Itretre Thupë Ewekë Hna Mejiune Kow
4-10 FEBUARE 2013
NYIMA: 62, 125
Itretre Thupë Ewekë Hna Mejiune Kow
“Tha ite ewekë i nyipunieti kö nyipunie.”—1 KOR. 6:19.
TRO NYIPUNIETI A SA TUNE KAA?
Nemene la hnëqa ne la itretre thupë ewekë ekö hna qaja hnine la Tusi Hmitrötr?
Nemene la hnëqa hnei Akötresieti hna ahnithe kowe la itretre thupë ewekë i Nyidrë?
Nemene la aqane tro së, itretre thupë ewekë i Akötresieti a goeëne la hnëqa së?
1. Nemene la aqane goeëne la itre hlue hnene la itre atr?
HNENE la ketre atre Heleni ekö ka cinyany, hna qaja ka hape, pëkö atr ka sipu ajane kö troa nyi hlu. Ala nyimu la itre atr enehila ka mekune tui nyidrë. Angatr a goeëne la itre trahmanyi me föe ka nyi hlu, ceitu me itre hna musinëne troa huliwa, nge hna axösisin. Ame la kola huliwane la itre atr cili, tre göne matre troa kepe thangane hnei itre maseta i angatr, ngo tha göi angatre kö.
2, 3. (a) Nemene la pengöne la itre ka nyi hlue fei Keriso? (b) Nemene la itre hnyinge hne së hna troa ithanatan enehila?
2 Öni Iesu ka hape, tro la itretre drei nyidrëti a nyi hlu. Ngo tha kolo kö lo pengöne hlue hna qanangazone me hna axösisin. Ame la itre Keresiano ka nyi hlue tre, itre hnei nyidrëti lai hna mejiune kow, me wange atrun, ke pane mekune hmaca jë së lo ketre “hlue” hnei nyidrëti hna qeje pengöne ekö. Ame lo kola easenyine tro nyidrëti a mec, hnei Keriso hna qaja ka hape, tro nyidrëti a thue qa ne la “hlue ka nyipici me ka inamacan.”—Mat. 24:45-47.
3 Easa goeëne ngöne la tus i Luka ka hape, tha kolo kö a qeje “hlue,” ngo “ate thupe [“atre thupë ewekë,” MN]” pe. (E jë la Luka 12:42-44.) Tha itre Keresiano asë kö la itre ka sine la lapa ne la “ate thupe nyipici” hnei Iesu hna qaja ngöne la itusi celë. Ngo ame pe, kola mama hnine la Tusi Hmitrötr ka hape, itretre thupë ewekë asë hi la itre hlue i Akötresie. Nemene la itre hnëqa hna athipe koi së ngöne la easa huliwa i Akötresie? Nemene la aqane tro sa goeëne la itre hnëqa cili? Qëmekene troa sa la itre hnyinge celë, tro sa pane wange la aqane qeje pengöne hnei Tusi Hmitrötre la hnëqa ne la itretre thupë ewekë ekö.
ITRE HNËQA NE LA ATRE THUPË EWEKË
4, 5. Nemene la hnëqa ne la itretre thupë ewekë ekö, tune la aqane qaja hnene la Tusi Hmitrötr? Hamëne jë la itre xa ceitun.
4 Ame la itretre thupë ewekë hna qaja hnine la Tusi Hmitrötr, tre itre hlue hna mejiune hnyawa kow hnene la itre maseta i angatr. Nge ame la qa ne la atre thupë ewekë, tre ene la troa thupëne la hnalapa, maine hnë salem ne la maseta i angeic. Angeic a thupëne la trenge mani me itre ewekë ne la maseta i angeic, nge hna aijijë angeice fe troa musi hune la itre xa hlu. Ka tui Eliezera ekö; angeic la ketre hlue i Aberahama, nge nyimutre la itre ewekë i Aberahama hna ahnithe koi angeice troa thupën. Goi upi Eliezera fe Mesopotamia eë hnei Aberahama, matre troa thele föe i Isaaka, nekö i nyidrë. Ketre hnëqa ka tru lai hna ahnithe koi Eliezera!—Gen. 13:2; 15:2; 24:2-4.
5 Ame fe Iosefa, ketre api Aberahama, tre hnei angeice hna thupëne ekö la itre ewekë i Potifara. (Gen. 39:1, 2) Easa öhne e hnine la Tusi Hmitrötr ka hape, ame hë e thupen, ketre hetre atre thupë ewekë i Iosefa mina fe hë; nge kola qaja hnine la Tusi Hmitrötr ka hape, celë hi “ate thupëne la hnalapa i Iosefa” lai. Hnene la atre thupë ewekë cili, hna kapa lo itre trejine me Iosefa, me nyi hnyawa angatr. Angeice hi lo ka ce thë me Iosefa troa tupath la itre trejine me Iosefa, jëne lo inege sileva. Itre tulu hi lai nyine troa amamane ka hape, ame la atre thupë ewekë, tre ketre atr hna mejiune hnyawa kow hnene la maseta i angeic.—Gen. 43:19-25; 44:1-12.
6. Nemene la itre hnëqa hna athipe kowe la itre qatre thup?
6 Ame pena ngöne lo hneijine i Paulo, hnei nyidrëti hna cinyihane ka hape, itretre thupë ewekë fe la itre qatre thup. (Tito 1:7) Angatr a cilë mekene la itre ekalesia, ke qa i angatre troa thupëne “la hnënge mamoe i Akötesie.” (1 Pet. 5:1, 2) Isa hetre hnëqane la itre qatre thup e hnine la organizasio i Akötresie. E ca ekalesia, nyimu qatre thup ka huliwa thatraqane ej. Ame pena lo itre qatre thup ka iwai trootro, tre nyimu ekalesia hnei angatre hna huliwa kow. Ame la itre qatre thup ka sine lo Kometr Ne La Hnalapa Ne Thewe Huliwa, tre angatr a huliwa thatraqane la itre ekalesia asë ne lo itre nöje hna upi angatre troa thupën. Nge qa ne la itre qatre thup asë troa xom hnyawa la hnëqa i angatr, thenge la hnei angatre hna atrein; “ke itete troa qeje gelen” angatre koi Akötresie.—Heb. 13:17.
7. Nemene la ka amamane koi së ka hape, itretre thupë ewekë asë hi la itre Keresiano?
7 Nemene la ka amamane koi së ka hape, ame lo itre xa Keresiano, ngacama tha itre qatre thupe kö angatr, ngo itretre thupë ewekë fe hi angatre lai? Hna cinyihane hnei Peteru kowe lo itre Keresiano ekö, ka hape: “Loi e tro nöjei ate a inyihluekeu thenge la hna kapa la ahnahna hnei [angatr], tune la itete thupëne aloine la ihnimi gufa ka nyimu pengö i Akötesie.” (1 Pet. 1:1; 4:10) Kola mama la aqane lolone la thiina i Akötresie, ngöne la Nyidrëti a hamëne koi së la itre ahnahna, me itre loi me itre hna atrein, me itre talan, nyine tro sa huliwane matre troa xatuane la itre trejine me easë asë. Celë hi kepine matre kola qaja ka hape, itretre thupë ewekë i Akötresieti asë hi së. Nyidrëti a mejiune koi së, me wange atrunyi së, nge Nyidrëti fe a mekune ka hape, atreine hi së troa huliwane hnyawane la itre ewekë hnei Nyidrëti hna ahnithe koi së.
ITRE ATRE I AKÖTRESIETI SË
8. Nemene la nyine tro pala hi së, itretre thupë ewekë, a mekune hnyawa?
8 Tro sa pane ce ithanatane la köni ewekë nyine tro la itre Keresiano a lapa mekune hnyawa, ke kola amamane la pengö së, itretre thupë ewekë. Ame la hnapan, tre ene laka, itre atre i Akötresieti asë hi së, nge qa së troa trongëne la aja i Nyidrë. Hnei Paulo ekö hna cinyihane ka hape: “Tha ite ewekë i nyipunieti kö nyipunie . . . ke ase hë itö nyipunie hnene la thupen.” Hna itö së hnene la mele i Keriso, ke itre atr ka ngazo së. (1 Kor. 6:19, 20) Itre atre i Iehova ha së; qa ngöne lai, qa së troa drengethenge la itre hna amekötine hnei Nyidrë, nge tha jole menu kö troa trongëne la itre hna amekötine cili. (Rom. 14:8; 1 Ioane 5:3) Itre hlue i Keriso fe së. Ceitui së hi memine lo itretre thupë ewekë ekö hna qaja hnine la Tusi Hmitrötr, ke tha hna xom acone kö la mele së. Ngo ame pe, tha easë kö a isa kuci ajan, ke hetrenyi la itre hna amekötine nyine tro sa trongëne hnyawa. Cilëne ju hë së la itre hnëqa maine pë pena kö hnëqa së hnine la organizasio i Akötresie, ngo ame pe itre hlue i Akötresieti me Keriso asë hi së.
9. Nemene la hnei Iesu hna qaja matre troa inine kowe la itretre drei nyidrë la nyine troa kuca hnene la hlue kowe la maseta i angeic?
9 Easa trotrohnine jëne la hna qaja hnei Iesu, la nyine tro la hlue a kuca kowe la maseta i angeic. Hnei nyidrëti hna qejepengöne la ketre hlue ka bëeke hmaca kowe la hnalapa ne la maseta, thupene la hnei angeice hna huliwa ngöne la drai ka pexej. Tha hnene kö la maseta hna qaja koi angeice ka hape: “Canga trohemi ma xen!” Ohea. Öni nyidrëti pe: “Hnëkënejë eö la hnenge hna troa xen, nge sileju la otene hni ’ö me nyi hlue koi ni uti hë e ase hë ni xeni me ij ; thupene lai, eö pena a xeni me ij.” Nemene la ini hnei Iesu hna hamëne kowe la itretre drei nyidrë? Öni nyidrë: “Kete tui nyipunie, e asesë hë kuca la ite hna ahnithe koi nyipunie, öni nyipunie, ka hape, Eëhuni la ite hlue ka pë tropan, ase hë huni kuca la qâ huni troa kuca.”—Luka 17:7-10.
10. Nemene la ka amamane ka hape, Iehova a wange atrune asë la nöjei hne së hna kuca koi Nyidrë?
10 Loi e xeci hnyawa e kuhu hni së laka, Iehova a wange atrune la nöjei hne së hna kuca koi Nyidrë, ke öni Tusi Hmitrötr: “Tha thina ka tha meköti kö Akötesie mate troa thëthëhmine la huliwa i nyipunie, memine la ihnimi hnei nyipunie hna amamane kowe la atesiwa i nyidë.” (Heb. 6:10) Ame la hnei Iehova hna upi së troa kuca, tre hmeku së hi lai. Nge ketre nyine loi koi së la itre hna amekötine cili, nge tha ka jole menu kö troa trongën. Ngo loi e tro pala hi sa lapa mekune lo hnei Iesu hna qaja ka hape, ame la hlue tre, tha sipu aja i angeice kö la hnei angeice hna thele troa eatrën, ngo aja ne la maseta i angeice pe. Ceitune hi lai me easë, ame la easa nue la mele së koi Akötresie, easë hi lai a iëne troa amë panëne la aja i Nyidrëti ngöne la mele së. Hapeu, aqane waiewekë i nyipunieti fe hi lai?
HNËQA SË ASË QAATHEI IEHOVA
11, 12. Nemene la thiina nyine tro sa hetreny? Nge nemene pengöne mele nyine tro sa xom?
11 Ame la hnaaluene ewekë nyine tro la Keresiano a lapa mekune hnyawa, tre ene laka, casi hi la itre hna amekötine hna acile thatraqane la itretre thupë ewekë asë, nge qa i angatre troa drengethenge. Nyipici laka, itre xan a cilë hnëqa ngöne la organizasio i Akötresie, nge tha ka cilë hnëqa kö itre xan. Ngo casi hi la itre hna amekötine hnei Akötresieti koi së asë. Ka tune la troa ihnimikeu, qa ne la nöjei hlue i Iehova asë troa trongëne la wathebo cili. Ase hë Iesu qaja ka hape, tro la itre atr a wange atrehmekune laka, itretre drei nyidrëti së, hnene la aqane ihnimikeu së. (Ioane 13:35) Ngo tha tro kö sa hnime hmekuje hi la itre trejine me easë. Loi e tro fe sa catre hnime la itre atr ka tha nyi hlue i Iehova kö. Tha ewekë ka jole kö troa trongëne la hna amekötine celë, nge ketre, qa së hi lai.
12 Hnei Akötresieti fe hna upi së troa kuca la itre ewekë ka meköt, me thipetrije la itre ewekë ka ngazo hna qaja hnei Tusi Hmitrötr. Ka tune la itre thiina hna qaja hnei Paulo; öni nyidrë: “Ame angete nyi xetë, me itete thithi koi idola, me angete kuci ngazo, me angete hni koi fö, me itete qene sodoma, me ite ate kë’nö, me angete meciun, me angete hmo hnei ka hait, me ite cateqë, me angete thepe mo, tha tro kö angate a hane sine la baselaia i Akötesie.” (1 Kor. 6:9, 10) Tha ka hmaloi kö la troa kuca la ewekë ka meköt, tune la hna upi së hnei Akötresie. Ngo e tro sa trongëne la itre hna amekötin, tru catre la itre eloin. Egöcatre hi së, nge lolo la aqane imelekeu së me itre atr, nge catrecatr mina fe la aqane imelekeu së me Akötresie.—E jë la Isaia 48:17, 18.
13, 14. Nemene la hnëqa hnei Akötresieti hna hamëne kowe la itre Keresiano asë? Nemene la aqane tro sa goeëne la hnëqa së cili?
13 Ame la atre thupë ewekë, tre hna thue qa i angeic. Ka ceitune hi lai me easë enehila, ke hnei Akötresieti hna pane hamëne koi së la ketre ahnahna ka tru catr. Hnei Nyidrëti hna amamane koi së la nyipici. Celë hi kepine matre, Nyidrëti a ajane tro fe sa inine koi itre xane la nyipici. (Mat. 28:19, 20) Easa e ngöne la ketre tus i Paulo ka hape, itre hlue i Keriso la itre Keresiano, me “itete thupëne la ite ewekë ka sihngödi Akötesie.” (1 Kor. 4:1) Atre hi Paulo ekö ka hape, hna ahnithe koi nyidrëti la “ite ewekë ka sihngöd,” ene la itre trenge nyipici qa hnine la Tusi Hmitrötr, nge qa i nyidrë troa tro fë me inine la itre atr la itre trenge nyipici cili. Kolo hnëqa lai, hnei Iesu Keriso Maseta i nyidrë hna ajane tro nyidrëti a kuca.—1 Kor. 9:16.
14 Ame la easa inine koi itre atr la itre trenge nyipici, hatrene hi lai laka, easa hnimi angatr. Isapengöne kö la itre hne së hna atreine kuca ngöne la huliwa ne cainöj, ke isapengö së kö, nge isa aqane mele së kö. Atre hnyawa hi Iehova lai. Qa ngöne lai, kuca asë jë pe së la hne së hna atrein. Aqane tro hi së lai a amamane la nyipi ihnimi së koi Akötresie me koi itre atr.
NYIPI EWEKË TROA HULIWA NYIPICI
15-17. (a) Pine nemene matre nyipi ewekë tro la atre thupë ewekë a huliwa nyipici? (b) Nemene la hnei Iesu hna kuca göi troa amamane la ewekë ka troa traqa, e ngazo la aqane huliwa?
15 Nyipi ewekë tro sa huliwa nyipici, nge troa mama lai qa ngöne la aqane idrengethenge së. Ame la atre hna upe troa thupë ewekë ngo ka tha idrei kö, maine tha eatrëne pena kö la itre hnëqa hna athipe koi angeic, tre ka gufa la itre hnei angeice hna atreine me thiina ka loi angeic. Nyipi ewekë catre kö la troa huliwa nyipici, matre atreine angeice troa eatrëne hnyawa la hnëqa hna ahnithe koi angeice hnene la maseta i angeic, me amadrinë nyidrë. Lapa mekune ju së la hnei Paulo hna cinyihan, kola hape: “Qâ i angete thupë ewekë troa isa nyipici.”—1 Kor. 4:2.
16 Maine tro sa huliwa nyipici, ka xeci hnyawa e kuhu itre hni së ka hape, tro Akötresieti a amanathithi së. Ngo maine tha huliwa nyipici kö së, atre hi së ka hape, tha tro jë pi kö së lai a amadrinë Akötresie. Kola jelenyipicine lai hnene lo ceitune i Iesu, ka qeje itre talan. Hnene lo maseta hna qaja aloine lo itre hlue i nyidrë ka “itö” ka huliwane hnyawane la manie i nyidrë; celë hi matre hnei nyidrëti hna nyi thupe i angatre hnyawa. Ame pë hë lo hlue ka tha hane kö idrei, tre hnei nyidrëti hna jele ngazo thiina angeic, me geny, me pë hnënyöngön. Goi xometrije fe nyidrëti lo talane qaathei angeice me upetriji angeic.—E jë la Mataio 25:14-18, 23, 26, 28-30.
17 Ase hë Iesu amamane ekö jëne la ketre ceitun, la ewekë ka troa traqa e ngazo la aqane huliwa; öni nyidrë: “Dei lai kete ate tena mo, ka hete ate thupën ; hna qeje nyëne kowe la tixe i nyëne laka nyën’a mejengöne la ite ewekë i nyidë. Nge nyidëti a hë nyëne me hape koi nyën, Hape ue la hnenge hna denge göi ’ö ? qajajë la pengöne la aqane thupëne hnei ’ö ; ke tha tro hmaca kö eö a thupën.” (Luka 16:1, 2) Hnene la atre thupë ewekë hna aluzine la itre ewekë ne la maseta i angeic; celë hi kepine matre nyidrëti a upetriji angeice pi. Kola ini së hnene la ceitune celë la ketre mekune nyine tro sa wange atrune hnyawa. Loi e tro pala hi sa huliwa nyipici, ene la troa kuca la hna atreine matre eatrëne hnyawa jë së la itre hna amekötine hnei Akötresieti koi së.
HAPEU, KA LOI JË KÖ TROA ITUPA HULIWA?
18. Pine nemene matre tha loi kö tro sa itupa huliwa?
18 Nyipi ewekë tro sa isa hnyinge ka hape, ‘Tune kaa la aqane xome ni la hnëqa ne atre thupë ewekë?’ Ngo tha tro pi kö sa itupa huliwa. Kola qaja hnei Tusi Hmitrötr ka hape: “Loi la nöjei ate troa isa tupa huliwan, ame hna hetenyi angate la nyine amadine qa thei angate kö, ngo tha qa thei kete kö.” (Gal. 6:4) Haawe, loi e tro sa thele troa isa maca ngöne la aqane huliwa së, me kuca la hne së hna isa atrein. Maine tro sa ujë tune lai, tha tro kö a cia the së la pi mama, nge tha tro pena kö a patre qaathe së la madrin. Nge the thëthëhmine kö së ka hape, troa saze la aqane mele së. Maine jë troa tithi së hnei mec, nge tro fe së lai a hane qatre trootro, maine pena hetre itre xa jole hne së hna troa thu. Nge pine la itre ewekë cili, tha ijije hmaca kö tro sa kuca enehila lo itre hne së hna atreine kuca ekö. Ame pena itre xa ijin, ame ju hi la kola saze la aqane mele së, tre ijiji së jë hi troa kuca la itre xa hnepe huliwa ka tru. Haawe, ijine tro hi së lai a huliwa atruny.
19. Pine nemene laka, tha tro kö sa canga nanazij, e tha hna canga athipi hnëqa së kö ngöne la ekalesia?
19 Tha tro kö sa itupa huliwa memine la itre ka trene hnëqa, me piine menune la itre hnëqa i angatr. Pane xome jë së la ketre ceitun; maine kola ajane hnene la ketre trejine trahmanyi troa xome la hnëqa ne qatre thup, maine kolo pena ajane troa cile fë cainöje ngöne la itre ijine asabele, tre tha ewekë ka ngazo kö lai. Ngo maine tha hna canga hamëne kö koi së la itre hnëqa hne së hna ajane tro cilën, tre tha tro kö sa nanazije pine la ewekë cili. Ame itre xa ijin, tha canga trotrohnine kö së la kepin, ngo ame pe hetre nyipi kepine matre easa pane itreqe, qëmekene la troa hamëne koi së la itre xa hnëqa. Pane mekune hmaca jë së lo pengö i Mose: maine jë hnei nyidrëti hna mekune laka, ijije hë tro nyidrëti a canga tro Aigupito eë matre troa amelene la angetre Isaraela. Ngo hnei nyidrëti hna pane itreqe koi 40 lao macatre qëmekene tro nyidrëti a eatrëne la hnëqa hna ahnithe koi nyidrë. Itre macatre ne nyidrëti lai a pane thele troa eëne la itre thiina ka loi, ka troa xatua nyidrë troa elemekene la ketre nöje ka pi tru me catreqë.—Ite hu. 7:22-25, 30-34.
20. Nemene la hna ini së hnene la tulu i Ionathana?
20 Maine jë, tha tro fe kö a hane thue hnëqa së ngöne la ekalesia. Celë hi ewekë lai hna melëne hnei Ionathana ekö. Angeice lo nekö i Saulo, nge maine ju, angeice la ka troa joxu hui angetre Isaraela. Ngo hnei Akötresieti pe hna iëne la ketre nekö trahmanyi ka co kö hui Ionathana; Davita la ëje i angeic. Nemene ju hë la hna mekune hnei Ionathana? Hnei angeice hna kapa la aqane ië ewekë i Akötresie, nge xönë fe hi angeice ekö troa mec, pine xatua Davita. Öni angeice koi Davita: “Tro nyipëti a joxu ne Isaraela, nge tro ni a hnaaluene fe i nyipë.” (1 Sam. 23:17) Nemene la hna ini së hnene la tulu i Ionathana? Tha hnei angeice kö hna qeje ejolene la aqane ië ewekë i Akötresie göi angeic, maine zalu koi Davita pena, tui Saulo. Haawe, ketre tu së mina fe, tha tro kö sa zalu pine la hna athipi hnëqa i itre xan, nge tha hane pë hë thue hnëqa së. Loi e tro pe sa kapa me kuca la hne së hna atrein, göi troa eatrëne la itre hnëqa hna hamëne hë koi së. Tro fe sa lapa mekune ka hape, ame hë elany ngöne la fene ka hnyipixe, tro Iehova a kapa la itre aja ka loi ne la itre hlue i Nyidrëti asë.
21. Tro sa goeëne tune kaa la hnëqa hna ahnithe koi së hnei Akötresie?
21 Loi e tro pala hi sa mekune laka, easë la itretre thupë ewekë i Akötresie, ngo tha maseta ka ithahluë kö Nyidrë, maine ka iqanangazo pena. Nyidrëti pe a mejiune koi së me wange atrunyi së, jëne la hnëqa ka draië hnei Nyidrëti hna ahnithe koi së troa eatrëne ngöne la hneijine la pune la fene celë. Hnei Nyidrëti hna upi së troa cainöjëne la maca ka loi enehila, nge tha tro hmaca kö a kuca la huliwa cili epin. Tha hnei Iehova kö hna ami ifegone la aqane tro sa eatrëne la itre hnëqa së. Haawe, catre pi së troa huliwa nyipici. Nge the thëthëhmine kö së laka, manathithi ka tru la troa nyi hlue i Iehova, atre cilëne la hnëqa ka draië catre ngöne la hnengödrai me fene hnengödrai asë.
[Thying]