Itre Macatre Ka Ca Thauzane Ne Tingeting, Me e Thupen!
29 OKOTROPA–4 NOFEBA 2012
NYIMA: 55, 134
Itre Macatre Ka Ca Thauzane Ne Tingeting, Me e Thupen!
“Akötesieti la ka sisitia cate hun’ asë.”—1 KOR. 15:28.
IJIJE KÖ TRO NYIPUNIETI A QEJE PENGÖN?
Nemene la aliene koi epuni la kola troa eatre elanyi la itre mekene tusi celë?
1. Nemene la ewekë ka tru hna treqene hnene “la ka ala nyimu atraqat”?
PANE mekune jë së la nöjei ewekë ka lolo hna troa kuca ngöne la ca thauzane macatre hnene la ketre musi ka tru menen, nge hna troa cilën hnene la atre musi ka meköti me thiina ka loi. Tro ha kepe thangane lai hnene “la ka ala nyimu atraqat.” Angatre hi lo itre atr ka troa mele pe qa ngöne la “aköte atraqat,” ijine kola troa lepe apatren asë la fene celë.—Hna ama. 7:9, 14.
2. Nemene hë la hna melëne hnene la atr ngöne lo 6 000 lao macatre ka ase hë?
2 Traqa ha enehila koi 6 000 lao macatre ne thele troa ketre sipu musi hnene la atr. Ame la thangane la musi angeic, tre, hleuhleu me akötr. Hnei Tusi Hmitrötre hë ekö hna qaja ka hape: “Kete ate a musinëne la kete mate angazo nyëne kö.” (Ate cai. 8:9) Nemene hë la pune lai? Kola elë catre la etrune la itre isi, me icilekeu la itre atr memine la itre mus. Hetrenyi fe la itre jol, tune la itre ka puafala, me itre sine mec, nge kola angazone la ihnadro, me saze fe la drai, me itre xa ewekë ju kö. Hna qaja ha hnene la itretre mus ka hape, tro ha ngazo catre elanyi la mel, e pëkö ewekë ka tru hna kuca enehila matre troa sawa la itre atr troa angazone la ihnadro.
3. Nemene la ewekë ka troa traqa ngöne la Itre Macatre Ka Ca Thauzan?
3 Ame ngöne la ijine kola troa musi hnei Iesu, Joxu ne la Baselaia, memine la ala 144 000, tre, tro la Baselaia i Akötresieti a apatrene la nöjei ewekë ka angazone la ihnadro memine la mele ne la itre atr. Ame ngöne la Itre Macatre Ka Ca Thauzan tro ha eatre la hna thingehnaeane hnei Iehova Akötresie kola hape: “Ini a xupe la hnengödrai ka hnyipixe me fene hnengödrai ka hnyipixe; nge tha tro hmaca kö a mekune la hnapan, me xulu e kuhu hni at.” (Is. 65:17) Nemene la itre ewekë ka lolo ka troa traqa elany? Tro la itre hna perofetane e hnine la Tusi Hmitrötr a xatua së troa atrehmekune la itre ewekë ka lolo ka troa traqa elany, ngacama itre ewekë lai “ka tha mama kö,” maine ka tha eatre petre kö.—2 Kor. 4:18.
‘TRO ANGATR A XUPI UMA ME EËNYI VIN’
4. Ekaa la hna mele ngön hnene la itre atr ka ala nyim enehila?
4 Ka ajan asë hi la nöjei atr troa isa hetre sipu uma i angatr, me mele ngöne la ketre götrane gaa pë iangazo ngön, me mele xetietë memine la hnepe lapa i angatr. Ngo ame ngöne la fen enehila, jole catre troa hetre uma. Tru menu pala ha la itre atr ngöne la itre traon, ene pe, angatr a ipepetreny. Itre xan a mele ngöne la itre kaban maine hnine la itre batima ka hekö hë, nge ka dro. Kösë pu ne jidr koi angatr, la troa ketre hetre sipu uma i angatre kö.
5, 6. (a) Tro ha eatre tune kaa elanyi la hna cinyihane ngöne Isaia 65:21 me Mika 4:4? (b) Tro sa kapa tune kaa la itre manathithi cili?
5 Ame elanyi la kola musi kowe la fene hnene la Baselaia, tro ha hetre sipu umane la nöjei atr asë. Hnei Isaia hna perofetane ka hape: “Tro angat’ a xupi ite uma me lapan’ it’ ej, nge tro angat’ a eënyi vine me iji wen’ it’ ej.” (Is. 65:21) Ngo ame la hna ajane catrëne hnei angatr, tre, tha ene hmekuje kö la troa isa hetre uma i angatr. Ame enehila, hetre sipu uma ne la itre xan, nge hetrenyi itre xane la itre iuma ka tru. Ngo angatre a hnehengazo wanga tha ijiji angatre ju elanyi troa nyi thupene la uma i angatr. Maine pena angatre a xouen e thë pi la itre qënehlö me itre xa ewekë ju kö hnene la itre ka atrekënö maine hnene la itre xa ka iangazo. Ame hë elanyi la kola musinëne la fen hnene la Baselaia, pë hmaca kö troa hnehengazone la itre ewekë cili. Hna cinyihane hnei Mika perofeta, ka hape: “Tro angat’ a isa lapa fene la ite vine i angate me fene la ite hmejienge i angat ; nge pëkö ate troa aqounyi angat.”—Mika 4:4.
6 Nemene la nyine tro sa kuca maine easa ajane troa mele fene la musi ne la Baselaia? Nyipici laka, aja së asë hi troa hetre sipu uma së. Ngo tha tro pi kö sa thele troa aejëne la aja së enehila, wanga troa tru menu hnei gufa së. Loi e tro pe a inamacane la aqane mele së me mama laka, easa sa mele mekune la hna thingehnaeane hnei Iehova. Öni Iesu e qeje nyidrëti kö ka hape: “Ame la nöjei alope, te, hete hna xudawa, nge ame la nöjei waco e caha, te, hete hna nyi tengen, ngo tha hetenyi kö la Nekö i ate la nyine tane la he.” (Luka 9:58) Maine ju tro hi Iesu a xup maine itöne pena la ketre uma ka sisitria catre kö hune la itre xan. Ngo pine nemene kö matre tha ujë tune kö nyidrëti lai? Tha ajane kö Iesu troa kuca la ketre ewekë ka troa sewe nyidrë, troa amë panëne la Baselaia ngöne la mele i nyidrë. Hapeu, easë kö a xötre thenge la tulu i nyidrë, ene laka tha tro kö sa nue la itre ewekë ne ngönetrei troa xome la mele së me nyi ejolen ej?—Mat. 6:33, 34.
TRO HA CE MELE TINGETINGE ELANYI LA ITRE ATR MEMINE LA ITRE ÖNI
7. Nemene la hna amekötine hnei Iehova göne la aqane imelekeu ne la itre atr me itre öni?
7 Ame ngöne lo Iehova a nyiqaane xupe la itre ewekë e celë fen, hnei Nyidrëti hna xupe pinëne la itre atr. Hnei Nyidrëti hna qaja koi Iesu, ene la Atre Huliwa koi Nyidrë, la kepine matre hnei Nyidrëti hna xupe la itre atr: “Tro sha xupe la ate hnaiji shë, me tu shë ; nge tro angat’ a musinëne la ite i e kuhu hnagejë, me ite öni ka sheshë e caha nyipin, me ite öni ka eke ca, memine la fene hnengödrai asëjëihë, me ite öni asë ka wewë e celë fen.” (Gen. 1:26) Hnei Akötresieti hna amekötine koi Adamu me Eva tro nyidroti a thupëne la itre öni me musinëne itre ej. Tro la nöjei atr a musi tune lai.
8. Nemene la hna öhne thene la itre öni enehila?
8 Hapeu, ijije hi tro la itre atr a musi hune la itre öni asë me ce mele tingetinge me angatr? Nyimutre la itre atr ka hnime la itre si angatr, tune la itre kuli me itre bus. Ngo tune kaa fe la itre öni ka ses? Atre hnyawa hi së laka, tro la itre öni a xou me elëhni ngöne la kola angazone la mele i nyudren. Ngo kola öhne hnene la itre ka inamacan, ene lo itre ka mele me nyudren me inine la pengöi nyudren, ka hape, itre öni ka sesi fe a hane madrin, me imekunekeun, me amamane la ihnimi nyudren. Kola qaja hnene la itre ka inamacan ka hape, ame la itre öni a hiane la itre nekön, tre, nyudreni a amamane la hni ne ihnimi nyudren.
9. Tune kaa ha elanyi la pengöne la itre öni?
9 Haawe, tha tro kö sa sesëkötre la Tusi Hmitrötre a qaja, ka hape, tro ha ce mele tingetinge la itre atr me itre öni. (E jë la Isaia 11:6-9; 65:25.) Pine nemen? Mekune ju lo kola lö qa hnine la Aka hnei Noa me hnepe lapa i Noa thupene la Iwë Ka Tru, öni Iehova koi angatre ka hape: “Tro ha qoue nyipunie me sheshe e nyipunie hnene la ite öni asë e celë fen.” Ame enehila nyimutre la itre öni ka kötrene la itre atr, wanga humuthi angatre pi. (Gen. 9:2, 3) Ngo tha jole kö koi Iehova troa apatrene elanyi qaathei nyudreni la xou cili, matre aijijë nyudreni troa ce mele memine la itre atr elany, tune lo hna amekötine hë ekö hnei Nyidrëti ngöne la qaan. (Hos. 2:18) Drei lai ketre ijine madrine kowe la nöjei atr asë ka troa mele elanyi e celë fen!
“TRO NYIDËTI A KÖLE TIJE LA NÖJEI TENGE TIMIDA ASËJËIHË”
10. Pine nemene matre itre atr a treije latresi?
10 Hnei Solomona hna öhne laka nyimutre la itre ewekë ka ngazo hna kuca e celë fen, nge pëkö ka ixatua. Haawe, atraqatre la hleuhleu koi angeic, ene pe öni angeice jë hi ka hape: “Hana wang, ite tenge timida i ange hna axösisin, nge pëkö ate xatua angat.” (Ate cai. 4:1) Ceitune hi la ijine cili me easë enehila, nge kolo jë petre hi, ka hape, ngazo catre jë enehila. Drei pe kö the së la ka tha hane treije latresi pine la ketre akötre ka traqa koi së? Ame itre xa ijin, easa treije catre hnei madrin. Ngo nyimutre catre kö la itre ijine easa treije latresi, ke, atraqatre la hleuhleu ekuhu hni së.
11. Nemene la hna edromë hnei Tusi Hmitrötre ka ketri epun?
11 Nyimutre catre la itre atr ka treije latresi hna qaja e hnine la Tusi Hmitrötr. Ame la Sara a mec, tre, 127 lao macatre i nyiidro, nge hnei Aberahama hna “teije latesi pi Sara.” (Gen. 23:1, 2) Ame la kola iahni hnene la lue tresi Naomi, tre, nyidroti a “teije latesi, nge thupene lai “hnei angate hna iteijenyi me latesi hmaca.” (Rutha 1:9, 14) Ame la kola wezipo catre hnei Hezekiela Joxu, nge kola mama laka kolo ha troa meci hnei angeic, angeic a thithi jë koi Akötresie, nge angeic a “teije cat.” Öhne hi Iehova la itre trenge timidra i angeic, ene pe Nyidrëti a aloine ju la meci angeic. (2 Ite jo. 20:1-5) Hetre ewekë ka ketri së asë ngöne lo kola kelikelë Iesu hnei Peteru. Ame lo Peteru a drenge la kola kukahleke la trotro, “ame hnei angeice hna löpi me teije hleuhleu.”—Mat. 26:75.
12. Tro la Itre Macatre Ka Ca Thauzan Ne Musi Keriso a axapone tune kaa la hni ne la nöjei atr?
12 Pine laka, nyimutre catre la itre ewekë ka akötrëne la mele ne la itre atr enehila, haawe, nyipi ewekë tro sa thele troa akeukawane la hni angatr. Ame ngöne la Itre Macatre Ka Ca Thauzan Ne Musi Keriso, “tro [Akötresie] a köle tije la nöjei tenge timida asëjëihë qa ngöne la ite lue meke i angat ; nge pa hmaca kö mec ; me hace hni me teij, me aköt.” (Hna ama. 21:4) Lolo catr e tro sa mekune laka, tha tro hmaca kö a hace me akötre la atr elany. Ngo tro kö a sisitria catre la madrine së elanyi la Akötresieti a apatrene la mec, ewekë hnei Nyidrëti hna thingehnaeane hë. Matre troa eatre tune kaa elanyi la mekune cili?
“TRO LA NÖJEI ATE NGÖNE LA ITE HUA” A MELE HMACA
13. Qaane lo kola ena la wathebo hnei Adamu, nemene ju pë hë la pune kowe la itre atr?
13 Qaane lo kola eni wathebo hnei Adamu, joxu hë la mec, ej a musi hune la nöjei atr asë. Celë hi ketre ithupëjia ka catr, nge pëkö atr ka atreine troa cile kow. Pëkö atr ka ngazo ka atreine troa kötren, nge ej a ahleuhleune me ahacene la hni ne la nöjei atr. (Rom. 5:12, 14) Hnene laka itre milio la etrune la itre atr ka xouene la mec, haawe, angatre hi la itre hna “hna xom’ acone . . . ngöne la nöjei drai asëjëihë i angat.”—Heb. 2:15.
14. Nemene la ewekë ka troa traqa elanyi ngöne la kola troa apatrene la mec?
14 Tusi Hmitrötre a qaja lo ijine kola troa patre palua la mec, ke, “meci la ithupëjia hnapine hna troa apaten.” (1 Kor. 15:26) Qa ngöne la hna thingehnaeane celë, hetre thangane elanyi hna troa kapa hnene la lue lapa. Tro la “ka ala nyimu atraqat” ne la nöje i Iehova enehila a mele pe matre troa lö kowe la fene ka hnyipixe. Ame hë e cili, ijije hë tro angatr a mele epine palua. Ketre, ijije mina fe tro la itre miliare lao atr ka meci hë a mele hmaca. Pane mekune jë së elanyi la kola elitrauje la madrine ne la nöjei atr, ngöne la kola kapa la itre hna amelene hmaca hnene la “ka ala nyimu atraqat!” Maine tro sa e hnyawa hnine la Tusi Hmitrötr la itre edromë ka qaja la itre atr hna amelene hmaca ekö, eje hi lai laka, tro hë sa trotrohnine la pengöne iamele hmaca hna troa kuca ngöne la itre drai elany.—E jë la Mareko 5:38-42; Luka 7:11-17.
15. Nemene jë la aliene hni epuni elany, ngöne la epuni a öhne la kola mele hmaca la ketre atr hnei epuni hna hnim?
15 Pane mekune jë la itre hnaewekë celë hna hape “hnei angate hna canga haine atraqat,” nge “hnei angate hna atrunyi Akötesie.” Maine epuni ju fe ekö e cili ngöne la kola amele angatre hmaca, maine jë tro hi epuni a hane ujë tune lai. Ketre ewekë lai ka troa amadrinë së la easa iöhnyi hmaca elanyi memine la itre atr hne së hna hnim, ngöne la angatr a troa mele hmaca qa hna mec. Drei kö elanyi la ketre ijine ka lolo catr! Öni Iesu: “Calemi hë la ijine tro la nöjei ate ngöne la ite hua a denge la aqane ewekë i angeic, me tropi.” (Ioane 5:28, 29) Pëkö ketre e easë ka öhne la ketre ewekë ka tune lai. Celë hi ketre ewekë lai ka tru elany nge “ka tha mama kö” ne së hna lapa treqen.
TRO AKÖTRESIETI A “SISITIA CATE HUN’ ASË”
16. (a) Pine nemene matre loi e tro sa madrine troa qaja la itre manathithi tha hne së petre kö hna melën? (b) Nemene la hnei Paulo hna qaja matre troa xatuane la itre trejine me angeic, angetre Korinito?
16 Ejehi laka, ame la itre atr ka mele nyipici enehila koi Iehova ngacama tru catre la itre jol, tro hë angatr a hetrenyi elanyi la ketre mele ka lolo catr! Ngacama thatre pengöne kö së la itre manathithi cili, ke, traqa jë kö itre ej elany, ngo ame pe, nyipi ewekë tro sa lapa mekune itre ej. Celë hi ka troa xatua së troa amë panëne pala hi la ka nyipi ewekë ngöne la mele së. Ketre, tro hë sa catre nyi hlue i Iehova me thupëne wanga troa huli së hnene la itre ewekë ne fen. (Luka 21:34; 1 Tim. 6:17-19) Loi e tro sa madrine troa qaja la mejiune së kowe la itre drai elany, ngöne la heji ne la hmi ne la hnepe lapa, ngöne fe la easa porotrike memine la itre trejine me easë, me ngöne la easa porotrike memine la itre hnainin, me itre atr ka hni ne ajan. Tro lai a acatrene the së la mejiune së. Hna kuca tune hi lai hnei Paulo, ngöne la angeice a xatuane la itre trejine me angeic. Hna xatua angatre hnene la itre trenge ewekë i angeic troa mekune la itre ewekë ka troa traqa elanyi ngöne la pune la Itre Macatre Ka Ca Thauzan Ne Musi Keriso. Thele jë troa mekune la aliene la itre trenge ewekë i Paulo ngöne 1 Korinito 15:24, 25, 28.—E jë.
17, 18. (a) Nemene la aliene la kola hape, Iehova “la ka sisitia cate hun’ asë” ngöne la qaane la mele ne la atr? (b) Jëne nemene la tro Iesu a acile hmaca la tingetinge me cas?
17 Casi hi la trenge ewekë ka troa qeje pengöne hnyawa la pengöne mel elanyi ngöne lo kola troa nyipune la ca thauzane macatre, kolo hna hape “Akötesieti la ka sisitia cate hun’ asë.” Nemene la aliene lai? Pane mekune jë së lo ijine Adamu me Eva e Edena, ijine nyidroti petre kö a hane sine la lapa ka cahae i Iehova ka mele tingeting. Iehova la Atre Musi hune la nöjei hnei Nyidrëti hna xup, e koho ju hë e hnengödrai maine e celë fen. Angatre a ifekeune la itre mekuna i angatre me Iehova, angatr a hmi koi Nyidrë, nge kola amanathithi angatre hnei Nyidrë. Nyidrëti la “ka sisitia cate hun’ asë.”
18 Hna angazone la imelekeu cili ngöne la Satana a iaöne la itre atr troa icilekeu me Iehova. Ngo qaane lo macatre 1914, hetrenyi la itre ewekë hna kuca hnene la Baselaia matre troa acile hmaca la tingetinge me cas. (Efe. 1:9, 10) Ame ngöne la Itre Macatre Ka Ca Thauzan Ne Musi Keriso, tro ha eatre lo itre ewekë ka lolo “ka tha mama kö,” ke, tha traqa pala kö. Ame hë ngöne “la pun,” ene la pune la Itre Macatre Ka Ca Thauzan Ne Musi Keriso, nemene hë la ewekë ka troa traqa? Maine nyipici laka hna hamë Iesu “la nöjei musi asë” e koho hnengödrai me e celë fen, ngo tha eje kö thei nyidrëti la ajane troa ceitu me Iehova. “Tro nyidëti a nue la baselaia koi Akötesie, ene la Tetetro” cememine la hni ka ipië. Ame la nyidrëti a xome la hnëqa i nyidrë ka ketre pengön, me mus, tre, “nyine atrunyi Akötesie Tetetro.”—Mat. 28:18; Fil. 2:9-11.
19, 20. (a) Tro la itre ka mele fene la musi ne la Baselaia a amamane tune kaa ka hape angatr a kapa la musi cile i Iehova? (b) Nemene la ewekë hne së hna lapa treqen?
19 Ame hë e cili, pexeje asë hë la itre atr ka mele fene la musi ne la Baselaia. Angatr a xötre thenge la tulu i Iesu. Nge pine laka itre ka hni ka ipië angatr, angatr a kapa la mekune laka, meköti koi Iehova troa musi hui angatr. Tro hë angatre elanyi a hun qa ngöne la itupathi tixenuë, e hnei angatre hna amamane ka hape, angatr a ajane tro Iehova a musi hui angatr. (Hna ama. 20:7-10) Thupene lai, ame asë hi lo itre ka icilekeu, itre angela ju hë maine itre atr, tro asë hi a apatrenyi angatre epine palua. Drei lai ketre ijine lai ka lolo catre elany! Tro hë la nöjei atrene la lapa ka cahae i Iehova, e koho hnengödrai me e celë fen, a atrunyi Nyidrë. Ame hë e cili, tro Iehova a “sisitia cate hun’ asë.”—E jë la Salamo 99:1-3.
20 Hapeue la itre ewekë hna troa hamëne hnene la Baselaia laka calemi hë, itre eje kö a upi epuni troa lapa mekune me catre kuca la aja Iehova? Xecie hnyawa kö koi epuni laka, ame la mejiune ka menu me keukawa ka xulu qaathei Satana, tre, tha tro kö lue eje elanyi a sewe epuni troa nyi hlue i Iehova? Epuni kö a acatrene la mekune hnei epuni hna axeciën ekuhu hni epun, la troa sajuëne me nyixölëne la musi cile i Iehova? Epi tro la itre huliwa i epuni a anyipicine laka, celë hi ewekë lai hnei epuni hna ajane troa kuca epine palua. Nge eje hi lai laka, tro hë epuni a mele tingeting me madrin, a tha ngöne hmekuje kö lo lai itre macatre ka ca thauzan, ngo itre macatre fe hë ka epine palua!
[Thying]