Hmekëne Kö La Itre Hnö i Diabolo!
Hmekëne Kö La Itre Hnö i Diabolo!
“Utete qa ngöne la hnö i diabolo.”—2 TIM. 2:26.
NEMENE LA AQANE TRO NYIPUNIETI A SA?
Maine ka ixöjetriji pala hi epuni, nemene la nyine tro epuni a kuca?
Nemene la itre ini hne së hna xome qaa ngöne la tulu i Pilato me Peteru matre tha tro kö sa kei thenge la iajojezi me xoue atr?
Tro epuni a neëne tune kaa la hnö celë, ene la troa jele ngazo epuni menu pala ha hnene la hni epun?
1, 2. Nemene la itre hnö i Satana hne së hna troa ce ithanatan?
SATANA a thele matre troa jötre la itre hlue i Iehova hnine la itre hnö i angeic. Ngo, tha ceitu i angeice kö memine la atr ka thele tha. Ame la sipu aja i Satana, tre, ene la troa athixötrëne la itre atr matre tro angatr a kuca la aja i angeic.—E jë la 2 Timoteo 2:24-26.
2 Ame la ka thele tha, angeic a xome la nöjei aqane troa trathethine la itre öni. Ame itre xa ijin, angeice a nyiqane manithe la itre hnitr matre kötre pi la itre öni qa ngöne la itre hnei angatr hna zae ngön, nge tha jole pë hë koi angeice troa xölehuji nyudren. Maine tro angeic a kuië enone la itre öni. Maine pena, tro angeice a ati thethi ka tha mama kö. Ame ju hi la kola ketr la hnö, kolo hi a trotro trane ju lai öni. Satana fe a xome la itre hnö matre troa trathethine la itre hlue i Akötresie. Maine tha ajane kö së tro sa jötre hnine la itre hnö i angeic, nyipi ewekë tro sa hmek, me atrehmekune la itre hatrene ka troa amamane hnyawa koi së la itre hnö i Satana. Ame ngöne la hna cinyihane celë, tro sa ce ithanatane la aqane tro sa neëne la köni hnö hna xome hnei Satana, matre tha tro kö a jötr e hnin la itre hlue i Akötresie. Ame la itre hnö cili, tre (1) itre trenge ewekë ka menu, (2) xoue atr me iajojezi me (3) hni së ka jele ngazo së menu pala ha. Tro la hna cinyihane ka troa xulu a ithanatane la lue xa hnö i Satana.
APINE JU LA EË, ENE LA ITRE TRENGE EWEKË KA MENU
3, 4. Nemene la ewekë ka troa traqa e tha xomehnöthe kö së la aqane ewekë së? Hamëne jë la ketre ceitun.
3 Ame itre xa ijin, kola manith la hnënge hnitr hnene la ka thele tha matre tro la itre öni a kötre qa ngön. Haawe, ame e cili kolo pe hi a xolouthi nyudren hnene lai ka thele tha. Ketre tune mina fe ame e hnine la ekalesia, kösë Satana a thele troa amelei eë matre tro la itre trejine trahmanyi me föe a kötre trije la ekalesia, lo hnë mele xetietë i angatr. Ame e cili, thatre una ju hi angatr, nge jötre hë hnine la hnö i Satana. Tro sa kei tune kaa hnine la hnö cili?
4 Hnei Iakobo ketre atre dreng, hna qaja ka hape kösë eë la thinem. (E jë la Iakobo 3:6-8.) Maine tha xomehnöthe kö së la thineme së, ene la aqane ewekë së, kösë easë hi lai a amelei eë e hnine la ekalesia. Tro lai a traqa tune kaa? Pane mekune jë la ewekë celë ka traqa: Ame ngöne la ketre icasikeu ne la ekalesia, kola ithuemacanyi kowe la ekalesia ka hape, hna xome la huliwa ne pionie lapa hnene la ketre trejine föe. Thupene la icasikeu, kola porotrikëne la ithuemacanyi cili hnene la lue trejin. Kola qaja hnene la ketre, ka hape, ka lolo catre matre nyiqaane xome jë hnene lai trejine föe la huliwa cili, nge epi troa tro loi huliwa i eahlo. Ame pena ketre, öni angeic, ka hape, kola pionie hnene la trejine föe, ke ka pi mama. Matre, drei e nyidro la hnei epuni hna ajane troa ce sinee memin? Canga mama hi koi së la atr ka aciane la itre gomegome ngöne la ekalesia, hnene la aqane ewekë.
5. Maine easa ajane troa apine la eë, ene la troa ewekë menu, nemene la nyine tro sa kuca?
5 Tro sa apine tune kaa la eë, ene la hna ewekë menu. Öni Iesu ka hape: “Kola ewekë la që qa kuhu hni ka tiqa.” (Mat. 12:34) Celë hi matre ame la pane nyine tro sa kuca, tre, ene la troa waipengöne hnyawa la hni së, maine pena la itre sipu mekune së. Loi e tro sa thipetrije la itre mekune ka troa upi së, troa qaja la itre trenge ithanata ka akötrëne la itre xa atr. Drei la ketre ceitun, ame la easa drenge la aqane catre huliwa ne la ketre trejine trahmanyi ngöne la ekalesia, hapeu, easë kö a mekune ka hape angeice a huliwa catr göi troa amadrinë Iehova? Maine pena, easë a mekune ka hape angeic a catre huliwa, ke hetre ketre aja kö. Maine hne së hna majemine mekune ka hape kola nyihluei Iehova hnene la itre trejine ke hetre ketre hna ajane kö, haawe, tha tro kö sa thëthëhmin, laka, hnei Satana fe ekö hna hane sili ewekë Iobu tune lai. (Iobu 1:9-11) Tha tro kö sa mekuhnine la itre trejine me easë, ngo tro pe sa thele la kepine matre easa wai gele i angatr. Hapeu, hetre sipu kepine kö matre easa wai gele i angatr, maine hna ajojezi së pena hnene la thiina ne la fen ka pë ihnimin, ngöne la itre drai tixenuë celë?—2 Tim. 3:1-4.
6, 7. (a) Nemene la itre kepine matre easa xötrije la itre xan? (b) Tune kaa la aqane tro sa ujë ngöne la kola qaja koi së hnene la itre xan la itre trenge ithanata ka akötr?
6 Pane mekune jë së la itre xa kepine matre easa xöjetrije la itre xan. Maine jë easa kuca la itre ewekë, ke, easa pi mama. Easë fe a ixöjetrij, hnene laka, easa pi amamane ka hape, ka sisitria kö së hune la itre xan. Ketre, maine jë, easa thele kepine la hne së hna tha kuca la ketre huliwa. Nge maine nyimutre pala kö la itre xa kepin matre easa ixöjetrij, tune la pi tru maine izalukeu, maine pë hni ne mejiun, ngo kola mama laka, ka hetre ethan e troa ijelengazo.
7 Maine jë hetre nyipi kepine matre easa xöjetrije la itre xan. Maine jë hna akötrë së hnene la hna qeje së. Maine nyipici laka hna akötrë së, ngo tha loi kö e tro sa itëkeun, wanga ngazo catre jë. Aja i Satana tro sa itëkeun, ngo tha celë fe kö la aja i Akötresieti lai. (2 Tim. 2:26) Tro pe sa nyitipu Iesu. Ame la kola qaqa nyidrë hnei itre atr, “tha hane pena kö qaqa” hnei nyidrë. Ngo “hna nue nyidëti kö kowe la ate hnyingën’ amekötin.” (1 Pet. 2:21-23) Tha sihngödri kö koi Iesu nge eje thei nyidrë la mejiun, laka, hetre aqane tro kö Iehova a amekötine la itre ewekë, nge ketre hetre ijine kö hnei Nyidrëti hna sa thatraqane lai. Nyipi ewekë tro sa mejiune tune lai koi Akötresie. Ame ngöne la easa qaja la trenge ithanata ka menyik nyine ithuecatre koi itre xan, easë hi lai a sajuëne la cas me tingetinge e hnine la ekalesia.—E jë la Efeso 4:1-3.
NEËNE JË LA HNÖ, ENE LA XOUE ATR, ME IAJOJEZI
8, 9. Pine nemene matre amekötine jë Pilato tro Iesu a mec?
8 Ame la öni ka jötre ngöne la ketre hnö, tre, thatreine hë eje kuca la aja ne ej. Maine kola lapa xome la ketre atr hnei xou, me kei thenge la iajojezi, kösë itre xane pë hë la ka musi kowe la mele i angeic. (E jë la Ite Edomë 29:25.) Tro sa ce ithanatane la lue trahmanyi ka kei kowe xoue atr me iajojezi. Easë pë hë a xomi ini jë qa ngön.
9 Atre hnyawa hi Ponetio Pilato, Gavena ne Roma ka hape, ketre atr ka pë ethane Iesu, haawe, tha ajane kö angeice troa akötrë nyidë. Öni Pilato mina fe ka hape “pëko kepine [hnei angeic hna öhne thei Iesu], mate troa mec.” Ngo hnei Pilato kö hna amekötine laka, tro Iesu a mec. Pine nemene matre ujë tune jë angeice lai? Pine laka kei hë angeice thenge la iajojezi ne la nöj. (Luka 23:15, 21-25) Angatr a thele troa uku Pilato troa kuca la hnei angatre hna ajan, angatr a sue me hape: “Maine tro nyipëti a shenge la ate celë, tha sine i Kaisara fe hë nyipë.” (Ioane 19:12) Hnei Pilato hna xouene laka, e nue Keriso jë hnei angeic, tro ha xome qaathei angeic la hnëqa i angeice me humuthi angeice mina fe. Hnei angeice hna kei thenge la iajojezi, me kuca la aja i Satana.
10. Pine nemene matre qaja jë Peteru ka hape thatre Keriso kö hnei angeic?
10 Peteru aposetolo la ketre enehmu i Iesu. Pëkö xou thei angeic, troa qaja koi itre xan ka hape Iesu hi la Mesia. (Mat. 16:16) Ketre tha hnei Peteru kö hna nuetriji Iesu la kola tro triji nyidrë hnei itre xan, ke tha trotrohnine kö angatr la ketre mekune hna qaja hnei Iesu. (Ioane 6:66-69) Nge ame la kola traqa hnene la itre ithupëjia troa othi Iesu, Peteru a xome jë la ketre taua matre troa isi göli nyidrë. (Ioane 18:10, 11) Ngo ame hë e thupen, angeic a kei ngöne la xoue atr, goi qaja fe angeice ka hape thatre Iesu Keriso kö angeic. Kola mama laka, ketre hnepe ijine kolo hi a kei hnei Peteru kowe la hnö, ene la xoue atr; tha catre ju kö angeice troa kuca la ewekë ka meköt, me nyipici koi Iesu.—Mat. 26:74, 75.
11. Nemene la pengöne iajojezi nyine tro sa thupëne catrën?
11 Nyipi ewekë tro la itre Keresiano asë a catre thupën, matre tha tro kö a ajojezi angatr hnene la ka ala nyim, nge kuca jë elanyi la itre ewekë hna methinëne hnei Akötresie. Tro la itre maseta maine itre xane ju kö a thele troa uku së epuni troa huliwa thoi, maine troa kuci ngazo pena. Ame ngöne la hna ini, kola ukune la itre thöth Keresiano hnene la itre sine ce ini angatre troa huliwa qenatrekënö ngöne la itre ijine itupath, maine troa goeëne la itre iatr ka sis, maine ufi sixa, maine kuci dorog, maine iji gorok, maine kuci ngazo pena. Ame la xoue atr me iajojezi, tre, lue hnö hna amë hnei Satana matre troa jötr hne së, ene pe tro hë sa kuca la itre ewekë ka sisi xajawa i Iehova. Haawe, nemene la ka troa xatua së troa neëne lai?
12. Nemene la itre ini hne së hna xome qa ngöne la tulu i Pilato me Peteru?
12 Nemene la itre ini hne së hna xome qa ngöne la tulu i Pilato me Peteru? Ngacama thatre Iesu hnyawa kö hnei Pilato, ngo atre hnyawa hi angeice laka, ka pë ethane Iesu, nge tha ketre atr menu kö. Ame la ejolen, tre, pëkö hni ka ipië thei angeic, nge pëkö ihnimi angeice kowe la Akötresie ka cas. Haawe, tha jole hë koi Satana troa kuca matre tro Pilato a kei thenge la aja i angeic. Ame pena ha Peteru, hetrenyi angeice la nyipi atrehmekune göi Akötresie, nge atraqatre la ihnimi angeice koi Nyidrë. Ngo hna traqa la ketre ijin, sasaithi tulu menu pala ha la aqane catre fë angeice la mekune i angeic, ene pe, hnei angeic hna xoue atr me kei thenge la iajojezi. Qëmekene troa othi Iesu, hnei Peteru hna selëne me hape: “Maine tro angat’ asëjëihë a thixötr, ngo ame ni, tha tro jë kö ni a [thixötr].” (Mar. 14:29, MN) Maine hnei Peteru ju hna mejiune koi Akötresie tune la hna kuca hnene la atre cinyihane la salamo, tro ha hnëkë angeice hnyawa kowe la itre itupathi ka troa traqa. Hna nyimane hnene la atre cinyihane la salamo, ka hape: “Xölenge Iehova ; tha tro kö ni a qou ; nemene la ewekë tro ate a kuca koi ni ?” (Sal. 118:6) Ame ngöne lo jidri tixenuë ne Iesu e celë fen, hnei Iesu hna ce tro me Peteru me lue xa aposetolo kowe la hlapa e Gethesemane. Ame e cili, hnei Iesu hna upi angatre troa hmek, ngo angatre pe kö a imeköleny. Ame la Iesu a ahlë angatr, öni nyidrëti ka hape: “Hmekënejë nyipunie me thith, mate tha lö kö kowe la itupath.” (Mar. 14:38) Ngo hnei Peteru hna meköle hmaca nge ame hë e thupen, angeic a kei thenge la iajojezi, ene pe kelikelë Iesu jë hi, me xoue atr.
13. Nemene la nyine tro sa kuca matre tha tro kö a ajojezi së?
13 Hanawange la ini koi së qa ngöne la tulu i Pilato me Peteru: Nyipi ewekë troa hetrenyi la nyipi atrehmekun, me hni ka ipië, nge tha tro kö a sasaithi tulu menu pala ha la aqane catre fë mekun, nge tro fe sa hetrenyi la ihnimi koi Akötresie, me xoue Nyidrë matre tha tro kö sa kei thenge la iajojezi maine xoue atr pena. Maine hna eköthe la lapaune së hune la nyipi atrehmekun, eje hi laka, tro ha hetre trenge catre së troa thawa kowe la itre xan la itre ini hne së hna mejiune kow. Tro lai a xatua së matre tha tro kö së a kei thenge la iajojezi maine xoue atr pena. Tha tro pi kö sa mekune ka hape, ka catre catre së. Maine tha ajane kö së troa kei thenge la iajojezi, hawe, loi pe tro sa hetre hni ka ipië, me atrehmekune laka nyipi ewekë koi së la mene i Akötresie. Nyipi ewekë tro sa sipo Iehova la uati Nyidrë, nge tro fe la ihnimi së koi Nyidrë a upi së troa trongëne la itre trepene meköti Nyidrë, me sajuëne la ëje i Nyidrë matre tha tro kö la itre atr a qaja angazon. Ketre nyipi ewekë tro fe sa isa hnëkë hnyawa kowe la itre iajojezi qëmekene troa tupathi së elany. Drei la ketre ceitun, nyipi ewekë tro sa ce thith memine la itre nekö së, me hnëkë angatre matre atreine angatre elany, troa cile huti e uku angatre jë hnene la itre xa nekönatr troa kuca la ngazo.—2 Kor. 13:7. a
NEËNE JË LA HNÖ—TROA JELE NGAZO SË MENU PALA HA HNENE LA HNI SË
14. Nemene la hnei Satana hna ajane tro sa mekune göne la itre ngazo hne së hna kuca ekö?
14 Ame ngöne la itre xa nöj, kola xome hnene la ka thele tha la ketre iwane sinöe maine ketre ietë ka tru, matre nyine hnö. Angeice a thele la ketre qa gojenyi hna majemine xötrëne hnene la itre öni me athipe hmekune lai la ketre ietë ka tru. Ame la kola ketr la eno hnene la öni, kolo hi a malatrane ju hnene lai ietë. Ketre tune mina fe maine hni së a jele ngazo së menu pala ha, kösë lo kolo hi lai a hutre hnyiji së. Drei la ketre ceitun, ame la easa mekune la ngazo hne së hna kuca ekö, tre “atraqate la hna hutratulupi” së. (E jë la Salamo 38:3-5, 8.) Satana a ajane tro sa mekune ka hape, ka ngazo pala ha së matre tha ijiji Iehova kö troa hnimi së me utipi së, nge ketre thatreine jë kö së troa trongëne la itre trepene meköti Akötresie.
15, 16. Tro epuni a neëne tune kaa la hnö, ene la troa jelengazo epuni menu pala ha hnene la hni epun?
15 Tro epuni a neëne tune kaa la hnö celë, ene la troa jele ngazo epuni menu pala ha hnene la hni epun? Maine hnei epuni hna kuca la ketre ngazo ka tru, nyipi ewekë tro epuni a canga nyihnyawane hmaca la aqane imelekeu i epuni me Iehova. Loi e tro epuni a tro troa wange la itre qatre thup, me sipo ixatua thei angatr. (Iako. 5:14-16) Kuca asë jë la hnei epuni hna atreine matre tha tro hmaca kö a kei kowe lai ngazo. (2 Kor. 7:11) Maine kola haji epun, the mekune kö ka hape ka ngazo catre epun. Ame hi la kola haji epun, tre, ketre jëne Iehova hi lai a amamane laka Nyidrëti a hnimi epun. (Heb. 12:6) Catre jë matre tha tro hmaca kö a kuca lai ngazo, nge loi e troa xecie hnyawa koi epuni laka, pëkö ketre ewekë ka troa uku epuni troa kei hmaca. Ame hë e thupene la hnei epuni hna ietra me ujë, maine ngöne la epuni a kuca hmaca la itre ewekë ka amadrinë Akötresie, tha tro pi kö epuni a luelue laka, ka senge Iehova la itre ngazo hna jëne la mele hna huujëne hnei Iesu Keriso, ene lo thupene mel.—1 Ioane 4:9, 14.
16 Ngacama hna nue hë hnei Iehova la ngazo hna kuca hnene la itre xa Keresiano, ngo kolo pala hi a jelengazo angatre hnene la hni angatr. Maine hna traqa fe tune lai koi epun, the thëthëhmine kö laka, ame ngöne lo Iesu a aja ixatua ngöne lo kola nuetriji nyidrë hnei Peteru me itre aposetolo, tre, hnei Iehova hna nue la ngazo i angatr. Goi nue fe Iehova la ngazo ne lo ketre trahmanyi ekö hna upetröne eë, ka kuca la ketre huliwa ka ngazo catr, ngo hna ietra pë hë e thupen. (1 Kor. 5:1-5; 2 Kor. 2:6-8) Ame hnine la Tusi Hmitrötr, easa e la itre ngazo ka tru hna kuca hnene la itre atr, ngo hnei Akötresieti hna nue la ngazo i angatr, ke, hnei angatre hna ietra.—2 A. l. ite jo. 33:2, 10-13; 1 Kor. 6:9-11.
17. Nemene la hna kuca hnene la thupene mel thatraqai së?
17 Tro Iehova a nue la ngazo i epuni me thëthëhmin, e hnei epuni hna ietra, me mejiune laka tro Nyidrëti a hnimi epuni me utipi epun. Hapeu, epuni kö a mekune ka hape thatreine kö Iehova troa nue la itre ngazo i epun, pine laka, tha ijije kö lo lai thupene mele hna hamëne hnei Iesu? Maine epuni a mekune tune lai, tro epuni a jötre ngöne la ketre hnö i Satana. Aja i Satana lai tro epuni a mekune ka hape tha ijije kö la thupene mele koi Iehova matre troa nue la nöjei ngazo. Ngo loi e troa atre hnene la itre ka kei kowe la ngazo, ka hape, troa nue la ngazo i angatr e hnei angatre hna ietra. (Ite edomë 24:16) Maine tro epuni a lapaune kowe la thupene mel, tro hë lai a xatua epuni matre tha tro kö a jelengazo epuni menu pala ha hnene la hni epun, nge tro ha xatua epuni matre troa nyi hluei Akötresie hnene la hni epuni me mekune i epuni me u i epuni ka pexej.—Mat. 22:37.
THA SIHNGÖDRI KÖ KOI SË LA ITRE NYINYITHIINA I SATANA
18. Tro sa neëne tune kaa la itre hnö i Satana?
18 Tha nyipi ewekë kö koi Satana la pengöne hnö hna xom, ngo ame la aja i angeic, tre tro sa jötre hnene itre ej, maine pena tro sa kuca la aja i angeic. Pine laka tha sihngödri kö koi së la itre nyinyithiina i Satana, haawe, ijije hi tro sa neën. (2 Kor. 2:10, 11) Tha tro jë kö sa jötre ngöne la itre hnö i angeic, e hne së hna sipone la inamacane jëne la thith, göi troa cile catre ngöne la itre itupath. Öni Iakobo ka hape: “Maine kete e nyipunie ka pë inamacan, tro angeic’ a sipo Akötesie, ate hamëne atrune kowe la nöjei ate asëjëihë, nge tha wesite kö, nge tro ha hamëne koi angeic.” (Iako. 1:5) Maine easa ajane tro Iehova a hamë së la inamacane troa cile catre ngöne la itre itupath, nyipi ewekë tro sa isa ini Tusi lapa, me mele thenge la itre trepene meköti qa hnine la Tusi Hmitrötr. Kola amamane hnyawa koi së la itre hnö hnene la itre itus qaathei hlue ka nyipici me ka inamacan, nge kolo fe a xatua së troa neën itre ej.
19, 20. Pine nemene matre nyipi ewekë tro sa sisine la ngazo?
19 Kola xatua së hnene la thithi me isa ini Tus, troa ajane la itre ewekë ka loi. Ngo nyipi ewekë mina fe troa sisine la ngazo. (Sal. 97:10) Maine tro sa mekune la itre ethane la troa kei thenge la itre sipu aja së, tro hë sa thipetrije itre ej. (Iako. 1:14, 15) Nyipi ewekë tro sa inine troa sisine la ngazo, ngo ajane pe la loi. Haawe, ame hë la itre ewekë hnei Satana hna xome matre troa iaö së, tre, ngacama troa huli së, ngo sisi hë itre eje koi së.
20 Easa olene koi Iehova, la hnei Nyidrëti hna xatua së matre tha tro kö sa jötr ngöne la itre hnö i Satana! Iehova a xome la Wesi Ula i Nyidrë, memine la organizasio i Nyidrë, me uati Nyidrë troa amele së “qa ngöne la ate ka ngazo.” (Mat. 6:13, MN ) Ame ngöne la hna cinyihane ka troa xulu, tro sa ce wange la aqane tro sa thupëne matre tha tro kö sa jötre ngöne la lue xa hnö i Satana.
[Ithueamacany]
a Nyipi ewekë kowe la itre keme me thin troa ce ithanatane memine la itre nekö i angatr la itre mekune ngöne la tablo hna hape “Comment résister à la pression du groupe” (Aqane Cile Huti Kowe La Iajojezi Ne La Itre Sine Ini Epun) ngöne la itus, Les jeunes s’interrogent — Réponses pratiques, volume 2, götrane 132 me 133. Loi e tro la itre keme me thin a xome la itre mekune cili, matre troa ithanatane ngöne la heji hna hnëkëne thatraqane la Hmi Ne La Hnepe Lapa.
[Thying]
[Iatr ne la götran 7]
Kola traqa la itre jole e hnine la ekalesia hnene la trenge ewekë ka menu
[Iatr ne la götran 10]
Nemene la nyine tro sa kuca matre tha tro kö a hutre hnyiji së, ene la troa jelengazo së menu pala ha hnene la hni së