nyidroti pi tune lai? Pine laka hnei Akötresieti hna xupi nyidro hnaiji Nyidrë me hamë nyidroti fe la mekuthethew; nge tro hë la ihnimi nyidro kowe la Atre Ixup a eatrongë nyidro ngöne la gojenyi ka meköt. (Gen. 1:27; Rom. 2:15) Ngazo pe, pëkö hni ne ole i Adamu me Eva kowe la Atre Hamë Mele ka loi koi nyidro, nge hnei nyidro hna xanadrone la inuegufa hna nue koi nyidro. Hnei nyidroti pe hna pine la inuegufa hmo qaathei Satana, ene la pi sipu mus. Luzi catre nyidro, gufa ha thei nyidro la inuegufa, nge nyidro me itre matra i nyidro pena a nyihluene la ngazo me menuëne la itre ethanyine ej.—Rom. 5:12.

3, 4. Tune kaa la aqane amenu së hnei Satana matre wai engazone pi së la itre wathebo i Iehova?

³ Maine hnei Satana ha ekö hna iaöne la lue pane atr ka pexej memine fe kö la itre xa angela troa thipetrije la musi cile i Akötresie, haawe pëkö ca pengöne koi angeice lai troa iaö së. Nge tha saze kö la itre aqane nyinyithiina i angeic. Angeice pala hi a thele troa amenune la mekuna së matre tro sa qeje engazone la itre wathebo i Akötresie, me hape ka hace me jole e troa melën, nge pëkö madrine së qa ngön. (1 Ioane 5:3) Nge e tro sa drenge lapane la itre mekune cili, tro fe hë lai a hane amenu së. Kola qaja hnene la ketre trejine föe Keresiano ka 24 ha lao macatren  enehila, nge ka melëne ekö la itre ewekë ka sis ka hape: “Hna huli ni hnene la itre sine ce elong ka ngazo thiinan, ke xounge e tro ni a isapengöne me angatr.” Maine jë, ase fe hë hane huli nyipunie hnene la itre atr ka tune lai.

⁴ Ame la ketre ejolen, tre hetrenyi fe hi la itre sine ce elo ka ngazo thiina e kuhu hnine la ekalesia i Keresiano. Önine la ketre thöthi Keresiano ka hape: “Hetre itre xa thöthi sine ce elong ekö ka ihanyi memine la itre ka tha ce hmi kö me easë. Nge ame la hnenge hna öhne hnyawa, tre, e ce tro catre hë ni me angatr, xome catrëne hë ni la thiina i angatr. Hmalohmaloi hë la itre ewekë ngöne la götrane la ua koi ni. Pë hë ehnyapan la göxeni hna hamëne ngöne la hna icasikeu, nge hna ihuline pë hë la tro ni kowe la hna cainöje trootro. Celë hi sipu hatrene koi ni ka hape, ijine tro hi ni la a nuetrije la itre sine ce elong; nge celë hi hnenge hna kuca!” Öhne fe hi nyipunieti la emenene la aqane ihuline la itre sine ce elo? Pane ce wange jë fe së la ketre ceitune hna qaja hnene la Tusi Hmitrötr.—Rom. 15:4.

HNEI ANGEICE HNA ËNÖNE LA HNI ANGATR

5, 6. Hnei Abasaloma hna iaöne tune kaa la itre xaa atr, nge hapeu, hune ju kö angeic?

⁵ Ala nyimu e hnine la Tusi Hmitrötr lo itre atr ka amamai tulu ka ngazo. Abasaloma, ketre nekö i Davita joxu la ketre tulu ka tun. Ketre pengöne kö la aqane mingömingö i Abasaloma ekö. Ngazo pe, ame ju hi la ketre ijin, hnei angeice hna tui Satana; hna nue la pi tru troa kökötre e kuhu hni angeic, me meciune la therone i keme i angeic, ngo tha edrö i angeice pe. a Jëne la aqane huliwa thoi, hnei angeice hna thele jëne troa thapa la hnanyijoxu. Hnei angeice hna nyi zöne la hnanyijoxu kowe la angetre Isaraela, matre tro angatr a mekune ka hape, tha hna nyipi ewekë angatre kö. Hnei Abasaloma hna tui Diabolo e Edena, ka lue iqëmek; iqëmeke ne kuci loi la ketre götran, nge atre sili thoine la kem la ketre götran.—2 Sam. 15:1-5.

⁶ Hapeu, hune ju kö lo huliwa thoi Abasaloma? Hnei angeice hna hune ngöne itre xa hnepe götran, ke Tusi Hmitrötr a qaja ka hape: “Hnei Abasaloma hna ënöne la ite hni angete Isaraela.” (2 Sam. 15:6) Ngo e thupene hë, hna kapasaitrë Abasaloma hnene la pi tru i angeic. Ngazo pe, tha angeice hmekuje kö la ka mec pine la itre huliwa ka ngazo cili, ngo traqa koi itre thauzane lao atr hna hule fe.—2 Sam. 18:7, 14-17.

7. Nemene la itre ini nyine tro sa xom qa ngöne la tulu i Abasaloma?

⁷ Pine nemene matre pë ju kö ejolene la kola iaöne lo lai angetre Isaraela? Maine jë hnei angatre hna pine la itre ewekë hna thingehnaeane koi angatre hnei Abasaloma. Maine pena, angatre hi a goeëne la emingömingö i angeic. Ame la ewekë hna amamane hnyawa, tre paatre kö thei angatr la mele nyipici koi Iehova me kowe la joxu siana i Nyidrë, celë hi matre canga saqe angatre hi jötr. Ame enehila, ala nyimu la itre ka tui “Abasaloma,” hna xom hnei Satana troa ënöne la hni ne la itre hlue i Iehova. Öni angatre ka hape: ‘Ka iothi la itre wathebo i Iehova. Öhne fe kö nyipunieti cahu itre atr ka tha nyi hlue i Iehova kö! Kola isa kuci mekunan, me madrin, a tha fene kö!’ Mama hnyawa kö koi nyipunieti ka hape, ka thoi lai, nge tro fe kö nyipunieti a mele nyipici koi Akötresie? Wange atrehmekune kö nyipunieti laka, “wathebo ka meköti” Iehova hmekuje hi, ene lo wathebo i Keriso la ka troa tro xomi nyipunieti kowe la nyipi inuegufa? (Iako. 1:25) Maine eje hi, haawe, hnine ju hë nyipunieti la wathebo cili, nge wange kö ke huliwane menune jë nyipunieti la inuegufa ne la Keresiano.—E jë la 1 Peteru 2:16.

8. Itre hna melëne hnei drei ngöne la hnedrai së la ka amamane ka hape, pëkö madrine e troa ena la itre trepene meköt i Iehova?

⁸ Itre thöthi pala hi la itre pi tha i Satana. Kola mekune hmaca hnene la ketre thupëtresiji ka thötre lao macatren, lo ijine angeice ekö a thöth, me hape: “Ame la aqane goeëne ni ekö la itre wathebo i Iehova, tre ceitu me ketre ewekë ka othi ni, ngo tha ka thupë ni pe.” Celë hi matre hnei angeice hna kei kowe la kuci ngazo. Ngo pë kö madrine i angeice qa ngön. Öni angeice ka hape: “Itre macatre ne eni a mele mekune ka hape, zönge kö la itre ewekë celë; nge kola angazone la hning.” Hnene fe lo ketre trejine föe ka mekune hmaca ekö lo ijine angeic a thöthi ka hape: “Ase jë hi së kuca la ngazo, nge angazone ju hi la hni së, nge easë pë hë a lapa fë ifekë itrein. Ngacama traqa ha koi 19 lao macatre enehila, ngo lapa mekune mina jë hi ni e itre xa ijine la ewekë cili.” Hnene la ketre trejine föe ka hnaho gojeny hna qaja ka hape: “Ame la eni a mekune laka, kola akötrëne la itre atr hnenge hna hnim hnene la aqane ujëng, hetre ethane catre kowe la mekunang, me meleng ngöne la götrane la ua, me ngöne mina fe la itre aliene hning. Ka hace catr e troa mele me atre  laka tha hna kepe së kö hnei Iehova.” Tha aja i Satana kö tro epuni a mekune la itre ethanyine la ngazo.

9. (a) Nemene itre hnyinge la ka troa xatua së troa wai pengöne la aqane goeëne së la itre wathebo me itre trepene meköt i Iehova? (b) Pine nemene matre nyipi ewekë catre troa atre Akötresieti hnyawa?

⁹ Ekölö hi ni pe la mele ne lo itre thöthi me itre xa ka tru hi, laka ngacama bëeke hmaca ha angatre kowe la nyipici, ngo angatre pë hë a xeni pune la qa i angatre hna thele ge! (Gal. 6:7, 8) Qa ngöne lai, ka loi e tro pe sa isa hnyingëne ka hape: ‘Wange atrehmekune hnyawa kö ni la sipu aliene la itre aqane nyinyithiina i Satana, laka kolo itre ihnö lo lai hna mecin? ’ ‘Hnenge kö hna xomi Iehova ceitu me sipu enehmung, atre qaja pala hi la nyipici me atre ajane la nyine loi koi ni?’ ‘Hapeu, xeci hnyawa kö e kuhu hninge laka, tha tro pi kö Nyidrëti a cipa ni la ewekë ka nyipi loi nge ka ithue madrineng?’ (E jë la Isaia 48:17, 18.) Nyipi ewekë troa atrehmekua Iehova hnyawa matre ijije jë troa hane qaja ka hape, eje hi. Tro nyipunieti a thele troa atrepengöi Nyidrëti hnyawa me wange atrehmekune laka, tha nyine tro kö a xom acone la mele i nyipunie la itre wathebo me trepene meköti ne la Tusi Hmitrötr, ngo ihnimi Nyidrëti hi lai koi nyipunie.—Sal. 25:14.

THITHI JË MATRE HETRENYI LA HNI KA INAMACANE ME IDRENGETHENGE

10. Pine nemene matre nyipi ewekë tro sa nyitipu Solomona joxu?

¹⁰ Nekönatre petre kö Solomona ekö nge cememine la hni ka ipië, hnei nyidrëti hna thithi me hape: “Nekönate ka co hi ni ; tha ’te kö ni la aqane löpi me löjë.” Ame hnei nyidrëti hna thithi matre hetrenyi thei nyidrëti la hni ka inamacane me idrengethenge. (1 Ite jo. 3:7-9, 12) Hnei Iehova hna kapa la hna sipone hnei Solomona cememine la hni ka nyipici, nge tro fe hi Nyidrëti lai a kuca tune koi nyipunie, ceitune hi la ka co me ka tru. Ame pe, tha tro kö Iehova a hamëne xanëne koi së la inamacane me trotrohnin. Ngo tro nyipunieti a kapa la inamacane e hnei nyipunieti hna catre inine la Wesi Ula i Nyidrë, me thithi troa sipone la uati hmitrötr, me huliwane la itre ewekë ne la ua lo hnei Nyidrëti hna hamë nyipunieti jëne la ekalesia i Keresiano. (Iako. 1:5) Celë hi itre hna amekötine hnei Iehova, matre jëne la itre ewekë cili, kola ainamacanëne la itre thöthi ka nyihlue i Nyidrë, matre sisitria angatre hune lo itre hna hape, “ite ka inamacan, me ite macamek” ne la fene celë.—Luka 10:21; e jë la Salamo 119:98-100.

11-13. (a) Nemene la itre ini ka nyipi ewekë hne së hna xom qa ngöne Salamo 26:4, me Ite Edomë 13:20, me 1 Korinito 15:33? (b) Nemene la aqane tro nyipunieti a trongëne la itre trepene meköti celë?

¹¹ Tro sa atre Iehova hnyawa e tro sa inine la Tusi Hmitrötr me sine thele la itre mekune hne së hna e qa ngön. Tro la itre xa xötr ne la Tusi Hmitrötr a amamane koi së la enyipiewekëne lai, nge ca trepene meköti ngöne la itre xötr cili ka xatua së troa iëne hnyawa la itre sinatro. Tro sa pane ce wang: “Tha hnenge kö hna ce lapa me itete thoi, nge tha tro kö ni a ce tro me angete iaö.” (Sal. 26:4) “Ame la ate ce tro me ite ka inamacan, te, troa inamacan ; ngo troa hete ngazo la ate sine la ite hmo.” (Ite edomë 13:20) “The iaö nyipunieti kö ; ithanata ka ngazo la ate angazone la thina ka loi.”—1 Kor. 15:33.

¹² Nemene la itre ini ka nyipi ewekë hne së hna xom qa ngöne la itre xötre celë? (1) Aja i Iehova tro sa iëne hnyawa la itre sinatronge së. Aja i Nyidrë troa thupëne la itre mekuna së memine la mele së ngöne la ua. (2) Canga tro hi a huli së kowe la loi maine ngazo hnene la itre sinatronge së. Pengöne kö la mele lai. Kola amamane hnene la itre trenge ewekë i Iehova hnine la itre xötr hne së hë hna ce wang, la aja i Nyidrë troa ketr la itre hni së. Nemene la aqane amamane i Nyidrë? Ngacama tha kolo kö a musinë së hnene la itre xötr cili, tune la kola qaja ka hape, “the tro kö eö a . . . ,” ngo ame pe, itre trenge nyipici hi lai. Kösë lo Iehova hi lai a qaja koi së ka hape: ‘Hanawange la itre trenge nyipici. Nemene la mekuna i eö? Nge tune kaa fe la hni eö?’

¹³ Eje e hnine lo köni xötr hne së hna ce wang la itre nyipici tha nyine tro kö a isenyin; nge itre nyipici lai ka nyipi ewekë pala hi ngöne la nöjei ijin, nge nyimu aqane troa trongën. Troa mama hnyawa la mekune cili jëne la itre hnyinge celë: Tro ni a ananyine tune kaa la “angete iaö”? Itre ijine ka ue la tro ni a itronyi memine la itre atr cili? (Ite edomë 3:32; 6:12) Drei la “ite ka inamacan” hnei Iehova hna ajane tro sa nyi sinatrongen? Drei “la ite hmo” aja i Nyidrë tro sa ananyin? (Sal. 111:10; 112:1; Ite edomë 1:7) Nemene la itre “thina ka loi” ka troa patre theng, e tro ni a thele sinatro ka ngazo? Hapeu, ame la itre sinatro ka ngazo tre, itre eje hmekuje hi e cahu trön? (2 Pet. 2:1-3) Tro jë nyipunieti a sa tune kaa la itre hnyinge celë?

14. Nemene la nyine tro nyipunieti a kuca matre tru hnei ewekë ka thue madrine i nyipunieti ngöne la ijine la Hmi Ne Hnepe Lapa i nyipunie?

¹⁴ Tune lo aqane thele mekune së jëne la Tusi Hmitrötr,  haawe ce wange jë pena së la itre xa xötr ka amamane hnyawa la mekuna i Akötresie, thatraqai nyipunieti memine fe la hnepe lapa i nyipunie. b Itre keme me thin, wai ijine jë troa ithanatane la itre tane mekune celë ngöne lo heji ne la kola Hmi Ne La Hnepe Lapa. Ame hë la nyipunieti a ithanatane la itre tane mekun, lapa mekune ju la qa i nyipunie, ene la troa xatuane la isa atrene la hnepe lapa troa öhnyi eloine hnyawa la ejuine la ihnim i Akötresie koi së, nge ka mama jëne la itre wathebo me itre trepene meköt i Nyidrë. (Sal. 119:72) Eje hi laka, tro la aqane ini tusi celë a ieakeune la itre atrene asë ne la hnepe lapa, me e angatre fe koi Iehova.

15. Nemene la ka troa amamane ka hape, hetrenyi hë thei nyipunieti la hni ka inamacane me idrengethenge?

¹⁵ Nemene la ka amamane ka hape, hetrenyi hë thei nyipunieti la hni ka inamacane me idrengethenge? Tro hi a mama lai, e ka ceitu la aqane wai mekune i nyipunieti memine la itre atr ka mele nyipici ekö tui Davita Joxu, atre cinyihane ka hape: “Akötesingöti fe, madine ni troa kuca la aja i cilie, nge e kuhu hninge la wathebo i cilie.” (Sal. 40:8) Ka ceitune mina fe memine la atre cinyihane la Salamo 119, ka qaja ka hape: “Atraqate la ajange kowe la wathebo i cilie, ini a mekune kow’ ej’ o drai.” (Sal. 119:97) Thatreine kö tro la aja hna qaja ngöne la lue xötre celë a cia ngöne la ga tëtë. Ngo tro pe eje lai a kökötr qa ngöne la ejuine la itre hne së hna inin, me hna thithi me hna sine thele la itre mekun, memine fe la hne së hna melëne lo itre manathithi qa ngöne la hne së hna trongëne la itre trepene meköt i Akötresie.—Sal. 34:8.

ISINE JË TROA THAPA LA INUEGUFA NE LA KERESIANO!

16. Nemene la mekune ka troa eje the së e pi tro sa hune ngöne la isi së göi troa thapa la nyipi inuegufa?

¹⁶ Kola mama ngöne la aqane trongene la mele ne la atr ka hape, hnene pala hi la itre nöje hna tro fë isi matre troa thele me thapa la inuegufa. Ketre tu së mina fe, loi e tro sa hane isi ngöne la götrane la ua matre thapa pi fe së la inuegufa ne la Keresiano! Tha tro pi kö sa mekune ka hape, Satana hmekuje hi memine la fene celë, me ua ne fene la itre ithupëjia me easë. Easë mina fe a isi memine la itre sipu aja së ka ngazo, memine la hni së ka iaö. (Iere. 17:9; Efe. 2:3) Ngo ame pe, jëne la ixatua qaathei Iehova, ijije hi tro sa ngaane la itre ithupëjia me easë cili. Ketre, maine tro sa atreine cile kowe la itre itupath, ka co ju hë maine ka tru, tro hë së lai a kepe thangane ka loi qa ngön. Ame la hnapan, tro sa amadrinëne la hni Iehova. (Ite edomë 27:11) Nge ame la hnaaluen, tre tro sa melëne la emenene la inuegufa qaathene “la wathebo ka meköti me gufa,” nge eje hi lai ka troa upi së troa xötrëne la ‘gojenyi ka ilit’, nge ka troa tro xomi së kowe la mele ka tha ase palua kö. Nge elanyi hë, tro sa hane kapa madrine la inuegufa hna hnëkëne thatraqane la itre ka mele nyipici koi Iehova.—Iako. 1:25; Mat. 7:13, 14.

17. Pine nemene matre tha tro kö a nue la pengö së, ene la atr ka tha pexej, troa akucakucane la hni së, nge nemene la ixatua tro Iehova a hamëne koi së?

¹⁷ Eje hi laka, e itre xa ijin, tro fe hi së a hane tria. (Ate cai. 7:20) E traqa ju, thupëne kö la hni nyipunieti ke kucakuca menu jë nge mekune jë ka hape, luzi hë nyipunie. Nge e hnai nyipunieti ju, cile hmaca jë nge tro jë, nge sipo ixatua jë thene la itre qatre thup. Tune la hna qaja hnei Iakobo: “Ame la thithi lapaun, te, tro ha amelene la wezipo, nge tro Joxu a acilë angeice jë ; nge maine hnei angeice hna kuca la nöjei ngazo, tro ha shenge tije pi.” (Iako. 5:15) Eje hi, the thëthëhmine kö laka, ka nyipi ihnimi Akötresie nge hnei Nyidrëti lo hna e nyipunieti kowe la ekalesia, ke tha sihngödri kö koi Nyidrëti la atreine ka eje thei nyipunie. (E jë la Salamo 103:8, 9.) E tro pala hi a pexeje la hni nyipunieti koi Iehova, haawe tha tro jë pi kö Nyidrëti a triji nyipunie.—1 A. l. ite jo. 28:9.

18. Tro sa mele thenge tune kaa la hna thithi fë hnei Iesu, ngöne Ioane 17:15?

¹⁸ Ame lo jidri tixenuë i nyidrë memine lo ala 11 lao aposetolo, hnei Iesu hna qaja la trenge ithanata ka lolo celë nyine thithi sai angatr me hape: Epi “tro cilieti a thupë angate ene la ngazo.” (Ioane 17:15) Tha thatraqai itre aposetolo hmekuj, ngo kowe fe la nöjei atr ka troa xötrethenge nyidrë. Eje hi laka tha tro kö Iehova lai a drei simine la sipo i Iesu; tro fe Nyidrëti a thupë së ngöne la itre hneijine akötre enehila. “Nyidëti la pete i angete tro nge pë ethan . . . me thupëne la gojene la ite ka hmitöt.” (Ite edomë 2:7, 8) Nyipici, maine tru la itre itupath ngöne la gojenyi ne la mele ka pë ethan, ngo ame pe celë hmekuje hi sipu gojenyi lai ka troa tro xomi së kowe la mele ka tha ase palua kö me kowe la nyipi inuegufa. (Rom. 8:21) Epi the tro kö sa nue la ketre ewekë troa ajeanyi së qa ngöne la gojenyi cili!

[Ithueamacany]

[Thying]