Iesu La Tulu Ne Ipië
31 DISEBA KOI 6 JANUARE 2012
NYIMA: 84, 82
Iesu La Tulu Ne Ipië
“Ase hë ni hamë nyipunie la tulu, mate tro nyipunie a kuca tune la hnenge hna kuca koi nyipunie.”—IOANE 13:15.
NEMENE LA AQANE TRO NYIPUNIETI A SA?
Hnene la Hupuna i Akötresie hna amamane tune kaa la ipië i nyidrë qëmekene troa uti kowe la fen?
Hnei Iesu hna amamane tune kaa la ipië i nyidrë lo nyidrëti e celë fen?
Nemene la itre ewekë ka loi qa ngöne la hna ipië hnei Iesu?
1, 2. Ame ngöne la jidri tixenuë i Iesu e celë fen, nemene la ini hnei nyidrëti hna hamëne kowe la itre aposetolo?
KOLO jidri tixenuë i Iesu e celë fen. Ce nyidrë me ange aposetolo i nyidrë e Ierusalema, ngöne la ketre hnalapa ngöne la hnahage e koho. Ngöne la ijine angatr a xen, Iesu a una pi la ixetre i nyidrë, me otregöne la sine trawel me nyi aliene la trap hnei tim. Nge nyidrëti a nyiqaane hnea ju la itre waca ne la itretre drei nyidrë, me xome la trawel troa köle aweliwelën. Ase jë hi, nyidrëti a heetre hmaca ju. Pine nemene matre ipië ju pë hë Iesu tune lai?—Ioane 13:3-5.
2 Iesu a qeje pengöne ju me hape: “Trotrohnine kö nyipunie la hnenge hna kuca koi nyipunie?” Öni nyidrëti hmaca jë: “Maine Joxu ni me Ate ini, nge ase hë ni hnea la ite lue ca i nyipunie ; loi e tro nyipunie a itö ihne lue ca kö nyipunie. Ke ase hë ni hamë nyipunie la tulu, mate tro nyipunie a kuca tune la hnenge hna kuca koi nyipunie.” (Ioane 13:12-15) Jëne la tulu celë, Iesu a inine la itre aposetolo i nyidrë troa ipië, haawe thatreine kö tro angatr a thëthëhmine lai, nge ixatua koi angatre troa tune pala hi la aqane ipië i nyidrë.
3. (a) Nemene la aqane amamane Iesu la enyipiewekëne la ipië ngöne la lue ijin? (b) Nemene la hne së hna troa ce wange ngöne la itane mekune celë?
3 Ame la Iesu a hnea la itre waca ne la itre aposetolo, tha nyidrëti kö lai a xötrei amamane koi angatre la enyipiewekëne la troa ipië. Hetre ketre ijine hë, hnene la itre aposetolo hna nango pi ithepe ka tru. Ame hnei Iesu hna xome amamai angatre la ketre nekönatr me hape: “Ame la ate tro ha kapa la nekönate celë ngöne la ëjeng, angeic’ a kepe ni ; nge ame la ate tro ha kepe ni, kola kapa la ate upi ni ; ke ame la ka co hi e nyipunie asëjëihë, celë hi ka tru.” (Luka 9:46-48) Thupene hë lai, ngöne la ketre ijin, Iesu a ithanata pena memine la itre Faresaio, kolo itre atr ka pi draië, öni nyidrë ka hape: “Tro ha acone la ate atrunyi angeice kö ; nge tro pena ha atrune la ate aconyi angeice kö.” (Luka 14:11) Iesu hi la a amamane la aja i nyidrë kowe la itretre drei nyidrë, ene la troa ipië. Xele nyidrëti ma wange la itre ka pi draië, me angetre pi iwajahuj, me angete mekune ka hape sisitria kö angatre hui itre xan. Loi e tro sa ce wange la tulu ne ipië i Iesu, matre tro sa nyitipu nyidrë. Tro fe sa öhne e cili la ixatua hna hamëne hnene la ipië kowe la itre atr ka melëne la thiina cili, me itre xane kö.
“THA HNENGE HNA HMACA”
4. Nemene la aqane amamane Iesu la ipië i nyidrë qëmekene tro nyidrëti a uti kowe la fen?
4 Hnene pala hi la Hupuna i Akötresie hna ipië uti fe hë la nyidrëti a traqa kowe la fen. Qeadridri catre la itre ijine ce mele Iesu memine la Tretretro i nyidrë. Hna qeje pengöne hnine la itusi Isaia la ecatrene la aqane imelekeu ne la Hupuna memine la Tretretro i nyidrë. Kola qaja ka hape: “Hnei Joxu Iehova hna hamë ni la sesepeneqë hna inin, mate ate ni troa hajine la ka kucakuca hnene la tenge ewekë ; nyidëti a ahlë ni o hmakany ; nyidëti a ahlë ni mate denge la lue hnangenyënge tune la ate hna inin. Hnei Joxu Iehova hna fē la lue hnangenyëng, nge tha hnenge hna ena, tha hnenge hna hmaca.” (Is. 50:4, 5) Tru catre la aja i Iesu troa kepe ini qaathei Akötresie. Kola mama la ipië i nyidrë qa ngöne la hnei nyidrëti hna hnangenyë hnyawa kowe la itre ini qaathei Iehova. Ketre mina, öhne hnyawa hi nyidrë la aqane ipië Iehova lo Nyidrëti a nyipi ewekëne la itre atr ka ngazo.
5. Ame ngöne la kola isazikeu hnei Iesu me Diabolo, nemene la aqane amamane Iesu ka hape, ka ipië nyidrë me ka atreine nyidrë wange la ewekë hmeku i nyidrë?
5 Tha itre angela asë kö la ka ipië tui Iesu. Ame lo angela laka Satana nge Diabolo pë hë e thupen, tre xelene kö angeice la itre ini qaathei Iehova. Pi tru hë angeic, me mekune ka hape sisitria kö angeice hune la itre xa angela. Aqane ujë lai ka isazikeu memine la ipië. Ame la thangane lai, hnei angeice hna pi tru koi Iehova. Isa pengöne catre memine la aqane ipië Iesu. Tha hnei Iesu kö hna thele troa sasaithe la musi hna hamë nyidrë hnei Iehova. Nge tha hnei nyidrëti kö hna ajane troa huliwane menune la mus ka eje thei nyidrë. Hane hi la ketre ceitun, hnene la Tusi Hmitrötre hna qaja la ketre ijine hna hetre isazikeu thei Iesu me Satana lo kola ithanata pine la ngönetrei Mose. Ame ngöne la ijine cili, pëkö ketre ewekë hnei Iesu hna kuca ngacama nyidrëti hi lo angela ka sisitria, Mikaela. Hnene la Hupuna i Akötresie hna amamane la ipië i nyidrë me atreine i nyidrë troa wange la ewekë hmeku i nyidrë. Hnei Iesu hna nue matre tro kö Iehova, lo Atre Amekötine Ka Sisitria ne la fene me hnengödrai asë, a amekötine la ewekë nyine kuca, ngöne la nyipi ijin.—E jë la Iuda 9.
6. Hnei Iesu hna amamane tune kaa la ipië i nyidrë la nyidrëti a kapa la hnëqa ne Mesia?
6 Ame lo Iesu ekö e hnengödrai, atre hë nyidrë la nöjei hna perofetane göne la tro nyidrëti a Mesia. Celë hi matre tha sihngödri kö koi nyidrë la itre akötre ka troa traqa koi nyidrë. Ngo tha hnene itre eje kö hna thingi jë nyidrëti troa uti kowe la fen, me meci tune lo ewekë hna perofetane kowe la Mesia. Pine nemen? Hnei Paulo hna amamane laka, ipië la ka xatua Iesu. Öni angeice ka hape, ngacama Iesu la ketre angela ka sisitria, ngo tha ase kö nyidrëti mekune ka hape “kola cei tune me Akötesie.” Ame pe, “hnei nyidëti hna aipië nyidëti kö, me xome la pengö i hlu, nge hna longëtine mate ate.”—Fil. 2:6, 7.
“HNEI NYIDËTI HNA AIPIË NYIDËTI KÖ” NGÖNE LA KOLA ATR
7, 8. Hnei Iesu hna amamane tune kaa la ipië ngöne lo nekönatre petre kö nyidrë, memine fe lo nyidrëti a tro fë la huliwa ne cainöj?
7 Hnei Paulo hna cinyihane ka hape, ame lo kola atr hnei Iesu, “hnei nyidëti hna aipië nyidëti kö, me denge thenge uti hë la mec, ene la meci ne satauro.” (Fil. 2:8) Qaane lo nyidrëti a nekönatr, hnei Iesu hna amamane la ketre tulu ne ipië nyine troa xötrethenge. Hnei Iesu hna drengethenge la keme me thine i nyidrë,Iosefa me Maria, ngacama tha lue ka pexeje kö nyidro. (Luka 2:51) Ketre tulu ka lolo catre kowe la itre thöth. Tro Akötresieti a amanathithi angatre qa ngöne la aqane drengethenge angatre la keme me thin.
8 Ame hë la nyidrëti a thupëtresij, hnei nyidrëti hna amamane la ipië i nyidrë ngöne la nyimu götran. Ame la ka sisitria catre koi nyidrë, tre, ene la troa kuca la aja i Iehova. (Ioane 4:34) Ame ngöne lo ijine nyidrëti a cainöje trootro, hnei nyidrëti hna qaja trongëne la ëje i Akötresie, me inine la itre atr la itre ewekë hnei Akötresie hna ajane troa traqa kow, memine la pengöne la Tretretro i nyidrë. Tha hnei Iesu hmekuje kö hna inine la itre atr troa mele thenge la aja i Akötresie, ngo tro fe angatre a hane mele tui nyidrë. Drei la ketre ceitun, ame lo Iesu a inine la aqane troa thithi kowe la itretre drei nyidrë, ame la pane ewekë hnei nyidrëti hna qaja ke: “Tetetro i anganyihunieti e kohoti hnengödrai, jiniati e [epi] hmitöte la atesiwa i enëtilai.” (Mat. 6:9) Iesu a amamane e celë kowe la itretre drei nyidrë ka hape, ame la ewekë ka sisitria nyine tro angatr a kuca, tre ene la troa atrune la ëje i Akötresie, ene Iehova. Hnei Iesu hna kuca tune lai. Traqa ha Iesu kowe la pune la mele i nyidrë e celë fen, ijije hë tro nyidrëti a qaja koi Iehova ka hape: “Hnenge hna amamane koi angate la atesiwa i cilie, nge tro kö ni a amaman.” (Ioane 17:26) Ketre, hnei Iesu pala hi hna qaja ka hape thatreine kö tro nyidrëti a kuca la ketre ewekë e patre la ixatua qaathei Iehova.—Ioane 5:19.
9. Nemene la hna perofetane hnei Zakaria göi Mesia? Nemene la aqane eatrëne la hna perofetane celë hnei Iesu?
9 Hnei Zakaria hna perofetane göi Mesia ka hape: “Madin’ atrune jë eö, nekö jajinyi ne Ziona, suejë eö, nekö jajinyi ne Ierusalema ; hana wang, kola tropi koi ’ö la Joxu i ’ö ; ka meköt, nge tene mele nyidë ; ka menyik, nge kola ti asina me fekene asina.” (Zaka. 9:9) Hna eatre lai lo kola lö Ierusalema eë hnei Iesu qëmekene lo Paseka macatre 33. Hnene la itre atr ka ala nyim hna seluthe trongëne la itre ixetre i angatr, me itre pici ne sinöe e kuhu gojeny. Tru la mejene madrine e Ierusalema la kola drenge ka hape lö hë nyidrë ngöne la traon. Ngacama itre atr a kepe nyidrë me atruny nyidrë kösë Joxu i angatr, ngo hnei nyidrëti pala hi hna ipië.—Mat. 21:4-11.
10. Nemene la hna anyipicine hnei Iesu jëne la aqane idrengethenge nyidrë uti hë la mec?
10 Ame lo Iesu Keriso e celë fen, hnei nyidrëti hna amamane la ipië i nyidrë me idrengethenge i nyidrë uti hë la kola meci hune la sinöe ne iaxösisi. Nyidrëti a anyipicine e cili laka, ijije fe hi kowe la itre atr troa mele nyipici pala hi koi Iehova ngacama traqa ju hë la itre akötre me jole ka tru. Nge Iesu fe a amamane ka hape, tria kö lo hna qaja hnei Satana ka hape, itre atr a nyi hlue i Iehova göi thupen. (Iobu 1:9-11; 2:4) Ame la Iesu Keriso a drenge thenge hnyawa la Tretretro i nyidrë, nyidrëti hi lai a isigöline laka, Iehova hmekuje hi la ka ijije troa mus, me amamane ka hape, pë hmaca ju kö ketre mus e hune la musi Iehova. Hane hi lai ka amadrinë Iehova la Nyidrëti a goeëne la aqane ipië ne la Hupuna hna amamane hnene la nyipici ka pë ethan ka eje thei nyidrë.—E jë la Ite Edomë 27:11.
11. Nemene la hna aijijën hnene la mele hnei Iesu hna huujëne kowe la itre atr ka lapaune koi nyidrë?
11 Hnene la meci Iesu hune la sinöe ne iaxösisi hna aijijëne troa thapa la itre atr qa ngöne la ngazo me mec. (Mat. 20:28) Jëne la mele hna huujëne hnei Iesu, ijije hë tro Iehova a nue la itre ngazo së thenge la itre tulu ne meköti xajawa i Nyidrë me aijijëne la itre atr troa hetrenyi la mele ka tha ase palua kö. Hnei Paulo hna cinyihane ka hape: “Troa jele mekötine uti hë la mele la nöjei ate asë hnene la thina ka meköti ka cas.” (Rom. 5:18) Hnene la meci Iesu hna aijijëne la itre Keresiano hna iëne hnene la uati hmitrötre troa kapa la mele ka tha ase palua kö e hnengödrai, nge mele ka tha ase palua kö e celë fene nyine troa kapa hnene lo “ite xa mamoe.”—Ioane 10:16; Rom. 8:16, 17.
KA “IPIË LA HNING”
12. Nemene la aqane amamane Iesu la ipië me menyike i nyidrë kowe la atr ka ngazo?
12 Hne i Iesu hna könëne la itre atr ka kucakuca, me hace hni. Öni nyidrë ka hape: “Xomejë la nyine isilikeunge hui nyipunie me inine theng ; ke menyike ni, nge ipië la hning ; nge tro nyipunieti a öhne la hna mano thatraqane la ite u i nyipunie.” (Mat. 11:28, 29) Hnene laka ka ipië me ka menyike Iesu, hnei nyidrëti hna ujë kowe la itre atr cememine la hni ka loi nge ka pë iwangatrehmekunyi atr ngön. Tha hnei nyidrëti kö hna upi angatre troa kuca la hnei angatre hna thatrein. Hnei Iesu hna qaja aloinyi angatr me thuecatre koi angatr. Tha hnei nyidrëti kö hna wajahuji angatr me wai angatre ceitu me itre ka thatrein, me itre ka menu. Tha ka ithahluë kö Iesu me calogitre. Ohea, ame pe hnei nyidrëti hna sipu qaja ka hape: “Uqa la nyine isilikeung, nge maloe la ehnefeng.” Kolo lai a hape, tha hace menu kö la itre hna amekötine hnei nyidrë göi troa xötrethenge nyidrë. Maine tro angatr a kapa la ini qaathei nyidrë, me trongëne itre ej, tre tro ha ahmaloinyi angatr. Hane hi lai kepine matre ajane la nöjei pengöne atr, trahmany, föe, thöth, me qatre troa ce me Iesu.—Mat. 11:30.
13. Hnei Iesu hna amamane tune kaa la utipine i nyidrë kowe la itre atr ka mele hnine la akötr?
13 Tru la hace i Iesu pine la itre atr e Isareala ka mele hnine la akötr, nge hnei nyidrëti hna kuca asë la hnei nyidrëti hna atrein troa xatua angatr. Ezine Ieriko, nyidrëti a ixelë ju memine la lue timek, Baratimaio memine la sinee i angeic. Hnei nyidroti hna ce sipo ixatua koi Iesu, ngo sewe nyidroti jë hi hnene la ka ala nyimu matre lapa thaup. Maine ju tro hi Iesu a tro thingetröne la lue timek, ngo tha hnei nyidrëti kö hna ujë tune lai. Hnei nyidrëti hna utipine la lue thupëtresiji cili, nyidrëti a hë nyidroti ju, me aloinyi nyidro matre goe hë nyidro. Iesu hi lai a nyitipu Iehova Tretretro i nyidrë, jëne la hna ipië me utipine la itre atr ka ngazo.—Mat. 20:29-34; Mar. 10:46-52.
“TRO HA ATRUNE LA ATE ACONYI ANGEICE KÖ”
14. Nemene la itre ewekë ka loi hna kapa qa ngöne la hna ipië hnei Iesu?
14 Ame la aqane ipië i Iesu, tre, ka hamë manathith kowe la ka ala nyim. Madrine catre Iehova pine la aqane idrengethenge la Hupuna i Nyidrë. Kola akeukawane me ithecatrene la ange aposetolo me itretre drenge hnene la aqane ipië me menyike i Iesu koi angatr. Jëne la tulu ka loi me ini me aqane qaja aloine nyidrë la huliwa i angatr; aqane xatua angatre hi lai hnei Iesu troa nyi hlue i Akötresieti hnyawa. Hnei Iesu hna xatuane la ka ala nyim, me ini angatr, me thuecatrei angatr, me hamëne la ka nyipi ewekë koi angatr. Eje hi laka, pine la mele hnei Iesu hna huujën, tro la nöjei atr asë ka lapaune a kapa la itre manathith ka epine palua.
15. Hnei Iesu hna kepe eloine tune kaa qa ngöne la hnei nyidrëti hna ipië?
15 Tune kaa fe Iesu? Hetre eloine kö koi nyidrë la hnei nyidrëti hna ipië? Eje hi. Nemen? Öni Iesu: “Tro ha atrune la ate aconyi angeice kö.” (Mat. 23:12) Hnei Paulo hna qeje pengöne ka hape, hna traqa tune hi lai koi Iesu. Öni Paulo: “Ase hë Akötesie nyipi atrunyi nyidëti jë draië, me hamë nyidëti la atesieti ka sisitia hune la nöjei ëjen’ asëjëihë ; mate troa sa watingöneca asëjëihë kowe la atesi Iesu hnei angete hnengödrai, me fene hnengödrai, me fene la fene hnengödrai ; nge mate amamanepi hnene la nöjei sesepeneqë asëjëihë, laka Iesu Keriso la Joxu, nyine atrunyi Akötesie Tetetro.” Pine la aqane ipië me nyipici Iesu lo nyidrëti e celë fen, Iehova pë hë a “nyipi atrunyi nyidëti jë draië,” me hamëne ju koi nyidrëti la mus hune la nöjei ka mele e hnengödrai me e celë fen.—Fil. 2:9-11.
TRO IESU A “NYINYAPE . . . FË LA NYIPICI, ME IPIË ME MEKÖT”
16. Nemene la aqane tro la Hupuna i Akötresie a amamane ka hape, tha tro pi kö a patre la ipië thei nyidrë?
16 Tha tro pi kö a patre la ipië thene la Hupuna i Akötresie. Hna qaja amë hë hnene la tusi Salamo la hnei Iesu hna troa kuca kowe la itre ithupëjia qa ngöne la hnanyijoxu i nyidrë e hnengödrai, me hape: “Ngöne la etrune la musi cilie, tro fë jë la hune i cilie, nyinyape jë fë la nyipici, me ipië me meköt.” (Sal. 45:4, MN) Ame e Amagedon, tro Iesu Keriso a isigöline la itre ka ipië me ka meköt, me angetre ajane la nyipici. Nge nemene ju hë la ka troa traqa ngöne la pune la itre macatre ka ca thauzane ne musi Keriso, e ase pi nyidrëti “apatene la ite joxu asëjëihë, me itete mus, me ite mene asëjëihë”? Eje pala hi thei nyidrëti la ipië? Eje hi. Önine la Tusi Hmitrötre ka hape, tro nyidrëti a nue hmaca la Baselaia kowe la Akötresie i nyidrë me Tretretro i nyidrë.—E jë la 1 Korinito 15:24-28.
17, 18. (a) Pine nemene matre ka nyipi ewekë kowe la itre hlue i Iehova troa hane ipië tui Iesu? (b) Nemene la itre hnyinge hna troa sa ngöne la tane mekune ka troa xulu?
17 Tune kaa fe së? Tro fe kö sa hane nyitipune la tulu i Keriso me aqane ipië i nyidrë? Ame e Amagedo, tro Iesu Keriso Joxu a amelene hi la itre ka ipië me meköt. Celë hi matre maine easa ajane troa mel, epi tha tro kö a patr la ipië the së. Haawe, maine hetrenyi the së la ipië, tro hë së me itre xane fe a kapa la itre manathith ka nyimutre, tui Iesu.
18 Nemene la ka troa xatua së matre hane fe së ipië tui Iesu? Nemene la nyine tro sa kuca matre tro pala hi sa ipië ngacama jole ju hë? Tro sa sa la lue hnyinge celë ngöne la tane mekune ka troa xulu.
[Thying]