12-​18 NOFEBA 2012

NYIMA: 43, 92

 “Tha Te Kö Nyipunie La Drai Memine La Haua”

“Hmekëneju nyipunie, ke tha ’te kö nyipunie la drai memine la haua ne traqa la Nekö i at.”—MAT. 25:13.

NEMENE LA AQANE TRO NYIPUNIETI A SA?

Nemene eloine koi së qaa ngöne la hna thatre la drai me hawa ne la pun?

Hna hmeke tune kaa hnene la itre hna iën?

Tro sa amamane tune kaa ka hape ka hnëkë së matre troa hmeke elanyi ngöne la kola nyipune la fene celë?

1-3. (a) Nemene la lue hna melëne hna xome ka troa aijijë së troa trotrohnine la ini hna kapa qaa ngöne la lue ceitune i Iesu? (b) Nemene la itre hnyinge nyine troa sa?

 PANE mekune jë laka kola sipo nyipunie hnene la ketre hene ne mus, troa tro sai nyidrë kowe la ketre hna isapui ka nyipi ewekë catr. Ngo epuni ju petre hi a troa tro, nge epuni a öhne laka, tha tru pe kö hnei saas. Epuni a canga tro troa nyi alien hnei saas, nge kolo pe hi a traqa hnene la hene ne mus. Nyidrëti a thele agö epun ngo pëkö atr. Saqe hë la traem, nge nyidrëti a sipone jë kowe la ketre atr troa nyenyape sai nyidrë. Epuni a canga bëeke qaa hna xomi saas, ngo traqa pë hë epuni nge koilo hë la hene ne mus. Nemene jë la mekuna i epun?

² Pane mekune jë laka epuni hi lai hene ne mus. Qëmekene tro epuni a tro kowe la ketre götrane gaa nany, epuni a iëne la köni trahmanyi troa wange pe la itre xa huliwa ka nyipi ewekë. Epuni a qeje pengöne koi angatre la aja i epun, nge angatr asë hi a hmala troa kuca. Ngo ame hë la epuni a bëek, epuni a öhne laka luetre hi la ka kuca la hnei epuni hna amekötin. Ame pë hë lai ketre, tre, hnei angeice pë hë hna qeje jol, goi tha pane thele fe angeice troa kuca la huliwa i angeic. Nemene jë la mekuna i epun?

³ Casi hi la pengöne la itre ewekë hne së hna wange e celë memine la itre ceitune i Iesu, ene lo itre jajinyi memine lo itre talan. Lue ceitune lai ka qaja la hneijine la pun, me amamane la kepine matre tro la itre xa Keresiano hna iën a nyipici me inamacan, ngo tha hna hane fe kö ujë tune lai hnene la itre xan. a (Mat. 25:1-30) Hnei Iesu hna qaja atrune la ini hna kapa qaa ngöne la lue ceitune cili, öni nyidrë ka hape: “Hmekëneju nyipunie, ke tha ’te kö nyipunie la drai memine la haua.” Hnei Iesu hna qaja ka hape, tha tro kö a atre hnene la itretre drenge la hawa ne troa apatrene elanyi la fene i Satana. (Mat. 25:13) Nyipi ewekë mina fe tro sa ‘hmek.’ Pine nemene matre nyine loi koi së la tro sa kuca la hnei Iesu hna qaja? Drei la ka hmek? Nge nemene la nyine tro sa kuca enehila matre tro pala hi sa hmek?

 KEPINE MATRE TRO SA CATRE HMEK

4. Pine nemene matre tha nyipi ewekë kö troa atre la drai ne traqa la pun ngöne la easa catre hmek?

⁴ Ame itre xa ijin, nyipi ewekë tro sa atre la traem. Drei la ketre ceitun, epuni a huliwa i maseta, nge hetre traeme hna sa troa wai droketre, maine epuni pena mekune troa ti kar, ke, loi e xecie koi epuni laka tha tro kö epuni a traqa hmitr. Ngo ame la atre tha man ka thele troa thapa la ketre atr qa hnine la eë, maine thupene pena la hna lepe la nöje hnei hulö, tre, tha angeice kö a goeë traem. Thatreine kö troa kuca pe kö la ketre ewekë ngöne la ijine cili, wanga troa hetre ethane kowe la mel. Nyipi ewekë pe la troa catre huliwa, hune la troa thele troa atre la traem. Ketre tune mina fe, tha nyipi ewekë kö tro sa atre la drai ne traqa la pun, matre tro sa catre hmek, me kuca la hnei Iehova hna amekötine koi së. Hnene la hne së hna catre cainöje trootro, kolo hi lai xatuane la itre atr troa atre la hnei Iehova hna kuca göi troa amele angat. Ka sisitria catre kö enehila la huliwa cili, ke, easenyi catre hë la pune la fene celë. Kola mama ngöne la faifi lao götran, laka nyine loi koi së la tro sa thatre la drai maine hawa hna sa.

5. Hnene laka thatre kö së la drai ne traqa la pun, tro ha mama tune kaa la sipu aja së?

⁵ Ame la hnapan, tre, hnene laka thatre kö së la drai ne traqa la pun, haawe kolo hi lai a aijijë së troa amamane la sipu aja së. Iehova a metrötrë së hnene la hna nue së troa ketre sipu mekune troa nyipici koi Nyidrë. Easa nyi hlue i Iehova, ke, hnene laka hetre ihnimi së koi Nyidrë, ngo tha hnene hmekuje kö laka easa ajane troa mele pe ngöne la pune la fene celë, me hane hetrenyi la mele ka pë pun. (E jë la Salamo 37:4.) Hetre madrine së la easa kuca la aja i Akötresie, nge öhne hnyawa hi së laka Nyidrëti a ini së, ke, aja i Nyidrëti tro sa mele ka loi. (Is. 48:17) Tha ka hace kö me jol e troa trongëne la itre wathebo i Nyidrë.—1 Ioane 5:3.

6. Ame la easa nyi hlue i Akötresie cememine la ihnim, tune kaa la mekuna i Nyidrë, nge pine nemen?

⁶ Ame la hnaaluen, tre, hnene laka thatre kö së la drai maine hawa, haawe, kola aijijë së troa amadrinëne la hni Iehova. Easa nyi hlue i Nyidrë, tha hnene kö laka hetre drai hna sa maine hetre thupene pena koi së, ngo hnene laka, hetre ihnimi së koi Nyidrë. Celë hi aqane tro së lai a huliwa matre troa xatua Iehova troa sa koi Satana, atre ithupëjia me qaja angazo Nyidrë. (Iobu 2:4, 5; e jë la Ite Edomë 27:11.) Tha sihngödri kö koi së la etrune la akötre me hleuhleu hna axulune hnei Satana, matre easa madrine troa isigöline la musi cile i Iehova, me thipetrije la musi ka ngazo i Satana.

7. Pine nemene matre easa ajane troa nue la mele së troa nyi hlue i Akötresie me xatuane la itre atr?

⁷ Ame la hnaakönin, tre, pine laka easa nyi hlue i Iehova nge thatre kö së la drai hna sa, haawe, tha tro kö a jole koi së troa mekune la itre xan, me nue la mele së troa nyi hlue i Nyidrë me xatuane la itre atr. Ame itre xan enehila ka thatre Akötresie, tre, angatre fe a lapaune laka troa nyipune la fene celë. Angatr a xouene tro la ketre hulö a aca tro apatrene la ihnadro, ene pe angatr a ujë thenge la mekune celë hna hape, “tro sha xeni me iji, ke elanyi la tro sha mec.” (1 Kor. 15:32) Ngo ame easë, tha xou së fe kö. Nge tha easë kö a meku së hi. (Ite edomë 18:1) Easë pe a amë panëne la aja i Iehova ngöne la mele së, nge easa ajane troa xome la hne së hna hetreny, ene fe la traeme së me trenge catre së, matre troa cainöjëne la maca ka loi ne la Baselaia i Akötresie. (E jë la Mataio 16:24.) Kola thue madrine së hnene la huliwa i Akötresie, ene hi ngöne lo easa xatuane la itre atr troa atre Nyidrë.

8. Nemene la itre ceitune ka amamane laka nyipi ewekë tro sa mejiune hnyawa koi Iehova me kowe la Wesi Ula i Nyidrë?

⁸ Ame la hnaafoane manathithi koi së qaa ngöne la hna thatre la drai me hawa, tre, ene laka kolo lai a xatua së troa mejiune hnyawa koi Iehova me saqe trongëne la Wesi Ula i Nyidrë ngöne la mele së. Pine laka itre atr ka ngazo së, canga tro hi sa mejiune kowe la itre sipu mekuna së. Hna hmekëne asë la itre keresiano hnei Paulo kola hape: “Ame la ate mekune laka angeic’ a cile huti, wange kö ke keipi.” Hnei angeice hna amexeje la etrune la angetre Isaraela ka tha idrei, ka ala 23 000, nge ka meci qëmekene troa lö kowe la Nöje Hna Thingehnaean. Öni Paulo ka hape: “Hna cinyihan’ it’ eje nyine eamo shë,” lo itre ka mele easenyine la pune la fene celë.—1 Kor. 10:8, 11, 12.

9. Tro la itre itupath a acatrene tune kaa la lapaune së me aqane imelekeu së me Iehova?

⁹ Ame la hnaafaifine thangane la hna thatre la drai me hawa ne la pune la fene celë, tre, ene laka hetre ini hne së hna xome qaa ngöne la itre itupath, nge kolo fe a hane acatrene la lapaune së. (E jë la Salamo 119:71.) Ame la itre drai tixenuë ne la fene celë, tre, hna hëne ka hape itre “ijine ka aköte.” (2 Tim. 3:1-5) Pine laka, ala nyimu la itre atr ngöne la fene i Satana ka methinë së, haawe, kola icilekeu me easë pine la lapaune së. (Ioane 15:19; 16:2) Ngo, tune la eë a dreuthe la fao me xometrije la itre engazone ej, haawe, tro fe la itre  itupath a eköthe hnyawa la lapaune së me acatren ej. Maine eje the së la hni ka ipië, nge easa catre trongëne la itre hnei Iehova hna amekötin, eje hi lai laka, tha tro jë kö la itre itupath a sewe së troa nyi hlue i Nyidrë. Ngo tro pe a acatrene la aqane imelekeu së me Nyidrë.—Iako. 1:2-4; 4:8.

10. Nemene la ka aijijë së troa qaja ka hape, ka nyimenyime la hawa?

¹⁰ Ame itre xa ijin, kösë nyimenyime la hawa maine hmitre pena. Maine tru la jole së, nge tha hne së kö hna goeë waci lapa, kösë lo tha öhne kö së la kola tro la hawa. Ketre tune mina fe, maine tru la jole së ngöne la huliwa hnei Iehova hna ahnithe koi së, tha tro kö sa öhne la kola tro la traem, nge traqa pi hi la pun. Itre tulu ka lolo koi së la itre Keresiano hna iën, ke, tha mano kö angatre kuca la huliwa i Akötresie. Tro sa pane ce wange la ewekë ka traqa thupene la hna acili Iesu troa Joxu lo macatre 1914, me aqane hnëkë me hmeke hnei itre xan, me aqane tha hmeke hnei itre xan.

ITRE KERESIANO HNA IËNE A AMAMANE LAKA ITRE KA HMEKE ANGATR

11. Thupene la macatre 1914, pine nemene matre itre xa Keresiano hna iën a mekune ka hape, ka traqa hmitre Iesu?

¹¹ Pane mekune hmaca jë së lo lue ceitune i Iesu, ene lo itre jajinyi me itre talan. Maine atre ju la itre jajinyi maine itre hlue la ijine tro la trahmanyi maine maseta i angatr a traqa, tha nyipi ewekë kö koi angatre troa hmek. Ngo pine laka thatre kö angatr, ene pe nyipi ewekë la tro angatr a lapa hmek. Nyimu macatre ne treqen hnene la itre hna iëne la macatre 1914, ngo tha nyipi trotrohnine kö angatre la ewekë ka troa traqa. Ame hë la angatr a traqa ngöne la macatre cili, nge tha eatre kö tune lo hnei angatre hna mekun, öni itre xane jë hi ka hape, ka traqa hmitre Iesu. Ame hë e thupen, önine la ketre trejine e qeje macatre 1914 treu Okotropa, ka hape: “Tha ala nyimu kö eahuni la itre ka mekune troa elë hnengödrai eë ngöne la pane wiike ne lai treu Okotropa.”

12. Itre keresiano hna iëne a amamane tune kaa ka hape itre ka nyipici me ka inamacane angatr?

¹² Tha ka hmaloi kö troa lapa treqene la pun, nge tha traqa kö. Ketre ijine ka jole catre ekö kowe la itre trejin, pine laka tru la icilekeu me iakötrë ngöne la Pane Isi Ka Tru. Ame e cili, hna pane puj la huliwa ne cainöj, kösë kola meköle hnene la itre hna iën. Ngo ame lo macatre 1919, hetre ewekë ka ahlë angatre hmaca! Traqa ha Iesu troa waipengöne la itre ka uune ka hape, itre Keresiano angatr. Ame itre xa hna iën, tre, tha hna kepe angatre kö ngöne la iwai cili, ene pe thatreine kö tro angatr a huliwa ne la Joxu, ene Iesu. (Mat. 25:16) Tha hmeke kö angatr; itre hna aceitunëne me itre jajinyi ka hmo, nge ka tha hane kö nyi aliene la lame i angatre hnei oel. Ketre tune fe lo hlue ka geny, nge ka tha nyipici kowe la joxu i angeic, pëkö hni ne ajane troa huuje thatraqane la Baselaia thene la itre Keresiano cili. Ngo nyimutre la itre hna iëne ka catre nyipici, nge catre la aja i angatre troa nyi hluene la Joxu i angatr, ngacama jole pi hë koi angatr ngöne la itre macatre ne isi.

13. Nemene la aqane ujë ne la itre hna iëne thupene la macatre 1914? Tune kaa la aqane ujë ne la itre hna iëne enehila?

¹³ Thupene la macatre 1914, La Tour de Garde a qaja la aqane ujë ne la itre hna iëne ka nyimutre ngöne la ijine cili. Eje a qaja ka hape, ame lo itre ka hetre aqane wai ewekë ka meköt, tre, tha hace menu kö angatr. Nge kola sisedrëne me hape: “Tha easë kö a thele la aja së; matre ame la easa öhne laka ka tria la hne së hna mekun, lo treu Okotropa macatre 1914, tre, easë pe a madrine laka, tha hnei Joxu kö hna saze la Mekuna i nyidrë matre troa amadrinë së. Eje hi laka, tha celë kö lai aja së.” Kolo hi a ajane hnei angatre troa trotrohnine hnyawa la itre aja i Akötresie. Kola xötrethenge la aqane ujë cili hnene la itre hna iën enehila, angatr a amamane laka, ka hni ka ipië, me ajane troa kuca la aja i Akötresie. Tha angatre kö a qaja ka hape qaathene la ua i Akötresie la itre mekuna i angatr. Angatre hi ajane troa kuca la huliwa hnei Iesu hna upi angatre troa kuca e celë fen. Ketre ame enehila, kola nyitipune la tulu i angatr hnene la itre Keresiano ka mejiune kowe la mele ka tha ase palua kö, ene lo “ka ala nyimu atraqat” ne la “ite xa mamoe.”—Hna Ama. 7:9; Ioane 10:16.

ANGATRE A AMAMANE KA HAPE KA HMEKE ANGATR

14. Pine nemene matre nyine loi koi së la tro sa drenge thenge la ini hnei Iehova hna hamë së jëne la hlue ka nyipici me ka inamacan?

¹⁴ Hnei Akötresieti hna iëne la hlue ka nyipici me ka inamacane matre troa hamëne la xeni ne la ua kowe la nöje i Nyidrë, maine ini angatre la aqane troa kepe eloine la Wesi Ula i Nyidrë memine la ua i Nyidrë. Ame la itre Keresiano hna iën memine la ka ala nyimu atraqatr, angatr a amamane ka hape ka hmeke angatr  hnene la hnei angatre hna drenge thenge la ini hnei Iehova hna hamëne jëne la hlue ka nyipici me inamacan. Aqane tro hi angatre lai a nyi aliene la lame i angatre hnei oel. (E jë la Salamo 119:130; Ioane 16:13.) Ame la thangane lai, ka lapa hmeke angatre elanyi la kola nyipune la fene celë, hmekune lo Keriso a troa traqa hmaca. Ketre, hetre trenge catre i angatre troa mele nyipici ngacama atraqatre la itre itupath. Drei la ketre ceitun, ame ngöne ketre kalabusi ne la itre Nazi, tre, casi hi la Tusi Hmitrötre ne la itre trejin. Haawe, angatre a thithi iele jë matre troa hetrenyi la göxeni ne la ua. Tha qea ju kö, nge angatre a drenge ka hape, hna lö fë hnene la ketre trejine trahmanyi ka xecie ca, la itre zonal La Tour de Garde ka hnyipixe, hna juetrëne me amë hnine la waca sinöe i angeic. Hna qaja hnene la ketre trejine hna iën ka mele pe qaa ngöne la iakötrë, ene Ernst Wauer la ëje i angeic ka hape, hnei Iehova hna xatuane la itre trejine matre tro angatre a hneheene la itre mekune ka ixatua qa hnine la itre hna cinyihan. Öni angeice fe ka hape: “Ame hë enehila, tha jole hmaca kö e troa kapa la xeni ne la ua, ngo hapeu, easë kö a thele troa xome pala hi la xeni cili? Tha luelue kö së laka mana la itre manathithi hnei Nyidrëti hna hnëkëne thatraqane la itre ka mejiune koi Nyidrë, nge ka catre nyipici, me xeni hune la laulau i Nyidrë.”

15, 16. Hna amanathithine tune kaa la ketre trefëne pine la hnei nyidroti hna catre cainöje trootro? Nemene la ini hne së hna kapa qaa ngöne la itre hna melëne cili?

¹⁵ Itre xa mamoe a xatuane la itre trejine me Keriso hnene la hna catre cainöje trootro. (Mat. 25:40) Tha ceitui angatre kö memine lo hlue ka ngazo me ka geny ngöne la ceitune i Iesu. Hetre aja i angatre troa catre huliwa me hni ne ajane troa huuje troa amë panëne la Baselaia ngöne la mele i angatr. Drei la ketre ceitun, hna könë Ioane me Masako troa ixatua cainöje e Kenya kowe la angetre Sinoa. Ame ngöne la xötrei, tha nyipi mama kö koi nyidro troa tro. Ngo thupene la hnei nyidroti hna ce wange la pengöne mele i nyidro, me thithi thatraqane lai, hnei nyidroti hë hna mekune troa feke kowe lai nöje cili.

¹⁶ Hnene laka atraqatre la aja i nyidro troa cainöje trootro, ene pe Iehova a amanathithine jë la trenge catre i nyidro. Öni nyidro ka hape, nyine haine la huliwa ne cainöj. Sevene lao atr hnei nyidro hna nyiqaane ini Tusi Hmitrötre memin, nge nyimutre catre kö la itre xa ewekë ka lolo hnei nyidroti hna melën. Öni nyidroti fe: “Nyiho a olene koi Iehova o drai la hna aijijë nyiho troa tro celë.” Nge nyimutre catre la itre xa trejine trahmanyi me föe ka amamane laka, aja i angatre troa tru hnei huliwa hnei angatr hna kuca koi Akötresie elanyi ngöne la kola traqa la pun, ngacama thatre ju hë angatre la drai cili. Pane mekune ju la itre thauzane lao trejine ka hane sine la Ini Ne Gileada, me hane kuca la huliwa ne mesinare. Tro epuni a atrepengöne la huliwa ne mesinare ngöne la hna cinyihane hna hape, “Nous faisons de notre mieux !” (Easa Kuca La Hne Së Hna Atrein!) ngöne La Tour de Garde ne 15 Okotropa 2001. Ame la epuni a e la hna cinyihane cili ngöne la aqane melëne la mesinare la ca drai, tre, mekune ju la aqane tro epuni a hane akökötrene la huliwa i epuni koi Akötresie. Tro la huliwa i epuni a atrunyi Nyidrë me akökötrene la madrine thei epun.

EPUNI FE, HMEKE JU

17. Nemene la eloine koi së la hne së hna thatre la drai me hawa ne nyipune la fene celë?

¹⁷ Tha hace menu kö së, maine haitre pena la hni së qaa ngöne laka, thatre kö së la drai me hawa ne traqa la pune la fene celë. Kolo pe a mama hnyawa laka hetre eloine pe. Celë hi ka xatua së lai troa catre kuca la aja i Akötreise, me acatrene fe la aqane imelekeu së me Iehova, lo Tretretro së ka tru ihnimin. Pine laka easa wangatrune hnyawa la hnei Iesu hna upi së troa kuca, me neëne la itre ewekë ka troa ajeanyi së qaa ngön, haawe, hetre madrine së troa nyi hlue i Iehova.—Luka 9:62.

18. Pine nemene matre easa ajane troa catre nyipici ngöne la huliwa i Akötresie?

¹⁸ Easenyi catre hë la pune la fene celë, haawe, easa ajane troa catre nyipici ngöne la easa huliwa koi Akötresie. Tha aja së kö troa ahleuhleunyi Iehova maine Iesu. Hnei nyidroti hna hamëne la ketre huliwa ka lolo nyine tro sa kuca ngöne la itre drai tixenuë celë. Easa olene koi nyidro la hnei nyidroti hna hane mejiune koi së!—E jë la 1 Timoteo 1:12.

19. Tro sa hnëkë tune kaa matre troa hmek ngöne la kola troa nyipune elanyi la fene celë?

¹⁹ Ngacama easa mejiune troa mele ekoho hnengödrai maine e celë fene ngöne la Paradraiso, ngo tro pala hi sa catre trongëne la hna amekötine koi së hnei Akötresie, ene la troa cainöj, me inine la itre atr. Tha nyipi ewekë kö koi së troa atre la drai me hawa ne traqa la drai Iehova. Tro pe sa hmeke ngöne la ijine cili! (Mat. 24:36, 44) Tha tro kö sa luelue laka, maine hne së pala hi hna catre mejiune koi Iehova me amë panëne la Baselaia i Nyidrë, tha tro jë kö sa hace hni.—Rom. 10:11.

[Ithueamacany]

[Thying]