Amamane Jë Ka Hape, Nyipunie La Itre Jini Ne La Baselaia!

“Loi e troa ijije la thina i nyipunie [tune la thiina ne la jin].”—FIL. 1:27.

TRO NYIPUNIETI A SA TUNE KAA?

Drei la ka ijije troa jini ne la Baselaia?

Nemene la aliene la kola hape, troa inine la qene hlapa, me pengöne me itre wathebo ne la Baselaia?

Nemene la aqane tro la itre jini ne la Baselaia a amamane ka hape, angatr a hnine la itre wathebo i Akötresie?

1, 2. Pine nemene matre ame la troa “ijije la thina [tune la thiina ne la jin],” tre ketre hnaithanata lai hnene la itre Keresiano ne Filipi hna atrepengöne hnyawa?

 HNEI Paulo aposetolo hna ithuecatrene la ekalesia ne Filipi me hape “troa ijije la thina i nyipunie memine la maca ka loi.” (E jë la Filipi 1:27.) Ame la aliene la hnaithanata hna hape “troa ijije la thina” ngöne la xötre celë tre, kola hape troa ujë tune la jin, maine troa tune la thiina ne la jin. Atre hnyawa hi la itre atrene la ekalesia ne Filipi la aliene la hnaithanata celë. Pine nemen? Pine laka hnene la mus i Roma hna aijijëne la angetre Filipi ekö troa hane nyi jini angatr; kepine hi lai matre angatre fe hë a mele fene la wathebo i angetre Roma. Angetre Filipi a wesiwesine laka, itre jini angetre Roma fe angatr, ke tru la nöjei pengöne loi hnei angatre hna kapa qa ngön, ngo tha hna hetrenyi kö hnene la itre xa nöje ngöne la ijine cili.

² Hetre nyine troa wesiwesi fë catrëne kö hnene la itre Keresiano ne Filipi. Ene la hna amexeje hnei Paulo kowe la itre Keresiano hna iëne cili, kola hape: “Ke ej’ e hnengödrai la nyipi nöje shë.” (Fil. 3:20) Itre jini ne angatre la Baselaia i Akötresie, ka sisitria catre kö lai hune la nöjei pengöne baselaia hna cilëne hnei atr. Hnene la Baselaia i Akötresie hna thupë angatre me amanathithi angatr; pëkö ca mus i atr ka atreine hamëne la itre ewekë cili.—Efe. 2:19-22.

3. (a) Drei la ka ijije troa jini ne la Baselaia? (b) Ije ewekë nyine tro sa waipengöne jëne la tane mekune celë?

³ Ame la edromë i Paulo troa “ijije la thina [tune la thiina ne la jini ne la baselaia],” tre hna pane nue mekötine kowe la ange ka troa ce musi me Keriso e hnengödrai. (Fil. 3:20) Ngo tro fe hi a hane xötrethenge lai hnene la ange ka troa mele pe e celë fen, fene la musi ne la Baselaia i Akötresie. Pine nemen? Pine laka easë asë hi a nyihluene la Joxu ka cas, ene Iehova, nge ame la itre hna amekötine hnei Nyidrë, ke thatraqane asë hi la itre hlue i Nyidrë. (Efe. 4:4-6) Ame enehila kola isine hnene la itre atr troa nyi jini ne la ketre nöje trenamo. Ngo hetre ka sisitria  catre pala kö hune lai. Maine pi tro sa atre hnyawa la mekune cili, tre loi e tro sa isa wange la isa pengönen la troa nyi jini ne la ketre baselaia i atr, memine la troa nyi jini ne la Baselaia i Akötresie. Haawe, pane ce wange jë së la köni ewekë nyine tro sa kuca e pi tro fe sa hane nyi jini ne la Baselaia.

ITRE HNA AMEKÖTINE KOI ITRE JIN

4. Nemene la pengöne lai aqane ewekë ka wië? Troa mama tune kaa la angetre ithanatane la aqane ewekë ka wië?

⁴ Troa inine la qene hlapa. Hna amekötine hnene la musi koi angetre ajane troa nyi jini ne la nöj, tro angatr a pane inine la qene hlapa ne la nöj. Ka tru huliwane catre la troa inine troa ithanatane hnyawa la qene hlapa ka hnyipixe; ke ngacama tro hi a canga kepe itre atr troa jini ne la nöje cili, ngo itre macatre ne tro pala kö angatr a inine troa ithanatane lai qene hlapa. Maine canga tro hi angatr a trotrohnine la aqane troa eköthe la itre trenge ithanata, ngo ame pë hë göi troa atreine ithanatane hnyawa, ma itre hnepe macatre ne tro pala kö a nango huliwan. Hnene fe la Baselaia i Akötresieti hna amekötine kowe la itre jin troa inine la qene hlapa ka hnyipixe. Hnei Tusi Hmitrötre hna hëne la qene hlapa cili ka hape “aqane ewekë ka wië.” (E jë la Zefania 3:9.) Nemene qene hlapa jë lai? Kolo nyipici hna inine hnene la Tusi Hmitrötre göi Akötresie, me itre aqane ameköti ewekë i Nyidrë. Mama pi hi la angetre ithanatane la aqane ewekë ka wië, qa ngöne laka angatr a trongëne la itre trenge wathebo me trepene meköt i Akötresie. Tha ka jole kö kowe la itre jini ne la Baselaia i Akötresie troa canga trotrohnine la itre pane ini hna nyi trepene hnene la Tusi Hmitrötr me hane xome la bapataiso. Ngo, e ase hë xomi bapataiso, tro pala kö a tru la huliwa nyine kuca, göi troa ithanatane hnyawa la aqane ewekë ka wië. Tro sa kuca tune kaa? Tro sa isa catre troa trongëne ngöne la mele së la itre ini hne së hna kapa qa hnine la Tusi Hmitrötr.

5. Pine nemene matre ka loi e tro sa inine hnyawa la pengöne la nöje i Iehova ngöne la hneijine së?

⁵ Troa inine la pengöne la nöj. Tro la atre ajane troa nyi jini ne la ketre nöje a inine la pengöne la musi ne lai nöj. Haawe, e pi tro sa nyi jini ne la Baselaia i Akötresie, inine jë troa atrepengön eje hnyawa. Tune ju lo itre nekö i Kora ekö e Isaraela. Hni angatr e Ierusalema nge ka tru koi angatre la hnë hmi, nge aja i angatre troa qaja la pengöne la götrane cili, tha hnene kö laka ka mingöminge la traon, ngo hnene laka celë hi “lapa ne la Joxu atraqat,” Iehova. Ame la hnë hmi e Ierusalema, tre celë hi hnë tro la itre atr a inine la wathebo i Iehova me hmi koi nyidrë. Ame la angetre lapa fene la musi Iehova Joxu ne Ierusalema, tre ange hna kapa me hnime hnei Nyidrë. (E jë la Salamo 48:1, 2, 9, 12, 13.) Ame fe ngöne la hneijine së, hetre lapa hna ce huliwa memin hnei Akötresieti ngöne la fene hnengödrai. Tune la itre nekö i Kora, pi tro fe sa inine me qaja kowe la itre xane la pengöne la nöje i Akötresie. E tro sa thele catrëne troa atrepengöne hnyawa la lapa i Iehova memine la aqane xatuane ej hnei Nyidrë, haawe tro lai a ketre mama hnyawa koi së la pengöne la Baselaia i Akötresie. Aqane tro hi lai a akökötrene catrëne la trenge aja së troa cainöjëne la maca ka loi.—Iere. 9:24; Luka 4:43.

6. Pine nemene matre meköti koi Iehova troa upi së troa inine me trongëne la itre wathebo me trepene meköt i Nyidrë?

 ⁶ Troa atre la itre wathebo. Hna amekötine kowe la itre jin hnene la musi troa inine me trongëne la itre wathebo ne la nöj. Haawe, ame fe kowe la itre jini ne la Baselaia, tre tro angatre a inine me trongëne la itre wathebo me itre trepene meköt i Iehova. (Is. 2:3; Ioane 15:10; 1 Ioane 5:3) Maine patre kö la pexeje me meköti e itre xa ijine ngöne la itre wathebo i atr, ngo “pexeje la wathebo i Iehova.” (Sal. 19:7) Ka ajane pala hi nyipunie troa e o drai la Tusi Hmitrötre me inine la itre wathebo me itre trepene meköt i Akötresie? (Sal. 1:1, 2) Isa qanyi së kö isa ala cas troa inine la itre wathebo i Akötresie. Tha qâ i ketre kö troa kuca la hnëqa së.

KA TRU KOWE LA ITRE JINI NE LA BASELAIA LA ITRE WATHEBO I AKÖTRESIE

7. Nemene la kepine matre xötrethenge jë itre jini ne la Baselaia la itre wathebo i Akötresie?

⁷ Ame angetre ajane troa nyi jinin palua ne la Baselaia i Akötresie, tre ange mele thenge jë la itre wathebo i Akötresie, nge epi tro pala kö itre ej a sisitria ngöne la itre hni nyipunie. Önine la itre jini ka mele fene la itre musi atr ka hape, ka loi fe hi koi angatre la itre wathebo hna acile hnene la musi ne la nöje i angatr. Ngo ame la engazon, tre e hetre wathebo hë ka nango hace koi angatre troa trongën, e pëkö ka goeë angatr, lapa ju hi angatr a ena. Angatre hi a trongëne göi tro hi a nyi waina i atr. (Kol. 3:22) Ngo ame thene la itre jini ne la Baselaia, hetre sipu kepine kö matre easa trongëne la itre wathebo i Akötresie. Easa hni Iehova. Celë hi kepine matre madrine së troa trongëne la itre wathebo i Nyidrë, ngacama pë ju hë atr ka goeë së.—Is. 33:22; e jë la Luka 10:27.

8, 9. Nemene la ka troa amamane ngöne la mele i nyipunie laka, ka hnine hnyawa fe nyipunie la itre wathebo i Akötresie?

⁸ Nemene la ka troa amamane ngöne la mele së laka, ka hnine hnyawa fe së la itre wathebo i Akötresie? Aqane ujë së. Haawe, maine hetre ka pane haji nyipunie, nemene ju hë la aqane ujë i nyipunie? Qaja jë hi hnei ketre la aqane heetre i nyipunie, kolo ewekë lai laka, qanyi nyipunieti kö sipu amekötin. Qëmekene tro nyipunieti a lö kowe la nyipici, maine jë tha nyipi ewekë kö koi nyipunie la aqane heetr, maine pena aqane heetre i nyipunie a acia mekune ka ngazo. Kökötre trootro ju pë hë la ihnim i nyipunieti koi Akötresie, nge trotrohnine hë nyipunieti laka, troa heetr göi troa atrunyi Nyidrë. (1 Tim. 2:9, 10; 1 Pet. 3:3, 4) Haawe, ma madrine hë nyipunie, ke ame koi nyipunie, lolo hë la aqane heetr. Ngazo pe, traqa ju hi la ketre qatre thup a nyi trenge ewekë ne la itre xa atrene la ekalesia me hape, tha nyipi loi kö la aqane heetre i nyipunie; tro ju hë nyipunieti lai a ujë tune kaa? Tro jë kö nyipunieti a qeje kepin, maine tro pena wesitr, maine dreisimine pena? Ame la wathebo ka nyipi ewekë catre nyine troa xötrethenge hnene la itre jini ne la Baselaia, tre ene la tulu i Keriso. (1 Pet. 2:21) Öni Paulo “ke ame Keriso, te, tha hna amadi nyidëti kö,” celë hi matre tro fe së isa ala cas a “amadinëne la ate easheny, mate loi angeic, me keukawa.” (Rom. 15:2, 3) Tro la tingetinge a jilapa hnine la ekalesia e tro la itre keresiano ka macaj a neëne wanga athixötrëne pi la mekuthetheu ne la itre xan.—Rom. 14:19-21.

⁹ Tro fe sa pane ce wange la pengöne la ce meköle trefëne me faipoipo. Kola mekune hnene la itre atr ka tha jini ne kö la Baselaia i Akötresie, ka hape pë kö engazone la troa ce lapa trefëne hnei lue trahmanyi maine lue fö, me pëkö engazone e troa goeëne la nöjei pengöne aqane kuci ngazo ka sisi catr, me nyixetë, maine tro pena a sei hna cil. Ngo hnene hë la itre jini ne la Baselaia hna inine laka, ka hetre thangane la itre huliwa hnei angatre hna kuca, koi angatr me koi itre xane fe. Qëmekene tro angatr a inine la nyipici, ala nyimu la angetre mele ekö hnine la itre ewekë ka sis. Ngo atre hë angatre enehila ka hape, ame la ce meköle trefëne me faipoipo, tre itre ahnahna lai qaathei Akötresie. Itre ka hninë hë angatre la itre wathebo i Iehova nge atre fe hë angatre ka hape, tha ijije kö troa nyi jini ne la Baselaia hnene la itre ka xele ma drenge la itre wathebo i Akötresie göi ce meköle trefëne me faipoipo. (1 Kor. 6:9-11) Trotrohnine fe hë angatre laka, ka ihuli fe la hni angatre kowe la itre ewekë ka ngazo. (Iere. 17:9) Celë hi matre atraqatre la ole i angatre kowe la itre ihaji ka hmekë  angatr, matre tro pala kö angatr a xötrethenge la itre wathebo i Akötresie.

TRU LA OLE NE LA ITRE JINI NE LA BASELAIA KOWE LA ITRE ITHUEMACANY

10, 11. Nemene la itre ithuemacanyi ka sisitria hna hamë së hnene la Baselaia i Akötresie? Nemene fe la mekuna i nyipunie göne la itre ithuemacany celë?

¹⁰ Hnene la itre musi atr hna kuca la itre ithuemacany kowe la itre jini angatr göi xeni me drösinö. Nyipici tha ka ngazo asë kö la itre nyine xeni me itre drösinö. Ngo e hetre ewekë ka tha loi kö, tro la mus a hnekëne la itre ithuemacany nyine hmekëne la itre jin, wanga angazone pi la mele i angatr. Hnëqa ne kö la musi lai troa hamëne la itre ithuemacanyi cili. Hnene fe la Baselaia i Akötresieti hna hane hamë ithuemacanyi kowe la itre jini ne ej. Kola hmekë së wanga huli së pi hnene la itre xa ewekë troa ena la itre wathebo i Akötresie me iangazonekeune la imelekeu së me Nyidrë. Hanawange la ketre ceitun, tru hnei atr ka xomi Ëternet nyine jëne maca, me hamë ini, me kuci itre elo. Organizasio i Akötresieti fe a huliwane la Ëternet nyine kuca la nöjei ewekë ka loi. Ngo tru catre hnei site ka ajojezine la itre ka ajane troa kuca la itre ewekë ka meköt. Ame la itre sit Ëternet ka amamane la itre aqane kuci ngazo ka sis, tre ka iakeinyi catr. Qaane eue hë la kola thuemacanyi së hnene la hlue ka nyipici göne la itre site cili, itre macatre hë enehila! Haawe, eloine hi laka, hne së pala hi hna kapa la itre ithuemacany!

¹¹ Eue hi lo, ca pengöne sit hna pi wange hnene la itre atr. Hnë porotrik me ithewe mekunekeu. Maine hetre eloin, ngo tru catre kö hnei engazon. Haawe nyipi ewekë tro sa hmeke catre e tro sa huliwane itre ej. Ame e cili, kolo hi lo hne së lai hna ixelë memine lo itre atr tha nyine tro kö a majemi kow. (1 Kor. 15:33) Celë hi matre hamë së pi hnene la hlue ka nyipici la itre ithuemacanyi nyine xatua së troa waipengöne hnyawa la itre site cili. Hnei nyipunie fe kö hna hane e asë lo itre tane mekune, qaathene la hlue ka nyipici ka qejepengöne la aqane troa huliwane la itre site hnë poritrik me ithewe mekunekeu? Canga tro hi lai a akeinyi së e hne së hna canga sesë troa huliwane la itre site cili, nge tha hna pane e kö la itre ithuemacany qaathene la hlue ka nyipici. a Ka ceitu hi lai memine la ka iji la ketre drösinö ka catrehnin hna amë hnine butei, iji jë hi ngo tha pane e pe la itre hna cinyanyin ngöne lo ipepane nyine ithuemacany.

12. Pine nemene matre hmo lai atre ka wange sixane la itre ithuemacany?

¹² Ame la ange ka lapa thatre la itre ithuemacanyi qaathene la hlue ka nyipici, tre tro angatr a sipu angazo angatre kö me itre hnei angatre hna hnim. Thatreine hë itre xane nuetrije la troa goeëne la nöjei aqane kuci ngazo ka sis, nge hnei itre xan hna kuci ngazo, nge angatr a mekune ka hape, tha öhne kö Iehova la itre huliwa ka ngazo hnei angatre hna kuca. Hmo lai atr ka mekune ka hape, ijije troa kuca juetrëne la ketre ewekë koi Iehova! (Ite edomë 15:3; e jë la Heberu 4:13.) Ame la atr ka wange sixane la itre wathebo i Akötresie, tha tro kö Iehova lai a kepe angatre troa nyi jini ne la Baselaia i Nyidrë; tune hi la itre musi lai hna cilëne hnei atr, tha pi tro kö angatr a nyi jini angatre la itre ka eni wathebo. b (1 Kor. 5:11-13) Ngo Akötresieti ka utipine Iehova, celë hi matre upe pi Nyidrëti la itre qatre thup troa amejëne hmaca la itre atr ka kei kowe la ngazo. (Gal. 6:1) E ietra ha la atr me bëeke qa ngöne la ngazo, enehmu i Iehova hmaca ha angeic, me jini ne la Baselaia. (2 Kor. 2:5-8) Haine jë fe ka hape, easë fe a hane nyihluene la Joxu ka tru ihnimin!

 ITRE KA WANGE ATRUNE LA INI LA ITRE JINI NE LA BASELAIA

13. Nemene la aqane amamane hnene la itre jini ne la Baselaia ka hape, ka tru koi angatre la ini?

¹³ Tru la itre mus hna acile ka catre thele jëne troa inine la itre jin i angatr. Hnei angatre hna xupe la itre uma, matre hnë tro la itre atr a kapa la ini. Hna öhnyi eloine la itre uma ne ini cili hnene la itre jini ne la Baselaia, ke e cili la hnei angatre hna inine e tus me cinyany, me inine troa atreine hnyawa huliwa. Angatr a kuca la hnei angatre hna atrein, matre tro angatr a kepe thangane ka loi qa ngöne la hna ini cili. Ngo sisitria catre pala kö la itre ini hnei Iehova hna hamë angatre jëne la organizasio i Nyidrë. Hnene eje hna ithuecatre koi së troa e tus. Nge kolo fe a thuecatrene la itre keme me thin troa e tus kowe la itre nekönatr. Ame ngöne la nöjei treu, hna upe koi së hnene la hlue ka nyipici la lue La Tour de Garde me Réveillez-vous ! Nyimutre la itre götran ka tiqa hnei ithuemacanyi hna xome qa hnine la Tusi Hmitrötr. Maine tro sa e la itre hnepe götrane ngöne la drai, ijije hi tro sa afenesine ngöne la treu. Tro hë së lai a kepe thangane ka loi qa ngöne la ini hna hamë së hnei Iehova.

14. (a) Nemene la itre pengöne ini hne së hna kapa? (b) Nemene lo itre mekune hna hamëne göi aqane troa tro fë la Hmi Ne La Hnepe Lapa hnei nyipunieti hna xötrethenge hë?

¹⁴ Ngöne la nöjei wiik, itre jini ne la Baselaia a kapa la itre ini jëne la itre icasikeu ne la ekalesia i angatr. Ase hë sasaithe enehila la 60 lao macatre, nge hnene la Ini Ne Cainöj Qaathei Akötresie hna xatuane la itre hna inin ka saen, troa tro fë hnyawa la Wesi Ula i Akötresie. Hane fe kö nyipunieti saene kowe la ini cili? Ketre mina, hlue ka nyipici mina fe a amekunë së la enyipiewekëne koi së troa kuca pala hi la Hmi Ne La Hnepe Lapa e nöjei wiik. Tro la ini cili a acasine catrëne la itre atrene la hnepe lapa. Nyipunieti pala kö a xötrethenge lo itre mekune hna hamëne hë hnine lo itre sine tus göi aqane troa tro fë la Hmi Ne La Hnepe Lapa? c

15. Nemene la hnëqa së ka tru nge nyine wange atrun?

¹⁵ Tru catre hnei jini ne la itre musi ne fen ka thele sine xöle göi troa ce kuci politik. Celë hi matre itre xan a xötrë hnalapa trootro. Hnene fe la itre jini ne la Baselaia ngöne la fene hnengödrai asë hna ce xöle memine la Baselaia i Akötresie, ke angatr a cainöje kowe la nöjei atr ngöne la itre xötre göjeny me ngöne la ketre uma matre ketre uma. Ame la ketre enyipicin, tre ene la huliwa ne la La Tour de Garde, ka tro fë la maca ne la Baselaia i Akötresie. Nge tune lo hna amexeje ngöne la hnaaluene götrane la La Tour de Garde, celë hi zonale la ka tru hna thawa trongëne ngöne la fen! Ketre hnëqa ka tru nge nyine wange atrune la troa qaja koi itre xane la Baselaia i Akötresie. Nyipunieti fe kö a hane catre cainöjëne la maca ka loi ne la Baselaia?—Mat. 28:19, 20.

16. Tro nyipunieti a amamane tune kaa ka hape, itre nyipi jinine fe nyipunie ne la Baselaia i Akötresie?

¹⁶ Easenyi hë matre Baselaia i Akötresieti hmekuje pe hi la ka troa musi kowe la fen. Wathebo ne la Baselaia hmekuje pe hi la wathebo ka troa amekötine la itre atr. Tro fe kö nyipunie ngöne la ijine cili a nyi jinin ka loi ne la Baselaia i Akötresie? Enehila hi la ijine tro nyipunieti a amaman. Ame ngöne la nöjei ewekë hnei nyipunie hna axeciëne o drai, kuca jë nyine atrunyi Iehova nge amamane jë ka hape, itre nyipi jinin nyipunie ne la Baselaia i Akötresie.—1 Kor. 10:31.

[Ithueamacany]

[Thying]

[Hna cinyhan ne la götran 4]

Nyipunieti kö a nyipi ewekëne la itre ithuemacanyi hna hamëne hnei hlue ka nyipici, göi Ëternet?

[Iatr ne la götran 2]

Ka hnine kö nyipunieti la hmi ka wië memine la pengöne ej, tune la itre nekö i Kora ekö?

[Iatr ne la götran 5]

Troa xatua nyipunie me hnepe lapa i nyipunie hnene la Hmi Ne La Hnepe Lapa, troa nyi nyipi jini ne la Baselaia