5-​11 NOFEBA 2012

NYIMA: 35, 90

 Xomi Ini Jë Qa Ngöne La Hna Xomihni Ahoenyi Hnei Iehova Me Iesu

“Mekuneju nyipunie laka ame la xomi hni ahoeanyi i Joxu shë, te, mele lai.”—2 PET. 3:15.

NEMENE LA AQANE TRO NYIPUNIETI A SA?

Hnei Iehova hna amamane tune kaa ka hape, ka xomihni ahoeanyi Nyidrë?

Pine nemene matre troa pane xomihni ahoeanyi hnei Iesu ngöne la itre macatre ka hoea?

Nemene la nyine tro sa kuca matre tro sa nyitipune la xomihni ahoeanyi Akötresie?

1. Nemene la hna hnyingëne thele hnene la itre ka mele nyipici?

 HNENE la ketre trejine föe ka mele nyipici hna xomihnine la itre jole ngöne la itre macatre ka nyimutre, nge eahlo a ketre hnyingëne thel, ka hape: “Tro kö elanyi a traqa la pun, nge mele pala kö ni?” Ame ngöne la itre hneijine ekö, tre, hna hane hnyinge fe tune lai hnene la itre xa ka nyi hlue i Iehova. Easa ajane me treqene la drai ne tro Akötresieti a kuca la nöjei ewekë ka hnyipixe, me apatrene la itre jole hne së hna cile kow enehila. (Hna ama. 21:5) Ngacama hetrenyi la itre nyine anyipicine ka hape, easenyi catre hë la pune la fene i Satana, ngo tha ka hmaloi kö troa treqene la drai cili me xomihni ahoeany.

2. Nemene la itre hnyinge hne së hna troa ce wange göi troa xomihni ahoeany?

² Tusi Hmitrötre a xatua së troa xomihni ahoeany. Tune lo itre hlue i Akötresieti ekö, tro hë sa kapa elanyi la itre hnei Nyidrëti hna thingehnaeane koi së, e hne së hna catre lapaun me xomihni ahoeanyi me treqene hnyawa la ijine tro Nyidrëti a eatrëne itre ej. (E jë la Heberu 6:11, 12.) Ame Iehova, ka xomihni ahoeanyi Nyidrë. Maine ju, ekö petre kö Nyidrëti apatrene la iangazo, ngo kola mama laka, Nyidrëti kö a treqene la ijine ka ijij. (Rom. 9:20-24) Pine nemene matre Nyidrëti a xomihni ahoeany? Hnei Iesu hna nyitipune tune kaa la aqane xomihni ahoeanyi Iehova, matre nyine tulu koi së? Pine nemene matre loi e tro sa atreine itreqe me hane xomihni ahoeanyi tui Iehova? Tro la itre mekune ka sa la itre hnyinge celë a xatua së troa acatrene the së la lapaun memine la xomihni ahoeany, ngacama ame koi së, tre, kösë hmitre catre Iehova troa eatrëne la mekuna i Nyidrë.

PINE NEMENE MATRE IEHOVA A XOMIHNI AHOEANY?

3, 4. (a) Pine nemene matre Iehova a pane xomihni ahoeanyi la Nyidrëti a eatrëne la aja i Nyidrëti kowe la ihnadro? (b) Tune kaa la aqane ujë i Iehova ngöne lo kola icilekeu ekö e Edena?

³ Pine laka ka pëkö sane la musi Iehova, haawe, tha jole kö koi Nyidrë troa apatrene la nöjei jol asë. Ngo hetre sipu kepine matre Nyidrëti a xomihni ahoeany me pane treqen. Pine lo icilekeu e Edena, nyipi ewekë catre hë troa sa la itre hnyinge hna acian, matre nyine loi kowe la nöjei ka mele ekoho hnengödrai me e celë fen. Hnei Iehova hna xomihni ahoeany, ke, atre hnyawa hi Nyidrëti laka, troa nyimutre catre la itre macatre hna troa xome matre troa sa hnyawa  la itre hnyinge cili. Pine laka atre hnyawa hi Nyidrëti la hna kuca me mekune hnene la nöjei ka mele ekoho hnengödrai me e celë fen, haawe, tha luelue kö së, laka, ame la hnei Nyidrëti hna kuca, tre, nyine loi koi së.—Heb. 4:13.

⁴ Ame la aja i Iehova, tre, tro la itre matra i Adamu me Eva a nyi aliene la fen. Ame la Satana a iaö Eva nge Adamu a tha idrei, tha hnei Akötresieti kö hna hnehengazo menu pala ha; ketre tha hnei Nyidrëti kö hna canga sesë menu, maine nuetrije pena la atr. Hnei Nyidrëti pe hna canga eköthe amë la aqane tro Nyidrëti a eatrëne la aja i Nyidrë kowe la itre atr, me kowe la ihnadro. (Is. 55:11) Pine laka, mama hnyawa ha la aqane catre xomihni ahoeanyi Iehova, haawe, tha jole kö koi Nyidrë troa eatrëne la aja i Nyidrë me amamane laka, ka sisitria catre kö la aqane musi Nyidrë. Kola e lo itre thauzane macatre ne Nyidrëti a eatrëne hnyawa la itre xa götran ne la aja i Nyidrë.

5. Nemene la ketre kepine matre loi e tro sa treqe Iehova?

⁵ Ame la ketre kepine matre Iehova a xomihni ahoeanyi me treqen, tre, göne matre ijije kowe la “ka ala nyimu atraqat” troa hetrenyi la mele ka pë pun. (Hna ama. 7:9, 14; 14:6) Jëne la huliwa ne cainöje së, Iehova a könëne la itre atr troa atre pengöne la Baselaia i Nyidrë, memine la itre hnei Nyidrëti hna amekötin. Ame la maca ne Baselaia, tre, celë hi ketre “maca ka loi” thatraqane la itre atr. Pëkö ketre maca ka tune lai! (Mat. 24:14) Ame la nöjei atr hnei Iehova hna könën, tre, kola hane sine la organizasio i Nyidrë e cailo fen, kolo hi lo itre enehmu ka hnine la itre ewekë ka meköt. (Ioane 6:44-47) Kola kuca hnene la Akötresi së ka ihnim la nöjei ewekë cili, nyine ixatua matre troa hane kepe angatre hnei Nyidrë. Nyidrëti fe a iëne la itre atr troa hane sine la baselaia i Nyidrë ekoho hnengödrai. Ame hë la angatr elanyi ekoho hnengödrai, tre, tro hë angatr a xatuane la itre atr ka idrengethenge e celë fen, troa itre atr ka pexej, me hane mele epine palua. Haawe, kola mama laka, ame ngöne la Nyidrëti a xomihni ahoeanyi me treqen, tre, Nyidrëti mina fe a huliwa matre troa eatrëne la itre hnei Nyidrëti hna thingehnaean. Nge kola kuca asë la itre ewekë cili nyine loi koi së.

6. (a) Hnei Iehova hna xomihni ahoeanyi tune kaa ngöne lo hneijine i Noa? (b) Iehova a xomihni ahoeanyi tune kaa ngöne la hneijine së?

⁶ Ame Iehova, ka xomihni ahoeanyi Nyidrë, ngacama kola kuca hnene la itre atr la itre ewekë ka ngazo matre troa akötrë Nyidrë. Drei la ketre ceitun, pane mekune jë së la hnei Nyidrëti hna axeciën ngöne lo kola ngazo catre la fen, qëmekene la Iwë Ka Tru. “Kola teije la hni [Iehova],” ke, tiqa ha la fene hnene la kuci ngazo, me iakötrë, nge casi hi la aja ne la itre atr, ene la troa kuca la ewekë ka ngazo. (Gen. 6:2-8) Eje hi laka, tha tro kö Nyidrëti a nue troa cile huti la iangazo. Haawe, Nyidrëti a mekune jë troa axulune la Iwë Ka Tru, matre troa apatrene trije la itre atr ka tha idrei. Ame ngöne la Nyidrëti a treqen, tre, Nyidrëti fe a hnëkëne la itre ewekë matre tro pë hë a mele hnei Noa me hnepe lapa i angeic. (1 Pet. 3:20) Ame hë ngöne la ijine ka ijij, Iehova a qaja koi Noa laka troa xulu la ketre Iwë Ka Tru, me hamëne la itre hna amekötine göi aqane troa cane la aka. (Gen. 6:14-22) Hnei Iehova mina fe hna ajane tro Noa a thuemacane la itre atr, laka, easenyi hë matre apatrene pi la fen. Tusi Hmitrötre a qaja ka hape, Noa la “ate cainöjëne la thina ka meköt.” (2 Pet. 2:5) Öni Iesu ka hape, ame la hneijine së, tre, ceitune memine la hneijine i Noa. Hnei Iehova ha hna axeciëne la drai ne tro Nyidrëti elanyi a apatrene la fene ka ngazo celë, ngo pë pe ca atr ka atre “la drai memine la haua cili.” (Mat. 24:36) Ame enehila, hnei Akötresieti hna hamë së la huliwa ne ithuemacany, ene la troa qaja kowe la itre atr la nyine tro angatr a kuca matre troa mele pe ngöne la drai cili.

7. Hapeu, nango hmitre Iehova pala ha eatrëne la itre hnei Nyidrëti hna thingehnaean? Qeje pengöne jë.

⁷ Kola mama laka, ame la Iehova a xomihni ahoeanyi, tre, tha kolo kö ka hape, Nyidrëti hi a lapa nge pëkö hna kuca. Ketre, tha tro pi kö sa mekune ka hape, tha Nyidrëti kö a xajawa së maine hnehengazo së pena! Ngo canga tro hi sa mekune tune lai, ngöne la easa qatre trootro maine pena ngöne la easa akötre ngöne la fene celë. Maine jë easa kucakuca, maine mekune pena ha laka, nango hmitre i Akötresieti pala ha troa eatrëne la itre hnei Nyidrëti hna thingehnaean. (Heb. 10:36) The tro pi kö sa thëthëhmine laka, hetre nyipi kepine matre Nyidrëti a xomihni ahoeany, nge Nyidrëti a xome la ijine cili matre nyine kepe eloine hnene la itre hlue i Nyidrë ka nyipici koi Nyidrë. (2 Pet. 2:3; 3:9) Tro sa ce wange enehila la aqane nyitipune Iesu, la xomihni ahoeanyi ne la Tretretro i nyidrë.

NEMENE LA TULU KA LOI HNA AMË HNEI IESU GÖI XOMIHNI AHOEANY?

8. Nemene la itre hna melëne hnei Iesu ka amamane la aqane xomihni ahoeanyi nyidrë?

⁸ Nyimutre la itre macatre ne kuca Iesu la aja i Akötresie cememine la madrin. Ame lo Satana a icilekeu, Iehova a axeciëne ju laka, tro la Hupuna i Nyidrëti a uti a tro celë fen, nge e cili tro ha Mesia. Pane mekune ju  la aqane xomihni ahoeanyi Iesu, ngöne lo nyidrëti a treqen, itre thauzane lao macatre qëmekene troa traqa la ijine cili. (E jë la Galatia 4:4.) Ame ngöne la ijine cili, tha nyidrëti kö a lapa hi tune la, nge pëkö hna kuca. Tru catre la huliwa i nyidrë qaathei Tretretro i nyidrë. Ketre, ame la nyidrëti a uti a tro celë fen, atre hi nyidrëti laka tro Satana a thele matre troa humuthi nyidrë, tune lo hna perofetane hë. (Gen. 3:15; Mat. 16:21) Hnei nyidrëti hna xomihni ahoeanyi me xomi akötr, ke, atre hi nyidrëti laka, aja i Akötresieti la tro nyidrëti a meci tune lai. Ka hni ka ipië nyidrë, nge hmalahnine fe troa akötr, ngacama Hupuna i Akötresieti nyidrë. Hnei Iesu hna hamëne la tulu ka pexej, ngöne la aqane troa nyipici koi Akötresie, nge loi e tro sa nyitipu nyidrë.—Heb. 5:8, 9.

9, 10. (a) Nemene la hnei Iesu hna kuca ngöne la nyidrëti a treqene tro Iehova a apatrene la fene celë? (b) Tro sa nyitipune tune kaa la aqane ujë i Iesu?

⁹ Thupene la hna amele Iesu hmaca, hna hamë nyidrëti la musi e koho hnengödrai me e celë fen. (Mat. 28:18) Hnei nyidrëti pala hi hna xome la musi cili matre troa eatrëne la aja i Iehova, me ujë pala hi thenge la ijine hna sa hnei Iehova. Haawe, hnei Iesu hna xomihni ahoeanyi me treqene ngöne la götrane maca i akötresie uti hë lo macatre 1914, ijine Akötresieti a nue matre tro nyidrëti a musi hune la itre ithupëjia i nyidrë. (Sal. 110:1, 2; Heb. 10:12, 13) Easanyi hë matre apatrene pi nyidrëti la fene i Satana. Ame ngöne la Iesu a treqene la ijine cili, nyidrëti a xomihni ahoeanyi me xatuane la itre atr matre troa hane kepe angatre hnei Akötresie, me eatrongë angatre kowe “la timi ka mele.”—Hna ama. 7:17.

¹⁰ Hapeu, öhne kö epuni la aqane tro epuni a nyitipu Iesu? Atre hnyawa hi nyidrëti laka, ase hë Iehova sa la ijine troa apatrene la fene celë. Maine nyipici laka, atraqatre la aja thei Iesu troa kuca la hna amekötine koi nyidrë hnei Tretretro, ngo aja i nyidrëti fe troa hane treqene lo drai hna sa hnei Akötresie. Ame ngöne la easa treqene la troa nyipune la fene i Satana, nyipi ewekë tro asë hi së a xomihni ahoeany. Nyipi ewekë tro sa lapa treqene la tro Akötresieti a amekötin, nge tha tro pi kö sa hmacahmaca ngöne la easa kucakuca. Nemene la nyine tro sa kuca matre tro sa xomihni ahoeanyi tune lai?

TRO SA ININE XOMINI AHOEANYI TUNE KAA TUI AKÖTRESIE?

11. (a) Kola ce tro tune kaa la xomihni ahoeanyi memine la lapaun? (b) Nemene la kepine ka upi së troa acatrene la lapaune së?

¹¹ Qëmekene tro Iesu a uti kowe la fen, hnene la itre perofeta me itre xa hlue i Iehova hna amamane laka, ijije fe hi troa xomihni ahoeanyi la itre atr ka ngazo. Ka ce tro la xomihni ahoeanyi angatre memine la lapaune i angatr. (E jë la Iakobo 5:10, 11.) Maine tha lapaune ju angatr, me tha mejiune kowe la hnei Iehova hna thingehnaeane koi angatr, thatreine jë kö tro angatr a xomihni ahoeany, me treqene matre troa eatre la itre hnei Nyidrëti hna thingehnaean. Ngo hnei angatre hna cile huti ngöne la itre jole me itupathi ka tru, ke, catre la lapaune i angatre laka, tro Akötresieti a eatrëne la hnei Nyidrëti hna thingehnaean. (Heb. 11:13, 35-40) Tusi Hmitrötr a amamane laka, hetrenyi pala kö la ketre kepine ka upi së troa acatrene la lapaune së enehila. Iesu la “ate . . . apexejene la lapaun.” (Heb. 12:2) Hnei nyidrëti hna eatrëne la itre hna perofetane ka nyimutre, me xatua së troa trotrohnine hnyawa la itre aja i Akötresie.

12. Nemene la nyine tro sa kuca matre troa acatrene la lapaune së?

¹² Nemene la nyine tro sa kuca matre troa acatrene la lapaune së, me hane catre xomihni ahoeany? Ame la nyine troa kuca ka nyipi ewekë catr, tre, ene la troa xötrethenge la itre hna amekötine hnei Akötresie. Drei la ketre ceitun, pane mekune ju la kepine matre nyipi ewekë tro epuni a amë panëne la Baselaia ngöne la mele i epun. Epuni kö a catre trongëne la hna amekötine ngöne Mataio 6:33? Maine jë ijije tro epuni a akökötrene la etrune la hawa i epuni ngöne la huliwa ne cainöj, maine pena troa saze me ahmaloeëne la aqane mele i epun. Hnei Iehova hë hna amanathithine la aqane catre trongëne epun la itre hnei Nyidrëti hna amekötin. Maine jë hnei Nyidrëti hna xatua epuni troa nyiqaane inine la Tusi Hmitrötre memine la ketre atr, maine pena hna xatua epuni matre troa kapa “la tingetinge ka sisitia qa thei Akötesie hune la nöjei mekun’ asë.” (E jë la Filipi 4:7.) Ame la epuni a lapa goeëne la itre manathithi ka tune lai, tro hë epuni a öhne laka, nyine loi koi epuni la troa xomihni ahoeany.—Sal. 34:8.

13. Nemene la ceitune ka xatua së troa trotrohnine la aqane acatrene the së la xomihni ahoeanyi hnene la lapaun?

¹³ Tro la ketre ceitun a xatua së troa trotrohnine la aqane tro la lapaune së a acatrene the së la xomihni ahoeany. Ame la atre eëny, tre, angeic a tra feja, me eëny, me menuën. Ame la nöjei ijine angeice a menu, nge ka mele la hlapa, kolo fe a acatrene thei angeice la mekune troa tra feja hmaca, me traane atrune mina fe. Angeic a tra feja me atre laka tro angeic a xomihni ahoeany me treqene la ijine troa menu. Nge  catre la mejiune i angeice laka, tro angeice elanyi a menuën. Ketre tune mina fe, ame la easa atre la itre hna amekötine hnei Iehova, me trongëne itre ej, me kapa la itre thangane ka loi, kola acatrene la mejiune së me lapaune së koi Iehova. Haawe, tha jole fe hë koi së troa hane xomihni ahoeany, me treqene la itre manathithi ka troa xulu.—E jë la Iakobo 5:7, 8.

14, 15. Nemene la aqane tro sa goeëne la akötre ne la atr?

¹⁴ Hetre ketre ewekë fe nyine tro sa kuca matre troa acatrene the së la xomihni ahoeany. Tro sa isa wange la aqane tro sa goeëne la fen, memine la aqane mele së. Nge tro fe sa thele la aqane goeëne Iehova la itre ewekë cili. Hanawange la ketre ceitun, pane mekune jë së la Iehova a öhne la akötre ne la atr. Qea catre pi hë la ijine Iehova a goeëne la akötre ne la itre atr, nge kola ahleuhleunyi Nyidrë. Ngo, tha hnei Nyidrëti kö hna nue la hleuhleu, troa sewe Nyidrëti troa kuca la loi. Hnei Nyidrëti hna upe la Hupuna i Nyidrë troa “apatene la ite huliwa i diabolo” me apëne la nöjei akötre asë ka xulu qa ngön. (1 Ioane 3:8) Easenyi hë tro Akötresieti a apatrene epine palua la nöjei akötr asë. Haawe, tha tro pi kö sa nue la iangazo ne la fene celë, troa ananazijëne la lapaune së. Tha tro kö sa anyimenyimëne la ijine tro Iehova nyipune la fen. Tro pe sa lapaune kowe la itre hna thingehnaeane hnei Akötresie. Ase hë Iehova axeciëne la drai ne troa apatrene la iangazo, nge tro kö Nyidrëti elanyi a eatrëne la drai hnei Nyidrëti hna sa.—Is. 46:13; Nah. 1:9.

¹⁵ Ame ngöne la itre drai tixenuë hne së hna melën, tro sa xomihnine la itre jole ka tru ka troa tupathe la lapaune së. Maine jë easë, maine itre hne së hna hnim a akötre pine la itre iangazo maine pena hnene la itre xa kepine ju kö. Tha tro pi kö sa elëhni pin, ngo loi e xecie e kuhu hni së troa catre mejiune hnyawa koi Iehova. Tha itre atr ka pexeje kö së, matre tha ka hmaloi kö koi së troa ujë tune lai. Ngo tro sa lapa mekune lo hnei Iesu hna kuca, tune la hne së hna e ngöne Mataio 26:39.—E jë.

16. Ame ngöne la easa treqene la pun, nemene la ewekë nyine tro sa neën?

¹⁶ Ame la atr ka luelue me mekune ka hape, nanyi pala kö la pun, tre, kolo ha nyiqaane cia thei angeic la aqane wai ewekë ka tria. Angeic a mekune ka hape, loi e troa eköthe amë la itre aja i angeic, wanga tha eatrëne ju elanyi la itre hna thingehnaeane hnei Iehova. Maine jë angeic a mekune ka hape, ‘Wange jë pë hë elany, e eatrëne jë Iehova la itre hnei Nyidrëti hna thingehnaean.’ Tro ha jole kowe la atr cili troa xomihni ahoeany, e tro angeice a mekune tune lai. Ame hë la thangane lai, tro angeic a thele troa hlemu e celë fen, maine troa nyiqaane nyinyape thele mani, me hmaca troa amë panëne la Baselaia i Akötresie ngöne la mele i angeic. Maine pena tro angeic a mekune troa lö hnine la itre ini ka tru matre troa hetre mele ka loi enehila. Ngo tro pe a mama laka ka pë lapaune la atr cili. The thëthëhmine kö laka hnei Paulo hna upi së troa xome la tulu ne lo itre ka nyi hlue i Iehova ekö, nge ka kapa la itre hna thingehnaeane qaathei Iehova “thenge la lapaune me xomi hnin.” (Heb. 6:12) Ase hë Iehova sa la drai ne troa apatrene la fene ka ngazo celë, nge tha tro jë kö Nyidrëti a hmitr. (Hab. 2:3) Qaa ngöne lai, tha tro kö sa hnöthe la etrune la itre nyine tro sa kuca thatraqane la huliwa i Iehova, nge tro sa catre uti hë lo drai hna sa hnei Nyidrë. Nyipi ewekë tro pala hi sa mekune laka easa melëne la itre drai tixenuë, nge tro sa kuca la hne së hna atreine ngöne la huliwa ne cainöje trootro. Tro fe la huliwa cili a ithue madrine së qaane enehila.—Luka 21:36.

NEMENE LA ITRE MANATHITHI KA XULU QA NGÖNE LA HNA XOMIHNI AOHEANY?

17, 18. (a) Nemene la hna aijijë së troa kuca ngöne la easa xomihni ahoeanyi me treqen? (b) Maine ka xomihni ahoeanyi së, nemene la itre manathithi hne së hna troa kapa?

¹⁷ Maine itre treu ne nyi hlue i Akötresieti hë së maine itre macatre pena, ngo ame la aja së, tre, troa nyi hlue i Nyidrëti epine palua. Tro la xomihni ahoeanyi a xatua së troa cile catr uti hë la pune la fene celë, ngacama troa tru la itre drai ne tro sa itreqe. Iehova a aijijë së tro sa amamane laka, easa mejiune kowe la itre hnei Nyidrëti hna axeciën, nge tro kö sa mele nyipici elanyi koi Nyidrë, ngacama troa traqa koi së la itre akötr. (1 Pet. 4:13, 14) Ketre Akötresieti a ini së matre troa xatua së troa cile huti me xomihni aoheany uti hë la pun, me hane hetrenyi la mel elany.—1 Pet. 5:10.

¹⁸ Hna hamë Iesu la musi e koho hnengödrai me e celë fen, nge pëkö ketre ewekë ka troa sewe nyidrë troa xatua nyipunie, e tro nyipunieti a catre nyipici koi Akötresie. (Ioane 10:28, 29) Tha tro kö a xouene la itre drai ka troa xulu maine xouene pena la mec. Ame la itre atr ka xomihni ahoeany me cile catre uti hë la pun, tro ha amele angatr. Celë hi matre nyipi ewekë troa xecie koi së laka, tha easa kö a nue la aqane wai ewekë i fen, troa ajojezine la mekuna së me sewe së troa mejiune koi Iehova. Ngo tro pe sa catre akökötrene la lapaune së me xome hnyawa la traeme së, ke, ka xomihni ahoeanyi Akötresie.—Mat. 24:13; e jë la 2 Peteru 3:17, 18.

[Thying]