Epi Tro Pala Hi Së a “Itete Hunuma Trotro”
11-17 FEBUARE 2013
NYIMA: 107, 40
Epi Tro Pala Hi Së a “Itete Hunuma Trotro”
“Ini a iele nyipunie ite tenyiwa me itete hunuma trotro, ka hape, iananyipi nyipunie memine la ite aja i ngönetei.”—1 PET. 2:11.
TROA SA TUNE KAA?
Pine nemene matre qaja jë së ka hape, ame la itre hna iën, tre, itretre hunuma trootro?
Hnauëne laka qaja jë ka hape, itretre hunuma trootro la “ite xa mamoe”?
Nemene la ewekë ka troa traqa elanyi hnei epuni hna lapa treqene hnyawa?
1, 2. Drei lai hna hëne hnei Peteru ka hape “ange hna iëne”? Pine nemene matre hë angatre jë hnei angeice ka hape, “itete hunuma trotro”?
KOLA traqa kowe la 30 lao macatre thupene la hnei Iesu hna elë hnengödrai eë, hnei Peteru aposetolo hna cinyihane kowe la ketre lapa, hna hëne ka hape “itete hunuma trotro,” itre ka lapa e “Poneto, me Galatia, me Kapadokia, me Asia, me Bithunia.” Hna hë angatre fe ka hape, “ange hna iëne.” (1 Pet. 1:1, 2) Peteru a cinyihane kowe la ange hna iëne cili, ene lo ange hna qaja kow ka hape, hna “hnaho shë hmaca pi . . . kowe la mejiune ka mel,” nge itre ka troa ce joxu me Keriso e hnengödrai. (E jë la 1 Peteru 1:3, 4.) Ngo pine nemene kö matre hëne jë angeice la itre hna iëne cili ka hape “ite tenyiwa me itete hunuma trotro”? (1 Pet. 2:11) Nge pine nemene matre nyipi ewekë tro sa atre la aliene la aqane hë angatre celë, ngacama ala xalaithe hi angatre ngöne la fen?
2 Ame ekö lo hneijine ne lo itre pane Keresiano, meköti hnyawa e troa hëne la itre hna iëne ka hape, “itete hunuma trotro.” Ame la itre hna iën, tha itre ka tro kö a mele epine palua e celë fen. Öni Paulo aposetolo, ketre hna iën, nge ketre atrene lo “hnënge mamoe ka xalaithe,” ka hape, ame la itre hna iën, tre, nyipi nöje i angatr e hnengödrai. Öni angeic: “Ej’ e hnengödrai la nyipi nöje shë ; nge eësha teqene la Ate amelene qa koho, ene la Joxu Iesu Keriso.” (Luka 12:32; Fil. 3:20) Kolo hi lai a hape, thupene la kola meci hnene la itre hna iën, angatr a tro pi qa la fen ka lapa fene la musi Satana, troa kapa e hnengödrai la mel, nge tro ha patre palua thei angatre la mec. (E jë la Filipi 1:21-23.) Pine laka “itete hunuma trotro” angatr, xoxopatre hi la mele i angatr e celë fen.
3. Nemene la nyine tro sa hnyingëne göne la “ite xa mamoe”?
3 Tune kaa fe la pengöne lo “ite xa mamoe”? (Ioane 10:16) Kola qaja hnene la Tusi Hmitrötre ka hape, hetrenyi thei angatre la mejiune troa nyi atrene paluane la fen. Tro angatre a mele uti hë epine palua. Ngo hnauëne kö matre qeje angatre jë fe ka hape, itretre hunuma trootro?
“KOLA AWE, . . . LA ITE EWEKË HNA XUP’ ASË”
4. Nemene la ewekë hnene la itre atr hna thatreine apatrene jëne politik, maine sias maine mani?
4 Pine laka tha ase pala kö Iehova apatrene la fene ka ngazo i Satana, tro la nöjei atr asë, me itre Keresiano fe a akötre pine la hna pi tru hnei Satana koi Iehova. Hne së hna e ngöne Roma 8:22 ka hape: “Ate hë shë laka, kola awe, me thë la ite ewekë hna xup’ asë uti hë enehila.” Hetrenyi la itre atr ka xome la politik, maine sias, maine mani, nyine troa thele loi kowe la mele ne la atr. Ngo thatreine jë pi kö la itre atr cili troa apatrene la akötre ne la atr.
5. Qaane lo macatre 1914, nemene la ewekë ka xecie e kuhu hni ne la itre milio lao atr, nge pine nemen?
5 Qaane lo macatre 1914, xecie hë e kuhu hni ne la itre milio lao atr tro angatr a itre jini Iesu Keriso, lo hna acile hnei Akötresie troa Joxu. Xele fe kö la itre jini Iesu ma hane lö hnine la fene i Satana. Nge tha ajane fe kö angatre troa sajuëne la fene cili. Ngo angatre pe a huliwane la mele i angatre me itre hnei angatre hna hetrenyi matre troa cilëgöline la Baselaia i Akötresie.—Rom. 14:7, 8.
6. Pine nemene matre hëne asë jë la Itretre Anyipici Iehova ka hape, itre trenyiwa maine itretre hunuma trootro?
6 Ame la Itretre Anyipici Iehova, tre itre ka atreine ce mele angatre me itre xa atr, kola mama lai ngöne la 200 nge sine lao nöj. Mele ju hë angatre ngöne la nöjei götrane la fen, ngo ceitu i angatre pala hi me itre trenyiwa me itretre hunuma trootro. Ka tha hane kö angatre lö hnine la politik, maine thele nyin la itre jole ka traqa kowe la itre atr ngöne la nöje hnei angatre hna mele ngön. Haawe, angatre a waipengöi angatre hë enehila ceitu me itre atrene la nöje ka hnyipixe lo hna thingehnaeane hnei Akötresie. Madrine catre angatr, ke, xalaithe pe hi la itre drai ne tro angatre a hunuma trootro ngöne la fene ka ngazo celë.
7. Tro la itre hlue i Akötresie a nyi atrene paluane tune kaa la fene ka hnyipixe?
7 Tha hmitre pe kö matre apatrene pi Iesu Keriso la fene i Satana. Tro la musi ka pexeje i Keriso a xome trije la ngazo me apatrene la akötr. Tro fe eje a apatrene trije la itre ka icilekeu memine la musi cile i Iehova. Thupene jë hi lai, tro pë hë la itre ka mele nyipici koi Akötresie a nyi atrene paluane la Paradraiso e celë fen. (E jë la Hna Amamane 21:1-5.) Haawe, tro ha nuamacane la itre hna xup asë qa ngöne la nöjei ewekë ka akötrëne la atr, ame hna traqa la nöjei atr asë “kowe la hna nue gufane ka hadehadeu ne la ite nekö i Akötesie.”—Rom. 8:21.
NEMENE LA AQANE TROA UJË HNENE LA ITRE NYIPI KERESIANO?
8, 9. Nemene la aliene la kola hape hnei Peteru, “iananyipi nyipunie memine la ite aja i ngönetei”?
8 Hnei Peteru hna qeje pengöne la aqane troa ujë hnene la itre Keresiano lo kola qaja ka hape: “Ange hnimina fe, ini a iele nyipunie ite tenyiwa me itete hunuma trotro, ka hape, iananyipi nyipunie memine la ite aja i ngönetei, itete ishi memine la u.” (1 Pet. 2:11) Hane hi la ihaji Peteru kowe la itre Keresiano hna iën, ngo nyine tro fe a trongëne hnene lo itre xa mamoe i Iesu.
9 Ame la itre xa aja, tre, tha itre ka ngazo kö e troa melëne thenge la itre tulu hna amekötine hnene la Atre Ixup. E tro sa melëne thenge la tulun, tro sa öhnyi madrine qa ngön. Hanawange la ketre ceitun, hetre itre aja ne la atr, tune la kola pi xeni la ketre xeni ka loi, maine kola pi iji la ketre nyine iji ka loi. Ketre ka thue madrine koi së la easa traqa itronyi troa ce lapa ne ce madrine memine la itre atr hne së hna nyisinen. Ketre ka thue madrine kowe la atr la troa ce meköle trefën e hnine la faipoipo. (1 Kor. 7:3-5) Ngo ame la hnei Peteru hna qaja hnyawa e celë, tre, ene la “ite aja i ngönetei.” Kolo hi a qaja la itre aja ka ngazo ne la ngönetrei. Hnene la itre xa Tusi Hmitrötre hna ujëne ka hape, “itre hna ajane ka ngazo ne la ngönetrei” (King James Version) maine “itre aja ka ngazo.” (New International Version). Hnei Iehova hna qaja koi së la aqane tro sa mel, me eatrëne la itre nyipi aja së. Tha tro kö sa nue la itre aja i atr troa angazone la aqane imelekeu së me Akötresie. Maine tro sa tro thenge la itre aja së ka ngazo, tro itre eje lai a tro xomi së kowe la mec.
10. Nemene la itre aqane thele jëne Satana troa tupathe la itre Keresiano matre tro angatre a hane sine la fene i angeic?
10 Satana a ajane tro sa thëthëhmine ka hape, “itete hunuma trotro” së ngöne la fene celë. Aja i angeice tro sa mele koi mo, me kowe la itre ewekë ka sis, me pi mama, me pi iwajahuj, me sipu atrune la nöje së. Ngo nyipi ewekë tro sa atrehmekune ka hape, ame la itre aja celë, tre, itre ihnö i Satana. E xecie hnyawa ha e kuhu hni së ka hape, tha tro kö sa trongëne la itre aja ka ngazo celë, easa hi lai a amamane hnyawa ka hape, xele fe së ma hane sine la fene ka ngazo i Satana. Easë hi lai a amamane hnyawa fe ka hape, easa mele hnine la fene celë ceitu me “itete hunuma trotro.” Ame la aja së ka tru, tre ene la troa nyi atrene paluane la nöje ka hnyipixe me ka meköti Akötresie. Nge tro sa huliwa catre matre tro sa traqa kowe la hna ie celë.
AQANE UJË KA LOI
11, 12. Nemene la aqane goeëne la itre xan la itre trenyiwa? Nemene la mekuna i itre xan göne la Itretre Anyipici Iehova?
11 Peteru pala hi a sisedrëne troa qeje pengöne la aliene kowe la itre Keresiano la tro angatr a “itete hunuma trotro” ngöne la xötre 12: “Loi e thina ka loi nyipunie qëmeke ne la nöjei ethen ; mate tha tro kö angat’ a qaja angazo nyipunie kösë ite ka ngazo thina ; loi tro angat’ a atrunyi Akötesie ngöne la drai ne xöji e tro angat’ a goeëne la nöjei huliwa ka loi nyipunie.” Ame la itretre hunuma trootro, tre itre trenyiwa, maine itre atr ka mele ngöne la ketre nöj, ngo tha zi angatre pe. Hna qaja angazone la itre trenyiwa pine laka ketre pengöi angatre kö, nge itre xan a wanga angazo angatr. Ame la aqane ithanata i angatr, me aqane huliwa, me aqane heetr, maine pengö i angatr; tre, ka isa pengöne kö memine la itre atrene la nöj. Ngo qa ngöne la eloine la aqane ujë i angatr, tro ha öhne hnene la itre xan ka hape, tha itre atr ka ngazo kö angatr.
12 Ceitune hi lai memine la itre nyipi Keresiano, isa pengöi angatre kö memine la angetre lapa easenyi angatr. Hanawange la ketre ceitun, angatre a ithanatane la itre ewekë ka isa pengön, me iëne la itre nyine iamadrinë ka isa pengön. Canga wangatrehmekunyi angatre hi hnene la itre atr hnei aqane heetr. Qa ngöne lai, itre xan a ‘qaja angazone’ la Itretre Anyipici Iehova. Ngo ame itre xan, kola qaja aloinyi angatre pine la eloine la aqane ujë i angatr.
13, 14. Kola hapeue lai hna qaja ka hape, “hna qaja amekötine la inamacane hnene la nöjei huliwa ne ej”? Nemene la itre ceitune ka anyipicine lai?
13 Qa ngöne la eloine la aqane ujë së, trotrohnine hë itre xane ka hape, pëkö kepine matre troa ‘qaja angazo’ së. Ngacama Iesu hmekuje hi la atre drenge thengene hnyawa Akötresie, ngo öni itre xane lo, hnei nyidrëti hna kuca la itre ewekë ka ngazo. Hnei itre xan hna jele tru hna xeni nyidrë, me tru hna ij, me ka nyisinene la itre atr ka ngazo. Ngo hnene la eloine la aqane ujë i nyidrë hna amamane laka, tha ka tune kö nyidrëti lai. Öni Iesu: “Hna qaja amekötine la inamacane hnene la nöjei huliwa ne ej.” (Mat. 11:19) Ka nyipici catre pala hi lai enehila. Hanawange la ketre ceitun, önine la itre atr ka lapa ezine la Bethela ne Selters e Alema, ka hape, ka nango ketre pengöne la aqane mele ne la itre atrene la Bethela. Ngo hna qaja aloine la itre atrene la Bethela hnene la Maire ne la traone cili, me hape: “Ame la Itretre Anyipicin ka huliwa e cili, ngacama hetre ketre aqane mele i angatre kö, ngo pëkö ethanyine lai kowe la mele ne la itre atrene la traon.”
14 Hanawange hmaca la ketre ceitun, hna upezöne la Itretre Anyipici Iehova ne Moscou e Russie ka hape, nyimu ewekë ka ngazo hnei angatre hna kuca. Hna qaja hnei itre xan ka hape, ame la Itretre Anyipici Iehova, itretre thi lapa, me upe la itre atr troa hnöjua, me xele ma kapa la itre ixatua göi troa nyinyine la itre mec. Ngo ame lo treu Juun macatre 2010, hnene la Hnakootre Ne Erop Asë Göi Troa Isigöline La Meköti Atr, e Strasbourg, France, hna amekötine ka hape, ka tria la hna kuca hnei Moscou, ke, hna hane upezöne menune la hmi ne la Itretre Anyipici Iehova, nge tha meköti kö tro angatr a wathebone la itre icasikeu i angatr. Önine la Hnakootre Ne Erop Asë Göi Troa Isigöline La Meköti Atr ka hape, ame la itre hnakootre e Russie, pëkö enyipicine ka amamane ka hape, hetre tria hna kuca hnene la Itretre Anyipicin. Kolo fe a qaja ka hape, hnene la itre hnakootre cili hna huliwane menune la itre trenge wathebo i Moscou göi troa upezöne menune la Itretre Anyipici Iehova.
QA SË TROA DRENGE THENGE LA ITRE MUS
15. Nemene la trepene meköti hna trongëne hnene la nöjei nyipi Keresiano?
15 Hetrenyi la ketre ewekë hna kuca hnene la Itretre Anyipici Iehova e cailo fen, ewekë hna amekötine kowe la itre Keresiano, nge hna amamane hnyawa hnei Peteru. Öni angeice ka hape tro sa drenge thenge “la nöjei wathebo i ate asë,” kola qaja fe la itre joxu me itre gavena. (1 Pet. 2:13, 14) Ngacama tha ka nyisinene kö la fen hnene la Itretre Anyipici Iehova, ngo angatre pala hi a drenge thenge la itre mus ke, [“hna nue itre eje hnei Akötresie troa cil,” MN] tune la aqane qaja koi angatre hnei Paulo.—E jë la Roma 13:1, 5-7.
16, 17. (a) Nemene la ka anyipicine ka hape, tha ka icilekeu kö së memine la itre mus? (b) Nemene la hna öhne hnene la itre ka cilë mus?
16 Maine “Itete hunuma trotro” la Itretre Anyipici Iehova ngöne la fene celë, ngo tha qa ngöne kö laka, angatr a pi icilekeu memine la mus maine thele troa qeje engazone la itre xa atr. Trotrohnine hi angatre ka hape, ame la itre atr, hetre ketre aqane waipengöne angatre kö la atre ka ijije troa cilëne la mus, maine aqane troa nyinyine la itre jole ka traqa kowe la atr. Maine ka kuci politik la itre xa hmi, ngo tha Itretre Anyipici Iehova fe kö. Tha ase kö angatre thele troa hule la itre hene ne la politik matre tro angatr a saze la aqane troa musi kowe la itre atr. Tha hane kö la Itretre Anyipici Iehova icilekeu memine la mus, maine tro pena a ukune la itre atr troa icilekeu memine la mus.
17 Hnei Peteru hna qaja ka hape: “Atrunejë la joxu.” Celë hi matre itre Keresiano a drengethenge la itre ka cilëne la mus matre troa amamane la metrötre i angatre me iatrunyi angatre kowe la itre atr cili. (1 Pet. 2:17) Ame itre xa ijin, öhne hnyawa hi la itre ka cilë musi ka hape, pëkö kepine e troa xouen la Itretre Anyipici Iehova. Hane hi la ketre ceitun, hnei Steffen Reiche, ketre atr ka cilë mus e Brandenburg, nge atrene fe la hna palemën e Alema, hna qaja ka hape, ame la Itretre Anyipici Iehova, ngacama hna kuca angazo angatre ngöne lo itre ijine i itre Nazi, ngo ka lolo pala hi la thiina i angatr. Tha saze kö la mejiune ne la Itretre Anyipicin kowe la itre ini hnei angatre hna kapa, nge lolo la aqane ce mele i angatre memine la itre sine lapa i angatr e kalabus. Ame la itre aqane ujë i angatre cili, tre ka nyipi ewekë catre kowe la nöje ka tune e Alema, pine laka kola elë catre la ixele ma wai trenyiwa, maine pena ka xele ma wange la atr e tha ka ce hmi kö me tha ka ce kuci politik kö me angatr.
EPI TRO SA AMAMANE LA IHNIMI SË KOWE LA ITRE TREJIN
18. (a) Pine nemene matre mele së hi la troa hnime la itre trejin asë, trahmanyi me föe? (b) Nemene la hna qaja hnene la itre xa atr göi Itretre Anyipici Iehova?
18 Hnei Peteru aposetolo hna cinyihane ka hape: “Hnimeju la ange tejin. Qouju e Akötesie.” (1 Pet. 2:17) Hetre xoue Akötresie thene la Itretre Anyipici Iehova, xou i angatre e troa ahleuhleunyi Nyidrë. Ame la aqane metrötrë Akötresie cili, tre, kola thue aja i angatre troa kuca la aja i Nyidrë. Madrine angatre troa sine la lapa ne la itre trejine e cailo fen me ce nyi hlue i Iehova. Angatre a hnime “la ange tejin.” Ala xalaithe pe hi la itre atr enehila ka hnime la itre xa atr. Celë hi matre kola sesëkötre hnene la itre ka tha ce hmi kö me easë, la kola wange la ihnimikeu the së. Hane hi la ketre ceitun, hna haine hnene la ketre föe ka ihamë trootro koi itre turis nge ka huliwa i avio (American travel company) la kola goeëne la ihnimi ka eje nyipine la itre trejine lo ijine kovasio atraqatr e Alema lo macatre 2009. Hnene la Itretre Anyipici Iehova ne Alema hna amamane la ihnimi angatre kowe la itre trejine me angatre ka traqa qa ngöne la itre xa nöj, me xatua angatre ngöne la hnepe ijine angatre e cili. Kola qaja madrine hnene lai ka huliwa i turis ka hape tha ase kö ni öhne la ketre lapa ka ceitu memine la Itretre Anyipici Iehova. Hetre atre fe kö hnei epuni hna hane drenge ka ithanata tune la, thupene la hna goeëne la kola ca lapa hnene la Itretre Anyipici Iehova ngöne la ketre kovasio?
19. Nemene la ewekë ka troa xecie e kuhu hni së, nge pine nemen?
19 Tune la hne së hna ce wang, hnene la Itretre Anyipici Iehova hna amamane ka hape angatr a mele tune la “itete hunuma trotro” ngöne la fene i Satana. Ka xecie hnyawa koi angatr laka, tro pala hi angatre a “itete hunuma trotro” cememine la madrin. Nyipici la mejiune i angatre troa nyi atrene paluane la fene ka hnyipixe me ka meköti Akötresie, ke, ka catre eje nge hna nyi trepene hnyawa. Hapeu, hni epuni fe hë ngöne la fene ka hnyipixe hne së hna treqen?
[Thying]