Hna Acasine La “Itete Hunuma Trotro” Ngöne La Nyipi Hmi
18-24 FEBUARE 2013
NYIMA: 124, 121
Hna Acasine La “Itete Hunuma Trotro” Ngöne La Nyipi Hmi
“Tro ite ate ne la ite nöj’ [trenyiwa] a eënyi hna i nyipunie me thupë vine i nyipunie. Nge troa ati ëje i nyipunie, Itete huje koi Iehova.”—IS. 61:5, 6.
TRO SA SA TUNE KAA?
Nemene la hna mekune hnei itre xan göi itre trenyiwa? Nemene la hna inine hnene la Tusi Hmitrötr göi aqane wai pengöi angatr?
Nemene la nyine tro la itre atrene la nöjei nöj a kuca?
Nemene la aliene matre hape jë, pëkö trenyiwa thene la Itretre Anyipici Iehova?
1. Nemene la aqane wai pengöne la itre trenyiwa hnei itre xan, ngo pine nemene matre ka ngazo la aqane mekune cili?
TUNE lo hne së hna ce ithanatane hë ngöne lo tane mekune hnapan, hnei itre xa atr hna xele ma wange la itre trenyiwa, maine itre ka traqa qa ngöne la itre xa nöj. Angatr a mekune ka hape, sisitria angatr hune la itre trenyiwa. Ngo ka ngazo la aqane mekune cili. Tha sisitria kö ketre hui ketre. Hnene la sine boroshüre (The Races of Mankind) hna qaja ka hape, ngacama isa pengöne la itre hane ikupeine la itre atr, ngo itre trejine asë hi angatre tune lo hna qaja ngöne la Tusi Hmitrötr. Ngacama tha ceitu kö la itre trejin, ngo itre trejine pala hi.
2, 3. Tune kaa la aqane waipengöne Iehova la itre trenyiwa ka mele e Isarala ekö?
2 Ame ngöne la itre hneijine ne la Tusi Hmitrötr, hnei Iehova hna isisinyikeu maine thingehnaeane koi angetre Isaraela, troa ië angatre thatraqai Nyidrë. Ngacama ka sisitria kö la aqane imelekeu i angatre me Iehova Akötresie, ngo hnene la Wathebo hna amekötine kowe la ange Isaraela troa ce mele memine la itre trenyiwa cememine la meköt me metrötr. Ketre ewekë lai nyine tro fe sa kuca enehila. Tha loi kö tro la itre Keresiano a waigelene menune la itre trenyiwa. Pine nemen? Öni Peteru: “Tha hnei Akötesieti hna iwangate hmekunyine ite ate, ngo hna kapa hnei anganyidëti la ate qoue nyidë me kuca la thina ka meköt, ngöne la nöjei nöj’ asë.”—Ite hu. 10:34, 35.
3 Lolo la mele ne la itre trenyiwa ekö e Isaraela. Pine nemen? Pine laka ka kapa Iehova la itre trenyiwa. Ame hë e thupen, hnei Paulo hna qeje Iehova ka hape: “Hape u, nyidëti la Akötesi angete Iuda hmekuje kö ? ngo tha angete etheni fe kö ? Eje hi, me angete etheni fe.”—Rom. 3:29; Ioela 2:32.
4. Pine nemene matre pë hmaca kö hna xome ceitu me trenyiwa hnine la “Isaraela i Akötesie”?
4 Thupene la hnei Akötresie hna isisinyikeu memine la ekalesia ne la ange hna iën, patre pi hi lo aqane imelekeu ka sisitria i Nyidrë ekö memine lo angetre Isaraela. Qa ngöne lai, ame hmaca pena la “Isaraela i Akötesie,” tre ene la ekalesia i ange hna iën. (Gal. 6:16) Hnei Paulo hna qeje pengöne ka hape ame hë hnine la nöje ka hnyipixe, tre, “tha ate Heleni nge ate Iuda, nge hna peritomone nge tha hna peritomone kö, nge ethen, nge ate Sekuthia, nge hlu, nge gufa, ngo Keriso la nöjei ewekë asëjëihë me ngön’ asë.” (Kol. 3:11) Celë hi kepine matre, pë hmaca kö hna xome ceitu me trenyiwa hnine la ekalesia i Keresiano.
5, 6. (a) Pine nemene matre hnyingëne thele jë hnene la itre xan la aliene la Isaia 61:5, 6? (b) Drei la “Itete huje koi Iehova” me itre “tenyiwa” hna qaja hnei Isaia? (c) Nemene la huliwa hna ce kuca hnene la “Itete huje koi Iehova” memine la itre “tenyiwa”?
5 Maine jë, tro la itre xan a thele mekune göne lo hna qaja ngöne Isaia mekene 61, lo kola qaja la ketre ewekë hna perofetane nge ka eatre kowe la ekalesia i Keresiano. Hnene la xötre 6 hna qaja ka hape, tro itre xan a huliwa ceitu me “Itete huje koi Iehova.” Ngo, xötre 5 a qaja ka hape, tro la itre “tenyiwa” a xatuane me ce huliwa memine lo “Itete huje.” Pine nemene matre qeje itre “tenyiwa” jë ngöne la xötre celë?
6 Ame la “Itete huje koi Iehova” cili, tre, ene lo itre Keresiano hna iën, angetre troa kapa la “mele hmaca hnapan” nge “tro angat’ a itete huje koi Akötesie me Keriso, nge tro angat’a ce musi me nyidë uti hë la ite macate ka ca thausan.” (Hna ama. 20:6) Hetre itre xa Keresiano fe ka mele nyipici, nge ka mejiune troa mele ngöne la Paradraiso e celë fen. Ame angetre mejiune kowe la mele e celë fen, tro angatre a ce huliwa me itre ka troa nyi hlue e hnengödrai. Ame la angetre mejiune kowe la mele e celë fen, tre, tha sine kö angatre la “Isaraela i Akötesie,” matre kösë itre trenyiwa angatr. Tru la madrine i angatre troa ce huliwa memine la “Itete huje koi Iehova” tune la itre ka “eënyi” me angetre “thupë vine” ngöne la hna menu. Angatre a xatuane la itre hna iën jëne la huliwa ne cainöje me hna inine la itre atr la nyipici. Itre hna iëne ju hë maine “ite xa mamoe” pena, ngo angatre asë hi a inine la itre atr la nyipici, nge angatre fe a xatuane cememine la ihnim, la itre atr troa melëne la itre hna inin.—Ioane 10:16.
“ITETE HUNUMA TROTRO” TUI ABERAHAMA
7. Nemene la ka aceitunëne la itre Keresiano enehila me Aberahama memine fe lo itre ka mele nyipici ngöne lo hneijine ekö?
7 Tune la hne së hë hna ce wange ngöne la tane ka ase hë, casi hi la pengöne la itre nyipi Keresiano memine itre trenyiwa, ke, “itete hunuma trotro” angatre ngöne la fene i Satana ka ngazo. Ceitu i angatre me Aberahama me itre xa ka mele nyipici lo hneijine ekö, xelene kö angatre la fene i Satana, “ite tenyiwa angate me itete tro agö, [maine hunuma trotro] e celë fene hnengödrai.” (Heb. 11:13) Itre ka mejiune ju hë së troa mele e hnengödrai maine e celë fen, ngo ijije hi troa sisitria la aqane imelekeu së me Iehova tui Aberahama. Hnei Iakobo hna qeje pengöne ka hape: “Hna lapau Akötesie hnei Aberahama, ame hna qaja eje koi nyidë nyine thina ka meköt ;” ame hna ati ëje i nyidë, ka hape, Enehmu i Akötesie.”—Iako. 2:23.
8. Nemene la hna thingehnaeane hnei Iehova koi Aberahama? Nemene la aqane wai pengöne Aberahama la hna thingehnaean?
8 Hnei Akötresieti hna thingehnaeane ka hape, tro la itre lapa asë ngöne la fen a manathith jëne Aberahama me itre matra i angeic. Tha ca nöje hmekuje kö la ka troa öhnyi manathithine la hna thingehnaeane celë. (E jë la Genese 22:15-18.) Ngacama troa eatre la hna thingehnaeane celë thupene la hna meci hnei Aberahama, ngo ka xecie hnyawa koi angeic laka, tro eje a eatr. Ame ngöne la mele i Aberahama asë, nyimu macatre ne angeice a lapa trootro, nge ka catre pala hi la aqane nyi ehnemu Iehova hnei angeic.
9, 10. (a) Tro sa xötre thenge tune kaa la tulu i Aberahama? (b) Nemene la ixatua nyine tro sa hamëne kowe la itre atr?
9 Ngacama thatre kö Aberahama ka hape, troa eatre eu lo hna thingehnaeane koi angeic, ngo hnei angeice pala hi hna hnimi Iehova me atrunyi Nyidrë. Tha hnei Aberahama kö hna thëthëhmine ka hape atre hunuma trootro angeic, celë hi matre tha hnei angeice kö hna thele troa mele hut tune la itre atre ne la nöj. (Heb. 11:14, 15) Nyipi ewekë tro sa xötre thenge la aqane mele Aberahama, ke, tha hnei angeice kö hna nyi ehacene la mel. Tha tro pi kö sa mekune ka hape, celë hi ka nyipi ewekë ngöne la mel la tro sa trenamo, maine troa atr ka mama ngöne la nöj, maine tro pena a cilëne la itre huliwa ka tru. Pine nemene matre tro sa thele mele ka loi tune la aqane mekune la itre xan nge easë hi a öhne ka hape tha hmitre pe kö matre patre pi la fene celë? Pine nemene matre tro sa hnine la fen, nge atre hi së laka tha ka huti kö? Tui Aberahama, tro sa lapa treqene la ketre ewekë ka sisitria kö hune la fene celë. Tro sa xomihnin me treqen, uti hë eatre la itre hna thingehnaeane hnei Akötresie.—E jë la Roma 8:25.
10 Ame la itre manathith hnei Akötresie hna thingehnaean jëne Aberahama me itre matra i angeic, tre, nyine thatraqane fe la nöjei atrene la nöjei nöj e celë fene enehila. Itre hna iën, ene lo “Itete huje koi Iehova” me itre “tenyiwa,” ene lo “ite xa mamoe” a qaja kowe la nöjei atr e cailo fen ngöne la 600 lao qene hlapa ka hape, Akötresieti a hë angatre troa atre pengöne la itre manathithi celë.
HNIME JU LA ITRE ATR NE LA NÖJEI NÖJ ASË
11. Nemene la nyine tro la itre atrene la nöjei nöj a kuca thenge la hna thithi fë hnei Solomon?
11 Hnei Solomona hna nue koi Iehova la ēnēti hmitrötr, la kola xötrei löthe eje lo macatre 1026 qëmeke i Keriso, nge ame la thithi hnei nyidrëti hna cile fë, tre hetre ixatua koi së qa ngön, ene la tro sa wai pengöne la itre atre ne la nöjei nöj asë tune la aqane wai pengöi angatre hnei Iehova. Hnei Solomona hna sipo Iehova troa shamatine, maine troa drenge la itre thithi ne la itre atr ne la nöjei nöj asë, lo itre ka traqa troa thithi ngöne la ēnē. Gojenyi ne tro hi angatre lai a kepe manathithine la hna thingehnaeane hnei Iehova koi Aberahama. Öni Solomona e thithi me hape: “Ame la tenyiwa ka tha sine kö la nöje i enëtilai angete Isaraela, ngo e traqa qa ngöne la nöje ga nanyi göi atesiwa i enëtilai ; (ke tro angat’ a denge la atesiwa i enëtilai ka tru memine la iwanakothemie i enëtilai ka cat, memine la themie i enëtilai hna xejë ;) nge e traqa angate me thithi ngöne la ēnēti celë ; shamatineju e hnengödrai, ene la hnamunë i enëtilai, me kuca tune la nöjei ewekë asë hna hë enëtilai ngöne hnene la tenyiwa ; mate ate la atesiwa i enëtilai hnene la ite nöje asë e celë fen, troa qoue enëtilai tune la hnei nöje i enëtilai angete Isaraela.”—1 Ite jo. 8:41-43.
12. Pine nemene matre ka ceitu hi la Itretre Anyipici Iehova me itre trenyiwa ne la nöje i angatr?
12 Ame la trenyiwa, tre, ene la atr ka ihamë ngöne la ketre nöj maine ka mele pena e cili, ngo tha zi angeice kö. Ka ceitu hi la Itretre Anyipici Iehova me itre trenyiwa. Ngacama angatr a jilapane la fen, ngo Baselaia i Akötresie e hnengödrai hmekuje hi la hnei angatre hna isigöline memine la Joxu ne ej, Iesu Keriso. Celë hi matre tha lö hnine kö angatre la itre politike hna kuca ngöne la nöje i angatr, ngacama catrehnine ju hë la ihuli itre xan.
13. (a) Nemene la aqane tro sa inine matre tha tro sa xome la itre atr ceitu me itre trenyiwa? (b) Nemene la aqane tro sa ce waipengö së asë, thenge la aja i Iehova ngöne la qaan?
13 Ame itre xa ijine canga tro mama hi la itre trenyiwa hnei aqane ithanata, maine aqane mel, maine aqane wai ewekë, maine aqane heetr. Isa pengöne ju hë la nöjei atr ka xulu qa ngöne la nöjei nöje asë, ngo hetre ewekë ka acasi angatr, nge ka sisitria catr. Celë hi matre e tro sa inine matre tha tro kö sa goeëne catrëne la isapengo së, tha tro hmaca kö së a xomi angatre ceitu me trenyiwa. E tro hi a ca musi maine ca nöj ngöne la fene hnengödrai asë, haawe, pë hmaca kö trenyiwa. Ame la aja i Iehova ngöne la qaan, tre, ca lapa hi fene la musi Nyidrë. Hapeu, ijije kö matre tha tro hmaca kö elanyi la itre atr ne la nöjei nöj asë a wange la itre xan ceitu me itre trenyiwa?
14, 15. Nemene la hna atreine kuca hnene la lapa ne la Itretre Anyipici Iehova?
14 Easë ngöne la fene hna melëne hnene la itre atr ka isa sipu meku angatre kö, itre ka mekune ka hape, nöje i angatre hmekuje hi la ka sisitria. Ngo ketre ka loi fe e tro sa atre ka hape, hetre itre atr ka hnime ceitune la nöjei pengön atr ngöne la nöjei nöj. Eje hi laka, troa traqa kowe lai e tro sa thele catrëne troa saze la aqane tro sa waipengöi itre xan. Hnei Ted Turner, lo atre nyiqaane ekö lo chaîne ne televizio, CNN, hna ce huliwa memine la itre atr ka hlemu e cailo fen. Öni angeic: “Qa ngöne lai, ame hë la eni a goeëne la itre atr cili e thupen, ene lai angetre traqa qa ngöne la itre xa nöj, tre tha goeë angatre hmaca kö ni ceitu me itre trenyiwa, ngo ceitu pe me itre xa atrene la fen ka tunge hi.” Thupene jë hi lai, angeic a wathebone ju kowe la itre ka huliwa i angeice troa qaja la hnaewekë hna hape, “trenyiwa.” Ngo troa nyihnane hnene la ketre hnaewekë hna hape “atre ne la fen.”
15 Itretre Anyipici Iehova hmekuje hi la lapa ngöne la fen la ka xötre thenge hnyawa la aqane wange i Akötresie la pengöne la nöjei atr ne la nöjei nöj asë. Hnei angatre hna inine troa waipengöne la itre atr tune la aqane waipengöne Iehova, nge amë hë la thangan, saze hë la hnei angatre hna mekune göi itre xan, me aqane waipengöne angatre la itre xan. Tha hnei angatre kö hna xele ma wange la itre atr ka traqa qa ngöne la itre xa nöj, nge tha hnei angatre kö hna mekune ka hape, trenyiwa lai tha nyine tro kö a mejiune kow. Madrine la Itretre Anyipici Iehova troa goeëne la nöjei pengön atr me itre hnei angatre hna atreine kuca. Tune kaa fe la mekuna i epun, öhne fe hi epuni la elolone laka atreine hi la Itrere Anyipici Iehova kuca la nöjei ewekë celë, nge öhne fe hi epuni la thangane ka loi qa ngöne laka saze hë la aqane goeene angatre la itre xa atr?
FENE ELANY GAA PË TRENYIWA NGÖN
16, 17. Nemene la pengöne la mele i epuni elanyi e eatre jë la hna qaja ngöne Hna Amamane 16:16 me Daniela 2:44?
16 Easenyi hë matre cile jë la nöjei nöj asë kowe la musi Akötresie ngöne la isi Amagedo. (Hna ama. 16:14, 16; 19:11-16) Ase hë sasaithe la 2 500 lao macatre enehila, thupene la hna qaja amë hnei perofeta Daniela la ewekë ka troa traqa kowe la musi atr. Hna cinyihane ka hape: “Ngöne la ite drai ne la ite joxu cili tro Akötesieti ne hnengödrai a axulune la kete baselaia ka tha tro kö a apaten’ epine palua ; nge tha tro kö a nue la baselaia cili kowe la ite xa nöj, tro ej’ a lep’ anyilanyilane me apatene la nöjei baselaia asëjëihë cili, nge tro ej’ a cile hut’ epine palua.”—Dan. 2:44.
17 Pane mekune jë la aliene la itre ewekë celë koi epun. Wange ju hi së enehila, kola xomi së ceitu me trenyiwa, pine laka hnene la atr hna acili fegone la itre nöj. Ngo e thupene Amagedo, pë hmaca ha ifego. Ngacama ka isa hetre pengöne pala hi la itre atr elany, ngo tro la itre pengöne cili a amamane la elolone la nöjei pengöne ewekë hnei Akötresie hna xup. Ka mingöminge catre la mele nyine tro sa kapa ngöne la itre drai ka troa xulu, celë hi matre catre pi së kuca la hne së hna atreine göi troa atrune me adraiëne la Atre Xupi së.
18. Nemene la nyine anyipicine ka hape, ame la Itretre Anyipici Iehova, tre, tha angatre kö a xomi itre xan ceitu me trenyiwa?
18 Hapeu, ijije fe kö matre tha tro hmaca kö la itre atr ne la fene celë a wange la itre xan ceitu me trenyiwa? Eje hi tro hi lai a traqa kow. Ame fe hë enehila, tha hnene kö la Itretre Anyipici Iehova hna wange la itre xa atr ceitu me trenyiwa. Ame la ketre ceitun, ase hë xome la itre huliwa hna kuca ngöne la itre bethela ka co, matre tro pena ha kuca ngöne la itre bethela ne la itre xa nöj. Ame la alien, tre, matre troa hmaloi e troa tro fë la huliwa ne cainöj. (Mat. 24:14) Ame la itre hna axeciëne cili, tre, tha hna xötre thenge kö la itre ifego ne la itre nöj, ngazo hi e hetre wathebo hna acil. Hnei Iesu Keriso, Joxu ne la Baselaia i Akötresie hna xatuane la Itretre Anyipici Iehova troa trotrohnine laka; tha tro kö la itre ifego ne la itre nöj a aisa angatr. Tha hmitre pe kö matre patre pi la itre ifego ne la itre nöj, ke, hune hë nyidrë, ene la “kola cate me troa cat.”—Hna ama. 6:2.
19. Nemene la hna atreine kuca hnene la Itretre Anyipici Iehova jëne la nyipici?
19 Ka xulu qa ngöne la nöjei nöje asë me nöjei qene hlapa la Itretre Anyipici Iehova. Nge hna icasinekeu angatre hnene la nyipici, nge tha tro kö a thë la casi angatr. (E jë la Zefania 3:9.) Casi hi la lapa i angatr e cailo fen. Ngacama angatre a mele hnine la fene ka ngazo enehila, ngo tha angatre kö a hane nyisinene ej. Hnene la casi ne la lapa celë enehila hna amamane ka hape, ame elanyi ngöne la fene ka hnyipixe, pë hmaca kö trenyiwa. Ame hë e cili, ame la itre atr ka troa mele e celë fen, tha kolo hmaca kö a wange ka hape, ka isapengöne angatr, maine atrene ketre nöje pena, maine ka ketre pengöne la hane kupein, ngo itre trejin asë.
[Thying]
[Iatr ne la götran 16]
Hapeu, tru fe kö la aja i epuni troa lapa treqene la fene ka pë ifegon, me ka pë trenyiwa ngön?