“Ini Ni Jë Troa Kuca La Hanengë i Cilie”
24-30 DISEBA 2012
NYIMA: 69, 120
“Ini Ni Jë Troa Kuca La Hanengë i Cilie”
“Ini ni jë troa kuca la hanengë i cilie, ke cilieti la Akötesingö.”—SAL. 143:10.
ISA LAPA MEKUNE JU PË HË
Nemene la hnei Davita hna kuca nyine troa amamane ka hape, hnei angeic pala hi hna thele troa hetrenyi la aqane wai ewekë i Iehova?
Nemene la hnei Davita hna kuca matre atreine jë angeice xom la aqane wai ewekë i Akötresie, ngöne la nöjei götrane la mele i angeic?
Nemene la nyine tro sa kuca matre tro pala hi sa amadrinë Akötresie?
1, 2. Nemene la eloine la troa atre la aja i Akötresie? Nemene la eloine la troa atre la pengö i Davita Joxu?
ATRE fe kö nyipunieti la eloine la i map? Maine tro sa xom la i map, tre tro ej a amamai së la itre xa hnepe götrane me itre hmeene gojeny, matre atre jë së la gojenyi ka loi nyine troa xom. Ka tune fe la easa thele troa kuca la aja i Iehova. E atre hnyawa ha së la nyine troa kuca thenge la aja i Nyidrë, memine la pengöne la ketre jole hne së hna ixelë memin, haawe tro hë së lai a atreine xomi mekune hnyawa. Nge tro hë sa xötrëne “la gojeny” hnei Nyidrëti hna upi së troa trongën.—Is. 30:21.
2 Hnei Davita Joxu i angetre Isaraela ekö, hna tupath pala hi troa xom la aqane waiewekë i Akötresie. Hna kuca tune hi lai hnei Davita ekö, matre atreine nyidrë troa mele thenge la aja i Akötresie. Eje hi, Davita la ketre atr ka nyi hlue i Iehova ce memine la hni ka pexej. Tro sa ce wange jëne la tane mekune celë, lo aqane cile i Davita kowe la itre ejolene la mele i nyidrë, memine la itre ini nyine tro sa xom qa ngön.—1 Ite jo. 11:4.
KA METRÖTRËNE DAVITA LA ËJE I IEHOVA
3, 4. (a) Pine nemene matre cile jë hi Davita troa isi me Goliatha? (b) Nemene la aqane goeëne Davita la ëje i Akötresie?
3 Ame lo Davita a thöth, hnei angeice hna cile troa isi me Goliatha, atre Filisiti. Pine nemene matre cile jë hi Davita troa isi memine lai atr ka tru matran, ka lue hnaapëne jë kö la ehoean, nge ka cile fë la itre jia ne isi ka catr? (1 Sam. 17:4) Hnene jë kö laka, ka tha xou kö angeic, maine hnene laka, ka lapaune angeice koi Akötresie? Nyipi ewekë lai lue ewekë cili, ngo ame la sipu kepine matre Davita a atreine cile koi Goliatha, tre hnene laka ka metrötrë Iehova angeic memine la ëje i Nyidrëti ka sisitria. Hnei Davita hna elëhni pine la hna ithanata akökötreny hnei Goliatha kowe la nöje i Akötresie. Celë hi matre öni angeic: “Dei nyëne ate Filisiti ce ka tha hna peritomon ? mate tro nyën’ a iehnaeane la ite ishi Akötesie ka shewengönie ?”—1 Sam. 17:26.
4 Thöthi Davita, ngo hnei angeice hna qaja koi Goliatha ka hape: “Hmunë a traqa fë koi ni la taua, me jo, me wanajo ; ngo ini a traqa koi hmunë ngöne la atesiwa i Iehova ne sabaoth, Akötesi ne la ite ishi angete Isaraela lo hnei hmunë hna iehnaean.” (1 Sam. 17:45) Hna ane jë hi Davita la ca wene etë, nge angeic a tha trehle Goliatha ju fe; ame hna meci pi. Haawe, ixatua qaathene la nyipi Akötresieti la hnei Davita hna mejiune kow. Ngöne la mele i angeic, hnei Davita pala hi hna mejiune koi Iehova me metrötrëne la ëje i Nyidrë. Nge hnei Davita fe hna upi angetre Isaraela ekö troa hane ‘selëne’ la ëje i Iehova.—E jë la 1 Aqane lapa ite Joxu 16:8-10.
5. Nemene la nyine tro epuni a kuca e tha metrötrë Iehova kö hnene la itre atr enehila, tui Goliatha ekö?
5 Hapeu, madrine fe kö nyipunieti troa nyi hlue i Iehova Akötresie? (Iere. 9:24) Nemene la hnei nyipunieti hna kuca e qaja angazo Iehova ju, maine hnyima fë pena la itre hlue i Nyidrë hnei itre ka lapa ezi nyipunie, maine hnei itre sine huliwa maine sine ini, maine itre sinee pena hi? Hapeu, tro kö nyipunieti a isigöline la ëje i Iehova me mejiune kowe la ixatua i Nyidrë, e qaja angazo Akötresieti ju hnei angatr, tui Goliatha ekö? Nyipici laka, ame itre xa ijin, tre ma loi e tro hi sa “lapa thaup,” ngo tha tro pe sa hmahmane laka, Itretre Anyipici Iehova së, me itretre xötrethenge Iesu. (Ate cai. 3:1, 7; Mar. 8:38) Loi e tro pala hi a menyike la aqane sa së, ngöne la easa ithanata kowe la itre atr ka tha metrötrë Iehova kö memine la maca qaathei Nyidrë. Ngo tha tro kö sa tune lo angetre Isaraela ekö ka “hmengöhmengöne me qou atraqat” ngöne lo angatr a drenge lo itre ithanata i Goliatha. (1 Sam. 17:11) Tro pe sa canga sa göi troa isigöline la ëje i Iehova ka hmitrötr, nge matre atre jë itre atr la nyipi pengö i Iehova Akötresie. Nge huliwane jë së la Tusi Hmitrötr me xatuane la itre atr troa atre la kepine matre nyipi ewekë tro angatr a hane atre Akötresie.—Iako. 4:8.
6. Nemene la sipu kepine matre isi jë Davita me Goliatha? Nemene la ewekë nyine tro sa wange atrune catrëne ngöne la mele së?
6 Hetre ketre ini fe hne së hna xom qa ngöne la pengö i Davita me Goliatha. Ame la Davita a nyenyape kowe la hnë isi, öni angeic e hnyinge ka hape: “Nemene la troa kuca kowe la ate ate humuthe lai ate Filisiti me apatene la hmahma qa thei angete Isaraela ?” Hna sa koi angeice hnene la nöjei atr e cili: “Tro la joxu a atena mone atrunyi angeic, me hamë angeice la nekö i nyidë jajiny.” (1 Sam. 17:25-27) Tha eje kö lai, la ewekë hna pi ajane catrëne hnei Davita. Hetre ketre ewekë kö ka sisitria catre koi angeic. Angeic a ajane troa atrune la nyipi Akötresie. (E jë la 1 Samuela 17:46, 47.) Nge tune kaa easë, nemene fe la ka sisitria catr koi së? Ene la troa hlemu la sipu ëje së, me qaja aloinyi së hnene la nöjei atr? Hapeu ka tru kö koi së la troa trene mani, me troa hlemu ngöne la fen? Ohea, pi tro pe sa qaja tui Davita, lo angeic a sili nyima, ka hape: “Ce me ini ju troa atrunyi Iehova ; nge tro sha cengöne adraiëne la atesiwa i nyidë.” (Sal. 34:3) Loi e tro sa mejiune koi Akötresie me wange atrune la ëje i Nyidrë, hune la sipu ëje së kö.—Mat. 6:9.
7. Tro sa acatrene tune kaa la lapaune së, matre tro sa catre cainöj, ngacama tha pi drei së kö hnene la itre atr?
7 Ame la ka nyipi ewekë ekö koi Davita ngöne la ijine cili, tre ene la troa lapaune me mejiune koi Iehova; celë hi la ka hamë trenge catre koi angeice troa isi me Goliatha. Ame lo Davita a thupë mamoe, hnei angeice pala hi hna inine troa mejiune koi Iehova ngöne la nöjei drai. Celë hi lai ka akökötrene thei angeice la lapaun. (1 Sam. 17:34-37) Nyipi ewekë mina fe koi së troa hetrenyi la lapaune ka catr, matre tha tro kö sa cile troa catre cainöj, ngacama tha pi drei së kö hnene la itre atr. Tro ha catre la lapaune së, e hne së pala hi hna mejiune koi Akötresie ngöne la nöjei götrane la mele së. Ka tune ngöne la easa tupath troa ithanata Tusi Hmitrötr memine la atr ka lapa ezi së ngöne la easa ti kar, maine avio pena. Nge tro fe sa thele troa ithanata memine la itre atr hne së hna ixelë memine e cahu gojeny, la easa cainöje ngöne la itre hnalapa trootro.—Ite hu. 20:20, 21.
KA TRU CATRE KOI DAVITA LA AJA I AKÖTRESIE
8, 9. Ame lo kola weji Davita hnei Saulo, hnei Davita hna amamane tune kaa, laka, ka tru koi angeice la troa metrötrëne la aja i Iehova?
8 Kola mama la aja i Davita troa mejiune koi Iehova, ngöne la angeic a catre thele troa xome la aqane goeëne Iehova lo pane joxu i angetre Isaraela, ene Saulo. Ka zalu catre Saulo ekö koi Davita. A köni a thele nyidrë troa jaqa Davita hnei jo. Ngo hna neëne pala hi hnei Davita, nge tha hnei angeice pena kö hna mekune troa bëeke kowe lai joxu. Celë hi matre, qaane ju hi lai Davita pala pë hë a kötre Saulo. (1 Sam. 18:7-11; 19:10) Thupene lai, Saulo a iëne jë qa ngöne la nöje Isaraela la 3 000 lao trahmany, matre troa thele Davita ngöne la hnapapa. (1 Sam. 24:2) Ame ju hi la ketre ijin, traqa ha Saulo kowe la ngönemenyi hna pune zae ngön hnei Davita me itre sine xöle i angeic. Maine ju, tro Davita a mekune ka hape, ijine tro hi angeice lai a humuthi Saulo, ke ase hë Akötresieti qaja koi Davita ka hape, angeice la ka troa joxu, hna i Saulo. (1 Sam. 16:1, 13) Hna uku Davita hnene la itre sine tronge i angeice troa humuthi Saulo. Ngo öni Davita: “Iehova a shewe ni, troa kuca la ewekë celë kowe la joxung ate hna siëne hnei Iehova, troa kuci nyidë, ke siana i Iehova nyidë.” (E jë la 1 Samuela 24:4-7.) Eje hi, siana i Iehova pala hi Saulo, nge tha ajane kö Davita troa humuthi nyidrë, ke tha ase pala kö Iehova ami Saulo qa ngöne la hnëqa ne joxu. Hnei Davita hi hna thupa metrötrëne la pune la ixeetre i Saulo. Hatrene hi lai laka, patre fe kö thei Davita la mekune troa lepi Saulo, ngacama hetre ijine i angeice hi.—1 Sam. 24:11.
9 Ame lo Davita a öhne tixenuë Saulo, hnei angeice hmaca kö hna metrötrë Saulo, ke “siana i Iehova” pala hi nyidrë. Ame ngöne la ijine cili, hnei Davita me Abisai hna traqa ngöne la ketre götran me öhnyi Saulo e meköle ngöne la hnei nyidrë me itre sine tronge i nyidrë hna mano. Kola mekune hnei Abisai ka hape, hnei Akötresieti hi lai hna kuca matre tro Saulo a tro kowe la götrane cili, me aijijë Davita troa humuthi nyidrë. Angeic a qaja koi Davita, ka hape, tro kö angeic a jaqa Saulo hnene la jo i angeic. Ngo hna sewe angeice hnei Davita. (1 Sam. 26:8-11) Ngacama qaja ju hë Abisai la itre ithanata cili, ngo eje pala hi la aja i Davita laka, tha tro kö a kuca la ketre ewekë kowe la joxu hna siëne hnei Iehova, ke, Davita a lapa treqe Iehova hnyawa, me thele la ixatua i Nyidrë.
10. Nemene e itre xa ijine la itre xa aqane iajojezi hne së hna melën? Ngo nemene la ka troa xatua së troa catre kuca la aja i Iehova?
10 Maine jë tro fe itre xan a uku së troa kuca la hnei angatre hna mekune ka hape ka loi, ngo tha xatua së pe troa kuca la aja i Iehova. Ame itre xan, angatr a upi së troa canga axecië mekun, ngo tha pane nue së pe troa atre la mekuna i Iehova göne lai ewekë hne së hna melën. Aqane ujë i Abisai hi lai koi Davita. Maine tha ajane kö së troa hane ajojezi së tun hnene la itre atr, loi e tro sa atre hnyawa la mekuna i Iehova göne la hne së hna melën, me ajane catrëne troa kuca la aja i Nyidrë.
11. Hnei Davita hna amamane tune kaa ka hape, ka tru pala hi la aja i Akötresie ngöne la mele i angeic? Tro sa nyitipu Davita tune kaa?
11 Hnei Davita ekö hna thithi koi Iehova Akötresie, me hape: “Ini ni jë troa kuca la hanengë i cilie.” (E jë la Salamo 143:5, 8, 10.) Tha hnei Davita kö hna tro thenge la itre sipu mekuna i angeice kö, nge tha hnei angeice kö hna kei thenge la hna qaja hnei itre xan. Aja i angeice pe troa ini angeice hnei Akötresie. Öni angeic: “Ini a lapa mekun’ asë la ite huliwa i cilie ; ini a mekune la hna kuca hnene la lue ime i cilie.” Ijije tro fe sa atre la aja i Akötresie tui Davita, e hne së hna inine hnyawa la Tusi Hmitrötr me thele troa atre la aqane eatrongëne Iehova ekö la itre atr.
TROTROHNINE HI DAVITA EKÖ LA AQANE TROA TRONGËNE LA ITRE TREPENE MEKÖT
12, 13. Pine nemene matre nenge jë Davita lo timi hna traqa fë hnene lo ala kön?
12 Hetre ketre ini nyine tro sa xom qa ngöne la aqane ujë i Davita. Trotrohnine hi Davita ekö la aqane troa trongëne la itre trepene meköt, nge hetre aja i angeice troa melën. Ame la trepene meköt, tre ketre trenge nyipici hi ka xatua së troa atreine ië ewekë hnyawa, me trotrohnine la mekuna i Akötresie göne la itre ewekë hne së hna melën. Nge ame ngöne la itre xa wathebo i Iehova, tre ijije hi tro sa öhne la ketre trepene meköti nyine troa trongën. Hanawange la tulu thei Davita; hnei angeice hna qaja ngöne la ketre drai ka hape, angeic a pi iji la timi ne “la ani qa Bethe-leema.” Ame la engazon tre, hna thupëne la lapa e Bethe-leema hnene la angetre Filisiti. Ngo hnene la ala köni hna nue la mele i angatre troa tha timi ngöne la götrane cili. Tha hnei Davita kö hna iji lai tim. Hnei angeice pe hna “nenge eje koi Iehova.” Pine nemen? Öni Davita: “Tha tro kö ni a kuca la ewekë cili, Akötesingö ; tro ni a iji la madra ne la ite ate celë maine meci hë ? ke hnei angate hna tro fë eje maine meci hë angat.”—1 A. l. ite jo. 11:15-19.
13 Atre hi Davita la hna qaja hnene la Wathebo göi madra, ka hape, tha tro kö a öni, loi pe troa nenge koi Iehova. Nge atre fe angeice la kepine matre acile jë la wathebo celë, nge trotrohnine hë angeice laka “mele ne la ngönetei la madra.” Ngo hnauëne laka tha iji ju kö Davita la tim, ke tha madra kö lo lai hna traqa fë ngo timi pe? Hnene laka, hnei angeice hna inine la hna qaja hnene la wathebo göi madra. Atre hi angeice laka, ka tru catre koi Iehova la madra. Hnene lo lai ala köni hna nue mel, göi troa tha lai tim; nge e tro Davita a ij, tre kösë lo tha metrötrëne kö angeice la madra i angatr. Qa ngöne lai, tha iji ju kö Davita la tim; ngo hnei angeice pe hna nenge hnadro eë.—Lev. 17:11; Deu. 12:23, 24.
14. Nemene la ka xatua Davita troa ië ewekë hnyawa matre amadrinë Iehova?
14 Wathebo i Akötresieti la ewekë hna wange atrune catrëne ekö hnei Davita ngöne la mele i angeic, ke drei la hnei angeic hna sili nyima, ka hape: “Akötesingöti fe, madine ni troa kuca la aja i cilie, nge e kuhu hninge la wathebo i cilie.” (Sal. 40:8) Ka inine Davita la wathebo i Akötresie, me lapa mekune la itre hnei angeice hna ini. Atre hi angeice laka, e tro angeic a trongëne la itre wathebo i Iehova, tro angeic a kepe thangane ka loi qa ngön. Ame la aja i Davita, tre tha ene casi kö la troa trongëne la Wathebo i Mose, ngo memine fe la itre trepene meköti ka mama koi angeice qa ngöne la trenge wathebo cili. Ame la easa ini Tusi Hmitrötr, tre loi e tro sa sine thele la itre mekune hne së hna e. Aqane tro hi së lai a trongëne la itre trepene meköt ngöne la nöjei drai ne mele së, me atreine iëne la itre mekune ka amadrinë Iehova.
15. Kola mama tune kaa ka hape tha trongëne hë Solomona la Wathebo i Akötresie?
15 Tru catre ekö la aqane amanathithi Solomona, nekö i Davita, hnei Iehova. Ngo ame hë e thupen, tha trongëne hmaca kö angeice la itre wathebo i Akötresie. Tha drenge kö angeice lo wathebo hnei Iehova hna hamëne kowe la itre joxu i angetre Isaraela hna hape, tha tro kö a nyimu föe. (Deu. 17:17) Nyimu föe trehnyiwa hna xom hnei Solomona. Ame hë la Solomona a qatr, hnene la itre fö i angeic hna huli angeic “troa xöte thenge la ite haze menu.” Thatre pë hë së la aqane thele kepine Solomona matre tha trongëne kö angeice la Wathebo i Akötresie, ngo kola mama laka ame hë e thupen, “Solomona a kuca la ngazo xajawa i Iehova, nge tha hna nyipi xöte thenge Iehova tui Davita keme i nyidë.” (1 Ite jo. 11:1-6) Haawe, loi e tro sa drengethenge la itre wathebo me itre trepene meköt hne së hna inine ngöne la Wesi Ula i Akötresie! Nyipi ewekë tro sa idrei, ngöne la easa mekune troa faipoipo.
16. Nemene la ini hne së hna xom qa ngöne la wathebo i Iehova ka upi së troa faipoipo “göi joxu hmekuje hi”?
16 Maine wesiwesi jë hi koi së hnene la ketre atr ka tha ce hmi kö me easë, nemene la hne së hna troa kuca? Tro kö sa thele troa atre la mekuna i Akötresie, tune la aqane kuca i Davita ekö, maine drei simine pena la itre wathebo i Nyidrë, tui Solomona? Ase hë amekötine kowe la itre nyipi Keresiano troa faipoipo “göi joxu hmekuje hi.” (1 Kor. 7:39) E traqa jë pi faipoipo la Keresiano, loi e tro angeic a ixomi me ketre Keresiano. Easa trotrohnine jëne la trepene meköti celë, ka hape, tha ajane kö Iehova tro sa iatre memine la itre atr ka tha ce hmi kö me easë. Haawe, the tro kö sa pi föene la atr ka tha ce hmi kö me easë nge ketre, loi e troa amamane koi angeic ka hape, tha hmeku i easë kö angeic.
17. Nemene la ka troa xatua së troa cile kowe la itupath troa goeëne la itre iatr ka ngazo?
17 Kolo fe a ini së hnene la aqane thele Davita troa atre la mekuna i Akötresie, troa cile kowe la itupath troa goeë iatr ka amamai kuci huliwa ka sis. E jë la itre mekene tusi celë, matre troa thele la itre trepene meköti hna qatrenge hnene itre ej; nge thele jë troa atre la aqane goeëne Iehova la itre pengöne iatr ka tune lai. (E jë la Salamo 119:37; Mataio 5:28, 29; Kolose 3:5.) Maine easa ajane troa cile kowe la itupath troa goeëne la itre iatr cili, loi e tro sa sine thele la itre trepene meköt i Iehova ka draië.
THELE JË TROA XOM PALA HI LA AQANE WAI EWEKË i AKÖTRESIE
18, 19. (a) Hnei nemene matre atreine jë Davita amadrinë Akötresie, ngacama ka tha pexeje kö angeic? (b) Nemene pë hë la nyine tro sa isa catre kuca?
18 Ngacama hnei Davita hna amamai tulu ka loi koi së, ngo hetrenyi fe la itre ewekë ka ngazo hnei angeice hna kuca. (2 Sam. 11:2-4, 14, 15, 22-27; 1 A. l. ite jo. 21:1, 7) Ngo ame pe hnei Davita pala hi hna ietra, ke hetrenyi angeice la “hni ka pexeje;” kolo lai a hape, ka pexeje la aqane huliwa i angeice koi Akötresie. (1 Ite jo. 9:4) Nemene la ka anyipicine lai? Hnei Davita pala hi hna thele troa xom la aqane wai ewekë i Akötresie, me kuca la itre ewekë ka amadrinë Nyidrë.
19 Ngacama ka tha pexeje kö së, ngo ijije fe hi tro sa hane amadrinë Iehova. Qa ngöne lai, catre jë së inine pala hi la Wesi Ula i Akötresie, me sine thele la itre ini hne së hna kapa, me canga trongëne la itre hne së hna trotrohnin. Aqane tro hi së lai a kuca matre tro fe sa hane tune lo lai atre cinyihane la Salamo, ka qaja cememine la hni ka ipië ka hape: “Ini ni jë troa kuca la hanengë i cilie.”
[Thying]